乳癌化療選擇 － 咁多組合點樣揀？
乳癌化療咁多組合，點樣揀先好呀？睇咗私家腫瘤科醫生，建議打化療，但計落條數好重皮，返去公立醫院睇，醫生建議嘅方案又完全唔同。究竟係私家醫生呃我錢？定係公立醫院水皮／慳皮所以唔用私家醫生嘅方案？⋯⋯
呢篇應該係咁耐以黎最技術性嘅一篇，如果唔洗化療嘅當然唔洗睇，因為驚悶親你。 已經化緊療／有個好腫瘤科醫生跟緊嘅，又係唔洗睇，因為唔好煩／唔好返轉頭諗D過咗去嘅野喇。
「咁寫比咩人睇？」
就係寫比啲正掙扎緊唔同化療方案嘅困惑病友／家人睇。好多時睇咗私家腫瘤科醫生，建議咗A餐，但計落條數好重皮，返去公立醫院睇，醫生建議嘅方案又完全唔同，都唔知點算好。
究竟係私家醫生有利益衝突呃我錢？定係公立醫院水皮／慳皮所以唔用私家醫生嘅方案？
如果你知道有咩常用套餐，同埋每個套餐嘅分別，就比較易揀合適自己身體／荷包嘅方案。
未講套餐前，有兩大迷思要搞清楚：
點解個個醫生建議都唔同？
乳癌化療藥／組合咁多款，發展日新月異，但實驗需時，好多時都冇直接對頭（A餐對B餐）比較嘅數據。就好似譚仔三哥米線，咁多餸咁多湯底咁多組合，點能夠話麻辣牛丸米線好過清湯腩肉米線。所以好多時100個醫生有100個唔同嘅建議，如果能夠做到互相尊重，呢啲就係「天與地」所講嘅和諧。
「100個建議你醫生就和諧姐，咁我係病人都要揀都要落單㗎，咁即係麻辣10小辣定係大辣先得㗎？」
好嘅醫生就係會就住你食唔食到咁辣（身體頂唔頂得順）／有冇需要咁辣（乳癌高唔高危復發）／鍾唔鍾意咁辣（你嘅意願），去建議啱你嘅方案。
如果醫生清清楚楚／有條不紊咁解釋你聽，就算冇實際數據係手，你都應該要信佢，因為佢好清楚佢自己做緊乜。
如果醫生咦咦哦哦／咩都唔講就叫你做A餐，就算有實際數據係手，你都唔會信佢，因為你唔清楚佢究竟做緊乜。
所以原來揀化療方案好簡單，就係㨂個比到信心你嘅醫生。唔洗咁複雜咩證據／咩數據嘅，你去診症室感覺吓就得㗎喇。
私家D藥靚D？
唔好以為私家醫生D藥會新D靚D。
事實啱啱相反，如果你想試新藥，應該去做研究嘅龍頭教學醫院做化療。因為好多外國有效但香港未註冊嘅新藥（例如新嘅標靶藥），只可以參加研究先用得到，呢啲未註冊嘅靚藥真係「有錢都買唔到」。
「咁點解啲病友話公立啲藥冇咁好？」
完全岀於誤解。化療藥物私家同公立一模一樣，分別在於撞唔撞到個比到信心你嘅醫生。
有咁嘅誤解，係因為好多時公立醫院因資源關係，只會出嚴重副作用先用啲貴藥，如果普通副作用就用平藥搞掂佢。例如打紅魔鬼勁嘔先開靚啲嘅止嘔藥，或者化療發燒入院先有得免費打升白針。所以病人有錯覺公立冇靚藥。如果你識野有做功課，其實可以一早同公立醫生講你肯自費購買好少少嘅輔助藥物，醫生好樂意教你幾時買／點樣買。
攻略時間
如果你真係冇錢，信政府啦，香港嘅公營醫療服務係世界級水平。化療期間係辛苦少少，捱多少少副作用，不過治療成效冇分別（如果用同一個套餐嘅話）。
如果你有少少錢／點都想比最好嘅野比自己／老婆／媽媽，最慳錢嘅做法，就係搵個你有信心嘅私家醫生幫你揀套餐，之後去公立醫院打化療（唔洗介意公立醫生點諗，照直講咁揀咁揀係私家醫生建議，一般有醫德嘅醫生都應該體諒你嘅情況。如果佢冇醫德，你都唔洗在意呢D人點睇），所有靚少少嘅輔助藥物就自費買。
如果你好有錢，呢段咁辛苦嘅化療日子，梗係去私家享用埋一流嘅配套啦，錢又帶唔走嘅，唔好咁蠢「人在天堂，錢在銀行」。
乳癌化療
搞清楚以上兩大迷思之後，就係時候睇吓有咩常餐過你揀。上回「乳癌化療藥物 － AC針？TC針？乜黎㗎？」講到乳癌化療藥物有兩大主力A針同T針，原來呢兩隻藥會產生出3代6大常用組合。而家為你逐一破解：
AC x 4
AC x 4 係第一代乳癌化療組合，即係打Adriamycin－Cyclophosphamide組合4針，每三星期一針，成個療程12個星期。 因為第二／第三代嘅療效好過佢，所以已經比較少打，不過都要講，因為係完全免費。同埋佢係原祖級，非常之深入民心，之後啲化療組合都係呢個基礎變上去。
「有咩副作用？」
除咗一般化療副作用，獨特嘅副作用主要來自紅魔鬼A針，就係嘔。
「咩人適合？」
相對低危復發，但醫生覺得打少少化療會穩陣啲嘅病人。四針已經係最低消費。
「化療藥費幾多錢？」
因為呢啲藥好基本，所以政府會包，公立醫院完全免費。
FAC x 6 ／FEC x6
FAC x 6係第二代乳癌化療組合，即係打 5-Fluorouracil－Adriamycin－Cyclophosphamide組合6針，每三星期一針，成個療程18個星期。 醫生發覺原來加多隻F落AC度好啲，打多兩針又好啲，所以成就咗呢個組合。因為Epirubicin同Adriamycin係同類野（Anthracyclin），所以FAC／FEC一樣㗎姐，公立大部份都用FAC，因為平FEC啲啲。
「有咩副作用？」
同AC x 4一樣都係嘔，不過今次成個療程耐啲，成18個星期，嘔耐啲。
「咩人適合？」
乳癌一般惡，醫生驚AC x 4唔夠力，就會建議呢個組合。
「化療藥費幾多錢？」
基本藥物，冇得再平，公立醫院包晒。
TTC x 4
TTC x 4 （DC x 4）係第二代乳癌化療組合，即係打Taxotere－Cyclophosphamide組合4針，每三星期一針，成個療程12個星期。 呢個組合係將第一代AC x 4個A用TT取代，因為醫生知道Taxotere好過Adriamycin。有啲醫生會叫佢第1.5代，因為我地只係知道佢好過AC x 4，但冇研究對比TTC x 4同FAC x 6邊個好啲。另一部份醫生會睇佢成第二代，假設佢效果同FAC x 6差不多。
「有咩副作用？」
今次冇A，所以唔嘔。因為有TT，所以發燒。
「咩人適合？」
乳癌一般惡，醫生驚AC x 4唔夠力，但又唔想FAC x 6咁長時間咁辛苦，就會建議呢個組合。
「化療藥費幾多錢？」
因為屬自選性質想 打短時間啲／舒服啲，政府唔包，TT大概$8000一針，總數$32000。升白針自費。
FEC x 3 + TT x 3
FEC x 3 + TT x 3（FEC x 3 + D x 3）係第三代乳癌化療組合，即係先打5-Fluorouracil－Epirubicin－Cyclophosphamide組合3針，之後再打Taxotere 3針，每三星期一針，成個療程18個星期。 當醫生發覺Anthracycline同Taxotere大家都對乳癌好有效時，就諗點解唔組合埋一齊用呢？所以成就咗呢個先打E再打TT嘅組合。原本證明FEC x 3 + TT x 3好過第二代FEC x 6個研究（PACS 01 trial）係用FEC唔係FAC，所以就算E係貴過A少少，公立醫院想原汁原味，就用返FEC。
「有咩副作用？」
頭段有E，所以嘔。尾段有TT，所以發燒。因為呢個組合發燒風險高，所以政府已經包埋免費升白針。
「咩人適合？」
高危復發乳癌病人，例如已擴散至腋下淋巴，明顯第二代唔夠力，用上第三代好D。
「化療藥費幾多錢？」
如果擴散至腋下淋巴，研究擺明第三代好啲，所以唔到政府唔包，又係免費。如果只不過覺得自己高危（但腋下淋巴冇受影響），就要自己比錢$8000一針TT，總數$24000，升白針另計。
DD AC + P
DD AC + P（DD AC + T）係第三代乳癌化療組合，DD即係Dose Dense，藥劑量不變，不過密啲打，每2個星期一針。先打Adriamycin－Cyclophosphamide 組合4針，再打Paclitaxel 4針，成個療程16個星期。 當醫生知道化療組合係有Anthracyclin同埋Taxane一齊好啲之後，就開始諗，如果病人頂得順，打快啲／打密啲，等乳癌冇時間回氣，應該會好啲，所以成就咗每兩個星期打一針嘅密集組合，呢個組合身體一定要有升白針嘅幫助先頂得順。
「有咩副作用？」
有A所以頭段嘔，有P所以尾段發燒。
「咩人適合？」
有啲研究話DD AC + P用喺三陰性乳癌特別夾，所以私家醫生特別鍾意用佢係有擴散至淋巴嘅三陰性乳癌。
「化療藥費幾多錢？」
AC唔洗錢，P大概$2000一針，總數$8000，升白針另計。如果有擴散至淋巴，政府包P。
TAC
TAC係第三代乳癌化療組合，即係打Taxotere－Adriamycin－Cyclophosphamide組合6針，每三星期一針，成個療程18個星期。
與其分段先後打A同T，有啲醫生諗，不如激啲A同T一齊打，所以成就咗呢個最辛苦嘅化療組合TAC。
「有咩副作用？」
因為A同T一齊打，同一時間又嘔又發燒，最辛苦嘅組合。
「咩人適合？」
起碼病人本身要後生健康先頂得順，醫生就會揀啲最高危最高危嘅病人先會用呢個最毒組合，例如三陰性乳癌，加埋乳癌好大，加埋好多淋巴（甚至頸淋巴）受影響。
「化療藥費幾多錢？」
要打得咁毒嘅組合本身乳癌已經好惡，政府會全包（化療及升白針），完全免費。
咁多組合點樣揀？
「唔同代數嘅化療療效差幾遠？」
每一代比上一代好大概10－15%。
「點解唔係人人都打最好治療效果嘅第3代？」
第3代治療效果雖然好，但副作用亦相對勁。所以策略上，應該打最大實際效果而又最少副作用嘅一代：
如果唔係HER2型嘅：
1）乳癌唔惡：唔洗打化療。
2）乳癌少少惡：打少少穩陣啲（用第1代至第1.5代），有錢就TTC x 4，冇錢就AC x 4。
3）乳癌一般惡：打返第2代，有錢就TTC x 4，冇錢就FAC/FEC x 6。
4）乳癌好惡（例如淋巴受影響）：打第3代，正常就FEC x 3 + TT x 3，三陰性就DD AC + P。
5）乳癌極惡（好多淋巴受影響加腫瘤好大加三陰性）：打第3代，最激嘅TAC x 6或者DD AC + P。
「係喎，睇咗咁耐，都未見到標靶藥Herceptin嘅？」
好野吓，咁好心機睇咗6大組合都未暈。HER2型乳癌相對上就簡單啲（其實都好複雜），有標靶藥Herceptin嘅化療組合主要得3個，不過今次唔講住，因為你嘔㗎喇。
下一篇先同你講乳癌標靶治療 － 乳癌HER2型點樣揀？
香港乳癌及乳病治療中心 
what kind of food/fruit do we have to avoid if taking tamoxifen? I am a her2 patient. Currently , I’m undergoing herceptin and tamoxifen treatment . Is there any problem if taking turmeric and I3C supplement? Is there a problem if having an orange daily? Will these have unfavorable effect to those two treatment?
Pls reply by return.
