乳房原位癌 － 究竟係唔係乳癌？
我醫生話我確診乳房原位癌，諗住搵保險公司claim保險啦，點知保險經紀話乳房原位癌唔係癌冇得賠。吓，有冇搞錯？！原位癌唔係癌，唔通佢係淨「原位」呀？⋯⋯
一般人聽都覺得嬲，「原位癌」唔係「癌」，唔通佢係淨「原位」？！？
運用保險公司邏輯，「保險賠償」唔係「賠償」，佢係淨收保費嘅「保險」。
伸延閲讀：乳癌治療費用 － 危疾保險保唔保？
乳房原位癌定義
「Breast HK，究竟乳房／乳腺原位癌係唔係乳癌？」
醫學上黎講，我會話原位癌係乳癌，因為同樣係要醫嘅。如果你唔理佢，佢係會變成侵蝕性癌嘅，即係都會攞命。
「咁點解保險公司唔賠？」
佢梗係話「原位癌係癌前病變／存活率好好／下刪一萬個理由⋯⋯」，實際答案好簡單，就係「唔想賠」。
「錢冇得賠就算喇，可唔可以講比我聽，點分原位癌同侵入性乳癌？」
原位癌（Carcinoma in situ）同侵入性癌（Invasive carcinoma或者就咁叫carcinoma都得）最主要分別就係睇佢有冇穿過咗底床個包膜（basement membrane）。
未穿（即係仲有浸膜包住）就叫原位癌。
穿咗（即係已經包唔住）就叫侵入性癌。
「點解穿唔穿浸膜係咁緊要？」
未穿，即係有野包住，理論上乳癌細胞冇可能擴散，即係唔會影響淋巴／其他器官，唔會死人，所以我地叫佢做乳癌零期。
穿咗，乳癌細胞可以周圍走，可以擴散去淋巴／其他器官，視乎唔同擴散程度，分為乳癌一期至四期不等。
「我個病理報告寫住Ductal carcinoma in situ（DCIS），咁Ductal點解？」
簡單黎講，就係睇吓乳癌細胞來自邊度？原來大致分為2類：
乳腺其實好似棵樹咁，分為樹幹（乳腺管）同埋樹葉（乳小葉）。
圖片來源：Terese Winslow LLC
如果D癌細胞來自乳腺管細胞（Ductal cell）（9成都係），未穿包膜就係乳腺管原位癌Ductal Carcinoma In Situ（即係你見人成日講嘅DCIS），穿咗包膜就係侵蝕性乳腺管癌Invasive Ductal Carcinoma（IDC）。
如果D癌細胞來自乳小葉細胞（Lobular cell）（唔常見），未穿包膜就係乳小葉原位癌Lobular Carcinoma In Situ（LCIS），穿咗包膜就係侵蝕性乳小葉癌Invasive Lobular Carcinoma（ILC）。
「好似好複雜咁，唔係好明～」
係難明D，畫個表應該易明DD：
仲係唔明其實唔緊要，主要因為以下2大原因：
1）大部份人都係乳腺管細胞（Ductal cell），即係DCIS或者IDC。
2）喺病人角度，唔洗分得咁仔細，因為治療大方向主要係取決於有冇穿浸膜，而唔係咩細胞源頭。
咁我係唔係乳房原位癌？
好多病友／家人都好想知，究竟應該點樣醫乳癌？因此我以前寫過兩篇文（乳癌治療方法 － 我需要用咩方法醫？1 ，乳癌治療時間 － 我需要用咩方法醫？2）教你有咩選擇過你揀。
睇完之後，你可能頭都暈埋，花多又眼亂，都唔知邊樣啱自己。
其中一個好重要嘅概念，就係對返自己乳癌咩期數，之後揀返相對應嘅治療方法，所以第一樣野你要搞清楚嘅，就係你自己係乳癌第幾期先。（伸延閱讀：乳癌分期 ﹣ 我係早期定末期？）
為咗可以方便病友／家人安心作戰，黎緊我會一連幾集用返你嘅角度，仔細教你點分自己第幾期／點樣醫。
想知自己係咪乳房原位癌？下一篇「乳癌零期原位癌 － 我係咪0期？」再教你⋯⋯
香港乳癌及乳病治療中心 
醫生你好：
可否 吿知以下三者的分別和患者須要留心的地方，謝謝。
Mammary gland hyperplasia，Fibroadenoma，Fibroadenosis。
Yy.
