乳癌手術 3 － 保留乳房手術 ，我揀唔揀好？
上集講到你有冇資格揀保留乳房，如果好彩醫生開刀有得比你揀，你應該點揀呢？保留乳房手術有咩優點缺點？全乳房切除手術又喺咪一定唔好呢？
保留乳房手術
「如果我有資格揀，可唔可以詳細講吓唔同開刀方案的好處同唔好處？」
簡單黎講，保留乳房嘅優點就係全乳房切除嘅缺點，相反保留乳房嘅缺點就係全乳房切除嘅優點。（比較表最尾兩項）
先講好處
1）局部割，即係保留乳房，如果做得靚（點為之靚？請參考「乳癌手術風險 － 安唔安全？高風險嗎？」），大部份女士都會滿意／接受。當然你唔可以有唔合理期望，例如要同未做之前一模一樣，咁係冇可能嘅，你始終都係割咗一忽乳房去（十個煲都冇十個蓋），變唔變型好視乎剩返幾多乳腺組織（蓋）。越剩得多蓋（乳腺組織），越有得走盞，越易彌補缺損（即係冇咁凹）。
圖片來源：互聯網
之所以我成日講要做乳癌手術，記得搵個乳腺科外科專科醫生去做。因為佢地嘅經驗可以幫你割準D，割準D即係等如割少咗無辜既正常乳腺組織，即係留返多D蓋（乳腺組織）去冚D煲（割乳癌後剩落黎嘅缺損）。第二個賣點就係乳腺科外科專科醫生知道邊D煲會見光要冚咗先／冚好D（例如上內側就係見光要小心嘅位，因為胸圍遮唔到，同埋女士要著V領），再加上整型技術（Oncoplastic surgery），可以整返靚D。
2）全個割，即係冇咗個乳房，有兩個可能性：一係胸口平晒，之後著衫戴義乳；
圖片來源：互聯網
一係就做埋重建乳房手術（用肚腩／背脊）。
圖片來源：BRO Development
圖片來源：BRO Development
無論邊個情況，好處都係有可能可以避免電療，同埋可以割嘅乳腺組織都割晒，就算割唔清，最多加電療，一定唔會翻手要做第二次手術（前哨淋巴誤差就另計，遲D講到淋巴手術時會詳細講）。
到講唔好處
1）局部割，首先一定要電療，對一D老人家黎講真係好麻煩。因為你要日日去醫院電（星期一至五），電足十五至三十日，即係搞你成個月，對行動不便嘅女士真係好唔吸引。另外因為係局部割，所以如果割唔清嘅話（兩至三成機會），係要再做第二次（甚至更多次）手術去割清D乳癌。有D私家醫生係會手術中途送標本去急凍切片（即係快速測試）驗吓嗰邊邊位清唔清，以減低割唔清嘅機會，用多咗時間做增值服務（大部份嘅公立醫院都冇咁多時間同你增值），咁你梗係要比多D錢，值唔值？因人而異。因此好多老婆婆，都唔再介意外觀，又唔想有可能第二次手術／日日去電療，就會揀全乳房切除。
2）全個乳房割，如果唔重建，好明顯最大唔好處就係唔靚。就算重建，嗰新乳房通常（當然有例外）都唔夠局部割嘅好（自然度／手感／相似度），再加上如果用肚腩／背脊，會多一個大傷口問題。
「我初步明白唔同開刀方案嘅優點缺點，如果我有得揀，咁應該點揀？」
你選擇時要忠於自己心底深處嘅想法，問自己想唔想保留乳房，或者考慮自己接唔接到個胸平晒／乳房重建嘅大傷口，問問另一半佢點睇。有唔明就問乳腺科外科專科醫生，叫佢比D真相你睇睇，你會明白更多／知自己接唔接受到。
「我想返屋企問吓屋企人先決定，得唔得？」
