乳癌電療大解構 － 原來唔洗驚
啱啱先做完手術／咁辛苦先捱完化療嗰幾針，轉個頭又要面對電療，究竟同化療有咩分別？過程係點㗎？有咩副作用？有冇後遺症？費用幾多？呢篇「乳癌電療大解構」幫你釋除疑慮⋯⋯
乳癌電療 vs 化療
「我啱啱先做完手術／咁辛苦先捱完化療嗰幾針，咁快又黎過？」
做完手術／化療，我地只係好似特區政府D施政咁，只係取得階段性成果，仲未能夠好似民建聯咁拉banner「成功戰勝乳癌」，所以同志仍需努力。
「咁電療同化療有咩分別？」
仲記唔記得我係好耐之前嗰個post「乳癌治療方法 － 我需要用咩方法醫？1」講過，乳癌電療係局部治療嘅一種。
如果話化療係成個天台油多幾浸防漏嘅話，咁電療就係局部針對漏水嗰條裂縫去做功夫，希望可以加強局部控制。醫生就好似D怪獸家長咁，唔單止要求子女總分考第一，仲希望科科可以攞滿分；唔單止要求整體唔漏水，仲希望搞掂問題源頭條裂縫。所以有冇做到化療，同洗唔洗電療係冇關係嘅。有4類人，我地知道電療可以減低局部復發機會，從而長命D。
「咁邊4類人要電療？」
局部割（保留乳房手術）一定要電療。
全個乳房割，以下三個情況都建議電療：
1）腫瘤大（T3或T4，即係大過5cm，或者蝕咗出皮膚／肌肉時）。唔明就參考返以前文章「乳癌分期 ﹣ 我係早期定末期？」。
2）全個割都仲未割得清時，例如切割出黎嘅標本底床仲有癌細胞。
3）有四粒或以上嘅腋下淋巴有癌細胞的跡象（即係N2，唔明又係睇返「乳癌分期 ﹣ 我係早期定末期？」）。有D醫生進取D，事旦一粒淋巴有癌細胞（即N1）都會建議你電。
2014年4月更新：國際權威期刊The Lancet喺2014年3月刊登左以下一個大型研究（支持N1都要電）：
https://www.thelancet.com/pdfs/journals/lancet/PIIS0140-6736(14)60488-8.pdf
研究發現全乳房切除及N1（1－3粒淋巴受影響）嘅病人，電療後：
10年復發率由45.7%減至34.2%（Absolute risk減少11.5%，relative risk減少32%），即係100個呢類病人，電療10年後12人因而得益冇復發。
20年死亡率由50.2%減至42.3%（Absolute risk減少7.9%，relative risk減少20%），即係100個呢類病人，電療20年後8人因而得益冇死到。
因此，我會預期越來越多醫生會建議N1都電。
所以如果你係以上4個情況其中一個，醫生就會叫你穩陣D做埋電療。
注：我地一般講嘅乳癌電療係電胸口，當然電療仲有其他用處，例如末期乳癌擴散去腦就電「腦」，擴散去骨就電骨。
乳癌電療過程
「我係其中一個情況呀，咁電療有冇化療咁辛苦？」
有個好消息話你聽，電療舒服過化療千萬倍。叫得做局部治療，即係好處同壞處都係局限於胸口嘅地方。
「即係點？」
即係唔會甩頭髮、唔會嘔、唔會唔想食、唔會冇精力、唔會抑制抵抗力。
「咦，唔辛苦就做得過，咁實際點做㗎？」
通常做完手術／打完化療3至4個星期，等身體狀態恢復之後，就可以開始電療。
要電療，當然要見臨床腫瘤科醫生，講解清楚之後，就可以制定電療計畫，有兩大類做法：
1）傳統電療25次，日日去醫院（又係唔洗住院嘅），星期六日休息，所以搞你5個星期，如果癌細胞有侵蝕性，就要局部再加電5次，即總共30次（6星期）。
2）新做法電療15次，同樣日日去醫院，星期六日休息，所以搞你3個星期，如果癌細胞有侵蝕性，就要局部再加電5次，即總共20次（4星期）。
「點解有兩類做法？邊個好D？」
傳統黎講，不嬲都電開25次嘅，但因為2013年9月英國發表咗個大型研究（UK START Trial），發覺電15次同25次效果冇分別（10年復發率），但方便好多同埋少D副作用，所以英國全面採用15次方案。香港呢就睇你醫生信邊套，有D覺得15次OK啦，人地英國都有晒證據有晒指引咁做咯；有D就疑慮多D覺得10年結果仲未夠耐，想睇耐少少先採用新方案。因此你問其他病友，最短佢會話你聽電15次（原位癌加新方案），最長佢會話30次（侵蝕性加舊方案），咁大差異唔好見怪。
姑勿論揀新定舊計畫，之後做法都係一樣，就係先設計劃位，電療技師會幫你畫D界線上身，同埋紋D「點」，用黎記住要電嘅範圍，咁就唔會電錯／電多／電少，可以放心正常沖涼，D「點」預咗你短期洗唔甩，咁當然你都唔好搏老命想捽甩佢。
「咁之後點電？好似測謊機坐電椅咁電？」
千祈唔好比電療嗰「電」字嚇親，誤以為有電流通過身體。電療正名叫放射治療，大陸D講，就係「放療」，原理好似照X光咁，不過就用D再高強度嘅幅射照吓你。
圖片來源：互聯網
你會好似照正電子掃描／電腦掃描咁先訓係張床度，之後電療技師同你對名對位，準備就緒後就開始電療，成個過程20－30分鐘度，幅射就會係不知不覺嘅情況下完成工作，就好似美容院照太陽燈咁，完全唔痛唔辛苦嘅，電完就返屋企，唔洗住院嘅。煩就煩在日日要去醫院姐，後生冇咩所謂，老人家行動不便就要人陪。因為要日日去醫院，部電療機又冇大分別，著實冇需要跨晒區去間人地話好嘅醫院，都係揀間近屋企嘅方便D好過啦。
乳癌電療副作用／後遺症
「唔痛唔辛苦咁正？咁有咩副作用／後遺症？」
以前技術冇咁先進，電療就會傷埋附近組織，例如心臟／肺。而家技術已經進步咗好多，影響附近組織嘅情況已經大大改善，所以你係感覺唔到嘅。
你主要感覺到嘅副作用就係皮膚灼傷，通常第三個星期就開始明顯，反應高峯期大約喺完成療程一到兩個星期出現。情況有如曬太陽曬得勁過頭，D皮膚紅紅滾滾興興，之後起水泡甩皮滲水，皮膚變黑好似「燶」咗咁。甩皮時梗係痛，所以皮膚護理好緊要。
另外如果要電埋腋下淋巴嘅位置，可能會令淋巴水腫嘅情況加劇。
乳癌電療皮膚護理
「咁皮膚點護理？」
電療技師通常會教你平時搽一隻叫電膚寶（Radiagel）嘅護膚啫喱，幾十蚊一支，可以喺病人合作社買到。最主要都係潤吓D好乾嘅皮膚，因為電療會令皮膚嘅油脂分秘減少。另外佢涼涼地，會令你感覺舒服D。電療前3個鐘內唔好搽野，因為驚阻隔咗D電療效果。
圖片來源：互聯網
好多病友會嫌電膚寶（Radiagel）太「立」，佢地會去百貨公司／藥房買其他潤膚膏／蘆薈膏（Aloe Vera Gel）黎搽：
圖片來源：互聯網
圖片來源：互聯網
平時你當自己係初生嬰兒D皮膚咁護理就得㗎喇，例如用BB沖涼液，貪佢少D刺激。另外唔好用太熱嘅水沖電療位置，天氣太凍可以諗諗買部暖風機，吹暖個浴室先沖涼。沖完涼就用毛巾輕輕印乾D水，唔好大力捽D皮膚。
醫生會第三星期起每星期見你一次，睇吓有冇野唔舒服，胸口D皮膚點。如果甩皮甩得好犀利，可以叫醫生開一隻Solcoseryl Ointment比你，等傷口可以快D埋口。
圖片來源：互聯網
有D人就會當燒傷咁護理傷口，用D油性紗布同埋敷料黎阻隔D衫同皮膚嘅摩擦，一方面可以索咗D水，另一方面貪佢有浸油，等到換敷料時唔會黐住個傷口。另外呢段時間唔戴胸圍都會舒服D。
甩皮梗係痛，通常痛四五日度，可以食止痛藥舒緩吓，等新嘅皮膚生出黎就好好多。整體黎講，皮膚一般電療完成後兩個月慢慢回復正常，深色咗嘅皮膚就要多D時間先會白返。
乳癌電療費用
「聽落原來電療過程都OK，咁唔知收費又點呢？」
公立醫院＄80一次，如果電最多嘅30次，總數＄2400，而最少嘅15次，就＄1200。
私家醫院就幾萬到十幾萬蚊不等，好處係整體流程順暢D。不過貴咁多而治療效果一樣，大部份人除咗真係好有錢嗰D，通常都會揀返公立醫院電療。
化療一講就講足12篇，電療1篇就講完，你就知道乳癌電療原來真係唔洗驚。
要吊標靶針herceptin嘅，就繼續3星期吊一次，直到一年為止。如果唔洗吊嘅，已經過晒成日要去醫院嘅黑暗日子，黎緊只係日日喺屋企食藥，同埋慢慢復康過返D正常日子。
下篇我地一齊睇吓最後一個治療階段「乳癌荷爾蒙治療 － 點解我仲要食藥？」
香港乳癌及乳病治療中心 
謝謝你Breast HK 文章寫得輕鬆得來資料詳盡 我而家無禁驚了
Woowww, you did keep your promise to write up this article. Many many thanks.
休息休息，透下氣先，唔得爛尾，還要你幫!
Breast HK，謝謝，等你番黎
We have been in your good hands. Thanks be to God.
I keep my fingers crossed for the best surgical operation result next week.
Take good care!
Thanks Breast HK!
Thanks for your valuable information!
謝謝你，Breast HK，呢篇文章我相信會幫助到好多人，文章內容充實之餘又有攪笑位，好嘢，功得無量。
Breast HK, 做電療是否只是針對患癌的一邊乳房？同埋文章內提及治療後變深色了的皮膚要長些時間變回正常膚色，即是大約幾耐？
對，是指患癌哪邊的乳房。
大概幾個月。
好多謝你的回覆，Breast HK. 從你生動又詳細的分享，令我知道電療不是如想像的或別人所說的咁難渡過，但想知道除了皮膚反應外，有沒有其他的side effects? 例如特別疲倦、食慾不振、脫髪等？
你感覺到嘅係冇。唔會甩頭髮、唔會嘔、唔會唔想食、唔會冇精力、唔會抑制抵抗力。
感覺唔到嘅有傷心臟／肺，其實非常輕微，例如傷肺功能7%（人地因其他原因割一半肺都冇問題），所以唔講係唔知嘅，呢D咁技術上嘅細節，交返比醫生煩，你只需知結論究竟電定唔電著數大D，就夠你做決定。
Breast HK,我媽媽62歲，發現乳癌時已經是三期尾，轉移到淋巴，捎骨下淋巴都有，剛剛完成了6針化療，但醫生話腫瘤雖然已縮了很多，淋巴原先有的，現在都摩不到，但是有一邊的乳房都還是比較大和食在皮膚，所以做不到手術，建議做電療(醫生話驚再化療媽媽會頂不到)，現在很擔心她做不到手術又不可再化療，電療可以幫到她嗎？
未見過你媽媽本人，好難講係咪真係做唔到手術，聽落去腫瘤都幾大，全乳切除後直接刪埋個傷口怕且唔得，不過如果植皮嘅話，就都可能可以做手術（雖則復發機會都大，因為已經蝕出皮膚，即係T4）。
因為打化療嘅通常係腫瘤科醫生，而做手術嘅係乳腺科外科醫生，你最好搵個乳腺科醫生睇睇，睇吓係咪真係如果植皮嘅話，都做唔到手術。
如果真係做唔到手術同埋化療，電療都不失為一個好選擇，佢可以縮細小小個腫瘤，同埋令腫瘤乾身D，冇咁多野流出黎。另外電完如果腫瘤細咗，就叫乳腺科醫生再睇下，睇吓到時可唔可以做返手術。
如果都仲未夠細嘅話，下一步就可以諗諗口服化療Xeloda，或者抗荷爾蒙藥（如果ER＋嘅話）。
Breast HK，您好！上星期三我做第一次電療當晚就開始咳和喉嚨痛，我去睇家庭科醫生食藥以為是感冒，但吃了藥都幫助唔大，到星期日我唔洗電療而藥又食完，覚得喉嚨好D，無痛無咳；但昨天星期一又開始電療，下午又開始喉嚨痛，我已經狂飲水、鮮果汁和蜂蜜，但成晚都喉嚨痛到瞓唔著，吞口水都痛，請問唔知與電療有關係嗎？ 謝謝！
因為乳癌電療同頭頸腫瘤電療唔同，係唔攝及頭／口腔部分，所以你嘅病徴同電療係冇關係嘅，睇黎都係上呼吸道感染／喉嚨發炎居多。
上呼吸道感染大部分因病毒（virus）引起，喉嚨痛大概維持一星期，咳長嘅可以維持兩至三星期。另一方面，電療要三星期以上，所以你頭段可能有印象覺得有關聯（尤其咳）。不過尾段你就知道其實唔關事，因為上呼吸道感染病徴慢慢好返，但電療仲繼續緊。
多謝 Breast HK 你詳細的解釋，我明白了，希望我的喉嚨痛早D好番先過電療過程。
Breast HK， 我老公想陪我完成電療後一星期去日本沖繩島散心，我可以搭飛機、玩水上活動或浸溫泉嗎？電療副作用是否就是這段時間最犀利？ Thanks！
搭飛機冇問題。電療完一兩星期皮膚反應最厲害，我怕水上活動同埋浸溫泉會乸皮膚。同埋如果有電埋鎖骨對上位置，去D陽光充足地方，要注意衣著同防曬，小心曝光嘅皮膚灼傷。
知道，多謝 Breast HK 提點！
Breast HK， 我是乳房局部切除，要做共16次電療，剛做完第七次，便發覺整個乳暈腫脹和脹痛，輕觸都覺痛，請問是否正常？
好正常，遲D甩皮可能仲痛D，如果真係好唔舒服，可以食止痛藥頂一頂。
哦明白，唔該哂 Breast HK！
Breast HK, 如果做局部切除，前哨淋巴只是切除兩粒，跟住還要做電療，是否切除淋巴和電療都會有可能引致淋巴水腫？
乳房局部切除一定要做電療。
如果只切前哨淋巴，淋巴水腫的機會好低。
如果全淋巴切除，水腫機會大概15%。
如果全淋巴切除加電療，水腫機會可高達40%。
Breast HK, 多謝你的回覆，聽一些同路人說做過手術的一邊以後也不要拎太重的嘢（五磅以上叫做重）以防引發淋巴水腫，一聽到咁我就諗以後旅行拎重些行李都唔得？
其實人人情況唔同，割幾多粒淋巴唔同，剩返幾多粒淋巴又唔同，所以根本就冇科學根據話拎幾多磅野／拎幾耐就會出事。
「唔好拎重野」其實只係一般建議（就好似嗰隻手唔好抽血／量血壓一樣），背後概念係叫你有得揀時，盡量愛惜保護做過手術嗰隻手，冇得揀時都冇得你揀啦。所以去旅行行李重，最簡單梗係叫男仕幫手，唔係個男人要黎仲咩。
我是乳房全部切除，割了２２粒淋巴，２粒有事，肿瘤１６ｍｍ，屬於２期，要做標靶，化疗後水腫１３％，医生之前説不用電疗， 但最近又說新研究可減低復發率小小， 我担心電疗後水腫惡化，因水腫無得医，電和不電有幾大分別（ａｂｓｏｌｕｔｅ ＆ ｒｅｌａｔｉｖｅ減低復發率）？困擾中
呢條問題問得非常之好及專業（識問absolute risk同relative risk）！
你醫生講嘅研究，就係2014年3月先係國際權威期刊The Lancet，刊登嘅以下研究：
http://download.thelancet.com/pdfs/journals/lancet/PIIS0140673614604888.pdf?id=eaa1XnfyrS44Xgke7nuwu
研究發現全乳房切除及N1（1－3粒淋巴受影響）嘅病人（即係你嘅情況），電療後：
10年復發率由45.7%減至34.2%（Absolute risk減少11.5%，relative risk減少32%），即係100個你呢類病人，電療10年後12人因而得益冇復發。
20年死亡率由50.2%減至42.3%（Absolute risk減少7.9%，relative risk減少20%），即係100個你呢類病人，電療20年後8人因而得益冇死到。
所以我都會建議你電療，始終命仔緊要過水唔水腫。
請問我已做了6次化疗&標靶, 10年復發率是幾多?
太多資料欠缺，答唔到你呢個問題。
最接近你想要嘅答案就係用Adjuvant Online：
https://www.breasthk.com/adjuvant-online/
不過要注意佢係冇計到HER2型乳癌同標靶治療，所以講到尾，冇可能比一個實數你。
Breast HK 我係ER 8, PR 5, Her 2 3+ ，Grade 3, Ki 67 80%, 做咗TTCH x 6，化前25mm，化後3mm，淋巴嗰粒都細咗，手術部份切除，割2粒淋巴沒事，電咗tomox25，TB 5,重有半年標靶，請問1-3年復發率或死亡率參考指數？唔該晒！因為Ki67真的好高
你要補充多D資料先：
1）幾多歲？
2）「淋巴嗰粒都細咗」係咩意思？術前幼針確定有淋巴擴散定點？
3）「割2粒淋巴」係前哨淋巴嗎？定全淋巴切？
4）什麼是「TB5」？
Breast HK 好多謝你的回覆
1）50歲
2) 淋巴原有9mm腫瘤
3) 前哨淋巴切2粒
4) 用TB機加電5次
唔該晒！
假設你一路掃描都冇擴散：
化療前，cT2N1M0，stage 2b
化療手術後，ypT1aN0(sn)M0, stage 1a
先講講手術，如果化療前有淋巴擴散，化療後手術前淋巴如果消失咗，傳統黎講，都係做全淋巴清除。如果要做前哨淋巴，要搵到／切3粒前哨淋巴先達到合格嘅準確度。不過你手術已經做咗，我地就當佢準確黎討論。
你係HER2型，所以同樓上一樣，Adjuvant Online有其局限。
你個情況其實幾似一個術前化療加標靶嘅研究（NeoALTTO）：2013年12月喺San Antonio Breast Cancer Symposium，NeoALTTO研究隊伍公佈咗佢地嘅初步數據，ER＋兼術前打herceptin加化療嘅人，3年80%人冇復發，3年存活率有94％。兩個數據一減，即係第三年有20％嘅人復發，其中6%人走咗。希望比到個初步印象你。
Breast HK 多謝你好快覆我，同埋你的寶貴時間，十分十分感激！
Hi HK breast
I am from Cambodia，i am 34 year old having 2 kids.