以上三者其實醫生會歸納為Aberrations in the Normal Development and Involution of the breast (ANDI)，詳細點分真係唔洗知（因為係D好悶嘅野），對普羅大眾黎講只有一樣野要知：佢地全部都係良性，唔會變癌／唔會增加患乳癌風險。
你問得咁仔細，睇黎都係睇住抽粗針／手術報告黎求答案（因為冇病人額頭寫住我係mammary gland hyperplasia嘅）。有樣野提提你，如果以上係抽針結果，之後點跟進就跟返乳房造影嘅BIRADS分類。如果以上係手術結果，就冇額外野要做，40歲以上就每2年照一照乳房。
謝謝Breast HK。
我有的唔係好明：我係在mammogram regular check時發現鈣化點，無瘤，照超聲波都睇唔到，確診乳線管原位癌，咪即係癌細胞被包住未走出來，點解都要切前哨淋巴來驗？是否為左保險？依家驗左癌無擴散，但遲D如果癌病復發或轉移，咪無得再切前哨淋巴來驗？
如果手術前抽粗針確診為乳腺管原位癌，而又唔係high grade嘅話，我睇唔到有咩醫學上嘅理由要做前哨淋巴手術。
你叫我估點解嘅話，最大可能係你喺私家做手術，手術前只係抽咗幼針話有癌，冇抽到粗針就做手術，即係手術前根本分唔到係原位癌定侵蝕性癌。而私家醫生又想一次手術就搞掂，所以就做埋前哨淋巴（費事做完第一次手術先話有侵蝕性，要做第二次前哨淋巴手術，病人可能會亂諗野／份保險同一個病只比claim一次手術費用）。
如果第時侵蝕性復發，係可以再試前哨淋巴手術嘅（不過成功率／準確度就講唔實）。
你好，我想問我媽咪就係咁嘅情況，醫生只抽咗幼針話係癌但話做手術嘅時先睇埋前哨淋巴，想問下呢個程序/方法係咪常用或者出嚟嘅結果會唔會冇咁好？？thanks
呢種做法私家比較常見，公立唔常見。
最終結果係咪差D唔敢講，但治療計劃／準備上一定有粗針結果好D／周詳D。
請問 encapulated papillary 可否分出是良性還是惡性, 是不是 invasive. Thanks.
Encapsulated papillary 什麼？carcinoma？
“E… p…” 是照醫生 refer letter 上寫的抄, 再看了看 pathology report, 是醫生串錯字 ! 由於完全唔明, 醫生無解, 只是照抄問問, 試試可否了解多些: Encapsulated papillary carcinoma is associated with excellent prognosis and survival is >95% at 10 years. 是不是十年番發的機會很低. 如可以, 請指導. 謝.
如果個pathology report冇寫明有invasive component，encapsulated papillary carcinoma 係歸納為原位癌咁治療，可以話十年存活率好高，至於復唔復發，比唔到一個簡單實數你。
謝謝, 想再問一下, 為何 report 下一句是 “While it is now classified as invasive carcinoma, the overall clinical behaviour is more similar to DCIS.” 可以看出是 invasive 嗎? 在 report 中, 還會有其他提示嗎 ? Tks.
Encapsulated papillary carcinoma 嘅classification 轉過好多次，詳情唔洗理，佢咁寫即係覺得隻癌嘅臨床表現似原位癌。
醫生，
請問原位癌有無可能十幾年都唔變大又唔變侵蝕性的可能?
同埋原位癌局部切除後，唔做電療，如果復發，會唔會無得醫? (復發時是原位癌多，還是入侵性多呢?)
