三陰性乳癌 － 係咪真係咁惡？
醫生話我係三陰性乳癌，我聽完真係一頭霧水，上網查又話好惡，究竟三重陰性乳癌有咩特性？點樣治療？復發率係咪高D？有冇咩食療？⋯⋯
三陰性乳癌特性
「究竟咩係三陰性乳癌？」
首先，要明白三陰性乳癌（triple negative breast cancer）係講緊侵蝕性癌，原位癌係冇分三唔三陰嘅（因為HER2係原位癌唔重要），如果你係原位癌，呢篇可以唔洗睇。
「咁我點先知我係咪侵蝕性乳癌？」
手術前，就要靠抽粗針。
手術後，就睇返切出黎嘅手術標本。
「醫生話我有侵蝕性呀，咁咩係三陰性呢？」
三陰性照字面拆，就係「三重」「陰性」。唔好一聽到個「陰」字，就諗怪力亂神／養鬼仔／陰氣好重嗰D神怪野。其實好簡單，「陰」者，「冇」也。
三陰性即係三樣人有嘅野你冇。
「咁係邊三樣野人有我冇？」
就係你成日聽人講／成日比病友問嘅：
1）荷爾蒙雌激素受體Estrogen receptor（ER）：即係ER－
2）荷爾蒙黃體素受體Progesterone receptor（PR）：即係PR－
3）標靶受體HER2：即係cerbB2 score 0/1，或者cerbB2 score 2及FISH test negative。
冇咗呢3樣野，乳癌就會好似沒女咁，人有嘅野你冇，沒樣貌身材、沒青春、沒家底成就，條路自然難行D。
「即係冇得醫？？」
沒女都可以大翻身，三陰性乳癌點會冇得醫，不過今次唔係靠TVB。
圖片來源：TVB沒女大翻身截圖
三陰性乳癌治療
「究竟三重陰性乳癌應該點樣醫？」
又係老規矩，首先要知道自己屬於第幾期：
乳癌一期 － 我係咪第1期？
乳癌二期 － 我係咪第2期？
乳癌三期 － 我係咪第3期？
乳癌四期 － 我係咪第4期？
再對號入座，睇返相應嘅攻略，就大概知點做：
乳癌一期治療攻略 － 早期都要做化療？
乳癌二期治療攻略 － 做手術先？做化療先？
乳癌三期治療攻略 － 醫好機會大唔大？
乳癌四期治療攻略 － 末期仲有冇得醫？
「睇完都唔係好明，可唔可以再講多D？」
乳癌治療5寶（手術、化療、標靶治療、電療、荷爾蒙治療）今次比人廢咗2寶（標靶治療／荷爾蒙治療），因為三陰性乳癌都冇標靶受體同荷爾蒙受體。簡單D講，即係同標靶藥／荷爾蒙藥唔夾，所以冇得用／唔洗用。
「咁少咗法寶對付佢咪好弊？」
係就係麻煩D，難D箝制佢。不過做人最緊要積極，所以我地應該阿Q啲咁諗，好處係慳返二十幾萬標靶錢，同埋唔洗食幾年藥。
「咁係咪要做齊晒手術、化療、電療？」
唔係一定要做晒。手術必做，化療好多時都要，電療就睇情況。
三陰性乳癌手術篇
手術依舊係主力，如果係一至三期就一定做。
「手術有咩揀？」
手術2大部份：乳房同埋腋下淋巴都要做。
乳房：局部切除vs全乳房切除加減乳房重建。
腋下淋巴：前哨淋巴vs全淋巴切除。
乳癌手術 1 － 開刀我有咩可以揀？
乳癌手術 2 － 保留乳房手術 ，我做唔做得？
乳癌手術 3 － 保留乳房手術 ，我揀唔揀好？
乳癌手術 4 － 乳房重建手術 你要知
乳癌手術 5 － 前哨淋巴結活檢術？咩黎㗎
乳癌手術 6 － 專做乳房手術醫生的增值服務
義乳的秘密 － 重建乳房手術外的另一片天
三陰性乳癌化療篇
化療呢就好多時都要做（就算一期好多時都要，除非真係早期中嘅早期，腫瘤超細而淋巴又冇受影響，先考慮唔洗做）。因為一來我地知道，三陰性乳癌同化療係好夾嘅，反應會比一般非三陰性乳癌好。二來因為已經讓人車馬（冇標靶治療／冇荷爾蒙治療），冇理由剩落黎嘅法寶都唔用。
乳癌化療需知 － 我洗唔洗化療？
乳癌化療時間 － 手術前做？手術後做？
乳癌化療需唔需要 － 著數計算機火併乳癌基因測試
乳癌化療AC針TC針 － 乜藥黎㗎？
乳癌化療選擇 － 咁多組合點樣揀？
乳癌化療費用 － 要用幾多錢？貴唔貴？
乳癌化療療程 － 吊針過程大公開
乳癌化療甩頭髮 － 點處理？幾時生返？
乳癌化療嘔吐 － 終極止嘔藥
乳癌化療副作用 － 辛唔辛苦？點處理？
乳癌化療期間之飲食 － 點補身？洗唔洗戒口？
三陰性乳癌電療篇
電療呢就同一般乳癌冇分別，都係嗰4個情況先電。邊4個情況就詳見乳癌電療大解構－原來唔洗驚
三陰性乳癌復發率
「三陰性乳癌係咪好易復發？」
呢個問題要分兩方面去睇，局部乳房復發黎講，三陰性乳癌同其他類型冇分別。
但一講到轉移，無可否認三陰性乳癌的確係易D轉移去其他內臟器官。
「咁實際三陰性乳癌復發率係幾多？」
人人期數唔同／情況唔同，好難簡單咁比一個實際數字你。我只可以講呢個風險會隨住時間慢慢減退，即係五年冇復發當然會好過一年冇復發，而十年冇復發又會好過五年冇復發。（唔好唓住，係，我知我咁講係好廢，但你諗深一層其實係有意思嘅。）
三陰性乳癌食療
「咁有冇適合三陰性乳癌嘅食療㗎呢？」
乳癌食療呢個問題次次都一定係最多人關心嘅，唔好消息就係「三陰性乳癌係冇食療嘅」，好消息就係「你唔洗戒口囉」。
你成日都會聽人講，乳癌病人要戒食雞／戒豆漿／戒豆腐，其實講黎講去，背後原理都係怕食物中嘅女性荷爾蒙（雌激素）會刺激乳癌生長。但你而家正正係咩都冇嘅沒女麻，你隻三陰性乳癌對荷爾蒙根本就冇反應（唔會受男人刺激），連抗荷爾蒙藥醫生都唔洗你食，仲戒咩口姐。
「我有個疑團一直未解開，外國的三陰性乳癌患者很多會食aspirin, 但香港就冇聽過有人食aspirin，究竟有冇用㗎呢？」
人地外國病友食aspirin呢樣野，係基於一D研究話係老鼠實驗中，好似aspirin有D用，D人咪一窩蜂衝到去食。其實我就唔鼓勵咁食法，一來係人身上係咪真係有用根本唔知（距離終極答案仲有好遠嘅路要走），但另一方面，食aspirin係有風險嘅（嚴重可以胃出血，甚至致命），所以一來一回，我都係建議睇定D，唔好亂咁試好D。
三陰性乳癌專頁
最後介紹一個外國專講三陰性乳癌嘅網頁 http://www.tnbcfoundation.org/，雖然好多佢提到嘅新發展仲係研究階段，大家未必用得著，不過最緊要嘅係佢為病友同家人精神上帶來「愛乳希望」。
下次同你講吓叧一個好熱門嘅乳癌種類：「乳癌類型巡禮 － 與你細數HER2型乳癌的歴史」⋯⋯
香港乳癌及乳病治療中心 
您好，你的文筆非常幽默而且全面，可以得到很多資訊，謝謝。
現在非常擔憂，我媽媽今年53歲，在1月4日摸到左邊乳房上面有硬塊，去照了超聲波，有一粒2.幾cm的腫瘤，之後轉介到港安乳房中心做了抽幼針，結果是乳導管癌，1月18日入院做了乳房造影，報告都只是一粒腫瘤，19日就做了手術切除，同時割了2粒前哨淋巴，化驗結果無擴散，定為T2N0,1月30日外科醫生睇完報告說荷爾蒙無受體，說明之後治療唔可以食藥，要化療，但好彩嘅係Her2都係0，唔使用標靶，醫返機會有九成，而且復發嘅機會好低，但點知今日去見腫瘤科醫生說是是三陰，擴散機會快，真的是晴天霹靂，心情沈重。安全了2月3日去做腦磁力共振同正電子掃描睇可全身有無擴散。而原本排左期2月23日去瑪嘉烈見腫瘤科打算在政府做電療化療，但今天醫生說太耐了，三陰擴散得快不能等那麼久，建議我們在私家做，現不知怎麼辦。
同時又在想其實1月30日見外科醫生時他應該都知報告是三陰，但為何還說醫返機會有九成，而且復發嘅機會好低？另外手術前他說會割3粒前哨淋巴來做化驗睇有無擴散，但最後只割了2粒，結果會有差別嗎？
另外今天腫瘤科醫生說我媽咪雖然是三陰，但好彩是個腫瘤生得高，算早發現，真的是早發現嗎？另是否擴散機會很大？會否是由其他器官擴散去的？
另想問一問媽咪以前有打開避孕針與此有關嗎？
現心情非常㥬惶。
其實好多野都係相對概念：早與遲、醫返機會／復發機會高定低等等⋯⋯
「喺瑪嘉烈醫院見腫瘤科係早定遲？係咪唔等得？」
如果同私家比，當然係遲，私家嘅一大賣點就係「快」。如果同其他政府醫院比，係正常時間，一般黎講，喺政府醫院做手術，兩星期後先睇病理報告，有需要再轉介腫瘤科時，再起碼排兩個星期。咁係咪拖咗好耐呢？又唔係，因為有時有D野唔急得，例如都要等傷口埋口先可以化療，呢度本身都要二至四星期。如果一個唔好彩，傷口有併發症，例如發炎／唔埋口，要等耐D添。如果媽媽嘅情況同呢D病友比，係早添。因此你問早定遲，真係相對概念，睇下你同咩人比。手術後化療嘅大方向就係「情況合適就盡早做」，手術後唔等多過三個月都叫「可接受」，不過現實係哪怕只叫病人等多一日，大部份病人都認為「不可接受」。
因此，心急又負擔得起嘅，去私家做。想快又唔想洗太多錢嘅，去私家打咗第一針先，下一針三星期後都已經等到政府醫院見醫生，之後嗰D針喺政府打埋去。唔心急又想慳錢嘅，等政府啦。
「點解外科醫生同腫瘤科醫生嘅講法咁唔同？」
一個硬幣有兩面，同一件事睇吓你點睇，冇話邊個啱曬／錯曬，睇吓醫生選擇報喜定報憂。假設醫返機會九成、一成機會復發咁先算。你搵外科醫生做咗手術，咁佢梗係話：「恭喜你手術成功，醫返機會九成」，唔通會話：「你搵我做手術就慘喇，有一成機會會復發㗎」，你會唔會讚佢誠實吖？你只會心諗：「仲咩搵你做手術」，事實係「手術係成功嘅，不過唔代表唔復發」。去到見腫瘤科醫生，評估認為你要做化療，咁佢想說服你，梗係話：「你復發機會高（一成），都係做埋化療好D」，唔通會話：「你九成醫好咗㗎喇」，你唔心諗：「咁我仲咩做化療？」，事實係「化療可以幫助減少復發」。
