乳癌手術 2 - 保留乳房手術 ,我做唔做得?
好多女性一聽到乳癌都好驚,佢地最驚嘅唔係死,佢地最驚嘅係冇咗個乳房。「究竟切除乳癌時,我做唔做得保留乳房手術呢?」
現實情況未必咁壞
好多女性一聽到乳癌都好驚,佢地最驚嘅唔係死,佢地最驚嘅係冇咗個乳房。
冇咗乳房等同冇咗性徵、自己唔再靚、唔再係女人。
隔離陪你睇醫生嘅朋友試圖安慰你「冇咗一邊姐,仲有另一邊吖⋯⋯」
佢地唔明白「冇咗一半(乳房),等如冇咗另一半(老公)。」喺病患者嘅世界等如老公唔再掂我,等如佢會出面搵女人,等如成個家庭就散,做人冇晒意義,死左去好過⋯⋯ 現實情況未必咁壞,不過心裡境況已經最壞。
保留乳房?唔保留乳房?
「醫生,請你開刀時,無論如何都要幫我局部割,我一定要保留乳房。」
喺咪人人都合適局部割?有冇條件限制?
另一極端,一聽到乳癌兩個字,已經周身唔聚財,希望醫生快D割,最好即日即場喺診所就割咗去,成個乳房割晒,甚至冇事嗰邊都割埋,因為見大明星安祖蓮娜祖莉都係咁做,希望咁樣一了百了最安全。
現實成個乳房割晒喺咪最好選擇?最安全呢?一定唔會復發呢?
保留乳房手術 vs 全乳房切除手術
假設你兩樣都有得揀,以上兩個開刀方案有咩分別呢?我地首先重溫「乳癌手術 1 - 我有咩可以揀?」重點三嗰幅比較圖表:
迷思一:全個乳房割安全D?
錯! 好多女性一聽到乳癌,直覺就會以為全個乳房割晒,一定最清/最安全。事實並唔係咁樣! 你冇聽錯,局部割嘅治療效果(存活率/局部復發率)同全個乳房割嘅係一樣。不過要建基於兩個基礎之上:
1)手術要割清,即係邊緣唔可以有癌細胞。
2)一定要撘電療 即係如果手術做唔清/你唔肯電療,局部割嘅復發率係會高好多。
重點一:如果手術割得清,術後有電療,局部割同全個乳房割嘅治療效果喺一樣咁清/咁安全!
迷思二:全個乳房割唔洗電療?
「我明喇,即係局部割一定要電療,全個乳房割就唔洗電療。」⋯⋯
啱一半錯一半! 局部割一定要電療,全個割都有可能要電療(即上表所講:選擇性)
「咁全個乳房割,幾時先要電療?」
好問題!答案係當個乳癌惡嘅時候,即係易D復發時,全個乳房割都要電療。有三個可能性:
1)腫瘤大(T3或T4,即係大過5cm,或者蝕咗出皮膚/肌肉時)。唔明就參考返以前文章「乳癌分期 ﹣ 我係早期定末期?」。
2)全個割都仲未割得清時,例如切割出黎嘅標本底床仲有癌細胞。不過呢個要做完手術先知。
3)有四粒或以上嘅腋下淋巴有癌細胞的跡象(即係N2,唔明又係睇返上面篇乳癌分期)。有D醫生進取D,事旦一粒淋巴有癌細胞(即N1)都會建議你電。呢一點可以手術前估到D,不過最終有幾多粒受影響,要做完手術先知。
重點二:如果你臨床/掃描都知自己腫瘤大(T3/T4),腋下淋巴有抗散跡象(N1/N2),即係無論你揀局部割,定全個割,都會建議你電療。
迷思三:全個乳房割唔洗化療/標靶治療/荷爾蒙治療?
