乳癌手術 4 － 乳房重建手術 你要知
如果情況唔容許你保留乳房（即係要全乳房割），下個決擇就係開刀時做唔做乳房重建手術？咁點解要重建？幾時重建？用咩重建？呢篇有你要知嘅野⋯⋯
點解要乳房重建？
喺診症室見病人同屋企人，一講到乳房重建，十個有七個屋企人會反對，佢地最大理據「唔好搞咁多野喇，切左個乳房算數啦」。
乳房重唔重建，點可以咩都唔知／咩都唔問，就做個咁重大嘅決定呢？
買卷兩蚊廁紙消委會都要比拼25個品牌，寫個「測試找出乾淨、柔韌又抵用的廁紙」嘅評測啦，更何況乳房重建，點可以唔比較吓。
圖片來源：互聯網
「好啦，唔重整啦⋯⋯ er ⋯⋯ er ⋯⋯醫生，我想問吓乳房重建⋯⋯」
口裏說不，身體卻很誠實。
嘗試搵出一百萬個理由去說服自己／屋企人重建／唔重建。
「點解要重建？」
一百個人有一百種答案。
「乳房係最重要嘅女性性徵，牽涉我嘅靈魂，影響我第時能唔能夠企翻起身」
「我怕老公／未來老公介意」
其實答案好簡單「重建就好似愛情咁，係唔洗講理由／原因⋯⋯重建（愛情）係講Feel（感覺）嘅，你仲愛唔愛佢（乳房）」
如果講理由，你隔離嗰個有一萬個缺點令你飛咗佢，你仲同佢一齊，係因為仲有Feel。
愛情，就係比全世界人睇到你跪係度比人打咗14巴都唔走⋯⋯係唔洗講理由／原因嘅。
如果醫生而家要你立刻決定，唔比你諗咁多，你只得0.00009秒考慮「重定唔重建？」
你會點答？
記住呢個答案，佢就係最忠於你感覺嘅答案。
至於合唔合適？你就要了解多D有咩選擇／有咩好處唔好處，先可以決定做定唔做乳房重建。
如果想重建，下個問題就係「幾時重建？」
幾時乳房重建？
主要分兩類：
1）即時重建：開刀切除乳癌同時即時重建。主要用係早期乳癌（如何分期請睇返乳癌分期 ﹣ 我係早期定末期？），好處係一次手術搞掂晒，同埋盡量減低冇咗乳房嘅傷痛。
2）延遲重建：等完成所有治療後先重建。主要用係晚期乳癌，因為呢類癌症比較容易復發，所以寧願搞掂好晒D輔助治療（化療／標靶治療／電療），等一兩年穩定D先重建。費事揀咗即時重建，之後唔好彩好快復發，手術咪白做，白白多個傷口。另一個用處就係以前做咗全乳房切除，但而家後悔／始終接受唔到嘅病友，再做乳房重建，重新建立一條忠於自己感覺嘅道路。
揀好時間，下一步就揀用咩方法重建⋯⋯
乳房重建手術
乳房重建有四大類：
1）鹽水袋／矽袋
直接喺胸大肌底下放入鹽水袋／矽袋：好處係簡單，身體唔洗多一個傷口。但係袋始終係外來野，手感一定唔夠自己組織自然。同埋佢係冇皮嘅成份，即係你如果個腫瘤好大／要割好多皮，咁剩係袋就唔係咁合適。你要問問乳腺科／整形科醫生自己用唔用得剩袋重建，呢樣野冇得自我評估。
第二個問題就要考慮襟唔襟用，袋係唔會永久襟用嘅，你要有心理準備十幾二十年後可能要再做手術更換。如果醫生同你講，一樣外來野幾十年都唔會老化／一世襟用，你都唔信啦。
同埋如果你要電療，袋係唔夠自己組織襟電，傷口裡面易D會有疤（capsular contracture），呢D疤可以令重建後嘅乳房變型／痛楚。
圖片來源：BRO Development
2）自身組織（肚皮／背脊）
自身組織：好處係自然／襟用／手感好，同埋同一時間連皮膚捐贈，就算腫瘤要割好多皮都唔怕。但你自己捐D組織比自己，即係身體會多一個大傷口。
圖片來源：BRO Development
第一個選擇就係用自己背脊，即係醫生講嘅「背闊肌肌皮瓣（Latissimus Dorsi Flap – LD Flap）」。
「嘩？！咩黎？」
唔洗驚聽唔明醫生講咩，其實好簡單，「背闊肌」即係背脊舊肌肉，「肌皮瓣」即係「肌」肉連「皮」連皮下脂肪，轉去前面重建乳房。簡單D講，即係「背脊」囉。
「咁我用咗背脊重建，會有咩影響？」
背脊會多一條六吋度嘅傷口，膊頭嘅力量差咗10%度。
「咩人最合適？」
乳房A Cup 或以下而又冇咩肚腩嘅女士。因為背脊提供嘅脂肪唔多，主要靠背肌，但係肌肉轉咗去前面冇抽捉就會萎縮，所以做唔到太大嘅乳房出黎。冇肚腩即係唔可以用肚皮重建。
圖片來源：BRO Development
第二個選擇就係用自己肚皮，即係醫生講嘅「腹直肌肌皮瓣（Transverse Rectus Abdominis Myocutaneous Flap – TRAM Flap）」。
「嘩？！又係咩黎？」
同上面背脊嘅情況差不多，「腹直肌」即係腹肌，「肌皮瓣」即係「肌」肉連「皮」連皮下脂肪，轉去上面重建乳房。簡單D講，即係「肚腩」囉。
「咁我用咗肚腩重建，會有咩影響？」
肚皮會多一條一尺長嘅傷口，因為腹肌轉咗上去，肚皮會弱咗，導致第時可能有小腸氣。
「咩人最合適？」
