乳癌化療需知 - 我洗唔洗化療?

Posted by in Chemotherapy 化療

「啱啱做完手術,今日返去乳腺科醫生度聽報告,希望唔洗化療啦。我真係好驚要化療,見其他人化療好似好辛苦咁,其實咁辛苦有咩好處呢?」呢篇同你解構乳癌化療需知-我洗唔洗化療⋯⋯

注意:乳癌化療發展非常急速,資料複雜到一個大部份醫生都跟唔上嘅地步。奢望可以靠網上資料為自己決定化療計劃,實屬不智。化療計劃嘅制定,應與你的腫瘤科醫生商量。

 

乳癌我可唔可以唔化療?馬國權醫生
乳癌化療黃金期,我係咪等得太耐?馬國權醫生
乳癌化療要打幾多針?馬國權醫生
乳癌化療期間,真係唔可以食中藥?馬國權醫生
2招解決血管變幼,從此輕鬆落化療⋯⋯馬國權醫生

手術之後⋯⋯

做完手術,大概一至兩個星期就會出病理報告。呢個時候,你會返去乳腺科外科醫生度睇傷口同埋睇報告。睇報告就係睇兩樣野:

1)手術割唔割得清:邊界位清唔清,洗唔洗翻手再做多次手術(詳見乳癌手術 6 - 專做乳房手術醫生的增值服務)。如果割得清,就睇⋯⋯

2)乳癌有幾惡越惡嘅乳癌,越大機會復發,越應該做輔助治療去鞏固手術嘅治療效果。

 

點解仲要化療?

「吓!醫生,我要做化療?我以為做完手術就搞掂咗㗎喇喎,其實究竟醫好未?」

如果乳癌仲係停留喺乳房同腋下淋巴階段(未擴散至非腋下淋巴/遠端器官),做完手術其實已經醫好咗

「咁醫好咗,點解仲要化療?」

化療嘅目的係為咗鞏固手術嘅治療效果,希望可以保用耐D/襟用D,即係長命D/少D復發

情況有如大廈天台漏水(生癌),做完維修工程(手術),其實已經搞掂(醫好),不過業主立案法團(病友)想保用耐D/襟用D(長命D/少D復發),咪叫承建商(醫生)幫手再油多一浸防漏(化療),甚至幾浸防漏(化療標靶治療電療荷爾蒙治療)。

乳癌

圖片來源:互聯網

 

咁我做唔做化療好?

你要考慮嘅有三個因素:

1)你嘅意願:即係想唔想長命D(防漏保用耐D/襟用D)?你係性格進取搏到盡(未漏水就準備好/做定防漏)?定係性格保守乜都唔想試(真係到雨季漏水先算啦)?

2)你嘅身體狀況:究竟你本身係後生健健康康頂得順化療(豪宅有錢做維修)?定係老人家體弱多病頂唔順(馬頭圍危樓夾唔起錢想做維修都比唔起)?有一個好重要嘅概念叫生活質素(Quality of Life),打化療賺唔賺到,要睇身體頂唔頂得順。如果身體頂唔順,打化療比你賺6個月命,但有3個月要訓醫院,3個月死下死下,咁又有乜謂呢?所以我地希望賺嘅係有生活質素嘅生命

3)你有冇需要化療:乳癌惡(易漏水),化療利多於弊(做防漏筆錢洗得過,預防勝於治療)?定係乳癌唔惡(唔易漏水),化療弊多於利(做防漏只會白白浪費金錢)?

做唔做化療,就係喺以上三個因素攞一個平衡點

化療

唔好奢望你自己問吓家人/朋友/病友/上網睇吓就可以攞到呢一個平衡點。因為你冇可能夠知識/經驗去準確評估第二同第三點(身體狀況同埋乳癌惡唔惡),所以你需要一個有豐富知識/經驗嘅醫生去引導你做決定。

相反,冇你嘅參與討論,醫生/家人/朋友係幫唔到你做決定,因為佢地唔知你嘅意願(好後生仲有好多野想做想長命D,定係兒孫滿堂無欲無求隨時走都冇問題)。

 

搵咩醫生傾化療?