Best regards
Wanda
為你寫左篇乳癌食療及食物禁忌 － 戒食雞？戒豆漿？，希望幫到你。
你好！我太太34歲9月確診右乳房三隂性一期無淋巴轉移腫瘤在私家醫院已經做咗Taxol/Carbo每2周打一次X6，10天前lumpectomy，連幾顆淋巴也摘除即時切片化驗証實無癌細胞，當時醫生都表示應該不用再打A針，今天復診傷口正常，但説最後報告化療縮小94%腫瘤，其餘手術全摘除，與腫瘤醫生開會後還是建議再打A組合針X4次才電療5周完成整個療程。補充太太姑姐和外祖母均有乳癌。這個建議對我太太心理打擊很大，因為之前2位醫生都沒有提給要打第二輪針，滿以為雖說是三陰性但一期且無淋巴轉移已經捱過辛苦的3個月化療且手術成功，再做5周電療就大告成，點知依家一月份又要捱A餐過年，心理難受⋯請問是否必要再打？不打adjuvant online 計算如何？
醫生亦提出之後做基因診斷，（另一姑姐近期做過測試無事）既然已經做完一切治療，這隔代family history,是否真的需要去做？太多心理壓力⋯
謝謝！
不是必須要再打。Adjuvant Online 未開返，不過佢都唔係咁樣用黎計洗唔洗補針。
至於基因測試則可以考慮，因為姑姐冇事唔代表太太冇事，可以自己係基因突變源頭（de novo mutation）。
謝謝回覆。基於腫瘤本身係三陰性，加上係Bloom & Richardson 3（切割後化驗B & R2）, 切割剩餘腫瘤時還有0.2cm,已經接受醫生建議打兩針，一針已經打完下星期就打埋最後一針。不過依個A針嘅反應比以前嘅化療辛苦。打完之後休息三星期再電療五星期就完畢了。
加油！好快完成就畢業。
謝謝解答。如果不幸真的基因突變源頭，有什麼可以做的？Prognosis 如何？
係咪源頭唔重要，要處理嘅只係基因突變，可以考慮預防性手術（切乳房／切卵巢），或者食抗荷爾蒙藥降低將來患癌風險。Prognosis要視乎什麼基因突變。
明白，再次感謝Breast HK 的解答。
Breast HK，你好！家人嚟緊會用TTC x 4，想請問除了打升白針外，可以食啲咩/補充啲咩/做啲咩…而可以令到病人舒服啲、副作用減低啲、唔需延期順利完成整個療程？謝謝！
嘅然你有緊急需要，我會好似電視台「由於節目調動關係」咁，講咗D你關心嘅野先：乳癌化療療程 － 吊針過程大公開
之後黎緊仲有幾篇都啱你洗嘅，得閒返黎睇，屋企人好需要你嘅支持，4針好快過。
Breast HK，謝謝你！真係講得非常易明又清晰，令我了解更多，我會繼續留意你嚟緊嘅post！
Breast HK, 因為媽媽唔想打升白咁麻煩 (聽病友講打升白仲辛苦過打T針) 但都想問如果金錢情況許可下 TTC x 4，FAC x 6 是否應該做TTC x 4 ? 兩者副作用/直白D問 痛苦程度 係未都係後者無咁勁 ? Thank. 🙂
TTC 一定好D，因為打四針，減頭減尾，9星期搞掂。就算同FAC一樣辛苦，起碼都短6星期先，時間快過好多。再者，A針嘔到飛起一定辛苦過TT發燒／升白針骨痛。
你媽媽怕打升白針，其實好多人都因為錢問題唔預防性咁打定先，真係白血球低先打。有D病友身體回復得快，真係成過療程冇打過升白針嘅。
媽媽話寧願辛苦少少 也不想浪費這麼多錢。最後都係選擇了FAC針 媽媽一向倔強 最後也就由她了。希望一切順利。 最後 謝謝Breast HK 所有文章都很有用 : )
唔好太介懷媽媽揀FAC，以前冇TTC時D人都只係打FAC㗎姐。佢慳錢都係為咗你，但佢知道你咁孝順，點辛苦都甜在心中。
「愛」⋯⋯勝過所有藥物，祝一切順利。
醫生，你好。我係T3, 已經接受了TC,局部切除手術，現正打AC中。想請問由打TC開始，本人時常忽冷忽熱，所以成日會着褸除褸，一時流汗，一時又要包毯。請問這是正常嗎？為何會有這情況？
化療本身唔會直接令你忽冷忽熱，要小心嘅係究竟係咪感染。有時感染未必會發燒，因為身體抵抗力低到連燒都燒唔起，只係覺得沾寒沾凍打冷震。你要留意有冇其他感染病癥，決定洗唔洗去睇醫生，常見嘅有上呼吸道感染（傷風／咳／啖）、腸胃感染（痾／嘔）、尿道感染（小便赤赤痛／好混濁）。
我唔可以話忽冷忽熱係正常（因為大部分人都唔會咁），不過如果冇感染嘅話，忽冷忽熱又冇害嘅，只係感覺唔舒服／麻煩D姐。
Breast HK，你好！
我的乳癌4.5cm,淋巴切18粒，有12粒感染，ER和PR陽性，不用打鏢鈀，己做手術，正電子掃描沒有轉移，現正在公立醫院做化療：AC×4,T×4,己完成五針，因為T針對我反應太大，全身勁骨痛，口腔，舌頭，喉嚨潰爛，我想只打T×2,打少二針T，想請教你可唔可以，對復發有影響嗎？
非常感謝！
你係第三期（pT2N3M0 stage 3C），本身比較大機會復發，所以打第三代化療DD ACx4 + Tx4。
你覺得對T針反應過大想打少D／早D停，其實我地點決定停唔停一隻化療藥，第一樣就睇係咪敏感，如果係藥物敏感，冇辦法，一定要停。如果唔係敏感，我地會試吓減劑量（dose reduction）或者打疏少少（2星期變3星期）先，睇吓完唔完成到療程。
如果完成唔到計劃中嘅療程，你問有冇影響復發機會。好對唔住，我只可以話有，因為我地相信化療嘅功效，係取決於：
1）用咩藥（Drug）
2）藥物劑量（Dose）
3）打幾密（Dosing frequency）
你心目中嘅計劃會影響以上3個因素，所以係會易D復發。至於有幾影響呢，就好難比個量化嘅數字你。你如果呢一刻就停，其實就好似完成咗第一代化療ACx4咁。
有3個建議比你：
1）你要搞清楚係唔係敏感
2）問吓醫生可唔可以減劑量／打疏D
3）如果冇辦法真係要停化療，記得要電療（希望可以補救少少）。另外如果後生未收經嘅，就同醫生傾吓好唔好抑制埋卵巢（Ovarian suppression）。因為以前有研究話，抑制卵巢加食抗荷爾蒙藥，功效同打咗好舊嘅化療組合CMF差不多。你腫瘤咁惡，後生嘅話值得抑制卵巢。
唔好太在意D復發數字，佢係比好悶的醫生去學術交流用嘅。人嘅野係整定嘅，你已經盡咗力聽醫生建議去點醫，身體頂唔順都冇辦法。有乳癌已經夠困擾，唔好再比D無謂嘅數字去束縛自己，人生有好多野值得你去在意。
Breast HK，你好！多謝你的答覆！
我以為自己腫瘤細胞不是Her2，冇咁惡，又有電療，再加五年荷爾蒙藥，打少二針T冇咁緊要，但聽你分析，我又好擔心，原來我的病愈後並不樂觀，我得四十出頭，仲後生，有個女，我唔想自己再有事，我會考慮你的建議，同醫生商量可唔可以減藥量，現在三個星期打一針，還有三針T，唔知可唔可以堅持落去？！
人生匆匆，人的一生只是一個過程，但此刻這個過程實在太痛苦！
乳癌惡唔惡睇好多因素，其中最重要係期數同種類，你非HER2型係好事，不過期數是後期，所以都係惡。
你提供多咗資料，有多2點意見：
1）你打3星期一針T，我估係Taxotere，你可以返去問問醫生，可唔可以轉每星期打一針Taxol，反應會冇咁大（因為劑量攤分每星期打一部分），舒服好多（原理有如少食多餐咁）。不過唔係每間公立醫院可以容許，因為三星期返黎一次變一星期返黎一次，醫護人員工作量大咗3倍，唔係個個系統可以承受到。你情況特殊，睇吓佢地幫唔幫到你。
2）40出頭，唔理你最後有冇抑制卵巢，我都會食10年抗荷爾蒙藥。
呢一刻係人生最痛苦嘅時刻，9星期，仲有9個星期，痛苦將會離你而去！你個女，就係你要撐落去嘅動力！支持住⋯⋯
Breast HK，非常多謝你利用寶貴時間來回答我的問題，我已拜讀你的文章，風趣幽默兼實用！
你真係一位仁醫，你的文章和你的正能量對我有好大幫助，還有9星期，痛苦過後就會見到光明！
大家加油！再次衷心多謝！
Breast HK，感謝你寫咗咁多資料，真係讓我瞭解得更徹底！
我今日見完腫瘤科醫生，佢比兩個組合我揀：
1）免費：AC X 4
2）自費：T (Taxotere) X 4
點解佢獨立用T? 而唔係TC?
用都應該係用TTC x4，只不過腫瘤科醫生冇講C，因為C係配角，又唔洗錢，佢費事你唔明／混淆你姐（9成9人唔會聽得明）。因此只講2個組合主要分別：A唔洗錢，TT要錢。
謝謝你的回應。我昨天覆診，攪清楚係打TC x 4。我透過你的blog知道T 係唔嘔的，但見藥劑師時，佢話C係會嘔的，醫生開咗普通止嘔藥先。請問普通止嘔藥頂得住嗎？
藥劑師啱，如果好仔細睇，C都係會嘔嘅。我唔寫出黎因為臨床上太輕微，普通止嘔藥已經搞得掂。如果每隻藥嘅副作用，連D好輕微／唔緊要嘅都詳細列出黎，隻隻都水蛇春咁長，只會嚇怕㥬惶無助嘅病友，冇人肯做化療。因此我避重就輕，希望鼓勵有需要化療嘅病友勇敢面對。
好感謝你那麼快回應我，那麼我放心很多了！我會勇敢面對！
我一邊看你的blog，一邊看病友的回應提問，你實在成為眾人的幫助。
我除了為各病友祈禱外，也為你祈禱，願你在煩重的工作上，得力，喜樂！
盼望各病友都積極面對！
Breast HK：
你實在是位仁醫，用自己寶貴的時間寫資料給徬徨的病人，願天主祝福保佑你。
我是一位年輕媽媽才三十多歲，兒子才1歳，剛完成切除手術，腫瘤4cm，好彩冇擴散至腋下淋巴，T2N0。ER和PRpositive，HERS negative，Ki67 high (70%)，我睇完你D資料覺得自己要打TAC，有點擔心（要等多一星期才見腫瘤科醫生）。我老公說如果公私立收費相差不遠（三幾萬之內），會叫我去私立做舒服D（同埋屋企可步行至某私家醫院），但我又想留D錢將來用，可否給一些意見。謝謝你
Mrs Lo
多謝你嘅祝福。
講返你個情況，字面行間，我估你已經接受咗化療呢個建議，甚至覺得自己要打TAC咁激。由你提供嘅資料黎睇：
惡嘅因素：後生，腫瘤大大地，Ki67好高
好嘅因素：淋巴冇擴散，ER／PR positive，HER2 negative，早期stage 2A
其實情況唔係最惡／最差嗰隻，TAC嘅額外著數著實唔多，所以我會建議TTCx4就夠。
因為淋巴冇擴散，所以TTC喺公立都係要比錢嘅，淨藥費＄32000度。私家呢就海鮮價，我估「相差」唔止三萬。你可以比幾百至千零蚊，搵個腫瘤科醫生問實大概幾多錢落樓，再決定去邊度做。
小朋友仲細，除非手頭好鬆動，唔係嘅話，我個人會傾向公立做化療（藥物療程一樣，係周邊配套嘅分別，最辛苦嘅時候兩個一樣都已經返咗屋企），寧願留多個錢比小朋友第時讀書。
Breast HK，謝謝你的回覆，原來在醫生眼中我這case 算不上惡。你説相差不只三萬，即係私家要六萬以上，所以我還是不考慮了。如果政府，伊利沙伯丶廣華和威爾斯那一間會冇咁多人？
另外我想問一下，我割了三粒腋下淋巴去測試，現在腋下丶上臂內側和後側丶膊頭後側都有痛和奇怪的感覺，想問這些是永久還是暫時性的？現在不能抱BB，有點心急
我諗間間政府醫院都多人，所以建議都係揀返自己居住嘅區份，咁樣會方便D（對要電療嘅病友尤其重要，不過你4cm我估都係全乳切除，而且淋巴又冇受影響，如果邊邊位唔係好近癌細胞嘅話，係冇需要電療嘅）。
另外提提你，廣華係冇獨立嘅臨床腫瘤科，病人見腫瘤科醫生／化療係要到瑪嘉烈醫院嘅。
割咗三粒，我假設係前哨淋巴啦，大部份神經都冇掂過／冇切到嘅，你嗰D病徵係暫時性，大概幾個月會好D。
Breast HK，我係三陰性乳癌，第一次化療5年前打了TCx4現在局部復發，照正電子素苗，暫時未發現擴散到其他地方、醫生已建議先做電療25次，然後化療！私人醫生的方案是打6支卡鉑加紫杉醇 每針四小時滴藥，公立醫院建議打Acx4，並説沒有其他自費藥物選擇？差別好像很大？
如果只係局部復發，最好睇吓有冇得再割，始終切除先係根治局部復發嘅方法。如果技術上切除係唔可行，就考慮化療先。如果縮得細，就再重新評估有冇得切。如果都仲係切唔到，就電療去加強控制。
至於化療選擇，已經去到復發階段，點樣揀已經冇一個統一標準，個別醫生嘅睇法可以相差好遠，我實不宜網上比太多意見。我只可以話Taxol-carboplatin x6 同ACx4都係可行選擇。理論上，三陰性乳癌對carboplatin嘅反應應該好夾，所以好多醫生都鍾意Taxol-carboplatin。不過實際上，我地又冇證據話Carboplatin 真係好D，所以有另一批醫生覺得應該用返對付乳癌都好好嘅紅魔鬼A針。
去到復發時，好多藥都政府包（免費），包括紫杉醇，所以已經唔太洗講自唔自費，主要係睇你醫生信邊一套。
Breast HK,你好。我在一月證實乳癌,已經接受了局部切除手術，現正打ACx4最後一針.現醫生建議，隨後用docetaxel(taxotere)x4取代之前計劃的taxol/herceptin x12.Herceptin三個星期打一針打一年.還會電療,食5年抗荷爾蒙藥.但是docetaxel(taxotere)副作用太可怕,唔可以堅持落去.此刻這個過程已經實在太痛苦,不要再更多,所以想放棄化療,其他照舊完成,成效如何?docetaxel(taxotere)副作用確實是否真的那麼可怕,指甲腳甲脫落?你可以分享一些意見嗎?謝謝
醫生,docetaxel(taxotere) 和 taxol/herceptin 成效差別 在那裡?差別 大嗎?
