乳癌四期 － 我係咪第4期？
你上次教我地咩叫乳癌三期，我對返自己個報告，好唔開心我已經擴散咗呀！咁而家即係第幾期？我唔想係乳癌四期呀！D人話係末期黎㗎，我仲有好多野未做，唔可以咁快死㗎⋯⋯
警告
本篇內容涉及一些極度敏感的話題，可能令人不安／產生不可估計的負面情緒。如閣下不欲看有關乳癌四期的資料，或心理狀況未準備就緒，請立即離開。
圖片來源：互聯網
停一停，諗一諗，問吓自己準備好未？
我係咪乳癌四期呢？
「我係咪乳癌4期呢？」
最簡單嘅方法就係問醫生。
「佢話比我聽確診乳癌時，個心都離一離，我已經亂到唔識問⋯⋯」
第二個方法，就係睇返自己電腦掃描／骨掃描／正電子掃描嘅報告。
有齊資料，就可以根據American Joint Committee on Cancer (AJCC) 7th edition (2010) TNM staging 去評估第幾期。
圖片來源：American Joint Committee On Cancer
有興趣嘅，可以㩒入去仔細睇下成個staging嘅細項:
https://www.breasthk.com/pamphlet/breast-cancer-staging_AJCC_7th.pdf
有iPhone 又唔介意比$83嘅（暫時免費嘅我搵唔到一個好用），可以下載以下apps
「自己唔係好識睇，可唔可以講多少少？」
圖片來源：American Joint Committee On Cancer
乳癌4期好不幸就係我地好怕聽到嘅癌症末期（即係擴散／轉移咗去其他器官），腫瘤幾大／淋巴有幾多受影響已經不再重要。
擴散咗去其他器官
「咁點先知有冇擴散去其他器官？」
呢個要照掃描先知。免費嘅就有普通電腦掃描（CT scan）同埋骨掃描（Bone scan），貴嘅就有正電子掃描（PET scan）。詳見乳癌分期 ﹣ 我係早期定末期？
2014-04資訊：香港政府會免費資助新確診乳癌病人，去私家醫院照普通電腦掃描（公私營計劃），唔洗係公立醫院慢慢等，1個星期就有得照，計劃幾時完就唔知。至於正電子掃描，最平應該係沙田仁安醫院（有D小型化驗所可能仲平D，不過質素參差），公立醫院轉介去有折，大概＄8000，優惠幾時完又係唔知。
「如果唔照掃描，會唔會知有冇擴散？」
咩都唔照，基本上要好嚴重嘅擴散先會知（要早發現擴散就要靠掃描）。餘下可以靠嘅就係病徵、臨床檢查、同埋抽血。
乳癌四期病徵
通常乳癌4期病徵係好後先出黎，4個常見嘅擴散／轉移地方：
1）骨轉移（bone metastasis）：即係你聽人講嘅「入骨」，病徵就係骨痛，有時嚴重可以痛到訓唔到。（不過唔好見自己周身骨痛就驚定先，可以係普通風濕／食抗荷爾蒙藥AI嘅副作用）。另外如果嚴重嘅骨轉移，係可以壓住脊髓神經（cord compression），搞到下半身癱瘓。
2）肺轉移（lung metastasis）：通常都係肺積水，搞到你覺得條氣唔順，呼吸有困難。通常病友呼吸有問題，都已經一早去咗急症室求診，唔會等到門診覆診話醫生聽。
3）肝轉移（liver metastasis）：通常冇咩病徵，後期右上腹可能痛（因為肝大脹住咗），另外個人可能會黃（黃疸jaundice）。