前2星期在曼谷做了 right wide excision with sentinel lymph node biopsy, diagnosis result is : atypical ductal hyperplasia right breast. sentinel lymph node 切了5个化验结果没有感染啊。 之后又再做 immunohistocemistry stain (p63), the final pathological is : atypical cell proliferation DCIS or stage 0 cancer. doctor recomend for adjuvant radiation therapy and take tamoxifen for at least 5 years.
ER positive
PR positive
HER 2 negative
Ki-67 less than 10%
请问:
我是不是0期乳癌? 既然0期, 肿瘤都切了， 点解又要做电疗? 要做几次? 有什么副作用和后遗症?
如果take tamoxifen 是不是效果不大?
有没有其他 treatment is better?
話唔實係咪零期乳癌，佢個報告講到好似非典型增生ADH，多過似原位癌DCIS，不過結論佢係當原位癌，中間推論／思路就欠奉。最好睇返手術前抽粗針的報告，可以有多D端倪。
如果當零期，局部割所以要電療，做15至25次，副作用上文有寫。
Tamoxifen 喺呢個情況可以話效用不大，不過我地冇其他更有效的治療。
感激您的回复。
1） 请问什么是非典型增生？是良或恶性？
2）core needle biopsy report diagnosis: atypical ductal hyperplasia or ductal carcinoma in situ. Recommendation: due to result revealed atypical cell (atypical ductal vs DCIS) that isn’t definitely diagnosed the cancer. however it has high chance to be early stage cancer. Recommend to remove that mass with adequate margin (wide excision). Sentinel lymph node biopsy of right axillary. 请问报告结论是想讲什么。
3）最后个p63 test 报告 Pertinent lab finding:
Pathological report : atypical cell proliferation
Immunohistochemistry recealed Ductal Carcinoma In Situ DCIS
ER+ PR+ HER2- Ki67 less than 10%,
4） 讲老实， 我有D质疑这个报告， 未做p63 test 之前话无事，p63出来又建议电疗加食tamoxifen 5 years. 有点不放心. 请问我的case 如果不做电疗会不会复发？
医生您好， 又是我呀。 再补充手术后的病理报告：
– no metastatic carcinoma in all 5 lymph nodes
– Reactive sinus histiocytosis
– Intraductal atypical epithelial proliferation and focal columnar cell hyperplasia (see note)
– Free all surgical margin: 1.5cm from superior. 1.4cm from medial margin. 1cm from inferior margin. 1.5cm from lateral margin. 0.7cm from deep margin. 0.7
– Note: atypical ductal hyperplasia is highly suggested. The large size of the lesion is worrisome for the presence of DCIS. The IHC for P63 and alpha smooth muscle actin should be requested to confirm the diagnosis of atypical ductal hyperplasia. The paraffin block “K” could be submitted for the studies.
– Microscopic examination: specimen of “right breast lumpectomy “show an irregular area if ductal hyperplasia that measures up to 1.1cm in the greatest dimension. The proliferate especially epithelial cells show mixed solid pattern with microlumen formation in the peripheral areas. The lumens are irregular in shapes & size with haphardly arranged surrounding cells. Their nuclei are slightly enlarged but without bizarre appearance. Mitotic activity is rarely seen (less than 1/30HPF). Some ducts are lined up by columnar cells showing cytoplasmic snout at their tips. Dilated terminal ducts with flat epithelial linings are present around the lesion. All surgical margin are free of the lesion . Hemorrhagic tracts are also noted in the lesion, compatible with a clinical history of previous core needle biopsy. 请问这个手术后的病理报告结论是原位癌or not.
1）非典型增生本身為良性，不過同原位癌喺顯微鏡底下好似，與及附近有2成機會有癌細胞隱藏，所以都係要割。
2）報告結論喺佢分唔到係非典型增生定原位癌，建議做手術切多D去化驗清楚。
3）佢報告話特別漂染後，認為有原位癌。
4）我對你的報告也有疑問，一般p63 staining係睇basement myoepithelial cell，即係用黎分原位癌（p63+)定侵蝕性癌（p63－），並唔係用黎分別非典型增生同原位癌（因為兩者都係p63+）。因此你話唔電得唔得，究竟係非典型增生定原位癌，呢個診斷至關重要。
感激您回复。
1 & 2 明白。
3） 特别飘染报告最后写
The IHC study of the breast cancer in the paraffin block shows the following results:
ER : positive immunoreaction in 60% of the tumor
PR : positive immunoreaction in 50% of the tumor
HER2 : non-reactive immunoreaction in all tumor cells
KI67 : positive immunoreaction in 10% of the tumor nuclei
我有D乱，请问佢是不是以这个数据做结论是原位癌？
4） 您的意思是说做p63 test 是不可以确定是DCIS or ADH?
5） 请问我后来补充的切去验的报告（手术后报告）佢认为是DCIS or ADH? 佢当时同我讲没事，不过要等p63 报告出，点知p63 出后建议我电疗加食药tamoxifen 5年。我不是不想电疗同食药，我是想搞清楚自己系唔系中咗，只是做手术费已经去了几万港币， 现在要再找10万港币做电疗（我是在曼谷一间私人医院做手术）。如果真的有病一定要趁早医，我只担心医生/医院误诊搞到白白电咗。
太长篇了，希望您不嫌烦。
3）不是，呢D只係描述癌細胞特性。問題係依你提供的資料，一路都係話非典型增生，從來都冇一句確實話證實有癌，但之後就一跳就跳去描述癌細胞的特性，中間的推論／邏輯一概欠奉，同貫常報告方式有差異。
4）係，兩種情況p63都係陽性（＋）的。
5）佢認為係「最似係非典型增生，不過個size 大，所以擔心有原位癌的存在，同之前抽粗針結論吻合」，所以佢係一路冇確實有癌，佢只係話驚、話擔心。
看了您的分析，我更加质疑佢的报告。
再补充medical history， 请帮忙分析：
2010 摸到硬块并 照超声波发现粒瘤，结论良性
2012 apr 生第一胎，母乳7个月（bottle feed)
2014 may 生第二胎， 母乳2个月（bottle feed)
2015 may 超声波加mammograms, 结论良性
2016 dec 超声波发现粒瘤的边缘唔靓（有些zigzag), 再做mammograms 同样情况，建议抽针化验。之后呢就做抽针，做手术，最后出了这个报告. 以我的情况（瘤已经切了，前哨淋巴也切了5粒）有什么办法可以搞清楚是原位癌定非典型增生？从那里追踪？假释是原位癌，手术后多久要做电疗？
找過另一個病理科醫生再睇清楚切出黎的標本，去搞清楚究竟係原位癌定非典型增生。
Breast HK,
何解我聽同一樣一期的case，佢要電五星期，而我醫生叫我只需電四星期。分別何在？
你個情況就係我上文所講嘅新式電法，正名叫hypofractionated radiotherapy，電15次，如果加埋「局部加電5次」，就會係20次（四星期）。
而5星期嗰個就係傳統電法25次，冇局部加電。如果要「局部加電5次」，就會變成30次（六星期）。
做新式電法定傳統電法，好大程度取決於醫生信邊套同埋資源分佈，以我所知（如果你有第一手資料，麻煩話我聽，我唔想誤導大家），瑪麗醫院／東區醫院／伊利沙伯醫院都係新式電法。
瑪嘉烈醫院／屯門醫院／威爾斯醫院就仲係傳統電法。我係瑪嘉烈睇喎，咁咪應該做25/30次嘅舊方法？而唔係依家嘅20次？
當然，如果效果冇分別，電少D對我嚟講梗係好D！
咁我應唔應該問番醫生？
可能係瑪嘉烈都開始慢慢轉新方案。數據就話10年冇分別，所以開始傾向電少D，問唔問醫生就睇你喜歡，其實都冇咩方案得揀，只可以揀電同唔電。
明白晒！
Thx a lot!
再去醫院見醫生定位和掃描，我問電20和25次有咩分別，醫生解釋是兩個次數的總劑量是一樣的，只讓病人頻撲少幾次。
吓！咁每次落的劑量咪加多咗？身體可否受得住？俾我的感覺是次數少了是為了減少每個病人用機的次數，省卻時間。
以下資料已經大大超出你要知嘅範圍，寫出黎主要方便解釋，呢D技術細節，最好自己唔洗煩，交返比醫生處理。
傳統電法係總幅射50Gy（幅射單位），分開25次電，即每次身體承受2Gy。
新電法係40Gy，分15次電，即每次身體承受2.7Gy。如果加埋局部加電10Gy，分5次，就會好似你醫生所講總劑量一樣（大家都係50Gy，雖然呢個講法有D過份簡化，不過病人黎講易明D，我唔想講咩40Gy又等如46Gy biological equivalent dose 呢D複雜野）。
所以你醫生冇講錯，佢只不過想以最短時間，令你明白一D好複雜嘅野。
而你嘅理解亦都啱，每次嘅劑量頭嗰15次係多咗0.7Gy嘅。我地大規模咁採用，當然係做過晒研究，身體係頂得順呢個增幅先會咁做，放心。
你感覺「是為了減少每個病人用機的次數，省卻時間。」，啱呀，如果效果一樣，點解唔揀個簡潔D／便捷D嘅方法？
由病人角度，電少幾次，盡量減少病人嘅頻撲，盡早完成，盡快回復正常生活，唔好咩？
由資源運用角度，少D人用部機，條隊咪短D囉，人人唔洗等咁耐／排咁耐就有得用，最終得益嘅始終係病人。
Breast HK,
我電療後，手臂好痛，手術位置有d腫脹，見醫生時，醫生話：「比起其他人，你已經好好喇」但沒有處理我的問題。請問我可以點解決呢d問題？
(ca breast, 40y)
其實只可以食止痛藥，之後等佢慢慢好。並冇咩特別治療可以加速復原，所以要比D耐性。
唔該哂，其實政府外科醫生已見了，他說暫時都未能做手術，要交由腫瘤科，電療後再决定。請問手術前電療或電療後手術有什麼分別，後者會否復發機會更高？我是否應該再要搵外科私家醫試下有冇機會做到手術，做到手術先是不是總比電療後做較好？T4是不是代表第四期？
正常做法係手術後電療，除非特殊情況（好似你媽媽咁，現階段根本做唔到手術），先會掉轉考慮先電療後手術（雖然電完都大機會做唔到手術）。去到呢個情況，已經係有咩治療做到就做，冇人再考慮邊個治療方案復發機會大D。
搵唔搵多個私家醫生睇／聽多個意見，好視乎政府醫生比唔比到信心你。睇完私家醫生，情況有2個可能性（做得VS唔做得）。如果私家醫生話唔做得，就可以令你安心D，起碼咩都試過晒，醫生又睇過幾個，冇對唔住媽媽。不過如果私家醫生話做得手術呢，你就會好混淆，都唔知真係做得吖，定係有利益衝突。講到尾，就係邊個醫生比到信心你。
T不代表期數，佢只係講緊腫瘤有幾大。T4等於第三期B或以上，詳見「乳癌分期 ﹣ 我係早期定末期？」。
我媽媽已電療完成，昨回政府復診，腫瘤科醫生說淋巴，右邊都已摩不到有腫瘤，但左邊乳房都還食住皮膚做不到手術，我要求見外科醫生，他最話咁交比外料醫生再作決。其實我在電療前找了一位很有名的乳癌外科醫生，她說等電療後是可以做到手術的，還說要再打兩針T針。她說手術過程是要用肚皮的皮膚放上乳房填補，好肯定的說做到，所以我好不明白政府點解不肯做，是不是政府無資源，私家的費用要成70萬，真是支付不起，我可以怎做，私家會唔會有方法refer去政府到做？(下個月政府約見外科醫生會診，到時再問清楚，我可以怎做……)
聽你描述，好似左右乳房都有事，係兩個源頭（乳癌第三期）？定係一個源頭轉移去另一邊（乳癌第四期）？呢樣係第一樣要搞清楚嘅野。
剛見完政府外科醫生，他都決定幫媽媽做手術，但他不用私家建議用肚皮的皮膚幫補，只是用回自己原位的皮膚埋口，但是因電療後皮膚埋口是較難埋的，還說傷口爆機會高，同時兩邊乳房都要做，所以我很擔心，請問傷口難埋會有什麼影響和其實用肚皮補會不會較好？私家話我媽是3期c
如果可以成功用得返自己原位嘅皮膚，咁係最好嘅，唔洗多個肚皮大傷口。電療後皮膚係較難埋口，有機會爆嘅（不過如果佢肯同你試，即係唔爆嘅機會高過爆）。如果真係爆，就視乎程度先決定點處理，輕微者可以慢慢洗傷口等佢埋，嚴重者可以植皮／用肚皮補。
所以我支持政府醫生嘅建議，先試吓用自己原位皮膚刪埋傷口，睇吓得唔得先。如果真係失敗，先用植皮／肚皮去修補。
Breast HK,
請問Ki-67 %是代表什麼？ 在我的報告內我找不到這個terms. 有另外的寫法嗎？
生長速度指數（Proliferative index Ki67）：百分比越高，生長速度越快。冇一個統一標準去睇呢個指數，通常< =15%叫善良，16%-30%叫一般惡，>30%叫好惡；有D醫生就用14%黎做分界。
另外有D報告叫佢做MIB1，不過更加多報告係冇寫呢個指數，尤其係政府醫院，佢地覺得都冇統一標準，仲做黎仲咩。不過我個人就覺得好有用，可以幫到決定做唔做化療好。
Breast HK,我於4月22日係私家醫院做完清除腫瘤及前哨淋巴檢查,確診為一期(1.1cm原位癌內有0.2cm癌)及淋巴冇擴散,已交轉介信到瑪嘉烈醫院,但覆回要5月30日見醫生,請問見醫生後要等多久才會得到治療?會否過了黃金時間?另手術後常感好手那邊腋窩有小許痛,很擔心另一邊都出事,我應看那科醫生呢?是否應做PET-SCAN檢查呢(因外科醫生話我不用做)?另私家腫瘤科醫生說係私院做電療較好,因設計模具時會避開心,肺及食道,免受損害,公院真的會有這些問題出現嗎?不好意思,太多問題,煩請幫忙解答!
要睇吓個別醫院電療條隊長唔長，先知見到公立腫瘤科醫生後，幾耐先開始治療。一般黎講，等一至兩個星期就可以劃位，劃位後幾日就開始電。
唔洗怕錯過黃金時間，因為黃金時間好長嘅，手術後半年內電都OK。因為好多人要術後化療，之後先電療。你諗吓，手術後順順利利冇併發症，休息4個星期後開始化療，當打6針冇留班，都搞你18個禮拜，電得黎最快最快都起碼5個月以上，所以你有足夠時間嘅，放心。
如果好擔心好手嗰面有事，都係搵乳腺科醫生檢查吓，加埋照埋腋下超聲波就穩陣晒。不過呢D檢查理應手術前已經做咗，排除晒唔係兩邊都有事，先做手術嘅。如果真係擔心／手術前冇做，就去做返啦。
雖然T1aN0(sn)走散嘅機會好細，但我個人黎講，係好支持PET scan嘅。因為病人要嘅唔係「醫生咩檢查都未做，就講『統計學上你走散機會好細姐』」，病人要嘅係「醫生已經盡晒能力檢查，之後講『你冇事，冇走散』」。
情況有如輕鐵唔拍八達通比人捉嘅機會好細，但市民黎講，係好支持拍咭嘅。因為你要嘅唔係「唔拍咭，朋友就講『統計學上你比人捉嘅機會好細姐』」，你要嘅係「拍咗咭，朋友之後講『你冇事，唔會比人捉』」。
至於電療私家醫院係咪好D？有D私家醫院（例如養和醫院）電療係有新器材，叫高速螺旋放射治療系統TomoTherapy，好多私家腫瘤科醫生都會推介，佢就好似一部電腦掃描機加咗電療能力咁，透過多角度劃位／定位／電療，希望可以電得準D。由於部野好新，2002年先發明，根本冇大型研究數據話佢喺乳癌係咪真係好過傳統技術。一般黎講，乳癌電療並唔係D複雜野，冇需要用到呢D高科技器材（而家一般技術已經將心／肺／食道避得好好）。個別乳癌病人，例如要電埋胸腔淋巴(internal mammary lymph node)，想準確D對位，就可能有幫助／著數。不過高科技野而公立醫院冇，你都估到收費唔平，十幾萬走唔甩。大部分人一聽到收費，都好容易做到決定。
Breast HK,唔好意思,有小小問題不太明白,我的外科醫生話我係”T1NO”,而文中見你寫給我的類別是”T1aN0(sn)”,請問有何分別?另見有另一讀者是1.4cm原位癌中有0.2cm癌,她則是”T1aN0MO”那麼MO跟(sn)又有何分別?可否教教我?
冇大分別，T1aN0(sn)只係再仔細D描述，T1仲有細分abc，T1a即係侵蝕性部分5mm或以下。而N0即係淋巴冇受影響，細分（sn）即係做前哨淋巴，「冇（sn）」即係全淋巴切除。M係講緊metastasis（轉移），M0即係冇遠端轉移。
Breast HK,明白了,唔該哂!