仲記唔記得我係乳癌醫生 ﹣ 睇咩科先啱 ?講過嘅分工?

熟悉乳癌治療嘅乳腺科醫生(判頭)通常都話到比你聽你隻乳癌惡唔惡,洗唔洗輔助治療(化療/標靶治療/電療/荷爾蒙治療)。

如果要化療,乳腺科醫生就會轉介你比腫瘤科醫生去詳細傾/詳細評估/落化療。

去到呢一刻,又係時候睇餸食飯,你要諗吓想唔想返公立醫院做化療?

乳癌治療

圖片來源:互聯網

因為做完手術,已經過咗公立醫院要等最耐嘅樽頸位,黎緊嘅療程已經唔洗點等。

而且用嘅化療藥私家同公立又一模一樣,情況有如零售(私家)同批發(公立),同一件貨(化療藥)零售價等如批發價加成本加賺你嘅錢。咁當然零售要有服務員(醫生)服侍/排VIP隊唔洗等/靚D嘅門面先可以賺你錢。私家同公立嘅主要分別只在於你信唔信嗰位/嗰組醫生嘅建議,同埋鍾唔鍾意個環境/配套。

如果決定留喺私營市場,乳腺科醫生自然會介紹佢自己班底比你。

如果決定返公立醫院繼續醫,就叫乳腺科醫生寫封轉介信比你,去排最近屋企嘅公立醫院腫瘤科。「近」係好緊要,因為化療時好虛弱,仲要舟車勞頓就好辛苦,同埋人多擠迫迫車迫地鐵會易D感染。

呢個階段等新症見腫瘤科醫生唔會等好耐,因為你已經做完晒手術有齊晒報告,腫瘤科醫生一睇轉介信已經知要幾時見你。再者你傷口未埋定晒,本身都要等等先可以開始化療

 

乳癌化療需知

雖然話冇可能自己一個人制定化療計劃,但係你咁沮喪黎到呢度搵資料,收收埋埋咩都唔講/咩都叫你搵自己腫瘤科醫生,又點會幫到你呢?

再者,睇怕你都已經睇咗幾個唔同嘅腫瘤科醫生、掙扎於十幾個唔同但又好相似嘅化療方案之間、自己已經搞唔清邊個方案好、仲要喺咁嘅情況下諗繼唔繼續喺私家醫落去、上網問咗幾十個病友但人人講法又唔同、已經數唔清捱咗幾多個失眠嘅夜晚、日以繼夜夜以繼日咁係討論區爬咗幾千個posts、搜尋黎搜尋去google都係出成千上萬個你抄我我抄你嘅大陸/台灣網站、去到D人話好好嘅外國網站但自己又睇唔明、面對一大堆查埋醫學字典譯晒中文隻隻字都識讀但都仲係唔明嘅化療藥名、仲時不時比D只係想sell野嘅神棍煩住你阻住你,最尾發覺都仲係一頭霧水幫唔到自己/幫唔到最錫嘅女友/幫唔到最愛嘅老婆/幫唔到最親嘅媽媽,呢種無奈我深深體會到⋯⋯

所以黎緊幾集我會陪你一齊行呢條最難行嘅乳癌化療路,希望你見到呢個世界,原來黑暗盡頭係一片光明⋯⋯

乳癌手術

圖片來源:互聯網

乳癌化療時間 - 手術前做?手術後做?

乳癌化療需唔需要 - 著數計算機火併乳癌基因測試

乳癌化療AC針TC針 - 乜藥黎㗎?

乳癌化療選擇 - 咁多組合點樣揀?

乳癌標靶治療 - 乳癌HER2型點樣揀?

乳癌雙標靶治療-HER2型乳癌的春天

乳癌化療費用 - 要用幾多錢?貴唔貴?

乳癌化療療程 - 吊針過程大公開

粉紅天使-落入凡間的天使

乳癌化療甩頭髮 - 點處理?幾時生返?

乳癌化療嘔吐 - 終極止嘔藥

乳癌化療副作用 - 辛唔辛苦?點處理?

乳癌化療期間之飲食 - 點補身?洗唔洗戒口?

封面圖片來源:改篇自WikiHow