4）腦轉移（brain metastasis）：慢性病徵就係頭痛同埋無緣無故嘔（因為腦內壓力過高），急少少嘅可能好似有D輕微中風跡象（突然間手腳唔協調／冇力，口齒不清）。
臨床檢查
「死啦，我好似有以上病徵，點算？」
有就快D睇醫生話佢聽，等佢幫你檢查吓，之後照掃描確定係咪有事。
「檢查D咩？」
都係就住以上病徵，做返相應嘅野：
1）骨轉移：幫你敲吓D骨，睇吓邊度有可疑，加減照吓骨掃描（bone scan）。
2）肺轉移：幫你敲吓同聽吓肺，睇吓有冇肺積水，加減照吓肺部X光（chest X-ray）。
3）肝轉移：幫你摸摸肚，睇吓嗰肝有冇大。
4）腦轉移：幫你睇吓有冇中風跡象，有懷疑就照有顯影劑嘅腦掃描（contrast CT brain）。因為腦轉移冇其他轉移咁常見，所以平時一般初步做嘅電腦掃描／正電子掃描都唔包呢部份。因此要自己留意病徵，有懷疑就提提醫生，傾吓洗唔洗照腦。
抽血驗癌指數
「你上面話抽血都知，我都聽過人地話咩驗癌指數，其實咩黎㗎？」
驗癌指數即係抽血檢查，驗2樣野／指數：
1）CEA
2）CA15.3
你成日聽人講，因為好多保險驗身／小型化驗所好鍾意氹人抽呢D血（聽落去都正啦，抽血就知有冇癌），現實邊有咁理想呢。如果係咁簡單，醫生都失業啦。
「咩叫冇咁理想？」
呢D癌指數，並唔靈敏，亦唔準確，只不過係多一個警號咁樣。
「又唔靈敏、又唔準確，即係點？」
唔靈敏，即係有癌佢都唔高，有如有火警警鐘都唔響。
唔準確，即係佢高都未必有癌，有如警鐘響都冇火警（誤鳴）。
「好似咁廢，咁驗黎仲咩？」
有兩個用處：
1）已確診有乳癌，臨床又懷疑第四期時，就抽一抽血驗癌指數，去確定真係好可疑，去支持我地要照掃描嘅決定。
2）當乳癌確定第四期，而指數又高時（早期擴散／轉移都可以唔高），就可以用佢黎觀察對治療嘅反應（睇吓治療有冇效）。
乳癌四期治療
確診乳癌第四期係非常非常非常之唔開心嘅，即管喊出黎啦⋯⋯
心情再難過，時間始終要過。
條路再難行，我地始終要行。
呢一刻，條命已經唔係淨係屬於你一個：
你老公唔想你放棄⋯⋯
你仔女唔想你放棄⋯⋯
你父母唔想你放棄⋯⋯
你家人唔想你放棄⋯⋯
你男友唔想你放棄⋯⋯
要支持住呀～
下篇同你傾吓呢條路，應該點樣行落去：「乳癌四期治療攻略 － 末期仲有冇得醫？」
香港乳癌及乳病治療中心 
你好，希望能請教：癌細胞是雌激素及黃體素受體（ER+/PR+），High Proliferative activity，另HER2-ve，發現時已擴散到骨。呢個時候應該用化療或荷爾蒙療法，對病者身心會好一些？謝謝賜教。
唔可以網上隨便咁答，因為牽涉大量專業知識／個人因素／腫瘤分佈、特性等等，尤其是一講到個「心」字，更加唔應該隔空比意見，所以都係建議跟隨閣下腫瘤科醫生建議。
只可以話荷爾蒙療法副作用溫和好多，但功效係慢D（幾個月後）先見到開始上力。
謝謝！明白多一點了。政府醫生給我們選擇了先化療，也開始給我們打骨針。醫生沒解釋太多，是否在化療後擴散到骨的癌細胞會被抑制／消除？又或荷爾蒙療法只會抑壓癌細胞生長？太多繁瑣問題，請諒。
無論化療定荷爾蒙療法，係乳癌四期嘅目的都係抑制癌細胞生長，我地並唔能夠消滅所有癌細胞。
另外，醫生你真的很有經驗和很有心，到這期數的病人應該揀有較劇烈反應的療法還是慢點、“舒服”點的療法，應否也讓病人參與選擇？縱使可能要花很多時間給病人解釋，但似乎也是關於到病人的尊嚴⋯⋯