乳房B Cup 或以上而又有肚腩／曾生育嘅女士。因為肚腩提供嘅脂肪多，所以做到大D嘅乳房出黎。
圖片來源：BRO Development
如果要D Cup以上，就要用「游離腹直肌肌皮瓣（Free TRAM Flap）」，即係要駁血管。手術失敗機會大少少（5%），同埋如果去D脂肪嘅血氣唔好，D脂肪可以硬化，就好似D小石頭咁（Fat necrosis）。
3）背脊自身組織加袋（即1加2）
如果你天生麗質，乳房豐滿又冇肚腩，咁就要用背脊提供皮膚及矽袋提供所需體積（即1加2）。
4）抽脂肪填補
全抽脂重建，香港比較少用，外國開始流行，不過長遠安全性仍然受爭議。
另外要留意，啱啱重建完係冇乳頭乳暈嘅（除非你做保留乳頭乳暈全乳切除手術nipple-areola sparing mastectomy），呢D係之後跟手嘅微整型工作。
乳房重建簡單指引
咁多選擇，究竟點揀好？
你要問問自己以下問題：
1）接唔接受到有外來野喺自己身體裡面？接受到（袋），接受唔到（自身組織） 。
2）接唔接受十幾二十年後要做手術換袋？接受到（袋），接受唔到（自身組織） 。
3）接唔接受身體多一個大傷口？接受到（自身組織），接受唔到（袋）
4）洗唔洗電療？要電療（自身組織），唔洗電療（袋）
5）想重建嘅乳房有幾大？ AA－A級（背脊），B－C級（背脊加袋／剩係袋／肚皮），D級以上［肚皮（駁血管）］
6）介唔介意手感？要自然（自身組織），冇所謂（袋）
7）自己有冇肚腩／想唔想修埋肚腩？想（肚皮重建），唔想（其他重建）。
以上只係簡單指引，由於乳房重建牽涉大量專業知識／個人臨床評估，詳情請問返自己嘅乳腺科醫生／整形科醫生。
伸延閱讀：義乳的秘密 － 重建乳房手術外的另一片天
下篇我地由乳房跳去腋下淋巴，講吓有咩選擇⋯⋯
香港乳癌及乳病治療中心 
Breast HK，如做重建，傷口是否很大很痛？復原要好耐？ I feel depress that I cannot make a decision whether to undergo the partial removal or whole breast removal for my carcinoma in situ. (I have family cancer history)
傷口係大嘅，幾吋至十幾吋不等，上面有啲link有真人相睇。
至於痛唔痛，用肚腩會痛過用背脊。不過無論用咩都好，都會有止痛藥，我好少聽到病友術後後悔話「早知咁痛就唔重建乳房啦」，所以我覺得相比起冇咗乳房精神上嘅痛，肉體上嘅痛係可以接受嘅。
至於復原就耐少少，比個概念你參考（當然人人唔同，進度有快有慢）：
切晒成個乳房唔重建，三四日出院，兩個星期表面傷口就埋晒。
切晒乳房加背脊重建，七至十日出院，兩三個星期表面傷口就埋晒。
切晒乳房加肚腩重建，十至十四日出院，兩三個星期表面傷口就埋晒，活動自如就一個月度。
根據你之前嘅問題，我估你對局部割有保留，係因為「驚易D復發」，歸根究底就係覺得自己屋企人有癌症，自己都易D會復發。其實呢個想法係冇根據嘅，好多病友屋企人都有乳癌，但其實只有少過一成嘅乳癌，係因為人類已知嘅基因特變（例如BRCA）所引起。呢個事實，引申出3個結論：
1）九成乳癌都唔關BRCA基因特變事（你好大機會係呢個情況），即係就算屋企人有乳癌，並「不代表」你大D機會復發。
2）就算你喺嗰一成人，個乳癌真係關BRCA基因特變事，你係易D局部復發，但並「不代表」你唔揀得局部割，掉轉講即係局部割並非唔安全，唔會因為你揀局部割而「再大D」機會復發，復唔復發係你條命生成。
3）至於遠端復發風險呢，根本都唔關手術揀咩事。
了解咗呢3個結論，如果你個醫生比得你揀局部割，即係技術上可行。剩落黎就係你自己點睇／鍾意邊一款喇。
雖然冇見過你個人（始終好多資料缺乏），不過聽你口吻，我會覺得局部割係一個好選擇，因為原位癌冇你想像中咁惡，家人有乳癌對你影響冇你想像中咁大，簡簡單單局部割，又可以保留乳房，又唔洗多條大疤痕，又唔洗怕復康問題。就算你成世人都好黑仔，第時真係乳癌局部復發，咪到其時先全乳房切除加重整囉。
Breast HK,
I have sent you an email, please check, thanks.
醫生，我媽咪69歲，最近發現乳癌，家族從來沒有人有過乳癌，硬塊有3公分，站時沒有擴散，約一個月後做手術。醫生建議她選擇全乳切除，因為覺得這個年紀外表不重要。而她本人也驚局部會易覆發。但她自專心比較強，我怕她切除後接受不到。
想問這個年紀，適合做即時重建手術嗎?看你的文章，用肚腩脂肪適合她。
政府醫院有沒有提供這種手術?因為沒有聽醫生提過。
是否一定要到私家?手術費大約幾多?