醫生會不會不肯再度局部切除? 我明白唔做電療是有一倍復發的機會，但我聽醫生講唔做都有8成機會唔復發，我只有39歲，未結婚，未生育，唔想個乳房變黑變硬，而且，乳腺已有部份被切除，電一電會再加大傷害嗎?
有一篇你提到割去的再生不回來，指的是乳腺嗎? 其他肉呢? 現在乳房微LUP, 以後都會是這樣嗎?不過就算係咁，我仍然是感激幫我做手術的醫生，因為傷口已經埋得算靚的了。
我仍然覺得自己算是幸運的，原位癌算易對付的了。謝謝!
呢個世界冇咩野係冇可能。
原位癌復發以原位較多，但如果係侵蝕性復發而又遲咗發現，係可以根治唔到。
如果今次已經做咗電療，下次復發係要全乳房切除，因為一來保留乳房已經衰咗，二來同一邊唔可以電兩次。
如果今次冇做電療，復發係因為未完成療程，咁醫生可因應當時情況局部／全乳切除。
乳房變黑變硬只係短暫係咁，幾個月會慢慢改善，耐D時間大部分人都會正常返，唔好怕電療，冇健康的身體，什麼結婚／生育也是天方夜譚。
乳腺組織唔會再生，皮下脂肪會隨體重而轉變。
多謝你的鼓勵，我要努力增磅先得。我會詳細同醫生再傾傾點跟進。
醫生︰您好！我的情況是政府醫院的報告:
– Clinical diagnosis: suspected right breast cancer.
– Diagnosis: LCIS with Comedo Necrosis. suggest excision
我相信這就是原位癌。
我在私家醫院做了手術，醫生替我做了乳房切除和淋巴切除手術，理由是我的乳房腫瘤有8cm大。原位癌要切除乳房嗎？我的淋巴沒有問題，為何要切除我的淋巴？謝謝！
LCIS係原位癌，不過處理方法同DCIS有D唔同。
如果抽針話係LCIS，下一步係做手術切。
視乎種類有唔同要求，如果係classical type LCIS而同一時間冇其他癌（e.g. DCIS/IDC），其實唔洗切清／割淋巴，因為我地只係當佢係一個將來患乳癌的高危因素（risk factor），並不當佢係癌症。
如果係pleomorphic LCIS，因為佢係惡過classical LCIS，所以要好似DCIS咁切清為止。如果全乳切除，都可以考慮切前哨淋巴，以防出黎標本有侵蝕性癌時，冇做淋巴要補做返。
醫生您好，
我近日因為左邊胸部刺痛，睇醫生並做了Mammogram & ultrasound. 發現有硬塊，再做了fine needle aspiration。
報告指consistent with ductual carcinoma. 另外，寫Tumour cell cannibalism and mitotic figures are demonstrated. The overall features are consistent with ductual carcinoma, provisional high-grade.
請問即係第幾期？要如何治療?
謝謝！
幼針係分唔到有冇侵蝕性的，所以唔知第幾期。
乳腺管原位癌約幾耐會變為侵蝕牲乳腺管癌
冇人知。
Thank you very much
如果已做了手術,報告發現有粒原位癌近边,应該点做?
睇下夠唔夠margin（緩衝區），有2mm以上就冇問題，唔夠2mm就要再做手術。
Invasive ductal carcinoma probably grade 3
姐係點解？ thanks
侵蝕性乳癌。
醫生你好,
我媽媽CHECK到有乳腺管原位癌之後做手術, 術後覆診時醫生說還有一部分周邊的組織沒做乾淨,
現在又需要重做一次手術…想請問一下, 原本未穿的原位癌, 會否因為醫生這樣動刀不完整後,
演變成穿過咗個包膜既侵入性癌呢? 謝謝!
唔會因手術變差，但殘餘的腫瘤本身可以係侵蝕性。
Thanks Doctor!!!