「會唔會全個乳房割,割得清D,唔洗化療/標靶治療/荷爾蒙治療?」⋯⋯
冇關係! 化唔化療/標唔標靶/荷唔荷爾蒙治療,係取決於個乳癌第幾期/有幾惡/有冇標靶受體/有冇荷爾蒙受體,同你揀做咩手術係冇關係,唔存在割多D就可以避免化療/標靶治療/荷爾蒙治療!
重點三:你揀做咩手術係唔會影響到術後洗唔洗化療/標靶治療/荷爾蒙治療。
點樣揀?
「咁局部乳房割同全個乳房割應該點樣揀?」
首先要搞清楚自己有冇得揀/有冇資格揀,如果有得揀,咁你就要平衡唔同開刀方案嘅好處同唔好處(上表最尾兩項)。詳細請睇乳癌手術 3 - 保留乳房手術 ,我揀唔揀好?
我有冇資格揀?
「咩叫有冇資格揀?唔係人人有得揀㗎咩?」
仲記唔記得上面講過局部割要建基於兩個基礎?如果滿足唔到嗰兩個基礎就即係冇得揀囉:
1)如果局部割,割咗好多次,割極都未清,冇得揀,要全個割。
2)唔電療得,又要全個割。
「咩人唔電療得?」
1)孕婦(尤其頭兩階段嘅孕婦,第三階段嘅孕婦唔一定唔電得,做法係先做乳房手術,跟住生BB,再電療)
2)紅斑狼瘡症( systemic lupus erythematosus)
3)硬皮症(scleroderma)
4)以前同一邊胸腔曾經電療,例如淋巴癌
5)唔能夠日日去醫院電療人士,例如老人家/行動不便人士
「我聽人講如果腫瘤太大/位置唔理想都唔做得局部割,啱唔啱?」
以前啱(開初技術發展時,腫瘤太大/太近乳頭,真係唔建議做,因為做完變晒型,你唔會接受),而家唔啱。 因為有兩大進步:
1)術前化療可以縮細佢先做,割少D/易做D。
2)乳癌手術技術嘅改良:而家外國好流行切除乳癌時,結合整型科技巧(Oncoplastic surgery)去填補缺損,可以將以前難割/易凹嘅位置都做好佢。 因此如果你嗰腫瘤太大/位置難做,而你又想局部割,最好術前先化療(當然唔保證一定縮細),之後搵個擅長oncoplastic surgery 嘅乳腺科外科專科醫生做手術,因為呢D並唔係一般外科專科(甚至婦科)醫生識嘅技術。
下一集詳細講吓如果你有資格揀,唔同方案嘅好處同唔好處⋯⋯
敬重的Breast HK:做完保乳手術約20天,感到該乳十分硬,並觀察和手能觸到一〔筋〕在刀切邊皮下延伸致下腹,是否正常變型?
Can time heals both conditions?
正常嘅,放心。保乳手術始終都係冇咗忽肉,10個煲得返8個蓋,我地要將裏面剩餘嘅乳腺組織對齊,所以係會扯住(你覺得有條筋)。因為啱啱做完手術,疤痕未生定,所以係會硬嘅。遲D電療會仲硬D添,不過隨住時間,會慢慢鬆返,大概6-9個月度啦。
Breast HK. 謝謝你的詳盡資料, 迷茫的我今天無意中看到你的詳盡及幽默有趣解釋, 一口氣把全部看完了, 現在明白和清楚了很多. 我早前做了前哨淋巴割除了數粒淋巴. 現在偒口已埋口了,但淋巴傷口附近有時有水腫, 手跟身體貼近時總覺得”格勒底”有舊野阻住. 有次剛好覆診時醫生幫我”抽水”. 問過醫生, 他解釋過及說過起初時時候會這樣. 想問一下這情況會維持多久? 如果每次水腫都一定要去醫生處”抽水”嗎? 不理那水腫會如何?
