乳房抽針檢查 － 乳房檢查三步曲3
終於黎到乳房檢查三步曲既終章－乳房抽針檢查。
你成日上網見呢個話抽粗針化驗，嗰個又話抽幼針化驗，而你個醫生又叫你直接做手術喎，咁邊個先啱？
今次同你逐一探討⋯⋯
乳房抽針檢查
醫生同你講：「你生癌呀⋯⋯」都未講完，你已經話：「醫生你肯定？有冇搞錯？」
醫生同你講：「割出黎係良性纖維瘤咋⋯⋯」都未講完，你已經話：「吓，唔係癌黎㗎咩？」（唔生癌，都好似好失望咁）
「究竟醫生點解可以咁肯定我生癌？」
「究竟醫生點解手術前唔預計好啲？」
種種心裏嘅問號，印證出抽組織化驗的重要。
「咩係抽組織檢查？」喺大部份情況下都係泛指抽幼針／粗針，少部份情況下，可能要動用到手術去達到確診目的。
幼針（Fine Needle Aspiration）
顧名思義即係支針好幼（約1mm，用平時抽血啲針），因為支針幼，所以係冇局部麻醉藥嘅，因此會少少痛。外科醫生就係透過幼針來來回回吸啜乳房細胞，再由病理科醫生喺顯微鏡底下作出判斷。
抽幼針有5個可能性（由C1到C5），詳細係咩黎可以參考乳房水囊／水瘤－有冇危險㗎？，裡面有詳細講。
粗針（Core Needle Biopsy）
顧名思義即係支針粗啲（約2mm），因為支針粗啲，所以係會比局部麻醉藥嘅。打麻醉藥時少少痛，之後唔痛。粗針既好處就係可以攞多啲組織，等病理科醫生易啲判斷，因此可以分辨出癌細胞有冇侵蝕性，同埋癌細胞對口服藥／標靶藥夾唔夾。
伸延閱讀：乳癌治療時間 － 我需要用咩方法醫？2
直接做手術？
「點解唔直接做手術，要抽組織先？」
係公立醫院，99.99%情況下都一定要有組織報告先會同你做手術，因為有好嘅術前診斷，醫生先可以幫你諗割幾多／洗唔洗做格勒底淋巴手術／術前洗唔洗化療。你可以睇成醫管局怕你告佢做錯手術，但另一方面，亦都保障咗你唔會做錯手術，做錯咗點賠返個乳房比你。
係私家個情況又係點呢？去到私家，樣樣都係錢，幼針要＄3000-4000，粗針要$4000-6000。你係病人，如果冇保險，手頭又唔鬆動，真係想唔抽組織直接手術。私家醫生呢，就會憑經驗決定跳唔跳過呢個步驟，所以仲有私家醫生會同病人做啲「加減手術」。
「咩喺加減手術？」
即係好似你去餐廳食飯，叫廚師（醫生）發板，食啲咩？自己都唔知。常見嘅加減手術「局部割＋急凍切片＋／－全乳房割＋／－前哨淋巴＋／－全淋巴切除＋／－乳房重整」，你亦都可以叫佢做「扭蛋手術」，因為扭咗隻咩蛋？（做咗咩手術？），扭咗（做咗手術）先知。唔喺人人都承受到訓醒醫生先講比佢聽冇哂成個胸嘅結果（心理上），或者承受到要埋張六位數字賬單嘅痛（荷包上）。
我應該抽咩針？
「Breast HK，我都係聽你講抽組織檢查先，不過抽幼針定粗針好呢？」
1）後生（30歲以下）／懷疑良性既：幼針就夠
2）上年紀嘅／可疑嘅：直接抽粗針（因為就算幼針話係癌，你都要再抽粗針去確定有冇侵蝕性，同埋同啲藥夾唔夾，所以幼針可免）
有晒呢三篇／呢三個環節，醫生可以百分百話你聽你有冇／有咩事，良性惡性都好，之後就進入治療階段。
下一篇，未去講乳癌點醫之前，要先補充返乳房檢查三步曲1中提到嘅患乳癌高危因素，想知自己係唔係高危，密切留意⋯⋯
相關醫學專欄：乳房檢查三步曲－幫你分辨良性惡性的利器
香港乳癌及乳病治療中心 
Mammogram & Ultrasound Both Breasts
Both breasts have dense glandular content that decrease sensitivity of mammography.
No abnormal soft tissue density or any architectural distortion can be seen in both breasts.
No suspicious clustered microcalcifications can be detected. Two small benign calcifications are present in lateral part of right breast with no association soft tissue densities. There is no abnormal skin thickening and both nipples are not retracted.
Benign looking lymph nodes are present in both axillae.
Transverse and longitudinal ultrasound scans are made through both breasts. III defined hypoechoic lesion is present at 10 o’clock position of right breast 3cm away from nipple with size: 0.7×0.8×0.6cm. Mild distal acoustic shadow can be seen behind this lesion and feastures are classified as indeterminate.
Another ill defined hypoechoic lesion is present at 4 o’clock position of left breast 2 cm away from nipple with size: 0.7 x0.5 x0.2 cm. Mild distal acoustic shadow can also be seen behind this lesion and this is also classified as indeterminate. Mammary ducts of both breasts are not dilated and no architectural distortion can be seen. Retromammary fat is not distorted.
Comment:
0.8cm hypoechoic lesion at 10 o’clock position of right breast and 0.7 cm hypoechoic lesion at 4 o’clock position of left breast show ill defined borders and they have features classified as indeterminate (BI-RADS 4 lesion). Follow up biopsy of these two lesions will be helpful for further assessment.
No suspicious clustered microcalcifications can be seen in both breasts.
已見了一乳腺科醫生, 他建議做手術切除腫瘤, 立即做化驗, 如果是惡性會再切淋巴才離開手術室.
看了你的文章, 知道檢查三部曲, 請問是否不需做抽針而直接做手術呢?
這樣做有何優點及缺點呢? 十分感激Breast HK能抽空解答, 謝謝。
呢D就係我上面所講嘅加減手術。你問我，我會建議你朋友唔好咁心急直接做手術，做咗超聲波抽粗針先比較好。咁樣做唔係希望第時唔洗做手術，而係要做手術嘅時候，已經做足周詳準備。
先講缺點，直接做手術割咗粒野去，簡單黎講有2個可能性：
1）良性
2）惡性
一覺訓醒，醫生話你知係良性，你好自然會問「咁點解開初要割咗去？割咗去有咩著數？？」
相反如果係惡性，有幾樣麻煩：
1）手術中途即場化驗嗰D叫急凍切片（Frozen section），呢樣野唔係百分百準確，有三個問題可能遇到：
a）如果搞錯良性係惡性，就做錯手術。
b）如果搞錯惡性係良性，就要翻手做第二次補救手術。
c）就算真係正確斷定惡性，有時係好難分辨原位癌同侵蝕性癌嘅，一分錯就做錯／做多／做少淋巴手術，割錯淋巴係可以搞到第時手腫嘅。
2）粒野咁細粒，多數局部割，如果係惡性，即係兩邊胸口要電療，你朋友手術前知唔知道／接唔接受呢個可能性？
3）如果真係惡性要做淋巴手術，但由於手術前冇做定準備工夫（打定放射性物質），只可以做全淋巴切除（大D機會淋巴水腫），或者只用藍藥水做前哨淋巴（準確度／成功率冇用晒兩種追蹤咁理想）。
你問咁樣做有咩優點？只可以話一站式服務，手術後訓醒覺「希望／有可能」搞掂咗個問題，好似好爽手咁／慳咗抽粗針錢。不過如果你遇到以上任何一個問題，係好大機會搞喎咗，行錯棋。
另一方面，如果你揀抽粗針先，成本就係幾千蚊同幾日時間。如果報告返黎良性，你有可能可以避免手術（風險／費用）。唯一難度就係左邊四點鐘嗰粒比較細，對醫生嘅經驗／技術有一定要求，有可能抽唔中。
十分感激Breast HK又快又詳盡的答覆，我朋友已預約另一專科醫生診斷再作決定，感激，謝謝！！
Breast HK：
我們仍有一疑問：聽聞如果做抽針抽組織，假如真是癌細胞的話，會加速擴散，請問這可能性大嗎？謝謝！
理論上黎講有呢個風險，實際上我地臨床見到就非常罕有。
傳統黎講，我地覺得癌細胞係有可能會經抽針路徑／管道擴散去乳房其他部分（呢D我地叫needle tract seeding），即係好似hi污糟咗咁，所以抽針時應該要／已經計劃好個路徑，好等我地做乳癌手術時，可以一併切除乳癌加埋路徑（即係抹返乾淨），將呢個理論上風險都清除埋。
不過當我地醫乳癌嘅經驗越來越多，會發覺原來唔切埋個路徑，都冇增加復發／擴散風險，慢慢D醫生就會根據個人經驗，先決定割唔割埋個路徑。
點解hi污糟都冇事咁神奇呢？有幾個可能性：
1）原來走咗出黎嘅癌細胞根本獨立生存唔到，即係冇污糟到。
2）如果之後全乳房割除，即係清理埋D污糟啦。
3）如果之後局部切，術後係要搭電療嘅，電療會清埋呢少少污糟。
有興趣知多D，可以去睇吓證據：
http://www.ncbi.nlm.nih.gov/pmc/articles/PMC3043430/
http://www.ncbi.nlm.nih.gov/pmc/articles/PMC3473763/
想簡簡單單嘅，結論就係抽針冇影響到多D擴散／復發，放心去抽針啦。仲係好擔心嘅，搵個豐富經驗嘅醫生幫你抽，一早計劃好個路徑，第時有需要時就一併切埋，咁就萬無一失，理論上風險都冇埋。
感激Breast HK的詳盡解釋！
我朋友現正約見另一醫生，希望她作出正確的選擇 ，最希望她的結果是良性的。如果是良性的話，是否不需做手術，只需定期檢查便可？
不好意思，太多問題了，謝謝！
好視乎你講良性「什麼」。一般黎講良性嘅病變大部份情況係唔洗做手術。當然好多例外，例如：
1）良性嘅葉狀腫瘤就一要做手術
2）抽針話良性，但造影檢查話可疑，可以選擇做手術
3）大得好快／有病癥嘅乳房纖維瘤都可以做手術
4）自己係良性，但附近可能有癌嘅病變都要手術，例如sclerosing adenosis
你朋友有可能落入第二個可能性度。但實際點做，要睇出黎個報告先知。
請問為什麼葉狀腫瘤一定要做手術？這與乳腺瘤有什麼分別？是否癌變機會風險較高？
請參考乳房葉狀腫瘤 － 究竟係咩黎㗎？ 。
Breast HK,首先感謝你這個網頁,做得很好!