「究竟喺早定遲發現？醫返機會／復發機會高定低？」
又係相對概念，相比第零／一期嘅人，係遲發現／醫返機會低／復發機會高，相比第三／四期嘅人，係早發現／醫返機會高／復發機會低。你會睇到，強行去比較，尤其係一D控制唔到／過咗去嘅野，就好似家長比較小朋友嘅成績一樣，其實係無意思。我地對眼生係前面，係因為做人係要「向前望」嘅。
前哨淋巴冇一個定數要割幾多粒，手術中搵到幾多粒就切幾多粒，兩粒好合理。
避孕針同三陰性乳癌無關。
真的很感謝你這麼快回覆，謝謝
現應會在私家打第一針，不過都係要等聽日去照左腦mri同全身正電子掃描，睇埋結果同抽血驗埋肝，照埋心電圖先再決定。
祝一切順利。
醫生你好。感謝你在百忙之中抽空提供寶貴資訊令我在睛天霹靂之時有渠道解開我種種疑團。我媽今年57歲，在半個月前確診為t2 n1 m0三陰性乳癌。主診醫生認為應先化療後手術亦提供了3個方案，包括文中提到的TAC, taxol+epirubicin+ carboplatin, 先打taxol+ carboplatin後打 doxorubicin+cyclophosphamide. 醫生認為carboplatin對BRCA gene mutated比較有效，亦提議可以到私院抽血等4~5星期有報告。等報告期間就由TAC開始如BRCA positive就轉TEC。請問以上三種療法對BRCA negative既pathological complete response rate數字同副作用既差别?為何第3種方案會較小用？是副作用問題？現階段應做BRCA test嗎？另外ct report提到懐疑thyroiditis.家族中亦有人大頸泡，請問會影響治療嗎,？感謝你的耐心閱讀並期待你的答覆。
你都好厲害吓，我係第一次有人問我pathological complete response rate（pCR），其實每一種組合嘅pCR已經難搵，仲要咁specific講到BRCA negative嘅三陰性乳癌，以我所知係冇大型數據。一般黎講，三陰性乳癌打術前化療，大概有30-40%嘅人可達到pCR。
第三種方案少人用，係因為缺少大型研究數據去支持咁樣打，已經去到腫瘤科醫生結合不同研究數據加個人經驗嘅自選打法。叫得自選，自然好似武林秘笈咁，人人唔同冇統一。
有錢都值得做BRCA test嘅，大概有2成嘅三陰性乳癌係BRCA positive。
Thyroiditis要抽血驗甲狀腺功能先知影唔影響治療，如果甲抗（thyrotoxicosis）係可以影響手術麻醉嘅風險。
感謝你迅速既回覆。回覆中曾提及平均pCR係30~40%，請問現今數據中TAC會比TEC更有效嗎？如若大家都是差不多既pCR,TEC俾我既感覺係加左carboplatin咁咪更加有多2成機會對病情有幫助？同時想請問如果由TAC中途轉TEC會對療效有影響嗎？我曾看到有文章提及如cisaplatin係加係其它chemotherapy後會將pCR大大降低？同如taxol每星期打既副作用會減少同時提高療效？除此之外亦想了解香港有無做clinical trial研究PARP inhibitor or EGFR係TNBC既作用？佢地都係作為second line既treatment?或只係用在metastatic TNBC?再次多謝你寶貴既意見。
冇直接對頭對比TAC同TEC邊個好D，我地係當佢地差不多咁睇。同日常生活的東西一樣，如果有一個特別優勝，另一個就已冇存在空間（即係壟斷）。
Carboplatin係理論上夾D BRCA mutation，不過現實係我們需要數據去支持呢個想法。所以就算幫到，分別一定冇2成咁多，有5%已經係驚天大發現，即係20個人有1個有分別已經誇啦啦，好有可能你媽媽係感受／享受唔到分別，所以唔洗過份執著／迷思邊一個好D。同一道理，中途轉分別只會更細。
Taxol每星期打係好過每三星期打一次。
據我所知，香港冇三陰性乳癌PARP inhibitor／EGFR嘅trial。佢地連second line都唔係，係研發中嘅藥（investigational drug），係咪真係有用都仲未知。要試藥，當然係metastatic setting試先，因為冇野輸。
多謝你的耐心回覆。雖明白各方案自有利弊，但作為家人唯有盡力搜集資料以助她做令她安心的決定亦已預約明天開始chemo.再次衷心感謝你的意見
醫生你好。我姊姊，今年剛好60歲，約3-4個月前，胸部出了一個瘤，現在還破了皮及出血，並且還逐漸大了。
從7月初到QE看醫生，在這一個多月沒有藥食及沒有藥查。血仍是流。到覆診時，醫生話是第4期。現在等QE排期做掃瞄確定有沒有擴散及做化療，醫生說因瘤大了，要做化療先，待瘤細了才做手術。我姊姊很擔心不知接不接受到化療。請問現在之化療藥是否沒有太大副作用呢?中醫可否醫治?
化療係有副作用嘅，不過姊姊情況嚴重，腫瘤已經蝕咗出黎同埋出血，做化療喺最合理嘅治療。如果嫌QE等得耐仲未有治療，可以去私家開始咗化療先，打咗一兩針到等到QE時，先返去繼續治療。
中醫唔得嘅，除非西醫投降，如果唔係唔好試住。
謝謝，康復了六年，昨天先知自己當年患的係三陰性乳癌………我真無知了……提多個三陰性好處，康復後可以生仔?
醫生你好，媽咪上個月確診乳癌，腫瘤2.5cm，11月3日在私家醫院進行保留乳房的手術，先哨淋巴檢驗下發現癌細胞並沒有轉移至淋巴，故不用切除淋巴。其後，腫瘤的化驗報告顯示，媽咪屬二期乳癌患者，但腫瘤毒性強，是三陰性乳癌。根據化驗報告，腫瘤屬grade3(score9/9)，ki67 index是50%。到QE排期進行化療，醫生開出ACX4或TCx4的方案。QE開出方案後，我帶她到私家腫瘤科醫生求診，醫生認為QE方案對於三陰性乳癌患者，尤其是GRADE3的腫瘤太保守，建議TACX6的方案。以上方案哪個較適合媽咪的情況？請問政府醫院也可以打TACX6嗎？病人可以再向QE要求進行TACX6的療程嗎？感謝醫生!!!!!!
我傾向QEH嘅TTCx4。
政府醫院也可以打TACx6，不過留返比更惡嘅腫瘤，例如第三期乳癌，好多淋巴受影響。
可以向QEH要求，不過佢滿唔滿足你嘅要求係另一回事。
5月20 号確診, 6月2做手術, 琴日病理報告出咗,係 3陰, 右邊乳房tumar size 2.7 cm, grade 3, ki67 80%, 局部切加切咗7粒淋巴結(無擴散), pet scan result無擴散, 請問:
1) 我想做腦 mri, 因為pet scan無包腦, 我有D頭痛, 可能心理作用, 值唔值得做?
2) 我 knee確診前有痛,須唔須要另外check?
3) BRCA test 值唔值得做? 如化療前做, 會唔會太耐? 我啱啱生完龍鳳胎 (佢地依家6個月), 呢個test係咪會indicate遺傳風險? 可以去邊度做?大概幾多錢?
4) 威院第一次期係7月6, 之後大概幾耐開始化療? 會唔會太耐?
5) 我呢個情況一般做咩化療? 等政府會唔會太耐? 去私家打第一針大概咩價錢?
6) 我呢個情況, 復發機率有幾多? 預後我應該點做?
7) BB變咗高危, 以後應該点monitor住?
唔該哂!!
1）如果有頭痛可以考慮照，不過淋巴同其他地方冇擴散，單獨腦擴散（isolated brain metastasis）的機會不高，即係照MRI揾到野嘅機會唔大。
2）要視乎PET scan 照唔照到knee，照到就唔洗。
3）三陰性乳癌值得做BRCA test。一般快都要等幾個星期。BRCA test只可以話到比你聽你有冇機會經BRCA Mutation去遺傳乳癌／其他相關癌症比佢地，唔係百分百等同遺傳風險。私家就去養和醫院，公立就去東華醫院。如果自費要兩萬幾蚊。
4）唔知佢地條隊幾耐。
5）一般打TTCx4。等候時間政府間間醫院唔同。私家打針海鮮價。
6）幾多歲？點發現乳癌？有病徵？定係身體檢查發現？
7）先驗咗BRCA先下結論係咪高危。
Age 39, 先發現乳房有腫塊以為之前試餵母乳時乳線失所致
你條問題唔完整，幫你唔到。
分娩後確診，做緊術前化療。外科醫生一直以儘量保留乳房為目標。
其他資料：
Age 36
First ultrasound 2D: 4.69×4.57
T2N0M0
Grade3
ER2
PR0
Ki-67 70%
c-cerbB2 negative
PET scan : breast mass dimension 5cmx7cmx7cm; abutting the underlying pectoral is muscle and overlying skin.
