乳癌手術 6 － 專做乳房手術醫生的增值服務
「嗰個醫生專做乳房手術好出名⋯⋯」
「一定要搵個專門做乳癌手術嘅醫生，有冇好介紹？」
作為乳癌病人，當然想搵個專醫乳癌嘅專家／名醫去幫自己做手術／開刀。但叫得做乳癌專家／名醫，收費一定唔平。比得咁貴手術費，同公立醫院有咩分別先？呢篇同你講吓專做乳房手術醫生的增值服務⋯⋯
乳房手術都有得增值？八達通呀？幫我增值100⋯⋯
專做乳房手術的醫生
冇錯，專做乳房手術嘅醫生，賣點除咗係佢地嘅經驗／手勢／刀法之外，好多時，力求完美嘅佢地仲有一D增值服務，可以令乳癌手術能保留乳房嘅成功機會大大增加。咁神奇？其實唔神奇，好多醫生都識，不過因時間／環境所限，所以唔做／唔做得姐。咁即係咩增值服務呢？就係我之前都有提過嘅「手術超聲波」同埋「急凍切片／冰凍切片Frozen section」⋯⋯
保留乳房手術的基礎
要局部乳房切除嘅治療效果（存活率／局部復發率）同全個乳房切除嘅一樣，我地要滿足兩個條件：
1）手術要割清，即係邊緣唔可以有癌細胞。
2）一定要撘電療
乳癌點樣割？
開刀割乳癌，就好似煎太陽蛋咁。蛋黃就係有毒嘅乳癌，蛋白就係包圍乳癌嘅正常細胞，亦即乳腺科醫生所講嘅緩衝區／紙口位／邊界位（margin）。要成功煎太陽蛋（切除乳癌），就要唔好整爆嗰蛋黃（乳癌）。
圖片來源：改篇自互聯網
點為之割得清？
如果醫生能夠見到四圍有蛋白包住蛋黃，即係蛋黃無爆，成功煎太陽蛋啦。
如果醫生能夠見到四圍有正常細胞包住癌細胞，即係乳癌無爆，成功切除乳癌啦。
割得清，就係喺顯微鏡底下，乳癌周圍有足夠嘅正常細胞包住佢，咁樣醫生先能夠確定冇乳癌細胞殘留係乳房。
「好簡單姐，開刀割多D咪得囉⋯⋯」
割多D係易D有足夠緩衝區，最極端就係全個乳房割晒，不過好多病友就係想保留乳房麻，你割咁多無辜嘅正常細胞，咁個乳房咪凹晒囉。
圖片來源：改篇自互聯網
所以割得清唔等如割得準。
個平衡點應該要放喺有足夠緩衝區得黎，緩衝區又要盡量少，即係我成日講嘅「割得準」。
圖片來源：改篇自互聯網
點為之割得準？
乳癌黎講，專做乳房手術嘅醫生開刀時會攞1cm緩衝區，目的就係喺顯微鏡底下有起碼1-2mm邊界位。
如果緩衝區少過1mm，醫生叫呢D做「好近／好貼（close margin）」，就好似個蛋黃側埋一邊，最好就再做手術，割多D好貼嗰面嘅緩衝區做清佢。
圖片來源：改篇自互聯網
如果直情見到癌細胞係邊邊位，呢D叫做「割唔清（involved margin）」，因為蛋黃已經流晒出黎（可能有乳癌殘餘喺乳房），一定要翻手再割。
圖片來源：改篇自互聯網
點為之割得好？
割乳癌割得好，除咗要割得清割得準，仲有一大要點，就係要識善後（即係點砌返靚個乳房），唔好凹咗一大忽。與時並進嘅乳腺科醫生都會識／知／聽過切除乳癌時嘅整形技術（oncoplastic surgery），擅長oncoplastic surgery就能夠喺未割乳癌時，一早預計好點砌返靚個乳房。
割得清割得準割完靚，此為之割得好。
點解會割唔清？
「好易做姐，醫生用間尺周圍度住攞1cm咪得囉，點解咁都會割唔清？」
你要明白外科醫生係冇一對超聲波手／顯微鏡手，做手術都係靠摸／靠觸覺。
因此如果你個乳癌好難摸／甚至摸唔到，割乳癌側埋一邊係好易理解嘅。
就算你粒野好易摸，都唔一定好易清。因為乳腺細胞早期變癌時，係摸唔到嘅，即係你摸到嘅腫瘤就1cm，摸唔到嘅喺顯微鏡底下而有癌細胞嘅範圍可能已經2cm，判斷緩衝區當然有誤差（以為係蛋白，點知原來係蛋黃）。
割唔清會點？
割唔清，即係問題未處理，乳癌未醫好。未醫好嘅乳癌係會攞命嘅。
要處理未解決嘅問題，當然就要再做手術切清佢，即係你最唔想聽到嘅消息－「要再做手術」。
一般黎講，保留乳房手術割唔清嘅機會率大概係兩至三成，即係十個人有三個要再做手術。