我有一個問題,希望能幫助我。我媽媽一年前患上第三期乳癌,做了完全切除手術,及割除十多粒淋巴,已完成電療及化療,現在服用抗荷爾蒙藥。 最近到按摩店按摩了15分鐘頸部,之後幾天都覺得頸部很痛,更發現後頸位置腫大了很多,她說沒有痛,她又希望等到25號覆診才告知醫生。我現在十分擔心及不怎樣做, 我擔心出現病情轉移…Breast HK, 希望你可以給予意見, 萬分感謝!
身體自己發現有變化，早D睇醫生現場檢查方為上策，網上可以幫嘅著實唔多，只好盡量答：
1）今日7號，25號見到專科醫生已經好快（政府醫院嘅話，已經早無可早添），有轉移就有轉移／冇轉移就冇轉移，早十幾日定遲十幾日對整體方向／治療冇大影響，唔好過份擔心。
2）時序上，聽落去係短時間頸部「突然間腫大」咗好多，聽落去唔係太驚，因為頸淋巴轉移唔係咁嘅，通常都係慢慢大，雖則你媽媽可以係「突然間」發現頸「慢慢腫大咗」。
3）位置上，唔太肯定你講後頸係指咩位置。頸淋巴轉移通常都係鎖骨對上位置受影響先（大概膊頭嘅水平），之後先慢慢影響再上D嘅淋巴。所以如果「後頸」你係指頸背脊方向（尤其係左中右嘅中間部分），就安心D唔似有事。
不過最後都係重申嗰句「早D睇醫生現場檢查方為上策」。
Hi Breast HK:
我朋友卒之做了抽幼針（醫生話粒野咁細唔駛抽粗針）；報告結果係一粒有事一粒良性：-
1）FNA, right 10 o”clock breast shadow–interacystic papillary lesion, suspicious for malignancy (C4)
2）FNA, left 4 o’clock breast shadow–benign cytologic pattern(C1)
到時都係局部切，冷凍切片才知手術程度嗎？
Finally 都係要做手術，冇乜新資料！
你見我上面回覆係叫你抽粗針嘅，因為抽幼針會好似你而家咁，冇咩額外資訊比到你。記住，所有影象可疑嘅陰影都係要抽粗針，因為抽幼針會有以下可能性：
C1－inadequate for diagnosis，即係樣本唔合格，要再抽粗針。
C2－benign，但影象話陰影可疑，又係要再抽粗針。
C3－atypical cells，非典型細胞，又係要再抽粗針。
C4－suspicious，懷疑癌症，又係要再抽粗針去確診。
C5－malignant cells，有癌細胞，要分原位癌定侵蝕性，都係要抽粗針。
你會見到，如果影象係可疑嘅話，無論幼針結果係點，其實幫唔到件事，你朋友正正就係呢個情況。
右邊10點嗰粒係C4，但我地未確定係癌／就算係癌都唔知有冇侵蝕性，照正就未做得前哨淋巴住。
左邊4點嗰粒係C1（有D系統係計良性），不過影象可疑，醫生都係唔信冇野，又建議要做手術。相反，如果粗針係良性，就可以揀唔做手術。
既然唔抽都抽咗幼針，手術都係要做㗎喇。公立醫院就會只切嗰2粒野先，到正規病理報告出晒先決定做唔做淋巴手術。私家呢，有可能叫你做「加減手術」。
攞哂貼士排左幾個禮拜先去見這名醫，我朋友話個醫生二話不說就同佢抽針，我朋友已經好醒咁問佢係咪抽粗針，但個醫生冇理佢，照抽幼針。要$7000.
今天去見醫生，都係話要做手術，如果要做埋電療同化療大摡90萬。
我朋友仍未決定下一部。
錯不在你／你朋友。你地已經做足準備功夫，溫晒書先去見乳癌名醫。不過面對權威嘅建議，一般人少D定力／知識，都幾難抗拒，呢D就係所謂「肉隨砧板上」。90萬唔係一個細數目，希望D錢用得其所。
所以真係好感激Breast HK set up 呢個平台；讓多D人知道多D有用嘅資訊。我朋友對於這位名醫及診所姑娘的態度都很不滿意。在病人最無助的時候，希望獲得的信心同肯定都無法得到；這名醫同助手可能真是太忙了！她已決定唔會搵佢做手術。
你好, 我33歲, 未曾懷孕, 我一向乳房有幾粒纖維瘤, 第1次發現是18,9歲, 當時只有1粒, 切左, 係良性, 次後再CHECK都再有, 2邊加埋5粒左右, 最近去LAB做BODY CHECK又照胸, 今次發現有埋水囊, 醫生建議抽組織化驗, 費用2200蚊, 佢冇講係粗針定幼針, 但那個只是一個普通幫人BODY CHECK的化驗所, 都唔知果個係咩醫生, 我驚信唔過, 請問我是否適合抽粗針? 因為好貴, 我可唔可以睇個普通科轉介我去瑪麗抽? 但瑪麗會唔會等好耐都未有得抽?
抽粗針定抽幼針要視乎超聲波粒野可唔可疑，同埋大細。
當然可以由普通科轉介，等幾耐就視乎你個情況醫生覺得急唔急，同埋條隊有幾長。呢D野要你去排咗先會知。
謝謝你快速的回覆! 等我取左報告先, 再去睇普通科(私家/賽馬會)先.
Dear Breasthk,
原來你寫了這麼多好東西，我今天見了醫生，有一整個下午可以細閱你的資訊，不過我還未看完呢!
我幾可肯定在文章中沒有提及過相類似我的情況，所以又來煩你了，也希望如果有同路人遇到相似的情況也可參考下。
我的情況是，左胸有粒2CM的TUMOR, 我是抽幼針後被要求做造影的，病理報告話有可疑，造影報告話有可能惡性，所以醫生話要做手術取出腫瘤再做化驗先知惡不惡，醫生說病理科醫生表示無法靠抽針知道是否是癌細胞，就算是切割出來的，也不可能只做冷凍切片即驗，要靠做什麼”立”封的，醫生已說明了有可能要做兩次手術。
我想請問我的情況複雜嗎?到目前為止，還不能說是惡性當然好，但似乎我要硬食這次手術….
情況唔係好複雜，抽幼針話可疑，估計係C4 cytology（suspicious of malignancy），而造影報告都話可疑，咁點都要做手術㗎喇，不過方案都有兩個：
1）先抽粗針去確定有癌細胞，之後先做一次手術搞掂。
2）直接做手術攞佢出黎，不過之後可能要翻手做多次手術做清佢。
一般黎講，會揀方案一。至於會唔會方案二好D，就要睇返臨床上嘅資料先知。
Dear Breasthk,
我想了又想, 都係唔明, 點解你會話一定要做手術呢?如果舊野唔係惡死，我可以同佢共存架喎，我好包容架，都同佢相處左好耐。
所以想問一下，是否有些情況其實是抽粗針都無法斷症的呢? 我粒野成2CM, 抽一定抽中，上次醫生用幼針都抽唔少組織出黎架。你上文都有提到”「咩係抽組織檢查？」喺大部份情況下都係泛指抽幼針／粗針，少部份情況下，可能要動用到手術去達到確診目的。
咩會係個少部份情況呢? 好迷啊~~
你嘅疑問好合理，2cm冇錯係唔细，抽都一定抽得中（不過抽得中唔等如抽得囇），咁點解我會話一定要做手術呢？帶你睇吓故事之後會點發展：
假設你抽咗粗針，病理報告出黎只有兩個可能性：
情況一：報告確診有乳癌，咁你好自然要做手術切咗去啦。
情況二：報告話良性冇毒，咁我地信唔信佢好呢？
情況有如機場安全檢查，目測個旅客就好可疑，X光機都話件行李有野，好喇，保安打開個袋，抽幾件物品出黎冇可疑，咁你信目測同X光機要檢查清楚佢？定信幾件物品冇野就放佢走吖？合理做法當然係打開曬成個行李，所有物品都要睇清楚，先敢放佢上機。
你而家抽幼針可疑，X光機都話乳房可能有野，好喇，醫生抽粗針，抽一部份組織出黎冇可疑，咁你信幼針同X光機要檢查清楚佢？定信粗針部分組織冇野就算數？而家講緊癌症，係一D唔可以錯嘅野，合理做法當然係開刀打開個乳房，成舊野切咗去，真係冇野先敢放你走。
呢個就係我講手術差不多無可避免嘅原因。當然最終選擇權喺你手，你可以清楚曬風險之後都選擇信幾件物品冇野就放佢上機（信粗針冇野就唔做手術），後果當然要自負。呢個處理方法唔代表嗰個乘客一定會劫機，不過喺機場安檢（醫生）嘅角度，呢個係一個明顯漏洞，上得山多終遇虎，出咗事醫生係賠唔返條命比你的。
我媽媽都開始就快做抽粗針手化驗, 你話抽粗針來化驗, 話良性都信吾過, 咁即係抽粗針未必準確?? 一樣都要做手術, 咁不準確, 我們抽粗針化驗來做什麼?? 吾太明白
我冇講過「抽粗針來化驗, 話良性都信吾過」，信唔信得過視乎每個人獨立情況，唔好一概而論。之前講「信唔信得過？」係講緊造影同抽針結果有分歧時（radiological-histological discrepancy），我地要考慮誤差呢樣野。
抽粗針未必準確，呢個冇理解錯，抽粗針係一個採樣（sampling），可以有採樣誤差（sampling error）。
「一樣都要做手術, 咁不準確, 我們抽粗針化驗來做什麼?? 」嗰「咁不準確」已經理解錯，我地抽得針，就相信佢大部分情況下都係準確。就算已經準備做手術，大部分情況都會建議先抽針先，因為要決定切幾多，切幾多紙口位，洗唔洗切淋巴。
明白明白，多謝你詳盡的回覆，人有時係會想自欺欺人嘅, 又俾你睇到的我的弱點添!