呢D叫手術後積水(seroma),通常手術後6至8星期度已經清晒,因為慢慢自己組織識得吸收。唔理佢其實冇咩大礙,只不過覺得格勒底有舊野浮吓浮吓咁,可能覺得手擺動時阻住唔順。
有D人自己吸收唔晒,成日積水,覆診時可叫醫生幫你抽,通常抽兩三次就慢慢越來越好。如果仲係唔得,可以試吓抽完水搵D野長期壓住嗰個位一排(可搵職業治療師度身訂做壓力衣),可以減少再積水機會。
明白了, 謝謝你的解答Breast HK
請問:我母親年初做了一邊全乳切除,當時有積水,用喉引流出來,其後已沒有積水,但剛過去一星期,發現手術位置變硬,及發燒,原來有積水,醫生給她抽積水及服用抗生素,至本星期覆診仍有積水,癌指數正常,醫生說不知原因,令母親十分擔心,請問這情況是否正常或能解釋一下嗎?謝謝:
年初做完手術,而家都成9個月,照正絶大部份人已經收水。間唔中都有一個半個持續積水,不過好似你媽媽咁收完水一輪後又再積返就罕見D。同你醫生一樣,唔知點解。不過又唔洗過份擔心,復發唔係咁嘅。
醫生你好。
我是 HER2+T4 的病人,本周四將打最後一支的術前化療。自從打第一支化療藥物後,我開始覺得左乳的腫瘤慢慢縮小,到最近更摸不到其存在,一兩星期前到公立醫院見外科主診醫生及會診,醫生經手按檢查,也說腫瘤縮小至 1-2 cm 左右,連本來有的一粒左腋淋巴結,也消失至醫生摸不到了,他遂安排在 29/4 替我做手術。
若非我提出可否做保留手術的詢問,醫生似乎從沒考慮這個方案,始終都想我做全乳切除手術,以貫徹他一開始已安排的五管齊下「全餐」:標靶、化療、手術、電療、荷爾蒙藥。
不與病人商討、不讓病人選擇,是否牽涉公立醫院的資源問題及醫生的 mindset?
我並非一個固執一定要保留乳房的人,只是覺得既然療程有效、腫瘤縮小了,為何不給自己多一個選擇、多一個機會?既然兩種手術方案的存活率、復發機會都差不多一樣,我更著眼於不想給自己帶來大創傷,以及手術後的生活品質、癒後保健。
我將於 20/4 見多次主診醫生,這段時間我會廣求專業意見,讓自己消化、考慮,以作出最合適及理想的決定。
懇求賜教。
以上局部割同全乳割的數據比較,係根據一D「早期乳癌」手術成效的研究結果而得出。傳統黎講,以前T4腫瘤(即起碼乳癌第三期)係冇人做局部割嘅,因為覺得唔穩陣。
不過醫學不斷進步,而家手術前可以打化療、甚至標靶,因而產出咗一批獨特的病人(本身係T4,化療標靶後變咗T1/T2),咁佢地做唔做得保留乳房手術呢?
T4腫瘤化療標靶縮細後,做唔做得保留乳房手術牽涉比較複雜的臨床細節考量,並唔係縮細咗就做得保留乳房咁簡單。
例如T4我地仲細分T4a,T4b,T4c同T4d。其中T4d inflammatory breast cancer我地知道復發率其高無比,就算你打完化療標靶,假設腫瘤消失曬都好,都係無得我地揀局部割的,因為我地知道咁揀實衰緊(復發)。
另外就算唔係T4d,腫瘤好細都好,本身會唔會成個乳房都有好多分散的癌鈣化點(extensive malignant microcalcification) 呢?呢個又係另一個唔做得局部割的因素。
之前醫生冇得你揀,可以係佢嘅盲點,又或可能其實病情真係冇得我地揀。所以點樣揀?有冇得揀?呢樣真係要與主診醫生多多溝通。
你有「不與病人商討、不讓病人選擇」的感覺,問題源於缺乏有效溝通,多過牽涉公立醫院的資源問題。
謝謝解答,十分清晰,我會嘗試多與主診醫生溝通。
你好,我現時化療中,粒野由4cm 縮至1點幾cm,但醫生話粒野中間斷斷續續咁,而且係正乳頭下,請問是否要全切連乳頭?