化療前腫瘤一直分泌液體，試過幾次外科醫生抽走液體decompress。液體拎去化驗，我話係有inflammatory cells.
化療第一針打carboplatin + epirubicin + taxol, 一星期後複診，腫瘤科醫生覺得效果唔理想，因為腫瘤大咗，但軟咗好多。
第二針改咗打taxoter + epirubicin + cyclophosphamide ,而家已經打左五針。腫瘤科醫生一直都係話打六至八針呢一個組合，但我問佢點解決定六或八針，佢冇特別詳細解釋，只係話depends.
最近一次返外科醫生度照超聲波，tumour size 1.37cm x 1.85cm (2D); 相比第一次照聲波時4.69×4.57
問題一：請問到底係點樣去決定六針定八針？有咩基準？外科醫生決定定腫瘤科醫生決定？對癒後影響大嗎？
問題二：我係咪屬於下面所講炎性乳癌？http://www.cancer-fund.org/tc/cancer_news_402.html
如果係，係唔係全乳切除復發風險會低啲？
謝謝回答。
1）雖然主要係睇腫瘤對化療的反應，但其實係冇客觀基準，主要由腫瘤科醫生決定。到打完第六針時，有三個可能性：
a）腫瘤已經完全消失，當然直接做手術。
b）腫瘤細咗但仲係度，有D腫瘤科醫生會選擇打多兩針，希望將腫瘤再縮細D。有D就會選擇收手，因為打咗6針都縮唔曬，打多兩針分別都唔方大。
c）腫瘤曾經細過但有反彈跡象（大返），轉做手術，因為化療已經開始控制唔到佢。
2）炎性乳癌係一個臨床診斷，要問返醫生自己係唔係，其中一個主要條件係乳房皮膚三份一以上有發炎跡象（即係紅皮膚）。如果係炎性乳癌，係唔合適去保留乳房，全乳切除好D。
澳門好媽媽,57歲
2017.JUL.3-JUL.8 發現右乳腺黑白超聲—有一個6*4cm的硬塊.,再照X線 又說5.1*3.8CM
2017.JUL.12- 穿剌得出三陰浸潤癌. 澳門D醫生話要做一個全身CT… 怕抗散….請問個CM咁大….係HK 也是建議先做化療再手術嗎.另外媽媽堅持所有也到公立醫院.因為一切費用全免…但私家醫生建議自資打住一兩支化住先和照左CT先….我好擔心好擔心…其實CT 10000我還是可以的…問題是所有報告也是一星期一星期…我到底還有多先星期可以陪我媽等…之前醫生說3期有70%可以好的….但現在是三陰會不會多少D機會….我的媽才57…我不想失去她……..另外醫生話我也有機會是高危一族?我36歲….為什麼偏偏是她……她完全唔痛….所以發現到去看時已大得太快…..用CM計是3期吧…. 希望你可以給點意見…..如果HK做成功機會又如何.但之後D費用又……?????
你最好整一整理你的問題，跟唔到你的思路。
我65歲嘅媽媽於11月中確診有乳癌，醫生話個癌唔近乳頭，大概2cm，要做手術。原本我地一家人都係諗一了百了全乳切除，但護士話我媽比較豐滿，其實做局部都可以，傷口冇咁大同唔需要帶義乳；而我的考慮點係我媽媽曾做過腰骨手術，怕佢如果全乳切後唔勤帶義乳會影響脊骨，所以決定局部切。做之前自費照正電子掃描，都冇擴散。但當做手術當日，醫生（不同之前見果個）同佢解釋時話係三陰性乳癌，講到個癌係好惡，當下我覺得點解一早唔講，佢講咗可能當時我地未必揀局部。（呢個係我第一個迷團，點解醫生唔講？原位癌同侵蝕性癌同全乳/局部切完全冇關係？我覺得佢冇俾足夠資料我地作為考慮）。
冇辦法，當天就做手術。一個星期後覆診，佢話發現旁邊仲有啲癌未清，係原位癌（0.5mm from DCIS)，醫生建議再做一次手術切除。我唔明，點解之前又做正電子掃描又做前哨淋巴嘅檢查都唔知佢原來旁邊仲有癌細胞？醫生再次建議局部切除，咁如果再切之後又有喺旁邊，咁又要切？！我實在接受唔到家人要喺2星期內做2次全身麻醉手術，我有好多疑問！
如果當初佢解釋係三陰性，我地未必決定做局部！點解一直唔講直到做手術當日，另外一個醫生先講？！
而我亦想問，基本上患三險性乳癌，都要做化療？除非身體太虛弱？醫生到呢刻都答唔到，話要問番腫瘤科！
係咪三陰同手術點樣揀冇直接／密切關係，所以手術前冇必要知。
正電子掃描本身係用黎睇遠端擴散，睇乳房本身個spatial resolution 係唔夠，唔係用黎評估原位癌。前哨淋巴就評估淋巴，又係唔係用黎評估乳房原位癌。
如果再切都未清，自然要做第三次手術。
三陰性2cm要化療。
咁佢又有侵蝕性癌又有原位癌，咁今次仍然選擇做局部，會唔會比較高風險，再發現有癌症？
要臨床評估先知，冇得隔空估。
唔好意思，我仲想問，其實又侵蝕性癌又原位癌，呢個情況是否普遍？我實在擔心媽咪嘅情況。
普遍。
謝謝你嘅極速回應。多謝你！
每次做手術都要全身麻醉，作為家人都會擔心咁會唔會好傷身？我知冇人想，醫生都唔想，但作為病人/家人，果種感覺好沮喪…
可以避免的話，當然冇人想做兩次手術。但如果真係需要做兩次手術去切清癌細胞的話，傷唔傷身已經變得好次要，有得揀咩？
你好醫生，
家母今年62歲，12月15日做了mammogram+ultrasound，12月18日再做ultrasound guided core biopsy ，histology report說是invasive ductal carcinoma, probably grade 3
外科醫生建議再做tumor marker,另加pet ct whole body +mri brain
到29/12 pet ct 和mri報告回來說沒有擴散，另外 tumor marker的報告則顯示是三陰，Ki-67index 85%，排了9/1 見QE的 oncologist，以下有幾個問題想問,
1) 是否是要再做mri breast 才知道乳房其它位置有沒有擴散？
2) 其實我到現在看了這麼多report都不知道期數，只有在biopsy 的histology report 裡看見grade 3 probably，其實還有你說pathology report會提及的tumor size, lymph node metastasis 和lymphovascalar invasion我都沒有看見，是要怎樣才可以知道?
3) 要知道有沒有擴散到淋巴是否要到術前的sentinel lymph mode biopsy才知道？
4) 做BRCA test是否可以根據結果試用platinum agent如cisplatin,carboplatin,以增加治癒機會？
5) Ki67指數好像頗高，我擔心要到9/1才見到QE的oncologist後又不能即時做chemo,之後又可能要評估心臟，肝功能才可以開始chemo,我擔心會令病情拖延，你會否建議我們先到私家醫生開始第一針，然後才到QE繼續療程？
謝謝，非常感激
1）不用MRI，mammogram同ultrasound已經足夠。
2）實際tumor size 同lymph node metastasis要做完手術先知。手術前只可以靠造影去評估。
3）最準都係sentinel lymph node biopsy 。
4）可以咁理解。
5）如果可以，當然最好，不過今日都6號，QE個期唔會比私家慢好多。
醫生我好驚我阿媽是3陰性
我希望我可以跟他一起三四十年
化療做8次會不會對病情有影響
醫生叫得做，就應該有正面影響。
冇咩實質野可以答你。
我媽咪是早期的三陰性乳癌無轉移到請問復發的機會會不會低過其他三陰性病人有什麼方法可以減低復發率。
低過晚期。定期檢查。
sister, 我媽都確診左乳癌二期，我都好擔心我媽，
我感受同你一樣，想媽媽陪多我二十，三十年，我都覺擔心，
但我覺我是媽媽的精神支柱，我應該不可以太驚，要鎮定，
要樂觀感染媽媽，大家齊齊加油！
我暫未知是否三陰性乳癌，要去醫院見醫生再check,
要加油，要堅強臉對！
你好
姐姐之前確診乳癌II期，做左局部手術切除，之後切片檢查tumour size 2.1mm, invasive ductal, 無擴散到淋巴位置， 但係就係TNBC
已經開始左化療，完成左4針Q2wks 嘅AC 同埋打左2針Q3wks嘅T針，但係姐姐覺得太辛苦，想唔打之後2針T針，想問下咁樣對於D之後嘅relapse rate會唔會有好大影響？
謝謝
2.1cm定2.1mm？
2.1cm
冇實際數據，不過都已經打咗6針，照估就唔大影響。
你好 !醫生哥哥!!
首先, 醫生的網站寫得好風趣，生動, 特別沒女果part 我真係笑左出來,
(雖然好似好衰, 吾多尊重, 始終依個網站所講的資訊都好沈重)
事先聲明，本人不是患乳癌者，只是家母今年60歲懷疑患乳癌!!