再做手術你會點諗？
割唔清，做完手術聽病理報告，醫生同你講要再開刀，你一定「晴天霹靂」問：「點解第一次開刀唔割多D／割清D？係咪個醫生手勢差？係咪想dum我症賺多D錢？」
你唔會再信嗰位醫生，你會叫人介紹一個專做乳房手術／乳癌手術嘅名醫比你，希望可以割得清／割得準／割完靚／割得好。
點解專做乳房手術的名醫可以割準D？
專做乳房手術的名醫除咗贏經驗之外，仲有兩大增值服務能夠增加準確度，就係「手術超聲波」同埋「急凍切片」。
咩係手術超聲波？
之前講過一般外科醫生開刀時只係靠摸／觸覺，所以難摸／摸唔到嗰D腫瘤咪準確度低。
「咁如果我地唔只靠摸，加埋其他感觀，咪會好D準D囉？」
正是如此，專做乳房手術嘅名醫，開刀時除咗靠摸／觸覺，仲會靠睇／視覺，所以會好D準D囉。
當然，唔係靠肉眼去睇，而係靠平時乳房造影嘅超聲波去睇。同平時唔同，佢地係一路做手術一路照（intraoperative ultrasound）住去做。所以就算難摸／摸唔到嗰D腫瘤，都難佢地唔到，因為佢地超聲波睇到麻。
咁咩係急凍切片？
「咁如果好似你頭先講，摸唔到又睇唔到，剩係顯微鏡先知嘅早期變異，咁點算呢？」
好問題！如果睇都睇唔到，呢樣真係手術超聲波都幫唔到。不過專做乳房手術嘅名醫仲有第二樣法寶「急凍切片」。
「急凍切片」就係喺手術中途做快速測試：醫生會將四邊嘅紙口位（margin／蛋白），都切一D立即送去化驗室，比病理科醫生立刻喺顯微鏡底下睇吓有冇癌細胞。如果有癌細胞（蛋黃），即係唔清，名醫會即場再割多D，以求割清晒。
當然叫得急凍（快速測試），一定唔會百分百準確，因為冇特別染色／慢慢詳細睇。不過顯微鏡加埋手術超聲波，已經能夠令翻手嘅機會大大降低九成（唔係百分百）。
割清晒你會點諗？
割清晒，做完手術聽病理報告，醫生同你講恭喜你，你一定「天天天晴」諗：「點解第一次我唔搵一個專做乳房手術的醫生做手術？呢個醫生咪就係手勢好，洗多D錢都值得睇嘅名醫囉！」
呢兩大增值服務係咪好貴？
貴唔貴，視乎你個乳腺科醫生有幾出名，因為最主要都係時間成本，做多咗額外野，自然收返行政費。情況就好似請大狀咁，越出名，每個鐘頭收費就越貴。
咁值唔值？
見人見智，睇你將重點放係邊度。情況有如買保險（手術超聲波／急凍切片），你要比保費（醫生費），不過佢保你唔會出事（唔洗再做手術）。
如果你唔買保險，冇事發生割清晒，恭喜你慳咗保費。
如果你唔買保險，有事發生割唔清，翻做手術條數點計（心理／生理／荷包）都一定貴過保費好多。
買唔買，視乎你進取定保守。
咁邊度可以增值？
私家呢，專做乳房手術嘅乳腺科醫生一般都有得增值，好公平，用者自付原則。
公立呢，對唔住，一般都冇得增值。唔係唔識，只係資源所限，時間唔容許慢慢增值。因為喺醫管局嘅角度十個有三個要翻手，即係七個（大部份）冇事OK啦，仲咩浪費呢D時間？
當然，我估如果高官有事黎教學醫院醫，醫管局會有唔同嘅答案。你唔會天真到以為梁振英去錯士多增值會增唔到呀？老闆就算冇八達通機，都一定有得增值啦，最多咪比埋自己張增爆咗嘅個人八達通過特首。
「咁咪好唔公平？」
對唔住，呢個世界由始至終都冇公平過⋯⋯
「平等機會」只係會出現喺比人投訴世界唔公平嘅機構名稱之上。
圖片來源：東方互動
做完手術，休息三至四星期後，治療進入一個新階段「化療」。
下一篇同你講吓乳癌化療需知 － 我洗唔洗化療？
香港乳癌及乳病治療中心 
請問nearest margin of invasive component of smallest tumor (B) is the Inferior (0.1cm). 是否要再切? 或25次電療也可以? 若我現乳房重建, 內有擴張器和鹽水袋, 可否電療? 謝謝回覆!