請問係邊d 地方先有得抽粗針？我外科醫生話佢只抽幼針，我打去幾間化驗所又只得幼針。其實粗針係由放射科醫生抽定外科醫生？
粗針通常都係外科醫生（乳腺科）或者放射科醫生抽。外科其實仲有分係咪做開乳腺科，一般外科醫生未必懂得如何抽粗針，因為唔係做開。你可以去搵做開乳腺科嘅外科醫生抽，或者放射科醫生抽。
化驗所內的就係有放射科醫生，但佢地仍然同我講只得幼抽….
可能是設備問題，或者商業角度／成本效益問題。
你好,想問如果懷疑病人可能患上乳癌/或其他癌,為何不建議直接照CT scan,而是做其他檢查,如果真係癌,才照CT scan?CT會否快點斷症?
另外,有家人發現乳房有硬塊,醫生說要觀察一段時間,暫不抽針,一直到了硬塊變大擴散至淋巴腺,給她才抽針. 為何醫生不即時為硬塊抽針?
感到很混淆.
多謝解答
CT scan 係將成個身體縮細成一格菲林，相反顯微鏡係將細胞放大幾千倍黎睇，你話邊個高清邊個準？所以癌症一律以抽組織係顯微鏡底下睇為之確診，此乃黃金標準。
如果有乳房硬塊，當然係做齊乳房檢查三步曲，抽針實不可少。
您好，媽媽已在私家抽針，說是非典型細胞，公立醫院排左個期一個月後再抽粗針，公院醫生本來話可以選擇做微創吸個1.16cm腫瘤出來驗，或者做手術拎出來驗，但最後決定仍然抽粗針，因為我媽咪擔心會是同邊復發（超聲波BIRADS4-5，之前9年前her2+ Er+ 1.9cm局部切除加前哨淋巴兩粒,無淋巴擴散，只做電療冇做化療，現在61歲）,所以媽咪都有同醫生說接受到進取方法全左邊乳房切除及全淋巴切除，即使有機會是另一個癌（原位癌）都接受到全乳房切除，但姑娘解釋他們須要數據才做手術，而上次私家可能用支無咁粗嘅粗針，今次公立x光醫生會用支粗啲嘅粗針試，而我媽媽一定希望在公立醫院做手術。。請問現階段我仍然可以帶媽媽做什麼檢查幫助了解果個係咩呢？我自己非常擔心她係入侵性癌，而浪費了時間等，但媽媽硬頸程度是我和爸爸都無辦法勸到她去私家(正如您的文章，私家建議手術過程中急凍切片後決定割幾多)，PET公立醫院腫瘤科及乳腺科都不寫轉介信去照，所以想了解我可以再做什麼呢，謝謝您，等待回復。
可以去揾私家醫生安排照PET scan。
超聲波報告顯示乳房硬塊是良性，醫生建議可抽粗針進一步確定，要局部麻醉抽針。我現在懷孕，中期懷孕，請問可用麻醉藥嗎? 怕影響肚內嬰兒。
其實孕婦用局部麻醉藥係安全的，不過如果擔心對胎兒有影響，何不生完先抽針，超聲波話良性又唔急的。
醫生話喂母乳時吾建議抽針，因乳房改變太大。我想喂母乳，等BB出世，再喂一年母乳,最快一年半才抽針。好似等太耐了，怕到時trace吾到。
有呢個疑慮，咁可以選擇照打局部麻醉抽粗針，或者抽幼針去避咗麻醉藥。
您好，我近年29歲，未曾懷孕。我一月果時乳房有硬塊去做超聲波，個報告話 hypoechoic lession in right axillary region, measuring 0.7*0.5*0.7 cm could be abnormal lymph node as no fatty hilum identified. Other possibilities include fibroadenoma/cyst with viscous fluid. 建議做FNA of this lession. 不過現在個硬塊已經消失左。今天公立醫院個外科醫生話個組織太細，很難抽，叫我下年二月再去做一次超聲波再去抽，請問等咁耐怕不怕的，有無必要自己去私家醫生度做FNA？Thx very much.
邊個話消失咗？自己？醫生？
唔好意思啊，用詞不準確，應該系摸唔到
粒野咁細誠如你醫生咁講係難抽嘅，覆照我都同意，至於時間上，如果有錢當然去私家早D照，冇錢等公立2月耐就耐咗D，唯有自己留意身體有冇變化。
你好, Breast HK,
上星期五, 我係私家醫院做左乳房超聲波, 超完之後醫生話發現我右邊胸搵到一粒少於1cm的野, 要再用幼針抽出來化驗是什麼。之後化驗報告出來如下, 望請可否解釋我而家的狀況係唔係有機會係癌? 個時抽組織出來時, 個位放射科醫生話係一些膿, 仲問我是否曾經乳腺發炎, 而我都回答他是, 那時我餵人奶時曾經乳腺閉塞發炎, 之後好返.
Clinical Summary & Procedure : R Breast 3H lesion x FNA
Cytological Diagnosis:
Right breast lesion, R3H, USG guided aspiration cytoliogy
– Atypical aspiration pattern (C3), probable cyst content
– Cannot ruled out possibility of necrotic tumor centre
Microscopic Examination:
the aspirate contains numerous macrophages, some nulcear dusts, cytoplasmic fragments and proteinaceoius debris in cytospin and cell block sections. Sheets of granular microcalcification are also found. There is no diagnostic malignant cells. No epithelial elements is present in the aspirate. There is no inflammatory cells or epithelioid granulomas. the aspirate represents an atypical cytogical pattern. It may represent breast cyst content but possibility of an in situ neoplasm with necrotic tumour centre and calcification cannot be ruled out entirely. Correlation with clinical and radiogical findings is suggested, Histological diagnosis may be rendered if there was clinical and radiological suspicion.
謝謝你的回答及幫忙!
C3 cytology即係代表有D非典型細胞，雖然可以係發炎，但始終唔能夠完全排除癌的可能性，所以下一步好多時都係抽粗針去確定有野冇野。
Breasthk 你好，
我媽媽72歳，她患糖尿病近30年，去年開始腎衰竭，決定不洗腎，正在公院接受紓緩治療。10月發現一邊胸有腫塊（之後report話3cm)，外科醫生一摸就話是乳癌，第二天即入院半天抽針，2星期後造影及ultrasound，抽針報告先出，話不是惡性，但造影和ultrasound 就話十分可疑，姑娘打來要提前覆診和醫生商量，因家母身體差，如不是十分肯定是惡性就不想她冒險去做手術，請問是否應再抽多一次針？（因姑娘話可能之前抽的位置不對），或另有建議？
糖尿病洗唔洗打胰島素針？因為如果長期一型糖尿病，有一種唔常見的良性情況叫糖尿乳腺病（Diabetic mastopathy），佢無論臨床檢查／乳房造影都好似乳癌，偏偏就係抽針話冇癌（因爲佢本身都唔係），個病理報告?面可能有D端倪會寫lymphocytic infiltration，你可以睇吓個報告／問下醫生呢個可能性。
第二個可能性就係姑娘咁講，真係有癌不過抽唔中，不過3cm咁大抽唔中嘅機會實在不大。
如果唔想倉猝做手術，下一步合理做法係再抽多一次針。
Million thanks for your reply!
是的，已打胰島素多年，及長期食血壓藥、阿士匹靈等。
很開心遇見良醫。過去30年，陪母親見過不少公、私醫生，每次遇上有醫德有良心的醫生真的很感動?
Hi Breast HK,
我媽媽剛在公立醫院聽報告，X光見到2個鈣化點，叫佢排期抽幼針。當時未有深入了解幼針同粗針的分別，所有未有進一步問醫生是否根據報告認為是良性故抽幼針足夠。
我想了解一下公立醫院是否會按照情況建議幼針或粗針?抑或可能成本等考慮一律建議先抽幼針? 我是否應叫媽媽到私家醫院直接抽粗針? 因現時排期須2個月後才有期抽幼針，屆時未可確認或須再排期抽粗針須時太久。先謝謝你網頁的資訊及解答。
按道理就係根據情況建議幼針定粗針，不過X光導航（stereotactic guided）下抽鈣化點一般都係抽粗針，唔會安排抽幼針，唔知你有冇聽錯醫生建議。
去唔去私家抽，主要睇錢，有錢就去，冇錢就唔去。
BREASTHK !