Breast HK, 我原位癌在私院做局部切除手術後，轉介至瑪嘉烈醫院做電療，我分別問過見我的腫瘤科及放射科醫生，他們都話25 次，而其中一醫生話因英國上年的報告的對象不包括原位癌病人，所以就於我情形便沒有實質論據做15 次。
今天剛做完第二次，已開始間唔中有些少賬痛感覺，你在文中提及的RadiaCream 我今天已在合作社買了，可以現在就開始搽當保養皮膚嗎？還是盡量不要搽直至真的皮膚好乾及痕癢至好搽？
Hahaha，你地真係好利害，越問越深入／專業。佢冇講錯，不過推論我就唔同意。參加英國START trial嘅病人係早期乳癌病人，pT1-3N0-1M0，佢地發覺電少D次數效果冇分別。你醫生講得啱，研究對象係唔包括原位癌病人。
不過人地擔心嘅係D後期乳癌病人（例如T4／N2），電少D會唔會唔夠力，因為後期乳癌病人易D復發。人地擔心嘅「唔係」更早期嘅零期原位癌，電T3都夠力，點會電T0唔夠力（而家殺雞用牛刀點會唔夠力？！）。
情況有如求職見工，你係大學生去見份要求大學學歷嘅工好合理，你驚嘅係驚要求碩士學歷嘅工唔啱你。你點會驚份要求中學學歷嘅工自己唔夠班（而家殺雞用牛刀點會唔夠班？！）。
所以你醫生嘅推論我係唔同意嘅，不過各處鄉村各處例，入鄉隨俗，佢地話25次就25次啦（傳統不嬲都係咁做嘅）。
電膚寶幾時開始搽就係個人選擇，不過普遍病友相信「防患於未燃」，而家開始搽冇壞吖。
Breast HK 你好!我於4月初發現左乳房患有乳癌,4月22日在私院做完保留乳房手術,切去左乳房17mm腫瘤,有侵蝕性,及1粒淋巴,淋巴無感染,其實情況好似上面位朋友Alice的問題咁,私院就話做電療係私家做較好,係私院的腫瘤科醫生就話舊的電療就會影響心臟,要電30次,要6萬元,新的電療可避開心臟,要電15次,要7萬元.今天我去威記第一次見政府醫生,佢就話要電30次無分新定舊喎,但佢就話而家政府醫院的技術巳可避開心臟,同埋30次是因為係左邊乳房,分開d時間來電避免心臟太大負擔,重要佢只係每次$80,全部30次只係$2400. Breast HK,我想問的是政府的電療得一種,是新的還是舊的呢?係咪一定要電30次?係咪真係可以避開心臟呢?因為我怕搞好乳癌之後,如果個心臟又有事,咁就唔好啦.Breast HK,可否比d意見我可以係邊到做好呢?謝謝!
你個情況同樓上Alice好似，既然你睇完晒都仲係好擔心，咁我就講多D實質數據同歷史，等你易D做決定。
醫生最初發現「原來電療會傷心臟」，係透過觀察一堆1949－1955年乳癌全乳房切除後電療嘅病人，34年後發覺「咦？點解電完都冇長命D嘅？」，發覺原來電療係會傷心臓嘅，嗰堆人有死於心臟病而唔係乳癌。嗰時個電療技術相比今日，當然落後好多好多，心臟承受十幾至廿幾Gy嘅電。
因此1975年之後，技術不斷改良去避電到心臟，時至今日，電右乳房心臟承受1-2Gy度，電左乳房心臟就承受多D（不過多幾多，唔同報告有好大差異，如果好近心臓又要電埋internal mammary lymph node嘅話，就最多10Gy度）。
咁電到心臟又有幾大影響呢？根據2013年嘅研究：
http://www.ncbi.nlm.nih.gov/pubmed/?term=23484825%5Buid%5D
如果心臟承受3Gy（即係大概右邊乳癌要電嘅情況），50歲女士無任何心臟病高危因素，80歲前死於心臟病嘅機會由1.9％增加至2.4％，而有心臟病嘅機會由4.5％增加至5.4％。
如果心臟承受10Gy（即係大概左邊乳癌加埋難電嘅情況），50歲女士無任何心臟病高危因素，80歲前死於心臟病嘅機會由1.9％增加至3.4％，而有心臟病嘅機會由4.5％增加至7.7％。
你個情況應該係界乎上面2者之間，心臟傷唔傷就自己衡量，情況有如「得返半杯水，定仲有半杯水」咁，人人感受唔同。
至於你私家腫瘤科所講嘅「新vs舊」，應該係講緊我上文所講嘅唔同電療方案，開頭發展新方案嘅目的並唔係避心臟（雖然電15次心臟承受嘅電係少DD，因為15次乳房食40Gy電，30次乳房食60Gy電，記住乳房一定承受多過心臟嘅，我地就係想電嗰度麻），但佢用15次冇加電，去比較25次有加電，從一個唔公平嘅比較而得出結論話「30次就傷心臟，15次就避心臟」，難免比人感覺有D取巧，因為事實係「30次都避心臟，15次都傷心臟，不過理論上冇傷得咁多咁解」。
至於威爾斯醫院醫生講「30次冇分新定舊」，係指用現今當代技術嘅傳統方案（30次）去電，所以話冇分新定舊，當然我地亦都可以用現今當代技術嘅新方案（15次）去電。威爾斯醫院不嬲都仲係用傳統方案去電，並唔係技術上做唔到新方案，不過唔轉新方案嘅實質原因我就唔清楚，但「左邊乳房就要多D時間來電避免心臟太大負擔」唔係（唯一）原因，因為佢地右邊都係用傳統方案嘅。你去得威爾斯醫院，就只可以揀電同唔電，係冇得揀咩方案嘅，唔洗浪費時間同醫生傾吓有冇得新方案，因為牽涉嘅部門／人手／行政指令太多，唔係一個醫生可以決定。
注：到呢度所講嘅「新vs舊」「新方案vs傳統方案」同我答Alice所講嘅十幾萬Tomotherapy係唔同野黎嘅。
知道以上嘅資料，去邊度電好，應該易D做決擇。
Breast HK，
你好！
我係三陰性乳癌，已經做了局部切割手術，切了29粒淋巴，發現3粒有感染，也完成了 8 針的化療，下星會見醫生安排電療。
最近做手術那邊的手掌及前臂有腫脹，每當握拳時手指的節位都感到非常的腫痛。雙腳及另一邊手掌也有腫脹，但情況就不算非常嚴重。
請問點樣可以已善腫痛的情況?
請Breast HK指導！非常感謝！
雙手雙腳都有唔舒服，聽落去似T針副作用多（雖然手術嗰邊嘅腫脹可以關淋巴水腫事），其實冇咩特別方法去處理。一般建議就係止痛藥／休息／暖敷／按摩／申展運動（瑜珈），或者一個字：「等」。
其實有D國際指引建議用醫情緒病嘅藥，去醫因化療引起嘅神經痛（chemotherapy associated neuropathy），例如duloxetine，不過我少接觸，唔敢貿然推薦。
多謝Breast HK的回答，我明白了！我會努力多的多做運動，希望可以減少腫脹。謝謝！
多謝Breast HK的詳盡分析，我清楚很多了，我可以好好決定最適合我的方案！身體健康！生活愉快！
醫生您好,很感謝您百忙中仍這麼快回覆,還有兩問題,希望您能幫忙解答,我舊年經期亂及量多,後婦科醫生發現子宮內膜生了粒良性息肉,已於今年1 月做切除,刮宮手術,並戴了Mirena子宮環,但到3月發現患乳癌,請問現情況,需要將環除去嗎?另私院腫瘤科醫生說我只需做電療(是否真的不用化療)及食Tamoxifen(醫生話我ER同PR都好陽性)但藥物有副作用,而我子宮內膜曾生過嘢,驚易有子宮癌,故建議將卵巢切去,甚至連子宮一併切除免後患,請問Breast HK,我有其他方案可選擇嗎?我可否不食荷爾蒙藥呢(Her 2 -Negative，Grade 1, Ki 67-2%),可否給我一些意見?
你幾多歲？有其他大病痛嗎？
Breast HK,您好,我今年46歲,已有兩名女兒,沒有其他大病痛,家族亦沒有人患過乳癌及子宮癌!謝謝您!
T1aN0(sn) ER+ PR+ HER2 -, Grade 1, Ki67: 2% 乳癌黎講其實真係好早期，僅次於原位癌，好似你醫生咁講，電療加食藥應該就夠。你想知係咪真係唔洗化療？或者唔食藥得唔得？可以用Adjuvant Online計一計化療同食藥有幾大著數：
1）唔化療、唔食藥：10年死亡率：1%；10年復發率：14.9%
2）打第一代化療、唔食藥：10年死亡率：0.7%；10年復發率：9.6%
3）唔化療、食5年Tamoxifen：10年死亡率：0.7%；10年復發率：9.2%
4）打第一代化療、食5年Tamoxifen：10年死亡率：0.5%；10年復發率：6%
你會睇到化療相對食藥，所提供嘅額外著數著實不多。因此大部份人都會揀舒服D嘅食藥。至於切晒卵巢，效果大概等如打咗第一代化療咁上吓。你可以就住以上數據，諗吓自己想要咩治療效果，去決定接受咩治療方案，冇咩輔助治療係「必定要做」嘅，不過冇做「XX治療」而冇「XX功效」，係好自然嘅事。
您好！ Breast HK
我母親年78歲，剛於4月尾發現乳癌第二期惡性，於8/5在私家完成全切乳房及淋巴，私家醫生轉介媽媽於27/5看QE 腫瘤科，醫生建議要吃五年傳統抗癌藥和電療20次，我們好擔心母親年紀咁大，剛做完手術都未康復，又要負擔電療的副作用，體弱的她怕承受不了，請問醫生手術完做埋電療才完善將不知有否隱藏着的癌細胞消滅，才有更大的保障嗎? 如果唔做電療，就好像沒有完成手術，癌細胞好快又復發? 做或不做電療影響嚴重嗎? 有無人第二期完成手術，不做電療或化療都可以繼續好好存活。
Breast HK你的意見我母親咁大年紀，做完手術真係必須電療? 我們作為兒女只希望過着快樂家庭生活，怕再受折磨，療程令她辛苦，就算多给數年命，但就辛苦療程中生活，我們願母親快樂過话，不是捱苦療程去爭取活多數年。
母親應否接受電療嗎?
pet
你要提供多D資料先可以準確D答：
1）邊隻腫瘤？腫瘤幾大？幾多粒淋巴受影響？
2）HER2陽性定陰性？
3）Grade幾？Ki67幾多%？
4）有冇大病痛／長期病患？
5）要幾耐有質素嘅生命先滿足？
Breast HK 醫生，
我十四年前患了乳癌T1N1M0, 已完成全乳房切除，重整，化療(4針AC)和五年tamoxifen. 沒做電療。年半前發現重整那邊乳房表皮有暗瘡類東西長出。不以為意，早二個月復診才發現是癌症復發。已做了手術切除nodule, ,clear margin. 病理報告顯示是0.7 cm invasive ductal carcinoma grade three with no lymphovascular invasion. ER +PR + Ki-67 40%. 乳腺外科醫生說接着做電療和吃十年aromatase inhibitor便可.但腫瘤科醫生說要做化療以減低復發的機會。我掙扎良久，後被勸服打第一支TC. 但有很多問題出現，除了無胃口，疲倦，tingling 等感覺，一星期後還在落針的地方敏感，長水泡，白血球己低至1.3. 要打neupogen. 繼而長shingles 在手臂，腋下和好乳房上端的地方，又痕又痛，医生開了共二星期的anti virus 藥给我，現在消了結焦了但時不時還有痕癢和像傷口痛的感覺。我的問題是：
1. 我想不再繼續打下一針TC 了，會不會有好像antibiotics那類resistant 的問題？或其他問題？
2. 我的重整乳房是用鹽水袋，電療對它會有什麼影響？我的情况要電多少次才好？
3. 可在電療期間同時服用Aromatase 賀爾蒙藥嗎？
4. 我還没到更年期，醫生說要打停經針，此針對整個生殖系统有什麼副作用？aromatase 又有咩嘢副作用呢？
5. 打完停經針後多久便有更年期症狀出現？吃什麼可有助舒缓症状呢？
因case 比較複雜，長篇大論，不好意思。希望醫生你盡快回覆，謝謝！
1）唔再打TC，唔會有resistant，不過冇咗化療嘅好處（減少復發／延長壽命）。如果你會打停經針／用其他方法抑制卵巢，差不多等如第一代化療CMF嘅效果。
2）做咗鹽水袋乳房重建，電療有可能令附近組織／疤痕收縮（capsular contracture），最差情況可以長期痛楚／乳房變型。你要電20次度（15次＋加電5次），實際情況有冇出入，要問返自己醫生。
3）電療時可同時服用Aromatase inhibitor （AI）。
4）停經針（Zoladex）係用黎抑制卵巢嘅雌激素分泌，對成個生殖系統嘅影響就係用緊藥時會不育，同埋有更年期病徵（潮熱，心情唔好，下陰乾涸，性慾下降，體重上升，皮膚變差）。AI 可能會骨痛／骨質疏鬆。
5）打完頭一針三星期度，身體嘅雌激素就會同收咗經嘅女士相約，一兩針後就會冇咗經期黎。至於幾時會有更年期症狀就人人唔同，好難講實。咁食咩好呢，就可以上網睇更年期D資料，唯一要留意就唔好食賀爾蒙補充劑（Hormonal replacement therapy, HRT），因為有研究認為HRT會增加患乳癌風險。
謝謝醫生你的快速回覆！我還有些關於電療及賀爾蒙治療的問題想問你：
1. 你文中提及電療15次和30次的效果相同，總劑量是一樣，那麼30次是否電得舒服D？因為每次的劑量無咁勁。
2. 我打的停經針是Lupron. 是跟Zoladex 一樣嗎？既然打了停經針，就無咗estrogen生産，點解重要食aromasin呢？Aromasin 又有咩作用呢？
1）仔細D再睇我上面寫乜，你有少少誤解。15次（40Gy）同30次（50Gy＋10Gy）嘅效果不能直接比較，因為一個係冇局部加電（新式15次），一個係有局部加電（傳統25次＋局部加電5次）。而且總劑量係唔同嘅：一個40Gy（每次2.7Gy），一個60Gy（每次2Gy）。並唔存在30次會舒服D，因為你係唔會感覺得到0.7Gy嘅分別。
2）Lupron同Zoladex係同類野。未收經，女性荷爾蒙主要來自卵巢。收經後／打停經針，卵巢收工，女性荷爾蒙主要來自脂肪。Aromasin就係用黎抑制脂肪製造女性荷爾蒙。
唔該晒呀Breast HK 醫生，係我攪錯咗，應該係20 同30次是相等總劑量吧？是否計埋局部加電，新舊的總劑量都是60Gy? 會唔會有case 要電多個60Gy的劑量？
我的醫生話我要電6個半星期。整體電28 次，再局部加電7次，我有D困擾，點解電咁多次。聽完你講傳統唔會舒服D，更加唔想去多幾次醫院。另外醫生又話我個鹽水袋高咗D，個角度會射多咗去肺，要放走一D鹽水至電，咁電完之後，個袋會唔會變咗型？重可以再打翻D鹽水入去嗎？電療雖然好似無化療咁辛苦，但D副作用都好似比較永久性，唔似化療過去之後，身體回復狀態便無事！諗到呢到就好煩，好depress. 點算好？請breast HK 醫生點化一下。謝謝！
都仲未啱，不過幾多劑量呢D野已經大大超出你要知嘅範疇，越講你只會越亂，對你有害無益，所以我唔打算再講多D。
點解你醫生叫你電35次？我只可以話35次唔係常規做法，至於有咩特別／個人原因，詳情都係要問返自己醫生。或者想聽多個意見，搵多個私家腫瘤科醫生都得。
至於抽水問題，如果你係一般鹽水袋（Saline implant）重建，我就未聽過抽返D鹽水出黎先電。除非係胸口擴張器（tissue expander）就可能會有醫生選擇放咗水黎電，不過大部分醫生都係打脹黎電，等D皮膚有支撐，唔會郁黎郁去。
其實所有野都係針無兩頭利，有好嘅作用，自然有唔好嘅副作用。只要平衡兩方面後都仲係有著數嘅，就咬緊牙關往前衝，好快雨過天清，唔好擺個放大鏡落副作用度自添煩惱。
Breast HK 醫生，
又係我呀！多謝你给的資料和意見！我又發生一D情况，想你幫忙了解一吓。我8月20日打了第一枝lupron 停經針，已心理準備好無月經來，但我咋天早上又來經期，起初是以為有些出血，打了给腫瘤科醫生問，又叫我睇婦科，婦科要到星期一下午至有得睇。但到了晚上出血嚴重，比平時月經來還要多，好似倒水咁。我想知道我這種情况常見嗎？這些是血經還是子宮不正常出血？是否打第一枝停經針不會完全停經？定係打嘅量唔夠？一般打多少量呢？Aromasin 會唔會引至出血呢？我昨晚停了Aromasin, 因為覺得經期來了，食也没用。果個混合食法，2年tamoxifen +3年aromasin 啱唔啱我？我今年47歲，等自然停經后再轉新藥。但之前食了五年tamoxifen。麻煩醫生你盡快為我解答。我這邊的醫生好似未見過我咁嘅case.
呢D唔洗睇婦科，打停經針通常第一至第二針之後先收經。你嗰D比正常經期仲要多嘅流血又係正常不過，因為第一個月女性荷爾蒙急劇降低，係會咁流好多血嘅，呢D叫withdrawal bleeding（就好似人地食避孕丸，停食七日流血咁）。流血唔關Aromasin事，請你繼續食藥。
你由電療／食藥／打針／建議都同香港有出入，是在哪邊醫的呢？
唔該哂醫生！原來是正常的，等我重驚餐死。我星期一要打去取消婦科appointment了。我是在美國芝加哥醫，因為保險問題，不能隨便找什麼自己喜歡的名醫，惟有睇在network内的oncologist. 佢未必係專breast cancer 這方面，咩嘢都睇，週身刀就可能無張利！現在有breast HK 醫生你一路陪住我，guide 住我就放心得多了！
咁..據你咁講，我打第二次停經針后都有可能來月經？但仍屬正常？兩次月經相距的時間也該和以前未打針時一樣？好，我今晚食番aromasin. 停了一天應該無咩大外吧？
另外，我在打停經針后二天做咗bone density scan, 結果係已經有初期疏鬆現象。醫生叫我食鈣+vitamin D, 遲下會幫我打prolia 針，可改善疏鬆現象，但隻藥係唔係好新？副作用又有D咩嘢呢？有無其他方法可改善骨質疏鬆而又少D副作用架呢？
請醫生你盡快回覆，謝謝！
經期「通常」第二針後收，當然「通常」嘅意思就代表「可能有例外」，即係仲可能第二針後都仲有經期。越多針，仲有經期嘅可能性就越細。
而你而家經歷緊嘅下體大量出血withdrawal bleeding（非經期），就第一個月㗎姐。
Aromasin 停一日半日冇問題，食返就得。
Prolia (Denosumab)係好新，用係骨質疏鬆好方便，半年打一針，冇食口服藥咁煩。通常都好受得，冇咩副作用感覺到。係副作用之中，比較常見有便秘／背脊痛，比較嚴重但唔常見嘅有顎骨壞死（osteonecrosis of the jaw）。
改善骨質唯一冇副作用嘅就係承重運動weight bearing exercise，實際做D咩，可以自己上網睇。
唔該晒醫生！明白哂拉！
Hi Breast HK 醫生，
我最近又被確診右邊乳房是DCIS. 我想做mastectomy. 想知道要不要也切除前哨淋巴化驗有無擴散？是否不用做化療和電療？
如果做mastectomy，可以考慮順手做埋前哨淋巴。原位癌唔洗化療，電唔電就視乎手術做邊樣。詳細可參考乳癌零期治療攻略－原位癌有咩咁特別？
你好，我媽媽52歲，有焦慮抑鬱症。兩星期前進行保留乳房手術, 証患乳癌第一期PT1CN0。
考量媽媽有精神問題, 討論後認為化療弊多於利，於是醫生建議電療30次及服藥TAMOXIFEN五年。
我上網查了好多資枓, 說一般是電療後才開始吃藥，但現在還未開始電療醫生已開始叫媽媽開始吃TAMOXIFEN藥中, 請問此會有影響嗎? 謝謝
你好細心，咁細微嘅細節你都留意到。
好耐以前，有派學說認為電療緊時食Tamoxifen（注：AI係唔會），會增加電療對肺嘅損害，所以嗰時醫生係會叫病人電完晒成個療程，先開始食Tamoxifen。
但後來發現，呢種疑慮／呢派學說其實缺乏證據支持（即係我地唔覺得傷肺D），所以而家我地會叫病人完成晒化療已經可以開始食藥（無論電唔電都好）。
因我看到網路上有篇是這樣寫的: 因TAM 是雌激素受體阻斷藥, 是抑瘤藥, 而非殺瘤藥, 把腫瘤誘導入GO期, 而GO期剛好放療及化療不敏感, 所以TAM只能放在放化療都結束後, 而不能和放化療同時使用.