1mm margin足夠，不用再切。乳房重建不會同時放入擴張器同鹽水袋。
對不起, 是放了擴張器, 再分次打入鹽水擴張皮膚. 因澳門醫生建議我打4技AC針加五年Tamoxifen, 澳門醫生說:打化療,可增加5%不復發機會. 因我一個人住, 担心化療傷身和照顧唔到自己. 我也知詢了兩位在香港的腫瘤科醫生意見, 他們都說, 不用化療, 因化療作用不大, 但他們都建議電療, 原因是他們覺得若切出腫瘤的邊緣margin 是2-3mm會比較好. 其實我聽到不用化療己經很開心, 請問我需唔需要25次的電療? 是否內有擴張器也可進行電療? 十分感謝回覆!
傳統黎講，2mm以上係比較好，不過科技越趨進步，我地發覺1mm都ok，甚至外國指引話就算細過1mm，只要冇掂到就得。所以1mm會有醫生係覺得近，建議電療幫補吓，有D就覺得唔洗。既然你已經睇咗2個腫瘤科醫生，佢地建議一致，我睇唔到咩理由唔信／反對他們的建議。
擴張器就係專給電療用嘅。
請問一下如果是復發的話，病人接受不需要保留乳房，接受到整個乳房切除(而另一文章您曾經提及如果首次保留了乳房，但仍然復發，代表保留是沒有用，漏過水的地方會再容易漏水，所以要整個切除)，那麼，選擇「一個專做乳房手術醫生」做手術或是「一般外科醫生」，這點是否相對沒有太大差別呢？謝謝您，這個網站穩住了我作為病人家屬的心情，可以看得見一步一步應該怎樣分析，而且您的回答也讓我了解更多，好感謝您付出的時間和心機，真的好感謝您。
今次揀全乳房切除，即係手術中途沒有必要做急凍切片，手術喺公立定私家做嘅分野已經冇咁明顯。不過既然已經係復發，有經驗嘅乳腺科醫生，相比起一般唔係做開乳房手術嘅一般外科醫生，都係有其過人之處。
明白的，所以我也正在找乳房專科醫生，希望報告出了後帶媽媽去看，想請問一下，因為不了解這個乳房專科醫生的抽針服務是否粗針:
「立體定位組織抽取 (Vaccuum Assisted Biopsy)
此部儀器可以更準確,更安全及有效地在乳房及腋下描準有問題的地方抽取細胞組織化驗。」
請問只看名稱您知道是否指粗針呢？
我也好怕看外科醫師時他們都因為沒有粗針服務而用幼針，畢竟媽媽年紀大，不希望拖，謝謝，等待您的回覆。
Vacuum assisted biopsy 係粗過粗針（core needle biopsy）的微創手術，大部分情況未洗抽咁多組織出黎化驗。
明白，那我明天要打電話問問這個專科醫生有沒有粗針服務。
一般來說，到私家醫院做粗針，是否都會有荷爾蒙受體和標靶受體測試呢？我已帶媽媽到港x醫院做超聲波，姑娘給我安排的外科醫生網上這個月有三位乳癌病友都說他沒心機沒醫徳，不做抽驗只顧介紹外科手術，所以我打算幫媽媽約另一位外科醫生，看看是否安排在該院做粗針，以及帶齊報告到乳腺專科醫生請教。因為媽媽最終都希望安排到公立醫院做手術，現在又怕粗針結果沒有荷爾蒙受體和標靶受體測試，到頭來還是不能幫媽媽加快檢查進度。希望您可以給點意見，謝謝您。
通常要指明先會做。
醫生：你的解釋非常詳盡，多謝你為病人付出這麼多時間與心機。
我剛剛做完全乳房切除，之後醫生建議做正電子素描，結果腋下還有兩粒淋巴，需要再做手術
為什麼會這樣呢？
你呢個情況偏離正常做法（先做正電子素描，再切除乳房，同一時間加減切淋巴），要問返自己醫生背後的原因，不適宜胡亂猜測。
醫生：首先感謝您的網站，為病人提供了詳盡清晰的說明。無言感激！