你好!我想問下, 我半年都會定期去超聲波檢查胸部。
今次超聲波, 醫生話有粒新嘢,個樣唔靚仔。叫我抽幼針。
個報告話:
MICROSCOPIC EXAMINATION:
Cellular aspirate showing groups, nests and single epithelial cells with slightly enlarged nuclei with scanty cytoplasm. In some of the sheets, myoepithelial cells are seen.whereas in others. no myoepithelial cells are identified. The background shows similar single cells with oval nuclei. The features are mildly atypical. Proliferative lesion is more likely.
DIAGNOSIS:
Left breast 12H aspirate: Atypia.
跟住醫生就好緊張叫我去描粗針。而家等報告中!
想問下, 係CANCER個機會大嘛?
幼針都係話mildly atypical，有事機會唔大，抽埋粗針更穩陣。
你好。本人居住韓國，36歲，剛生第二個小孩，目前10個半月大，餵母乳至9個月大。今天做了乳房超聲波檢查，由於是小型醫院，醫生看了結果建議我到大型醫院，再由該院醫生判斷是否需要抽組織檢查。
他寫的轉介信中是這樣描述的：
7×9.5mm oval slightly hyperechoic lesion with surrounding sonolucent halo & some flow signal.
旁邊加上C4A
請問上述描述，可以判斷癌症的機率大嗎？
如果講BIRADS 4a，癌症機率大概2－10％。
請問我早前做左抽針（幼針）
報告話我有非典型細胞
究竟係咩呢？
有無需要做手術？
參考返乳房水囊 ／ 水瘤 － 有冇危險㗎？，即係文中的C3 cytology。下一步一係抽粗針，一係做手術。
醫生你好！我媽琴日喺公立醫院做咗粗針檢查，大約要到5月中先有報告，愈諗愈覺得應去私家先完成所有檢查，再返公立做化療，如果我下星期再帶我媽去私家抽一次針，出報告後有機會要照埋PET，再將所有檢查報告攞返去公立，會唔會可以buy返少少time？同埋想問抽多一次粗針會有風險嗎？謝謝！
追唔追得到視乎你最終係邊度開始治療。假設星期一見到私家乳腺科醫生，再抽針，兩日後星期三出報告，即係26號可以開始治療，咁相比5月中先有報告，可以快兩個幾星期。但如果最終都係返去公立做治療，你齊曬野佢都唔會早見你，咁最多只係偷咗步做PET，即係只快一星期，咁就分別冇咁大。
抽一次針同抽兩次針面對的風險係一樣嘅。
Hi Breast HK, my mother diagnosed with breast cancer Stage 2 at 67 years old. I’m 43 years old but never had a mammogram. Do you think mammogram is reliable to detect breast cancer ??? or I have to ask for breast ultra sound together ?? I heard a new method called automated breast ultrasound, do I still a mammogram with this new method ?? My mother had a lump in her breast but mammogram cannot detect so the doctor ordered breast ultrasound and biopsy to find out that she has cancer. I think maybe I can skip mammogram and go to breast ultrasound directly, what do you think ??
Depends on the breast density, the sensitivity of mammogram for detecting cancer ranges from 50% to 90%. If we do ultrasound at the same time, the sensitivity will be boosted up to 95%. The sensitivity of ultrasound on it own is just 70-80%. So the quick answer will be mammogram and ultrasound at the same time for women aged 40 or above. Automated breast ultrasound is not a validated method for detecting cancer, so should be used with caution, and we won’t rely solely on it.
你好，做了抽幼針，報告如下：
Cytospin preparation of the left breast aspirate at 6:30 oclock position shows a number of ductal epithclial cells in sheets, fragme and Some of the clusters are loosely cohesive but there are no epithelial cells in dehiscence.The larger fragments have two cell type differentiation Abundantspindiccells are noted in the background together with some naked nuclei ormyoepithelial cells and fibrous stroma.The features are those of a ductal proliferative lesion with realures in favour of an intracystic papillary lesion.For these lesions, excision for full histological examination is recommended
想問是否一定要開刀攞出黎驗是良性還是惡性，因為是來經期前2天抽針，會否有影響需要再抽再驗，如不做手術，可抽粗針再驗嗎？需要再找乳腺科再驗一次嗎？想問有沒有其他建議。謝謝
如果懷疑intracystic papillary lesion，就應該做手術去搞清楚。
經期唔影響抽針結果。
至於可唔可以再抽／需唔需要複驗，要見過評估過先知。
Breast HK 您好
醫生您好
1. 我太太今年47歲, 在今年5月在私家化所做左乳房造影及超聲波, 發現有結節及鈣化.
2. 然後把報告交了去公立醫院排期.
3. 在8月25日見完醫生再排期到11月20日才抽粗針.
問題: 3個月後才抽粗針怕唔粕太遲?
報告寫我太太係BIRADS 3, 為何要抽粗針?
除了等之外有什麼建議, 謝謝幫忙.
心急人Billy上
3個月當然唔理想，但係咪太遲就取決於最終係咩病變。
BIRADS 3 誤診的機會為2%，所以抽埋針就再穩陣D。
唔想等就只可以選擇去私家抽。
醫生, 多謝答覆.
可否send份報告給你們看看, 有没有必要去私家抽.
因本人是基層人士, 没有太多積蓄.
一般私家抽粗針約幾錢?
診所三千，醫院六千至一萬。
唔喇，個人能力滿足不了眾多個人化建議的要求。
知道, 唔該
請問可否提供抽粗針的診所資料?
http://www.hkbreast.com
Dear BreastHK 醫生您好,
家人兩週前抽針的結果確診了是乳癌,
我們提問過類型及有無可能用標靶, 醫生說標靶對應唔到, 只說是最普遍的乳癌和不是最惡也不是最溫和, 已決定月尾做全切同時驗埋淋巴。 醫生也有很快速地提及手術後有機會要做賀爾蒙治療或化療, 但那時腦袋一片空白沒有問得更詳細了;_;
請問這種最有可能是哪一型？等一個月會否太久了？家人已七十多歲，恐怕不能讓她受化療之苦。
感謝您閱讀及為我們解答！
最有可能係荷爾蒙受體陽性乳癌（管腔B型）。經濟許可的話，就去私家做唔好等，一生人唔係好多機會可以用錢買健康。經濟唔許可就冇辦法局等。
醫生謝謝您快速回應. 之前照完係1粒, 大概是在2cm以內, 我們完全無經驗, 請問驗淋巴+全切手術在私家預估全額是幾多上下？
10萬。
你好，我想問下醫生話我係纖維瘤，個未做三部曲。醫生直接refer 我去公立醫院抽針，我23歲，我需要自己去做超聲波嗎？個瘤約5mm ，我很擔心，我可以點做
5mm好細姐，就算抽針都有難度。唔介意等的，就等公立。心急如焚的就去私家。
需要confirm 良或惡性嗎？ 等等下會唔會變左惡性？很怕是乳癌
當然最好確認。你咩檢查都未做，冇人講得實等唔等得。
明白，謝謝你。
你好，
謝謝有關資訊。
我最近照 ultra sound 發現1粒瘤 (2×3×3 mm) BI RADS Category 3。 醫生建議6個月後再照睇下有冇變化，其實需唔需要抽針呢? 同埋咁細粒抽唔抽到呢? 謝謝。
咁細粒極難抽，觀察一下6個月再照已經ok。
Thank you very much.
Dear Breasthk,
首先感謝你這個網頁,令我認識到更多information關於乳房檢查
本人35歲，心臟本身有事，不太適合麻醉手術，情況是左右胸一直都有水瘤，係私家檢查及覆診左7-8年，一直都係做Ultrasound為住，因醫生建議觀察住先，但上年年尾有一天發現右邊乳頭流血，檢查後醫生建議去公立乳腺導管測試（因不用全身麻醉及私家沒有相關檢查），之後今年初排期後公立那邊說乳腺導管測試都是需要全身麻醉，之後做左Mammography 同 Ultrasound。
及後醫生話望落想抽粗針檢查，但檢查當日因又改回用幼針檢查（之後問返原因係因為本人太瘦驚支針插穿肺）。報告話我個瘤係C4，排左3個月後做手
術。同醫生話如果確診，就要之後檢測完睇下切得清唔清同其他因素先知是否需要再做手術。
現有以下問題想請教：
1）C4其實係咪都唔算太樂觀，因為我參考過一D網站同外國數據C4都幾大機會肯定係惡性
2）其實都有問過醫生會唔會抽埋粗針先決定點做，但直接做手術原因係因為本人太瘦驚支針插穿肺（本人170cm/110lbs）
3）因抽針時間同排期手術時間相隔3個半月，擔心如果真係中左會否延誤左醫療時間
希望可以解答一下如下問題，萬分感謝！
1）C4就係可疑，都大機會有事。
2）太瘦都唔會插穿肺，不嬲都係壓平支針入，唔會有呢個問題。
3）如果真係中，係延誤咗。
明白，謝謝你的解答。
可否有比較合適的方案可以採用? 我已經contact左私家等回覆，因公立果邊我估計我都冇方法問到早做或粗針檢查。萬分感謝！
合適的方法咪就係抽粗針搞清楚，或者早做手術。一個醫生冇信心抽，咪搵多個醫生睇下係咪抽唔到。
明白，謝謝你的解答。
因現在覆診左7-8年私家醫生因心臟本身有事叫我跟公立醫院手續做便可以(感覺是醫生不想承擔風險，難聽D講放我出去做，話連覆診都冇需要)。
即是我應該先找私家抽粗針搞清楚，再做手術? 因本人心臟問題，我都怕手術費用負擔問題。但明白公立的排期制度，不能要求時間快慢。
請問我應先找私家抽粗針找出問題，再決定下一步，還有如果私家抽粗針報告公立是否受理?