HER2型乳癌絕對建議用herceptin，唔辛苦嘅，而且成效顯著，冇咩醫生會有分歧。
剩落黎討論嘅只係完唔完成化療，呢個答案又係肯定嘅，頂得順我一定建議你撐落去，好快見到曙光。Taxotere同Taxol並唔係你想像中咁恐怖，大多數病友都覺T針舒服過A針。
至於Taxotere三星期一針（共4針）好D，定Taxol每星期一針（共12針）好D，其實冇對頭對比，成效我地睇成一樣嘅。唔舒服程度呢，就好似Taxol每星期都吊舒服D，係衰在個個星期都要去吊針麻煩姐。
Recently TC quotation by govt hospital is only $4700 (not $8000), is the dosage different, medicine different or any reason ? Any advice.
最大原因係用嘅劑量人人唔同，要用身高體重黎計一個叫「body surface area（BSA）身體表面面積」嘅數，之後再去計劑量。人越高／越重，BSA越大，所用嘅劑量越多，咁就越貴。
藥物唔同，當然唔同錢（打法／劑量都唔同），整體黎講Taxotere係貴過Taxol嘅，不過大家都係正廠藥。
第三個原因，就係視乎醫生／藥房點開藥，有冇幫你慳。
舉個例，打Taxotere-cyclophosphamide x4，重45kg，高150cm。
由身高體重計出BSA＝1.37m^2
Taxotere係要打75mg/m^2，即係要75×1.37＝103mg
精妙之處係Taxotere 大細唔同價嘅，一支大40mg要$4055，一支細20mg要$1141
如果醫生／藥房醒目幫你慳，就會開5支細（總共落100mg，嗰3mg算數，唔洗落到咁足／盡），等如$5705搞掂。
如果冇經驗，同樣落100mg，不過今次佢開2支大一支細，就已經要$9251。
如果醫生／藥房食米唔知價冇幫你慳，就會準一準開足103mg，開3支大再掉咁17mg，咁你就要$12165。就算開6支細掉咁17mg，你都要$6846先落到樓。
我上面寫$8000，基本上係大部分情況都夠找數，除咗超高／超重／食米唔知價例外。
佢而家收你$4700，只要你輕過45kg／矮過150cm／佢識幫你慳／來貨價平咗，就已經好合理。
Many thanks for the prompt reply
Breast hk 你好
本人38歲，lower-inner quadrant;stage 1B (P T1c Ni M0)醫生建議打3×Fec，3×T！。
我已完成3枝Fec,但今星期打T針時很辛苦，全身骨痛，無胃口，口發炎，有輕微，我想問餘下兩針可以唔打嗎？影響復發？
你意思係N1mi嗎？
仲有要提供以下資料：
1）乳房局部切除？全切除？
2）淋巴淨做前哨？有冇切晒？
3）ER? PR? HER2? Ki67? Tumor grade?
4）做唔做電療？
5）食唔食藥？
我係局部切除，要做電療，醫生話可以食藥，grade 1 ，淋巴做了二次手術，因為第一次做的時候話無，但化驗結果有一粒，好似約2mm,但再切就話無，我係N1miM0,stage1B,我問醫生點解要打6針，佢話淋巴感染了1粒，雖然好細，但要當二期咁醫，係做多左，想徹底d！
但我打呢針好辛苦，頂唔顺，我要照顧兩個小朋友，所以想放棄唔打！謝謝！
幫你用Adjuvant Online計一計：
1）唔化療、唔食藥：10年死亡率：9%；10年復發率：26%
2）打第一代化療、食5年Tamoxifen：10年死亡率：4%；10年復發率：11%
3）打第三代化療、食5年Tamoxifen：10年死亡率：3%；10年復發率：7%
你而家打咗4針，情況同第2相似，打埋落去，就會似第3。兩個情況實際分野應該再細D，因為以上資料係假設N1（即一至三粒淋巴受影響），你係N1mi，情況會好過上面。
另外如果你食足10年Tamoxifen，情況又會再好D。
所以如果你真係好頂唔順，而家就停都係一個合理選擇。
謝謝你的回覆，今次打化療針真的很辛苦，有發燒、肚瀉、骨痛、嘔、口爛，喉嚨痛，坐又唔得瞓又唔得，一星期瘦了8磅，如分別不大，我想真的放棄唔打！
分別有幾大，上面話咗D數據比你聽，點睇D數據就要你自己衡量吓，無論打定唔打，最黑暗嘅時候好快就過，加油！
十分感激你的回覆，謝謝你！
可否幫我計下adjuvant online，因家的Java安裝不了。
44歳，9mm，冇淋巴擴散，毒性2，ER+，PR+, HER2-, Ki67是24%,nuclear2, mitotic rate is intermediate.
醫生說我是化療的灰色地帶，所以已花$寄細胞去USA驗是否做化療，謝
幫你用Adjuvant Online 計一計：
1）唔化療、唔食藥：10年死亡率：3%；10年復發率：17.9%
2）打第二代化療、唔食藥：10年死亡率：1.7%；10年復發率：9.5%
3）唔化療、食5年Tamoxifen：10年死亡率：2%；10年復發率：11.2%
4）打第二代化療、食5年Tamoxifen：10年死亡率：1.1%；10年復發率：5.8%
以上比你參考，因為都已經做緊OncotypeDX，當然你會等埋個Result先決定。
謝謝!若要化療，我是打TTCx4嗎? 醫生說之後再電療20次，是否效果會更好，無言感激
啱，係TTCx4。你之前冇講係咪局部割，如果係就一定要電療。
AC針若自費買止嘔藥是否可減最重要的副作用，但TTC的副作用是否冇藥吃，大家都是12星期，除了$的因素，TTC真較好嗎?謝
A針你買止嘔藥係好D，冇咁辛苦。不過我地建議TTC嘅原因係佢功效好過第一代嘅ACx4。你見到上面adjuvant online計第二代TTCx4，功效都已經唔係十分明顯，如果用ACx4，功效再少D。
媽媽今年65歲, 兩個月前確診患三陰乳癌，已經4期！擴散至淋巴及肺部，兩星期前在QM開始化療，打第一釘TC。3日後雙腳出現紅疹，接著兩隻手都有，立即返腫瘤科見醫生，最後配類固醇止痕及消炎，兩天前嚴重脫髪，今日幾乎全光，非常擔心各種副作用迅速出現！怕她接受不到，她亦有便秘！請問醫生這些副作用正常嗎？是否TC太強，真的有需要由TC開始？謝謝！你之前提及打TC要自費, 但媽媽不用俾錢！此TC跟你説的是同一種嗎？聽說三陰很惡，患者存活期很低，真的嗎？謝謝！
敏感／脫髪系正常副作用。
乳癌四期打咩化療先，已經冇一套簡單章法可以教你，因為牽涉到大量因素／專業知識，只可以建議你信瑪麗腫瘤科啦。
去到乳癌四期咁惡，原本要比錢嘅Taxane政府已經免費包埋，所以你媽媽係唔洗比錢。
你媽媽係三陰性乳癌，呢度嘅TC通常係指Taxol-Carboplatin，同上文一般講嘅TTC（Taxotere-cyclophosphamide）係唔同野。
三陰性乳癌／四期乳癌，唔係三言兩語可以講得掂嘅野，黎緊會有三篇文章講，請耐心等候／密切留意。
感謝你的回覆！請問媽媽打的TC跟你說的TTC對治療三陰是否一樣成效？可以為媽媽用Adjuvant online評估她接受治療後的存活率及復發機會嗎？Thank you.
去到乳癌四期呢個階段，已經好難講實某某化療方案係咪好過另一個方案。好多時大部份化療藥都要用到，只不過係先後次序咁解。因此，個故事就會係打完第一線化療，到唔受控就轉第二線化療，如此類推。好多醫生都信carboplatin同三陰性乳癌夾D，所以第一線會Taxol-carboplatin咁打。
媽媽個情況並不合適用adjuvant online去計，因為佢要求／前設係冇轉移（非第四期乳癌）。
謝謝解釋，但聽完後感覺有點灰！4期真的很可怕，接受治療並不代表可以延長她的生命似的！其實醫生是根據甚麼情況斷定媽媽是4期而不是其他其數呢？
接受治療係可以延長壽命嘅，點斷定乳癌四期下星期六會講。
如果我屋企人系復發同擴到骨
醫生用紫衫醇加卡鉑 6次
我想問禁系咪即系叫tc
同埋用完好反同有反機率有幾高
同埋可以食咩營養品
減低其負作用？
啱，卡鉑即係Carboplatin。同上面位朋友一樣，係冇一個單一數字比到你，因為真係人人唔同。
沒咩特別營養品可以減低其副作用，做化療時飲食有咩留意可以睇睇「乳癌化療期間之飲食 － 點補身？洗唔洗戒口？」。
醫生你好，情況如下：
已做全乳房及淋巴(切除18粒，當中10粒受感染)切除手術，腫瘤36mm，術前已 PET Scan 冇其他器官擴散
報告結果：
N2T3aM0
ER+ 250/300
PR+ 270/300
HER2 Equivocal 2
Ki67 30%
公立醫院建議先化療，後電療及服用Tamoxifen
化療組合二選一，為 TAC x6 及 FEC x3 + TT x3
病人49歲，164cm 60kg，並無任何長期病患及現時身體狀況尚佳。
請問醫生對以上兩個化療組合有何意見？
謝謝！
應該係T2N3aM0先啱，你冇講FISH報告，由醫生嘅建議，估計係非HER2型。因為你個乳癌好惡（咁多淋巴有事，Ki67又高），我會傾向TAC x6，雖然冇直接對比話佢好過FECx3 ＋TTx3，但我信傳統智慧「苦口良藥」，頂得順就打最進取嘅組合。
感謝醫生寶貴意見
謝謝
Breast HK你好! 我媽媽今年52歲，已經做完全乳切除手術，報告結果如下：
T1cN1biM0 (30粒淋巴核,2粒有事)
Grade 2/3
ER+ 150/300
PR+ 150/300
HER2+
公立醫生話要化療，畀左兩個選擇我地考慮，
一個係FEC100 x3→Docetaxel x3，另一個係TAC x6
聽你講TAC x6係好辛苦，治療較惡乳癌
我媽媽病情算唔算嚴重?有冇需要打TAC x6?
而且呢兩個選擇的療效差幾多?
感謝!