其實無論咩階段嘅治療，都應該比病人參與選擇，因為醫生好多時只會好單純咁睇住D數據黎做，邊樣殺癌細胞多D就做邊樣，往往忽略咗病人嘅感受／需要。究竟某某治療係「激進」定「進取」，往往只係一線／一字之差。我相信大部份醫生都想多花時間解釋比病人聽嘅，只可惜受制於客觀環境所限，好多時都關顧唔到病友嘅尊嚴，請諒。
衷心感激回覆。其實我哋都轉咗個concept叫與癌共存，諗緊乜嘢係好方法可以喺同一個host入面好好相處。天真咁諗，喺生物學嘅觀念上，冇理由有生物想一拍兩散。
呢個想法正確及正面。
抱歉想表達多少少今次的感受：4期（又或者叫末期）係咪等如死梗？一般大眾就好害怕腦中嘅景象。在病人組織入面認識到好多同期朋友，有復發嘅，亦都有確診咗4期好耐，其實除咗係喺生活上keep住食藥，好多都係如常生活。當然依家隨便同個親友講：我患咗癌症末期，佢可能會傷心過你。所以，社區教育真係好需要，唔好先被嚇死⋯
當日見醫生，佢第一句話係：有得醫，你以後就當自己係長期病患者喇。
醫生你好，幾個月前曾留言，現在太太嘅化療已完成6針療程（全部紅針），跟住就係荷爾蒙療程了。之前化療過程見過不同政府腫瘤科醫生，問題出現了：有醫生說要做乳房切除，還快速安排了手術期；但當見外科醫生時，旁邊另一位腫瘤科醫生又說其實冇必要做，做咗係統計上對存活率全冇影響，畀佢就唔會做，叫我哋自己揀⋯⋯咁，前後兩位顧問醫生，我哋是但揀一樣，咪即係否決另一位醫生嘅決定？自問讀書少，醫生佢哋自是聰明百倍，畀我哋揀完全唔覺得係我哋嘅選擇自由，反而有啲被愚弄嘅感覺，點揀呀？！寧願從頭到尾只給我哋一個意見，仲好⋯
醫生，其實，應該從邊一個方向去諗，可以令個決定比較有意思呢？謝謝。
（四期、四十多歲，荷爾蒙授體、已擴散到骨、頗多位置。）
乳房有冇病徴？打完針D擴散控制成點？
表面冇異樣，第四針時照pet scan，報告話腫瘤有縮小，活躍度減低咗，而有醫生意見話如果早用T針腫瘤可縮得更細，但政府都全用6針紅針。
如果乳房有病徴／擴散完全熄滅曬，做手術係有意思。換句話說，如果乳房冇病徴，而D擴散又唔係完全熄滅晒，我唔會揀做手術。
即係唔揀嘅理由都係手術喺呢個情況對療程冇乜幫助？太太有個想法：如果第時乳房有病徵如侵蝕流濃時才發覺不能切時會否很麻煩？而現在做這手術真的沒有意義？其實醫學上主張在這階段切的理據是什麼呢？謝謝。
據你描述嘅情況，我睇唔到手術有咩幫助。
太太擔心嘅情況係存在嘅，不過我地知道就算乳癌失控，佢都係一個要時間嘅進程，你定期有睇醫生，唔會今日咩事都冇，聽日一有事就切唔到。
醫學上係冇理據去主張在這階段切的。
謝謝醫生，問得有點嘮叨，希望體諒。確診至今半年身體在感覺上還未算太過難受，似乎已是小幸運了！再謝回覆及意見。
你愛太太姐，加油！
抱歉還有個可能很無知的問題：留在乳房內的腫瘤／病灶是否不會繼續“輸出”癌細胞到其他器官部位呢？
會繼續輸出，不過呢個唔係一個理由去做手術，以前山火嘅比喻你重溫返。擴散咗即係多過一個源頭，如果其他唔係熄滅曬，移除單一源頭係冇意思。
明白了！感激感激。
如果照了PET scan 懷疑脊椎骨有癌細胞是否就不需要再照 bone scan?