所以我才會有這疑問, 因媽媽剛做完手術才兩星期多, 電療排期中, 但已開始吃TAMOXIFEN 10MG (早晚各一粒)了,
另外, 媽媽保留乳房手術後的病理報告是乳腺高分化浸潤性導管癌, WHO組織學分級1級, 5分=2+2+1, 腫瘤最大直徑1.6CM, 組織表面的皮膚及手術切緣未見癌, 送檢組織中見20淋巴結未見癌, 腫瘤細胞中度異型性, 細胞核增大, 核分裂約3/10hpf,
免疫組化:
ER POSITIVE, H SCORE=7
PR POSITIVE, H SCORE=8
Ki-67 low proliferative index, PI about 5%
C-erbB2 negative, score 1
E-Cadherin 陽性
p63陰性
無HER2基因擴增
1)經過你的解釋, 我想媽媽未開始電療已開始吃tamoxifen應該是不會有問題的吧?
2)從病理報告中, 是否表示媽媽是否已把全部腋下淋巴都切除呢? 這樣在進行電療是不是大多數會引起水腫, 電療後能恢復嗎?
3)因媽媽正處 於更年期, 月經之前已很不規律, 而醫生說媽媽情況比較灰色, 化療沒有說必要或不必要, 再考量焦慮抑鬱情況下, 醫生建議不化療, 只做電療30次及5年tamoxifen, 請問醫生的做法可行嗎?
1）未開始電療已開始吃tamoxifen係冇問題，不過建基於腫瘤係ER/PR陽性。你上面寫H Score，我唔知你有冇覆述錯。因為H Score 滿分係300分，如果7或者8分，係陰性（食Tamoxifen冇用）。如果係Allred score（滿分係8），就係陽性（食Tamoxifen有用），所以你返去搞清楚邊一種score先。
2）切咗20粒淋巴，可以評估為「已把全部腋下淋巴都切除」。電療會增加水腫風險，不過局部割係必需電療。恢唔恢復就一DD人。
3）做唔做化療好，取決於ER/PR係陽性定陰性，你搞清楚第一點先再教你。
報告是甘寫的:
腫瘤細胞ER陽性 (ER positive, H score=7分)
PR陽性 (positive , H score=8分)
咁就錯咯，H score 0-9 係陰性，10-49係微陽性，50-300先係陽性。你們要返去問返醫生搞返清楚，先再決定下一步點做。
再者,很多謝醫生你的迅速回覆,其實我是澳門人,從媽媽一年前得了焦慮抑鬱全家已不知所措,精神問題還未痊癒,毫無預兆來的乳癌更令我們驚慌過度,你也知道澳門只有兩間醫院,醫生更不停要求我們作出重大決定,如手術前要我們決定全乳切除還是保留乳房,手術後又要我們決定是否化療,一間醫院說化療對媽媽弊多於利,另一間說做埋化療會好d,我們本來就沒有這方面的認知,又怎能輕易作出決定呢,只好不停上網查資料,剛好看到你的網站,真的大大幫助了我們,至少我們對乳癌及後續問題都了解了不少,真的非常謝謝你
謝謝醫生你的發現, 因之前兩間醫院看了報告都沒有發現問題, 今天再向醫生確定了報告是allred score的評分, 是他們打錯了!!!!!! 那你建議我們下一步怎樣做呢?
澳門醫生是建議不化療, 電療25或30次及吃藥5年
電療就點都要做，下一步得兩樣野要決擇：
1）化唔化療
2）食藥點食法
1）你媽咪將近更年期，年紀唔算輕，按傳統adjuvant online計算，化療著數已經唔係咁明顯。再加上佢有焦慮抑鬱症，我係同意澳門醫生建議唔化療，冇謂再加重心理同肉體負擔。
2）食藥就有唔同建議，食十年Tamoxifen 或者轉藥食法更好。詳見乳癌荷爾蒙藥 － 不同年紀嚴選最正確食法。
明白。
那電療你認為25次還時30次較好呢？
唔應該25對30（一個冇加電一個有加電）咁比較。好似上文咁講，一係新電法15次＋5次加電（20次），一係傳統電法25次＋5次加電（30次），兩者暫時證據係冇分別，當然傾向揀少D次數嘅方案。
我不幸地check到患乳癌，現在已經7cm, 要一邊乳房切除，下星期首先做一個前哨淋巴手術，攞乳房側邊一粒淋巴出黎驗再做手術。但抽過粗幼針，又照晒x光，磁力共振, 正電子掃描都話我係原位性，咁點解仲要攞一粒出黎化驗先呢? 醫生就話要知道會唔會有侵食性先知之後駛唔駛做電／化療。但如是原位性又點解會擴散去左淋巴呢? 同埋話我屬早期，但又估計可能係二期B, 乜野都要做完攞出黎再化驗先知，等待既心情好難受。最大問題我肚之前做過幾次手術，疤痕是打直的，大約有12cm長，如做重建要用肚既肉的話，就要攞晒兩邊肌肉，但用背脊我又唔想，因為用背脊唔夠肉，應該要加鹽水袋，但如要電療又會令水袋變型，令到我好煩惱亦都好困擾… 請問有冇其他建議呢? 謝謝！
你個情況真係好複雜，嘗試解釋比你聽：
A. 點解原位癌都要做前哨淋巴？
最主要係醫生覺得你唔係原位癌咁簡單，換句話講，即係佢覺得你有侵蝕性。點解咁講？7cm如果有侵蝕性即係T3，做得前哨淋巴即係N0，T3N0就正正係你醫生講可能嘅2期B。
如果有侵蝕性但你以為係原位癌，全乳房切除時又冇做淋巴，咁你之後係要補做返前哨淋巴手術，本來做第二次手術都冇咩問題嘅，不過如果你第一次手術時做埋乳房重建，咁要翻手就好麻煩，尤其係用背脊重建，係會阻住腋下搞到好難做，最危險甚至會傷到背脊皮瓣添，所以你醫生叫你做咗前哨淋巴先，雖然暫時你認為自己係原位癌（醫生唔係咁諗）。
B. 有咩乳房重建選擇？
1）背脊加水袋（如果係原位癌，唔洗電時嘅最好選擇。）
2）淨背脊（接受佢係細D／唔對稱，但如果要電，你就唔洗怕水袋變型。）
3）單邊肚皮（同上面一樣，都應該係唔夠大，因為肚做過幾次手術）。
4）淨背脊／淨單邊肚皮，短暫接受唔對稱，第時完成曬治療都仲係接受唔到時，先抽脂肪填充（lipofilling breast reconstruction），不過安全性仍受爭議。
多謝您醫生，我今朝入去做前哨淋巴手術，多謝您既建議！之後有問題再請教您啦，謝謝！
祝手術順利。
醫生，我上次做完前哨淋巴後，而家傷口位腫左一隻雞蛋咁，但要再等下星期先知報告同覆診，腫左有問題嗎? 定遲些會消腫呢? 麻煩您！
剛剛做完手術就腫咗，聽落去似手術後積水，可以覆診時問問醫生係唔係？如果係，洗唔洗抽咗D水去。
唔該您醫生！因為都幾痛，我覆診時問下，但是關手術問題定我郁得太多呢? 謝謝您！
好多因素都可以影響到，好難講實因為某某原因搞到咁，但亦都不需深究，因為你會做第二次手術，到時可以一併處理。
知道，謝謝您！
醫生您好！做完前哨淋巴後，證實左有擴散，所以要做埋淋巴切除手術，亦決定了用背脊肉加矽膠袋，之後還要做化療和電療，無奈地也有些擔心！也想請問一下，醫生說以後都要著無鋼線bra, 亦在做手術後要暫時著前扣的無鋼線Bra, 請問知否在哪裡買得到呢? 我都有出去搵過，謝謝！
以下資料係由病友搜集所得。（利益申報：我冇同任何一間公司有聯系，自己亦都未試用過佢地產品，所以我係唔知佢地嘅服務／產品係好定唔好，甚至可能有黑店都唔定，自己打電話去／上佢地網頁研究吓。排名只係分區加隨機，並不表示邊間好D。）
謝謝醫生的幫助!
另外, 以我媽媽的情況是不是屬LUMINAL A 類型呢? 是不是預後較好和轉移復發性較低者呢?
而另外想問媽媽現時是否適合吃亞麻子呢?
因網上有很多不多意見, 有些說不能吃植物雌激素,如粟米油,黃豆,豆腐和亞麻子,
有些說法則說可以有很好抗癌作用?更可加強TAMOXIFEN藥的作用,能有效防止乳癌復發
你媽咪係Luminal A型，係最好嘅乳癌類型，本身生長速度慢，又有藥可食，轉移嘅機會係細過其他類型。
我本身對亞麻子冇研究，所以唔知。我亦都相信冇一致嘅證據話佢得定唔得，所以信邊一派學説係完全講個信字，唔需要強求證據。
醫生。又是我了。感謝你能百忙之中抽空解答我們的問題。謝
今天媽媽開始電療。而醫生確定話電28次。好奇怪不是25也不是30次。知道醫生用意為何嗎？
另外。媽媽左乳房保留手術後傷口未完全復原。特別是引流管傷口。仍未可以洗澡同需用膠布貼著。會影響電療嗎？
因還有紗布及未能洗澡。這樣可用電膚寶嗎？電膚寶塗的位置是否不可接觸到整個傷口部分呢？
另外媽媽手術時間是8月21日。至今天9月23日仍是以上身抹身形式。不敢沾水。
唔理解醫生點解咁建議，只可以話同香港一般做法有差異。
手術已經一個月有多，傷口應該埋晒口。如果仲要貼膠布／唔可以沖涼，就要搞清楚係自己過份擔心做多咗？定係真係未埋口有咁嘅需要？呢個要搵醫生檢查：
如果已經埋晒，就可以照電／照搽電膚寶。
如果未埋口，就唔好電住。
唔該晒您醫生，已經做完手術了，謝謝您！
醫生你好，媽媽電療已接近尾聲，但每天都感到非常累，請問有什麼食療或方法可幫助到呢?
冇咩特別食療／方法，「累」最治本嘅方法就係「休息」，雖然咁講好廢，但呢個始終係事實。
我聽醫生講，全乳切除後，在原本腫瘤的位置放置了金屬標記以方便電療時的位置，之後不用再把金屬拿出來，永久存在於體內，想請問這對於日後生活有否影響?例如不能照X光或某些身體檢查。那個金屬是哪種?鐵or不銹鋼?會在體內生銹嗎?此外，全乳切除後胸壁肌肉僵硬及有時感到痛楚，這與內有金屬有關嗎?另外電療之前要在皮膚紋點，留下永久痕跡，我可否要求用筆畫，而拒絕紋點?最多我洗澡時小心唔好整甩色。謝謝你回答。
嗰D金屬係鈦金屬（Titanium），係唔會生銹，對日常生活冇影響，可以過保安檢查機，第時照磁力共振都冇問題。
呢D標記好細，唔會感覺到，「手術後胸壁肌肉僵硬及有時感到痛楚」同佢無關。
我未遇過病友拒絕紋點，唔知可唔可以用其他野代，你見到放射治療師時可以問吓佢。
醫生, 又是我了, 很久沒有聯絡了, 我媽媽已完成好電療, 現在只是每半年覆診一次, 但我發現從11月頭電療完後至現在, 胃口一直都好好, 但體重有減輕, 朋友都說她瘦了, 有需要再作進一步檢查嗎?
另外, 自從電療(電療前作一次CT定位)後就沒有再做任何B照, CT 之類檢查, 怎知療效怎樣?
現在, 只有再等每半年後抽血覆診, 但手術前抽血顯示也是正常的, 這樣只靠半年抽血, 一年後才再乳房X光能知道癌症有受控嗎?
而媽媽的身心症抑鬱還沒有好轉, 醫生轉開了sulpiride 50mg 給她, 現在藥單是:
Pristiq 50MG 每日2粒
Amitriptylini hcl 10mg 每日1粒
Lexotan 1.5mg 每日1粒
Sulpiride 50mg 每日1粒
這些藥會對她正在吃的Tamoxifen 10mg 每日2粒 有相互影響嗎???
另外, 媽媽已切除全部腋下淋巴, 是不是以後都不能泡溫泉及坐飛機要用壓力手套呢?
謝謝你的答覆!
體重驟降，搵醫生檢查係最正確做法。
做完治療，我地係假設佢有效，或者可以話「冇需要」去證明佢有效，除非有合理懷疑乳癌失控。如果冇懷疑，定期跟進住就ok，詳見乳癌檢查 － 醫好乳癌之後點跟進？
Amitriptyline 係輕至中度CYP2D6 inhibitor，有可能影響Tamoxifen藥效。
溫泉就唔好浸，另一方面，冇科學證據話「坐飛機用壓力手套」有幫助「預防」淋巴水腫，帶唔帶純屬個人喜好。
請間全淋巴切除後,游泳會否導致淋巴水腫?此外，有否其他類型的運動需要避免？
無明確指引話邊D運動做得、邊D唔做得。我諗大原則係唔好嗰邊膊頭太激烈／太大動作，因為怕整傷／撕裂僅餘嘅淋巴管道。
我已經電療完了一年, 電左33次, 電完后D皮爛到見紅肉, 當時要日日去醫院洗傷口和敷料,洗足2-3 個月,
而家胸口手術個位 仲有黃色野出 ( 個護士話果D叫 “痂”), 總之好反覆, 甩完又起, 護士話我大瘦.冇肉俾佢自己埋,所以咁耐..(但我係食極唔肥的人)
到而家成個胸又硬又有D痛 ,又做唔到超聲波檢查; 個膊頭又轉唔到,個物理治療又話要等D皮好番, 先幫我推鬆D皮
唉…令到我好困擾, 已一年了都是這樣, ….
想問下有冇方法令到果度D皮快好番,至少冇野出,係干爽 ,or應該睇什麼專科?
仲有,手術位置可否照激光/ 活彩偏光機?
謝謝!
電療後嘅皮膚護理可以睇以下醫生：
1）腫瘤科醫生：佢地接觸得最多同類病人
2）整型科醫生：電療後皮膚問題其實同燒傷很類似，燒傷係屬於整型科範疇。
3）皮膚科醫生：所有皮膚問題都關佢事㗎喇。
至於激光／活彩偏光機，我冇呢方面經驗。
我是原位癌因為鈣化點範圍散，做了全乳切除加即時重建，手術前醫生話須切2粒前哨淋巴化驗，唔須要做電療同化療，藥也可能唔須要食。病理報告出了，切了五粒淋巴，是零期原位癌無入侵性，但由於貼近皮膚所以須加多項電療，又話全乳切除唔須要做其他療程，是否因為重建了乳房呢？電療是否一定要做？本人擔心電療副作用及出現痕癢和傷口脫皮痛的感覺。
好難講實係咪一定要做，要視乎所謂「貼近皮膚」係咩意思。如果係指割唔淸（involved margin），加電療希望降低復發風險。但如果係切清嘅（clear margin），已經全切係唔洗電療嘅。重建乳房係唔影響電唔電嘅決定。
我是否要再問翻醫生呢？醫管局的醫健通可否睇到病理報告，為何要做多項電療嗎？
問返醫生係最正路做法。
Hello醫生你好,
我家工人姐姐經醫院抽針檢查後証實乳癌第三至四期，已排政府醫院化療及做手術(因腫瘤太大要先打6-8針才能做手術)，由於姐姐與我一家要好及非常盡責，她亦意向想在香港醫治，所以已答應讓她整個療程在香港進行! 但朋友告訴我說放射治療會有幅射由病人帶返家中, 如果小朋友近接觸病人更會被影響……因為從沒有聽過此傳聞, 請問那是真的嗎? 因家中有小孩要照顧, 所以很擔心, 謝謝!
此傳聞是謬誤，乳癌嘅放射治療係對病人施以幅射，但係並唔會將放射物質帶返屋企，所以可以放心，唔會影響小朋友嘅。
真的非常感謝你的解答, 亦非常感激有你的資訊, 謝謝!
你好,我媽60歲，剛係10月頭發現有大約2CM大腫瘤，已經見左醫生排期做手術，醫生比佢自己揀部分定全乳,最後揀部分+電療!當手術完睇埋報告先決定要唔要化療。但我見同你比個條timeline好似電同化先後倒轉，個效果係咪都一樣？另外你提到照PET SCAN睇睇有無抗散到身體其他部位，想問呢個SCAN係咪可以係手術前照?