另有問題請教：我有一條乳腺管流血，X光及超聲波都照不出有異樣，做了導管X光發現有瘤，之後做乳腺管切除手術後，病理報告顯示有0.4mm的侵入性腫瘤，醫生說需再次手術，切多點。我選擇部分切除，但因腫瘤位置近乳頭（上次縫針位位於乳暈），我正在考慮是否切乳頭。醫生說上次切走的部位距離乳頭有超過1CM，因此也可以在本次手術中先切最靠近乳頭的組織，在手術中先做快速測試，若證實無癌細胞可以保留乳頭（說法A）。但醫生之前也說過因流血時血從乳頭流出，也擔心癌細胞是否會存留在乳頭(說法B)。我現在很矛盾，還有幾天就要做手術做決定，想請教您關於說法A的手術，是否能保證手術後乳頭沒有癌細胞？醫生說手術後我只需要做電療。
說法A的做法並不能保證手術後乳頭沒有癌細胞，講得清楚一D，說法A的做法並不能保證手術後餘下的乳腺組織（不單止乳頭）沒有癌細胞。你試諗吓，一日唔割出黎又點會知餘下的乳腺組織有定冇癌細胞。不過你放心，就算餘下「有可能」有癌細胞剩其實都可以係安全的，大前提係要紙口位冇癌細胞（clear margin），同埋術後要電療（某程度上係執漏，清除有可能遺漏的癌細胞）。
小玲
2016May 1
我於 去年5月摸到左胸有粒嘢，醫生話脂方沒關係。10月我自己去照乳房攝影發現左乳十二點位果粒嘢真有懷疑，於11月在荃灣港安抽粗針，結果話乳頭突出增生，建議做手術取出化驗，回加拿大又抽針，但未有醫生話過是癌症。至3月開刀割除出切片化驗，結果是原位癌，訂了5月20曰再切除因有些位未割清，我自己也能觸摸到仍有粒嘢在傷囗上方。已約全乳切徐並矽膠重建左乳。起初我認為割哂最安全，但現在上網發現局部切除也是安全的。心?疑問：1.全切後左乳沒得三部曲乳房攝影及超聲波檢查，將來怎麼查得出假如復發呢？，會否延誤令復發都不知道。沒三部曲用什麼檢查照呢？C TScan.? 2.局部切除真是十分安全不影響復發機會率嗎？3.局部切除傷口較小並易復完及減少傷口過大，對嗎？4.電療對身體輻射有無害處？醫生仼我擇全切或局部切。現在我想改局部切，約好5月20日又怕因改局部切而約期被取消及延誤。假如再拖至六月或七月才有手術做,會影響到原位癌變入侵癌嗎？
1）全切後只係做唔到乳房X光，但係乳房檢查三部曲仍然可行（照樣臨床檢查、超聲波就加減、抽針照可以做）。CT scan喺乳房方面冇咩用。
2）局部切除如果切得清加埋電療，係安全的。
3）局部切除只是傷口較細，復原時間其實同全乳切除差不多。
4）詳細睇乳癌電療大解構－原來唔洗驚
5）原位癌理論上就應該等得，不過3月做第一次手術，第二次拖到67月，就點講都講唔通，同常規做法偏離太多。
非常衷心感謝您回答。將於5月20日全左乳切除不須切淋巴並即時矽膠重建左乳,整形醫生話將會保留乳頭及皮膚而在乳房底部圓型處開刀植入，令傷囗有遮掩；並且通常安全不須更換及取出。我的外科醫生沒提及怎樣落刀，原位癌在12點位，手術醫生通常會與重建醫生在同一落刀位切除全乳嗎？定係佢考慮合適於12點落的另一位置呢？12點位曾抽過粗針位的原位癌位置上的皮膚都須要切走些少以策安全呢？假如手術全切除後發現有侵入性癌的可能性機會大嗎？日後康復皮膚會崩緊不適嗎或會痛嗎？並矽膠會感覺到而令身體不舒服嗎？
left breast lumpectomy:(12 o’clock),
A. intermediate grade (grade2/3) ducal carcinoma in situ (DCIS),greatest dimension 2.7cm
B. Negative for invasive carcinoma
C. Margin status :
DCIS :
I.is present at cauterized anterior margin.
2.Is present within95%of Timor).