得唔係唔得，不過要揀啱人傾。因為乳癌手術係外人眼中好簡單，就係靚同唔靚，又唔係割佢忽肉。不過病人要面對嘅就唔係咁膚淺，乳房係最重要嘅女性性徵，牽涉你嘅靈魂，影響你第時能唔能夠企翻起身，影響你嘅兩性相處，影響你嘅下半生。所以千祈唔好問姨媽姑姐／家庭觀眾，十個家庭觀眾有十個不同建議，加上佢地嘅資料九乘九錯（睇翻上一篇「乳癌手術 2 － 保留乳房手術 ，我做唔做得？」嘅三大迷思），只會令你作出錯誤嘅決定，要傾就搵乳腺科醫生（專業知識）、伴侶（情緒支援）或者其他乳癌病友（同路人經歷）傾。
下一篇帶你睇睇如果真係要全個乳房割，有咩乳房重建選擇過你揀⋯⋯
有唔明？係下面寫低佢，我會盡量解釋你聽⋯⋯
化療後點解仲要割咁多？
「我已經打咗化療，腫瘤都縮細到摸唔到，點解醫生仲話要成個胸切晒？」
化療完後，我地一般都係割剩返落黎嘅腫瘤，有醫生叫佢做病灶（tumor bed），你可以睇成係乳癌個賊竇。
如果有多個源頭（賊竇），割幾多，就要視乎佢地點縮法。
大致有2種縮法：
1）腫瘤源頭縮細兼夾聚埋一齊，呢個最理想，可以切少D，易D做局部割。
2）腫瘤源頭縮細但仲係分咁開，呢個冇咁理想，可能都係切咁多，同未打化療前冇咩分別。局部割「冇」易做咗，即係可能都要全乳房割。
香港乳癌及乳病治療中心 
Breast HK,
我依家做緊tec x 6化療，已打4針，個瘤已縮到剩少少陰影同摸唔到(本來有2.7cm)，兩粒satellite nodules 都冇左，另我淋巴有幾粒感染(唔exactly知幾多粒)。
我睇過兩個醫生，醫生A話無論縮到點都要做電療先，之後切哂。醫生B話有機會可以局部切，之後先做電療。
由於兩位醫生(2位都係乳腺外科)既advice好唔同，我真係好迷惘，究竟電療係手術前定後做既呢？咁其實個瘤縮左之後要切返癌細胞曾到過既範圍定係只係切走個病灶(其實我又唔知呢個term點解)呢？如果我揀局部切係咪風險較大呢？
謝謝~
煩惱人上
你而家面對2個問題：
1）電療手術前做，定手術後做？
2）做完化療縮細咗腫瘤，究竟要切幾多？局部切定全乳房切除？
問題一：
全世界主流都係做手術先，之後先電療。原理係：
1）如果做電療先，之後胸口D組織會變得好硬，令到手術好難做。另外咁做，術後傷口會好難埋口。相反，做手術先就可以避免以上情況，所以主流係手術先於電療。
2）電療同手術大家主要作用都係局部控制。電療就日日感化個賊（乳癌），希望佢變乖，但唔保證佢唔再作惡。手術就即時執行死刑，一刀切完必死晒。一個慢加未必清，一個快加一定清，正常人都揀手術先。
呢個世界咁大，當然有人會做另類野（電療先手術），主要用喺：
1）做實驗，睇吓咁樣得唔得。
2）做完化療唔想做手術，就做電療去替代（慢加未必清，點都叫做好過冇局部控制）
你嘅情況我橫睇掂睇都唔係以上兩個特殊例子，應該跟返主流做手術先。我實在睇唔到任何理由做電療先，如果你跟A醫生建議，你要問清楚佢嘅理據。
問題二：
做完化療腫瘤縮細咗，你要切幾多真係冇得網上答你。因為要睇2個因素：
1）本身乳房幾大
2）腫瘤點樣縮法，當有多過一個源頭尤其重要（好似你有3個源頭咁）。請睇上面為你追加嗰段。
因為唔知以上兩點，我唔可以評論你做唔做得保留乳房手術。不過跟據醫生B嘅判斷，佢肯同你試局部割，即係有機會成功啦，你想保留乳房嘅話就試吓囉，最多唔得／唔清先全乳房割，起碼叫做比咗次機會自己，第時萬一真係要切晒，都唔會怨自己揀錯（因為冇得揀）。
Dear Breasthk,
您好.