咁個人化的建議,要見過個人評估咗先知,唔可能單憑你三言兩語去做決定,差之毫釐繆之千里。
醫生你好,我今年28歲,唔好彩中左乳癌,醫生話初步判斷係初期。但要10日後先有期做手術,好膽心呢10日期間會擴散。想問有冇咁快擴散。
同埋如果我唔食糖分D癌細胞會死得快D架!
唔該醫生!
如果係初期就冇咁快嘅,早到梗係早,早唔到就唔好諗咁多,都唔到你控制。
唔食糖分冇幫助。
醫生,我做完乳房部分切除手術(1.6 cm),為何無引流管?
局部切除通常都唔需要引流管。
你好,我右乳房側近腋下起了2個淺啡色斑點(一個不到1cm,另一個不到1.5cm) 一個月了都持久不消退,我之前做過良性葉子狀瘤的手術,不過是在左胸,請問是什麼原因呢?
要檢查後才可以評論。
醫生你好, 我47歲, 剛做手術取出一粒11mm IDC (ER+, PR+, Ki-67 7%, HER2 negative, histologic grade 2, Pathological stage : pT1c(m)N0(sn i-))及大範圍地方(三分一乳房),現排政府電療中,然而於樣本中其他地方發現其他地方有10 粒Invasive lobular carcinoma foci (0.3mm – 3mm),醫生建議可以維持現時的部分乳房切除加電療,然而亦有其他醫生建議由於未知保留部分會否有隱藏ILC,因此必須全乳切除。請問那一個方案比較好?全乳切除是否必須連腋下淋巴亦需切除(即使現時無淋巴擴散)?
11個源頭咁多,我認為全切比較穩妥。淋巴唔洗再搞。
請問原位癌是否一定要做手術,範圍大約1/4,需要全乳切除嗎?要電療嗎?
要做手術。如果1/4,好有可能需要全切。全切後唔洗電療。
我媽咪今年73歲,有糖尿病,剛發現乳癌第一期,醫生建議切除整個乳房,請問是否應該接受建議?謝謝!
情況可以有好多可能性,唔能夠靠你短短兩句輕下判斷。
如果乳房有兩粒分開的乳癌,是否一定要全切?
謝謝!
視乎幾大粒,相距幾遠,邊個位置,乳房幾大。
11點3.5cm,2點1.1cm.兩粒都距離乳頭6cm
想問什麼?
可否做局部切除
如果描述冇錯,兩粒相距好遠,初步認為唔可以。
我而家打左化療第一針,醫生話要縮細左個瘤先做手術。話我係多中心性腫瘤,所以一定要全切。係咪真? 我可唔可以做局部切?
全切安全D,唔建議局部切。
謝謝回覆
咁我可唔可以揀乳頭乳暈保留手術
可以保留乳頭乳暈的全乳切除加減重建。
請問化療後如果腫瘤細左,係咪唔洗電療?
以下三個情況要電療:
1)局部切除
2)原本腫瘤大過5cm
3)淋巴有感染
香港馬醫生:
靜了好耐,因為在chemo中,因為我在網絡等等,難以閱到以下,不知可否請教你?
1、)一些中國網民,雖然全切,但好像第三/四chemo後,就先手術,之後才繼續chemo。為什麼要中途開刀,不等chemo完畢?其利弊?
2、)我想腫瘤可以再縮細些;但假如又有事故,推遲手術,又怕腫瘤會變大。
chemo藥力,是否在14日後會減弱,或者去到第6支,腫瘤已經縮不了多少?
因此無論做局部/全切(我依然想局部的),最好的時機,應該是,打落第6支chemo後等(circle)14 or 21天後,然後7日內做到手術?
而超過28日,是否有些危?越早越好?
不知chemo打落第6支後的第1至28日都適合手術?是您,會選什麼日期做?