十分感謝你提供所有資訊！
先後次序冇倒轉，只不過你媽媽因為揀局部割，所以一定要電療，化唔化療就要等報告。如果真係要化療，佢係會加插係手術後電療前做嘅。
PET scan 如果係做，就手術前做好D。
你好，9月中做完右乳房局部切除手術，現在電療中。手術前已做pet scan，沒有擴散，但現在左乳房有脹痛及摸到硬塊，政府醫院姑娘話等電療後才見醫生檢查，是否太遲？還是電療中不可以中途停止有什麼事亦要等電療完畢才打算？
謝謝。
好難判斷係咪太遲，睇你個人取態。
啱啱先做完手術，而家又電緊，好少話咁快「復發」，由呢個角度睇就唔遲。
不過你摸到乳房有硬塊，想早D見醫生又係好合理，由呢個角度睇就係遲。
請問我剛化療完，等緊做手術，姑娘叫我做完手術有報告先去排公立電療，但有朋友話咁樣太遲，趕唔切做模同排期，我其實應該點做，而家叫醫生寫紙我排，還是做了手術有報告先排
有報告先排。未有報告，又唔知洗唔洗翻手做第二次手術，又唔知淋巴有冇受感染洗唔洗加電，根本好多野都未決定到，仲未計傷口埋未／有冇併發症，有D野唔急得。
醫生你好，我媽媽12月2日做完局部割除手術，並安排1月30日係瑪麗醫院畫位，但未定到幾時開始接受電療，她需要接受15+5之電療，假若1月尾開始第一次，電的過會橫跨新年假期，請問醫院電療部在春節也開嗎？
另外 ，其實可否要求過年後才開始整個療程？
謝謝
紅日唔開，可以同醫生商量幾時開始。
那12月2日動手術後，若果等到2月15日才開始電療，可以嗎？
可以，半年內都ok。
Sorry, 咁若果已經約左1月20日畫位，到時先要求2月中才電療，晝位的mark等等會有影響嗎？
謝謝你的解答
應該就唔影響，不過實際操作／安排就盡早同醫生傾傾，咁先係一個負責任表現。
好的，謝謝！
醫生你好，我今日聽到 tomo 比 imrt 會殘留多d 幅射係身上所以唔建議我用 tomo (雖然好似話避內臟會好 d )，呢個我都係第一次聽。係咪真有其事？Thx.
唔清楚。TomoTherapy 其實係 IMRT （intensity-modulated radiation therapy）嘅其中一種，其他仲有field-in-field forward-planned IMRT, inverse-planned IMRT等等。唔知你乜野比較乜野，想幫你check都check唔到。
醫生，請問我媽媽做完電療大約已經3星期，佢係手術後再電療的，而家左邊側乳房 乳頭 液下窩全部都黑晒 左側亦成片硬晒 硬到摸到入面好似兩粒野咁，請問係咪正常？佢從第一次電療到而家就每次比每次又黑又硬 係真係硬到化石咁 電後醫生叫佢6月中先覆診 所以佢而家咁硬我地好擔心 會否唔正常？
黑晒硬晒係正常，至於好似摸到兩粒野就要搵醫生檢查清楚，究竟係自己唔識摸？一或是疤痕？定真係有問題？
Breast Hk 您好，我於5月13日已完成15次電療，之前一直只是胸前及腋下皮膚變紅，但不適感並不嚴重。。但從今星期一開始，腋下開始脫皮，有小計滲液，胸前疤痕(我是乳及淋巴全切)覺得拉緊疼痛，更困擾的是，腋下近背部，腫起一大塊，影響手臂活動。。請問這是否電療後副作用？過一段時間會自然好轉？
脫皮、滲液、疤痕拉緊疼痛可以關電療事，過一段時間自然好轉。背部腫起一大塊就要睇醫生，檢查清楚原因。
謝謝醫生回答，明白了，那只好耐心等自然好轉了，腋下腫脹，其實之前給姑娘睇過，佢話先觀察一下。。。過幾天會再覆診，再睇睇點講。。。
本人現在剛好手術後一個月，去年確診一期後只接受局部手術，但手術後醫生說邊緣不清要再全乳切除，但我就沒有再接受手術，這一年甚麼治療都沒有做，一年過去再發現硬塊，所以今年決定再做手術，算是全乳切除，全乳內部挖空，但保留了乳頭和乳房下半部皮膚。ER十、PR十、HER2一。外科醫生說我肯定不用化療，連電療應該都不用。但腫瘤科醫生也說他個人認為不用化療，電療也應該不用，但他想和其他醫生開會，討論一下聽下其他醫生建議，可能建議我16次電療。現在我好像做唔做電療就看我自己的選擇，所以請問我做唔做好？
要睇幾樣野先可以比意見，1）侵蝕性腫瘤幾大，2）割得清唔清，尤其posterior margin有幾多，3）淋巴有冇受影響
醫生你好，伊利沙伯腫瘤科醫生說沒有侵蝕的原位癌要電21次，說本來是16次，另外要局部加電5次，所以是21次，而不是15次的新方案。已經約了下星期到設計室，請問
1. 通常在開始電療之前會見放射科醫生決定電療次數，還是由腫瘤科醫生決定呢？
2. 我的報告是ER+280, PR+290, C-erbB-2 negative, Ki-67: 5%，醫生說食藥對減少復發沒有幫助，堅持不開藥，如果想食藥減少復發，請問有甚麼方法？
謝謝！
1）腫瘤科醫生（oncologist）有兩大類：臨床腫瘤科（Clinical Oncologist），識電療劃位；同內科腫瘤科（Medical Oncologist），唔識電療劃位。唔好搞亂放射部門同放射科醫生（Radiologist），Radiologist只係負責睇X光片，同電療冇關係。
2）搵私家。
謝謝醫生回答！
醫生您好 我媽媽將在2月尾完成化療 可以立即電療嗎 定係要休息一段時間先電呢？
通常休息一段短時間，因為等劃位都需時。
HI 我做左局部手術同化療, 就黎開始電療, 但突然又好不安想唔做
想問長期副作用黎講乳房硬化係咪機乎都會而且一世唔會好定可能十幾年會正常番? 同埋硬化既程度有幾硬?
我既問題可能比較幼稚, 但因為我仲好候生, 好驚成世人就咁樣
大部分人都會鬆軟返，年幾兩年度。硬嘅程度好主觀，冇一個客觀基準去比較。
你好﹗我8月左乳房發現了原位癌，8月做完局部切除，並在11月中完成25次電療，剛剛做完後皮膚雖然脫皮，但是出來是白肉，沒太大疼痛，最後一星期開始，睡醒後左乳房會疼痛，但是直到現在整個左乳房還是很疼痛，好像越來越痛….尤其睡覺時..請問這是後遺症麼? 需要再去檢查麼…
痛本身唔係一個令人擔心的病徵，可以觀察一下，如果唔放心，就去睇醫生。
我都明白會痛，所以一直都沒理會，不過見已經做完電療一個半月，痛好像沒有舒緩，好像越來越不舒服，才有點點擔心，感謝回覆^^
醫生您好！ 我最近做了mammograms, biopsy then MRI, 確定要做lumpectomy切除一粒約3cm直巠的（前癌細胞） 十 電療。現階段是＂0⃣️＂。這是否叫＂局部切除＂？您認為手術後十天可否坐長途飛機（約16鐘十轉機約3個鐘十飛行3個鐘）! 還有大型行李（獨自一人）是否太過勞累和會影響康復？ 還有14鍾頭時差! 手術後應該吃什麼好些？ 幾時後可捐血？。萬分感激!！！
Lumpectomy 即是局部切除。
如果復康一切順利，其實坐長途飛機冇問題，當然如果手術有併發症則另作別話。而你講到又辛苦又長時間又獨自一人又時差，我諗任何人也會勸你取消行程多休息。
手術後只需均衡飲食，唔需要特別進食什麼。
有癌症病史，紅十字會係唔會再接受你捐血。
感谢醫生回覆! 哪是否如不復發，過多十年，二十年都不接受我捐血?謝謝!!
永不接受。
醫生你好.
我32歲, 十月confirm bilateral 乳癌 (左右各2粒). 最大的tumor 44mm IDC. ER/PR+ 90-100%, HER2-. Grade 2. lymph node 0/3. BRCA 1/2 (-). 沒有information on kI67. 已左局部手術但還有positive margin, 醫生suggest 以我的年紀, 將會做全乳房removal (double mastectomy). 我現在在做4個cycle 的TC化療.
但係電療醫生說我係borderline case, 叫我自己決定做唔做電療. (佢地個radiation board 既醫生冇話一定要, 但亦冇話唔好唔做) 我好confuse, 因為一心以為做左double mastectomy 就唔需要做電療. 電療醫生話有幾個考慮因素:
1) 年紀 – 32 好年輕. recurrence 機會較高
2) tumor size – 44mm 雖然係T2, 但比較篇大
3) Report 有提及: rare LVI – 唔係化療去Treat 架咩? 係唔係真係concern?
想問 (因為電療會affect 我reconstruction 既選擇同timing):
– Radiation 其實可以減低recurrence 幾多%?
– 以我既情況, recurrence 機會幾多?
– 仲有咩其他因素我要考慮?
老實講，答你唔到，因為成個療程將法都好怪。
第一，手術都未做清，無端端仲咩走去做化療？
第二，化療完諗住補做手術（本身已經好怪），又無端端走去加插個電療？
第三，仲咩而家要咁早決定電唔電療？如果全切時仲有癌細胞剩，加埋可能已經唔係T2，T3自然要電，如果全切都仲未清，又係要電。相反，如果一早全切，又可能可以避咗電療。
你會見到，成個療程最大問題係手術都未做清／未做完，實際係第幾期都未知，根本就唔應該係呢個階段去做輔助治療的決定，亦唔會做曬電療後走回頭路返去全切（因為全切得，可能有機會避咗電療）。你個情況偏離常規做法太多，所有野要問清楚自己醫生。
醫生你好,
多謝你既回覆. 我個case 其實係外國follow, 唔知係咪因為咁同香港既唔同.
– 最大既tumor 其實清左. 其餘3 粒 (8mm each)係 positive margin . 唔即刻做清個手術, 因為打算同一個手術做 double mastectomy + 重建. 再排期同埋等康復會過左化療既黃金時間.
或者我簡單少少咁問: 有咩情況, 係做完double mastectomy 都要做電療呢?
要視乎mastectomy仲有幾多癌細胞，同埋清唔清先知。
醫生：我今天已第二支TTC，副作用是有但總可過渡。政府醫生話打第三針要約電療，請問會否與打第四同時進行？
謝謝.
不會同時進行，完曬化療先電療。
明白，謝謝你的回覆。
Breast HK你好, 請容許本人花D朵你哋保貴時間系度勁激讚一吓Breast HK醫生….回覆咁生鬼同可以令病者或其家屬得到貼心即時回覆解答， 實在相當難得。系度再感謝Breast HK並祝每一位病者早日康復….各位+油啊！
馬醫生，請問電療劃位是不是一定要打顯影劑？為何PMH説乳房電療不用打呢？打和不打分別在那裡？
電療劃位是不用打顯影劑的。
手術報告出左, 想請教 一下
我34 歲
IDC G2 ER + PR+ HER2 -ve pT2No (i)
乳線醫生講我係第1, 2期, 粒 tumor 化驗 有2.5 cm
一定要做電療+ 食10 年荷爾蒙藥
化療踩界, 要見埋腫瘤醫生再決定.
除咗係第二期，冇野補充。
想請問乳癌電療是根據剛確診來決定如何電及電幾多，還是化療+手術後？我是術前化療+標靶。剛確診時醫生說有三期，腫瘤有7厘米，淋巴擴散。6針化療+標靶（標靶持續一年18針）-> 手術 -> 電療+Tamoxifen。不同醫生（外科、内科腫瘤科、電療腫瘤科）都說我的治療效果很好。手術後變爲1期，割了22粒淋巴，當中0粒擴散。請問電療是不是按照這個術後的1期0淋巴擴散來定方案呢？我可以用新的15次方案嗎？謝謝！
以最開初的情況（三期）來決定，不是化療後的一期來定。可以用新的方案，不過淋巴有擴散都要加電的，所以唔止15次。
謝謝醫生
醫生，剛剛發現Radiagel的成分有parabens，請問它與乳癌的關聯是否已經證實呢？
未證實，只知佢可以摸仿荷爾蒙，不過弱好多倍，日常使用會唔會導致乳癌冇人知。其實都幾難避免，日常護理產品八成都有parabens。
我就快要電療…我想知道係咪一定要連續電足一星期五日架？若中間有一日電唔到會唔會影響療效？
一日半日冇咩影響，有時撞正紅日都係要停一停。
明白….唔該晒….因我可能其中一個星期有一日唔喺香港做唔到….跟住又農曆年咁多日紅日….有啲擔心好大問題……咁樣會唔會太密？唔該晒!! 唔好意思我講得唔夠詳細
等腫瘤科醫生決定。
馬醫生你好，本人一月確診左邊乳房為零期乳癌。一月中已做了部份乳房切除手術。現正考慮東區或法國醫院進行電療。已經見過兩邊腫瘤醫生一次。東區醫生表示要下次做設計時先可以告訴我次數同方案。私家醫生表示次數20次，方案有三個：1. 由兩個頭放出劑量、2. 全乳平均放出劑量、3. 跟據呼吸放出劑量。三種機我估可能是IGRT、Tomotherapy、Cyberknife。因為本身心藏有早博問題，媽咪也有先天心藏問題。所以好擔心電療後遺症，希望盡量減低到最少。而且我主要鈣化點位置係9-10點，很近心藏。心裡好困擾應該去東區定法國做。希望馬醫生可以給我一點意見。謝謝您。
唔好亂咁估D terms，一定唔係cyberknife。如果割得清，原位癌係唔洗局部加電／電淋巴，普普通通傳統技術已經足夠，東區同法國同樣勝任。
唔好意思又係我，
之後媽媽做完電療後皮膚有損、出水等，喺醫院洗傷口後好返，傷口埋左，依家啲皮甩緊，可以點做？係咪由佢？同埋好唔好去游水？因為本身佢有呢個慣。感謝
耐心等待自己好，唔好去游水住。
您好醫生, 我家人宜加電療第三次, 電頸附近位置(淋巴 頸椎 甲狀腺), 但已經痰有鮮血,是否正常。 同時主診醫生俾佢食類固醇。 謝謝回覆
唔正常，話返比主診醫生知。
醫生, 有少少疑問 。若果接受電療, 腫瘤係會腫左,燶左及流血?
謝謝解答
腫瘤大部分係燶咗，收水，減少流血。唔應該流血的，除非你指皮膚電損咗。
醫生你好，本人去年10月確診，在私家醫生做了左邊做全乳切除，右邊做前哨淋巴，之後轉政府，已完成化療，現做緊標靶、電療及吃抗荷爾蒙藥，記得之前私家醫生說右邊除了前哨淋巴要加電療，但政府醫生説只需電左邊，右邊不用電，想知是否這樣？謝謝！
唔明咩叫左邊做全乳切除，但前哨淋巴又右邊做？？
左邊確診T2N2M0,右邊是DCIS原位癌
右邊局部割？定全切？紙口位margin有幾多？
右邊局部割，病理報告寫size of tumour 1.2 cm, at least 0.2cm from deep margin
兩邊都要電。
謝謝醫生回覆，因為左邊已開始進行電療，是否可以要求政府醫生電埋右邊？如果現在唔電，將來是否很大機會復發呢？因右邊是high grade intraduct carcinoma, 謝謝！
點安排要同佢傾，原位癌局部切都係要電嘅。
知道了，謝謝醫生！
醫生您好！想問個簡單問題。電療之後一個星期可否去短途旅行如日本？另外，康復後是否一定要改戴無wire的bra?
可以去。不一定要無wire Bra。
謝謝醫生的快速回覆，你的建議對病人有莫大裨益！
本人60歲，現正接受第4次化療(共6次)。病理報告如下：Mult foci of IDC G2 T1b ( largest 6mm, three 1-2mm) also DCIS 3.5 cm. Margins clear. Deep margin 3mm, anterior margin 15mm.
N1mic( 1/12) (SLN : 4 nodes, 1 with micrometastasis 0.5mm, axillary Ln 0/8). ER 4/8, PR -ve, Ki-67: 50%, FISH +ve, HER2/c-erbB2 over expression score 2: Equivocal (moderate)
在私家醫生做手術，左乳全切除，在瑪麗做化療(TTC 針6次)、標靶H針18次)、電療15次、荷爾蒙藥至少5年。
在電療方面，醫生說我的情况是Borderline case, 私家醫生說割了12粒淋巴只一粒有0.5mm轉移，已全切左乳房，可以不做電療，因副作用(心臟在左邊，我打H針已或會影響心臟、肺部會有約10%纖維化、容易淋巴水腫等)可能大過治療作用。公立醫院的醫生則說雖然也同意私家的說法，但按照醫院政策，是一粒淋巴受感染，也建議病人做電療，以防萬一。
我不知如何決定，請醫生給我意見。
我是Stage1b至第二期，HER2 病人若做足化療+標靶，現今的復發率是多少？做與不做電療又影響復發率多少？
期待答覆，謝謝你。
KL Tam
Stage 1B HER2型做足化療標靶，復發率應該係好低嘅，不過冇工具去計呢個情況電唔電有幾多影響，我個人傾向保守唔電。
多謝醫生答覆。請恕愚昧，醫生説傾向保守唔電，何解唔電反而是保守的選擇？是因為副作用的影響嗎？
喺好多未知數（唔知值唔值）的情況下，唔去馬就係保守，進取的態度就係唔知得唔得都照去。
唔知樓價係咪一定升的情況下，唔入市就係保守，進取的態度就係唔知升唔升都照入市。
您好醫生 想問完成電療頭頸部引起多痰, 正常嗎? 同埋叫主診開止痰藥食可以嗎? 會否進一步令口腔乾涸? 感謝回覆
電完應該係少分泌，痰多應該唔關事。想開藥問吓主診醫生冇壞。
醫生你好, 你有提及電療要係手術後半年內開始
媽媽3月22日做左手術
手術後治療方案: 先打TTCH x 6，打完休息1個月左右就開始做電療 (標靶就一路繼續)
5月7日在私家醫院打第1針化療
之後就轉返去政府醫生繼續
政府醫院5月28日覆診，5月31日打左第2針化療
但第3次覆診約左係6月25日，假設都係隔2-3日打第3針
即係同第2針相隔4星期
如果之後每次落針都相隔4星期，就算當唔駛留班
到時開始電療果時咪已經超過左半年?
到時電療成效會唔會好差?
真係超過都冇辦法。實際有幾影響比唔到嗰簡單數字你，只係建議盡量盡力跟上進度。
你好，本人經診斷後確診是原位癌，經已動手術部分切除，手術結果顯示腫瘤全部切除，現在醫生建議進行電療或全乳切除。
請問電療有機會引致有其他的癌症是什麼意思嗎？全乳切除重建是大型手術嗎？長遠對整體健康為考慮首選時, 這兩個選擇那個比較安全?謝謝!