局部切除，是否較易覆發?
這個年紀都可以做重建手術，不過少D人咁揀，原因有2個：
1）年紀越大，都仔大女大，感情一早昇華晒唔係睇外表咁膚淺，甚至老伴可能已經唔係度，所以冇咁嘅需要。
2）年紀越大，身體越多毛病，做手術麻醉始終都係有風險，所以想簡簡單單，盡快完成手術，減低麻醉嘅時間／風險。
政府醫院都有提供乳房重建手術，不過年紀越大，醫生越傾向唔提呢個選擇，費事搞亂你／節外生枝。
私家就病人需求主導，你有咁嘅需要而又比得起錢，80歲我都見過有人做。費用就大概十幾二十萬。
局部切除如果切得清，加埋電療，係「唔會」較易復發。不過腫瘤成3cm，除非乳房好豐滿，如果唔係局部切除都幾大機會會變型／凹。
請問你所說用肚腩重建，一個月左右可活動自如，是否可以好像以前咁企到直輕鬆行？我現在手術完成了2個星期，企得直行要行得好细步，好易又像老婆婆咁向前彎行，所以攪到背肌好痛，坐得多和行得多都痛。
因為我在私家做手術，沒有政府的一條龍服務，請問可提供可以做和需要做的運動嗎?
一個月企到直就冇問題，輕唔輕鬆行就睇人，有D人得有D人唔得。
其實冇咩特別運動要做，只係做返平時會做嘅日常活動已經夠，唔好成日覺得自己做唔到／唔好成日淨係訓係度休息，就已經足夠。
抽脂肪填補
不過長遠安全性仍然受爭議?即係咩意思？
唔知會唔會增加乳癌復發風險。
請問，之後用水袋重建會否對稱？我係B cup
睇情況及個人要求，淨水袋重建你預唔對稱，咁嘅期望比較合理。
點樣先會對稱呢？
用自身組織會易D對稱。
醫生，我要電療，但又唔想用肚皮重建（運動員個 core 都好重要），延遲重建等電完用鹽水袋／矽袋係咪最好既選擇？
咁係咪全乳切除後要先裝左 tissue expander 先電？
通常最快可以做重建（由做全乳切除計起）？如果我想等一兩年咁耐。。。
謝謝！
唔想輕率咁講邊一個係最好的選擇，最合適答你呢個問題的始終是看過你的整型科醫生。
如果諗住全切加電療後會延遲重建，而又唔想用自身組織去做（未必一定係肚皮，背脊都係其中一個選擇），全切時同一時間放埋tissue expander之後先去電好D。
一般黎講，延遲重建通常都係全切後一兩年以上先做。
醫生，我又聽過一個方案係先電療再做手術加即時肚皮重建，原因係手術加即時肚皮重建後電療個效果唔夠靚有機會縮。呢個方法常唔常？如果遲d 先切走個瘤有冇其他風險？Thx!
「先電療後手術」呢個唔係一個主流做法，安唔安全冇大型研究數據去支持。值唔值得為咗貪靚而去採取非主流做法就見人見智。
我係從一位好出名既醫生度得到呢個建議，其實我無諗過佢會有呢個非主流做法 (chemotherapy, targeted therapy, or hormonal therapy → radiation → surgery)，所以我都好矛盾，因為好多病友都睇佢口碑好好，但聽到呢個咁新既方案真係唔知點考慮。我有睇過做電療會纖維化，聽落radiation → surgery好似有著數。唉。六神無主。。。
非主流意見唔等如一定唔啱，主流意見亦都唔等如一定啱囇。不過我地一般都會跟大隊的原因係「出問題時起碼有人／有好多人支持自己」。
打個比喻，「小朋友應該努力讀書，第時做專業人仕（醫生、律師、會計師），改善生活。」呢個係主流意見，但係咪一定啱曬？好明顯你可以舉好多成功人士的反例子，Bill Gates／Steve Job都完成唔到大學，咪一樣咁成功。
你唔跟主流意見唔讀好書，但比你成功咗，人地會恭喜你「行行出狀元」。
你唔跟主流意見唔讀好書，但你真係失敗咗，人地會話你「不聽老人言」。
你跟主流意見讀好書，比你成功咗，人地會讚你「孺子可教也」。
你跟主流意見讀好書，但都失敗咗，人地會安慰你「盡咗力就得」。
跟大隊某程度上係相信集體智慧，同埋希望出問題時得到別人的支持。
乳房重整手術係公立醫院及私家醫院做幾錢呢?
乳癌手術費用 － 手術收費貴唔貴？醫療保險包唔包？
切除手術已包重建費用？因在連結中找不到重建費用
公立包，私家唔包。
我將做腹直肌肌皮瓣手術，醫生話我要用整個肚嘅脂肪，並用兩條腹肌，想問我嘅情況常見嗎？因為醫生話用矽袋，萬一手術後有問題個矽袋要拆返出來，唔係咁好！我情況係零期乳癌。請指教?
冇話常唔常見，用哂兩條腹肌嘅主要原因係一邊肚的脂肪唔夠重建乳房用（即係得天獨厚地乳房豐滿但冇乜肚腩），所以要用哂兩邊肌肉去提供足夠血液比兩邊脂肪。
明白，謝謝你?