今個星期初已經做左乳房攝影及BIRADS診斷 (Mammogram-ACR BIRADS),家母有5粒腫瘤發現,
其中一粒都有成26mm長, 最慘是有一粒好細的生在腋下淋巴結到,
而且BIRADS 評估出左報告, 有兩粒4A, 有兩粒是4c, 仲有粒寫住ill defined hypoechoic area, doppler -ve,
又有咩irregular, indistinct MMG Lesion doppler -ve, posterior shadowing,
又有粒vague glandular distortion, doppler +ve , may correspond to MMG distortion,
我不是醫生， 當然不知道點解讀，但上網查，
人地話ill_defined, 而不是well_defined, 你就要小心啦！！
所以我情況都不是太樂觀！
醫生說單靠Mammogram-ACR BIRADS係吾準，建議叫我地做埋刺針檢驗！！
我地都倣左３枝幼針， 加一枝粗針（最可疑果粒做），
佢話再等報告出先可以判決結果！！
我同家母感情要好， 令我都十分擔心， 全家都心情忐忑不安！！
一星期後就會知結果， 好緊張，好不安，
１． 請問我家母患癌機會高嗎？？
２． 患三陰性乳癌機率高嗎？？
因家母都乳房下垂， 而且乳頭內陷， 發熱，
一邊乳房凍， 一邊就發熱，
請醫生哥哥解小妹的不惑， 謝謝！！感激
1）BIRADS 4c即係50-95％可疑度。
2）冇得估。純統計就5-10％。
您好!我38yrs,23/5/18已完成最後一針歐紫化療，我痛苦的是已經一個月了每天瞓醒都腰酸腿疼，大腿骨盆腳踝關節只要活動都是又卡又痛，從坐著要站起來時非常的吃力更別說蹲了，這種情形會持續多久呢?之前都沒有這些症狀，但我有keep住每天適量運動，如八段錦，散步，踏健身單車等，需要停止嗎？有告訴腫瘤科醫生，他說再觀察下先。謝謝解答 !
聽落去唔似關化療事，持續幾耐好難講，所以腫瘤科醫生叫你觀察下先。可以繼續適量運動。
醫生您好！我是三陰性乳癌第二期，50歲，11月23日已經在浸會醫院做了手術。請問什麼時候化療是最佳時機？公立醫院已經約定12月20日見腫瘤科醫生，但是擔心排期太久。因為經濟問題，我可以先在私家診所化療幾次後再轉往公立醫院繼續化療嗎？如果可以的話對治療會有影響嗎？我的主診醫生說因為是三陰性乳癌，復發率高，所以第幾期根本不重要。需要盡快化療和電療。是這樣嗎？我很擔憂！希望您能給予意見。謝謝！
一般黎講，手術後四至六星期做化療最理想。
可以公私營混合咁做，不過要注意唔係種種打法都無縫銜接。例如三陰性乳癌私家好多時打Dose Dense（即兩星期一針），公立好多時負荷唔到。
請問一個人可否同時有Her2及三陰乳癌？thank you
可以。
醫生你好，我剛剛完成化療和手術約一個月，1.7cm 淋巴沒有事，三陰1A期，ki90%,grade 3
上年7月照過全身mri，其他器官無轉移，但近一星期發現頭痛，已經痛了一星期了，我有需要再一次照腦嗎？ 淋巴無擴散的話，有機會轉腦嗎？
想清楚就照。機會唔大。
醫生你好，我確診是三陰性乳癌3A期，已於3月15日已做全乳及全淋巴切除及乳房重建手術，剛剛已見腫瘤科醫生，建議4月29日開始化療，Adriamycin Cyclophosphamide 打4針，Paxlitaxel 打4針，合共8針每兩星期打一針，化療後3星期再做15次電療，請問這套治療方案適合我嗎？
合適。
我今年45歲，兩星期一針會否太密呢？我害怕太難受身體負荷到嗎？
頂得順的話，兩星期一針好D。
醫生，很多謝你🙏🙏🙏🙏
醫生你好！我属三陰性，巳做全乳手术，腫瘤1cm，grade3，Ki67 70%，冇抗散淋巴，請問在公立醫院做化療有什么组合适合我？三陰是否應該揀進取D的组合會好些嗎？麻煩醫生。
公立就TTCx4。
謝謝醫生咁快回覆，TTCx4够力嗎？癌细胞咁恶有冇需要進取D呢？麻烦醫生。
公立認為夠力。
唔好意思我又再問醫生，我爸爸三兄弟都死于癌症，他們發病時分別是三十几、五十几及八十歲，我今年五十一歲，我有冇機會遗傳咗癌症基因？
不止是睇歲數，主要睇癌症種類去評估風險。
醫生我想問他三個有两個患腸癌，一個患喉癌同我患乳癌有冇關係，麻烦醫生。
無關。
你好，我媽媽手術左乳全切+淋巴全切，浸潤性二期導管癌，包塊2.2cmx2cmx1.8cm，淋巴無轉移。 免疫組化為三陰性。 有幾個問題想諮詢下您。
1.一個多月前媽媽檢查時包塊是1.8cm，當時本要做手術，後因心臟各項檢查問題拖了一個月手術，後包塊長大為2.2cm。 如果當時就做了手術，分期會不會是一期呢，因為包塊小於兩厘米，並且沒有淋巴轉移。
2.如果一個多月前就做了手術，免疫組化為三陰性，這個結果是否有可能會改變呢？ 看了很多文章，知道三陰性這個類別很不好，很擔心。
3.看了您的文章知道，之後也要定期復查。 但我看到有好多例子，當複查的時候看到有轉移，已經晚了。 我看到這些例子的家屬也在問，那復查有什麼意義呢？ 當查到發生復發和轉移的時候感覺已經不可控了。
1）可能係，亦可能唔係。如果係1.8cm就第一期，問題係一個月前都可以未必止1.8cm，因為造影評估同手術樣本可以有出入。
2）屬性唔會改變。
3）復診意義在於及早發現復發，復發可以係轉移（可以控制），亦可以係局部（可以根治）。
媽媽是三陰性，Ki67 15%-25%，結合考慮心臟做了二尖瓣手術，醫生給的方案是TCx6次，每次間隔21天。 想問下您：
1.這個方案是否ok呢？
2.開了升白針，護士說每次化療後48小時開始配合打，每天2針，連打4天。 升白片也是每天吃。 但我看到很多是白細胞升唔上先至打升白針。 想請問下您，應該是直接配合打呢，還是應該每個禮拜查白細胞不夠才打呢？
謝謝醫生
1）腫瘤幾大？淋巴有冇感染？TC個C係carboplatin?
2）升白針每天打一針，唔明咩叫升白片。
您好，感謝回复。 腫瘤2.2cm，淋巴冇感染。 TC的兩種藥我見寫的是艾素和環磷酰胺。 是否ok嗎？
升白片是用於升白細胞的一種藥，升白針一定要打嗎，如果通過食補及營養品如速愈素類能升起來，是否也可不打呢？
環磷酰胺係cyclophosphamide ，咁打4針就夠。
香港冇你所謂的升白片，唔知你講咩藥。升白針一定係打的。白血球夠數就可以唔洗打。
多謝醫生，明白曬。
你好，媽媽57歲，腫瘤1.6cm，前哨淋巴顯示淋巴無影響，，一期，三陰性，剛剛私家醫院6月13日做左全乳切除手術。依家威爾斯約到8月2號件腫瘤科醫生，相信真正開始化療尚有一段時間。想請問化療同手術相隔咁耐有無特別影響（因為爬文話最好術後4-6禮拜做）？另外，想知道化療前可以做/食d咩可以更好預備做化療？
情況許可就早D開始，情況唔許可就根本冇得揀。
冇野要預備。
醫生你好！我属三陰性，5月21日巳做全乳手术，腫瘤Icm，冇抗散淋巴，grade3, ki67 70%，覆發機會大嗎？今日到公院見腄瘤科醫生見議我做DCx4，你覺得适合嗎？最快都要等到8月1日打第一針，好擔心會否太遲？麻煩醫生。一
機會大定少係相對概念，人人觀感唔同。
DCx4合適。8月1日先第一針唔係最理想，不過亦唔係太遲。
醫生我想問如果現時去私家打第一針連升白针及其他雜費大约要多少錢，謝謝你！
三萬度。
感激你的回覆，我會考慮。
母親60歳，2b期，七月初已局部切除乳房皮淋巴 （手術前醫生說全切或局部切復發機會一樣）之後確診三陰要化療。請問
1. 全切或局部切真的復發機會一樣？三陰會否全切較好？
2. 可否私家醫生先選擇化療藥組合，再到公立醫院自費醫治？
3. 剛登記東區醫院，還未第一次見醫生。是否越早化療越好？但如在私家先開第一針，公立之後可否涵接？
1）復發機會差不多，差不多一樣。三陰情況唔會有特別。
2）可以，不過公立醫院未必採用同樣方案。
3）越早越好。未必可以銜接。
謝謝你。如家母是2B三陰+grade 3, 即是復發機會很高嗎？完成療程後可怎樣預防？
高。定期檢查。
另外，我們剛登記公立醫院，8月5日才第一次見醫生，不知要等多久才能開始化療。請問2b三陰化療要在什麼時間內做？因政府太久的話，會選擇在私家先開針。如手術已在7月8日完成，在什麼時間前應該開始化療？
如私家先開針，但公立醫生之後用另一藥物組合，會有影響嗎？
私家醫生有的藥，在公立自費也一樣會有？
最好手術後四至六星期開始，最遲三個月內開始。
唔同組合有影響，影響幾大冇人知。
私家醫生有的藥，公立醫院也有，只係佢地採唔採用私家的建議。
那是否如在私家開了針，就不應轉去公立，怕影響病情？
唔可以一概而論，要視乎私家點樣用藥，公立又肯唔肯銜接。
醫生説會用頭4針係紅魔鬼，之後紫杉醇去治家母2b三陰grade 3,合適嗎？
是頭4針，每三星期一針，醫生話也可以兩星期一針。4針後休息三星期，然後12針紫杉醇每星期一針。
聽說公立醫院合併為4針，醫生說効果比較差。真的嗎？
論效果，私家會更好？因很貴，所以想問值得嗎？
如果頂得順，兩星期一針好過三星期一針。
公立醫院未必合併成四針，要視乎邊一間醫院。
效果黎講，唔係話私家一定好公立一定差，主要視乎點用藥。值唔值得呢D好個人。
謝謝你。請問化療其間可吃雲之或舞茸等保健品嗎？
唔建議。
60歳，2b期，grade 3 三陰，已局部切了左乳房及11粒淋巴(2粒有問題). 化療分面，私家醫生建議紅魔鬼x4(每三星期）紫杉醇x12(每星期). 公立建議FEC x3(每三星期) docetaxel x3(每三星期）
1. 公立或私家的效果好啲？那個冇咁辛苦？
2. 母親覺得公立6支易挨過私家16支，真的易挨啲嗎？
3. FEC=紅魔鬼？那私家多一劑會更好嗎？
4. 公立醫院話docetaxel 只會給次一級的止嘔藥，可以自費買頂級嗎？需要嗎？只想母親舒服啲
5. 母親廿年前已切除了子宮，加上有骨質疏鬆，需要打補骨針嗎？
6. 母親60歲三陰，可要求寫紙做BRCA Test?