由於我近日受到乳房疾病的困擾,上網搜尋到您留下的痕跡, 十分感動, 在這”利”字當頭的年代, 還有您這樣的熱心人,真的感動
謝謝您
Kitty(謹上)
你好，breasthk,首先很感謝你無私的精神，係極度需要關於這病的資訊時，找到這個網站，真的十分感謝及感動。
我媽媽59歲，在三月頭摸到左邊乳房有硬塊，已於公立醫院做抽粗針是惡性，醫生說要在手術後先能確定期數。報告話硬塊
1.4×1.3×1.6 cm, a dense mildly irregular 2cm lesion…
淋巴照超聲波有兩粒腫大左，但抽了幼針就話淋巴無癌細胞。
見了公立醫院乳科醫生佢話按而家情況睇應該無走位唔需要做PET scan住，要做手術先。醫生向媽媽講解左佢係可以選擇全乳切徐或保留乳房，淋巴可以做前哨淋巴或全部淋巴切徐…亦都解釋左會有手腫的機會出現。
但媽媽聽完後就很快決定了要全乳切徐及全淋巴切徐…媽媽希望做得徹底一些。
手術將於9/4做, 但我很擔心媽媽這樣決定會不會太盡，以及佢全部切徐淋巴會令佢手術後有更多的唔舒服。我係唔係應該再勸下佢…
不好意思，這個問題比較愚昧，但我已經混亂，唔知可以再揾咩人問下。
謝謝
「全乳切除及全淋巴切除會清D」呢個係一個好多病友嘅誤解，直覺上以為切曬就最清最徹底，事實上如果部分割割得淸加埋電療，治療效果係等如全乳切除。不過全乳切定切部分，主要都係睇病人想點，因為局部割如果割唔清係要翻手嘅，同埋有病友想盡可能避電療。
至於淋巴，前哨淋巴係準確可靠的，如果有得揀，一定揀前哨淋巴而唔係全淋巴割，咁樣可以盡可能減低併發症的發生。
假設你媽媽最終都係選擇全乳切除，你盡可能都勸下佢做前哨淋巴啦，如果佢改變主意，記得盡早通知醫生，手術前嘅安排係唔同嘅。
感謝你神速回覆…
媽媽聽到醫生講解提及前哨淋巴係有可能有例外..前面個兩粒無事，啲癌細胞跳了去後面幾粒有唔好既野潛服左係到…所以我有少少唔知點勸。所以令到佢好決斷咁決定左。會發生醫生講的情況會有可能嗎？
謝謝你
凡事都有例外，醫生講嘅情況係有可能發生，主要當腋下淋巴已經受癌細胞塞住曬，咁前哨淋巴有可能唔準。不過實際情況係，呢個時候臨床（包括檢查／超聲波／PET scan）應該已經知道淋巴有受影響，而唔會比前哨淋巴你揀。因此比得你揀前哨淋巴，即係呢個例外係罕有發生嘅，考慮做什麼選擇時重點唔應該放係呢度。
打個比喻，你媽媽要上廣州，佢聽人講火車有可能出軌會發生意外，所以選擇行路上廣州。凡事都有例外，人地講嘅情況係有可能發生，主要當路軌受損時，搭火車有可能出軌。不過實際情況係，呢個時候例行檢查應該已經知道路軌受損，而會停開火車唔比你搭。因此比得你搭火車，即係火車出軌係罕有發生嘅，考慮點上廣州時重點唔應該放係「火車可能出軌」呢度。請恕我難聽D講句，冇理由有先進D嘅火車唔坐，走去咁蠢行路上廣州。
醫生您好! 請問做局部手術切除，乳房形狀及size有多大的變形嗎？手術後需否用儀乳嗎？謝謝!
有幾嚴重變型視乎好多因素，好難隔空講實。不過就算變型，冇咩人因此戴義乳。
明白了， 唔該晒!
醫生，今日有個公立腫瘤科醫生問我上次見個醫生有冇放marker 睇下術前化療個瘤有冇縮，但我料上次見個醫生同私家外科兩個醫生都無放，但私家有講過腫瘤源頭縮細但唔係聚埋，係咪因為唔係單一源頭所以唔落 marker? 咁而家我係咪唯有當完成哂化療後靠照多次 pet scan 睇睇？Thx!