睇情況。
如果講「確診骨擴散」黎講，照咗PET scan係唔洗再照bone scan，因為PET scan係靈敏過bone scan。換句話黎講，bone scan唔會有額外資訊比到你。
但如果講「跟進骨擴散」黎講，就算照咗PET scan，都會建議你再照bone scan。主要用黎作為一個基準（baseline），等第日要跟進骨擴散嘅進度／對治療嘅反應時，再照bone scan對比就得。平時喺私家跟開嘅，照bone scan平過PET scan。如果喺公立跟嘅，照bone scan仲免費添。
請問bone scan跟照x-ray是否不一樣?在擴散到骨之後醫生建議以後要打骨針，請問其效用為何？另為何要外加鈣片及維他命D？
Bone scan 係核子掃描嘅一種，同PET scan一樣可以睇到骨嘅活躍度，相比起比XRay只睇到骨嘅結構，喺斷定骨轉移方面係靈敏D。
骨針有2個選擇［Zoledroic acid（Zometa）］同埋Denosumab你揀。佢地主要用黎減少因為乳癌骨轉移，而引致嘅併發症（骨痛／骨節／血鈣過高）。另一方面去睇，佢可以搞到血鈣低，所以要食鈣片同維他命D補充返血鈣。
另外Zometa仲有研究（AZURE，ABCSG-12）顯示，對早期乳癌可能有抗乳癌作用添，包括可以減少骨轉移，什至延長壽命，不過主要係喺收經5年以上人士身上先有效。
咁如果跟進骨擴散照 MRI 是否同 Bone Scan 一樣？它們有分別嗎？
兩樣野係唔同嘅，好似上面咁講，Bone scan 係functional scan，照晒全身，主要睇骨嘅活躍度。而MRI就係structural scan，照某一部位，主要睇骨嘅結構。
所以一般跟進，照bone scan。如果bone scan有懷疑／模稜兩可時，先針對性照嗰部位嘅MRI。
感激萬分!
醫生你好，
母親剛確實是乳癌4期HER2+，擴散淋巴，頸椎，胸椎，盆骨。
很急想問問意見
雙標靶Trastuzumab + Pertuzumab + 化療 TJ
是否好過只用 Trastumab + 化療 TJ
T-DM1 又如何?
萬份感謝你的無私奉獻， 這網址給我很多很多重要資訊!
乳癌4期HER2+第一線用Trastuzumab + Pertuzumab + Docetaxel。唔會用雙標靶加TJ。T-DM1已經係第二線藥物。
謝謝你這麽快回覆
現在醫院用標靶藥Trastuzumab 一年
加化療藥 Paclitaxel Carboplatin 6針
我想問如加 Pertuzumab 一起用會否對她治療作用好些呢？
唔該晒
我相信雙標靶好一些，不過係咪就咁加上去就值得商榷，因為四期乳癌嘅研究唔係咁打法。
正電子掃描除左骨肺肝腦其他部位係咪睇唔到？
全身由頭臚底至大脾位都睇到，主要係睇唔到腦部。
我妈妈乳癌复发，现在已是第四期，两次共打了36次镖靶，今天复诊医生说最好继续打镖靶，荷尔蒙药对她没有作用……之前用过化疗药，她的身体似乎受不了…..医生说如果不打标吧的话迟啲回来再复诊验血看情况再决定.我不敢说但真想问她现在是否在等死啦……每三个星期一次的镖靶，我们实在负担不起…..是否只能夠等癌细胞有否扩散到身体其他部份?
從來面對逆境我都唔鼓勵病友咁消極去睇事物，如果係喺香港醫，真的負擔不起標靶費用的話，應該合資格申請資助，去同醫生傾吓。
我太太16年9月時確診三陰性T2N1?M0
neoadjuvant chemo (Caelyx + Abraxane + Carbo) => pCR (Feb-2017)
也完成了手術 (Mar-2017) 及 RT (Jun-2017)
現在brain ct小腦有暗影, 懷疑有轉移. 等再做contrast brain ct. 但neuro醫生說暗影大,必須開刀.
請問除了等surgery and subsequent RT, 仲有冇其他治療可以幫到?
e.g. lapatinib可穿過腦血管壁到達腫瘤, 但係咪只對HER2病人有用? 三陰病人會唔會仲有類似標杷/Chemo可取?
how about PET/CT once more and check 癌指數? Will these be helpful?