不好意思這麼多問題，希望可以解答。萬分感謝！
如果抽粗針真係確診癌症，公立手術可以排快D。
有質素的病理報告會受理，質素參差的會唔信。
感謝答覆!萬分感謝!
Dear Breasthk,
首先感謝你這個網頁,令我認識或可得到更多information關於乳房
我媽咪58歲、今年她一邊乳房表皮红，乳頭和乳晕皮肤紅色一達有些膿泡和乳頭些少凹陷，差不多半年至今年8月頭媽咪才告訴我有咁既問題，之后立刻睇政府門診，專介快期2星期睇政府乳腺專科（8月２３号見乳腺專科），我焦急帶左佢去私家婦科醫生度即刻pass比私家婦女化驗所度做左超聲波、造影和粗針抽取組織化驗，報告寫住：「浸潤性乳腺癌，型態傾向乳腺導管癌，鑑別診斷有浸潤性乳腺小葉癌，暫時評為修訂Bloom’s and richardson’s第二級」這個報告可以知道情況？請問這樣是屬於邊一類？定要抽埋血驗？（未抽血）而家好擔心政府等得耐吾耐做治療。。。吾知手術定治療行先
知道已確診乳癌，未知屬性（要係抽粗針的樣本加驗先知），抽血冇用嘅。
請問是另外一個項目的？佢又冇問我要吾要驗…咁咪又要再抽過？
唔洗再抽過，只要喺舊樣本加驗ER/PR/HER2
Hihi你好,
好多謝你詳細的文章令我認識了很多. 上星期去看了醫生,因為最近乳房摸到有個瘤好明顯(其實呢六七年來不嬲都話乳房有幾粒野,良性的,不過平時摸唔到的). 兩星期前仲又大又腫又痛,唔知係唔係發炎…. 上星期見醫生時佢初頭用超聲波睇話唔可以完全肯定係好嘅嘢, 所以叫我做X光同埋即時抽針. 睇完X光報告醫生話初步應該唔係癌細胞,但係要再抽針睇吓化驗報告點講, 因為始終果粒野都幾大, 摸落去感覺有2-3cm. 但係醫生話實質係超聲波度睇應該一點幾cm. 兩星期前有發炎嘅感覺時的感覺有成4-5cm 㖭呀,我自己都摸到,但係到我睇醫生嘅時候佢已經變返細,而且冇咁痛.
今日啱啱收到姑娘通知佢話醫生睇左抽針報告,話啲細胞有啲古怪. 冇話惡性定良性,淨係話要唔知點樣進一步再攞啲細胞去檢查, 要再等幾日等報告. 本來醫生叫我一個月後先複診,但係佢話可能要再早啲返嚟睇報告. 我即刻就好擔心,乜嘢為之細胞好古怪呢? 請問有乜嘢可能性呢? 我以為抽完針有報告就會即刻知道者冇事, 點知仲要再等….真係好驚…..
可能性太多了，冇可能遂樣講，等報告出先再作打算。
其實係唔係抽完粗針已經知係唔係惡性,如你上面說, 抽完針加驗係想check 屬性,屬於邊種cancer 而已? 還是有其他可能性都是抽完粗針要加驗的? 可能不是惡性呢? So worrying…..其實早幾日醫生睇完X-Ray報告佢話係良性的,有冇可能X-Ray報告係良性但係抽針發現係惡性? (姑娘好像在電話說細胞有點古怪時,說了是spindle cells,這其實是什麼呢?)
Thank you so much
加驗唔等如惡性，有時難分辨的情況都要做額外染色去搞清楚。
X-ray同抽針報告可以有出入。
Spindle cell lesion 可以良性可以惡性，所以要切出黎成舊驗先知。
你好,我想請教一下激素對BI-RADS 3類乳腺纖維腺瘤的影響.
我自2011年自摸發現乳房硬塊2粒，在私家抽了其中一粒粗針，證實是Fibroadenosis (Right 7H)。之後2013年發現左面有粒17mm x 6mm x 11mm,在私家抽了細針，說是良性纖維瘤 (Left 3H)。今年在KWH又全面做了超聲波檢查，針對R7再抽了粗針，醫生說是良性脂肪瘤。自2011年至2018年頭，所有醫生都說定期超聲波監測就可以了，不用手術。
但是現在我34歲，準備做IVF懷孕，生殖科醫生建議會診乳腺科醫生。我看了第一個乳腺科醫生，她說BI-RADS 3類乳腺纖維瘤，建議手術後再開始IVF，避免期間的荷爾蒙變化對令乳腺纖維瘤變化。之後我再看了第二個乳腺科醫生，她說促排針嘅激素遠比不上10月懷孕期間自身嘅荷爾蒙變化，即使你現在手術切除了纖維瘤，也不代表懷孕期間會不會有新的生長，既然你體內的纖維瘤都一直安靜地存在了這麼多年，就不要動它們了。如果真的擔心，就做一次3D MMG & Ultrasound 再排除一下cancer.
我現在都不知道該怎麼辦。究竟BI-RADS 3類乳腺纖維瘤會不會在IVF及懷孕期間的荷爾蒙變化變大變惡?我究竟該手術，還是該進一步檢查，還是定期超聲波檢查就好了?
希望醫生能夠給與我一些啟示，thanks.
如果真係乳腺纖維瘤，可以變大，不過唔會變惡。
已經見過兩個醫生，雙方睇法各有支持者，自己選擇好了。
好感激馬醫生回覆~~“如果真係乳腺纖維瘤，可以變大，不過唔會變惡”。這令我安心不少，其他醫生都是無楞兩可地回答我，讓我很不安。
1. 其實第一個醫生知道我好抗拒手術，她最後就跟我說，如果不想手術，就每三個月做一次超聲波監測，必要時手術吧。只不過她曾經說過建議手術，令我很懷疑我個人對自身纖維瘤原本抱有的監測態度……萬一乳腺纖維瘤真係變大,大過5cm,在懷孕期間,也可以手術吧?
2. 我之前一直都有抽針,超聲波監測. 因為我無最update的報告比第二個醫生睇.佢比左refer letter我去做3D MMG和Ultrasound.但佢覺得MMG吾係一個must…請問馬醫生,是否我34歲，再做多個超聲波已足夠，可以暫時不考慮3D MMG？
1）懷孕期間，要考慮埋BB安全，盡可能情況下都唔做手術。有時就算確診癌症，我地都會盡量拖到32-37週，開刀生埋BB先做乳房手術。
2）要視乎update嗰個報告結果先去做決定。
以下是我的病歷記錄。自2011年至2018年一直通過不同的乳腺科醫生，國內的，香港的，公立的，私立的，年輕的乳腺科醫生，稍有名氣的乳腺科醫生，一直USG監測著自身的乳腺纖維瘤，該抽針的都抽過了。退一步講，是否都很難誤判良性纖維瘤了？如果是，是否真的不需要太擔心，不需要再做3D MMG去排除惡性隱患？謝謝.
因為這個纖維瘤的問題，我已經推遲了IVF療程，不知道是否繼續進行。
日期 檢查 部位 大小 性質 醫療機構
16/4/2011 Ultrasound Right 11.6mm x 3.6mm x 5.9mm & Right 6.8mm x 3.5mm x 6.8mm Fibroadenoma HK
28/5/2011 Ultrasound & U/S Guided Right Biopsy Right(7H)10.8mm x 3.4mm x 8.6mm
Ultrasound Right (9H) 5.1mm x 2.6mm x 6.6mm Fibroadenosis HK Baptist
9/9/2011 Ultrasound Right 12mm x 4mm x 10mm & Right 9mm x 4mm x 8mm 纖維腺瘤 PRC
23//7/2012 Ultrasound Right 10mm x 4mm x 9mm & Right 7mm x 4mm x 8mm 纖維腺瘤 PRC
17/5/2013 Ultrasound Right 10mm x 5mm x 8mm & Right 6mm x 3mm x 7mm & Left 14mm x 6mm 纖維腺瘤 PRC
18/12/2013 Fine Needle Aspiration L(4H) 良性纖維腺瘤 HK
9/9/2014 Ultrasound Right 10mm x 4mm x 9mm & Right 8mm x 3mm x 8mm & Left 17mm x 6mm x 11mm & Left 5mm x 2mm x 4mm “BI-RADS 3類，
多發性纖維瘤” PRC
17/10/2017 Ultrasound KWH
8/1/2018 US Guided Breast FNA Right (7H) 脂肪瘤(有痛感) KWH
23/7/2018 Ultrasound Right(7H) 7mm x 8mm 3mm & L(3H)10mm x 13mm x6mm BI-RADS 3類 PRC
我唔想單憑你的文字轉述去做判斷，臨床檢查、睇片係我地做評估不可或缺的部分。我只可以話你提供的資料我睇唔到有令人擔心的地方。
明白,update的報告是超聲波? 即係最起碼要做個超聲波,再衡量下一步做吾做3D MMG? Thanks~
三個月內的報告已經夠updated。
Breast HK你好，感謝有呢個page可以分享好多有用的乳病資訊。
我今年29歲，現在懷孕23week。平時飲食作息都正常，無食煙，咖啡都少飲。2016年的時候覺得左邊乳房有些痛就去照超聲波，當時顯示左邊乳房有一個0.6cm的水囊，無其他問題。今年六月（當時懷孕未滿三個月）的時候覺得左邊乳房偶爾有些刺痛感去睇普通科，醫生用手摸過覺得無咩大礙，不過我為咗安心request要照超聲波。因為女醫師booking太滿所以拖到八月頭先做超聲波檢查，發現左胸11點鐘位置有一個大約2cm的腫塊，抽幼針檢查無惡性細胞。進一步去睇專科醫生，醫生就話幼針抽到嘅細胞唔多，而且我個腫塊嘅shape麻麻哋，於是又再抽咗粗針化驗。結果未出，但由於系孕中期，都系好擔心會影響胎兒及喂母乳。
請問如果結果系惡性細胞，系咪唔可以喂母乳？後續會有可能點樣去處理？
感激不盡！
唔好自己嚇自己住，抽咗粗針就耐心靜待結果。
剛剛知道結果，係良性纖維瘤，安心好多。
考慮到懷孕期間乳房變化好大，專科醫生叫我兩個月后返去複診照超聲波。
請問孕期纖維瘤變惡嘅機會高唔高呢？
纖維瘤唔會變惡的。
醫生你好,因為7月份的USG係在大陸做的，醫生不太認真。８月３１日我在香港又重新做１次USG,結果如下，
Right 7-2 8.8mm x 3.6mm x 6.2mm (stable) well defined, hypoechoic，Probably Benign
Right 9-4 6mm x 2.5mm x 6mm (stable) well defined, hypoechoic，Probably Benign
Right 11-2 4.1mm x 3.7mm x 4.3mm (new) well defined, hypoechoic，Probably Benign
Left 4-2 12.7mm x4.4mm x 12mm (stable) well circumscribed, hypoechoic, could be an area of fibroadenosis，Probably Benign, FNA done in Dec 2013-C2
Left 3-1 5.5mm x 3.3mm x 4.5mm (new) well defined, hypoechoic，Probably Benign
Left a few left breast cysts, largest one 3.5mm in size (new)
(1)憑以上判斷，請問可否確定是乳腺纖維瘤？因為由以往不同的報告裡面曾出現過Fibroadenoma，Fibroadenosis，纖維腺瘤，BI-RADS 3類， 多發性纖維瘤
，脂肪瘤，well defined, hypoechoic，Probably Benign的說法。是否其實說的是同一樣野?