以上不太明白，可以翻譯中文給我嗎？加拿大醫生是說英語，故不能問得明白，㚈科話手術後叫5年荷蒙藥就不會復發，他講得女好肯定。是真的咁好嗎？
正常如果乳腺外科醫生同整形科醫生有溝通就夾過先落刀，冇溝通過就乳腺外科醫生決定，之後整形科自己執生／執手尾。你anterior margin未切清，最好將原位癌位置上的皮膚都一併切埋安全D，所以應該12點落刀，叫整形科用埋同一個傷口，盡量唔好係乳房底再開多一個傷口。
有冇侵入性癌冇得估，始終有咁嘅可能性。皮膚會唔會崩緊／不適／痛，同樣道理，冇得估，因人而異。
段病理報告都係話有原位癌，前面紙口位未切清。
至於復發問題，一定冇咁樂觀，一世都有可能復發。如果唔會復發，仲咩要定期覆診。
剛做完手術一星期䨱診，整形醫生未拆引流管前說，手術她沒有我合適左乳尺寸，要再訂購再做手術，or加入些矽膠於凹位，我問會很痛嗎？她說不會像上次咁痛，只小小痛。?回家前認為不對稱的意思是大小高低勉強接受啦，自己看才知全個左乳變型凹突及走歪並胸底部凹令皮膚皺摺，前胸正中位，隆起突出，刀口在左胸半彎底部約7吋長，我感到矽膠很硬擠迫隆出於本來正中乳溝位較小肉位置上。以下有問題: 再次手術會像上次咁痛及刀口一樣咁大嗎？執翻靚些機會大嗎？如果我請醫生拍攝照片訂購矽膠會尺寸較合嗎？現在仍未影過相，矽膠感覺很硬，幾時才變軟？乳溝位擠迫隆出感覺是瘀傷未愎服？還是放位不正確會感覺到不適？矽膠咁硬，改鹽水袋又如何呢？
你做咗咩手術？
我係Au Yeung Siu ling
小玲
May20 左乳於12點位有原位癌，做全左乳切加即時重建手術
1）再次手術理應用返上次個傷口，所以係一樣咁大，至於痛多定痛少冇得估。
2）同一醫生執翻靚機會大唔大，我唔方便評論。核心問題係「點解一開始係冇合適尺寸的假體情況下都照做手術？」。其實要幾大／咩型狀假體，應該係手術前評估好、準備好，唔應該上到手術枱先話冇現貨。呢個唔關影唔影相事。
3）矽膠質地係咁就係咁，唔會變軟。
4）乳溝位隆出感覺係因為假體放置得太過近中間所引致，同復原無關。
5）鹽水袋會軟身D，但另一方面亦冇咁彈手。
我是Au Yeung Siu ling 在加拿大做手術，言語?能流暢溝通找家人翻譯不方便！令本來想改翻局部切又唔敢煩人，沒想到全切後這樣難看，我跟本唔知執翻靚可否換醫生，又唔知加拿大那個醫生有冇經驗？我上次在香港九龍QE排期4月做切片手術，後來致電話我在海外做取消了約期，如我再回來香港公立醫院，可以排期整型執翻靚嗎？醫院管理局可免費嗎？還是只收矽膠成本費呢？倘若回香港荃灣港安醫院或其他私院整型費約要多少呢？（加拿大唯一好處是免費）但斷症港安只針對12位有問題而加拿大醫生多抽2個位針及割2個位，最終仍是港安準確判斷只有12點位有問題。我成個左胸皮膚面好似被人打一身勁嘅咁，全部瘀青未退，這是否因唔啱位拉扯引致嗎？再開刀傷口會更難看及難埋口嗎？現在第八曰傷口無貼仼何保護物，幾時可以淋浴呢？感謝醫生回答！
香港公立醫院有身份證就差不多係免費（一百幾十大部分人都比得起），不過只有四間有整型外科（瑪麗、廣華、威爾斯、屯門；伊利沙伯係冇嘅），假體成本要收費。
私家醫院海鮮價，視乎醫院同醫生名氣。
瘀就係已知的可能併發症，同啱唔啱位無關。
翻手就點睇都差過一次搞掂，執唔執到手尾要問返自己醫生有冇信心。
傷口問題唔可以隔空答。
Thank you ! Breast HK
Dear BreastHK,
Hi, my situation is that the nodule originally predicted as “原位”. However, the supplementary report after the OT showed that both left and right side are invasive. In this regard, I am worrying if they were “割得清”. The answer from my doc is a definite yes, but recently the oncologist said that he was kinda of worry because the first report after the OT showed that “invasive carcinoma…, size 2.5 x 2.1 x 1.5 cm, positive for extensive peritumoral lymphovascular permeation, TOUCHING MEDIAL MARGIN of this specimen”, “Sections show an invasive carcinoma spanning LEVEL 6 to 9 of the specimen.… The invasive carcinoma measures 2.5 x 2.1 x 1.5 cm. It has TOUCHED THE MEDIAL MARGIN of the specimen at LEVEL 8.”
I had not paid attention to these findings before until he pointed this out (although I don’t really understand what these sentences exactly mean). I was only paying attention to the following information relating to margins in the supplementary report (i.e. the second report after the first report of OT):
RIGHT
Invasive carcinoma (right outer quadrant lumpectomy + right 3-7H margin + further right 4-7H margin)
Size: 2.5 cm across
Resection margins: 3.4 cm from superior margin, 0.6 cm from inferior margin, 0.1 to 0.5 cm from anterior margin, 0.2 to 1 cm from posterior margin, 0.4 cm from lateral margin, 3 cm from medial margin.
DCIS (right outer quadrant lumpectomy + right 3-7H margin + further right 4-7H margin)
Size 2.1 cm in maximum horizontal extent, scattered small foci, occupying 30% of invasive carcinoma
Resection margins: 2.5 cm from superior margin, 0.6 cm from inferior margin, 0.1 to 0.5 cm from anterior margin, 0.2 to 1 cm from posterior margin, 0.4 cm from lateral margin, 1.2 cm from medial margin.
