乳癌食療及食物禁忌 － 戒食雞？戒豆漿？

Posted by in Diet 食療

乳癌食療及食物禁忌－咩醫生建議嘅治療又做晒喇，都係時候睇吓有冇咩乳癌食療可以幫助醫乳癌／預防乳癌？D人話唔好食雞／唔好飲豆漿，有冇根據㗎呢？食物方面有咩禁忌？邊D食物可以食?邊D唔可以食？洗唔洗戒口？⋯⋯

乳癌要戒雞？戒咗就唔會復發？馬國權醫生
乳癌要戒黃豆？戒咗就唔會復發？馬國權醫生
乳癌要戒糖？糖分會養癌細胞？馬國權醫生
乳癌手術洗唔洗戒口？馬國權醫生

讀者來函：「what kind of food/fruit do we have to avoid if taking tamoxifen? I am a her2 patient. Currently , I’m undergoing herceptin and tamoxifen treatment . Is there any problem if taking turmeric and I3C supplement? Is there a problem if having an orange daily? Will these have unfavorable effect to those two treatment?」

讀者英文來函，但為咗可以更傳神去講解，令多D本地讀者有共鳴，我會譯返廣東話同埋改少少上文下理去回答。

乳癌食療

「人地話薑黃（turmeric）同I3C可以醫乳癌，得唔得㗎？」

呢個問題其實好典型，你可以將薑黃／I3C代咗你想問嘅食療／自然療法入去，成條問題就變咗「人地話XXX可以醫乳癌，得唔得㗎？」

簡單D講，有實在證據証明真係醫得到乳癌嘅療法只得5樣，就係我成日講嘅手術、化療、標靶治療、電療同埋荷爾蒙治療。

其他所有咩食療、自然療法、布緯食療、褐藻糖膠、人體充電、能量水、古方、古法、秘方，厚道D講就好有潛力，實際D講就係唔得嘅，刻薄D講就全部都係呃人嘅。

「唔係喎，佢話YYY試過真係得。」

呢D咪就係警訊嘅騙案囉，唔搵多幾個媒，點引你上當？你點會幫襯佢？假鮑魚就係咁樣賣嘅。

唔通話你聽信親佢都冇好下場／信親佢都死，你會覺得佢誠實而幫襯佢？

「點解我／家人咁蠢會信佢？」

唔係你／家人蠢，只不過係人性的弱點。所有騙案都係建基於貪婪同恐懼。

比人呃買野嗰D係衰貪心，以為呢個世界真係有捷徑，以為可以咩都唔做一夜致富、轉個手就賺幾個開、唔洗做運動訓係度就可以減肥⋯⋯下刪一萬個例子。

乳癌患者／家人比人呃係衰恐懼，怕個病冇得醫／怕治療辛苦。當有人話比你聽唔洗辛苦、唔洗做手術、唔洗做化療，有秘方食少少野就可醫乳癌，你仲唔心動？一百萬人叫你唔好試，你都仲會心思思想試吓，哪怕係叫你飲香爐灰你都會飲。

記住，呢個世界係冇捷徑嘅（如果真係有一啲好簡單嘅方法就可以處理一啲好複雜嘅問題，呢啲問題已經一早唔再係問題啦）。如果乳癌咁簡單可以用食物搞掂／幫助，仲有人叫佢做絕症？仲有人驚佢？仲有人做手術／做化療／做標靶治療／做電療／做荷爾蒙治療？貪呢D治療方法辛苦？定係貪得意？

乳癌食療

圖片來源：互聯網

所以如果有人同你講XXX能醫百病，尤其係D癌症／絕症／長期病患，千萬要小心，佢地利用嘅就係癌症病人嘅痛苦、無奈同埋絕望。唔好話能醫百病，只要佢真係搞得掂其中一種長期病患／其中一個棘手問題，嗰個人都攞咗諾貝爾醫學獎啦，仲得閒係度同你分享，所以試之前你真係要諗真D諗清楚D。