你意思是N1mi嗎？同埋如果係HER2＋，就冇理由冇herceptin。你搞清楚淋巴期數同HER2 status先。
不好意思，我再更正一次!
pT1cN1bi (AJCC, 7th edition)
equivocal for c-erb B2 overexpression
你去問醫生搞清楚，N1mi就第一期B，N1b就第二期A，係冇N1bi嘅。
http://cancerstaging.org/references-tools/quickreferences/Documents/BreastLarge.pdf
HER2 equivocal就要做FISH test搞清楚陰性定陽性，先決定到點用藥。
breast HK 你好！我今年40歲，一月剛做完局部手術切除，報告結果如下：
ER+ Allred score =4/8 H-score=15/300
PR- both score 0
HER2- (score 1/3)
Ki67 80%
grade 3 invasive
pT1b
腫瘤9mm 冇擴散淋巴
是否三陰性乳癌呢？可否幫我用Adjuvant online計一計呢？謝謝！
照正計就唔係三陰性乳癌，不過我地知道你隻乳癌，雖然對抗荷爾蒙藥有反應，不過藥效就唔係好大。所以喺決定用唔用化療時，腫瘤科醫生可能會當三陰性乳癌咁醫，進取D用化療。但當去到決定用唔用抗荷爾蒙藥時，就當佢唔係三陰性咁醫，都係要食藥，因為藥效細，都仲係有效。
附近冇電腦有java，唔幫你用adjuvant online 計喇，40歲、荷爾蒙反應唔大、Ki67咁高、Grade3，已經會建議打TTC x4，之後食10年Tamoxifen。
謝謝你，醫生！我去看了腫瘤醫生，他建議我打Doxorubian + Cyclophosphamide x4. 如果頂得順再打埋Taxol(Paclitaxel) x4. 我驚我身體抵受不了，為什麼1期也要打那麼多針？後面4針是什麼呢？謝謝！
知唔知係咪叫你打Dose dense？即係2星期一針？
不是呀，每3星期1針。
主流第一期三陰性乳癌都係打TTCx4，不過都有醫生覺得ACx4唔會差得遠，都可以咁打。
主流第二／三期三陰性乳癌就會打Dose Dense AC+P。
你醫生可能見你Ki67咁高，覺得頂得順就加幾針安心D。但咁做係咪真係好D冇人知，我只可以話呢個唔係常見做法。
謝謝你，我決定打丅Cx4，做我做手術的醫生也如此建議。
我女儿四十歲有三隂乳癌医生说做完化疗电療仲要食AI新葯兼每月打停経針打五年，請問停経針有無小型的而且是每三個月打一次的那一種呢？
三陰就唔會食AI／停經針，食AI／停經針就唔係三陰。
停經針有三個月打一次的配方，唔明你講咩小型唔小型。
醫生您好！請問二期B HER2-陰性。係咪應該打第3代，FEC x 3 + TT x 3，聽日見腫瘤科醫生，我應該注意問醫生什麼呢?副作用，有無好些的藥，化療時間有無短些，還有其他注意要問麼? 不是her2 是否不用標靶藥，咁私家醫院進行化療電療大約需要幾多洗費呢?想用些好些的藥時間短些副作用少d.唔該曬您。
非HER2型第二期B乳癌，大致上係打第三代化療，實際打咩要睇埋荷爾蒙受體係陰定陽性。
見腫瘤科問咩真係冇得教，只可以話問一D你關心但又唔識嘅野。
化療藥物嘅選擇首重藥效，同時間長短／副作用無關係，唔係話時間短D／副作用少D就等如好。
不是HER2不用標靶。
電療大概幾萬到十幾萬之間，範圍可以好闊。
唔該曬你，等下見醫生有些緊張。謝謝您的詳細答覆，心都很過d.
醫生，你好。我今年40歲，上年4月完成乳房切除手術，當時是ER+, 2A期，那時醫生說我的情況不用電療，可加減化療及食荷爾蒙藥。但我聽信了中醫，放棄選擇化療與荷爾蒙治療，結果今年1月發現局部復發，照過pet scan沒有擴散，淋巴結有兩顆腫瘤，1顆5.5cm, 另一顆2cm. 在2月中做了手術切除，化驗結果為ER Score: 8, PR Score: 7, Ki-67: 75%, c-erbB2: 1, 割了16粒淋巴，只有兩顆有癌腫。今天剛往腫瘤科決定化療方案，醫生給予TAC，以及PACS01 (FEC100–> Doxetaxel)這兩個組合選擇，我看過你以上的文章講解，謝謝你，很詳細，也見到你回應說TAC是苦口良藥。醫生說FEC100不用打增白血球針，但TAC要，是嗎？因為你資料說FEC的後3針也要打增白血球針。請問，以我的情況，TAC和FEC100哪一隻會成效較大？如果自費，還會否有其他化療組合副作用較少又適合我情況的可以選擇？ 謝謝你。
打唔打升白針主要睇頂唔頂得順，上面話PACS01要打，係因為政府已經包埋，主要想話比病友知有免費野姐，如果身體頂得順，係可以唔打嘅。
醫生比得你揀2個組合，即係冇一個方案有壓倒勝優勢，主要睇個人取向。比著係我，我會揀TAC（非科學化驗証），因為淋巴話就話兩粒有感染，但大嗰粒成5.5cm，係好大架喇，咁多癌細胞，進取D啦。
你呢個情況揀咩藥同錢銀冇關係，比得起都冇額外選擇。
謝謝你的回覆，心裡真感到驚惶，唔知自己情況仲能否完全康復。請問有沒有什麼方法可以減輕化療的副作用呢？謝謝。
乳癌化療副作用 － 辛唔辛苦？點處理？
醫生，十分感謝你的詳盡資料，對我很有幫助，且釋去我不少疑慮，謝謝你。
Jo
你好！我 52歲,剛做完全乳切除手術。報告如下：
Er+
Pr+
CerbB2（0）
Ki67 20%
腫瘤1.4cm
擴散至4 粒淋巴
請問有何化療組合適合我而成效好？
FECx3 + TTx3
謝謝！
你的分享令病人得益不少!
您好醫生，我媽咪63歲，一個月前做咗左乳全切同側淋巴12粒2粒有事。以家準備係屯門醫院化療同埋電療。不過見醫生時果D數據咩都冇講，淨係話二期B.今日見藥劑師，同我D解釋要打FEC*3+TT*3,同解釋好多副作用。不過，我幾時先可以知道例如KI67,ER之類的數據呢？而且，藥劑師話，我的針係免費，仲包埋升白針。請問我媽的病情係唔係已經好惡？如果按呢個組合打人頂唔頂得住？我D有冇可以自費升級打的其他化療方案？仲希望可以幫我計一計果個幾年的復發同死亡率？唔好意思，問咗更多，多謝嗮！
sorry,補充一句，我媽個瘤係2cm以下，多謝！
你要知道乳癌詳細數據有兩個途徑：
1）覆診時直接問醫生
2）申請醫療病理報告
病情係咪好惡？身體頂唔頂得住？復發同死亡率？呢D問題喺缺乏大量資料情況下，不適宜網上亂加評論，只建議你問返自己醫生。不過有樣野睇到錯嘅就係期數，如果腫瘤細過2cm，即係T1，淋巴有2粒有野，即係N1。T1N1係第二期A，並唔係第二期B。
如果隻乳癌唔係三陰性，都係會建議FECx3＋TTx3，並唔存在自費升級方案。
您好，今日複診，問著病理報告。醫生話係二期B,ER+,PR-,HER-,Ki-67係10%原來個瘤切出來係2.2CM,淋巴先做前哨，切4粒2粒有事，後來又切8粒冇事。就係12粒2粒有事。另外，我媽63歲，身體冇其他問題。醫生話打FEC*3+TT*3,電療加仲食荷爾蒙，因為年紀大，所以開著六隻升白針，梗係唔係全面D?多謝！
如果有埋tumor grade就詳細D。初步喺唔知tumor grade情況下用adjuvant online計：
1）唔化療、唔食藥：10年死亡率：38.9%；10年復發率：61.4%
2）唔化療、食5年Tamoxifen：10年死亡率：28.8%；10年復發率：44.2%
3）打第三代化療、食5年Tamoxifen：10年死亡率：19%；10年復發率：28.9%
好多謝你，媽咪已經開始化療，昨天第一天了。
醫生你好,家姐今天剛見完腫瘤科醫生,他給了兩個組合:1)TAC x6. 2)FECx3+Docetaxel x3. 還要吃一隻Tamoxifen荷爾蒙藥.
家姐50歲,150cm高,50.5kg,是局部切除,報告是:(ER-290,PR-280,Ki 67-13%,HER2-1),Pathological stage:T1c(m) N1mi.醫生說是1B期.淋巴切咗6粒,有一粒擴散0.24mm.
從以上文章寫TAC組合係對啲好惡癌,但家姐係1B期,都要用咁勁藥?
組合2的藥醫生說要自費打升白針.
可否給些意見,我們應該如何選擇呢?
你家姐嗰腫瘤唔係十分惡姐，未洗用到TAC，我個人傾向組合2，而家升白針減價戰已經平咗好多好多。
謝謝醫生回覆.我會同家姐講ka la.
醫生,你好,我看了你不少文章,很受用,也看見這文章較多人發問,所以我也在這發問了.
今天,我與媽媽問了醫生, 她是 T3, N1a, M0 / ER as 4 / PR as 8 / Her2 Score 1
因沒能問到Ki-67[這醫生是乳癌外科,不是ca科… (明明伊利沙伯的nurse與我說這天是見主治醫師才請這天假的…T_T)
所以,我提供pet-scan 的資料.
[Head & Neck: Lt upper jugular LN 0.9×1.5—-SUV max 2.1 , Rt posterior triangle LN 0.8X0.6—-SUV max 1.5]
[Thorax : Lt pectoral LN 0.9×0.9—-SUV max 0.8, Lt axillary LNs up to 1.0X1.9—-SUV max 1.6
Lt breast mass 2.4×3.2×4.5—-SUV max 6.8, Lt breast nodiles up to 1.5×1.4 —-SUV max up to 1.9
Rt breast calcifications up to 0.5—-SUV max none, RML nodule 0.3 —–SUV max none]
[Abdomen & Pelvis : Lt renal cyst 2.6×3.3 —-SUV max none]
1. 醫生說Her2 中的Score 1等於不是Her2 型,請問 Score 1 是甚麼?
2. 我問她可以幫我看看Ki-67的百分率,看著她CHECK 電腦資料的,但她回應說找不到.不過又找到T3,N1a,M0 等其他資料.(有約4~5頁那麼長), 她不知道是有可能嗎? 還是擔心我們知道,或是其他因素?
3. PET SCAN中有說出, HEAD & NECK,都有,SUV MAX 都過2了, 是有問題嗎? 如有,會是甚麼問題? (有D英文文章說過2是好似是有問題的,不過我看不懂)
4. PET SCAN中的乳房是最大SIZE 4.5CM,但術後報告出了是5.5CM….. 而,PET SCAN後半個月就做手術了…半個月升了1CM是否很惡? (有可能升那麼快?) (還是PET SCAN 只看到腫瘤SIZE,看不清楚侵犯性腫瘤SIZE?)
5. CA科已給選擇, FECx3＋TTx3 或 TAC, 就以上資料而言,選那個比較好? 或是差不了多少?
6. 就以上資料,可以幫我計一計復發同死亡率?
十分抱歉,問了這樣多問題,又那麼多資料… 但我認為你這裡是最給到我信心的,期待你的回答.
1. HER2 score 1係低分，代表「非HER2型」。
2. Ki67好多公立醫院係唔做嘅，所以醫生搵唔到唔出奇，冇野隱瞞你。
3. PET scan 唔係就咁睇Suv Max，仲要考慮分佈、病歷、病徴等等，唔可以就咁網上答，你可以參考醫生係結論寫佢覺得似乜，之後跟進不外乎定期再照／抽針確定有冇野。
4. PET scan或者其他scan 嗰size係唔準嘅，一切以顯微鏡為準，所以唔存在「係咪短時間大咗」呢個問題。
5. 兩個方案都係第三代化療，療效理應差不多。不過如果頂得順，我會傾向TAC（苦口良藥）。
6. 要提供歲數，Tumor Grade，有冇長期病患等資料先有得計。
謝謝,醫生.等遲點出健康報告,可行時再問她轉不轉TAC…
補充多一點,我媽媽會做埋電療.
我媽媽只有高血壓,53歲,TUMOR GRADE (呢個我都有問她,但她回應說,T3就是TUMOR GRADE了,我諗我那天帶了口罩又講得太細聲了.)
T3 係TNM staging中tumor size 嘅staging，同histological grade 係兩回事。
了解,我還是等一星期多一點後,問了TUMOR GRADE再告訴你幫我計,以免現在計出的數字,我也會嚇倒…
我諗是我說錯的可能較大或是說話真太細聲了,謝謝解答^^
化療後便秘怎樣解決？
便秘都係主要確保以下三樣野多／足夠：水份、運動、纖維。仲唔得就食藥囉。
我知道回復的位置不太好『一個回復了在3 April, 下面，一個開了新回復』，對不起『這網的回文我不太會用T_T』
在這回多一次，請醫生見諒，雖然機率的結果不會太好，但我都想係心裡有個底。
其實，我想也沒想過我媽3A,grade 3也等了一個月才做化療『與某女士2B 同日化療』，本來還心裡安慰自己，等得久就會比較好吧『政府醫院一向比d 嚴重優先。』。。。
我媽53歲，T3N1M0, Er as 4, Pr as 8, HER2 score1, Tumor grade 3, 淋巴23 粒中有3粒有事，有高血壓. 打Fec x3 + TT x3.
