乳癌化療期間之飲食 － 點補身？洗唔洗戒口？
醫生又唔係May姐，點識教你飲飲食食。但係當我發覺10個病人有9個問：「化療時點補身？洗唔洗戒口？」我就知道，「乳癌化療期間之飲食」呢個係一個需要正視嘅問題⋯⋯
乳癌化療點補身？
「化療時點補身？」
西醫其實冇「補身」呢個概念，同中醫唔同，佢地覺得要固本培元，咩都要補一餐，就好似May姐咁咩都唔洗理，全部補一補雞汁先，整沙律都要落雞汁。
圖片來源：互聯網
相反，西醫會覺得你要補充營養，都要知究竟有乜營養唔夠先得㗎。情況有如學生哥去補習，明明英文唔得你走去補中文，冇用㗎喎。
所以如果要講補身，我地要好科學化咁去睇吓，究竟化療時身體需要咩野先：
做化療，即係派毒藥入去身體殺癌細胞，但同一時間身體生長得快嘅細胞都會被波及。
我地希望嘅就係自己細胞回氣得比乳癌細胞快，佢死時我地唔死。
回氣呢個過程就係你成日聽到人講嘅「新陳代謝」，佢最主要需要嘅源料就係蛋白質。所以化療病人啱食一啲高蛋白質嘅食物，就好似人地健身練大隻嗰D餐單咁，蛋白呀、牛奶呀、豆類食物呀咁。
如果你日常攝取嘅蛋白質唔夠，身體會自然分解你嘅肌肉去提供蛋白質，你成個人就會日漸消瘦。唔好以為日夜追求嘅「瘦」終於得到會好正好靚，呢種「瘦」加埋冇頭髮冇精神皮膚黑指甲變質，成個就係一個好病嘅樣，同靚完全扯唔上任何關係。所以化療時，人生目標應該由追求極致嘅「瘦」轉為「保持甚至增加體重」。
「瘦就難姐，增肥易過借火啦～」
唔好以為好易，化療冇胃口／易作嘔係常見嘅，食都食唔到，點保持體重？
要保持體重，好多病人都會飲一啲營養奶去幫幫手，主要貪佢蛋白質含量高，並唔係好似廣告咁講有咩神奇營養。
圖片來源：互聯網
另外唔好誤會以為要增磅，就走去食一D平時好想食但唔敢食嘅肥膩野。相反，應該少油／少肥／少煎炸，因為高脂肪食物會有「好飽」頂住唔舒服嘅感覺。化療已經冇胃口／易作嘔，仲要頂住就咩都唔想食／好辛苦。
為咗減少「頂住」嘅感覺，醫生會建議少食多餐，好多病友都覺得有幫助。
仲有記住飲多D水，咁樣可以多D小便，排出毒素身體好。
圖片來源：互聯網
所以「補身」呢樣野，好多時常識已經夠，飲食金字塔，均衡營養，多飲水，多運動，早睡早起身體好。唔好睇小呢D野，九成香港人都做唔到，淨係叫佢早睡早起都做唔到啦。
乳癌化療期間之飲食
「我明喇，化療時唔洗特別補身，咁洗唔洗戒口？」
西醫雖然冇「補身」，但我地化療時都有「戒口」呢樣野。最主要原因／目的係想避免感染，因為化療時抵抗力好弱，小小感染都可以好大問題，甚至攞命。
圖片來源：互聯網
成個「戒口」主題其實係圍繞生活細節去盡量乾淨，盡量避免有菌嘅野：
1）準備食物要洗乾淨對手。
2）徹底煮熟D食物。
3）唔好用木筷子，因為藏好多菌。
4）水最好飲蒸餾水／滾水，唔好誤會走去飲鑽石能量水，嗰D冇用嘅。
5）唔好食沙律／刺身／海產／打邊爐／自助餐，因為生野多菌。
6）生果唔好連皮食。
7）唔好出街食。一來街D野污糟，二來人多易感染。
另外仲要戒食中藥。
「中藥都要戒？」
唔係話中藥唔乾淨，而係怕佢會影響你化療嘅進度。
中醫好鍾意用「複方」，又藥引又盛，幾十隻藥材撈埋一齊，中醫師都估計唔到中藥同化療藥撞埋一齊會點（本草綱目都冇教，以前都冇呢D新藥／標靶藥）。所以唔好再信咩中西醫合壁，你唔識我我唔識你點合壁，新組成嘅雜牌軍話你聽佢地好合拍你都唔信啦，仲用佢黎打呢場只許勝不許敗嘅生死戰？
圖片來源：電影＜少林足球＞截圖
由西醫嘅角度，我地好多時都見到啲草藥（靈芝、雲芝）令肝酵素上升，令到我地喺冇辦法嘅情況之下要停化療（因為化療都可以搞到肝酵素升），咁就阻礙你嘅治療啦。
所以做緊西方治療時最好唔好用中藥，要用中藥，就等西醫完成晒治療先慢慢補身，鍾意點補都得。
「我等唔到咁耐，中醫師／家人想我快D用中藥，點算好？」
如果真係一定要用中藥，底線係唔好停西方治療，同埋唔好化療時用。電療／荷爾蒙治療時用中藥，撞嘅機會就細好多。
下一階段⋯⋯
做完化療，要吊標靶嘅就繼續標靶，同一時間治療進入一個冇咁辛苦嘅新階段「電療」。
下一篇同你講吓「乳癌電療大解構－原來唔洗驚」
香港乳癌及乳病治療中心 
乳房電療會傷害到肺部嗎？
詳見乳癌電療大解構－原來唔洗驚
請問乳癌病人可以喝蜂蜜嗎？
可以。
你好醫生，我媽咪係乳癌三期感恩冇擴散佢第一次化針巳打，已過4日，冇乜太大反應，朝早起床只係少許見頭暈，少少作悶，食完早餐後好D以下有小小問題:
1)我可以用普通糖水以#黃耳,加紅棗+無花果,妃子,龍眼肉,黑糖,一齊煲?幫佢可補充体力+補血?