Million thanks.
腦擴散仲可以考慮放射式手術，例如立體定位珈瑪導航刀stereotactic gamma knife，詳情要同自己腦外科醫生商量。
Lapatinib只合適HER2型病人用，三陰性病人唔啱用。
Reassessment PET 同癌指數只係監察進度，並不是治療。
醫生您好！我媽媽62歲，乳癌四期，擴散至肺及骨，剛完成五次電療，現開始進行化療，TC*6, 本來是化療期間一併要打骨針的，但牙醫發現她智慧齒有蛀牙需要剝，骨針暫時不能打。請問化療期間剝牙是不是很容易做成細菌感染？如果一定要剝的話什麼時候會比較低風險？感謝您的寶貴意見！
如果真係蛀牙就冇辦法要剝咗先，有時甚至會阻到化療。
多謝您咁快回覆！呢個情況會唔會需要延遲第二針化療的日子，要先處理牙齒的問題？因為化療的日子已經定好，腫瘤科醫生會唔會唔允許改日子？我有問過想熟牙醫，他話情況比較複雜，最好搵頷面外科醫生做剝牙。我最擔心的並唔係媽媽承受唔到化療的副作用，她當年都捱得過兩套紅魔鬼，反而怕療程的其他支節攞佢命⋯感謝您的意見！
牙醫認為情況咁複雜，最好由頷面外科醫生直接同腫瘤科醫生溝通，睇吓邊個為主邊個為次，外人好難說三道四。
母親在2017年3月確診第3期乳癌，同年8月照左正電子掃瞄，無發現有癌細胞，
但到左最近去胸肺科覆診時發現肺部有陰影，會唔會有機會擴散?
Thank you
有咁嘅可能。
冇得聽嘅，冇得估有幾大機會，搵醫生檢查清楚。
想問一下，如果有幾大機會？醫生話聽落肺個都清。thank you
公立醫院排期排到12月，好冇俾錢出私家照？thank you
要自己決定，擔心就私家，唔擔心就等。
冇得聽嘅，冇得估有幾大機會，搵醫生檢查清楚。
多謝醫生嘅解答
你好醫生，有句句子喺PET 掃瞄佈告後唔明，咩叫 “without significant FDG activity”? 請問點解? Thx
冇著燈，即係嗰度冇活躍細胞。
咁即係好定壞
唔可以斷章取義睇一句去評估。
醫生你好，上次問關於媽媽肺部陰影一事，醫生證實左唔關事，係本身媽媽肺功能差，有氣喘底引致，請問如果身體啲器官本身差啲或有長期病，會唔會增加擴散機會？
另外腫瘤科醫生話係第二期(瑪嘉烈)，但本身喺明愛做手術，癌症護士話第三期，我相信邊個好？
(腫瘤5cm, 有一粒淋巴有事)
謝謝
長期病唔會增加擴散機會。如果確確實實係5cm，唔係5.1cm，T2N1係第二期B。
唔好意思 愚問，那第二期B同第三期係咪冇大分別?謝謝
治療方向一樣，癒後當然有分別，大唔大就觀點與角度。
那癒後分別在於….？唔好意思想問多句，謝謝
三期差過二期B。
醫生，你好。
唔好意思又係我
其實上次媽媽PET CT同醫生講都冇事，但睇嚟今次有事係我，唔知點我成日好驚有事，發夢成日發，身邊又冇同路人，有冇咩方法或家屬小組可以參加下？（最好係乳癌小組）同埋我使唔使精神科
利申：我有正職（讀緊大學一年級），有陣時驚到做唔到功課。
無限感激
你可以去香港乳癌基金會，佢地有乳癌小組可以參與。
亦都可以聯絡勞院牧，佢正在開展乳癌病人及家屬的義務輔導服務。
基層癌症病人及家屬義務輔導服務
真係無限感激，香港好需要有你呢種仁醫。
醫生，我真係吾知應該點做好…
阿媽3月2號入急診發現乳癌
3月8號做左Pet Scan 知道擴散左去骨同肝
3月21號見左第一次乳科會診
本身話4月6號打骨針兼開始電療
點知果日放射果邊見完話阿媽個傷口大同淋巴感染多 要重新設計過 需時3星期
即係最快都5月頭先開始RT
我地4月30號先見第一次見化療果邊 吾知會吾會因為電療既原故令化療去到6月先有得做