雖然我知道結果不太樂觀，但也想請你幫我計一計個復發同死亡率，謝謝。
幫你用adjuvant online計：
1）唔化療、唔食藥：10年死亡率：57%；10年復發率：78%
2）唔化療、食5年Tamoxifen：10年死亡率：44%；10年復發率：60%
3）打第三代化療、食5年Tamoxifen：10年死亡率：27%；10年復發率：36%
多謝醫生那麼快的回覆，比我看的綜合3期的要低，那是5 年死亡約40% 2010 左右年版本。
現左，媽媽打fec 還算好，不過比之前真的疲累了不少，希望打TT 時也只是疲累就好了，我有空會留意這網址的，真的謝謝你。
三陰性stage 1, ki67:90%，10/4確診的。淋巴未見受影響。私家醫生轉介去XX政府醫院果邊化療，為咗快，已經係出面做咗blood tests同心電圖等。私家醫生建議見一次XX醫院私人果邊的外科醫生，希望盡快安排化療。但見完XX醫院私家醫生話出面做的blood test唔可以做reference, 亦要做pet scan先可以決定化療藥，又要等一星期。我唔想等，因為只係想經佢睇完報告轉介去政府。呢家我要求佢轉介我去政府，佢話要排大隊。其實我想知，我呢家簽同意書，佢地轉介去政府，要幾耐先可以決定到用咩化療藥，再幾耐先安排到化療？pet scan係咪一定要決定化療藥或化療前做？如果唔係，我係咪應該唔做pet scan住？
做咗手術未？
未。
乳癌臨床一期淋巴初步評估冇受影響，即係腫瘤細過2cm，化療可以手術前或手術後做。問題係點解咁想手術前做化療？想局部割但乳房好細？
已決定先化療去控制咗先，想知政府醫院安排時間會係點。
拿轉介信去排腫瘤科，時間幾耐間間醫院唔同，真係排咗先至知，呢一部份係最耐嘅。見到醫生其實好快（一星期度）已經可以開始化療，打T針抽血冇野就做得，如果打A針，就要做心臟檢查（你比錢出去做就可以理順成個流程）。PET scan係影響嗰評估，對用藥係有影響，但因為自費關係，其實佢唔會阻到你嘅進程。你可以係等見腫瘤科醫生之前做咗PET scan，咁就唔怕阻礙咗打化療嘅時間。
謝謝你咁快覆
PET scan report 話有9mm isometabolic node同mildly hypermetabolic node in level IV in jugular chain, 個腫瘤現在係21mmx20mm。已打第一針化療，我見醫生的prescription 寫DD TC 同DD EC x 6. 每兩星期打一針，共12針。其實我想知係咪即係好差，好惡，係第三期？
要睇詳細報告先知，同埋取決於頸部淋巴係咪真係有野（加減抽幼針）。
化療藥係carboplatin 同paclitaxel
你好！我媽媽58歲，有二型糖尿，食緊Diamicron 40mg om + Metformin 500mg TDS
佢左胸有一大塊mass，外面就咁度9cm x 8cm，24/4 HA抽血照肺抽幼針，WCC 10，ALP 110，FNAC話ductal carcinoma，28/4 bedside USG話睇到有3粒淋巴，淨係做左core biopsy for tumour biological behaviour，30/4 做左個pet-ct話冇擴散去其他器官，但至少見到5粒foci，suggestive of multiple metastatic lymphadenopathy，同埋話有個satellite lesion，我估即係有分左兩粒。排緊期去qeh見oncology，HA同private都話要打chemo縮左先睇下點做手術。
心焦如焚，想請教吓，
１，點解會唔使做lymph node biopsy就可以開始化療？係咪個乳癌已經好惡？因此冇乜機會好番哂所以先會先化療後切除？
２，以你估計係咪已經可以免費用到第三代藥？用到咩套餐機會大？
３，佢係咪已經去到第三期ｂ？
４，其實等嘅期間有冇需要搵個私家腫瘤科睇／出去做心臟超聲波／有乜野可以事先準備？
５，好驚私家幫我排期有排都未排到，但佢情況係咪都算Urgent？……
如需要更詳細資料我會馬上補充，感激你的時間心力為我們解難！
1）如果PET scan好肯定淋巴擴散，係可以唔抽淋巴驗的。因為抽中又係咁醫，抽唔中醫生都唔信冇野，又係當淋巴有野咁醫。9cm腫瘤加埋幾粒淋巴有野，係好惡嘅，不過只要一日未擴散都仲有機會根治。唔傾向直接做手術，因為會好困難，除非乳房好大，如果唔係係好難刪埋個傷口。
2）合資格免費化療，用咩組合視乎抽粗針結果。
3）假設腫瘤侵蝕性部分大過5cm（起碼T3），淋巴多過4粒受影響（起碼N2），T3N2M0係第三期A。
4）而家最主要等粗針報告出，先知用咩藥。可以做定心臓超聲波，咁會令個流程順利D。揾唔揾私家睇主要取決於你信唔信公立醫院，同埋有冇錢。
5）私家唔係得一間，可以用腳投票，呢間等得耐咪去第二間。佢情況係urgent。
你好!我今年35歲，前段時間做左全乳切除加重建，我自己所知就系腫瘤2.1CM，2A，無淋巴轉移，GRADE 3，醫生話打4次化療，食5年藥。比左兩個組我選擇，AC和TTC。醫生就話效果相差唔大，藥劑師就話AC對心臟有影響，而我本身一直無心臟方面的問題。請問我應該點選擇好，AC和TTC的治癒率和復發率各系幾多？
除非嫌貴，如果唔係就會揀TTCx4。
好多謝你咁快覆我！TTC係咪相對黎講，比AC好好多
一定好過ACx4，多少就係相對概念，人人觀感唔同，太籠統咁講唔係太好。
你好，我今年50多歲，患上乳癌第三期，已做了乳房切除手術，政府醫生和私家醫生都建議我化療方案是FEC + DOCETAXEL，唯一不同的是政府是FEC X 3 + Docetaxel x 3，三星期打一次; 而私家就FEC X3 + TAXOL x9，前三針一樣，後三針分9 次打，每星期打一針，每次打1/3劑量。我已在政府捱了頭2針，好辛苦。現想請教，後面三針應否考慮去私家打，因費用頗昂貴，是否真的無咁辛苦，同埋效果好的。政府會包埋打升白針又令我考慮好唔好留番係政府。好難決定，想聽聽閣下議見，謝謝﹗
效用黎講，兩個方案冇對頭對比，所以你可以當佢地效用一樣。
舒服程度黎講，我眼見係weekly taxol舒服好多。
頭三針FEC一定辛苦好多，尾三針相對一定舒服D。去唔去私家就睇你經濟情況，如果要賣當借，留返係政府啦。經濟情況許可不過想慳錢，就喺政府打一針docetaxel睇吓有幾辛苦／頂唔頂得順先決定尾兩針去邊度打。如果經濟寬鬆，梗係去私家。
您好，我好迷惘，我做完右邊切除手術，私家醫生给轉介信到威爾斯，9月1日入纸，等到9月30日首次見醫生，今天見完醫生，又話等到10月30日見化療師，都唔知幾時做化療？都唔知我等唔等得咁耐？
政府醫院是不是等咁耐？我淋巴有，有擴散到骨，應用什麼藥？HER2 negative, PR positive
需不需要電療？有無可能日後返工維持生計？
我四十幾歲？會不會翻發？麻煩哂
成個流程都同一般個案有出入。
首先，幾時知道有骨擴散？如果好早已經知道，一般黎講唔會做手術／唔會做手術先，應該盡早做化療。
第二，香港係冇「化療師」呢個職業，如果今天見嘅係腫瘤科醫生，理應已經決定到下一步打咩化療／大概幾時打。
之後打咩化療／需不需要電療，取決於身體狀況同埋擴散程度，要問返腫瘤科醫生。
已經擴散去骨，即係第四期乳癌，重點已經唔係會唔會翻發，重點在於如何控制佢，與佢共存。
乳癌四期治療攻略 － 末期仲有冇得醫？
您好，
今天首次見政府醫生，只给AC,紫杉醇，紫杉特爾化學治療須知给我，要一個月後才見化療師和確定日期做化療，我驚會再走散，可不可以叫私家醫生打一次AC針，然後再可到政府醫院接力，因無咁多錢……
我都不知，佢比了腫瘤科化療覆診預約，到10月30日見，其實我不幸，早期看時，醫生經化驗所抽針，scan看不到擴散，說我一期，確診10日後做手術，醫生做手術時話我淋巴硬，割了化驗才發現，手術4日後才做pet scan,因我唔識
去私家打一針，再到政府接力，不失為一個加速治療嘅好方法。
你真是個仁醫又專業，早知有你，就不會信錯個外科醫生。如我30日見政府腫瘤化療科，幾多日才開始化療？今天是見腫瘤普通科(預约纸寫)，ER 300, PR 230, HER2 negative, KI-67 30%, 骨有轉移，是不是由AC針開始？，那種療程會適合？需要幾多針？麻煩晒
A針會傷心臓，所以事前要做心臟檢查。另外化療要抽基本血加埋驗乙型丙型肝炎帶菌。如果呢D結果齊備，30號見完醫生後幾日內開始化療才合理。如果事前咩都冇準備，30號見醫生先安排做檢查，咁又阻遲咗化療當然唔理想。
如果打AC針開始，一般會打4針先，之後再決定下一步點做。
非常感謝，诀定在私家打第一針，约13號打，之前要去私家驗血和心電圖，這些資料可不可以用在政府接力？
可以在政府用返，不過提你心臓檢查不是心電圖，而是功能測試，即心臓超聲波（echocardiogram），或心臓核子掃瞄（MUGA scan）。
非常感謝你無分日夜為我們解答，多謝……
仁醫，請問 pT2N2aM1 是什麼？正常人是不是無癌症指標？如指標是11.4 ( ref《 or=31.3 )未做化療，前景是否樂觀？非常多謝……
M1即係代表有遠端擴散，是乳癌第四期。
乳癌四期 － 我係咪第4期？
癌指數正常人都有嘅，你而家有擴散都唔高，即係代表佢唔係一個好好嘅工具去監察進度。
已經係第四期，重點在於控制嗰病，中途要好小心，未敢輕言樂觀。
乳癌四期治療攻略 － 末期仲有冇得醫？
請問用什麼工具去監測較理想？近年有什麼藥研發控制此病，謝謝……
最好用PET scan，次一個選擇就CT scan同Bone scan。
醫學日新月異，好難三言兩語總結新發展。自己係度慢慢睇，你需要知嘅野九成九已經包括咗係度。
請問升白針打肚皮可唔可以？
定一定要打手臂？
謝謝
主要打落皮下脂肪，所以可以打肚皮。
在adrenal lesion 有1.5×1.3cm, 骨有擴散，醫生說打6針和跟住食賀爾蒙藥，由AC開始，不需電療和標把藥，是不是醫生放棄我？
呢個可以好肯定答你：「不是，醫生沒有放棄你！」
此粒瘤，做化療而不做電療，可以控制到？打骨針可不可以修補骨有少許洞？
控唔控制到就睇做化，不過重點係唔好因為醫生唔做某某治療，就誤會醫生放棄你。醫生係會因應當時情況，平衡風險及好處，為你決定最合適嘅治療。呢一刻唔做某某治療，第時情況如果合適可能會做返。
辭彙上，我地唔會「修補骨有少許洞」咁講，不過概念上，同骨針嘅功用係源出一澈，主要係減少因乳癌骨擴散所引起的骨痛及骨折。
非常感謝和專業……
你好醫生!我媽媽58歲剛切右BREAST腫瘤DCIS-14MM和3粒前哨淋巴，沒有擴散，淋巴都冇事!
報告:”Estrogen receptor-Postive Alired:8/8,H-Score300/300″,”Progresterone receptor: Equivocal Alired:3/8,H-Score:0/300″,”KI67:75%”, HER2:Postive:3″
醫生建議MUMMY 做全餐: 荷爾蒙藥，化療,電療加標靶，由於MUMMY 勁唔想做化療，我想請問我們有什麼選擇呀?咩都唔做這情況復發率有幾高呀?
可以淨係做 荷爾蒙藥，電療加標靶 或 荷爾蒙藥加電療嗎? 這樣會降低復發機會嗎? 謝謝幫忙!
你要搞清楚兩樣野：
1）究竟係原位癌DCIS定有侵蝕性（invasive carcinoma）？原位癌我地唔會做化療／標靶治療的，一係醫生錯（可能性較細），一係你覆述錯（可能性較大）。
2）另外點解要電療？因為局部割？因為紙口(margin)唔夠？呢樣野你的提問中冇交代清楚。
多謝醫生提點，我看錯了，sorry,應係invasive carcinoma,淋巴-netgative,局部割,紙口-clear,那請問不做化療，可以嗎？
可以淨係做 荷爾蒙藥，電療加標靶 或 荷爾蒙藥加電療嗎? 這樣會降低復發機會嗎?
關於你媽媽個情況，我同你醫生睇法一致，都係建議全餐做囇。
你問題核心係問可唔可以免去化療，淨做其他治療。你要明白一樣野，所有輔助治療（化療、標靶治療、電療、荷爾蒙治療）雖然手法不同，但佢地嘅目的只有一個，就係令到個病唔好復發，希望延長壽命。佢地之間並肩而行，冇話一樣可以代替另一樣。你自己當然有權選擇做／唔做某某治療。當你選擇唔做某某治療時，可能性只有兩個。仍然冇復發的話，恭喜你，比你搏到了。但當復發時，只可以怪自己未盡全力。
你而家去向女神求婚，當然開行你副浪漫嘅turbo，又五卡鑽戒，又燭光晚餐，又99枝玫瑰，又拍YouTube片，仲租埋直升機。呢D輔助野雖然手法不同，但佢地嘅目的只有一個，就係令到女神唔好拒絕，希望延續浪漫愛情故事。佢地之間並肩而行，冇話一樣可以代替另一樣。你自己當然有權選擇做／唔做某某動作。當你選擇唔做某某動作時，可能性只有兩個。仍然抱得美人歸，恭喜你，比你搏到了。但當食檸檬時，只可以怪自己未盡全力。
謝謝醫生既寶貴意見!我會盡力說服mummy!可否幫忙提供病發率數據給我說服mummy ar!感激!