「咁XXX食療／療法得唔得呢？」

呢個世界咁多食物／咁多療法，邊有醫生／人可以講比聽你每種食物／每種療法得定唔得，剩係同你講百佳有得賣嘅食物都夠講一世。

「咁點算？醫生都講唔實，我作為病人咪仲迷茫？」

我唔會同你講每一隻食療姐，我教你自己分辨咪得囉。要保護自己咪比人呃，你要學識療法照妖鏡。

療法照妖鏡

通常醫生去評估一種新療法有冇效，有5個階段：
1）發現期：我地留意到，做咗XYZ之後，乳癌好似好咗喎，「XYZ」同「乳癌好咗」好似有關聯咁。
2）實驗期：細心分析、對照一吓究竟X？定係Y？定係Z？同「乳癌好咗」有關聯（association），有關聯嘅就再睇吓有冇因果關係（causality）。有關聯唔等於有因果關係，情況有如你見到女明星下嫁比光頭阿伯，你唔可以下一個「女明星鍾意光頭阿伯」嘅結論。因為「光頭」只係同「下嫁阿伯」有關聯，並唔係「下嫁阿伯」嘅真正原因。真正「下嫁阿伯」嘅原因係因為阿伯有錢，「有錢」同「下嫁阿伯」先真正係因果關係。呢D冇因果關係嘅關聯因素醫生叫佢做混擾因素（confounding factor），佢地只不過魚目混珠。
3）評估期：如果確定X同「乳癌好咗」有因果關係，就再詳細睇吓點樣用X好。咩劑量？點食法？食幾耐？有冇副作用？安唔安全？
4）比拼期：知道X點用之後，就睇吓同現有嘅治療邊個好D？
5）配對期：知道X真係好過現有治療之後，就再睇吓咩人先最夾最啱洗最大功效。

經歷得住呢5個階段療法照妖鏡嘅洗禮／瀝煉嘅治療，醫生先會信先會推薦比病人用。

「唔係好明，可唔可以舉吓例？」

情況有如May姐做飲食節目，帶你食好野、教你煮好餸一樣：
1）發現期：我地留意到，落咗雞汁嘅咖喱薯仔雞翼，真係好味／雞有雞味，「雞汁」同「好味」好似有關聯咁。
2）實驗期：細心分析、對照一吓究竟係雞汁？定係咖喱薯仔？定係雞翼？同「好味」有關聯（association），有關聯嘅就再睇吓有冇因果關係（causality）。
3）評估期：如果確定雞汁同「好味」有因果關係，就再詳細睇吓點樣用鷄汁好。落幾多滴？點食法？點樣點？有冇副作用？安唔安全？
4）比拼期：知道雞汁點用之後，就睇吓同現有嘅調味料（例如味精）邊樣好味D？
5）配對期：知道雞汁好過現有嘅調味料之後，就再睇吓咩人先最啱食最鍾意用最鍾意買。

「開始明明地，點解你一開始就話XXX療法唔得？佢地過唔到療法照妖鏡？」

正是如此，好多時新療法／自然療法／食療等等，連第一關都過唔到，所以我幾肯定佢地唔得。

我地一齊睇吓佢地嘅謬誤出係邊度：
1）發現期：我地留意到，原來「雞汁」同「好味」都冇關聯，「XYZ」同「乳癌好咗」都冇關聯。好多所謂新希望／好有潛力嘅療法就咁就潛咗落深海，根本就冇浮力。
2）實驗期：就算「雞汁」同「好味」有關聯，好多時都冇因果關係，「好味」只因隻雞靚。就算「XYZ」同「乳癌好咗」有關聯，好多時都冇因果關係，「XYZ」只係混擾因素。
3）評估期：就算真係確定雞汁同「好味」有因果關係，都要詳細睇吓點樣用鷄汁好，食得多會唔會傷身體／食死人。就算真係確定「X」同「乳癌好咗」有因果關係，都要詳細睇吓點樣用「X」好，食得多會唔會傷身體／食死人。副作用仲大過好處嘅療法又係唔用得。
4）比拼期：知道落咗「雞汁」好味D，又知道點落好／唔會食死人，但係佢夠唔夠落「味精」好味先？如果唔夠味精好味，我不如落味精好過。知道用咗「X」乳癌好咗，副作用又可接受，但係佢夠唔夠「手術／化療／標靶治療／電療／荷爾蒙治療」好先？如果唔夠現在嘅好，始終都係取締唔到現有治療嘅地位。
5）配對期：知道「雞汁」好過「味精」之後，係咪人人啱食先，原來有部份人唔受得呢D調味料。知道「X」好過現有治療之後，係咪人人都夾先，會唔會有D人根本唔夾／冇效。

好多時新療法／自然療法／食療等等仲停留係第一階段，即係連關聯都未觀察到有，醫生仲點會同你浪費時間研究點食／點用好呢。

回歸讀者問題，薑黃（turmeric）同I3C對Herceptin同埋Tamoxifen應該冇影響，不過同一時間對乳癌個病情應該都冇影響，我會話薑黃同I3C都係停留係關聯都未觀察到有嘅階段，要證明佢地真係得，仲有好長嘅路要走，條路可以係一個圈，永遠冇終點，永遠走唔完。