我已經做完直肌皮辨手術，腋下有數條喉，而家術後第4天，發覺有點味，係咪因為無換膠布而’腌’到有味，另外我咳時及噴嚏時內裡扯到想爆開咁，驚5驚架，通常幾多日先落得床呢？
咁早D味通常都係呢個原因。
咳／噴嚏應該就唔會整爆，當然唔係叫你挑戰佢。
你差不多可以落得床。
做完tram flap 手術第十二天，現仍未可以直躺，要用枕頭抬住腳，因為腳彎住腰無咁扯，但側睡，睡醒就覺得腰間傷口好痺，請問大約要幾耐先覺得D肉係自己？現在成個肚皮就只有拉址及痲痺感覺?
感覺嘅野好個人，冇一個客觀指標。
想問我己做重建，醫生話為免日後小腸气，話做左塊腹膜，跟住醫生又話咩纖維化，又話大約九個月肚皮先會有冷熱感覺，因為D血管切斷哂，我唔係好明，咁個腹膜即係我自身邊忽？咁我覺得拉址係因為肚皮個條長疤痕，定係因為腹膜問題呢？請指教
我估你醫生係指放咗一塊網（mesh）入肚面，去加強腹部強度（避免小腸氣）。如果已經擺咗mesh，拉扯主要來自表皮疤痕。
本人真心想明白以上問題，請指教?
什麼以上問題？？之前所有問題已經即日回覆了。
請問一般人做完自體重建，傷口內外都埋哂口 後，除了有小腸氣或手擘活動能力差外，還會有其他後遺症嗎？是否大部份會有這些症狀？
其他後遺症可包括：
1）疤痕問題，有D人疤痕好肉酸，甚至突起。
2）如果用肚皮重建，仰臥起坐的能力減弱，一般香港人冇咩問題，因為好少要／好少會做好劇烈仰臥起坐，運動員／健身教練就有所顧慮。
不是大部分人也有後遺症的。
Thanks so much.
唔好意思，我想問人工腹膜放在腹部會不適嗎?我常覺得有塊東西頂住腹部，範圍很大，很不舒服，那是人工腹膜嗎?
會有部份人覺得唔舒服，你嘅病徵都吻合。
唔好意思，我又想問，醫生話因為做完手術要逢針，所以肚會覺得拿埋ㄧ住，佢話D線會溶，之後會鬆返，無咁緊，我想問Tram Flap肚內傷口係咪好大，咁D針其實聯在體內咩位，D線係点溶，請指教
肚皮的內傷口係好大嘅，正面肚部幾大傷口就幾大，全部都要移動先可以將肚腩搬上去。
好難用文字三言兩語描述點樣聯針／D線點溶。
我要兩邊乳房全切，C cup，醫生建議我用背脊自身組織 + 袋。
不過我怕膊頭力量差左10%，全影響日常生活嗎？
另外，因我須電療，係咪一定要放tissue expander?
差10％其實唔影響日常生活。
要電療就tissue expander 好D。
我做了tram flap 手術後11天，感覺腹部及乳房肌肉很硬，乳房形狀很怪，還有數天才複診，我可以開始輕輕按摩一下乳房及腹部肌肉嗎？
我感覺用腰封輕輕包腰的傷口也舒服點，可以繼續嗎？謝謝解答。
可以輕輕按摩及用腰封。
Thanks for the advice!
唔好意思，請問我全乳切除後，想選擇延遲1-2年後等完成化療療程後才重建，但聽人講話太遲重建皮膚已沒有彈性及不能再做了。這是真的嗎？延遲重建又有什麼壞處和影響？謝謝！
延遲重建皮膚彈性係冇即時重建咁好，但又未至於「不能再做」。
延遲重建主要缺點如下：
1）分兩次手術，即係要全身麻醉多一次。
2）皮膚彈性冇咁好，自身乳房的皮膚比較少（因為第一次手術唔會保留多餘的皮膚），最終難D匹配返對面的正常乳房（難，唔代表唔得，考醫生功力）。
請問若以背脊肌來作重建，手術後要戒除茶、咖啡飲品、辛辣食品嗎？術後，要幾耐才可作手部伸展運動？術後有什麼要留意呢？
勞煩你，謝謝回覆！
用背脊重建後不需要戒口，冇特別野要留意。至於伸展運動就冇硬指標，自己慢慢就住身體狀況調節。
謝謝醫生的回覆！
唔好意思！請問做了“背部皮瓣手術”重建後，隔幾耐才可穿胸圍呢？可否穿鋼絲的胸圍？或是不可穿？另，做了這手術，可否按摩背部或乳房呢？
勞煩晒，謝謝！
兩星期度。可穿有鋼絲的。可按摩背部及乳房。
澳門人，想問香港邊到重建會好啲?
話題敏感，不作公開推介，請諒。
在2點鐘位置有2.6×1.2x2cm腫瘤, 但做MRI後發現在12點及3點及附近都有很多細點, 醫生說做局部都可以選擇, 但相對復發機會比較高, 她有點擔心, 如果全乳切除會比較好, 請問是否正確?
好難單憑你的簡單複述就下到判斷，如果12點同3點的白點係可疑的話，全乳切係一個比較簡單直接了當的選擇，因為局部割四分一以上，割完都一定凹得好厲害，外觀效果係強差人意的，就算割清唔復發，都九成唔滿意。
你好~ 本人今年一月于公立醫院做了乳房切除及重建 (肚腩)手術. 之前覆診發現有”小腸氣”情況, 並提供了腰封給我配戴, 現醫生叫我自行選擇做手術( 加回mesh)與否 ? 請問是否做好d ? 唔做有什麼影響 ? 需時多久康復 ?? 謝謝!