呢D係一D好複雜嘅野，冇單一簡單數據比到你。你可以睇吓以下藥廠網頁，佢為咗賣藥已經係最精華版，不過冇醫學背景去睇會覺得好吃力。
http://www.herceptin.com/hcp/treatment/adjuvant/studies
多謝醫生!其實化療是否像mummy想像中那麼辛苦呢？
過程，係辛苦嘅。不過經過努力而得來嘅成果，係甜美嘅。
乳癌化療副作用 － 辛唔辛苦？點處理？
將要接受化療，會一星期打一次Carbopleutin, Epirubicin 同 Taxol; 係進取嘅打法？因為好似啲名又同以上你介紹嘅有啲唔同所以想問下。同埋有咩副作用？（英文有機會串錯因為睇唔清左醫生寫乜）
我地一般唔會咁打，同埋epirubicin係唔會每星期打。
副作用就睇乳癌化療副作用 － 辛唔辛苦？點處理？
點解一般唔會咁打？又或者有咩情況先會咁打？我有啲驚.
每星期打Taxol-Carboplatin就會，不過epirubicin 呢隻藥係每三星期落一次，並唔會好似你講到咁一齊落。
大部份情況都唔會咁打，我唯一見過就係有D腫瘤科覺得Taxol-carboplatin喺三陰性好D，但又唔放心唔落A針，就weekly Taxol-Carboplatin 之後先3 weekly epirubicin。
醫生，希望你仲會睇留言， 你真的幫了很多人！
媽媽 58 歲， 上月已做全乳切除手術， 病理報告為
T2(22mm)N1a(1/18) Gr2,
LVP +ve
IDC extensive
ER 270 (8）PR 120(7) cerb2b score 2, FISH -ve
腫瘤科醫生給予 FEC x3 + TT x3 or TAC *6, 請問那個療程轉適合媽媽？ 謝謝！
兩個都得，一般都係揀FECx3 + TTx3，進取就TACx6。
醫生，多謝你咁快覆我！ 請問媽媽呢款癌算惡嗎？如果揀TAC x 6 會比FECx3 + TT x3 著數幾多？ 我聽人講打TAC 會嘔血， 我驚媽媽會好灰心⋯
再一次感謝你回覆！
一般般，種類就唔算惡，但淋巴有擴散始終都叫惡。
大家都係第三代，TAC著數唔會好幾多。嘔血就係流言（除非血小板真係低到自然出血嘅低水平，唔好比一D罕有嘅情況嚇怕），不過過程係辛苦嘅，T同A針一齊落。
醫生你好，希望你仲會回覆。我今年25歲（好後生），做左術前化療TTCH+perjeta *6. 其後做左全乳切除+重建. 本身我個case係多發性乳癌，唔知係咪你所講既局部廣泛性。最初有3個腫瘤係左邊乳房. 經過術前化療後, 我果3個腫瘤有一個完全消失，另外兩個分別係8mm and 6.5mm. 報告寫係partial response. 做埋淋巴切除，有3/19腋下淋巴受感染。margin 20mm. 我係ER-, PR-, her2+. Ki67 80%, grade 3. 醫生建議我再打EC*4, 同埋做螺旋式放療，再打埋herceptin *12. 我想請問, 做咁多化療，心臟功能會唔會受到好大影響？我最初心跳below 70 per min, 做完術前化療已經升到9x per min. 另外既係, 我上網睇neosphere 個treatment有d組合係texotere+heceptin+perjeta*4+術後fec*3. 我想問我呢個情況可唔可以打fec*3? 打fec*3同ec*4分別大唔大？唔該醫生！
其實係我實在唔想再打咁長化療…想少得一針就一針…T^T
打多4針A針對心臟的確係一種挑戰，不過你打完雙標靶都仲有3粒淋巴受影響，即係隻癌真係好惡，我完全理解醫生點解建議你打多4針。副作用係有，不過醫生會照顧你㗎喇，你試諗吓有咩人會fit得過25歲？你都頂唔順嘅話，仲有邊個頂得順？放心去做，摸住石頭過河，一步一步就到對岸。
係你呢個情況（打完雙標靶後），FECx3同ACx4冇對頭對比研究話有冇分別，純粹靠估計就分別不大，所以醫生一般會跟第一代化療ACx4叫你咁打。
其實我都理解, 個癌細胞都真係好惡! 不過始終生活已經好大影響. 所以如果療效分別唔大, 我都想痛苦既時間短少少~ 副作用方面既話FEC*3 同 EC*4 係咪都差唔多呢? 唔該晒你, 咁夜都仲覆我
副作用差不多，主要都係來自A針。另一個選擇係照打AC，不過打三針先，到時睇你身體狀況／心情先決定完唔完成埋最後一針。
好的~多謝晒你既建議啊=)) 我會再同個醫生傾下先~ 我腹部傷口張力大, 埋得慢, 所以會做左電療先, 都仲有時間考慮=D 醫生早抖=))
my wife age 65, total right breast cut
Histological type- invasive ductal carcinoma. no special type
Size- 19 mm.
Histologic grade- 3(modified bloom & Richardson)
Nuclear garde – 3
Mitotic rate High
Peritumoral angio- lymphatic invasion- Present
In situ component – Small high grade DCIS present, nuclear grade 3 in solid and cribriform patterns with comedo necrosis and microcalcifications.
Nodal status – 1 out of 26 lymph nodes(1/3 sentinel, 0/3 non-sentinel) shows metastatic ductal carcinoma, largest focus 14 mm,with about 0.2mm extracapsular invasion.
Specimen margins – Not involved(more than 10 mm from deep margin, all others over 5 mm).
Pathological stage: pT1cN1a (TNM/AJCC 7th edition)
ER – Positive, Allred: 8/8 H-score: 210/300
PR – Positive, Allred: 8/8 H-score: 300/300
Ki-67: High proliferative index 80%
HER2 (c-erbB-2) oncoprotein overexpression – Equivocal HER2/CEP17 ratio <2.0 and HER2 signals <4.0 HER2 Negative.
Plan – AC x4 +Docetaxel x4 is good for my wife? Thank you very much.
JOE
10/5/2016
淋巴有受影響，一般我地會比第三代化療，例如以下組合：
1）FECx3＋TTx3（全部三星期一針）
2）ACx4（三星期一針）＋Paclitaxelx12（每星期一針）
3）Dose Dense ACx4＋Paclitaxelx4（每兩星期一針）
你所提及嘅方案就怪D，甚少人會咁配撘，因為如果係打Docetaxel，就會打FECx3＋TTx3，貪佢打少兩針。如果想打weekly／dose dense，就會揀paclitaxel，因為Docetaxel唔可以weekly／dose dense。最好返去問清楚醫生背後嘅理據。
你好，好好彩自抽針開始看到你這網頁，令我們每一步都像有支援，安心不少。
我係由MMG 發現鈣化點 開始，做mammotome 證實係癌，做手術時切片發現癌細胞分散在乳房(差不多10cm), 最後做了全乳切除。前哨淋巴割了4粒沒有事。醫生話重割多一粒warm sentinel node 都冇事。
術後報告: Ductal carcinoma in situ, intetmediate to high grade with focal necrosis, 5.5cm, with a 0.6cm focus of infiltrating duct carcinoma, grade III. Immunostaining shows the tumor cells are ER +ve(moderate to strong staining, 80%), PR +ve (moderate to strong staining, 30%), cerB2 +ve (3+), and Ki67 index is about 60%.
私家醫生建議化療DC(Docetaxel Cyclophosphamide) x4, 另一個醫生就話唔駛咁重，Taxol ×12 (weekly)就得。兩個都話要同時打Herceptin 1年， 也要賀爾蒙治療。
想問兩個化療效果係咪一樣?係咪Taxol 係咪冇咁辛苦?點選擇? 另外0.6cm 腫瘤政府醫院會唔會做化療?係咪要自費?
我49 歲，有隱性地中海貧血，身體麻麻地，化療會有影響嗎？
麻煩你。
Wong
兩個方案冇直接對頭對比，主觀上覺得效果分別不大。Weekly Taxol可能舒服D，不過DCx4其實都唔太辛苦。
0.6cm HER2型乳癌政府腫瘤科建議都差不多，ACx4或者DCx4，weekly Taxol就應該唔會提供，因為工作量大。呢個情況下，化療同標靶都要自費。
化療時，貧血情況可能會加劇，不過放心，醫生會睇住。
Dear BreastHK,
Your effort and kindness is highly appreciated. I have a few questions which puzzled me a lot and would like to seek your kind advice. The background info is as follows:
Age: 43
PET scan: Nothing wrong in general except mild patchy metabolism over the bilateral remaining breasts, most likely residual post-operative inflammatory changes.
基因測試: 沒有基因突變
OT: Already underwent bilateral lumpectomy and right axillary dissection around five weeks ago. As the supplementary report after the OT shows that the one on the left side is also invasive (which is different from that originally predicted), another OT will be performed very soon for sentinel lymph node biopsy.
RIGHT
Invasive carcinoma
Type: No specific type/ductal (confirmed with positive E-cadherin immunostaining)
Grade: II
Size: 2.5cm across
Lymphovascular permeation: Present, extensive
Perineural invasion: Absent
ER – 6 (4+2) positive (PS+IS)
PR – 6 (4+2) positive (PS+IS)
Ki-67 – 20% (high)
c-erbB2 – 1 (negative)
Nodal status
2 out of 3 sentinel lymph nodes positive for macrometastases, 27 negative lymph nodes in axillary dissection
DCIS
Size: 2.1cm in maximum horizontal extent
ER – 7 (5+2) positive (PS+IS)
PR – 6 (4+2) positive (PS+IS)
Ki-67 – 25% (high)
c-erbB2 – 2 (equivocal)
LEFT
Invasive carcinoma
Type: No specific type/ductal (p40 immunostain; reveals no supporting myoepithelium)
Grade: I
Size: 0.6cm across
Lymphovascular permeation: Absent
Perineural invasion: Absent
ER – 8 (5+3) positive (PS+IS)
PR – 7 (5+2) positive (PS+IS)
Ki-67 – 7% (low)
c-erbB2 – 0 (negative)
Nodal status
NA (see remarks under “OT” above)
DCIS
Size: 2.5cm vertically
ER – 7 (5+2) positive (PS+IS)
PR – 7 (5+2) positive (PS+IS)
Ki-67 – 4% (low)
c-erbB2 – 1 (negative)
My questions are:
Q1 – I have absolute trust in my doc. However, currently I am in a dilemma as my doc said that for my case, I can choose to undergo chemo or not, which is entirely up to my discretion. Before seeing the doc, I at first infer that, from all the information I have read on the Internet, going for chemo will probably be a must for my case (IIB on the right (T2N1) and I for the left). I have also read your post on “whether I need to go for the chemo”. For the three criteria (the personal will, the physical condition of body and the need for chemo), , I am certain about two of them, which is, firstly, my body should be fit for the chemo, and secondly, I am willing to do so “if necessary” (I am ok for the temporary effect although I am very concern about the long term effect on other organs, such as the heart, the lung and the liver). However, what I am uncertain of is “the need for chemo” for my case. That’s why I fail to decide yet. Do I really have a choice here? Is chemo necessary for my case? (P.S. While the “Adjuvant! Online” is currently unavailable, I have used the similar tool (Predict) recommended by the “Adjuvant! Online”, but the result for “no chemo” and “second/third gen chemo regimen” does not seem to have much difference (or minor difference).)
Q2 – If decide to go for the chemo, I will be offered two choices, which are, either AC X 4 or FEC (X ? dosage not mentioned) plus the Docetaxel (I hope that I got the info correct according to my note written down). However, I learn from the post that AC X 4 is for “少少惡”, while FEC X 3 + TT X 3 is for “好惡“. If I am the marginal case that is offered a choice for chemo or not (re. Q1), how come the two combinations seems to be so different?
Thanks you so much and looking forward to hearing from you.
1）T2N1我會建議打化療，呢度冇咩懸念。
2）你唔屬於marginal case，打就打第三代化療（FECx3+TTx3）。呢個年代已經好少打ACx4，冇錢又係咁咦打少少化療先會揀ACx4。
Thank you so much for your prompt reply!! That is very kind of you!! < D
Breast HK，
我媽媽係三陰性乳癌，二期A沒有擴散淋巴，腫瘤2.75cm, 已割一邊乳房, 3年前化療打了4枝AC紫杉醇，現每年2次覆診, 康復中, 想問得知三陰性乳癌是十分惡毒,和復發機會高,是否要過5 年, 才是安全!