Nodal status: 2 out of 3 sentinel lymph nodes positive
LEFT
Invasive carcinoma (lefter outer upper quardrant lumpectomy + left 7-10H margin)
Size: 0.6 cm across
Resection margins: same or better than DCIS
DCIS (left outer upper quadrant lumpectomy + left 7-10H margin)
Size 2.5 cm vertically
Resection margins: 1.5 cm from superior margin, 1 cm from inferior margin, 0.5 cm from anterior margin, 0.5 cm from posterior margin, 0.5 from medial margin and 0.4 cm from lateral margin
Nodal status: 8 extracted all negative
My question are:
(a) As said, “專做乳房手術嘅醫生開刀時會攞1cm緩衝區，目的就係喺顯微鏡底下有起碼1-2mm邊界”. While my doc said that the margin is 2mm (but I read from the supplementary report that some areas are only with 0.1cm), my oncologist said that the guide should be 1cm. May I know how to determine? Should the “egg white” (緩衝區／紙口位／邊界位) be 1mm or 10mm? Are there different starting points to measure these two different “margin”?
(b) There are so many different terms relating to “margin”, such as the medial margin, superior margin, etc. I tried to search online. Judging from my limited knowledge, these different “margins” are the terms to indicate the location of the nodule, aren’t they (please correct me if I am wrong as a layman)? If affirmative, are the findings point out by my oncologist (i.e. “TOUCHING MADIAL MARGIN of this specimen”) relevant to my question, which is, are they “已經割得清”?
(c) The fundamental question which puzzled me is, are the problem areas on my left and right breasts “已經割清晒”? Already five weeks after the OT, my breast, especially the right side, sometimes 隱隱作痛 (in the breast) and 突然一兩陣刺痛 (near the armpit) in the last two days. Kinda worry.
Sorry for such a long piece of writing. Always try to provide all the necessary information when I raised my questions. Million thanks!!
A)Margin要分開侵蝕性癌同原位癌黎睇。
如果講侵蝕性（invasive cancer），其實而家guideline話最外圍冇癌細胞（no ink on cancer cells）已經夠，即係少過1mm都得。不過仔細睇返背後理據，其實支持「少過1mm都得」的證據唔係咁強，所以我個人傾向支持有1mm或以上就叫清，如果1mm以下就要睇下／傾下仲有冇得割、仲想唔想割。
至於原位癌（in situ cancer），因為我地怕佢skip lesion（即係唔係連氣），所以一般要求會比侵蝕性高。普遍認為少過1mm叫唔夠，多過10mm叫夠，1－10mm之間就見人見智（睇吓醫生綜合結論）。
你嗰樣本最近嗰度係面（anterior margin）同底（posterior margin），1mm其實都可以已經叫夠，再加上如果乳腺科醫生已經由皮割到底（呢個要你自己同醫生confirm），就算唔夠都冇得再割，因為已經割到盡。
B）嗰D形容詞指邊一條邊，唔係指location of the nodule。Superior margin 上邊，medial margin （內邊，近事業線），lateral margin （外邊，近手），inferior margin 下邊，anterior margin （前邊，近皮），posterior margin（後邊，近自己）。
根據你提供的資料，右邊應該係有三個樣本：
1）main specimen，即係right outer quadrant lumpectomy
2）right 3-7H margin
3）further right 4-7H margin
「touching medial margin」估計係指main specimen，而手術中途醫生亦應該已經知道／估計到，所以3－7點鐘位置亦一而再、再而三咁割多兩忽，最終medial margin 所以有3cm（由侵蝕性計）／1.2cm（由原位癌計）。所以最終結論係「已經割得清」，前提係以上假設正確（喺缺乏手術報告／整份病理報告下，係可以導致前設錯誤）。
C）B已經答咗。
Dear BreastHK,
No word can express how thankful I am. Million thanks, from the bottom of my heart. This question has been looping in my mind for days and now I am so relieved. Even on Sat you spare your precious time and energy to read my post and answer me in such great details in just several hours!! That is very very kind and 偉大 of you. Not exaggerating!! You are really a GREAT doc. Even though I have no chance to meet you, I shall remember your kindness and pay it forward to others. God bless you my dear!! Please take more rest and don’t exhaust yourself too much.
Dear BreastHK,
My sincere apology. Please excuse me for asking one further question (afraid to bother you again so take this chance to ask in one go). Judging from the DCIS of my left side, the “margins” are also safe, right (during the OT, it was treated as 原位癌 but later confirmed as invasive as well)?
左邊都清。
衷心感激!!
請問只有一邊乳房有一粒3cm 的癌細胞腫瘤需要全乳切除嗎？我的醫生說全個切除穩陣d,但我卻唔想全乳切除….