如果一開始已經決定唔做／判定化療後都唔適合做保留乳房手術，咁唔放marker就合理。
如果術前化療係為咗縮細腫瘤，從而做保留乳房手術，就應該放marker。
Hm… 我係因為想睇下有冇機會做保留，私家就建議術前化療，定其實佢放左只係無話我知？想請問marker係點放？Thx.
好似抽粗針咁，只不過今次唔係抽組織出黎，係放一個2-3mm的金钃記號入去。
應該就唔會放咗冇話你聽，因為放D野入你身體，首先要得到你同意／簽同意書，另外會額外收費，所以你好難會唔知。
咁我即疊埋心水要做全割？希望幻滅咁有點失望。。。
我冇見過你，唔敢咁武斷去下結論。你應該問返自己的乳腺科醫生，睇吓係咪唔做得局部割？有冇需要而家擺返marker？
其實我係公立打化療都快埋尾，私家都覆過兩次診，都無提過擺 marker 呢樣野，直至今日另一位公立醫生問我就開始有點擔心，加上今日打化療都立立亂，好彷徨。我明天試下打去私家問下，希望佢唔係呃我其實點都要全割啦。><
你好，我在几个月之前做了个自体脂肪移植到胸部的手术。现在乳房有点痛。之后去了医院做检查，发现有很多的水瘤，请问是否正常？需要采取什么治疗？多谢医生！
唔可以求其講一句正常定唔正常，關於水瘤詳情去睇乳房水囊 ／ 水瘤 － 有冇危險㗎？。
请问如果没做自体脂肪移植到胸部的手术, 普通人的胸部是否会突然有很多的水瘤？？ 多谢医生
唔知。「突然」呢個概念牽涉前後對比，即係要短時間內照多過一次乳房超聲波去比較。現實中，係冇人會咁做去睇一D我地唔關心嘅野，因為突唔突然根本唔係重點。
明白了， 唔該晒! =)
你好醫生，媽媽剛做兩個乳房的全乳切除，今天術後第七日，引流出的液體越來越深紅色（原本是血水，變瘀血般顏色），越來越多，頭五天100ml/day, 今日第七天170ml了。這是否正常現象？需否提早看醫生/看急診？會否流血過量？謝謝！
呢度唔係一個合適的平台去評估正常定唔正常。只可以話一般黎講，我地會預期引流量越來越少。有任何疑問／懷疑，最正路嘅做法始終都係去睇醫生。
謝謝醫生，已帶媽媽回手術病房，等醫生檢查
醫生，媽媽一個月前做全乳切除，初初手術後只有傷口痛，但約兩個星期後傷口已好，反而乳房開始痛，是正常現象嗎？是甚麼原因呢？有甚麼運動可幫助改善嗎？謝謝
你指另外一邊乳房痛？定同一邊胸口傷口位置痛？
兩邊都切了，兩邊也有痛，但有事果邊痛多些。
做完手術後痛／痺其實好常見，有時因為神經開始慢慢恢復過來，所以時間上有D濟後。只要排除唔係發炎就可以了（發炎四大特徵：紅、腫、熱、痛）。
哦原來如此！謝謝醫生！釋除了我一個很大疑慮，媽媽每次覆診都問點解會痛，醫生都是說切左忽肉梗係會痛，但明明頭兩星期都不痛呀！那這種痛會隨時間消除嗎？還是終身都間中會痛？
至從媽媽患癌後一直都是跟焦慮與迷惘做朋友，對病及進展不太了解，好彩有醫生你一路伴我作戰，這個專頁真的很有意義，亦相信一定幫了不少病人和家屬！
大部分人都會隨時間減退，不過間中都有病友話長期受影響。其實冇咩可以做，真係好困擾就食止痛藥。
医生，請問 Femara 和 generic letrozole 除價錢有分別外，對於治療攻効 和副作用方便 有無分別？
客觀地講正副廠應該冇分別，主要成份過咗專利後又唔係咩高科技野，應該好多廠都做到（好似山寨手機咁）。
原廠實話副廠有雜質，副廠又會話自己冇分別／性價比高。
雖然如果經濟許可，我係會覺得原廠係好啲嘅，起碼心理上好D，呢D我地叫placebo effect（安慰劑效應）。同一支紅酒，7－11賣$50，酒莊賣$5000，你實話酒莊嗰支好飲D，7－11嗰支叫「苦」，酒莊嗰支叫「醇」。
原廠貴藥，食完「心理上」都覺癌細胞死快D。