3、)完成6支chemo(FECT),是否可以不做CT Scan?其利弊?假如是可以局部切,因為做CT Scan又害怕拖延了,腫瘤會變大,所以你的睇法?
等我電療,有機會就做CT Scan/PET,沒得做,就算?這個chemo後CT Scan很重要嗎?點解?
4、)雖然我沒有辦法得到Ki 67的數據,但chemo後,好像可以使Ki 67降低,假如我能得到最快手術的日期,那樣割了之後,驗到的grade數,都是精準的?
假如chemo藥未散就切了去驗,chemo始終改變不了那個最原始的grade數?
5、)我還未去看醫生,不知我的lymph nodes是否癌、是否可以局部切,假如不能,你會否認為,我應該再博下去,來多6劑TAC?但是你都寫了,人的一生是有chemo limit的,因此你有咩建言嗎?
一直都好謝謝您和這個網,現在香港疫情那樣嚴重,死和痛苦了好多人,我只望你們都可以ok,而你都要小心,防疫。謝謝。
1)香港/國際主流都係完成晒化療,先手術。並唔會做做下化療中途走去手術,之後再化療返,除非明顯腫瘤失控。
2)完成最尾一針化療後,如果身體狀態許可,就三星期做手術。如果身體情況唔合適,就四星期做手術。
3)化療後全身掃描究竟重唔重要,視乎臨床上對啲化療有冇反應。如果臨床上都縮得好好,全身掃描冇必要。如果臨床上縮得唔好,全身掃描就有需要。
4)你都冇事前個報告去做對比,講乜嘢假設性問題都係鑽牛角尖。
5)去睇醫生。
我媽咪喺政府醫院複診,醫生冇做過任何詳細嘅檢查,告知佢係乳癌,我想帶佢喺出邊私家醫生做返個詳細檢查個流程應該係點
打電話去診所約心儀嘅醫生。
醫生你好,我今年54歲,5月中做完局部乳房切除,排緊政府腫瘤科,不過8月頭先至見醫生! 請問電療係咪有黃金期㗎?? 咁我應該幾時做電療比較好呢?🙏🙏
手術後四至六個星期電就最好。
請問如果做完局部切除,覺得真係兩邊差得有d遠,可以做到重建嗎?又可以有啲咩方案?
通常都係脂肪移植。
医生你好! 我乳房照超声波发現4粒瘤,判断一粒係癌(在乳头上方11H),其余2粒BI-RADS 3 (其中一粒在乳头下方 6H)另一粒BI-RADS2,10月局部切除時只切上面3粒,下面1粒BI-RADS3沒切,最后化驗出上面已切的3粒都是癌! 請問余下那粒可否电療解决? (排緊政府腫瘤科12月才見!)
最好抽埋針先決定。
醫生想問下我有粒2.3cmx2.3cmx2.0
在3点鐘位置離乳頭4-5cm遠
是浸潤惡的癌可否局切?
淋巴要全切嗎?
左邊3:00就應該做到,右邊3:00就會凹陷。
淋巴切幾多視乎現在淋巴有冇感染跡象。
多謝醫生慷慨的知識分享,絕對使有需要的乳癌患者提供專業支援!
9/19右乳患2期乳癌(賀爾蒙受體陽性+HER2),完成局部乳房切除,電療,化療,標靶治療,4年來一直要服tamoxifen。至12/23發現左乳有癌細胞,沒有擴散至淋巴,即停tamoxifen及完成局部乳房切除手術,病理化驗報告証實為賀爾蒙受體呈陽性,沒有HER2,但術後resection margin仍有癌細胞並有入侵性跡象,醫生不建議電療,亦堅持全乳切手術,因非常抗拒這手術,在這情況下,是否一定不可能再做局部乳房切除手術?藥物方便面還有什麼治療方法可選擇?
要視乎醫生覺得仲可唔可以局部割,要臨床睇先知。
Tamoxifen 要轉AI,如果未收經,就要打埋停經針先可以轉到。