7. 割了11粒淋巴，容易手腫嗎？
謝謝你的資料
1）效果差不多。辛苦私家冇咁辛苦。
2）針數公立係少D，但係其實紫杉醇拆開一星期一針係舒服D。
3）FEC 個E係紅魔鬼，多少一劑不是重點。
4）Docetaxel 唔嘔的，唔需要。
5）針對骨質疏鬆可以打。
6）可以。
7）15%
如在公立化療，之後三星一次的docetaxel 頂唔順，可以叫公立醫生折開每星期做嗎？又或者可以回私家做weekly docetaxel 嗎？
可以叫，不過佢好大機會唔會理你。
可以去私家做，不過weekly 的係paclitaxel(Taxol），Docetaxel一定係3 weekly 嘅。
另外，公立的FEC X3 docetaxel x 3合適嗎？在這方案，可以自費買更靚的藥嗎？
合適。冇自費更靚的藥。
如果挨到FEC x 3, 後段的docetaxel x3 會相對易挨嗎？
如真的挨不到，可中途去私家做weekly packitaxel 嗎？ 成效會有影響？
多謝你的極速回答
因人而異，有D人覺得FEC辛苦D，有D人反而對Docetaxel 反應大D。
可以中途轉，不過冇人知成效有冇影響，不過估冇影響多。
母親今天開始第一針FEC, 雖然冇嘔，但已開始暈。之後會越來越暈嗎？有什麼方法可舒緩？
謝謝你一直的回答
暈唔暈感覺好個人，冇咩pattern可言，都係休息。
另外，母親由確疹癌症後，因心情大受影響，一直失眠，已吃了醫生的安眠藥，也只是每晚睡了三至四小時，白天也睡不了。醫生開每晚一粒安眠藥，她試了也只是睡多了一小時。她便將藥分開兩次吃。睡前半粒，半夜醒了再吃半粒，但效果也一樣。因為睡不好，所以也吃不好。
醫生，請問可以怎麼辦？擔心這樣會影響治療
都係靠自己放鬆同安眠藥，冇咩好方法。
請問可以給她按摩分鬆嗎？
不好意思，一直打攪你
可以。
請問打完FEC一日後不斷手震是正常嗎？（雙手震到好似彈琴咁）會震幾耐？可以點舒緩？
謝謝醫生
FEC唔會導致手震。
但如一直手震，會有其他原因嗎？ 震到不能在手機寫字
可以好多原因。困擾就睇醫生。
請問食咗類固醇會手震嗎, 因為今天才吃類固醇, 剛巧今天才開始手震
唔會。
我覺得手震係來自情緒。她一直心情彷彿，睡不好。公立醫院會有情緒支援嗎？乳癌中心活動她一直都不肯去參加，請問公立醫院可以轉介至心理醫生嗎？如果是醫生，她可能會去
心理情緒真的比身體疾病難搞….
公立醫院可轉介至心理學家（clinical psychologist）或精神科醫生（Psychiatist），冇心理醫生呢樣野。
母親正進行化療，打緊FEC, 醫生開了 HEPAVANCE Entevcavir tablet 0.5mg. 每天一粒，餐前或餐後兩小時吃
1. 請問吃藥後需要空腹嗎？
2. 如晚上睡前吃，可與安眠藥一起吃嗎
謝謝醫生，因為下次見公立醫生要三星期後，但這問題很煩擾母親。
1）吃藥最好空腹，所以前後兩小時唔好食野。
2）可以。
如果晚餐七時吃，可以大概九時睡前與安眠藥一起吃？這時間安排合適嗎？因這就不用打亂白天的飲食時間
可以。
媽咪七月初分別局部割了乳頭附近，及左邊11粒淋巴。現在已打了第一針FEC. 她現在也會覺得淋巴位置酸痛，但乳頭傷口就不痛了。
這是正常嗎？
常見。
只是困為傷口未完全埋口？過一段時間會好過來嗎？
或這是長期的？
謝謝醫生
原因可以有好多，要檢查先知。
請問口腔及近喉嚨破損應如何處理？母親已經每次吃東西後用鹽水涮口了，並沒有什麼效果。
睇醫生。
媽咪脷苔很厚很白，是受化療影響嗎？可以怎樣改善？
每次吃東西後都用鹽水漱口會過多嗎？會破壞口內保護膜嗎？媽媽經常會口乾，但口內的瘡還未康復
可以關亦可以唔關事。排除感染後，刮咗佢。
鹽水唔會過多，唔會破壞口內保護膜。
你好，私家醫生做完手術話三陰性2期，報告寫2 foci of IDC grade 3，0.8cm and 1.8cm with clear margin，切左17粒淋巴，入面有1粒擴散，醫生定為T1N1M0。想請教4個問題：
1. 請問腫瘤grade 3係咩意思？
2. 請問政府做化療會做邊個組合？做完化療需要再做電療嗎？
3. 需要做pet scan再檢查清楚嗎？
4. 9月19見腫瘤科，而家飲加營素對之後做化療會有幫助嗎？謝謝。
1）腫瘤分裂的分級，grade 3即係生得快。
2）政府多數FECx3+TTx3或者TACx6。需要電療。
3）淋巴有擴散，建議做PET scan。
4）冇。
母親上星期五在公立打了第二次FEC,今天下午開始右邊眼有些模糊，是副作用嗎？需要立即看醫生？
太多呢D小問題網上隔空係判斷唔到，睇返自己醫生。
媽媽在第二次化療針前的抽血化驗，從手臂抽不出血，後來改在手背(要手垂下)才抽出血。下一次抽血前，需要做什麼準備方便容易抽血？
飲多D水，多做手部運動。
醫生你好，今日見完腫瘤科，佢建議化療為FECx4 + Taxoterex4，每三星期一針，請問8針咁打法會否用藥太重？呢種方法常見嗎？謝謝。
眾多用法中其中一個選項，好難講實係咪太重，觀點與角度。多見於威爾斯醫院腫瘤科。
咁你後尾點發現？
其實三陰乳癌有冇分期數？
有，同其他類型乳癌一樣用TNM去分一至四期。
今個星期二手術後，今個星期四的報告係三陰，期數為第一期B ( T1N0 M0)，腫瘤0.9cm ，沒有擴散到淋巴，grade2, ki67 是 10%，一般政府會給化療嗎？因為私家的腫瘤科醫生話有機會政不提供化療，另外這個情況容易番發嗎？治癒率高嗎？謝謝醫生回答
T1N0係第一期A。政府應該都會比化療。治癒率高，番發相對都唔高。
但荃灣廣安醫院寫1B，想問1A同1B分別大嗎？(ps屬性係三陰)麻煩你馬醫生
Stage 1B 係指T0N1mi或T1N1mi，即係淋巴有微量擴散。你係咪搞錯T1b同stage 1B？T1b即係腫瘤＞0.5cm-1cm。
母親將會接受一連串電療，而我剛剛懷孕，請問我可以如常探望她？會否有幅射影響？謝謝
冇幅射問題，可以如常探望。
拎到港安個report：left ductal carcinoma, 0.9cm, clear margin, grade 2, pN0 (0/4 sin), ER/PR/HER2- score: negative, Ki 67=10% 請問咁係 stage1A定 stage1B？唔該哂
Stage 1A。
感激馬醫生的回覆，其實在我心底最大的痛是雖然得了乳癌但有一點點的安慰是期數是1A屬早期，但不幸地掛著了3陰這個名字，那麼1A的三陰痊癒率還高嗎？番發率是否仍屬偏低嗎？假設有二個人也是1A，一個三陰，一個不是三陰，痊癒率和番發率是否爭很遠？不好意思我太長氣問多了，不過希望馬醫生可以體諒我的麻煩及我的焦慮，感謝！
痊愈率還高。
所有高高低低都係相對概念，唔好太執着。有一百萬算唔算有錢？相對基層，係百萬富翁。相對李嘉誠，係百萬草根。
感謝馬醫生回覆，想問一下依家做完手術後，會有電療及化療的治療，腫瘤科醫生說可以先電療後再化療，其實可以嗎？因為未聽過咁既先後次序，謝謝！
主流係先化療後電療，我睇唔到咩原因要倒轉次序。
再想問一下，如果 check埋基因測試對個化療治療方法有不同影響嗎？(即是需要化療加免疫療法嗎？)感謝
視乎你指乜基因測試，如果指驗乳癌復發基因測試OncotypeDx ，就唔合適。如果指驗BRCA遺傳性乳癌基因測試，就有D影響用藥選擇。
咁是否驗左BRCA先化療？不過我驚要等埋個報告影響耐左開始的化療時間
係。有可能。
醫生你好，母親已剛完成化療，正在等電療。她的情緒及睡眠由確診起一直未有好轉，甚至每況愈下。以為化療後會好些，但都沒有好轉。一直不肯出街，連說話也不想多講。人亦沒有朝氣，只想躺在床上，但其實身體狀況並不是太差的。吃了安眠藥也只能睡四小時，白天也睡不着。她説什麼事也想不通，很易憂心。
她這情況應該是情緒病，政府醫院要明年七月才轉介見醫生。之前看了一次私家醫生，吃了藥後人只變得很呆，但對心情及睡眠沒有改善。因為這私家醫生只是隨便在家附近找的，她對癌症也不太了解，好像不太明白她們的心理情況。
請問可以在那裡找一些對乳癌病人有經驗的精神科醫生？
為免瓜田李下，不作任何醫生推薦。
醫生你好，母親完成最後一次化療已經一個半月，但還是經常腹瀉，及腹脹未散。請問這些副作用大概會維持多久？謝謝
因人而異。
醫生你好，本人患有三陰性一期，去年5月做了全乳及淋巴清掃手术，淋巴冇受影响，手术前係私院驗癌指數是12，手术後係公院做了DCX4化療，最近覆診驗血癌指數是17，点解做完化療癌指數還比手术前高？是否化療對我冇效？覆發機會是否很高？麻煩醫生。
邊一隻癌指數？化驗室正常水平係幾多？
是CA15.3乳癌指数，實驗室的指標是30以下都属正常，但我唔明做完化療的癌指數比手术前還高，麻烦馬醫生。
咁冇事，只要係正常範圍已經OK，係會高高低低嘅。
謝謝馬醫生的回覆
醫生你好，我媽媽2017年確診三陰性乳癌，腋下淋巴亦有感染，當時做了左胸切除、淋巴切除，電療及化療，但現在有擴散致胸及肝，今日於QE打算排快期，但仍未有見醫生日子，現在很擔心，請問有什麼方法治療？謝謝
化療加減免疫治療。