純個人喜好／選擇。唔做就繼續現狀。康復時間人人唔同。
你好，今年1月做了乳房重建手術。出院已17天，每晚睡覺平均只睡2-3小時，經常要日間補睡，原因係肚傷口痛及背脊肌肉痛醒要起身坐下舒緩。出院有食止痛藥一星期，只是止肚傷口痛，肌肉仍痛醒，在醫院已有這情況，現在已沒食止痛藥，我跟本晚上無法好好睡眠，但日間行路及坐下是沒有那麼痛，是否屬於正常，請幫忙解答，萬分感激。
啱啱做完手術的問題要問返主刀的醫生。
你好！我即將進行一邊全乳切除，即時 TRAM Flap 重建 (不是 Free TRAM Flap)，以及另一邊乳房縮小手術。這樣的手術 ( 切除 + 重建 + 另一邊縮小) 在香港比較少找到資料。想請問 ：
1. 手術的風險會比只切除和重建大很多嗎？
2. 手術後身體有三個傷口，復原進度大約是如何？會因多了一個傷口而比只切除和重建差多遠？
3. 手術後復原有甚麼需要留意的地方？
謝謝！
1）不會。
2）復原速度差不多。
3）沒有特別。
醫生你好，我要雙側乳房全切，正考慮即時以腹直肌或背濶肌（不加袋）重建，想問假如不介意手術後由現時的Ｃ cup變 A cup，純粹考慮切掉腹肌或背肌長遠對身體功能的影響，以及背或腹痛的可能性，是否用背濶肌會是較佳的選擇呢？謝謝。
背闊肌好D。
謝謝醫生抽空回覆！亦十分感謝你設立這網站提供全面的乳癌資訊和香港的醫療資訊，真的對徬徨的病人很大幫助。祝你身體健康，工作順利，幫多啲病人！
何謂 oncoplastic surgery? 台灣的網站説可幫助局部切割的姐妹，填補切割的部分令乳房不至變形。這個香港有嗎？
Oncoplastic surgery你可以睇成係切乳癌時的微整型技巧，透過技法將附近組織移動去填充因切除乳癌而出現的缺損，就好似掩眼法咁。因為唔洗另一地方捐組織，所以有別於一般重建，唔會多個傷口，唔洗整形科醫生參與。
香港有呢種技術，乳腺科醫生一般都識。
醫生你好,1. 照超聲波左邊乳房有一個囊腫0.75×0.52×0. 92(7-8 鐘方向),明確的橢圓形， (Bi-rads 2)經常會痛，醫生話多數是良性， 但是 MG 檢查(X ray) 卻未見顯示到該囊腫。 2.右邊乳房有鈣化影，範圍約2.2×0.6cm, 距離右側乳頭約6.3 cm， (Birthda 4a )右乳內上見一空心鈣化灶， 醫生建議粗針穿刺抽組織化驗. 請問醫生，我現在應該點做呢， 抽粗針還是做微創好？ 左邊乳房囊腫已經追蹤了10年， 也想趁此機會一起解決， 要抽針還是要割掉？ 希望醫生畀到建議我， 因實在太煩惱了， 謝謝
另外 如果用微創刨清鈣化點 乳房會塌下去嗎
形成兩邊大小不一
有機會，尤其是你要刨2.2cm以上，再加埋上內側係乳房組織比較薄身加見光位。
右邊：醫生建議抽粗針就抽粗針先，唔係個個合適做微創，要滿足更多技術細節，要睇片先知合唔合適做。
左邊：聽落去好良性，想趁機解決就做手術，事前抽唔抽針就視乎自己想唔想偷步。
你好
我媽媽在4月初做了右邊全乳切除包括乳頭，再用肚腩即時重建。術後肚腩好快就埋左口，仲埋得幾好。但乳房中間，乳頭切除後連接肚皮皮膚邊緣8點鐘位置有兩個傷口（大約都有1cm及0.5cm) 係近呢兩星期爆開左，一直都未埋好，仲不時滲血水，外科醫生建議每日到醫院洗傷口，抗生素消炎藥都一直keep住食，都好似未有好轉。早兩日外科醫生再剪走左傷口少少組織去種菌，未知道結果。
媽媽排左期6月20日就打第一針化療，而加媽媽好擔心傷口仲吾埋，會影響到打針時間會再推後，醫生仲同我講媽咪有少少焦慮症的症狀，我都好擔心好吾知點算，希望醫生可以比啲意見我，感激！
冇咩可以做，傷口有問題正常人都焦慮，只可以跟醫生指示洗傷口。
-我的胸部只是有約A-B CUP, 因要左邊全乳切除包括乳頭, 而且我很瘦, 身高大約156cm及90磅左右.
-我有個腫瘤在乳頭附近, 知道乳頭是不能保留, 醫生好像提過,乳暈是可以保留, 因乳暈只是皮膚不會有癌細胞的, 請問這說法是否正確?
另外, 看了兩位醫生,是有關重建問題, 不知如何選擇那個較適合?
-1位醫生建議我用背濶肌（沒有提要加袋）重建。
-另1位醫生建議我直接在胸大肌底下放入矽袋,或TRAM Flap。
因知道,如用背濶肌重建時間一久就會萎縮,請問大約會萎縮多少?而背部傷口會否有水腫情況出現？
萎縮多少人人唔同，冇得大約，只可以話最終大約會做到A Cup到。
背部傷口可以出現水腫，不過唔係長久的。
我接受了右邊乳房全乳切除及兩組淋巴, 即時重建, 放入矽袋, 手術至今大概三個星期, 右邊乳房有脹痛 (亦覺得比左邊熱), 以平日正常步速 (或急步) 行路, 右邊胸口會更痛. 晚上要食止痛藥才能入睡. 醫生話身體生緊個「薄膜」包住個矽袋.