唔係淨睇size就決定全唔全切，仲有好多技術細節要考慮。
未接受到醫生的建議就去揾多個醫生睇睇攞second opinion。
我在伊利沙伯排咗1月尾做右邊完切除手術,但醫生話佢地不會同我做即時重建喎，因時間關係喎！佢話重建手術要多3-4小時，3-4小時可以做多1個其他病人的手術！
但我有朋友在博愛做切除乳房手術後可即時做埋重建， 咁是否伊利沙伯沒有重建的手術提供?
伊利沙伯係冇整形外科的。
謝謝你！
咁我想手術後做埋重建, 我係咪可以叫伊利沙伯轉介我去其他醫院？
東九龍有邊間醫院有重建可以一齊做呢？
你可以要求轉介，佢啋唔啋你又係一回事。廣華有整形外科。
Dr Brest HK 你好，本人親人係乳癌III A期，剛做完右乳全割及用 背脊肌肉重建乳房。 但術後病理報告， 醫生 發現 乳房皮膚 也有癌細胞， 於是喺診所做了小手術，再割去5 mm皮膚， 希望能割清, 但再做化驗完之後，医生又話要割多小小做化驗穩陣d,想請問 這樣做法正常和常見嗎? 最差的情況是怎樣，要怎樣處理?
唔可以輕言評論此做法正唔正常，只可以話唔常見。最差情況就係割極都唔清，點樣處理要見過先知。
想補充返一啲資料， 我啱啱喺瑪麗度做完局部切除加前哨淋巴活檢。醫生係有同我做埋砌出嚟嘅部分+前哨淋巴嘅冷凍切片，咁所以其實而家政府係有做到呢樣嘢㗎。至於有冇做手術超聲波，呢個我就未知啦，因為都係啱做完手術，過一星期後先去返去睇報告，到時問返。
政府係case by case，恭喜您佢幫你咁做。
你好醫生，感謝你無私的分享，回應。
本人30歲，3代亦沒癌病歷史。呢半年來一直經歷不同的檢查、像人球般被轉介到不同醫生，身心疲憊亦唔知道點做好，我大概總結下現況，因今天公立醫生建議我做全乳切除叫我考慮，本人驚呆了想參考返到底我是否必須要做全乳手術？
事源由大半年前開始乳頭流血，拎乳頭分泌物標本(冇結論) → 照ultrasound → 有幾粒 cyst & 見到有2位可疑黑影 → 2位黑影抽幼針(非典型) & 夾胸(後生乜都睇唔到) → 再ultrasound抽粗針評反左呢2粒唔係惡性腫瘤 → 乳頭繼續有不定時流血 →上星期照MRI(上半個胸見到都比較active) & 抽粗針由10點到2點(report 寫10-12點有疑似原位癌 , 1－2點就增生) → 本身睇開個私家醫生話冇野幫到我轉介返我去公立話瑪麗可做埋MRI biopsy 同埋配套都好比養和(但我見醫生你寫過其實mri biopsy實用性不大，我這情況也同樣嗎？) →★今天公立醫生建議★1.做全乳切除&拎埋前哨淋巴&重建 Or 2. 局部切都會由10-2點切+埋乳頭(唔明白1-2點位都冇癌點解要切只因為安全d? 同埋因有血曾在乳頭流出就可疑又要切埋?) 怕唔清&範圍大，做局部就要加埋電療 &重建。但2個方案都冇講要食5年藥？
→抽左血做埋基因檢測(預計6個星期後有結果) & 寫左紙會拎返標本比呢面醫生再化驗! 現在等侯下周見整形醫生相討。
本人有疑問是如果基因測試Proof 到我negative, 這足夠證明什么？
為何1-2點都證明了不是原位癌都要做埋? 定仲要做咩Test 先Proof 到只做10－12點位嗎？ 何等手術才應考慮做微創？
我明白健康應在首位，我亦只想拎到個平衡點，如果金錢能得到更好的治療，我盼能從一個更少傷害到身心的方法醫好自己的病。
感謝你!
我冇講過MRI guided biopsy冇用，唔好誤會。我只講過唔係人人都要照MRI，只有特定五類人先有用。
1-2點位抽過針冇野就唔一定要切。食唔食藥就視乎病理報告有幾惡同有冇荷爾蒙受體。
基因測試negative，只證明到你冇BRCA 基因變異，冇其他野證明到。
請問能多點分享你的情況嗎？
我今天剛第一次去瑪麗(→東華) 見醫生，我在考慮是否要加錢約埋睇瑪麗私家症
Thankyou
你好 抱歉剛剛才見到這信息。
我開初都有著同你一樣的想法，但我個人認為，事實上瑪麗，東華都是同一班醫生，除非你想指定醫生做手術，要不 no point 又去睇返同一班人，因為treatment 結果都一樣，反而可以考慮搵出面其他醫生拎second opinion。 如各位Sis 有出名豐富經驗名醫請分享!