好多人都會咁問，係咪過咗X年就安全？
與癌作戰其實係一個人生馬拉松，過咗2年呢個中途站，就會向住5年呢個目標跑，過咗5年呢個中途站，就會向住10年呢個目標進發，過咗10年呢個中途站，就向住15年呢個目標努力⋯⋯沒完沒了。咁究竟有冇終點線？同歷代皇帝一樣，但願終點永不來臨。
非常感謝你以顯淺幽默既方法，解釋左咁多有用既資訊，驅走左我好多因為無知而產生既不安同恐懼。
我媽媽58歲, T2N2M0, 做左左乳全乳+淋巴切除,
ER: 260/300 (+ve)
Proestrogen: 15/300(-ve)
HER2 -ve
Ki-67 30%
Size 3cm ,grade3
淋巴切23粒，有8粒感染。
聽左2位私家醫生既意見，都係話打 AC x 4 (2周1次) + TT x 4 (3周1次);
而公立醫院醫生則提議 FEC x 3 (3周1次) + TT x 3 (3周1次)
因為睇左攻略，我就照講左私家醫生既建議，同埋問我媽媽既情況，可唔可以係公立做私家果個方案。公立醫院醫生答唔可以，話只可以做FEC 果個方案。
其實2個方案有咩分別? 你有咩意見?
再次感謝你！
效用黎講，兩個方案冇直接對頭對比，大家都係第三代化療，你可以當成佢地效用一樣。
因為有成8粒淋巴受感染，即係乳癌好惡，所以如果身體頂得順嘅話，私家醫生傾向密集打法（dose dense），每兩星期打一針，希望比少D時間癌細胞回氣。成效係咪真係好D，冇大型客觀數據支持，所以公立醫院係唔會比你揀的，因為無端端打多咗／打密咗／返黎多咗，成個系統係負荷唔到嘅。
去邊到打，睇吓自己荷包，睇吓自己心意。有能力就去私家，一來自己舒服，二來將政府資源留返比D更有需要嘅人。負擔唔起就根本唔洗諗，香港嘅公立醫院提供咗世界一流的醫療服務。
好感謝你咁快覆我! 經過一番爭扎，我地決定尊重媽媽自己既意願。
你好. 我媽媽59歲，上個月尾做左right breast lumpectomy with axillary dissection.
Pathology report話 係 IDC grade 2/3, tumour size 1.2cm.
Micro metastasis to SLN 1mm 所以AD左。
stage 1b IDC T1cN1miM0.
淋巴切20粒, 除左SLN 個粒有 micromet 0.1cm near the capsule, 其他都係Negative.
ER: -ve, PR: -ve, c-erbB2 2/3, SISH her2 -ve 即係三陰性。
Ki67 8%
chemo plan 依家公立醫院俾左2個套餐揀：TAC x 6 或者 FEC x3 + Doxetaxel x 3
想問返如果stage 1b 揀邊隻好D？
同埋見到你上文寫私家可能用DD AP-T x 4
所以想問返呢3隻邊隻睇落適合媽媽多D？有冇需要搵私家做先好D效果？
長遠計有冇話邊隻好D？因為驚TAC好激會好辛苦 會唔會其他選擇適合少少？
多謝你解答疑難
三隻同屬第三代化療，成效你可以睇成一樣，TAC可能比較辛苦，我會揀FECx3＋Docetaxelx3，公立／私家其實成效一樣。
Breast HK，你們的資料對我十分有用，真係多謝你們好用心回覆我們！
我是Stage IIIB CT4aN1M0（right breast)，非Her2,是先化療，後全切,電療，食5年荷爾蒙藥在公立醫院醫
化療組合是AC X 4及TT (Taxotere) X 4
我己完成了AC,沒有想像中辛苦，只是打完針頭幾日攰d，之後都睡得食得精神好
我獨立打TT針，沒有配cyclophosphamide,打之前我再問醫生要否升白針，醫生說不用。我起初都有d擔心，但打完第一針後，身體一齊正常，何解呢？
打完AC後，去做pet scan.但出來報告話照唔到右股骨中間部位（開始化療前照x光時右股骨中間有一點，及骨掃描亦有一點，報告唔確定係，所以醫生話唔當轉移）咁咪開始化療，但後來又叫我自費做pet scan，出來報告其他部位沒有活躍組織，個腫瘤亦縮少好多，淋巴亦scan唔到有，右股骨只照左上面部份報告話沒有活躍組織，但中間部位無照到。政府醫生右上部份右股骨沒有咁中間亦沒有的，我唔信，咁醫生諗左一陣話再照x光，如仍有一點就不是轉移 / 沒有了一點就是轉移話是打了化療針後無左。現攪到我好嬲又唔開心，比左錢居然睇唔睇最想睇位置，又無得投訴，醫生咁講又唔知信唔信得過，點算好呢？
另外，我應如何選擇那種荷爾蒙藥？
之前用x光／骨掃描見到的唔妥當，用返同一種檢查去比較。
乳癌荷爾蒙治療 － 點解我仲要食藥？
乳癌荷爾蒙藥－究竟食咩藥？
乳癌荷爾蒙藥－不同年紀嚴選最正確食法
你好, 早前媽媽(60歲)已於瑪嘉烈外科進行右邊全乳割除手術, 日前(首次)往腫留科見腫留科醫生, 佢表示係咩2期A級 , 之後只係俾左幾張藥物單張我地睇, 話媽媽粒野係好惡(2.1cm), 暫時未擴散(但佢又話第一前梢淋巴又發現幾粒野) 又有Her2受體,又對Hormone 有反應(好似係), 因此做化療+標靶+柯爾蒙……(對唔住可能聽唔清楚, 個時成家人個心已經離一離,一片空白)
事後睇返單張, 佢offer個plan係:
AC (Adriamycin Cyclophosphamide) X4 (3星期一針),
Docetaxel (Taxotere) <—-呢隻野我唔記得要打幾次, 又係3星期一針
Transtuzumab (Herceptin) <—一年打18針 (要同時同化療做)
Tamoxifen <—好似係柯爾蒙藥..要食幾年…
睇完你網站資料, 我有D野想查詢一下:
1)想問下佢呢個組合係唔係醫院常用呢? 或者會唔會有其他建議?
2)化療 同 標靶係唔係要一定同一時間進行? (因為媽媽本身身體唔好, 之前右全乳割除手術時, 其他人一晚可以出院, 佢就暈同嘔左成日.要住多1晚,我地怕佢身心都頂唔住, 可唔可以先化療..再標靶)
3)係唔係一定要用埋標靶, 如果只係化療+柯爾蒙藥又效果如何呢? (媽媽表示唔想浪費錢, 話標靶沒咩用..)
4)醫院同我地講Tamoxifen呢隻野..食得多會生子宮Cancer, 有沒得唔食/轉其他藥?
5)同埋我想問下政府醫院呢.會唔會俾返份病歷/報告我地?? 因為我地由入院去外科手術到而家見腫留科都未有任何病歷/化驗報告俾過我地,只係得D資料單張….
6)媽媽表示唔想做化療/標靶/柯爾蒙, 話既然已經進行右全乳割除手術, 就唔會再番發..但我想問下全乳割除手術之後會唔會再有機會返發?
Sorry 我真係好多問題…
(p.s. 而家約左9個月中/尾返腫留科抽血同心臟超聲波..但係阿媽唔想去..)。
1）以前常用，預期會被淘汰。喺2015年12月舉行的乳癌世界大會San Antonio Breast Cancer Symposium之中，發表咗一個重磅研究BCIRG 006嘅10年跟進結果。發現打TTCH同ACTH嘅治療效果一樣，不過TTCH嘅心臟副作用就少好多。可以預期從此以後，TTCH將會一統江湖成為首選，冇咩人會再打ACTH／ACPH。
乳癌標靶治療 － 乳癌HER2型點樣揀？
2）最好一齊用，雖然都可以前後腳。一齊落並唔會令媽媽辛苦咗，此乃誤解。
3）雖然唔會用「一定」呢個字眼，但強烈建議用標靶，功效非常、非常、非常之顯著，因為很重要，所以要講三次。
4）可以揀AI。
乳癌荷爾蒙治療 － 點解我仲要食藥？
乳癌荷爾蒙藥－究竟食咩藥？
乳癌荷爾蒙藥－不同年紀嚴選最正確食法
5）報告要去醫療檔案部比錢申請。
6）即使全乳切除，亦都有機會復發，正正係呢個原因所以要做輔助治療。
媽媽唔想去，你要鼓勵佢去。
媽媽唔明白，你要解釋佢聽。
媽媽想幫你地慳錢，你要令佢明白生命／親情點會比不上金錢。
你好,首先謝謝你的回覆。早前阿媽返左鄉下住左一陣,心惰好左D,應該都肯接受治療。
關於化療藥想請問一下:
1) 照我媽咪情況, 我可唔可以向醫生提出轉打 TTCH (TaxoTere－Carboplatin H-Herceptin）,因為我媽咪身體真係好差個隻, 我好驚佢心臟頂唔住D藥….
2)同埋佢係7月底瑪嘉烈外科做完手術(右邊全割), 通常政府醫院幾時可以開始化療呢? 會唔會要等／隔太耐而擴散同番發??
(ps.而家瑪嘉烈抽左血,等月底照心同見醫生。)
謝謝。
1）可以向政府醫院提出反建議，睇吓醫生受唔受理。
2）做咗心臟檢查後隨時準備好開始，實際要等幾耐間間醫院唔同，要問返自己醫生。等／隔太耐當然唔好，最好三個月內開始，照現階段情況睇應該趕得切。
你好,很多謝你的回覆。星期二媽媽係抽完血後見了醫生,再同佢了解化療/標靶過程, 佢地會用:
Taxotere + Cyclophosphamide (沒Adriamycin,唔係Carboplatin) 打四針(三星期一針),同時會開始打埋標靶(Herceptin)18針。大約3-4星期一針(即係頭4針標靶同化療個4針一齊打。)
化療計劃流程:
化療期期打針個3日(前一日,當日,第二日)每日都要食steriod同止嘔2次,每次打完針之後要連續四日上診所/健康院打升白針,再過一星期要返醫院抽血2次。
<—上邊流程每次化療都要做,即係要loop4次。
完左後就只係再打標靶(即係18次-4(同化療同時打個4次)=14次)
再完左就食抗hormone藥5-10年。
我地都同意左進行化療/標靶,下星期會開始打第一針。
其實我想請問下:
1) 佢offer個計劃/流程算唔算合理? 因為我見你個Her2 標靶個頁寫係Taxotere + Carboplatin X6 + Herceptin ( 醫生同我地講得4針Taxotere + Cyclophosphamide..)
2) 打完化療或者標靶之後,會唔會有咩檢查俾佢去check下個cancer lv有沒完全消滅/擴散..etc? 定係打完就算?
3) 想問下係唔係順利過完化療個4針流程..之後身體係會慢慢好返? 因為我計過如果順利, 佢打完四針就大約明年一月底,想同佢出去行下..定係要打完18針標靶先?
4) (聽聞)有乳癌會易D有其他癌症如子宮癌?
5) 男性會唔會因遺傳而易得得男性乳癌?
抱歉,有很多問題。
1）合理。呢個世界係好多元嘅，並唔係我啱就等如你錯，同一條問題可以多於一個正確答案，同一味餸菜可以有唔同煮法。
2）媽媽而家係輔助性質（adjuvant setting）咁打，即係身體假設已經冇可偵測的癌細胞，化療／標靶打完就算。
3）係，完咗化療已經會慢慢好返，打淨標靶其間可以去旅行，當然唔可以遠行超過三個星期。
4）乳癌有百分之五係屬於遺傳性乳癌，當中以基因BRCA1、BRCA2突變居多，家族／自己會增加患卵巢癌、前列腺癌、胰臓癌的風險（同子宮係冇關係，不過如果因乳癌要食抗荷爾蒙藥Tamoxifen，就會增加子宮內膜癌風險）。
5）會，呢個可能性係存在嘅，不過「唔好」理解成「男人有乳癌一定關遺傳事」。男人都有乳房的（當然冇女士咁發達），所以一樣可以有乳癌，當然比率黎講係少好多，大概1：100，即全港每年有3000個女士新確診乳癌，男士就30個。因為受影響人數少，所以往往男士乳癌係會被忽略。
你好,唔好意思又要勞煩您。媽媽已經完成左四針(Taxotere + Cyclophosphamide) 及四針標靶針, 今日醫生開左D抗荷爾蒙藥, 佢地個plan係 2 年 Tamoxifen –> 3年Aromatese Inhibitor–> 2年 Tamoxifen, 共7年。
1.想問下呢個混合食法好D 定係 淨食Aromatese Inhibitor 好D? 如果媽媽體質差, 對食邊隻會唔會有影響?? (之前打最後一針時, 佢都因為身體弱而重感冒, 入左院住在幾日)
2.Tamoxifen 對子宮有副作用, 想請問下需唔需要自己定期去醫院check? 或者食之前要有咩準備?
3. (同上)Aromatese Inhibitor對骨頭有副作用, 想請問下需唔需要自己定期去醫院check? 或者食之前要有咩準備?
4. 如果要定期去檢查, 係唔係要轉介去其他科排期(如婦科,骨科..etc.)?