(2) 如果係乳腺纖維瘤，可以變大。Left 4-2那粒size算大嗎? 在IVF & 懷孕的影響下，size倍增的概率大嗎?
(3)34歲的我，根據三部曲，以上檢查是否已經足夠，不需要3D MMG去排查其他不良因素？
Thanks~
不作網上斷症，請諒。
你好 ! 請問入侵性抽針檢查在短時間內可否重複做多次?
P.S本人約二十多歲
因為半年前我經私家做入侵性抽針檢查確診為良性纖維瘤(無變癌機會),之後希望定時檢查(現以服用中藥調理)觀察病情, 由於私家收費貴,因此想轉公立醫院檢查。
我朋友建議我當新症看,由門診轉介去專科,但不要告訴有關病歷。以免多番質問為何不繼續看私家檢查,這樣問題不大嗎?
謝謝!
不隱瞞不重覆做無謂的檢查，對你才是最好。好多人私家公立兩邊跟，醫生根本唔在意。
謝謝你的回覆~ 我知道了:)
不過我會先去門診睇醫生等轉介專科, 我需要攜帶有關病歷報告給門診醫生看?
最好。
你好,我今年56歲,本身有糖尿病,要打胰島素針已有3~4年,早2年發現左邊乳房近乳頭部位按下去有舊硬塊,不痈的,所以沒有理會,直到最近有些陰陰痈,是否已有病變?現在很擔心,請盡快回覆,謝謝你
有硬塊就要睇醫生搞清楚。
在私家醫院照左照聲波報告說極有可能是癌 ，轉介到公立醫院。一月二十九號再安排抽針。但醫生說排期要等兩個半月。
好担心病情惡化.醫生說到私家醫院要六位數字。負擔不起
乳癌手術私家埋單平極都要九萬幾蚊，負擔唔到真係只可以等政府醫院。
醫生您好，看了您的這個網站受益匪淺，了解了很多知識。
我想問一下我媽媽的情況，62歲，做了超聲波和鉬靶檢測，硬塊2cm,醫生歸類為4C，比較高懷疑是惡性腫瘤。然後醫生做了淋巴抽針檢查，報告說淋巴無癌細胞。
醫生說直接做手術拿掉硬塊，再看是惡性還是良性的。
但是媽媽有心臟問題，做過二尖瓣手術的，醫生有點不敢做，所以現在在暫緩期。
我想請教一下您，
1.在沒有做包塊抽針情況下，直接做手術切除包塊是否正確呢。這樣是否其實無法確定要切多少呢。
2.如果淋巴抽針沒有癌，是否表示就算包塊有，也是屬於比較早期的呢。
3.如果手術後發現是惡性的，那這樣直接手術是否會有一些優點或者缺點，正確的做法應該是怎樣呢。
謝謝醫生。
1）直接做手術唔係理想做法。因為如果手術後才確診癌症，媽媽便好有可能要做第二次手術。
2）淋巴抽針沒有癌不等同前哨淋巴沒有癌，所以唔可以推斷為比較早期。
3）直接手術只有缺點，沒有優點。正確做法為先抽粗針，才決定手術方案／幅度。
謝謝您的解答。
感謝您的時間。
你好醫生，我媽媽佢以前做心臟病手術做咗二尖瓣嘅機器膜，手術之後長期都有食薄血藥華法林，如果佢做乳房包塊切除手術，有冇乜野需要特別注意呢？同埋我媽媽做咗超聲波同鉬靶，檢查結果係4c，安排做手術，估計需要等兩到三個月左右，日期會唔會太長，算唔算拖太久呢？
多謝醫生。
大D機會流血，可能要做多一次手術去處理流血問題。食緊薄血藥更加唔應該直接手術，先抽粗針去確診。
兩三個月等得太耐了。
醫生你好，我之前有諮詢過的，關於我媽媽的手術。 現在排到她住院，因為她做過的二尖瓣心臟瓣膜手術，醫生反而不給她抽針，說抽針也不准確。
經過之前的一些檢查，醫生根據他的經驗來說，覺得有95%都應該是癌，建議乳房全切加淋巴全切。 之前淋巴有抽過細針是沒有癌細胞的，但醫生說這個也不代表淋巴沒有。
媽媽怕水腫，有問前哨淋巴的問題，但醫生說，根據臨床經驗來說，也有一些人的癌細胞會跳過前哨淋巴。 全切淋巴才會一了百了。
如果真的怕多切了淋巴，則還有一種方法是做兩次手術，先做一次手術來確定癌細胞，然後再需要的話做第2次手術來切淋巴。 醫生讓我們考慮一下，想諮詢一下您覺得怎麼樣會比較好一些呢？
謝謝醫生。
根本是胡說八道。
如果淋巴抽針冇癌細胞也要全淋巴切除，那最開初為何要抽針？有癌細胞又全切，冇癌細胞又全切，抽針唔影響治療方針，難道抽針好好玩？
「跳過前哨淋巴，全切才一了百了」的說法如果成立，我想反問，咁咩人才應該做前哨淋巴？應該所有乳癌病人也做全淋巴切除才對。現實情況係越來越少人做全淋巴切除，可以話有理冇理全切淋巴呢個做法係被淘汰中。
分兩次手術做是下下策，並不能解決「多切了淋巴」的問題。首先為何捨易取難去做手術以確診癌症？為何不簡簡單單抽針去確診？難道手術風險會低過抽針？？
講到憑經驗就咁睇已經有95％係癌，反而怕抽針放大喺顯微鏡底下睇返而唔凖確，呢個係咩邏輯？？
第二，就算真係手術確診癌症，也應該做前哨淋巴，不應不問因由便全切淋巴。
你所複述的建議根本是自相矛盾，不合邏輯的。
醫生您好，謝謝您詳盡快速的回复。 媽媽的醫生說不能抽針，是考慮到她二尖瓣手術過後心臟的問題，雖然我們也不知道有什麼影響，但醫生的話總是權威也不能反駁……但今天和心臟科醫生交流了意見 後，也覺得不能做兩次手術，於是醫生說在術中做前哨淋巴的活檢，大概需要40分鐘，如果前哨淋巴活檢有就全切，如果沒有的話就只做前哨淋巴。 這樣的方案您覺得是否妥當？
勉強可接受。最理想做法係做好前哨淋巴的事前準備，手術中途將硬塊送冰凍切片，確定有癌才繼續做前哨淋巴，冇癌就停止。
醫生你好，你所說的前哨淋巴準備，是指前哨淋巴活檢還是前哨淋巴切除呢，如果切除的話，以什麼判斷只需要切除前哨淋巴呢。如果是活檢的話，是否是在手朮中停留等候兩次的檢測呢（一次包塊一次前哨淋巴）。
活檢同切除係同一樣野。前哨淋巴準備係指打定藥水去追蹤淋巴，真係確診乳癌先進行切除前哨淋巴去做活檢。
我最近照 ultra sound 發現1粒瘤 (0.9cmx0.4cmx0.7cm) with no significant vascularity (BI RADS Category 4a) but may be fat lobule or fibroadenoma. 會是高危嗎? 下一步要抽針? 粗定幼?