– 請問這脹痛是正常嗎? 會不會有排擠的可能性? 如果唔係排擠, 通常要大概多久發熱和痛楚才會消失?
覆診後, 醫生叫我跟住啲小冊子教, 做上手臂運動, 做 (例如: 向前轉膀頭) 的時候, 胸部和腋下感到痛楚, 也感到好像腋下有硬物「刮」到或胸口有嘢「un」住咁. 同時, 右手舉起時完全無力, 朋友說是因為無左胸部嘅「肌肉」support.
– 請問這些感覺 (「刮」到 / 「un」住) 是否我 feel 到矽袋的週邊? 會多久才會「習慣」或消失? 右手手臂是否需要之後做啲 train muscle 的訓練, 才可以 regain strength?
三星期仲係好早，脹痛都正常。唔會排擠。感覺幾耐因人而異。
幾個月慢慢習慣異物的感覺。矽袋唔影響舉起手的肌肉。
請問如果我係因為有巨大纖維瘤而全切加重建左，病理報告出左都係冇cancer, 之後其實仲可以/是否需要保持檢查個重建左既乳房呢？謝謝！
重建的乳房不用檢查，另一邊同普通人一樣，40歲後定期檢查。
你好，我在12月初做了右邊乳房全切除肚皮重建，傷口復合中，1月開始化療，然後電療，大約可時可以穿回胸圍？是否初步要穿無鐵線胸圍？我是C cup尺寸，謝謝
6星期到可以穿回，初時無鐵線好D。
想問公立醫院也可做腹肌或背肌皮瓣手術嗎？我自己可以選擇嗎？
技術上做到，你有冇得揀視乎醫生評估及建議。
我在內地醫院做了乳腺切除手術，當時放擴張器，准備二次手術放假體，但擴張器目前出現偏移。現有打算回HK做重建，曾去私立醫院看過醫生，他們也解釋了目前用的幾種方法，但費用都幾貴，不知道一般買的保險能否cover 重建手術？公立醫院做重建的費用通常是多少？另我好難決擇，到底用假體還是用腹肌重建為好？不知您能否給些意見⋯⋯謝
一般的保險唔包重建。
公立手術唔洗錢，只比住院120蚊一日，如果用假體可能要出幾千。
具體用咩好要現場評估。
本身是 SLE 患者，請問可否做乳房重建?
可以。
咁請問用假體還是用自身重建會較安全?考慮時應注意什麼?
自身重建較安全。要注意的地方上文已經交代咗。
醫生你好，我在3月15日已做左側乳房及淋巴全切除手術並乳房即時重建，表面傷口大部份於手術後兩星期內已埋口，惟獨乳頭側邊的傷口仍未埋口及有血水，本來訂於4月29日開始化療第一針，傷口會有影響嗎？化療需要延期嗎？
傷口埋曬先可以化療。
我1期、A-B cup、一邊全切、用矽袋重建、已經3星期、手術醫生話依家不可按摩, 左右不對稱、請問係咪以後都係咁？有冇得補救或遲D會唔會自然D?
手術效果問題要問返經手醫生。
如已在私家醫院做全乳切除，現在在公立醫院做化療和電療，之後公立醫院會幫做重建，費用多少？
唔洗錢，只比每日住房錢。
我很困擾，乳房切除後沒有選擇做重建，但是接受不到現狀，我是剛剛做完手術不久，如果重建是否要等一年後？
洗唔洗化療電療？
不用化療電療
隨時可以再做重建手術。
你好，我12/2018 做手術左邊切除，即時做埋肚皮重建，手術後一直覺得下胸有個位比較硬，初時覆診醫生話係正常，電療後會更硬，慢慢就會回復，但今日覆診再問醫生，佢話可能脂肪壞死，再觀察吓先，或者切左佢都得，咁即係點呢？按壓時會小小痛，可唔可以講解吓脂肪壞死嘅詳情？麻煩你喇！
用肚皮重建乳房有機會因血氣供應不足，而導致脂肪壞死，之後嗰部分就好似石頭咁硬。
請問咁我可以做咩會改善到呢？如果只係硬而唔痛係咪冇影響？可以唔理佢？唔該哂！
改善唔到。如果確定係脂肪壞死，對健康冇影響，可以唔理佢。
感謝你嘅解答，唔該曬
請問由彭脹氣放返矽袋入去時，是否也要全身麻醉?另外我做手術至今，吊住條喉抽返D血水成15-16日，護士話因為矯型科要求高 ，正常嗎？
通常全身麻醉。引流引返D血水好正常，同要求高唔高冇關係，都控制唔到。
你好 想請問 乳房重建手術 可否在 化療後才做 想請教 會有什麼副作用 後遺症呢 同埋安唔安全 感謝
可以，冇額外副作用／後遺症，只係冇即時重建咁靚。
你好醫生各位sis，我本身c cup, 唔係肥底冇乜脂肪，響2年幾前做左其中一邊全乳切+1條腹直肌重建，當時主診話太緊縫唔埋個肚所以加左個網，術後1年半後才跟據醫生指示開始做返運動，因過往醫生指傷口未完全 康復， 網上面嘅釘要時間生實左先，我既問題係，
我到宜家個肚仍然未能拉直自如，仍覺拉扯，周不時都會 痕癢但R唔岩位唔知邊度痕，以及當年術後3個月度開始下腹脹起( 位置係肚臍對落到bikini line)，到現在變成好似3~4個月身孕既情況，因為腹肌弱左又縮唔到肚，本人非常無奈，網上完全搵唔到任何資料好似我既情況，
當初醫生有嘗試轉介去做腰束但完全沒效，醫生亦表明此情況是不會有好轉的，除非再做手術將已生實既網拉緊，但見我有計劃2~3年生bb所以暫時冇野好做，到時睇下個肚皮鬆成點再執喎，現只係繼續定期覆診。 醫生，我呢個情況到底係咪手術失敗? 定個網一早鬆左?定係點解啊醫生，希望得到詳細解答。謝謝
唔可以話手術失敗，但出現咗一D你接受唔到嘅副作用。
冇咩點解，所有野都源於肚皮弱咗，呢個係捐贈者的代價。
重建乳癌复活机會有幾大?