電療係有機會引起肉瘤（post irradiation sarcoma），不過機會極微，唔會因爲呢個原因去否定它的正面作用。
全乳切除加重建是超大型手術。
兩個選擇同等安全。
謝謝醫生回覆。經過2天，仍想不出答案。
原位癌選擇全乳切除加重建手術，就有植入物要更換的問題.。
選擇電療，就有secondary cancer 的風險。
更換植入物手術跟面對另一種癌症相比，好像是選擇全乳切除加重建手術對日後生活保險一些，是嗎？
有建議那個選擇比較長遠安全嗎？
電療引發secondary cancer的風險根本微不足道。已經切清的話，就咁電療就最簡單。
醫生你好。
女兒29歲，今年2月中做了左乳全切除和重建手術。切除10粒淋巴，當中有一粒淋巴(0.4mm)擴散，被診斷為IDC T1N1 mic (sn) MO stage 1B。
現時女兒在瑪麗接受第2次TC化療(共4次)。醫生建議完成化療後做放射治療，然後再服十年的TMX.
女兒對放射治療頗為抗拒，擔心引發淋巴水腫，以及影響重建的乳房縮小。
我們曾諮詢私家腫瘤科醫生，他跟瑪麗的醫生持不同意見，認為N1 micromets不需要做電療。
我們不知應該依重公家還是私家醫生的建議。
請問：
1. 你認為我女兒是否需要接受放射治療？
2. 我們應否再多尋求專業意見，諮詢另一醫生？
3. 有否比較好的冶療方法，能避免淋巴水腫及乳房縮小。
4. 你提及國際權威期刊The Lancet於2014年3月刊登左一個大型研究（支持N1都要電），是否包括N1 micromets？
感謝！
1)我傾向唔做，喺阿女情況，電療副作用係有，正面作用就唔知，加上本身抗拒，同埋已經切咗10粒淋巴，暫時天秤傾向唔做嗰邊。
2)冇咩需要再問，都係得做同唔做兩個選擇。
3)就係唔電。
4)就係唔包N1 micrometastasis，所以我地唔知呢個情況下電唔電好，瑪麗部門政策係傾向進取，N1 micrometastasis 佢地一般都建議電。
萬分感謝醫生如此直接了當的答案，助我們作明智的決定。
醫生，您好，我今年32歲，左側腫瘤1.5Cm，已切除27粒淋巴，一粒陽性，屬於2A，ER &PR H-score均為10（弱陽），Her2 +++，根據我的情況，有三個問題，
1、如果經費有限，二選一，是應該去私立做Tomo therapy的電療呢，還是應該去打二靶向perjeta，感覺醫生兩個選項對我的benefit都非常的marginal。
2、請問下如果ER&PR是弱陽，是否有必要吃5年的內分泌藥，因為聽說吃藥也有類似更年期的副作用，還可能造成骨質疏鬆，子宮內膜增厚（我本身還有朱古力瘤）？
3、是否有研究表明，在有標靶藥的情況下，her2病人的生存率和luminal型已經趨於一致？有沒有2A期類似的DFS之類的數據？
十分感謝您寶貴的時間。
1）同意兩個選擇的benefit 好marginal，如果要二選一，我會揀Perjeta。
2）H score 10分我地判定為陰性，唔會建議食藥。
3）冇。
馬醫生你好，請問電療開始後可以剝牙嗎？謝謝
可以
你好
我前哨切了3粒有1粒感染3.7mm，見左腫瘤醫生建議要切徐液下淋巴，但外科醫生覺得不必切徐，只要電療時電埋液下，我猶豫不定，請問醫生治療效果是否一樣。
謝謝
主流意見都係再做手術全淋巴切除，只有滿足到特定條件（腫瘤細過5cm，局部切除，冇術前化療），先可以考慮用電療去替代再次手術。
十分感謝你，我都符合特定條件只是淋巴感染嗰粒是入侵性的，哪種治療效果好些。
我信手術，電療取替手術要更長時間去觀察安唔安全。
醫生你好
我係grade 2, 右邊乳癌，8/8 完左化療。
排政府威爾斯9月尾電，但佢地就話用傳統電療，唔電胸腔。仲要電完先比荷爾蒙藥食。咁樣變左一個月空窗期？怕唔怕呢？私家醫生就建議我用強度調控連胸腔連。請問我應該點做好？
謝謝
ICC
遲一個月先食藥就唔係好怕。個人化的建議則不作網上判斷。
謝謝醫生回答：）
請問如果9月尾先電療，那就是10月尾才完成，那就是空窗期2個月後才食荷爾蒙藥，這樣可以嗎？ 我見其他院友在政府醫院做完化療3星期就食荷爾蒙藥再電療…所以我有點擔心。慢一政府唔比藥，我要去私家睇自行食荷爾蒙藥嗎？
那電的位置有不同，會有大的影響嗎？
不好意思咁多問題🙏🏻🙏🏻
謝謝
ICC
出路不外乎照等，或者自費早D食。
電唔電胸腔視乎有冇淋巴擴散，有就電，冇就唔電。
醫生你好。
本人已做完了6次化療，HER2+， 仍然打標靶藥 。剛做了右乳全切除和重建手術。切除7粒淋巴（包括前哨及非前哨淋巴），全部沒有淋巴轉移擴散，只剩下微量剩餘高度惡性乳腺導管內原位癌，size 2x1mm，TNM stage: ypTisN0。
因不想電療，擔心引發淋巴水腫，及影響重建的乳房縮小。
請問：
1. 是否需要接受電療？做同唔做復發機率差別大嗎？
2. 除了公立醫院腫瘤醫生，是否再多諮詢私家腫瘤科醫生意見？
謝謝！
1)要視乎化療前腫瘤幾大同淋巴有冇擴散。腫瘤大過5cm 或者T4，或淋巴有擴散，就要電。
2)個人喜好。
11月30號在北區醫院切除一個細胞，前幾天見醫生說是原位癌。應該未擴散，可選電療25- 30次或全左乳切除以防日後復發。請問，若是原位癌并已切除，是否可先不做任何預防性治療? 保持定期檢查可以嗎？
局部切唔電療唔穩陣，會易D復發。
不好意思醫生插嘴一問，請問你說的個別病人一般是指什麼情況下才要電埋胸腔淋巴呢？謝謝！
胸腔淋巴有擴散跡象，或者N3（10粒淋巴以上感染）。
感謝醫生的快速回覆！請問如何知道胸腔淋巴有擴散跡象呢？用PET嗎？CT又是否可以呢，因為手術後我只知獲告知腋下前哨淋巴沒有擴散跡象。
PET scan 準D，嚴重的CT都會睇到。
請問如果我的乳癌是於右胸內側，加局部切除，是否便代表照埋胸腔淋巴比較好？期數是2A, T2而沒有腋下淋巴感染，只做過CT。因現還在化療中，還是應等完成化療後再補照PET才決定比較好？看過的醫生都沒有提過電療胸腔淋巴的問題⋯謝謝醫生
CT如果照過胸腔已經足夠，可依據結果去處理。如果冇咩特別，唔需要補做PET。
再請教醫生，CT報告上說”No gross mediastinal mass is seen”, 是否代表看不到胸腔或內乳淋巴有問題呢？因上面並沒提及internal mammary lymph之類的…不好意思，因已在化療中，我們比較擔心。
可以咁理解。
我是這一個多星期，剛剛確診患上乳癌（初期），很是感激，在我最徬徨的時候，睇倒Breast HK這post的資訊分享，內容非常實用，讓我短短幾日內作參考。我已落實手術和日後的治療方案。
Breast HK你好，
我今年43，Tis(DCIS) N0(sn) (i-) M0 ER8/8,PR5/8, KI67-9%,c-erb2 3+, stage 0. No invasion. 沒有腫瘤，只是微細鈣化點。1月12日做了手術, 報告指
Tissues measures 5.5×3.5×1.5cm, 12g.
7 foci of residual ductal carcinoma in situ, size 0.05-0.7cm in max dimension, high nuclear grade with comedonecrosis.
Anterosuperior margrin – residual foci of DCIS, size less than 0.1cm in diameter, 1 focus very close to the new margrin (<0.05cm).除了這邊以外，其他的都有最少1mm. 手術醫生告訴我手術是成功的，我要跟進的只是電療和食荷爾蒙藥作預防。
因為經濟問題，轉介瑪嘉烈做電療，見了腫瘤醫生，他說切邊margrin 不夠，建議我要再做手術並全乳切除，不然就做15次電療。我對再做手術同全乳切除的心理壓力很大，因為經濟，工作安排和手術的痛苦與康復都給我很大壓力，所以我選擇了電療和食荷爾蒙藥。
我想問按我情況，可否推測復發的機率？我會每半年一次見乳腺科醫生跟進外，請問我還要每年做什麼檢查去監察癌細胞有冇走到其他器官？謝謝意見。
Chu Chu
冇得計。
原位癌margin唔夠都係睇緊D乳房怕局部復發，其他器官唔太擔心。
明白。謝謝醫生
Breast HK, 你好！本人去年做了手術全乳切除，亦切除了兩組淋巴，化驗後係二期 B，同埋有三粒腋下淋巴結受感染，要做化療和25次電療（要做到上頸）。
化療差不多尾聲，想問電療做到上頸係咩意思？會否影響聲帶及食道？
網上見有香港的病人在台灣接受 proton therapy，聲稱相比電療，對身體傷害較少，但為香港未有。
請問 proton therapy 是否較可取？做法、次數跟電療有沒有分別？如考慮到台灣接受 proton therapy, 應該考量什麼因素？
聽說香港醫院有兩款電療機 (tomo & linear), 副作用是一樣的嗎？
謝謝！
1）電埋範圍包括鎖骨淋巴的位置。唔影響食道及聲帶。
2）proton therapy 在乳癌屬實驗性質，現階段2019年實在不應用作取替電療之用，走得太前把自己放係白老鼠的位置，往往得不嘗失。
3）不一樣，tomotherapy劃位會精準D。
感謝回覆！如果範圍大左，是否代表劑量會增加？身體會否非常（或更加）疲倦？有朋友稱做完電療要家人扶先返到屋企。
範圍同劑量冇線性關係，唔會因而疲倦咗。
電療期間可以（返公司）工作嗎？有沒有什麼需要注意呢？
可以工作。
Hi Breast HK!請問每次電療換咗衫後即時擦潤膚液？請問用鹽水敷電療的地方起乜嘢作用？再請問電療後的輻射會在體內停留幾耐？謝謝你.!
幾時搽呢D好個人喜好。鹽水敷冇咩作用，除咗涼浸浸。冇人講D輻射會停留幾耐，因為唔會散出黎影響別人。
類風濕(RA)患者可唔可以電療？？？SLE就唔好，RA又如何？係擔心皮膚反應大，還是有其他考慮
RA可以電。
醫生你好！做了lumpectomy & microdochectomy，化驗結果：invasive carcinoma of no special type arising from ductal carcinoma in situ。
Gross size of tumor: 0.8cm。Minimum pT stage: pT1a(m)。Modified Bloom & Richardson grading score: 1。Size of invasive component : multiple, measuring up to 5mm。ER PS+IS : +ve (Score 8)。PR PS+IS : +ve (Score 8)。 c-erbB2 : Score 0。Ki67︰2%。
醫生指上次手術無做淋巴，要再手術切前哨淋巴+/-全部淋巴。本來話係第一期，易處理。做手術淋巴，跟住電療同食賀爾蒙藥就可以。但我患有類風濕關節炎，醫生就話擔心電療皮膚反應，叫我考慮做全乳房切除，有機會唔使電療。好迷惘，兩種做法差好遠。請問類風濕患者是否不能做電療？電療會引起甚麼問題？以我情況應該點治療/處理最好呢？謝謝！
類風濕關節炎患者可以電療。如果上次乳癌已經切清，做前哨淋巴便可以了。
謝謝醫生快速回答！已切清，邊沿位置亦足夠。已切走的腫瘤好近乳頭，係R8H，FN1cm。會唔會增加跟住治療的難度？？
另外，3月中做MMG & US同一邊乳房仲有3個問題。
1. R10H，FN6cm，有一7x4x7cm hypoechoic nodule。 probably benign，could be fibroadenosis，fibroadenoma or an intramammary lymph node，BI-RADS 3。
2. punctate microcalcifications at outer central (11x13x7mm)。Probably benign and likely fibrocystic changes，BI-RADS 3。
3. Simple cysts at R9H (3mm) & R10H (2-5mm)。BI-RADS 2。
想問這些情況會唔會影響唔可以保留乳房，要做全乳房切除術。唔切晒乳房會有甚麼危險？？下星期先會會診外科同腫瘤科醫生，但而家洗親傷口護士都同我講都就要切晒，唔使緊張埋口，亦唔使跟之前講的pressure dressing做法，講到我無得揀咁。我擔心咁細個傷口兩星期都唔埋，又發炎。萬一做全乳切除+重建+切淋巴，有3個傷口，到時傷口處理更困難！希望醫生給我一些意見，指引，謝謝！
只要margin 清，即使近乳頭，唔會增加治療難度。
想保留乳房，抽埋R10H 7mm（我諗你打錯cm）嗰粒針已經足夠，當然要報告良性。按你提供的資料，睇唔到必需要全切的理由。
想請問醫生我太太在4月12號做完手術之後再轉介去QE腫瘤科,但耍去到只是5月28號才見第一次腫瘤醫生，時間會唔會太長,因為私家醫院手術科醫生話最好嘅術後化療時間方法是六星期內。那由12/4至28/5這個時間剛過了6星期，會否太遲？
謝謝你 Li Kin
唔係最理想，但也合理。
馬醫生如果R10H係良性就可以做前哨淋巴+電療+賀爾蒙藥來治療。萬一唔好彩R10H係癌，應該點處理對我最好最安全呢？？全乳切除還是有其他方法？？
上次R8H抽幼針bengin，class C2，但結果係癌。今次做幼針還是粗針好呢？HA醫院會唔會有得揀做粗針？出私家費用大約幾多？
如果R10H係癌，就要睇同上一次個癌近唔近。近就要評估可唔可以局部割，遠就全切好D。
抽粗針好D，HA醫院有嘅，私家就4000蚊度。
感謝你這麼快回覆，因為幫我太太做手術的醫生說時間太長叫我太太轉看私家腫瘤醫生，我也知道公立醫院和私家醫生時間有分別，但價錢好貴，我們也決定等到5月28號。謝謝醫生 Li Kin
R8H, FN 1cm已知係癌。R10H, FN 6cm MMG+U/S BI-RADS 3，就未抽針。兩個位置算遠還是近？萬一唔好彩R10H都係癌，位置上我仲有無得揀再局部割，定要全乳房切晒先得？係HA同私家醫生做手術，會唔會有唔同選擇/做法？
發現R8H粒瘤時睇過私家醫生，因類風濕問題佢叫我返HA醫院做。睇私家醫生除左經濟問題要考慮，都擔有心類風濕個病出去睇都未必個個醫生肯幫我。
兩個位置唔算近。如果唔好彩R10H都係癌，仲有冇得揀局部割要現場評估過先知。HA同私家做手術，大方向一致，細項選擇當然有分別。
Hi Doctor, 你好，我今年50歲，以下是我的病理報告：
Type : IDC
DCIS : present
Tumor : 3.5×2.5×2.0cm
Grade 2
ER and PR : both positive 95%
HER2 : IHC 1+ negative
p53: less than 10% neoplastic nuclei
Ki-67: less than 10% neoplastic nuclei
Classification : pT2, N1mic, Mn/a
切前哨淋巴2粒，1粒有Micrometastasis, 1 粒冇感染
另切淋巴1粒亦有Micrometastasis
Stage : 報告寫IB，但醫生說係IIB, ??