如果真係 咁拖法 媽咪個病情會吾會嚴重好多？
如果轉私家重新搞得黎可能只係早一個多星期
好徬徨 我應該可以點做?？
有擴散就先化療後電療，唔會電療先。如果經濟許可，去私家搵腫瘤科問問意見，睇下會唔會私家開咗針先，遲D再返公立收尾。
因為媽本身骨T7同C2有轉移塌陷，本身安排4月6係淨係去電骨，但去到又話媽傷口流緊血要設計過另一個PLAN電多D，所以要搞到5月頭先有得電。我想問下佢擴散型係咪一定係要化左先電?有冇case係一齊做或者電完先化? 如果無，咁係咪即係公立醫院出錯? 我可以點算? 我幫媽約左17號見中大同威院果個醫療中心既腫瘤科教授，請問知吾知果間中心會吾會offer到化療?定係我地都係要出去私家醫院做? 感謝你既回覆。
你提供的資料太零碎，不足以解釋複雜的情況，我唔想輕下判斷。17號好快到，等見完中大先決定。
好的，謝謝醫生。
另外我想請教一下什麼叫轉移病灶? 淋巴算吾算係病灶? D病灶係點樣計算的? 如果骨有兩處轉移是不是遂算2處病灶? 同埋我想問問乳癌四期患期係咪就算藥物暫時控制得到，只要一有抗藥性出現就難以醫治? 即使已經改善生活/飲食習慣也好
擴散咗嘅地方就係轉移病灶。淋巴如果有擴散，都係病灶的一種。
病灶就係病灶，冇話點樣計算，數得到就數，多到數唔到就冇得數。
產生抗藥性自然令可選的藥物少一個選擇，越來越困難去醫。生活／飲食習慣冇關係嘅。
Q1)
請問多久做掃描 when you are in maintenance therapy?
– Chest x-Ray – should i do it every 3 weeks?
– 電腦掃描（CT scan）- Should I do it every 3 months? Can I do low dose CT Scan instead of the contrast one?
– 正電子掃描（PET scan）- Should I do it once a year?
Q2)
請問在哪裡可以做 Lung Cancer Genomic Testing for 300+ mutations? 政府醫院可否寫紙做Testing. 請問 Genomic Testing 收費多小?
1）冇一個硬指標，都係等醫生根據臨床情況決定。
2）Lung Cancer唔熟識。
請問係咪照左PET CT 就唔使再照CT ？因為之前講過話政府排到年尾，但呀媽之前自己出左去照左PET CT，醫生睇過話冇事，咁使唔使年尾再照？好似話好多福射，做得多。同埋呢啲隔幾耐做一次好？謝謝
唔可以咁推論。PET-CT個CT通常都係冇顯影劑（non contrast）嘅，同CT通常都有顯影劑（contrast CT）唔同的。幾時再照人人唔同，由醫生決定。
另外，愚問想請教下，
1) 兩者有咩分別?點解要照曬兩個?
2)我想問下因為本身呀媽個肺花左，長期有咳，我地成日好驚係肺轉移，但上次腫瘤醫生話冇事。咁肺轉移嘅咳同唔同一般咁咳?兩者病徵上有咩分別?如果呢個情況他日真係咁唔好彩有轉移會唔會遲左醫?
謝謝
1）你冇相關知識，好難三言兩語解得你明，只要知道佢地係唔同野就得。點解照？幾時照？留返比醫生決定。
2）唔好誤會病徴的指示性好強，誤以為咁咳就冇事咁咳就好大問題，好多時都冇指向性，大部分情況係要宏觀咁睇。第時好唔好彩控制唔到嘅，隨遇而安，杞人憂天都係冇用。
Thank you
醫生, 可否請教一下最新AJCC第8版, HER2+ ER+ PR+ 既情況可以遞減期數是否亦適用於第四期? 如遞減為3B期? 是否可以理解為預後較HER2-/ER-/PR-第四期患者為佳?