醫生你好! 我 2015 年11 月時做過ultrasound + Xray 都冇話有事 (以前割過一粒良性， 所以ＫＥＥＰ住年幾驗一次), 今個月月中再做ultrasound, 發現一粒新的, 而且表面唔平滑。上星期抽針REPORT 出左係high grade DCIS, no evidence of invasive carcinoma. Ultrasound report: 2.08 x 1.64 x 0.93cm at 1 o’clock position, 3cm from nipple. 另外同一邊有另外6 粒良性 (唔係全部新), 其中2 粒比較近果粒惡性, 分別係 1o’clock 1cm from nipple: 0.35x 0.39x 0.36cm and 1o’clock 3cm from nipple: 0.96x 0.89x 0.53cm. 呢幾日見左2 位醫生俾左唔同意見我:
1. 一位好出名的乳腺外科 – 佢做多次ultrasound 之後見佢, 大約3 分鐘, 問一句答一句, 只係叫我要去做埋MRI先知使唔使全切， 因為如果ＭＲＩ唔係咁好，面積大就可能要全切
２一位出名醫德好好的外科，但唔係乳腺專科， 不過佢年紀大應該好有經驗。佢建議我做全切， 因為佢話我high grade , 加上如果要清埋其他果Ｄ， 可能面積都大出來效果可能唔靚。而且我３５，佢怕我有排擔心， 所以建議免除後患。佢話佢拍一個好好的整形科醫生效果不錯的，叫我見下佢先決定, 所以我都會見下佢問多少少
3. 我今天會再見多另外一個乳腺外科
其實佢都有佢道理，需係好難接受， 我而家好驚， 心情好矛盾，你可以俾Ｄ 意見嗎？ 另外點解佢話我唔似原位咁簡單 ? 佢話多數原位係細D, 好少形成左MASS…係咪咁呢?
兩個都係可行方案，睇你內心孰意邊一個。
原位癌最初係唔成形的，即係未有硬塊。到時間耐咗，就慢慢成形，呢個時候醫生會擔心會唔會已經演變到侵蝕性癌，不過佢地之間唔係等號，都有mass forming 嘅原位癌的。
你好! 本人媽媽11月初乳頭有紅棕色液體分泌, 經醫生轉介下到化驗所做左X ray + 超聲波檢驗, 報告指有乳腺管增生, 并轉介到政府醫院.
於11月初做手術切除增生部分及化驗, 化驗結果發現有乳癌 (原位癌 0期) , 因為割唔清所以要進行多一次手術, 而我們選擇了部分切除
於12月初進行手術後, 醫生指本身乳癌 (原位癌 0期)巳經割清. 但發現有病灶 (原位癌 3期) 要再一次手術
我們應該如何選擇? 全部/ 部分切除?? 因為巳經進行過兩次手術… 第三次手術是否應該全乳切除? 請提供意見 , 非常感謝!!
原位癌冇三期的，你應該理解錯D野。既然切兩次都未清，第三次要認真考慮全切。
新病灶應該係屬於原位癌(高)
因為十分擔心全乳切後及切前哨淋巴所帶來的後遺症, 所以之前選擇了部分切
醫生指該乳癌係照唔到, 所以要拎組織化驗先知..如何得知是否存在其他病灶?
請問第三次都切唔清, 第4次做全乳會否帶來很大的影響?
為何第三次要認真考慮全切? 第三次選擇部分切是否太大風險??
thanks a lot! Merry Christmas*
唔切唔會知仲有冇其他病灶，所有隱藏病灶都係靠電療去處理。
第四次全切冇咩影響，主要係心理疲累。
第三次局部切除風險大唔大，即係成功率有幾多，要靠醫生評估，全切係簡單D嘅選擇。即使揀全切，都唔代表一定要做前哨淋巴手術，有得揀嘅。
第三次手術都選擇了部分切除 , 不幸地手術結果報告指本身乳癌 (原位癌 低+高)巳經割清 , 於6點鐘方向發現有新病灶(原位癌)
因為於兩個月內巳進行過3次手術,巳經覺得身心疲倦, 這次醫身建議全乳切除.