醫生你好，依家過唔到香港，未能到你診所看診。媽媽68歲，因一邊HER2, 9月頭完成4針紫杉醇，每星期打一次. 11月另一邊三陰性小葉癌，PT1aN2aMx, 做左全切，淋巴有三粒感染。醫生話唔可以再打紫杉醇，睇過抽血報告，覺得媽媽身體打唔到小紅莓，建議打小黃莓（CMF) 6針，或者唔想辛苦就口服化療藥，效果差幾成。請問醫生，1. 係咪應該進取d, 打CMF, 如果真係捱唔到，先轉口服化療藥。2. CMF效果如何？3. 副成用係咪少d，啱老人家打？
太多野太怪，唔可以代為決擇。
第一，唔應該咁快就另一邊有事，仲要咁多淋巴感染。點解第一次乳癌會唔知另一邊有事？
第二N2即係4粒至9粒淋巴有感染，你話三粒感染就應該係N1。N2係第三期，N1係第二期A，差好遠嘅。
第三，唔會由抽血報告可以得出「打唔到小紅莓，建議打小黃莓」的結論。
CMF 效果等同第一代化療，效果同AC x 4相約。
謝謝你咁快答覆。
1. 第一次b超另一邊無事，有事果邊即刻私家做左手術，冇照PET。返公立醫院做化療，有問過使唔使做，話佢地會睇情況而安排。之後冇安排。
2. 報告寫Breast Invasive Lobular Carcinoma, PT1aN2aMx with Focal Lobular Carcinoma in Situ. Lymph Node Carcinoma Metastasis (3+/9)， 咁係算幾期？
抽針Ki67: lobular carcinoma in Situ 10%， invasive lobular carcinoma 50%+
請問啱老人家既三陰性化療應該打咩？依家做Pet scan 有幫助嗎？顯影劑是否會影響腎功能？ 媽媽貧血，腎功能差，肌酐高，高血壓，骨質疏鬆，心臟功能還可以-一邊有返流。
1）咁之後又點會咁快知另一邊有事？
2）報告錯，要覆檢先知。
3）要現場評估。要做PET scan。PET scan 唔洗打顯影劑。
1. 因為痛，同埋乳頭有變細少少，去左b超，就發現，抽針報告出左就即刻私家做手術，估唔到淋巴已有擴散。
2. 謝謝提醒，明天叫醫院覆檢
3. 好多謝你熱心既解答。好醫生。謝謝！
馬醫生你好
因為我最近先睇到呢篇文章先知三陰性通常係先化後術，但我媽之前係做完手術之後再做fish test先知係三陰，想問下點解唔係手術前就知係邊一個type而係要做左手術先? 現在次序調返轉，會不會無咁好？謝謝解答！
如果醫生有信心直接割得清，三陰性都唔一定要化療先。先後次序唔影響存活率。
馬醫生
我見你話先化後術可以知病人對化療藥有無用，咁調掉左係咪就等於唔知起唔起到作用？
另外，好感謝你嘅回覆
你真係好好，平時我地係公立醫院問多句都唔得，你真係一個好好嘅醫生！好感激！
先化後術誠言係可以知道化療有冇作用，幾時先重要就係當腫瘤同打針化療唔夾，手術之後又肯食6-8個周期口服化療先有分別。如果腫瘤同化療夾，又或者根本唔會考慮食口服化療，就冇分別。
馬醫生
本人40歲，於兩星期前做了乳房及淋巴切除+ 重建手術，腫瘤1.6cm及淋巴有2粒感染，術後報告得出
ER (5/8 and H-score=24/300),
PR (5/8 and H-score=30/300)，
Her-2 (2/3),
以上數宇顯示我係咪屬於三陰性?
之後治療方案應該會點安排
感謝你無私地解答大家疑難
HER2灰色地帶，要睇埋FISH/SISH報告先知屬性，會影響之後治療方案，你揾埋個報告先。
馬醫生你好，我嘅fish test顯示是her2受陽體，咁屬性應該是? 日後治療方案會係點?
先謝謝你
打化療6針加一年標靶，之後電療加荷爾蒙治療。
請問醫生，是需要雙標靶嗎?
我是3月25手術，政府排期4月29才見腫瘤科醫生，擔心過了治療黃金期。有冇需要先到私家開針(全私家無能為力)，第二針才返政府駁針?
雙標靶好啲。係唔係私家開針好視乎自己經濟能力。
請問粗針病理報告話ER3-5%弱陽性,術后病理報告卻話ER蔭性,點解會咁樣?我查資料話就算1%陽性都算陽性,我應該相信哪份報告。
信陽性嗰個報告，因為食埋藥有殺錯無放過。
明白，非常感激醫生你的專業意見!!
唔該馬醫生的快速度回覆。主診醫生術前話我屬於何爾蒙型1期，仲話術後報告應該比之前的ER3-5％會高D，無洗化療。但術後病理報告寫住ER陰性，變成佐三陰性乳癌，我當時聽到成個人蒙晒。術前病理是中大實驗室做，術後病理是仁安醫院做。
我好無想被确诊三陰性。
現在等手術埋口。
馬醫生能否給個中肯的化療方案比我。
術後報告：腫瘤2.0cm，淋巴冇擴散，Grade3
TTCx4。
馬醫生真係仁醫，知道患者急切等回覆，都當日覆。
關於ER術前陽術後陰呢單野，我有冇必要將術後得到的組織再搵前面個實驗室或者第3個再確認，到底陰定陽。
如果心有不安，可以兩個樣本搵第三方化驗去覆檢。
昨日覆診見私家醫生，亦拿到最終的術後病理報告。因為抽針化驗ER＋，術後化驗轉陰呢單嘢，主診醫生讓病理科同事做多一次ER測試，但最終的報告還是顯示陰性。主診醫生話可以試着要求政府醫院幫手驗多一次，政府醫院會願意幫手驗嗎？臨床上咁樣短時間內（15日）的陽轉陰的病例多嗎？有醫學解釋嗎？
另最終病理報告：腫瘤最大尺寸2.1cm，哨前淋巴冇事，割清，Grade3，MIB1 stain 40％
MIB1標示甚麽？
醫生話係2A期，那是不是如果腫瘤大2.0就係1A期了。
醫生建議化療打A*4＋T*4，兩星期一次。會不會勁過頭？
44歲，有缺鐵性貧血和甲狀腺结节及1.7cm子宫肌瘤，咁勁的化療會唔會頂唔順？
想聽聽馬醫生的建议，唔該晒
1）政府醫院會考慮。
2）唔係陽轉陰，只係有可能腫瘤有兩個群族（即係多國藉），抽粗針咁啱得咁橋已經抽晒陽性嗰部份，做手術嗰陣時就淨係睇到淨返落嚟陰性嗰部份。
3）MIB1即係等如Ki67，講緊生長速度。
4）2cm或以下，淋巴冇感染，就係1A期。
5）進取可以咁樣打八針，有啲醫生保守就打四針。
6）貧血嗰度要補充番啲鐵質，甲狀腺結節同子宮就唔影響化療。
多謝馬醫生的耐心解答。
4月9號手術，16號出術後病理報告後私家帮我轉介傳真去政府醫院，排期到7月27號先見腫瘤科醫生,真係無語。但私家話需要手術後30日內化療。醫療保險cover唔到（除外保），全部私家負擔唔起。可否跨區排期，廣華或者瑪嘉烈點？
第一個期係文員比，一般都係排隊尾所以好遲嘅。之後醫生會睇轉介信，如果齊料的話，一般會叫文員通知你提早，所以兩三星期內會收到第二個期，一般手術後四至六個星期見到你。
如果都係嫌慢，可以考慮私家開針先，打一兩針之後公立排到就返去駁尾。
跨區冇用，人地見你其他醫院腫瘤科有期，佢唔會俾你排。另外廣華醫院係冇腫瘤科嘅。
又係我，阿May。馬醫生，我而家亂晒龍了。外科主診醫生建議我打A*4＋T*4的8針兩星期一次，她轉介的腫瘤科醫生建議我打FEC*3＋TT*3，政府醫院話淋巴冇野嘠只打4針，TTC*4，至於ER弱陽，三個醫師都唔建議我食藥，政府醫生仲話食藥的副作用有1％機會得子宫恶性腫瘤，我原本打算食葯，比她一蝦，冇胆食。而家六神無主了，請馬醫生比D專業意見，唔該晒你
進取就DD AC + P，保守就TTCx4，唔會揀PACS01。
子宮內膜癌風險為0.02%，冇1%咁高。食唔食藥個人選擇。
私家腫瘤科醫生話可以跟住政府醫院的方案，但可以TTC*6，頭針同埋尾針私家度打，政府醫院按常规打4針，咁樣打6針比打4針有效益嗎？對白血球的副作用是否好大？
冇數據話你個情況咁樣加多兩針會有效D，唔會咁樣唔湯唔水。正正經經，一係四針，一係八針。
你好醫生，媽咪係三陰性，腫瘤1.5cm，在公立醫院5月25號做了部分乳房切除，經化驗後發現擴散到淋巴。醫生建議7月30號先做電療，之後再配合化療。請問這樣的順序適合嗎？之前看你的文章都建議手術後先化療後再配合電療。謝謝。如果在公立醫院，病人可以選擇化療方案嗎？
正常係先化療後電療。
可以在有限的範圍內選擇。
醫生你好，好多謝你用左簡單易明又幽默嘅手法提供左咁多寶貴嘅資訊。媽咪今年66,8月頭係公立醫院抽粗針，驗到係三陰乳腺癌，1.74cm， T1N0M0。然後醫院排左期比佢9月頭做手術9月尾見腫瘤科。之後我地同媽咪出面搵多個醫生拎second opinion，醫生建議做術前化療先，但都話open可以做咗手術先。媽咪怕辛苦唔係好想做化療先。想問下究竟做邊樣先會好啲？另外PET scan應該術前定術後做比較好？
希望醫生可以比啲意見，謝謝！
喺媽咪個情況，兩個效果相約，所以純個人喜好。
PET scan如果鐵定會做，就術前做。術後做PET scan 係比嗰D想盡量唔做PET scan嘅病人，等睇埋淋巴有冇感染先決定做唔做PET scan。
醫生你好，我媽媽今年63歲，10月確診, 10月26做了局部乳房切除手術加切咗5粒前哨淋巴檢驗。其後化驗報告顯示淋巴無擴散，腫瘤證實為三陰性乳癌T1A期(T1b No Mo)，腫瘤2cm DCIS (with 6mm invasive component), Ki-67 30%, Grade 3。
排了11月30日見QE腫瘤科，因為很擔心，所以我帶她到私家腫瘤科醫生求診，私家醫生開出 TCx4 (Docetaxel & Cyclophosphamide) -每3星期打一次 + 每次化療配合升白針，再於化療後3星期做21次電療。關於治療方案有幾個問題希望醫生可以給我建議，十分感激。
1. 請問TCx4 + 21次電療的方案合適嗎?會否太保守?