重建唔會令乳癌復發風險增加。
醫生，做完背肌皮瓣幾日，因為胸部A左右，所以無加野，做完好緊好扯，醫生話遲d唔會，話頭幾日辛苦d,就無答我，想問吓會維持幾耐？因為唔知遲d會唔會係一年半載
要問返手術醫生。
手術後2星期，宜家背脊後面吱起左舊肉，有拉扯緊既感覺，手術醫生話等遲d消腫，如果半年後都係咁可再做手術
醫生我想問吓其實係米手術問題定呢個情況都係正常？我有朋友用肚做，雖然我用背脊，佢都個肚吱起舊肉有拉扯緊既感覺，2個月後先改善好多
視乎位置，疤痕的兩端有少少谷起屬正常，中間谷起就唔正常。
謝謝解答，我發現問題係疤痕中間凹咗入去，個個位好緊好扯，我睇番一般疤痕中間應該係平嘅，問題係米出在呢度？
如果我想睇私家確定問題寫信，貴中心有無得睇，因為我係政府做重建，想確定如果手術問題，請佢地盡早處理，下次覆診要9月
呢D都係要問返手術醫生最清楚。
醫生您好，已做了背脊自身組織重建兩年九個月，背脊傷口初期腫起，抽過血水，後來比較平伏。但最近突然又腫起，這是否血腫問題?可以有什麼方法如根治呢?謝謝。
有可能，要檢查先知點處理。
手術約十年後出現類似情況，腹部隆起位置大約有18 x 8 厘米，還有站立，坐下，彎腰及側睡不適問題，應安排手術或是如何處理?
應該睇醫生評估咗先。
你好！請問醫生游離皮瓣同帶蒂皮瓣有咩唔同？點知道自己做邊一樣合適，邊一種較多人做，謝謝
游離皮瓣要駁血管，有機會手術失敗（1-5％），保留腹肌功能較好。
帶蒂皮瓣唔使駁血管，手術失敗機會低好多（少於1％），但肚皮會弱咗。
邊樣合適要醫生評估，帶蒂皮瓣較多人做。
乳房重建後8年有漏及腫痛，請問可否更換其它醫生跟進或需當年的醫生? 如重建與否，手術及康復期要幾耐呢？
可以換醫生。唔明你第二個提問。
馬醫生：
你好！想問已經做了重建乳房，但還沒有做乳頭，請問私家有冇只是做回乳頭手術？及費用大約多少？
有。大概幾萬蚊。
我今年40歲，去年發現左胸有兩粒，已擴散到淋巴，2月做完化療。2月尾做完局部切除及3粒前哨淋巴，做完後醫生話切唔哂及切片發現好少淋巴，可以做電療解決。4月做電療第二次，發現乳房有2.5cm暗影，要全乳切除。
想問下我這個情況適合重建嗎？如重建適合那一個？重建後會不會有水重及其他併發重？番發機率有幾多？
適合重建，最好用自身組織，因為襟電啲。
重建並不會增加水腫風險。
提供嘅資料唔足以判斷返發機率。
我做了右邊乳房全切除肚皮重建已經六個星期，最近幾天左大脾外側會久不久刺痛，睡覺時也會有像突然比人插一刀的痛。是否血管或神經因手術弄傷了？情況會自己好轉嗎？我現在有什麼可以做減輕痛楚呢？
有時醫生起個肚皮嘅血管時候，需要掘深啲，就有可能引起刺痛。情況會慢慢改善，最主要都係等待，冇乜嘢可以做。
如果原位癌做全切加乳房重組, 及決定保留乳頭, 請問DCIS recurrence 機會有幾多呢？
10年大概3-4.5%復發率。
本身已做了重建乳房，想做重建乳頭加乳暈，請問大約幾多費用，謝謝！
重建乳頭，局部麻醉做，大概兩三萬。
紋返個乳暈，大概一萬。
我16年己經做完用腹肌重建乳房手術，但到今日咁多年後，仍然覺得肚皮好緊，同有時彎腰時，覺得肚入面塊人工腹膜，會頂到其他地方，好唔舒服
我認識有朋友都做呢個手術多年，佢地無呢個問題，完全無我呢d不適感覺，想問點解會有咁大分別呢
好多因素可以影響，包括手術點做、自身反應等等，最好就係問返自己手術醫生。
醫生你好，想請問接受乳房重建手術是否可以減低淋巴水腫的機率？這是否應該是一個考慮是否接受乳房重建手術的考量？謝謝
乳房重建手術並不能夠減低淋巴水腫的風險。
醫生你好，我2022年5月做重建手術！第三次復診醫生話我知有脂肪壞死！想問下我應吾應該抽壞死脂肪出來？如果抽，個手術要多長時間？會吾會有其他後遺症！多謝醫生！
唔使抽。
多謝醫生，另外係壞死脂肪附近有一粒野！之前冇的，要吾要去照下？呢排壞死既位置經常有D痛！成個人好吾舒服！
建議去檢查清楚。