布緯食療

所以當你學識世界上冇捷徑，同埋療法照妖鏡5關，好多療法你見到只會一笑置之。例如網上熱烈討論嘅「布緯食療」，話茅屋芝士加亞麻籽油可以醫埋乳癌，我只可以好似唐唐咁講：「你呃人！」

如果你信布緯食療，佢唔單止可以醫乳癌，俱俱嘅茅屋芝士加亞麻籽油仲可以醫肝癌、狗嘅淋巴癌、中風、便秘、暗瘡、減肥、濕疹、牛皮癬、痛風、糖尿病、胃病、膝關節痛、風濕、高血壓、鼻敏感⋯⋯總之就能醫百病。聽都覺得佢勁過保濟丸，真係有病唔洗怕。

乳癌食物禁忌

圖片來源：保濟丸

如果茅屋芝士加亞麻籽油得，世代冇乳癌，我地西醫執咗粒啦。政府唔應該比錢開到周圍係醫院，政府應該比錢開多幾間鋪去賣茅屋芝士同埋亞麻籽油。

「咦，同你上面講呃人能醫百病嘅騙子咁似嘅？」

冇錯，呢D乜乜食療物物自然療法就係一個利用長期病患者痛苦去呃人嘅好例子。與其信佢，我寧願你信May姐雞汁能醫百病，起碼最尾醫唔好，都叫做哈哈哈哈過。

末期冇得輸？

「我已經係末期，冇野可以輸，真係想咩都試吓，睇吓有冇一絲希望⋯⋯」

如果西醫真係舉晒白旗投哂降時，你去試呢D古靈精怪野，都無可口非。因為好多時新療法嘅突破，都要有人勇於去試先會成事。不過試還試，起碼搵D有科學基礎嘅療法去試，例如已經觀察到有關聯，不過唔知有冇因果關係嗰D療法，或者教學醫院嗰D研究咁。千祈唔好走去試飲香爐灰。

如果現有有效嘅5大療法你都未做，就走去行捷徑，試呢D古靈精怪野，實屬不智。

另外我想提醒你，絕望時你都唔係冇野輸。有時呢D古靈精怪療法比咗個假希望你，到你後來意識到希望幻滅時，希望越大失望越大，攀得越高跌得越痛。

同埋，我見過有病友傾家蕩產、賣當借去試呢D療法，雖則話錢又帶唔走，但都唔好留下一屁股嘅債。

仲有，好多時呢D療法都食埋D無謂野／戒埋D無謂口，大大影響咗最尾呢段路嘅生活質素。

最後，如果屋企人都覺得新療法呃人／唔想你試，你死都要信三姑六婆／神棍去試一試一D冇根據嘅療法話，仲會影響埋同屋企人嘅關係添。

所以就算末期病人都可以輸希望、輸錢、輸生活質素、輸家庭關係，更何況其他人，試呢D冇根據嘅野唔係冇成本嘅。

乳癌食物禁忌

「Breast HK，我明喇，唔會再沉迷呢D食療。不過我而家用緊Herceptin同埋Tamoxifen，洗唔洗戒口？日日食橙得唔得？」

標靶藥Herceptin暫時我地見唔到有咩食物會影響佢，所以唔洗戒口。

相反，食緊抗荷爾蒙藥Tamoxifen，就有兩樣野要注意：
1）唔好同一類我地叫SSRI（Selective serotonin re-uptake inhibitors）嘅抗抑鬱藥一齊用，例如paroxetine（Paxil）、fluoxetine（Prozac）同埋sertraline（Zoloft）。因為原來Tamoxifen要係肝度轉化成有用嘅狀態（大陸D講，即係激活），靠嘅就係一種叫CYP2D6嘅酵素。而SSRI喺2009年先被發覺原來會抑制CYP2D6，搞到Tamoxifen激活唔到，發揮唔到應有嘅作用。

2）要避免食西柚（Grapefruit）同埋苦橙（bitter orange）。西柚首次被發現會影響藥物吸收係1991年，之後陸陸續續有報告出話佢會影響好多種唔同嘅藥物，其中兩種關乳癌事嘅就係Tamoxifen同埋lapatinib，背後原因同上面差不多，原來西柚會抑制CYP3A4酵素（另一隻酵素），搞到Tamoxifen激活唔到，發揮唔到應有嘅作用。文獻就話苦橙（bitter orange）都會影響CYP3A4，至於我地平時食嘅橙（Mandarin orange／sweet orange）有冇影響就冇人講。以上影響我地僅僅知道有因果關係（即上面療法照妖鏡第二階段），至於食幾多先有事／先冇事？係咪人人都唔好食？就仲未知，穩陣咪唔好食囉，又唔係有獨有營養一定要食佢。