2. 由此11月30日先第一次見QE醫生，唔知QE幾時先可以安排到打第一針，私家醫生建議最好12月3日前要開始打第一針，如果等見埋QE會唔會太遲，令病情延誤?
3. 如果係私家打左一針先，政府醫院可以接番其後3針既療程嗎?
4. 知道三陰性乳癌會容易轉移，請問有需要現在做埋 pet ct + MRI Brain嗎?
5. 現階段需要做BRCA Test嗎? 如果做完知道有基因突變，治療方案會否有大變動?
6. 媽媽好擔心化療過程很辛苦，她的情況是否必須化療?
1）合適
2）見到QE醫生後，通常1-4星期後落針。係咪太遲好睇個人有咩選擇，只可以話唔係襯熱食，係攤凍食，但未過期。
3）可以
4）Stage1a如果冇病徵，唔洗PET scan。
5）會建議做BRCA testing。治療方案會有變動。
6）最好做埋。
感謝醫生回覆，想問多少少以幫媽咪搵到最好既治療方案
1. 見到有其他三陰性一期(無淋巴擴散)患者要打ACx4 +TCx4 (共8針), 但私家醫生只建議打TCx4足夠嗎?
2. 因為未做BRCA 檢測，怕做完等埋結果出來未配合到打第一針既時間。如果做左BRCA 檢測發現有由乳癌基因 (BRCA1或BRCA2)，個治療方案會點變?
3. 如果開始左第一針(TCx4) 後再變其他治療方案會唔會影響力媽咪個治療效果?
4. 三陰性如果有 (BRCA1或BRCA2) 只需服用PARP抑制劑?還是化療+食PARP抑制劑?
5. 見早前文章有提及BRCA 基因檢測約需2萬，但見有部份體檢中心只需幾千檢驗BRCA1 & BRCA2, 只驗這2組基因足夠嗎?
1）足夠。
2）會落多隻化療Carboplatin 去組合度。
3）唔同方案當然有唔同效果。
4）第四期嘅BRCA突變乳癌先會考慮PARP 抑制劑。
5）如果你只關心呢兩個基因突變就足夠。
馬醫生你好，家人上年6月覆診照過pet scan無乜事，今日再去醫院覆診(已完成手術化療電療第二年)，但醫生話不用成日照pet scan，所以無寫紙比我地照，但我地有點擔心，因為不照pet scan咪不知道體內的情況？請問應該如何是好？我睇你的文章話頭幾年應該每半年到一年最好照一次？我地應該自已去搵其他醫生嗎？謝謝！
唔需要每年定期照PET scan，臨床醫生有懷疑有需要先照。睇有冇轉移唔一定用PET scan，亦可以透過抽血驗癌指數，照低輻射量電腦掃描個肺， 超聲波肝去評估。
PS 我冇講過「頭幾年應該每半年到一年最好照一次PET scan」，唔好誤會。
馬醫生你好，我今天在公立醫院會做左邊全乳切除手術，手術前只係做咗乳房X光造影和超聲波，抽針確診咗係三陰性浸潤乳癌，5月4號檢查， 5月17號確診，6月6號做手術，我擔心自己會擴散，是否太遲呢？X光造影顯示我嘅癌腫瘤是1.9 cm，當初醫生只係建議局部，但因為乳房旁邊仲有好多粒細小的東西，我決定切全乳，是否最積極的治療？
另外，我因為之前冇做Pet Scan,我想喺手術後做返，起碼見腫瘤科醫生之前去做是否對治療有幫助？
手術後幾個星期可以做Pet scan?
1）一個月內開始治療都叫做可以接受，唔算太遲。
2）全切唔等如積極過局部切。
3）淋巴有感染就值得做，淋巴冇感染就個人選擇。
4）隨時都可以，最好係拆咗引流先去做。
多謝你呀馬醫生，百忙之中抽空幫助回覆
今天出咗前哨淋巴報告，四粒沒有感染
有幸在你另一個post睇到，
有啲研究話DD AC + P用喺三陰性乳癌特別夾，所以私家醫生特別鍾意用佢係有擴散至淋巴嘅三陰性乳癌。AC唔洗錢，P大概$2000一針，總數$8000，升白針另計。如果有擴散至淋巴，政府包P。
我想問如果政府叫我打嘅針跟以上不同，是否要向政府醫院爭取？點樣同政府腫瘤科醫生講？有姊妹教我，是否要睇多一個腫瘤科私家醫生，再喺私家醫院開咗第一針，咁政府就可以跟私家醫生的打法？
都係直接問醫生呢個方案適唔適合自己。
私家開咗針，政府醫生都未必跟嘅。
今日見咗腫瘤科醫生，佢話安排注射
Docetaxl + cyclophosphamide X 4
問清楚腫瘤係1.6 cm，前哨淋巴四粒沒有感染，三陰性，grade 3
我的方案是否太過簡單？仲要唔使電療，
我真係好驚復發，我有問過自己俾錢可唔可以打得進取啲，但醫生話已經係最好嘅安排🙈
請問我的針組合是否唔夠爭取？
現方案好大路，可以接受。
我今年40歲，連電療都唔需要，有冇需要用到DDAC+p?我的組合是否太過保守🙈
現方案唔算保守，只係遇上進取的腫瘤科醫生，先會喺淋巴冇感染的三陰性乳癌用DD AC+P。
感謝馬醫生的神速回覆，真心嗰句，係我最絕望嘅時候，睇咗你嘅影片，我才能夠平復下來💖
馬醫生你好、我想知道三陰性乳癌經過化療、免疫治療、手術、電療後、一定會復發嗎？
當然唔一定，好多三陰性乳癌都好得返嘅。
補充:太太43歲三陰性三期淋巴有感染、腫瘤5.36cm,grade 3 ,ki67 85 完成術前化療、先卡鉑、紫彬醇8次+免疫 、 之後紅魔鬼、c針、4次、剛全切加重建、等電療中、手術前照pet ,mri, 已經熄燈、腫瘤剩下1.5cm。雖然手術完成了、我還是很担心太太生命安全、請問她預後好嗎？我真的很担心、謝謝
三期係大機會復發。
馬醫生你好
太太將腫瘤移除之後 雖然腫瘤還有1.5 cm但是化驗出來沒有癌細胞 是否屬於pcr ？预後會好嗎謝謝
腫瘤還有1.5 cm同化驗出來沒有癌細胞，係一個互相矛盾嘅概念，唔可能同時存在，是但一樣嘢你誤會咗。
馬醫生:報告說太太是ypcr是什麼意思？覆發機會低嗎？謝謝你
即係打完化療後，做手術切出嚟嘅樣本，已經冇晒癌細胞，即係癌細胞同啲化療藥好夾，係好事。
醫生你好，媽媽佢今年47歲，確診為乳癌第四期。
四個月前時見醫生腫瘤被診斷為荷爾蒙受體陽性，大概一個月後開始食標靶藥物。
兩個月後因為成效不佳，再抽針發現癌細胞為三陰性，現時正接受化療和電療治療，想請問其實係唔係媽咪身體一早已經存在兩組癌細胞，醫生冇解釋得好清楚，只係話又荷爾蒙受體變做三陰性，令我好不解，
而醫院一直冇安排媽咪做過任何手術，但睇住佢腫瘤不停滲液同腫痛好鄧佢辛苦，都想知有咩原因令醫生決定唔幫佢安排手術⋯⋯
另外醫生幫媽咪安排電療亦都只係針對腰部，而非胸部，係咪有咩原因令佢唔適合針對胸部做電療？
應該係本身已經多國籍，即有部份係荷爾蒙受體陽性、部份係三陰性。
媽咪已經擴散左，醫生可能覺得做手術並不能延長壽命，所以唔幫佢做。
胸部如果有流血，係可以考慮做電療止血。
咁如果1b ？
1b什麼？
醫生你好，
我今晚3月尾至4月頭發覺左邊個胸痛（特別係同個女吵架，因為佢由早到晚都玩手機），4月中睇醫生，5月頭抽針，5月12號即係做手機，5月25號見腫瘤科醫生，先知個中左三陰性乳癌，報告係：
浸澗性乳腺導管癌，第三級，TNM 階段pT1cN0, 腫瘤大小 1.5 x 1.4 x 1.1 厘米，
切除邊緣沒有癌腫，腋下淋巴結沒有癌細胞轉移，有腫瘤周邊神經鞘癌細胞滲透。
這樣是否一定要做化療仲有冇其他方法？1)如果要化療，最遲幾時開始化？
2)因政府醫院要7月7號先有得見，見完又 唔知幾多先開始化療？同埋以上個情況公立會唔會比做化療呢？
3)另外如果我做完化療，會唔會又再覆發，要點樣避免覆發？
4)如果要盡快化療，咁我係私家打住針先，可否可以要求跟公立D針一樣？
謝謝你！
麻煩你解答
心急人上
三陰性乳癌最好做化療。
1）手術後三個月內。
2）政府都會叫你做化療。
3）有機會復發。
我真係好驚乳癌復發，點先可以保命保健康？
https://youtu.be/tWV03ai547Q
4）可以。
你好，馬醫生，希望你能夠答覆我的疑問
本人媽媽73 歲，七月初發現左胸近胸骨有腫瘤，經檢查（包括Pet Scan 等）確定為二期三陰性乳癌，presentation 仲係罕有的encapsulated papillary feature , 5/7 已經全乳切除，前哨淋巴正常無擴散，腫瘤約3.69mm ，ki67 :80%,現在等10/8 見政府腫瘤科醫生，本人有以下疑慮，懇請馬醫生幫忙
1. Pet Scan 正常，前哨淋巴正常，lymphovascular 冇問題，我媽媽已經切除曬腫瘤，可唔可以講她身體內已經冇癌細胞，已經根治咗個問題，之後嘅治療只係預防復發？
2. 本人上網睇資料，encapsulated papillary breast cancer 個預後一般都好因為少擴散，存活率高，但係三陰性乳癌嘅資料又完全相反，我想問下其實考慮預後或存活率係考慮個cancer 嘅種類表徵（期數）定係個病理重要？
3. 以我媽媽個case , 化療就應該需要，咁免疫治療會唔會加埋更好？香港政府醫院會唔會建議用免疫治療？
謝謝你，馬醫生
未答你問題之前，你搞清楚期數先，如果真係好似你咁講，3.69mm係T1a，淋巴冇感染係N0，T1aN0M0喺第一期，唔係第二期。如果啲前設資料錯，後面嘅討論就會錯。
1）可以咁講。
2）Encapsulated papillary carcinoma個情況等如原位癌，就唔使睇屬性，亦都唔需要化療。
3）你搞清楚期數？係唔係原位癌？先再討論落去。
多謝你馬醫生的回覆， sorry我之前打錯 ,個腫瘤size 係36.9 mm,個報告寫係 pT2pN0.