已做右邊全乳切除，保留乳頭及所有皮膚，亦同時做重建裝了tissue expander. 化療6次亦完成。
問題：當初醫生話應該不用電療因為淋巴感染是Micrometastasis, 但現在說要睇電療醫生再決定。感困擾。請問根據以上報告，須要電嗎？電好處多D定唔電好處多D？覆發率電同唔電差多少？後遣症及淋巴水腫有多大? 因為化療後右手及右腳開始有水腫。裝了tissue expander 有多大影響？ 謝謝🙏及期待你的寶貴意見。
IIB期。
電療踩界，傾向唔電。
你之後嗰D問題好多都冇簡單單一數字比你去衡量。
醫生我係R8H手術後先知係Ca嗰個位。R10H抽幼針結果係inadequate for diagnosis，醫生抽完針粒嘢U/S下已經唔見左，同只抽到好小嘢出嚟臨床似係水囊。剛再做左前哨淋巴手術，等緊正式病理報告出，再安排之後治療(電療+荷爾蒙藥)。
出院時醫生開左兩個月病假畀我！！！之前護士話休息兩星期畀傷口埋口。想問傷口癒合，等待電療期間有無因素需要要攞病假休息？？上次切除腫瘤手術後休息兩星期後返工，身體應付得到，唔覺得辛苦。唔明白點解中間無treatment都要休息？？醫生一般做法都會叫病人放長假？？但電療未知幾時開始？中間有變數影響，eg傷口進展，報告最終結果。
休息呢D野好個人，自己評估得到。做完手術冇硬指標要休息幾耐。
我同醫生講唔使咁多病假，等到真係電療有需要先再攞。佢話係咁做就行左去，等我以為公立醫院規定要開咁耐病假，原來唔係。覆診時再同醫生溝通一下，希望可以縮短D啦。HR只會跟醫生紙做事，醫生唔改就要放足兩個月病假。但我認為身體許可下返工見下人有寄託，時間易過。好過無無聊聊屈係屋企，痴痴地等下一步治療，易胡思亂想，越想越覺得自己慘同病重。
醫生你好，又來問你意見！我3月中右全切手術，4月中發現手術傷口下生粒痘，這時已初步劃位，經腫瘤科同外科決定，在本月9號手術拿出來化驗，這次係要拆線，5針，琴日拆左，好彩出來結果係好的，咁電療都照舊15次，就下星期一如果傷口沒事開始電，想問傷口剛好開始電會唔會仲傷皮膚？仲有本身全切再次粘針，依家右邊皮膚都少少緊，咁電療粘針個個位驚唔驚爆？
傷口埋曬，電療就唔會傷D。傷口未埋曬，就易D爆。
好啊，唔該！如果醫生話傷口好返，唔洗粘膠布，係唔係埋曬了？咁其實我這種情況電療其間擦唔擦野好呢？唔好意思咁多問題！
大致代表。搽唔搽屬個人喜好。
好啊，真係好多謝你！
Hello doctor, 多謝你的回覆，
報告都會打錯 IB,真離譜。有以下問題：
電療踩界是什麼意思？是因為我在邊緣地帶，做又得唔做又得？但你傾向唔做，是因為對我冇作用？
醫生提到做埋電療，覆發率3-5%，唔做就15-20%，真的嗎？
如做電療，可能會有10%淋巴水腫，可信嗎？
如決定去電，有什麼要特別注意呢？
報告另一點寫著：extensive lymphovascular space invasion identified, 是什麼意思？
期待你的回覆，謝謝你！🙏🙏
N1要電，N0唔洗電，N1mi電療唔知作用大還是副作用大，視之為踩界。
電療同唔電療個復發率一定唔會差咁遠，如果有咁遠，主流一定一致叫你電。
10%淋巴水腫，實際比呢個數有多冇少。
Lymphovascular invasion 即係乳房同前哨淋巴的橋樑，已經N1mi，已經唔重要。
Hello Doctor, 多謝你的回覆。
這就是我最煩惱不知電定唔電。
我已見電療醫生，她認為我情況是應該要電的，因為
我還年輕，重有超過10至20年路行，我這個年齡覆發機會亦大，所以要進取一些去做多重保障。如果唔做，之後覆發嘅話，所有嘢重頭做過，到時我年紀又大，又唔知幾嚴重，比較麻煩。就如你上文提到進取D連N1都要電，甘就當N1來做，唔理係mi 定唔係mi. 醫生話副作用好少，只有最後2星期及做哂後2星期皮膚紅及甩皮，差不多一個多月就好番，一共做30次6星期，星期一至星期五，每次大約半小時就完成。淋巴水腫就到時再處理吧。醫生話舒服過化療，所以我決定去做啦, 繼續努力💪！
醫生，請問有什麼特別要注意呢？謝謝你！🙏🙏
😍😍
要注意的上面已經寫曬。
昨天第一次電療，晚上發現上個月做前哨淋巴之前埋左口的手術疤痕有小量血水滲出來。用鏡照看到有2個比針孔大小小的小孔，血水就係由那兒流出來。馬醫生點算好？遇上同樣情況會點做呀？係咪要暫停電療等傷口好番晒先再電過？好煩惱同無奈呀！
要睇返手術醫生等佢決定。
有傷口電療會點樣㗎？
會爛會唔埋口。
多謝馬醫生快速回覆。睇怕都要暫停左等先，等嗰兩個小孔埋左先。埋左口都會無端端爆番嘅，好灰=_=
您好醫生！我今年28歲，2月時已做右邊局部乳房加淋巴手術切除，ER/PR+, HER-，pT2 pN1a (total 3 nodes with metastatic carcinoma, out of 17 lymph nodes)。
現化療中(EC x4, Taxcol x12)，預計8月尾完成。
1) 請問化療完要休息多久才開始電療？
2) 荷爾蒙藥要化療後立即食，定完左電療先食？
3) 電療應該選擇Tomo，電埋中間胸骨淋巴，追蹤淋巴，減少對肺既影響嗎？
4) 電療後，可去旅行嗎？
謝謝你:)
1）四星期。
2）電療時開始食。
3）應該。
4）可以。
唔該晒醫生！
我想請問下，究竟Tomo無機定直線加速器既機會對我嘅病情好啲？兩者效果分別大嗎？
Tomotherapy好D。
想請問以我情況，有生育打算的話，食10年Tamoxifen 定AI加停經針比較適合？
聽人講AI加停經針會令頭髮薄啲，顯老小小，係真的嗎？
謝謝醫生！
AI加停經針。有D人會頭髮稀薄。
建議AI加停經針，係因為有生育打算呢個concern嗎？定有其他原因，所以建議AI呢個方法？
謝謝你！
一來用藥時間短5年，多D機會滿足生育的打算。另外淋巴有擴散，AI加停經針係控制癌症方面係優勝過Tamoxifen 。
醫生，想了解多少少呀！
1) AI+停經針呢個方法係用5年？
2) AI+停經針，當中假停經會對我卵巢有影響嗎？
3) 因為我化療時已停左經，如果而家食AI+停經針，會影響我將來復經嗎？
4) 頭髮稀薄係好常見既副作用嗎？怕生唔返頭髮
5) 政府會建議我用呢個方法嗎？要自費嗎？
感謝您，醫生！
1）係。
2）令卵巢冬眠。
3）唔影響，不過唔一定復到經。
4）唔算常見。
5）視乎醫生睇法，要自費。
多謝醫生回復！
如果連續用停經針幾年，甚至整個療程(5年)，令卵巢休眠咁耐時間，會有副作用嗎，定會保護到卵巢？如果有幸將來療程完結復到經，對生育會有影響嗎？
感謝您！
副作用主要係骨質疏鬆，對卵巢冇副作用，亦唔會保護到卵巢。
復經唔等如有生育能力。
馬醫生你好，本人剛剛昨天睇抽粗針報告，醫生話係浸潤性stage1,話只要局部切除及前硝淋巴化驗再睇下使唔使化療。我問醫生使唔使做pet scan,佢話醫學上我呢個期數係做唔都可以。我偏向唔想做，因為驚幅射。但又驚有擴散跡象。想問下醫生我究竟做唔做好。我由上月19號開始睇醫生到昨日確診再到安排10月14做手術。時間會唔會太長，腫瘤會唔會變化好大嘅？
一期唔洗做。手術當然越快越好。
馬醫生你好，
我14號做完手術，現在休養中，等緊瑪嘉烈醫院安排約見
我既病理報告出咗如下
Grade II invasive ductile carcinoma
ER & PR strong > 90%, CerbB2 score 0, MIB1 stain 3-5%
pT1b(1cm), all resection margins clear, nearest margin 0.5cm from superior margin LVP –
pN0(0/1sn)
Overall Lumial A , stage 1A
我既手術醫生話唔需要化療，只要做電療加食藥10年。我亦做埋oncotypeDX.想問馬醫生，我係唔係真係唔需要化療？食藥會有副作用就係有子宮內膜癌既風險，我係唔係可以揀用停經針加食AI呢？我今年37歲
唔需要化療。低危復發食Tamoxifen 好過停經針加AI。
感謝馬醫生
你既回覆加強我既信心
馬醫生，我14號做完手術，不過政府醫院要11月21號先第一次見，時間會唔會太長？我成日擔心時間太耐，身體唔知有冇問題。
政府只可以當安全網，好難要求好似私家咁快。
馬醫生，又有問題發問。我已經見左馬嘉烈腫瘤醫生，亦已經開始食tamoxifen,不過電療仲未開始，10月14號做完手術，我12月12日先安排劃位，之後再等期去做電療。我由手術到劃位已經兩個月，我問腫瘤醫生會唔會太遲，佢話三個月內都冇問題，不過我等到有啲擔心，想轉返私家醫院做，請問等會唔會太遲電療而會影響病情？我會唔會轉去私家做好啲？
當然越快越好，不過六個月內開始到都冇咩問題。私唔私家好睇個人負擔能力。
馬醫生你好，請問係咪一般情況下電療都要先做模同照CT定位? 在什麼情況下唔需要做模？謝謝
一定要做模。
醫生你好，母親做完化療一個月，正準備電療。上星期畫位後，醫生説位置太近心臓，今天再去畫過。醫護跟母親說做電療時每次也要閉氣20秒，母親擔心自己應付不來，但醫護人員説若不能應付，就要醫生另作治療方案. 請問：
1. 一般電療也需不斷閉氣20秒？或是因太近心臓？
2. 請問每次做完電療後可立即搽上蘆薈膏保濕嗎？
3. 母親說劃位的標記及膠布很易退色及掉下，中途需要再畫位嗎？
1）配合呼吸可以電得精準啲，減輕對附近組織的傷害。
2）可以。
3）通常唔需要。
手術后及電療期間可否用止汗劑？如果吾得,有冇代替品？我好大汗,出街怕尷尬
可以用。
請問每次電療後應立即搽蘆薈膏保濕，預防皮膚受傷嗎？因聽其他人說，不要搽任何嘢，除非皮膚真的傷了，醫生會開藥膏。
那我們應主動搽潤膚膏去預防嗎？
可以搽，不過未必能預防。
75歲，荷爾蒙受體陽性、其他陰性，2A 期，前哨淋巴有兩粒感染！ 5/11/2019 公立醫院做手術，現需食荷爾蒙藥五年，4/2/2020 才排到開始電療，對病情有影響嗎？
如果選擇唔化療，本身都唔係做到最盡，影響唔大。
我母親74歲，等梗報告，瘤太大，超聲波睇有入骨情況，又有出血，醫生說應該要電左先，但左邊近心臟，老人家應該不能閉氣咁耐，有冇方法同佢練習？有咩方法可以令瘤唔出血？啱啱先知道家人生病，咩都唔識，謝謝你的平台！有一點𥌓光！
冇咩特別的訓練方法。止血不外乎用藥（要抽組織先知乜藥夾）或電療或手術。
媽媽confirm 4期，肺，骨兩度，淋巴10粒，er 300/pr150/ki67 18%, her2 negative. 今日係QE做了一次性的止血電療，媽媽返屋企後覺得好痛，止痛藥都冇用，正常嗎？ 有冇野要留意？
腫瘤食出嚟個傷口由之前紅色變咗有d黃綠半乾身狀態，少少膿咁，之前冇的，會日日去門診洗傷口，但明天開始食Hormones (L字頭的a.i.同 Ibrance 標杷），又話白血球會有少左，抵抗力弱d,咁胸上個傷口會唔會好易感染？應該點處理？醫生又叫唔好用酒精洗傷口，用生理鹽水，又唔好封住個傷口，咁可以嗎？thanks!
1）痛感覺好個人，好難講實正唔正常。
2）唔會增加傷口感染機會，但本身係有機會感染。
3）生理鹽水冇咁乸，好過酒精。
多謝醫生回覆！ 一個星期了，出血係少左！另外想請教一下：
1.2度擴散，同一度退化，唔知佢腰痛係因為邊個，怕T12惡化會大件事嗎？請問建議佢打骨針嗎？又洗唔洗電骨？有咩方法可以保持佢活動能力？醫生話可打可唔打。唔知骨針應該嚴重先打定打定先好？
2.其實開始療程後，點樣keep Track佢哋有冇好轉/惡化？
3.ai同ibrace副作用要幾耐先會出現？現在主要係疲倦。
4.pet scan提出肝有Cycst, 會唔會影響佢代謝咁多藥？ 我問醫生，又話唔會特別check 肝同肺功能？
6.肺轉移，佢徵狀係氣促，加上佢後生有哮喘底，應該點樣留意佢有冇惡化？
7.淋巴擴散個d,其實會有咩影響，見唔太多提到？
8.建議食用魚油，鈣片，薑黃素嗎？
1-7）情況複雜，不適合網上輕下判斷。
8）鈣片可考慮，其他唔建議。
馬醫生,
我術後隻手無法抬高, 骨科醫生話係五十肩/ 肩周炎, 做緊物理治療. 治療師話要六至九個月才能夠復原, 另外我手臂伸直就痛, 前臂血管凸起 , 骨醫話係血管發炎, 有機會係化療影響.
但我未做電療, 拖咁耐會否有問題？ 如果唔做電療, 有冇其他方案？
五十肩是否化療或手術後嘅後遺症？Thanks
拖太耐會有問題，怕失去作用。冇替代方案。
五十肩係自然病，唔係後遺症。
T1a ，五月中完了局部手術，7月尾完成所有電療16+8，過了一星期手術位置內裏痛楚，是否電療後的病癥，我最怕復發。謝謝
可以係又可以唔係，相信問題唔大，可以觀察下先。
醫生你好，家母上年確診三陰2b期，已經先後完成手術，化療及電療。最後一次電療於今年二月完成。她手術局部割了左邊近乳頭十點位置的腫瘤，及左腋下腫瘤。
現在左邊乳房明顯比右邊大，左邊乳房的左下方的肉比較腫脹及按下去較正常的結實，請問這是正常的嗎？
謝謝
唔可以簡單話正唔正常，要檢查過先知。二月完成電療，而家十一月，好多時D腫脹應該消曬，你媽媽切完嗰邊仲大咗有少少唔合理。
謝謝醫生回覆，媽媽在乳健中心剛做完乳房超聲波，沒有甚麼特別發現，需要做其他檢查嗎？
觀察下先。
醫生，你好。我（57歲) 在10月底已做了乳房部分切除，是一期，腫瘤科醫生給我的治療方案是電療25＋5次，和吃5年AI藥。現在我已在私家醫院做了10次電療和食AI 藥，預計1月第一星期完成電療。現在COVID-19 又開始嚴峻，我現在有啲擔心，若果中途我住的屋苑有人中咗COVID-19, 而導致醫院不讓我做電療，那麼之前做咗的電療次數是否白費，要重頭再做? 或者幾耐之前必須完成才有用? 或隔得太耐(幾耐) 再做便沒有效果? 謝謝🙏
唔會重頭再做，做咗嗰D次數唔會白費。合理半年內完成。
謝謝解答
想問內乳和鎖骨上淋巴都有感染 醫生話會用最大劑量去電 但收到電話只係電25次 50Gy, 但咁嚴重點解都唔需要加電5次？
有醫生係會選擇加電到60Gy。你醫生嘅決定要自己問返佢，唔能夠代答。
請問電療中遇上公眾假期要停幾日對治療會唔會有影響，因為復活節假期運星期六日總共停左5日冇得電，會唔會令到個治療成效差左？
唔會。
馬醫生，我剛在政府醫院電療第一次，我係原位癌，冇侵蝕性，佢話總共電15次，但電嘅過程只係2-3分鐘左右，計埋事前對位同其他準備，一共15分鐘左右。
問啲放射治療師，真係電咁短？佢地好簡單咁答，話每人唔同，最搞笑我一個月前見政府醫生，都冇講我電幾多次，我今日電第一次就問究竟我電幾多次，個放射治療師好驚訝：之前原來冇人同你講？
請問馬醫生：
1）電咁短時間係正常？真係電2分鐘左右咋，係咪因為我輕微？
2）我睇你其他文章，有講如果萬一將來不幸復發，同一個位置係唔可以電第二次，所以到時唯有全乳切除。但我今次，每次都電咁短時間，萬一將來復發，都一樣要全乳切除嗎？
謝謝馬醫生
1）正常。電療關注在於施行的輻射劑量，不在意於時間。
2）如果局部復發，要全切。唔好搞錯以為電得快等如電少咗。
感謝馬醫生解答！點解你咁好人，你咁忙，仲會花時間解答大家嘅網上問題，咁多年來都繼續答，仲要唔係個個問問題嘅都係你嘅病人，真係有幾多人能做到？謝謝您無私獻出您的寶貴時間，我諗好多人係做完手術先通過網上認識到你，太遲先搵到你網頁，如果唔係，一早都搵你醫了。
最後一問，如果家人朋友想搵你做例行一年一次的檢查、照超聲波，你會接症嗎？因為我知而家好多醫生都唔接了，除非自己在出面照哂，拿住份報告去睇先會接…
雖然工作很忙，但只要你願意，總可以擠出時間，例如可以利用搭車／等𨋢／睡前時間。
我好感恩上天對我好好，生活上一切所需完全不缺，什至多過我所需，心態上就好似老人家咁已經無慾無求，所渴望嘅可能就係一份被需要的感覺，一種存在感。我將我嘅知識分享，喺水深火熱之中嘅病友／家人就有如救生圈一樣，大家的反應／支持賦予我生命中一種意義，一種滿足感，令我人生得以完滿。希望父母看在眼裏，會為兒子的作為感到驕傲。仔女看在眼裏，會潛移默化成為榜樣。
我相信緣份。如果大家有緣份，欣賞我搵我睇，當然高興歡迎。如果大家有緣無份，只係網上交流一下，亦唔需要太計較得失，仲要分咩係咪我D病人。
馬醫生，謝謝你！真的，你知唔知你真係好似我哋嘅救生圈，當人病緊嘅時候，又對自己嘅病唔了解，但問自己嘅醫生，只會答一兩句，其實心中仲有好多疑問，好需要幫助，所以你真係做了太多好事，感恩有你呢個網站，你寫嘅文章、同埋解答好多人嘅問題，真係令我哋得到好多幫助。
唔好意思我再有一個問題想問，我係原位癌2.8cm (係cm, 唔係mm)，喺私家做咗手術，事前只抽了幼針。當時醫生話要做手術先知係原位癌抑或浸潤性癌，佢亦冇講估計個腫瘤幾多cm。最後做了局切&割咗3粒淋巴，冇擴散。
做完手術我先發現你個網站，先至知道原來係可以事前抽粗針，不過你都有提及而家好多醫生係唔會安排抽粗針了。當時由知道自己有事直到做手術只係一個星期，當時又未知自己個癌係去到乜嘢程度，根本再冇心情上網搵資料了解。
當然我知冇得返轉頭，但好想知道，
1）如果事前我有抽粗針，係咪即係代表我能夠手術前就知道我係原位癌，咁就唔需要割3粒淋巴？因為始終覺得唔需要割就梗係唔割最好，身體始終少咗啲淋巴，都唔係好事吧？
2）萬一將來不幸復發要驗淋巴，係咪而家排喺後面嘅淋巴，就會變成將來嘅前哨淋巴？
1）係。係。
2）係。
Hello , 醫生你好
我50歲，乳癌1期1.8cm ,her2-,做了局部切除腫瘤手術，切了兩粒前哨啉巴。
原本手術後做電療 和食藥。
但化驗報告發現有一粒擴散現象。
腫瘤科醫生話要做埋 化療、電療丶食藥
我有焦慮症吃藥10年，做過甲狀腺癌全切手術，吞嚥小小困難
好擔心化療會好難挨！
這樣情況一定要化療嗎？？？
麻煩醫生幫幫我，謝謝
Grading ? ER? PR? Ki67?淋巴感染幾大？
1期
ER+
PR+
Ki67 30
感染細過 0.2mm
Tumor grade?
係公立醫院睇，乳腺外科醫生唔係咁強烈話要化療，係腫瘤科話做埋化療⋯
T1c 腫瘤1.8cm
Modified bloom Richardson grade 3
Er+
Pr+
Her2 –
Ki67 30
醫生麻煩你幫幫我
傾向做埋化療，如果想唔化療，就做埋OncotypeDx睇吓避唔避到。
醫生你好，媽媽已經79歲，2021年11月26日係私院做全切手術，術後要食5至10年荷爾蒙藥，腫瘤科醫生認為媽媽狀態良好，建議做埋電療。
腫瘤1.7cm，抽14粒淋巴有一粒轉移。
Modified bloom Richardson grade 3
Er/Pr+
Her2 –
Ki67 14
已排公立醫院2022年2月9日見醫生。
想問以媽媽既年紀公立醫院仲會唔會幫佢做電療？如果會，會唔會太遲？
醫生麻煩你，謝謝！
會幫佢做。
唔算太遲。
馬醫生
你好，我剛完成最後1針化療已經1個月了，想問下可以生魚生嗎？
可以食。
想問原位癌割左主要病灶但應該週邊仲有少少未割清，係唔係都需要做電療？要做幾多次?其實原位癌係咪都相對安全?