不適用。
你好，我媽媽最近確診乳癌復發，係Luminal B HER2 negative。擴散到肺，肝，骨。腫瘤科醫生建議兩種方案，想問問有咩分別？
1.palbociclib+Letrozole
2.Ribociclib+Letrozole
冇咩大分別，都係CDK4/6抑制劑。Palbociclib就面世先，用藥時只要抽血，主要研究都係收經後女士用。Ribociclib用藥時除咗要抽血，仲要睇埋心電圖，多D研究支持喺未收經女士都用得。
我太太乳癌有擴散，耑有一星期見醫生開始化療，但近期體溫keep 住38度，食退燒藥會降至37.5，請問政府䣽院是否不會開始做化療？有甚麼方法可以退燒？因為不想再拖延化療時間？
發燒就唔會開始化療。退燒不外乎退燒藥同處理好傷口或感染。
您好，我太太做了兩針化療，醫生說噲影無細。請問是不是化療2針，腫瘤便會縮細，無縮細是否效果未如理想？
可以睇多一兩針先判斷。
謝謝
我太太乳癌復發轉移肺部，已打3針化療，但呼吸比之前弱和困難，請問是否正常情況？
好難講正唔正常，只可以話唔理想。
請問免疫治療是否較好的治療方法？請問費用多少？
會為呢個topic 寫一篇文章，黎緊呢一兩個星期密切留意。
會留意，謝謝
補充我太太屬三陰性乳癌，復發擴散至肺和骨，請問免疫治療對比症狀有冇效用？而且需要做幾多次治療？
https://www.breasthk.com/immunotherapy/
乳癌免疫治療－解放你的抗癌潛能
醫生你好，本人確診乳癌4期，要打鏢靶，是否要先打粒鐵珠做記號，以防日後難找原頭？由於癌細胞已經蝕出到乳頭潰爛，全個乳房漲痛難耐，之後都要全乳切除，請問記號是否必要？
全切唔需要記號。
醫生，謝謝你
馬醫生，請問有無皮膚轉移的情況睇下，我依家仲打緊標靶，胸口邊緣即電療邊，（電療完幾個月），有手指頭范圍小小紅，有時又無咁紅，有點痕癢，咁樣會唔會係轉移？想問轉移皮膚乳房超聲波可以照到嗎？
臨床照片屬敏感資料，唔方便放上網。要靠醫生經驗去評估，如有懷疑時，就切少少皮膚去驗。
好啊，唔該你！
馬醫生，你好。我上年做年檢確診覆發，HER2+，賀爾蒙受體，之前只是左邊乳房有腫瘤，今次覆發發現左邊腋下淋巴和尾龍骨轉移，現接受化療+雙標靶，想請問係咪已屬於第四期？是否沒可能完全痊癒，只可控制住唔畀佢繼續擴散？存活率有幾多？
屬於第四期，只可以控制。存活率好視乎對治療的反應。
我仲以為有機會可以徹底消滅啲癌細胞，睇完你呢編文章同解答，灰左😞，即時爆喊，但喊完、消化左件事、心情平服了，知道既然無辦法改變呢件事，惟有改變自已心態諗諗點樣活好每一天。現只希望啲癌細胞乖乖地唔好繼續擴散同大落去，比我玩多幾年。感激馬醫生的回覆。🙏🏻
醫生想請教一些事情， 本人乳癌8年後復發至四期， 確診時發現有腦腫瘤轉移， 剛在私家做了手術 (10月尾)，現在公立醫院覆診嘅時候話腦電療最快12月尾。 因為除了已割除的3cm 腦腫瘤，還有兩個細過1cm的腫瘤。差唔多要等一個月才電療，會否太遲？謝謝你。
有D咩選擇？
醫生您好，我媽咪乳癌四期同有糖尿，食緊 letrozole and palbociclib, 同糖尿藥metformin, 請問：
1. 這兩隻抗癌藥是否需要同一天同一時間一齊食，定同一天分開不同時間食也可以？
2. 佢食開omega 3 魚油丸，是否仍可食用？
3. 佢幾日前排打完補骨針，手背吊針位仍貼住膠布，但膠布附近的皮膚黃了一撻，為什麼有此情況呢？
謝謝，祝工作順利！
1）冇所謂。
2）可以食。
3）似瘀青散左。