洗唔洗戒口？

「吖，講開戒口，成日聽講乳癌病人要戒食雞／戒豆漿／戒豆腐，真唔真？」

乳癌

圖片來源：互聯網
乳癌要戒雞？戒咗就唔會復發？馬國權醫生
乳癌要戒黃豆？戒咗就唔會復發？馬國權醫生
乳癌要戒糖？糖分會養癌細胞？馬國權醫生

其實講黎講去，背後原理都係怕女性荷爾蒙（雌激素）刺激乳癌生長。所以，第一樣要知就係你隻乳癌係咪對女性荷爾蒙有反應先（ER or PR ＋）？

如果你隻乳癌對荷爾蒙根本就冇反應（ER AND PR－／三陰性乳癌／醫生冇叫你食5－10年口服藥），戒唔戒口本身雌激素都刺激唔到乳癌，即係唔洗戒口囉。

「咁如果對女性荷爾蒙有反應呢？洗唔洗戒口？」

我會話戒口呢樣野仲停留係療法照妖鏡嘅第一階段，即係仲未能確定有關聯。

理論上如果乳癌對雌激素有反應，咁梗係少D雌激素好D啦。實際上，戒口同「少雌激素」又冇一個直接線性嘅因果關係。

「此話何解？」

其實身體嘅雌激素大部份由身體自己制造（收經前由卵巢造，收經後由脂肪造），由食物攝取嘅根本微不足道。再者我地太多野唔知喇：
1）食物有幾多雌激素？唔知。D人驚食雞，最主要係有D無良商人為咗谷肥D雞，就加D雌激素入飼料入面，D雌激素主要會積聚喺雞皮，所以D人話唔好食雞，尤其雞皮。至於黃豆類製品，佢地就驚植物雌激素（phytoestrogens）。
2）非打針雞又點呢？打針雞但唔食皮又點呢？唔知。
3）食咗大量雌激素，條腸有幾吸收呢？唔知。
4）真係好吸收嘅話，每日可以食幾多？唔知。
5）知道每日可以食幾多，如果今日食多咗聽日食少返又點？唔知。
6）真係食過量，吸收咗入身體，D抗荷爾蒙藥Tamoxifen抗唔抗衡得到？唔知。
7）抗衡唔到嘅話，日日過量要食幾多年先出事？唔知。
8）出事嘅話，有冇得搞？影唔影響命仔？唔知。

萬九幾樣野唔知，貿貿然叫你戒定唔戒某一樣食物，都唔係一個負責任嘅做法。

反而收經後因為雌激素由脂肪制造，所以收經後肥伴係會增加患乳癌機會，所以要戒就戒所有可以致肥嘅野。不過唔好話乳癌吖，減咗肥，心臟病、糖尿病乜都少D啦，實會長命D。

「醫生都咁多唔知，咁我點算好？」

三陰性乳癌／對荷爾蒙冇反應嘅乳癌（ER and PR －），唔洗戒口。

細膽／杞人憂天嘅，戒咗佢又冇問題嘅就戒囉，好似D人食齋咁姐。原理好似宗教咁，講嘅唔係證據，講嘅係一個「信」字。

乳癌飲食注意事項

圖片來源：東方互動

樂天知命嘅，唔洗戒口，咩都食得，咁你嘅人生先活得有質素（quality of life）。

總結

今堂都算長，係時候總結一吓學咗D乜：
1）有實在證據証明真係醫得到乳癌嘅療法只得5樣：手術、化療、標靶治療、電療同埋荷爾蒙治療。
2）其他所有咩療法，厚道D講就好有潛力，實際D講就係唔得嘅，刻薄D講就全部都係呃人嘅。
3）呢個世界冇捷徑。
4）小心嗰D聲稱能醫百病嘅騙子，佢地利用嘅係癌症病人嘅痛苦、無奈同埋絕望。
5）療法照妖鏡嘅5個階段，去幫你分辨牛鬼蛇神。
6）乳癌好絕望時都仲有野輸、仲有野比人呃。
7）食緊Tamoxifen要避SSRI同埋西柚。
8）戒唔戒口就因人而異，好多野人類都唔知，現階段唔洗浪費時間強求證據，主要講嗰「信」字。

有唔明？係下面寫低佢，我會盡量解釋你聽⋯⋯

封面圖片來源：互聯網