醫生你好！首先非常感恩你無私的分享，令我們這班迷惘的病友有希望，我本人10月中自己摸到右胸右上角有一個硬塊，後來走去香港婦女影像中心做了B超和X光檢查，報告講有1cm，最新再做一個抽針細胞化驗為良性細胞型態，變化建議良性纖維腺瘤。醫生建議做手術拿個瘤出來，如果不做會擔心長大同變化，迷茫的我不知道怎決定?
信自己醫生，就同佢傾。唔信自己醫生，就問多個醫生意見。
我患咗原位癌，選擇保留乳房，但做咗兩次手術都割唔清，而家要全切。由發現呢個病到做咗兩次手術，雖然係好快手，但我真係覺得無助。我搵過第二個醫生想問意見，佢話唔想得罪我原本個醫生所以唔想睇我。我想問我應唔應該轉醫生？轉醫生有咩要考慮？
搵second opinion 其實好普遍，想搵就搵，冇咩野要考慮。
請問做了全乳切除和前哨淋巴檢驗大概一個月，報告說是二期a不惡，但腋下附近有舊好像雞蛋咁大的腫塊，請問是什麼來的？有危險嗎？
通常都係積水，搵醫生睇睇確定之後抽走佢就得喇。
你好, 我去了覆診, 醫生說是脂肪, 要定期按摩, 會消散嗎?有點擔心, 因別人說通常無那舊東西…
脂肪硬化唔會點散。
要做多次手術切除?
如果係脂肪就唔洗。
醫生你好，私家造影超聲波、粗針，證實原位癌，之後轉介政府，政府要求私家抽組織嘅玻璃片化驗，發覺冇癌細胞，政府醫院再次抽粗針，結果一樣都係冇癌細胞！我信邊個好？
情況複雜，唔可以輕下判斷。未來方向最大機會係切咗個目標去搞清楚究竟有癌定冇癌。
多謝回覆！打少左樣，私家X光做影、抽針、超聲波、MRI 報告係癌，會有錯嗎？情緒好似坐過山車咁@@好匪夷所思！若果切左個目標都係無癌細胞？咁私家是有問題嗎？我有冇權追究責任？
X光超聲波MRI講到幾可疑都好，都唔可以作準。抽針病理報告則為手術前確診的黃金標準，唔應該有錯。至於責任問題，我唔係喺一個合適的位置去評論。
醫生, 點樣可以克服手術嘅恐懼？ 我 要做全乳切除手術 , 擔心未入手術室已爆喊. 平時打針睇牙已經好驚, 從未入過手術室
恐懼好正常，只可以期望速戰速決。
想請問抽粗針會唔會令好大嘅,瘤爆列/令病情惡化？
如為老人家，瘤已經大到唔合適手術，只食荷爾蒙藥，幾耐先有縮細效果？改善瘤食出皮膚出血情況？
瘤食出皮膚出血情況點樣可以快啲改善又少副作用🙏🏻
感謝你的解答，令迷惘的病友家人多啲安心🙏🏻功德無量🙏🏻
抽針唔會令病情惡化。
荷爾蒙藥要四個月先開始見其功效。
可以考慮電療。
我做完乳房腫瘤切除手術已超過個半月，但乳房積水消退後肌肉變硬，形狀更是一舊一舊，明明是在乳頭的上方切去腫瘤，卻是連乳房最底部中央都凹了入去，請問是否有問題？做手術的醫生說無問題，其他醫生卻說不常見或不明原因。由於電療後肌肉會更硬，是否乳房永遠都是這樣怪形狀？有方法補救嗎？
凹咗係因為切除嘅組織多，餘下缺損大，除咗外觀問題其實唔影響健康。
之後有可能慢慢會鬆D，當然未必去到你理想的形狀。等一年半載停落嚟之後，如果唔滿意，可以考慮揾整形科醫生打脂肪令佢脹返。
你好，因近期未婚妻檢驗後發現有2.2cm浸潤性導管瘤，但因她不希望留有明顯疤痕。請問局部切除是否一定要在胸上開刀，不可在乳暈邊位置開刀以避免看到明顯疤痕？ 因她希望日後能穿婚紗和泳衣。
以及手術後是否可注射脂肪補回該空間？
不一定要在胸上開刀，如果情況許可，可以收藏在乳暈邊。術後可注射脂肪，但亦有相關問題。
可了解有什麼相關問題嗎？
打落去嘅脂肪可以壞死，之後可以硬如石頭，另外可能影響之後造影，成日都話有D可疑陰影，虛驚一場。
請問invasive breast carcinoma, distance to margin: superficial 1mm.
1mm 是否太少要再做手術切多啲？
侵蝕性癌都夠，如果係原位癌就唔夠。