2)以她正在接受化針期間是否可以食多D魚?梳羅魚?海參?
3)如果佢之後見想嘔，我可以比D陳皮輔助她嗎?
謝謝如可回答:)
Ashley
1）煲湯水飲冇問題。至於可唔可以補充體力同補血，中西醫嘅角度好唔同，我就唔班門弄斧。
2）煮熟冇問題。
3）陳皮只怕污糟。
一星期前做完全乳切除手術，但她很想吃火鍋，有什麼不可以吃？
計正就冇話唔食得，不過都會建議休息多2個星期等傷口埋曬先食。廢事肚屙時上又痛下又痛，另外如果發燒會令醫生誤會傷口發炎。
做完2次化疗，肝酵素升至50, 可以继续做第三次化疗吗？
唔止係睇單一指數去決定，要問返自己醫生適唔適合繼續。
你好,
做到第4次化療，不過近幾次抽血白血球都過低，未可以再做第5次化療
已經係盡量休息，同落樓下公園做運動，飲食都同平時差唔多
有無一些飲食上建議或其他建議令身體的白血球保持正常？ 謝謝
可以參考乳癌化療療程 － 吊針過程大公開。
您好!
請問您是乳線斷台療/乳線科的醫生嗎?
請問口服的化療藥有多少種, 有什麼好處及不好處呢?
你的問題太空泛了，好難三言兩語說得清。
醫生，黃薑粉算唔算中藥？化療未做完食嘅話會唔會同啲藥相沖？
算唔算中藥唔清楚，建議都係一如以往，盡量減少不必要的補身，減少干擾機會。
親人已做第一期已做切除手術，準備做化療，但本身係素食者，請問化療期間有什麼素食物可以幫助她身體加強？感謝！
雞蛋。
癌症病人是否適合打流感針？ 本人已經做咗四次化療，仲有四次未做。 化療間亦需要打升白針。
打流感針是否有機會發燒？ 如發燒我便要入院？
適合打，不過不是化療時。
有機會發燒。
家人乳癌第2A期要打4次化療針+電療21次，剛打第一針化療針（D+C)兩天,想問下係化療期間，可以買oral impact比家人飲嗎（為增強抵抗力）？會唔會影響到化療效果？
可以買，不過唔會增強抵抗力。唔會影響。
馬醫生
請問 oncotype DX score 29 , 病理報告 前哨淋巴一粒有 0.1mm isolated Tumor cells , 乳腺癌 37*11*18mm 已切除，是否需要做化療？如果要，建議打什麼針，多少支，手術后何時開始，謝謝
29分要化療，打TTCx4，手術後4-6星期開始。
馬醫生
本身是乙型肝炎帶菌者，會有影響嗎？
查看你的文章 TT = Taxotere 紫杉醇 ，是否等於 Taxance ? C 指什麼?
排了政府醫院，醫生會提供 CCTx4 嗎？如不，請問我可否要求用此個療程呢？
乙型肝炎帶菌做化療前要用抗乙肝藥去預防肝炎。
Taxotere係Taxane嘅其中一種。
C指Cyclophosphamide。
政府醫院有得提供。
馬醫生
感謝你抽空回覆，還有一個問題想問，現在食緊「酵素液體」及「縲旋草片」的保健產品，化癢期間是否要停用？雞蛋是否手術后一個月才可以開始食？
最好停用。
手術後冇要求戒口。
馬醫生
謝謝假期回覆，端午節快樂
你好 醫生，
我月頭打左第一次停經針，
今日係第一次化療後 第5天
但今日好像有經血出現， 正常嗎？點解會咁？
（計返日子 就係月經周期咁 比上個月早幾天）
正常，停經針都要時間先生效。
馬醫生，本人7月27日做了全切左乳加腋下淋巴清掃，報告出來如下
乳腺 浸潤 性 非 特殊 類型 癌 , 修訂 Bloom and Richardson 第 3 級
浸潤 性 腫瘤 最大 32 毫米 , TNM 階段 pT2 pN2a
手術 切 緣 無 癌 組織
不見 血管 , 淋巴 管 , 神經 鞘 有 癌細胞 滲透
腋下 淋巴結 有 癌細胞 轉移
現在排緊腫瘤科，請問我需要用哪組化療藥。
取決於癌症屬性（ER/PR/HER2），先可以作出建議。
ER-/PR-/HER2+3
6套雙化療加雙標靶，TTCHP x 6。