醫生，你好，我妹剛確認乳癌4期，有抗散至骨，在私家同政府已經睇左腫瘤科，不過有D分別，私家全程18個月後就吃荷爾蒙葯，政府都係先18個月後繼續標把，中間需全乳切除，我是否要再去揾一個比較權威D嘅醫生查詢一下，另外如在私家落第一針，政府可唔可以銜接到？還是一經決定第一針在私家，之後都要在私家打？謝謝
可以銜接到。
醫生，你好！我用背脊做了左邊乳房重建，現手術後約三星期，表面傷口已大致埋了，除少少位置外，但內裡仍然痛，影響睡覺，每晚都會因轉身而醒，面裡的傷口通常幾耐會好？用背脊重建會影響10%手部能力，即是那些動作或功能會影響？
大概一個月。
腋下夾手袋呢個動作。
如果放水袋後，日後檢查仍然是用夾胸方式嗎？會否影響水袋變型？
如果乳房全切用水袋重建，嗰一邊唔會／唔需要夾。
醫生，請教如果做了重建多年，現在胸部變型。如隆胸放假體後，做夾胸檢查，會否影響假體變型？檢查又會否受假體影響了準確性？夾胸準確性是否比MRI高？如果打脂肪隆胸，鈣化風險是否好高？2者比較你個人會較推薦那項？感謝🙏
假體重建同假體隆胸係兩回事，首先要搞清楚。
夾胸檢查唔會令假體變型，有特別手法叫pull out view。
可能有D位會被假體遮蓋，從而影響準確性。
夾胸比MRI 準，但冇MRI咁靈敏。
打脂肪隆胸會增加鈣化風險。
好多因素要考慮，人人情況唔同，唔可以簡單比較邊個好D。
你好醫生，如果用自體組織重組後，和另外一邊大小唔一樣，即係正常果邊細d，下垂d，咁冇事嗰邊胸可以有咩選擇的方法微調？謝謝
細變大就要加外來物或自身脂肪。
下垂就要做手術提拉。
明白，但打自身脂肪係咪會增加鈣化同患癌風險？另外，如果全切重建果邊，日後縮小左再打自身脂肪仲會唔會鈣化呢？因為入面已經冇晒組織，謝謝醫生！
會增加鈣化風險，唔會增加患癌風險。
都會鈣化，不過你唔會知，因為重建嗰邊乳房唔會夾胸。
右邊確診原位癌，左邊亦有一粒良性病變，醫生建議右邊全乳切除，因位置問題，局部後外觀凹陷嚴重。
有家族病史，妹妹兩邊先後患癌，第一次原位，第二次另一邊一期，最後都係兩邊全切，加即時重建。家姐亦一邊二期，也選擇即時兩邊全切加重建，但佢哋兩個驗過都冇基因突變問題。佢哋兩個亦係即時重建兩邊。
我依家雖然只係右邊原位，但左邊都始終要做手術，而且腹直肌只可做一次，我是否應該兩邊都全部切除，然後即時重建兩邊？一了百了，左邊唔切，每天提心吊膽，有冇人都會咁樣選擇？
謝謝指教🙏🏼
有人會咁選擇，不過如果冇基因突變，其實係做多咗。
但我自己始終冇做基因測試，想問下做測試嘅結果幾時有？同埋要幾多錢左右？🙏🏼妹妹家姐都-ve, 我是否也應該-ve? 唔駛check 呢？🙏🏼🙏🏼 感謝醫生給予意見
三星期有報告。
大概萬零蚊。
佢哋係陰性，你好大機會都係陰性，當然可以有例外。
我在今個月9號做完雙左右乳房切除手術並由腹肌重建。手術後已經是15天。前兩天首次去整完醫生覆診，醫生拆晒D膠水和拆綫之後。只係係傷口上黐返3M膠布。約咗兩星期後先返去去複診，但係呢段期間醫生話冇須洗傷口。請問這是正常嗎？
正常。
即時兩邊Tramflap 喺1/6做完，今日6/6仲係非常扯，仍然覺得前幅身體唔屬於自己，正常拉直返個人通常要幾耐？我7月可以返工未？
另外係我其中一邊，將腹直肌反咗上去個轉彎位，即係乳房對落位置都突出得幾嚴重，同另一邊有好大difference, 點解嘅？手術出現咗問題？醫生話肌肉理論上冇咗神經線會慢慢萎縮返，細返？可以嗎？如果縮唔到同另一邊一樣，事後會唔會有咩可以做到？
今日在醫院偶遇馬醫生，只想真心向你表達謝意🙏🏼🙏🏼
大概一個月度。
七月返唔返到工要你先知。
手術效果問題要問返自己醫生。
肌肉可以打肉毒桿菌針(Botox)去縮細。
醫生你好，我做完左邊乳房切除及腹肌重建16日，重建的乳房外側又腫又硬，請問是否正常？會唔會壞死咗？正常幾時會消腫同變柔軟？
可以正常，又可以唔正常，手術問題要問返主刀醫生。
用闊背肌皮瓣做重建，是否會大大影響背肌力？活動能力會否喪失很多？對心胸會否影響很大？（本身心胸狀況不是太好）
影響少少腋下夾手袋能力。
整體活動能力冇咩野。
唔影響心胸。