醫生指該乳癌係照唔到, 所以要拎組織化驗先知..請問現時有否新科技可以檢驗出 ?
如果唔再切 , 只進行電療是否有幫助?
如果該原位癌發展到1期後, 是否可於儀器檢查到位置, 再進行部分切除更好?
其實原位癌理應不會轉移, 是否不應做前哨淋巴手術?
所以之前選擇了部分切, 但現在進行全乳切除感到十分疲憊…
請提供意見 , 非常感謝!!
原位癌有時可以好鬼鼠，之前已經建議你全乳切除，現在建議不變。
未切清走去只電療係唔安全。
原位癌全切做唔做埋前哨淋巴係一個個人選擇，做同唔做都有利有弊。
醫生您好，我目前情況是右乳癌擴散到淋巴(T3N2M0)，療程是先化療後手術再電療。暫時完成了兩次化療，所以仍未確定做哪種手術（希望有選擇啦）。早前到過一位整形醫生了解過各項手術過程，除了感覺上了一課外，醫生亦提及到如果使用肚皮自身組織做重建手術的話，可以用一塊類似「膠片」去放在被移走組織的位置，否則肚臍位置可能會在埋口時移去一邊。由於先前聽身邊分享經驗的女士都未曾提及過「膠片」，所以想請教吓醫生係咪有真係會咁呢？先謝謝您！
唔係膠片，係一塊唔溶嘅網（prolene mesh），用黎強化肚皮，有整形科醫生擺，有整形科醫生唔擺。
醫生你好!! 首先好多謝有你呢一個 breasthk, 因為當我知道太太患上乳癌時候真係手足無措, 機緣巧合之下搵到呢到 , 真係幫咗我好多, 真係好多謝你.
我太太今年45歲, 證實患上乳癌第一期, 20- March 2020 做完局部切除手術 病理報告資料如下:
1.The Paraffin sections show isolated tumor cells in one lymph node. The biggest group measures 0.15mm in greatest dimension. No extra capsular extension is seen. The remaining 5 lymph nodes are unremarkable.
2. Invasive ductal carcinoma , 1.5cm
3. Mitotic rate is up to 20/10 HPF.
4. The tumor is thus of modified Bloom and Richardson Grade II
5. The resection margins are clear , The tumor is 0.55cm from the deep resection margin which is the nearest resection margin.
6. ER>80% , PR>90% CerbB2 stain is negative ( Score =1 )
7. MIB stain is about 30% to 40%
我擔心我太太做化療對身體唔好 , 我知道而家處於灰色地帶 , 現在已安排做乳癌基因測試正等待結果…..
我有2個問題:
1. 由於有0.15 mm 擴散到去前哨淋巴 , 呢個係咪需要考慮做唔做化療嘅原因之一 ?
2. 電療係咪已經可以解決到擴散到前線淋巴的問題 ?
由於我需要解釋畀我太太聽 所以我只可以問到你 萬分感謝
1）Isolated Tumor Cell癒後同淋巴冇感染類似，所以唔係化療原因。
2）同上。
醫生你好!! 首先再次多謝你抽出寶貴時間….
我太太45歲 Oncotypr DX 化驗報告 Recurrence Score 18 ( Chemo Benefit ~1.6% ) / Distant Recurrence Risk at 9 Years with AI or TAM alone 5%
我有4個問題:
1 . 如果開始打停經針服用 AI, 係咪已經等同化療結果? 呢個結果需要做化療嗎 ?
2 . 如果先服用舊藥, 到自然停經後再轉服用AI 有冇更多好處 ? ( eg: 減少骨質疏鬆可能性 ? )
3 . 化療 / 不化療, 打停經針服用 AI / 不化療, 用舊藥到自然停經後再轉服用AI , 請問還有沒有其他選項?
4 . 如你來做我 , 請問會選擇邊一個?
不恥下問 恩同再造 萬分感謝 !