想請問醫生, 現在流感或感冒比較流行, 食緊標靶藥的病人, 若患上感冒, 是否仍可以食市面上大牌子的感冒成藥? 謝謝
視乎你講緊乜嘢標靶藥，HER2型標靶藥大部份都係吊針，唔影響抵抗力，流感比較少影響。但如果你講緊CDK4/6抑制劑，就要小心啲，因為佢會影響白血球抵抗力，唔建議就咁食成藥。
醫生你好，
想請問下如果 pet scan話 left upper prevascular lymph node發現有著燈 （1.2 x 0.9 cm），是否已經是第四期？謝謝。
視乎準確位置，有D醫生當三，有D醫生當四。
謝謝醫生！
因為政府醫生說這個地方已經是遠轉移所以屬四期。。。
4期康復者 活存率有記多
https://www.breasthk.com/prognosis/
醫生你好 我38歲 2022年12月做左局部切除
Invasive Ductactal Carcinoma NOS, T2, (4.1cm) N2a (5/15) G2, ER8 PR7 HER2 1 -ve, Ki67:32% 本來未做手術前話係2期無擴散淋巴，但做完話變左第3期。
今年1月見腫瘤科 佢叫我化療前去做PET CT，做完：
Lytic lesion with hyper metabolic uptake noted at S2 vertebral body/SUVmax 7.7. DDx include bony metastasis.
再見醫生佢話擔心呢個係擴散 但佢又話唔可以肯定 有啲複雜。
話比幾個方案我揀：
1）乜都唔做住 去抽針先決定 但又話抽針可能抽唔中 驗唔到啲乜
2）做左化療先 再照PET CT 睇下果節骨有無變化
3）唔做化療 直接食標靶藥同荷爾蒙藥
我其實唔知點揀 又唔知有咩分別。最後揀左2。下星期一就開始化療。
想問下其實應該揀邊樣先岩。
希望醫生能比啲意見！
後生要博到盡，先做咗化療，之後再食荷爾蒙藥同荷爾蒙標靶藥。
多謝醫生既回覆！
我已做左6次化療，本來準備電療。
但最近照完PET-CT, 骨多左4處擴散，
電療醫生話電都無用。
剛覆診腫瘤科，醫生比兩個選擇我，
1）食傳統荷爾蒙藥 Tamoxifen
2）就食Letrozole + Abemaciclib + 停經針
想問下我係咪得呢兩個選擇？應該點揀？
希望醫生能比啲意見！萬分感謝！
選擇2好D。
醫生你好，本人 47 歲。今年一月確診第一期三陰性乳癌， 做了CT scan 冇擴散，排左幾個月期，下星期做 bone scan. 三月份開始做化療，打 4 次紅針，4 次白針共 8 次化療。打了兩支停經針，會繼續打。每次化療後打 7 支增白針。今個星期打第四次化療。化療前抽血每次都是高血鈣。我一直食不同 supplement，維他命 C, D, E, 鈣片及 omega 3, 亦有同醫生講。一個月前已經停了食鈣片，D ，同 omega 3。醫生今日叫我停晒所有 supplement, 佢話高血鈣有可能癌擴散骨，或淋巴問題，或 supplement 影響。我冇特別骨痛，除了打完第 7 支增白針後 lower backpain 1 晚。
我知道 3 星期後便知有沒有擴散骨，但我今日已經非常沮喪，準備立遺囑。
其實我這情況是否容易擴散骨？因為一去到骨便是第四期，生命在倒數。我本以為今年辛苦一年做化療及切除手術我便可以做番正常人。化療 side effect 已經搞到我得番半條人命。請你比D positive energy 及 message 我。謝謝您 !
無謂估，估錯就唔好，等檢查結果。