不太高危，不過最抽粗針。
醫生你好，親人7月4日到公立醫院做了乳房觸診有硬塊，途中做了超聲波，x光顯示大小為1.8cm，5級標誌，然後8月1號安排抽粗針，醫生話最快安排8月中手術，咁樣會唔會拖得太耐？
盡能力快。
1個月抽兩次 X-Ray定位抽粗針是否太密，會否吸入太多X光對身體不好？
還可以接受，問題係點解咁短時間內做兩次同樣檢查？唔一次過做？
因為政府做每次只抽一個目標。有兩個不同的目標位，所以做兩次。
咁處事咁冇辦法。
我抽完第二次XRay定位粗針，過了一個星期後，有時突然覺得乳房裹面有d痛，以前是没有的，請問是否有問题？
聽落去唔似有大問題，要詳細睇就要睇醫生。
想問吓同一個乳房一次抽三個目標位的粗針是否可以的？
可以做到，不過要花多D時間，做完一個目標，止清楚血，再做另一個目標。
醫生話右邊乳房有4個不同位置钙化點要抽粗針。因要分4次抽，每次抽都要先照mammography, 這樣會否吸入太多福射？其實是否就算不同位置，都可以一次過做？一次過做有風險嗎？
可以接受的輻射量。如果目標係鈣化點，就算所謂一次過做，都係要每一目標照一照mammogram ，瞄準左先抽。
醫生你好,
奶奶64歲, 右邊乳房有兩粒硬塊, 剛確診為乳癌, 大約是一至二期惡性, 醫生有提及是屬於會”走” 的類型, 建議是先化療加標靶, 之後再全乳切除。
而化療+標靶部份, 醫生提及一般是”化療和一個標靶藥”, 但現在有新藥推出, 可以選自費再加多一個標靶, 則是”化療加二個標靶藥”。而兩個標靶藥力強D, 復發機會細少少, 但副作用會多少少。
想請問醫生… 一般以64歲來看, 建議是用一個還是兩個標靶會較適合….
感謝醫生
打得就雙標靶。
醫生你好。我今年26歲。早前在左邊乳房近乳暈位置摸到有一粒小腫塊，去了私家做超聲波，左邊摸到的一粒有1.13x 0.566x 1.14 cm大，另外有兩粒摸不到的有0.573x 0.292cm 及0.449 x 0.305cm大
私家醫生只幫我摸到個一粒做了FNAC，報告是: “scanty benign ductal cells with mucoid background. No malignant cells are seen.”
剛剛去了覆診，醫生話摸到的一粒係mucocele like lesion，亦不掛除另外兩粒是同類病。
佢比左我兩個選擇，一是半年再覆診，二是做全身麻醉手術拎哂三粒野岀嚟進一步做化驗。
而我是想問：
1）你認為手術有必要性嗎？
2）這個手術有無急切性？
3）我正在考慮在公家還是私家做手術，如果我拎報告去公家醫院，醫生會唔會比我做手術？或是會覺得沒有必要性，比一個好遲嘅期我等？
感謝萬分！！
1）由你提供的資料，我睇唔到必要性。
2）冇急切性。
3）如果你好想做，公立會比你做，不過一定係遲嘅期。什或至覺得唔需要，叫你唔好做。
感謝你的回覆！！
不好意思，對這個病實在十分憂慮，有些問題想再問：
1）上網睇的資訊呢個病都係用core needle biopsy 去做診斷，而我只做了FNAC，拎到的樣本會不會唔夠多唔夠準確？！ 要不要再抽core needle biopsy 比較好？
2）做手術是不是都有機會拎唔哂組織去化驗？
3）如果唔做手術，醫生多數會同我如何跟進？長期都要半年覆診一次做超聲波或抽針？要觀察幾耐才可放心？
4）如果唔做手術，我自己又需要觀察什麼身體狀況去留意有無惡化或變成癌？
5）呢個病有無需要戒食什麼嗎？有無什麼成因我需要注意？
多謝你的幫忙！萬分感激！！
1）Core needle biopsy 會準過FNAC。抽唔抽過就視乎你有幾擔心。
2）手術做得合水平係唔會拎唔晒，當然唔合水平就會有殘餘。
3）第一次半年後超聲波，穩定就下一次9個月後，穩定就再拖疏D。唔需要定期抽針。
4）定期摸住有冇大。
5）唔需要戒口。
你好，我宜家21歲，之前照超聲波照到右胸有兩粒野，化驗師話應該係囊腫，就咁睇粒野裏面係水，分別0.4cm 同 1.5cm
已經排左期睇公立，請問呢個情況下，會有需要抽針嗎？謝謝
如果全部係水，冇實心瘤，唔需要抽。
醫生你好，我是一位35歲男士，大約2年前左邊乳頭入面有一粒野，按落去會有少少痛，冇液體流出，外觀冇特別變化，經過2年個粒野變大左少少，為安全起見去公立醫院求診，醫生直接同我抽細針，結果發現非典型細胞，超聲波乳房造影話粒野有1.4 x 0.5 x 1.7cm，BI-RADS 3，請問是否一定要全乳切除? 另外乳房檢查在男性身上是否準確和適用? 謝謝
唔一定全乳切除，因為都未確定係癌症。切嗰粒野就會建議嘅，因為幼針結果有非典型細胞。
檢查在男性身上同樣準確及適用，只係唔會夾胸，因為好多時個乳房都太薄身夾唔到。
我16歲開始左右乳房都有纖維瘤，前後做左2次手術，之後又再生，左右乳房每邊兩粒，一直沒有再理會。現在42歲再檢查，兩邊乳房仍然有粒粒，照mammogram 同檢血正常，但ultrasound斷定是BIRADS 4a, 醫生建議抽針，我好唔想，請問這情況一定要抽針驗嗎？還是直接割除？但怕割完又生….. 請問可以點做？謝謝！
先抽粗針搞清楚。
你好,想問下乳房位其實之前都有做過超聲波同造影check但都話係無野,但就乳房會隔一排就會有紅腫痛,重會流膿之後又再好返,但又會過一排又要黎紅腫, 睇過醫生就話可能係皮膚炎,但我又好擔心成日紅腫都煩又吾知會吾會有乳線炎果的,今係咪要抽針先check到?謝謝
係咪皮膚炎／乳腺炎，靠臨床診斷已經可以，唔使去到抽針呢個地步，抽針唯一作用就係排除炎症乳癌。
謝謝解答! 但請問靠臨床診斷我係應該去看皮膚科就可以CHECK到問題?
睇乳腺科。
醫生你好，我今年22歲，近日因為胸部摸到有硬塊，所以去左診所照超聲波，醫生照完話睇落似乳房組織增生，並建議我再去照多一個照得清楚啲既超聲波，請問問題大嗎？因為我睇完醫生都好迷惘，吾係好明白乳房組織增生係咩，同埋請問有冇癌變可能？
好難講實問題大唔大，佢叫你照多次超聲波，即係連佢自己都唔肯定。現場檢查過嘅醫生都唔肯定，好難單憑你三言兩語去判斷。
請問醫生抽針的手勢重要嗎？想book的醫生要等比較耐，諗緊是否應找另一位乳腺外科醫生做左抽針先
重要，轉唔轉醫生就要自己衡量。
除抽幼針和粗針外，我最近爬文發現一種叫”真空輔助切片”（vacuum-assisted excision/biopsy). 可以抽取較多組織，甚至可代替傳統手術，把有問題的組織移除，類似微創手術，創傷性較少。早前朋友因有非典型導管增生，多個醫生都建議以手術切除。但卻没有醫生提及這”真空輔助切片”的微創選擇。想請教這個技術是否在香港不普及？或是技術較新以致不是很多醫生掌握？還是因其他原因醫生們並没有提出此較低創傷性的選項給病人？是否因收費較傳統手術平而私家醫生不prefer？甚麼情况下可應用此技術？相比傳統手術，有甚麼好處和唔好處和風險？像我朋友的情况，雖有非典型增生，MRI報告話個site完全發現唔到任何特别嘢, 其後手術切除後亦發現唔到惡性細胞。其實呢個case, 回想是否可應用上述的VAE微創技術處理，較低入侵性，又可節省住院時間和費用？謝謝回覆。
Vacuum assisted biopsy (VAB）即係我哋所講嘅微創手術。詳情可以睇咗下面條片先：
直撃乳房微創手術現場，傷口究竟可以有幾細？
https://youtu.be/hKVp4u5_UE8
朋友患有非典型導管增生（atypical ductal hyperplasia），到做手術嘅時候喺有兩成機會會變成原位癌，所以係唔建議做微創嘅，微創只係合適比良性嘅病人。
呢個技術喺香港唔算普及，係一啲比較高階嘅技術，要搵專門嘅醫生做。手術費未必比普通傳統手術平，要視乎複雜程度。
微創手術好處就係麻醉方式彈性大，可以局部麻醉，唔一定需要全身麻醉。所以可以喺診所做，唔一定喺醫院做。同埋傷口細好多，復原快。
唔好處就係對個案嘅要求高，要視乎位置、深淺程度、抽針嘅病理報告，唔係人人啱做。
醫生你好，本人25歲，24歲第一次照超聲波，早前照第二次報告如下：
At left breast 3 o’clock position, 3cm from nipple, there is an ill-defined slightly lobulated hypoechoic area measuring 1.3 x 0.6 x 1.3cm in size. Interval increase in size is noted (previous: 1.1cm). This is of indeterminate in nature. FNA is recommended for further evaluation.
醫生話粒瘤大咗要抽針，請問”ill-defined slightly lobulated “代表情況嚴重嗎？同埋報告建議抽幼針，定其實粗針好啲？
另外，我左右各有6－8粒cyst/hypoechoic lesion/focal fibroadenomas （similar sizes as last year),請問係咪比同齡人多好多？有冇問題？
Thank you so much!!