再補充下，個報告寫係invasive carcinoma with encapsulated papillary features, 咁嘅情況係咪都唔需要考慮三陰性乳癌呢個factor ? 謝謝你馬醫生
你係features ，並唔係encapsulated papillary carcinoma，所以三陰性就係重點。要打化療，公立一般打TTCx4，淋巴冇感染唔會用免疫治療。
謝謝你馬醫生，媽媽10/8 見咗政府腫瘤科醫生，建議打六次紫杉醇+ 卡鉑，不過因為考慮到媽媽年紀大同傷口仲有少少水，安排最快11/9 打（即係手術後8-9 個星期），
1）請問呢個時間會唔會太遲？我需唔需要去私家開針先？
2）如果係私家開針，政府之後可以接力繼續？
謝謝你🙏🙏馬醫生
有冇引流管？
手術後有裝一個星期，之後已經拆咗，平時媽咪話個傷口少少扯住，無痛無發炎，所以唔知點解安排到九月先開始，唔知需唔需要帶佢去私家開針先，同埋政府建議的方案適唔適合🙏
如果冇引流管，傷口又已經埋咗口，其實隨時可以開始，唔需要等待。可以私家開始住先，返去政府駁尾。
政府方案都ok。
馬醫生你好，
本人39歲
5月初發現乳癌時腫瘤2.4cm
抽粗針化驗是三陰性
照PET scan 無轉移至其他器官
先做化療後手術（局部切，前哨淋巴活檢追蹤無發現癌細胞）
手術後病理報告指出no residual invasive carcinoma，但醫生說邊界仍有原位癌，但已幫我清除。請問我這個case算是達到Pathological complete response嗎？將來復發機會是否較低？
算pathological complete response。
謝謝醫生解答！
我呢個情況遠端轉移嘅機會係咪低啲？
病過一次之後心理質素變得好差⋯⋯有少少頭暈身㷫都疑神疑鬼。最近朝早起身手指關節有啲痹痛，擔心骨轉移。唔夠瞓頭痛又驚係腦轉移。
有冇放鬆心情嘅方法？
睇你同咩人比較。
医生你好
10月26號超聲波+乳房造影
10月27抽粗針
10月28號睇報告 醫生說是惡性第一期。腫瘤1.3cm
11月1號做乳房局部切除腫瘤 結果三陰性乳癌 前哨淋巴有一粒感染 腫瘤是1.5 cm。淋巴0.5 cm 全切淋巴
腫瘤科醫生說紅魔鬼兩星期一次打4針。紫杉醇一星期打一針12針 +電療
因醫療費用很大 需要幾十萬 實在負擔不起 所以叫腫瘤科醫生給我轉介信到政府醫院排期。腫瘤醫生說政府醫院4 紅魔鬼3星期一針共4針，紫杉醇3星期一針共4針。請問有何分別？ 兩種化療相對邊一隻會比較好？
再問一下醫生。術前評估是第一期。術後是二期三陰性 醫生說因為淋巴有一粒擴散。想問醫生抽粗針組織。是否已知三陰性定手術才是三陰性？
兩星期一針叫密集式打法，等腫瘤少D時間回氣，常用於三陰性乳癌。
政府冇資源去打咁密，所以係三星期一針。兩個方案去比較，兩星期會比較好。
手術前可以加驗屬性得知。
醫生你好
媽媽三年前確診乳癌，是三陰性，手術後直到一個月前才發現已經轉移到腦膜小腦附近，很不幸，手術後再做了全身掃描，原來乳癌復發，同時擴散到肺部。
媽媽現在還很精神的。雖然沒有詳細數據可以提供給你，我想請問醫生，以媽媽的情況，一般還有多久壽命？
半年至兩年。
多謝醫生回覆。嚟緊嘅日子係咪會愈嚟愈辛苦？我唔想媽媽走前還要受到折磨😢
環境改變唔到，只可以改變心境。
請問醫生三陰性二期 除左紅魔鬼加紫杉醇化療+電療。請問有否新的藥物如新鏢靶藥可治療呢？
冇標靶藥物。
醫生明白了謝謝你解答。
醫生你好。術前醫生沒有叫我做pet can 到了見腫瘤科醫生 問我有否做pet can。手術已經13日還有一個引流管 現時有需要做嗎？
可以留待拆咗引流管先做。
醫生你好。1號做局部乳房腫瘤手術， 淋巴全切除。今天15號還有淋巴1個引流管 每日都30ml 左右。我很擔心 是否有問題？
冇問題，正常。
謝謝醫生你的解答 現在心情平復返了
醫生你好 ! 我 46歲，三陰性乳癌，第一期，下個月做第一次化療，冇抗散，tumor 都成粒牛丸甘大，近 nipple. 醫生話未必需要電療，但化療後要切除乳房。我外觀比生命重要，我話一定要靚。醫生唔見意切部份因為會凹左冇得補，我唔會接受凹左一忽。佢 suggest 全切 rebuild, 用 temporary expander 幾個月，rebuild 效果會好D，再入 silicone 我唔洗係肚到多條 scar. 我接受 silicone. 但我真是唔想切。如果化療效果好，tumor 冇左或縮到好細，有沒有機會唔洗切？我以前有 depression雖然已經康復，但每次見完醫生我都 depress 幾日。我親人其他癌症死晒了，得我一個，好在有一班好錫我既朋友。
想根治個病就要切。
醫生你好，
媽媽65歲，雙乳全乳切除（一邊原位，一邊二期），三陰2期無擴散，現在化療中（第3針），頭4針紅魔鬼，後4針紫杉醇。手術同化療都係私家醫院做，今日第一次去政府醫院見腫瘤科醫生，佢見意完左化療，check基因，再食一年口服標把藥，但藥費政府唔包，想請問一下，唔食得唔得？（私家醫院醫生未有此見意）
Check 咗有冇BRCA基因突變先決定。
馬醫生，我上網看到三陰性乳癌康復後兩年內不復發的話，復發的風險將會大大降低。請問兩年時間是從何時計起？由確診起計，還是完成手術＆化療後起計？
完成手術起計。
馬醫生你好。請問康復是怎樣計的？完成手術後計？還是完成電療開始計呢？
泛指完成手術。
馬醫生你好，
8月中做了右邊乳防全切(62歲)，病理報告如下：
T1(1.5cm) N0(0/4+1) MO(PET -ve) G3, ERO PRO HER2 score 1, Ki67 30% triple negative
見了腫瘤科醫生，藥方如下：
第一階段，每兩星期1針，為期8星期
– Epirubicin與 Cyclophosphamide (4針）+ 每針配合7針升白針，自行家中打(28針）
第二階段，每星期1針，為期12星期
– Padiaxel(12星期)（無需打升白針）
1 根據以上藥方，總共要打16針，會否太激進？
因多數打8針
2 排緊QE, 這樣密集藥方，政府不跟，會影響效
果嗎？
謝謝馬醫生抽空解答!
淋巴冇感染，返到公立唔會打第三代化療，6-8針略嫌太多。
QE會打TTCx4。
馬醫生：
多謝你回覆🙏
如等QE，三陰性最多等幾耐要打第一針？
底線唔好多過三個月。