醫生，請問導管原位癌做了部份切除手術，是否必須進行電療❔
必須。
醫生～醫生～
我原位癌，做左部分切除，但唔清，要再做！
手術是一邊切，一邊驗，但點解驗住切都會切唔清既？
要問返做手術嗰位醫生。
醫生 report寫high grade DCIS即係點？
即係生長得比較快嘅原位癌，處理方法同其他原位癌一樣。
去年十二月Mammogram發現兩處可疑，做左Core Biopsy，一個0.2cm大鈣化點在乳頭上方不到2cm位置乳暈邊緣，另一個1.7cm大在乳頭上方6-7cm位置。結果都係ADH/ALH，本來兩個都需要手術切除，結果醫生只切除1.7cm果個。手術後四個月Mammogram發現兩個biopsy中間位置，大概乳頭上方3.9cm鈣化點有變化。Biopsy後發現DCIS。請問是否需要乳房全切。之前乳暈邊0.2cm鈣化無切嘅組織是否引起今次發展成DCIS？選擇切部分和全部需要注意邊D方面？謝謝！
洗唔洗全切，要視乎醫生有冇信心切乾淨之餘，又達致一個可以接受的外觀效果，好難隔空評估。
上次抽咗粗針話ADH，係要切除的，雖然唔可以百分百話引起係今次DCIS的原兇，但確實有咁嘅機會。
醫生你好,
Diagonsis 寫Invasive breast carcinoma of no special type
但Microscopic Examination 內容寫 No Lymphovascular and perineural invasions are detected. DCIS of high grade (3) with mixed solid and cribriform type is ovserved (Category B5b – Malignant)
咁即係DCIS 定 Invasive breast carcinoma of no special type? 定係同一個意思呢?
如果無錯一個意思係原位癌個一個意思已經浸潤性乳腺癌。係同一份報告出現我有啲唔明白….謝謝幫忙。
應該係invasive breast carcinoma 同時伴隨DCIS，即係以侵蝕性癌角度去處理。
醫生，我乳房照b超結果寫住低回音，有一2.1cmx0.6cm似沿導管結節，請問係咩意思?
香港唔會咁寫，你有冇直接英文版本報告？
醫生，我今年23歲，4月在診所照超聲波，左胸照到有2-3cm陰影，選擇抽幼針，報告寫冇惡性細胞，不過有少部份異性細胞，有機會係什麼？我剛去公立醫院排期，醫生話陰影好細，一係抽粗針，一係等半年再返黎檢查，我選擇抽粗針，要到11月份才可以抽粗針再睇下係咩黎，期間會否惡化或細胞變回正常呢？
可以好多可能性：可以係良性，又可以係惡性，所以要進一步跟進先知。
如果係惡性嘅話，期間當然可以惡化。如果係良性嘅話，中間就冇事會發生。
醫生，請問atypical apocrine adenosis是甚麼，是否需要手術切除？
有非典型細胞，最好割。
醫生你好，媽媽73歲，早2個月發現乳房有硬塊，乳頭滲血，最近喺東華檢查發現有浸潤性非特殊型乳腺癌 Invasive breast carcinoma of no special type
佢都講唔清楚醫生到底點樣同佢解釋，只係話決定會做手術，而且由於我唔喺香港，我無法問清楚佢嘅情況。
佢份report咁講：
Clinical summary: R2H 2FN irregular mass. BIRADS 5.
Diagnosis
1)Breast,right, 2 O’clock, 2cm from the nipple,mass, USG guided core biopsy:
-Invasive breast carcinoma of no special type
-provisionally grade 3(modified Bloom and Richardson)
Nature of Specmen
1)Right breast at 2 O’clock 2cm from nipple.
Macroscopic examination
1)3 strips of tan tissues measure up to 1.1cm in length and diameter up to 0.1cm.All embedded in 1 cassette.