1）差不多等同第一代化療效果。Recurrence score 18 不需化療。
2）對骨骼健康好D。
3）冇其他選項。
4）用舊藥。
多謝醫生嘅指教!!!
同太太商量完後 , 決定先去驗骨質密度 , 然後再決定 AI 定 舊藥 !!
最後再有兩個問題想指教下
1. 停經針係一個月打一次 , 定係三個月打一次 , 有咩分別 ? 如果一直打停經針, 如何知道幾時真正停經?
2. 正常情況下需要幾耐返去做複檢
不恥下問 恩同再造 萬分感謝 !
1）效果冇分別，只在於方唔方便。
2）冇經期黎。
3）https://www.breasthk.com/follow-up/
麻煩曬你醫生!!
我太太而家步入電療程序! 又係一個新挑戰.
見完腫瘤科醫生後 , 腫瘤科醫生選擇私家醫院完成15次電療.
但係我之前有閱讀過你有關電療的文章 ” 如果癌細胞有侵蝕性，就要局部再加電5次，即總共20次 ”
我太太係 Overall Stage IA pt1cN0 (i+) 係唔係要再加電五次呢 ? 電15次是不是只係適用於原位癌?
請問食維他命d補充劑 (或者曬多啲太陽) 有冇對癌症復發有幫助?
不恥下問 恩同再造 萬分感謝 !
我會加。
維他命D補充劑 (或者曬多啲太陽) 對癌症復發冇幫助。
大恩不言謝 願好人一生平安
醫生你好，
我係先化後術，化療共6針，已打5針，如果而家先放marker可以嗎？
另外切嘅位置其實係癌細胞存在過嘅位置定係縮細後嘅位置呢？
謝謝
要睇吓仲見唔見到個腫瘤，先知可唔可以擺marker。
切就切縮細左後嘅位置。
請問打麻醉藥放marker會影響化療藥效嗎？
唔影響。
你好!本人患乳癌，有骨轉移，沒有做手術，一直有標靶藥及荷爾蒙治療。一年後，最近照Petscan，乳房癌細胞縮少80-90%.超聲波近乎找不到腫塊。但骨頭的癌細胞雖然減少，但沒有消失。現在醫生建議做乳房手術局部切除。但我家人認為身體其他地方還有癌細胞，怕手術後癌細胞客易再度擴散，難控制。想尋求意見。
再者，乳房的腫瘤近乎不見，醫生建議加marker識別位置，若我最終沒有做手術。那個marker對本身有影響嗎？
謝謝
要視乎骨抗散控制成點，如果骨未控制得好，乳房又冇病徵，唔值得做手術。如果骨控制得好好，乳房有病徵，就值得做手術。
如果都冇諗住做手術，就無謂擺marker，雖然marker冇害，但做乜野要捱一針先。
醫生你好，我近來發現左邊有硬塊，做咗抽完針，報告出咗話我係3B三陰性乳癌，左腋下淋巴又有一個腫痛位，在夾胸照到右邊胸有小米粒，右腋下又有小粒⋯（右邊未有報告），請問我仲有冇得醫？仲有幾耐命？公立醫生話至惡嗰隻⋯⋯並冇透露什麼⋯⋯
未擴散去其他器官就有得醫。
幾耐命就睇：你唔怕老實同我講｜其實我仲有幾耐命？
https://youtu.be/QdJRsxt84b0
醫生你好
我媽媽（今年71歲）8月中肝癌HCC做了ablation，術前PET-CT發現左胸著燈需要再檢查確定。後來於8月尾做了mammogram+USG+抽幼針證實為cT2N0 ILC ER+PR+HER2- size 約16x14x20mm
醫生話可選擇局部切或全切，+前哨淋巴
媽媽唔介意每日回醫院電療（活動能力ok）
1）以復原速度+後遺症影響方面，是否選擇局部切除更好呢？
2）另外醫生建議術前進行MRI Breast with contrast，又是否需要呢？
3）醫生有提及可服用荷爾蒙藥，請問是否術後先開始還是術前已經可以開始服用呢？
感謝🙏🏻
1)局部切復原比較快。
2）要睇吓佢想睇啲乜，僅僅由你提供嘅資料好難判斷。
3）手術後先開始食。