1）你後生，有事嘅機會好細，情況唔嚴重。如果係抽就抽粗針。
2）叫做偏多，但係都係好常見嘅，冇問題。
醫生，我35歲，上兩個星期發現左胸內側有粒硬塊，所以去咗睇醫生，之後仲照咗超聲波同夾胸，報告返嚟話發現多八九粒，最大粒係1.8cm，宜家又話要抽針，咁我應該抽粗針定幼針？同埋我好怕痛，抽幼針嘅話，可唔可以要求打麻醉藥？同埋打麻醉藥幾錢左右？最後我醫生建議抽幼針，但我想聽多個醫生意見，最後感謝你攞寶貴嘅時間回覆我
1）有懷疑就抽粗針，冇懷疑就可以揀抽幼針。
2）幼針都可以打麻醉藥先抽。
3）一般打麻醉藥唔使加錢。
醫生你好 女病人57歲 在乳線專科做左
夾胸X光檢查結果
左側乳腺髁間不對稱致密影 密度不均勻 内見大小不一微鈣化 病變范圍約2.7cmx4.0cm BI-RADS評估為Category4C。余雙側乳腺未見結節、腫塊狀影，可見散在小點樣鈣化及環形、斑點樣鈣化BI-RADS評估為Category2。
超聲波檢查結果
左乳外象限 2-3點 見2個低回聲結節 大小約1.6X0.7cm、0.9×0.5cm 邊界欠清 BI-RADS評估為Category4a。右側乳腺末見明顯異常聲像 BI-RADS評估為Category1。
雙側腋區未見明顯異常淋巴結。乳腺皮膚無增厚、凹陷征。
該醫生表示惡性機率大 建議做抽針（無說明粗針或幼針）+PET/CT
1.想問PET/CT是否必做？還是等抽針結果出先決定做唔做，是否做手術之前都要做PET？
2.抽針會建議針對超聲波的兩個結節分別取樣？還是抽其中一個就可以？可能因為無當場決定抽針 該醫生無詳細說明
3.病人30年前曾進行卵巢囊腫良性切割手術，會否有影響或考慮病變擴散風險高？
非常感謝此網頁分享的資訊
醫生你好 我42歲 幾日前摸到左下胸有粒嘢 今日照乳房超聲玻和x-ray 但醫生話有D擔心要抽針化驗 我問惡機會大嗎？ 她話就要抽才知 一半一半啦 後日有報告 甘講機會大嗎？
耐心等候報告結果。
醫生你好，
我30歲，20歲開始有纖維瘤(已手術切除過2次)，之後仍繼續生，兩邊乳房夾埋都有10幾粒，近年都是以超聲波跟進為主。
最近有一粒比去年檢查大了0.5cm，醫生觸診認為都是良性纖維瘤，但因已經2.2cm，佢建議又再做手術切除。
然後我再去問多另一醫生意見，佢就建議先抽粗針，再睇下如果係良性的話可觀察住大小變化。
請問呢個情況應該抽針先定直接做手術呢？(本人媽媽同阿姨曾有乳癌)
感謝！
先抽針再決定。
醫生及各工作人員你好，
多謝你成立依個評台，我的情況是，近日一邊乳房發炎 (過往有數年餵母乳，但已經停了約2年)，現已做Ultrasound抽幼針及種菌。結果是無菌。但因發炎地方有約7cm, 又硬又紅，我自己覺得現時不算十分痛，但醫生說抗生素也無效。
但是次發炎，醫生說因發炎的地方多於一個點，但他們並不相連，即好像板間房間開了一樣。因此，醫生建議有2個方法，第一，不斷用針抽膿﹐但不知何時才清，亦有機會最後要開刀。第二個建議是開刀把發炎地方一次過扲走，手術時間約一小時。
看了你介紹微創手術的短片，請問如我這樣的乳房手術，是否也可以用呢？希望也可聽聽你的意見，感謝。
含膿發炎唔可以用微創嘅，因為永遠刨唔清，加上發炎會增加流血風險。
醫生你好，上次檢查後已過了2年半，當時細針發現非典型細胞但粗針結果又冇問題，最後醫生建議每半年檢查，檢查了2次後就幫我CLOSE FILE，直到最近左邊乳頭有輕微痛，估計是腫瘤長大引起，請問良性腫瘤會一直變大? 轉為惡性機會大唔大? 謝謝
要視乎實際係邊一款良性腫瘤，先可以答到。
Hi 醫生，2022年中摸到個胸有粒嘢，所以6月去咗私家照ultrasound 醫生見到有D水囊，建議照3D mammogram, 並說mammogram 冇嘢就唔洗去覆診，半年再去一次睇下有冇變化，結果我冇再去私家，因為12月有政府覆診，我就帶埋D報告比政府醫生睇，佢話個型狀唔係幾好似惡性建議我抽針，之後佢哋幫我抽左5針粗針，報告話不是癌症！然後醫生又比咗幾個選擇我，再抽針、再照、做手術、定期檢查，我選擇咗再照，今次報告末出，嚟緊我應該點做好呢？
等報告出。
報告出咗，我copy咗一段:
No ductal dilatation is observed. No abnormal axillary lymph node detected. Impression: Benign punctate microcalcifications in both breasts. Right 9 o’clock palpable vague indistinct area shows no significant interval change since. 1/2023, biopsy proven benign. Suggest clinical correlation and ultrasound follow up for monitoring. BIRADS 2 Benign cysts are noted in both breasts.
粒嘢size係 1.24x 0.98x 1.6cm
我有睇你寫嘅「乳房檢查三步曲」，而家係咪定期觀察，如果大過2cm先至考慮做手術？🙇🏻♀️🙇🏻♀️🙇🏻♀️
係。
你真好，多謝你快速解答！而家安心得多了^_^，
我在1 月6日 照超聲波， 醫生叫姑娘叫我抽針 ， 1 月29日 抽針。 請問係咪好嚴重先抽針？
有懷疑就會抽針，唔代表一定嚴重。
超聲波照到乳腺有一粒邊緣不規則，有血管的lesion，約7mm。之後醫生安排做幼針抽針，原因為不是一粒硬塊，而且在乳腺，如果用粗針反而未必抽得中。化驗報告結果係Intraductal papillary lesion，良性。醫生說有5-10%可能係惡性，或現在是良性，之後也有可能變惡性，因此建議切除再做化驗。請問這情況適合做微創手術vaccum assisted biopsy嗎？微創有何壞處?
可以考慮，不過唔建議。因為如果係癌症嘅話，微創判斷唔到切得夠唔夠乾淨。
醫生我想了解下因為我抽左粗針後証實左係乳癌，仲要係兩邊都有，然後睇私家時個醫生叫我俾錢去抽針間診所拎報告睇下到底係咩品種既癌先，佢話因為如果係her2的話就一定要用鏢靶，同埋有啲癌係要先落藥再做手術！想問抽針報告唔會話你知係咩品種既癌係正常嘅？同埋醫生叫我甘樣先俾錢拎報告睇咩癌先再做手術係合理嗎？感謝你🙏
由於私家每樣嘢都要收費，所以未確診癌症之前，係唔會收咗你驗品種嘅錢。到你抽咗針之後證實係癌症，而又想驗品種嘅時候，化驗所就會要求你加錢加驗，你遇到嘅情況合理。
請問2.2cm 纖維瘤算大嗎？ 如抽針無野，有要做手術需要嗎？
算大。如果抽針冇嘢，做唔做手術就個人選擇。
你好，我6年前確診過乳癌3期（PR+ ER+Her2+)，做了局切和食了‘’全餐‘’，現時在政府醫院打荷爾蒙針同食AI. 最近做mm同us發現手術口附近有一粒，可能是術後影響但不排除復發可能，評為4a建議抽幼針，政府醫院幫我排期同醫生寫定轉介信（方便我自己去搵私家）。但好奇怪一般是否直接抽粗針嗎？我怕抽完幼針又話要再抽多次。但我個報告同封信都是寫建議幼針，我應該無權自己要求抽粗針？
謝謝
有可疑就應該直接抽粗針。
你有權要求。
你好. 左邊乳房有個多年的大水囊(3CM+)脹痛, 做了超聲波+造影, 發現水囊入面長出新的實心囊腫, 之後再做了幼針(水囊部份)和粗針(新的實心囊腫部份, 抽了4下).
粗+幼針報告都話有atypical cells, 幼針同時有話Inflammatory change. 醫生話冇驗到惡性細胞, 但又未能解釋atypical cells – further assessment is limited by scantiness of these atypical cells.
醫生冇話風險大唔大, 咁我應唔應該手術割左佢?
另外抽針後已過一星期, 乳房裡面會周不時刺痛, 特別是躺右側時最明顯, 請問是因為抽針內部未復原或是因為發炎?
謝謝
應該做手術割咗佢。
兩個原因都可以。
Breast HK,
你好。早前定期檢查發現左邊乳房有粒野，US 話係4a. 因為形狀唔靚仔。醫生建議抽針再check.報告如下：
Clinical Note
L9H core biopsies for section
Gross examination :
Received in formalin specimen labeled as “L9H” are 4 cores of yellowish tissue measuring from 0.7cm to 1.1cm long, with a diameter of 0.05cm each. All embedded in 1 paraffin block (the specimen has been fixed in 10% neutral buffered formalin for 6-72 hours) (KN). (KL/W)
Microscopic examination :
Sections show cores of benign adipose tissue with small amount of interspersed blood vessels. Epithelial component is not included. There is no malignancy.
Pathological Diagnosis:
Left breast L9H core biopsies
— Benign adipose tissue, with no evidence of malignancy
想問係咪良性都需要做手術割左佢？因為驚佢將來會變？
謝謝回覆
你個抽針報告話抽出嚟嘅組織得脂肪細胞，冇乳腺細胞，即係抽針個樣本質量唔合格／抽唔中，病理報告比唔到咩結論你。搵醫生睇過究竟上次抽針係唔係抽得中先，睇吓需唔需要重覆再抽過針。