Microscope examination
1)Section shows cores of breast tissues involved by a provisionally grade 3 (3,3,3 modified Bloom and Richardson) invasive breast carcinoma of no special type. The carcinoma cells from irregular islands and anastomosing trabeculae without significant tubular formation. (tubule formation = 3) The nuclear pleomorphism is marked (nuclear pleomorphism=3). Mitotic figures are counted 36 per 10 high power fields （eyepieces 22mm) (mitotic count = 3). A component of ductile carcinoma in situ(DCIS) of high nuclear grade is suspected. No lymphovascular invasion is detected. The non neoplastic breast is unremarkable. (Category B5b- Invasive malignancy)
媽媽說醫生解釋過病情但她也不太明白，醫生亦表示媽媽可以做手術，但未知幾時可動手術。
我想問問，就以上報告看得出是第幾期的乳腺癌嗎？係咪屬於原位癌，定係要做左手術先知道？謝謝解答。
睇唔出第幾期，但係有侵蝕性，已經唔單止係原位癌咁簡單，即係一至四期。
醫生, 請問high grade DCIS involving intraduct papilloma是甚麼?
原位癌。
醫生你好，今年39歲，從19歲開始，我已經發現我有很多粒粒在乳房，但醫生說很多人也有，亦沒有異樣，所以只是每年/每幾年做下ultrasound 。一直以來都無異樣。
今年做了乳造影檢查，無發現，但今次ultrasound 檢查卻發現一粒1.5cm 有可疑的粒粒。大概就係個形狀不是oval shape, 個edge 凹凸不規則，於是就進行了抽粗針，結果發現了ALH。經過醫生診斷後，就決把呢粒切除，而順便也切除另外一粒size 比較大（大概1.5cm)，但外表沒有異樣的纖維瘤。 因爲我有很多粒粒，所以手術前亦做了MRI。報告指出了這兩粒需要跟進，另外一邊乳房。亦有一粒需要跟進。（ultrasound 沒有指出這粒有可疑）
手術很順利，切片後發現原本有懷疑那粒依舊是ALH，但沒有懷疑那粒反而有LCIS 。醫生解析LCIS 是乳小葉原位癌。如果我沒有理解錯誤，近年LCIS已經唔算係原位癌，不會鄺散和變cancer ，乳小葉原位癌只是一個名字，而ALH 和LCIS只是risk factor，醫生說我兩邊胸部有breast cancer 的機會率會提高。
我的問題是，我還有很多其他的粒粒，好像LCIS 那粒沒有表面問題。只是細粒一些。醫生說沒可能全部粒粒切除。現階段只可以monitor 住。現在約了我六個月後再見。其實我現在算不算breast cancer ? 有咁多粒粒，之後可以點部署？有咩可以做？
係咪應該做全切，保留外觀，再重建？
謝謝解答。
唔算乳癌。
都係只可以定期照住。
現階段做唔做全切再加重建就好睇個人意願。
醫生好、我剛剛做了抽粗針報告：
MICROSCOPIC DESCRIPTION
Section shows cores of breast tissue featuring intraductal proliferation of monotonous ductal cells in solid and cribriform pattems, focally associated with sclerosis, coredonecrosis and luminal calcifications. The lining cells demonstrate grade 1-2 nuclei. There is a focus of less than 1 mm, suspicious of stromal invasion, where there are small, irregular nests of tumor cells surrounded by lymphohistiocytic infiltrates. No definite lymphovascular invasion is identified. Immunostaining for p63 confirms attenuated myoepithelial cells in the intraductal component and apparent loss of myoepithelial cells in the focus suspicious of stromal invasion.
是否癌細胞？
啲描述係疑似。
醫生你好，我今年55歲，已經發現每邊乳房有4粒結節，醫生建議每半年做下ultrasound , 每年做乳房造影
在2022年做手術切除1粒和乳線管, 經過醫生解析LCIS 是乳小葉原位癌。
之後搵腫瘤科醫生 ,他建議要食抗荷爾蒙5年.
請問有冇呢個需要？
冇需要。
醫生，想問下叫得我做core biopsy 係咪多數都要做手術跟進？
唔係。