THX
未割清，就應該再割，並唔係走去做電療。
好多謝你的資訊及短片。
我之前右邊有Stage 2B乳癌，做咗手術，化療及電療，食Tamoxifen。
3年後我左邊有Stage 1A乳癌。請問我呢次出現乳癌，是否復發？為何短期內會再出現？是否之前化療或電療不夠？或食Tamoxifen 有問題？
唔當係復發。
左右兩邊都有乳癌，可以考慮驗BRCA及其他基因突變。
T1N1M0（1.3cm)，EP and PR +ve, HER-2 -ve ，isolated tumour cells in one of the 23 AD LN. 可否不做化療
Isolated tumor cell 係N0(i+)，唔係N1，你搞清楚淋巴情況同提供Ki67先討論落去。
醫生份化驗報告係咁寫，23粒淋巴有1粒受感染，0.5有浮游物，腫瘤1.3cm
你覆述嘅內容有予盾，搞清楚先。
DCIS Ki-67 18% ER 8, PR 7。導管浸潤性癌 Ki-67 5% ER 8, PR 8
breast hk , 你好
我剛做了左乳保乳切除，切左前哨淋巴無轉移，腫瘤邊界無癌細胞，病理顯示 er+, pr+, her2-, ki 67 20%, 亦都做左21基因檢測，分數23, 復發機率 9%, 36 歲
醫生話如果考慮生小朋友就唔做荷爾蒙治療，我想咨詢下荷爾蒙藥食唔唔食對我個病影響有幾大？
今日見完電療醫生，佢又講到電療有機會影響生育功能會生唔到小朋友。佢話如果真係劑量太大影響生育功能，而我又有需求可能要做yhe全乳切除。我想問下其實電療後係咪真係唔可以生小朋友？ 如果無影響，我可唔可以電完生完再食藥？ thanks🙏🏻
腫瘤侵蝕性部份有幾大？Tumor grading？
電上面胸口，唔影響生育能力。
侵蝕部份係咪指腫瘤大小？ 下面係我術後病理🙏🏻🙏🏻
我切左7×4.4×1.7 cm , 麻煩你幫我睇睇🙏🏻🙏🏻🙏🏻thanka
腫瘤分型及分級
1. 組織分型：
中分化浸潤性導管癌(moderately differentiated invasive ductal carcinoma)
2. Miodified B!oom and Richardson’s分級：6分=8+2+1
管狀成分：少（3分
核異型性：
中度（2分）
核分裂數：6/10HPF（1分）
腫瘤屬性
1 浸潤癌大小：1.6cm
2.切緣情況
切緣未見癌，癌距底部切緣約0.1cm，距3點切緣約1cm，距6點切絲約1.5Cm，距9點切緣約
3.7cm，距12點切緣約1.3cm，距表面約0.6cm，距4點切緣約0.05cm可見小灶不典型導管增生
3. 皮膚情況：皮腐未見癌
4淋巴血管浸潤：有，癌周圉的脈管可見癌浸濶
5.有否導管/ 小葉原位癌：癌內及周圍可見散在的中級別導管原位癌
6.導管原位癌級別：中級別
7.周團乳腺情況：增生
PT分期（AJCC 第8版)：pT1c
打4針化療TTC，之後電療加食10年荷爾蒙治療。
因為我做左基因檢測，rs 23, Distant Recurrence Risk at 9 Year 9%, Group Average Absolute Chemotherapy (CT) benefit <1%. 最初醫生話可以唔食藥先生小朋友，但之後又改口話先食兩年荷爾蒙藥再生小朋友，之後再食返藥。 其實食2 年藥同5 年藥我個風險指數會唔會差好遠？ thanks🙏🏻
你個情況唔係比較食幾耐藥，係幾時開始食？同停幾耐去生小朋友嘅問題。未收經就食5-10年藥。
馬醫生，你好，準備月中開始15+5嘅電療，因患者上星期度位時，沒問腫瘤醫生，如果電療期間感染新冠，做法會是怎樣？我爬哂以上其他病友嘅問題，都冇有特發性中斷嘅問題，患者焦慮，期待你抽空解答我的問題，十分多謝你！
被迫中斷，解除隔離後再續。
馬醫生，非常非常多謝閣下迅速嘅解答。
在此敬請見諒，自己和屋企人在呢幾個月，情緒非常低落，完全忘記了今天是中秋節，還向你提出問題，十分對不起！
在此衷心祝福你和你家人一生身心安泰！中秋節快樂！
馬醫生你好。我兩個禮拜前剛做完右胸全乳切除（乳頭保留）加用背肌重建手術。尋日出報告，內心有疑慮，煩請指教。
Age 39, 本身健康，冇長期病患
TNM : pT1cN1mi(sn)
Bloom Richardson grade 1
入侵性腫瘤 13mm
DCIS 15mm
ER +ve 100%
PR +ve 80%
Her2 -ve
手術切咗兩粒前哨淋巴，其中一粒有感染。
因本人喺荷蘭就醫，報告又好多簡寫，唔係好明。
醫生話治療方案只係腋下做電療。唔需要化療或荷爾蒙治療。請問你覺得呢個方案點？ 唔該晒！
本身後生，加上淋巴有微感染，好多腫瘤科醫生都會鼓勵你做埋化療。
至於電唔電療，就富爭議性，有腫瘤科醫生建議電，有建議唔電。
荷爾蒙受體陽性，本身就一定要食藥。
醫生你好！我係三陰性3B 期乳癌，47歲，捱完化療針，剛剛喺公立醫院做完左胸全切除手術、左邊淋巴全切除；今日覆診腫瘤科醫生話割咗我11粒淋巴，11粒也有腫瘤細胞，未來發展係日日返去電療、然後食化療藥；公立醫院沒提什麼大概，一直我是靠貴網站得到答案，而我又唔係好識問醫生問題，我唔知自己可以點樣做；會有幾耐命？！我未來會點呢？！心中忐忑不安了⋯我算唔算戰敗咗呢？！
Thx~
你唔怕老實同我講｜其實我仲有幾耐命？
https://youtu.be/QdJRsxt84b0
醫生，請問電療在手術後第7個星期做會太遲嗎？thanks.
普普通通，唔係最黄金時間，但又未超越底線。
馬醫生，早前我右邊腳冇力，入院兼檢查⋯現在懷疑我轉移去腦度，腦有水腫問題，食梗類固醇藥，並照到頭的左邊有1.7 cm ( 約一蚊size ）的物體？！
而家係幾位唔係腫瘤科的醫生話：「你食得好食了⋯⋯」、「你雇咗個頭先，乜都唔好理⋯」
咁我問個醫生：「咁我係咪隨時會死？」
佢話：「係！」
我而家每晚食兩粒安眠藥瞓覺都會扎醒，每晚瞓四個鐘就醒咗訓唔到⋯呆坐⋯⋯對腳冇乜力、頭有少少痛⋯⋯
以為做完手術切完個胸就冇問題⋯點知會咁快走去個頭度⋯⋯😔
馬醫生，我仲有冇得醫？我仲有幾耐命？我仲可以點呀？
唔該晒麻煩晒你🙏🏻
情況複雜，唔方便莽下評語，都係建議跟返自己腫瘤科醫生建議。
醫生你好,本人已做右乳全切, 原位癌, 報告寫high grade intraduct carcinoma. 有一粒寫0.1 cm from the deep margin. 醫生建議做電療. 我見已全切, 又是原位, 請問值得做電療嗎? 感謝回覆.
灰色地帶，可做可唔做。
謝謝回覆. 馬醫生, 你傾向做或不做? 好想知道醫生的建議，萬分感謝!🥹
要視乎做手術醫生切到底未？例如個病理報告話底床有冇肌肉等等，如果醫生肯定切到底切到清，就唔做電療。如果醫生唔肯定已經切到底，就做埋電療。
切肌肉是否由醫生決定?
原位做電療同不做復發率差多少?
感謝回覆
由醫生決定。
人人情況唔同，冇簡單單一數字去代表。
好感謝你馬醫生，我由確診到電療完成-直追尋你資料，實在好有用，令到我地冇咁驚，辛苦你！我也是全切背重建！
本人ER/PR+ve， Her-2 -ve腫瘤位置R7H，睇了2位醫生，1位建議做Vmat+呼吸調控15次（5次同次加強），因為近肝。另一位就話唔需要，只雖做3D個款15+5，tomo/vmat 劑量多d，反而有機會影響左胸同肝，我聽完有啲亂，其實邊款電療先適合我? 選錯後果會點？再做多次電？
局部切定全切？腫瘤幾大？淋巴有冇感染？
局部切、腫瘤1.5cm，淋巴冇感染
3D 15+5配合呼吸法就已經足夠，唔需要VMAT。
本人做完15次（同步加強）電療1星期，皮膚冇變黑，但乳房係做完電療當天開始就好似針吉咁，吉的部位不是朣癌位置，是否正常？
都常見，唔擔心。
馬醫生你好, 我38歲 6月27號翻刀做了右邊乳房切除, T1aN0M0 stage1A, ER + / PR + / HER2 – / Ki67 20%
Sentinel lymph node, negative for malignancy in 2 lymph nodes (0/2)
Invasive carcinoma of no special, histologic grade 2, size 5mm in greatest dimension
Invasive carcinoma margin >10mm from all margins
Ductal carcinoma in situ, grade III (high). Estimate overall size (extent) – multiple foci, size of individual foci ranging from 0.1-0.6cm in maximal diameter present in 4 serial slices of previously excision cavity (at least 4cm in greatest dimension from medial to lateral extent using gross and mircroscopic evaluation)
Margins : uninvolved by DCIS
Distance from closest anterior margin 3mm
Distance from posterior margin >1mm
Additional findings: Remaining breast with microcysts and columnar cell change with micro calcification. No residual invasive carcinoma
今日見了腫瘤科，建議我做25次電療，原因係DCIS Distance from posterior margin >1mm唔理想
請問馬醫生你的建議, 電療有需要做嗎
要視乎手術醫生割得徹唔徹底，徹底就唔使電，唔徹底就最好補電。
醫生妳好，我是荷爾蒙陽性第四期並帶有BRCA2遺傳基因，而家打完六組TJ (紫杉醇和卡鉑)，療程結束，指數一直跌到2點幾，但做完電腦掃描後雖然發現原本骨和肝的腫瘤縮細了，但懷疑骨有新的病灶，而家公立醫院醫生建議用電療電新的病灶，然後繼續食新的標靶藥Lynparza控制住。因此想問下你意見這個治療方案如何？
方案合理。
醫生你好！
我於7月中完成做了局部切除腫瘤手術，
年齡: 44，侵蝕性，腫瘤 19mm , ER +, PR+, HER 2 -, Ki 67%: 12%，淋巴及身體其他部位沒擴散
7月尾申請公立醫院見腫瘤科醫生，
但收到資料9月初才可見醫生，實際做電療時間可能再多等2星期。
請問時間(10星期)上可以接受嗎？
呢段時間都去睇左私家腫瘤科醫生，
他說做15次電療，另10年藥。
想問是因為新做法才15次嗎？還是15次後再看情況？
另外醫生說不會在私院做然後接駁到公院，但我知道有人是可以的 …..
因為我都想快D 做電療，但唔知應該去私院定公院。
麻煩你！
電療黃金期一般手術後四至六個星期開電，政府醫院通常跟唔上，一般就會10至12個星期開電，底線唔好多個半年先開始電。
而家大部份採用新制，15次大範圍+5次小範圍，一般嚟講會電20次。
私家做住先，銜接公院係講緊化療。電療要一整套咁做，因為要同一部機，所以一係喺晒私家，一係就喺晒公立。
醫生你好，我九月初完成化療，九月尾做了乳房局部切除手術，但瑪麗醫院排期要到11月尾才開始電療，請問事隔兩個月會否錯過治療黃金期？
當然越快越好。
如果我搵私家腫瘤科醫生做電療最多快10日8日，依你意見值唔值得用十幾萬去私家電？
另，我腫瘤生係左邊。腫瘤科醫生話可以用active breathing control method 減低對心臟影響，其實有冇必要做到咁講究呢？
10日8日就差唔遠，active breathing control 就好嘢嚟，呢個技術反而值得。
馬醫生你好，我是HER2乳癌病人，腫瘤 (Malignant right breast tumour, size = 1.6 x 1.8 x 1.8 cm, SUVmax 19.7)，PET Scan時，發現淋巴也有懷疑 (Suspicious of metastatic lymph node, axillary level I lymph node size = 1.3 x 0.8 cm, SUVmax 19.7)，所以當時是定性為HER2二期 (醫生稱，如果淋巴無懷疑，那就應該是HER2一期)。完成雙標杷化療(6針)，腫瘤已縮至看不見，只看見醫生落的一個 Marker。剛剛完成手術，切除了原位癌(醫生是這樣說)，同時做了”前哨淋巴結活檢”，切了4粒前哨淋巴，也沒有發現這4粒前哨淋巴有癌細胞，因此不用切除腋下淋巴，這是好消息，因為我很容易水腫，怕有水腫後遺証的風險。
手術是私家醫生，電療是公立醫院，幾星期後就會開始，電療設計時，HA醫生睇當日PET Scan Report，見”懷疑淋巴結轉移”這項，所以建議電療會做三個部份，(一)乳房原來腫瘤位置，(二)脛鎖骨淋巴位置，和(三)腋下淋巴位置。HA醫生說這是最保險的方案，因為今天已經不能確定當日淋巴是否有癌細胞。
HA醫生叫我們考慮是否想做曬全部(一)、(二)、(三)，這是按重要的程度區分，(一)是必須的，(二)和(三)是optional，可做(一) Only、(一) & (二)，但做全部(一)、(二)、(三)就會是最保險，因為始終當日沒有在這懷疑淋巴位置做抽針檢查，也沒有在這淋巴位置落 Marker切除。
馬醫生，我很怕電療後有長期水腫的後遺症，但HA醫生說做曬全部是最保險的。馬醫生，這是我的矛盾對決，你可否給我一點建議？(一) Only、(一) & (二)或全部做曬。
ER/PR? 切除時乳房腫瘤仲有冇活細胞？
非常感謝醫生這麼快的回覆，我是 ER and PR negative, 化驗報告diagnosis 如下:
[Right breast 7H wide local excision: Foci of ductal carcinoma in situ, intermediate nuclear grade, no necrosis, largest focus measures 0.25 cm. Smaller focus present at deep margin.]
你嗰段文字講到原位癌掂到底床，要搞清楚究竟切清未？
如果切清就一及二。
清楚了馬醫生謝謝你！祝你冬至、聖誕及新年快樂。
馬醫生你好，本人53歲，抽針驗到原位癌0期，腫瘤很小，做左局部切除，淋巴亦冇擴散，手術切除既腫瘤再化驗係良性，懷疑惡細胞真的很少又或最初抽針時已抽走，私家醫生亦有猶豫要否電療，最後referred左去瑪麗醫院，佢哋都係建議電療15次，其實我好抗拒，好怕輻射，手術距離現在已過左三個月，真的有需要電療嗎？
有需要。
馬醫生同各位同仁，新年好！我媽媽53歲，侵入型小葉I期，1月24日做完局部切除，一共切除左3粒，尺寸為11mm、6mm同0.8mm，淋巴冇擴散，ERPR陽性，HER2陰性，KI-67係24$，宜家安排QE嘅電療係4月23日，做完手術2個月先做電療會唔會有影響？我轉私家3月份做會不會效果仲加好？唔該晒！
同時我等緊oncotypedx嘅報告，醫生話出來睇睇報告結果先決定做唔做化療
如果方案已經決定咗嘅話，當然越快做越好。
馬醫生你好。 9/3/2024. Pathology showed high grade DCIS with a 1.3mm IDC, ERO/8, PR 0/8, HER 2 3/3. SLN 0/2. 這個是我的報告。準備做電療，但是有兩個醫生不同意見，一個是建議我把其中一組淋巴也電療。 有一個不用 如果淋巴都電療會不會增加水腫機會。 淋巴電療，效果是不是跟割了一樣?希望你的意見🙏🏻🙏🏻
電淋巴會增加水腫機會，你淋巴冇感染，唔需要電淋巴。
I read this in an article: “Preventing local recurrences will not have the hoped-for downstream effect of preventing deaths; therefore, the de-escalation of local treatment is rational.” Does it mean that radiotherapy as a local treatment can be skipped, at least for low grade DCIS? Since I am worried by the very slim chance of developing life threatening sarcomas after RT, can I use frequent mammogram to replace RT for low grade DCIS? Will it help to detect invasive BC before it turns life-threatening metastasis?
-If RT is skipped, in case of recurrence as invasive BC, RT needs to be done anyway even after mastectomy?
-If RT is done now, is it not possible to do RT again in case of recurrence?
-Does DCIS close to chest wall (<1mm negative margin at the deep side) cause additional risks in case of recurrence? (e.g. high risk of spreading to the chest? doing mastectomy may not clear invasive BC?)
好多醫生都想搵邊一堆病人可以安全唔使電，包括有人提議low grade DCIS，但事實係證明唔到佢哋唔能夠由電療獲益，即係所有局部切除都要電。
預防復發但係唔能夠延長壽命呢個係偽名題，同你講放個癌症喺度最終唔會攞命，你信唔信吖，諗都知唔合理。
密啲監察係及早發現復發，電療係預防復發，預防當然勝於及早發現。
每個組織只可以電一次，今次電咗之後復發就唔可以再電。
Margin唔夠闊會增加復發風險。
Dear Dr Ma, Thanks you very much for the information provided and the advice. They are very helpful!
馬醫生你好
我媽媽最近同時確診肺癌和乳癌1 期double primary，右上肺葉和右邊乳房已被完全切除，肺癌不需跟進治療。
病理化驗意外發現乳房組織axillary edge 有另一粒微細腫瘤好接近邊緣，腫瘤科認為有機會切得唔清建議做電療。
她術後超過1個月依然感覺氣喘厲害，擔心做電療會進一步削弱肺功能，請問政府做電療會唔會真係令佢肺功能再明顯差左？
另外醫生會建議用質子治療去醫嗎？我只知道價錢好貴，但講到副作用少好多咁。
謝謝您
會差咗，明唔明顯就好難講。
唔需要去到用質子治療，VMAT已經夠減低對肺嘅副作用。
多謝回覆
QE 嗰邊話安排左幫佢做3D conformal
想問醫生，比起IMRT / VMAT，係咪對肺的副作用明顯比較高？
如果係副作用大些，我地可能要考慮出去私家做，謝謝🙏🙏
3D Conformal 對肺嘅副作用大啲。