抱歉, 問題多..謝謝。
1）冇得比較，咁嘅混合食法唔係常規做法。「體質」同食咩藥冇關係。
2）食前冇野要準備，有唔正常出血就照陰道超聲波去量度子宮內膜厚度。
3）食前冇野要準備，每年可以去照DEXA scan去監察骨質密度。
4）子宮內膜厚度就轉介婦科／放射科，骨質密度直接由乳腺科跟返。
您好，又要辛苦您解答我，之前問過T1N0M0, grade 3, Her2+, 荷爾蒙受體（陰性) Ki67 25%, 腫瘤1.3cm, 局部切除，私家醫生建議打TC六針架+鏢靶18針+電療25次，但政府醫生就建議打TC四針+鏢靶+電療只不過21次，應該點揀？我37歲，另想搞清楚TC針嘅C係咪有唔同嘅呢？
因為有朋友話TC針既C會有唔同既藥，所以2個醫生所建議既4針及6針不同？
兩個方案都得，主要都係兩個問題：
1）化療6針定4針：私家醫生建議嗰個係TTCH（Taxotere-Carboplatin-Herceptin），大部份大型HER2型乳癌硏究（例如BCIRG 006）都係咁打。政府醫生建議嗰個就係TTC （Taxotere-Cyclophosphamide）之後再加Herceptin，以前未知Herceptin有幾好之前就會咁打（例如HERA trial）。正如你朋友所講，兩個C係唔同嘅。咁邊個好D？冇直接對頭對比，你問我，你咁後生荷爾蒙受體又陰性，我個人傾向打多少少化療的TTCH。
2）電25次定21次。即係傳統定新電法嘅分別，乳癌電療大解構－原來唔洗驚裡面有講解。
多謝您解答我呀！但因為手術2次係私家做而且又係Her2型要打18針標疤所以都選擇返政府e院，即係要跟政府e院講既4針TTC+H…..,請問我點好？
你可以向政府醫院提出反建議，睇吓醫生受唔受理。
但請問兩隻藥既分別有咩？之前也有提問過政府e生，但佢意思係政府e院係選擇一般最多人既藥，所以仍然係用，冇得反建議
唔係兩隻藥單獨咁比較咁簡單，要成個套餐咁睇（藥物／組合／劑量／幾多針／有幾密）。上面提到，冇直接對頭對比（head to head comparison），即係冇人比到實在數據你邊個好。如果政府只得一個方案，唔接受反建議，你唯一只可以選擇受定唔受。
Million thank
時間過得好快我已經打咗化療第三針12月頭第四針就完啦之後開始電療鏢靶當然繼續啦因為總共有18針，所以我想請問除咗甩頭髮無胃口手腳有少少麻痹同打針頭一個星期有少少攰其他都好似冇乜野咁係咪即係化療針對我起唔到作用啊？
最終係政府醫院已經開始化療，但政府醫院只安排四次化療同私家醫生安排六次有所分別，政府醫院嘅化療藥物：Taxotere （4針）+ Cyclophosphamide (4針）+ Herceptin（18針），而私家醫院打嘅六次化療針姑娘聲稱並不是政府醫院這種T C針，所以令我擔心因為化療已經打咗第三針而且沒有太大的不適只是頭一星期比較攰胃口無咁好手腳有啲麻痹甩頭髮個人比較燥熱因為有少少流鼻血其他都沒有太大不適，所以好懷疑化療藥係咪對我起唔到作用?希望你可以解開我嘅擔心
「冇乜野唔舒服」係好事，代表身體頂得順，應該感恩。同癌細胞夾唔夾唔係睇副作用去評估的，唔好誤會。
你好，我媽咪今年52歲，三年前做了局部切除加電療，最近復發啱啱做完左乳全乳切除，腫瘤size 22mm, ER7, PR7, HERS negative, Tumor grade 2, 冇擴散去淋巴
請問通常會打邊種針，同埋復發同死亡率會係？？謝謝！
要視乎三年前有冇打過化療，同用咗咩針，先可以比個初步意見你。
由於已經係復發個案，當中又經歷咗唔同嘅治療，復發率同死亡率已經冇得單純咁計。
三年前冇做化療，只係局部切除加電療，因為個陣都係初期冇擴散去淋巴，但係今次係同一個位復發。
咁打TTCx4。
你好！媽媽是乳癌四期，61歲，擴散淋巴及肺部，咨詢兩位醫生，一個提出雙標靶藥+化療，另一位提出單標靶藥+化療。想知道是否雙標靶藥效果比較好？
如果錢唔係一個問题，一定係雙標靶好好多。
你好！睇咗你咁多篇資料，對乳癌真係多咗好多認識！我媽媽65歲有高血壓，8月發現左邊乳房有腫瘤，已做全切手術，但有其中一粒前哨淋巴有事，做埋淋巴切除手術後發現沒擴散。公立醫院醫生講得唔太清楚，淨係建議做4支紅針4支T針，後來睇私家醫生問意見，私家醫生贊成咁做但認為要盡快做第一支，所以响私家做咗第一支紅針。私家醫生寫咗封信，但我睇完唔係太明白，醫生話係stage IIA G3/HR+. Biopsy confirm IDC, ER8/8, PR & Her-2 -ve. 腫瘤有2.5x2cm, IDC, G3, 1/1 SLN, 0/17, G3, clear margins. 宜家媽媽已做完四支紅針，醫生話可以揀打四支TT或打四支P, 三個星期一支，然後話TT效果好啲，但要打升白針; 打P就唔駛打升白針。我想問嘅係，我想問如果媽媽呢個情況，TT定P會適合佢多啲呢？謝謝！
你可以睇成三星期一針嘅TT效果同每星期一針嘅P一樣，冇話邊個好D，純個人喜好。
你好!!! 謝謝你咁快回覆! 但公立醫院醫生話P都係三星期一支, 所以我覺得呢個計劃好奇怪。而且P會唔會都令人容易發燒?
千祈唔好，每三星期的P嘅功效係弱過每一星期的P，所以如果公立醫院只可以提供每三星期一針，就揀TT。
原來係咁，咁唔怪得醫生話P嘅效果無TT好，好有可能佢係用三星期嘅P嚟比較。明白了，多謝你！嚟緊㸻醒再詳細問醫生唔同做法嘅詳情。
醫生！你0既網頁好詳細，令我地一般平日了解多左，可以幫助決定治療方法，多謝！今次我想幫我媽媽問化療方案。佢12月31日做了左邊乳房全割手術，術中發現一粒前哨淋巴有擴散所以整個左淋巴全割了。化驗結果：
– 三陰性乳癌
– KI67 20% high
– tumor size 2.6cm
– 只有一粒前哨淋巴擴散
– Invasive ductal carcinoma Grade 2
– PET scan 照過冇其他擴散
– 整體乳癌評估為2B期
現在公立/私家醫生各有方案治療，我們沒有專業知識，不知道該如何選擇?
公立： FEC x 3 + T x 3 (T會包埋升白針）
私家：DD AC x 4 (兩星期一次）+ T x 4
係咪研究話三陰性用DD AC會較好？上網搵過好似冇實質數據。公立只提供一個方案，是沒有特別考慮三陰性嗎？但媽媽對公立比較有信心，覺得精神同如有併發症支援亦較多。私家比較自由度大點，但媽媽亦不個可否承受2星期一次密集化療，怕適得其反。我唔知去邊度搵個中立點的回覆。
如私家做星期一就要開始了。現在好徬徨，期望你的回覆！
公立甚少打DD，其中一個原因為資源問題。
兩個方案冇大型數據話有明顯分別，不過係有D初步數據覺得DD好D。
請問her2 positive, tumour: pT1cN0, ki-67 index:,high 55%. Size 1.3cm, 淋疤冇擴散。ER positive, PR negative. 政府E生話做TC x 4, 完成TC 後，再開始一年的標杷藥。我們提出想做TCH x 6. 即TC 同H 一齊。但政府吾肯。現在做了一次TC, 應否之後轉回TCH 呢？因見E生你話TC 同H 一齊做先最好。前天見E生，佢話肯俾我地之後轉回TCH,但又話TC 的C 同TCH 的C 吾一樣。冇研究去証明轉藥是否更好。我們應否轉呢？謝謝。
治療前見過二位私家E生都話TCH 係最適合。但經濟問題，選擇政府做。但明天要落第二針TC. 政府話如果轉，即做完二次TC 後，會做多4次TCH. 家人話化療好辛苦，如果轉，本來4次化療就變成6次。又驚轉左個C 藥會影響療程功效。希望E生可給予意見。謝謝。
家人話做化療好辛苦，如果轉TCH ,本來4次化療就變成6次。另一方面，又吾知做完2次TC, 個C 之後轉TCH 果隻C. 咁對個療程成效有冇影響呢？現在隻TC 係Docetaxel Cyclophosphamide. 謝謝你的回覆。
C係cyclophosphamide 定carboplatin喺家人嘅情況冇咩關係，唔係主角。
如果已經開始咗2針，又覺得化療好辛苦，唔好轉黎轉去喇，咁樣唔鹹唔淡冇人知成效。
謝謝你的意見。
2月20日打了第一針FECX3 + TTX3 (全個療程) 去到今天紅白紅球都正常, QM 醫生要我毎個星期都去驗血, 其實是否化療第一針有可能唔降. 唔跌會不會因為葯的份量不夠. 政府比虊是否按重量計算 ? 定我身陳代謝太慢? 或是化療藥未見效用 ?
PT3N2A
ER / PR: 8/8 (一樣高)
HER2 NEG
KI36%
暫時沒有任何大的副作用出現.只是第3到5天無胃口. 其餘全部正常. 今天來經, 會不會令我貧血.
藥的劑量係按重量計，冇乜副作用應該感恩，副作用同藥效係冇關係的。
E生你好。我二月十四號問話家人乳癌一期，her2 positive. 政府E院話做TC 4次，完成後就一年標把藥。我地提出做4次TCH. 但佢吾肯。現已完成2次化療。如果剩下2次TC 可以跟埋標把一起打。但隻C 佢地話未決定用邊隻C。可能會用番TC 個C .即cyclophosphamide。咁你認為我們該轉嗎？如果到時用TCH 隻C 又點呢？有冇話邊隻C 同標把一起做係最好？家人話覺得標把愈早落愈好。雖然一期，但腫瘤都1.3cm, 又her2. 政府話我們想加標把就下針開始加。但又強調這是中途轉治療。吾知是否最好。叫我們自己考慮。點解佢地一開始吾肯做TCH 呢！麻煩你給予意見。萬分感謝。☺
C唔係主角，根本冇所謂。標靴早兩針落遲兩針落效果冇咩大分別，只要打足一年就得了。
醫生，這個網頁內容非常詳盡，可以解決病人的各種疑惑!!
我想問呢，如果已經全乳切除，35歲，有以下報告，是否可以不用化療?
cT2N0M0, ER8/8, HER2-, Ki-67 3%
Tubular/ Cribriform type, pT2N0 G1
T=3cm; SLN 0/5
如果係pure tubular （＞90％），你個情況就可以唔洗化療。
謝謝你呀～
醫生你好，我今年43歲，4月確診left breast cancer, 13/4 做了部分切除及前哨淋巴切除，病理報告是T1bN1aM0, ER 8/8, PR 7/8, HER2 negative, Ki67 40%, 看了兩位私家化療醫生，他們分別建議:
醫生Ａ：FECx3 + TTx3, 每３星期１針，共18週
醫生 B：ACx4 + TTx4，每３星期１針，共24週
想請問兩個方案有何分別及那個最好？
同屬第三代化療，冇直接對頭對比邊個好D，方案A已經足夠。
醫生你好，我今年33歲，係T2aNoMo，ER positive (7/8), PR negative (0/8), HER2 negative,ki6740%。做咗EndoPredict test 係high risk 44%。係9/5做咗局部同前哨淋巴切除手術。睇咗公立同私家醫生，2個私家醫生建議4xAC + 4xTaxotere。因為話我復發率比同期數高好多。有同公立醫生講想跟私家醫生建議，但佢地唔肯，只肯打4x TC 或者 4x EC。想請問邊個化療建議比較好？同埋AC 同EC有咩分別？另外，喺公立同私家各打一半有冇問題？因為真係afford 唔到全套喺私家打，打4針又驚唔夠…..仲有化療有冇話要係手術之後幾耐要開始? Thanks a lot!
最好提供埋腫瘤size，grade，點發現，先比意見。
AC同EC分別不大。
各打一半私家冇問題，公立可能唔鐘意，因為佢地已經清楚表明唔肯跟。
手術後最好三個月內開始化療。
醫生 您好 我左邊乳房腫瘤 0.9CM 已做局部切除 腋下淋巴亦全部切除 前哨淋巴一粒感染1.5mm 其餘17粒沒有感染
病理報告：T1bN1 Grade 2 KI-67:2% ER 210/300 PR 60/300 Her2 -ve
兩位私家醫生有不同方案
1) Taxol 12針 打12星期一星期針 加20次電療
2）Taxotere cyclophosphamide x 4 3星期一次 再加升白針 加30次電療
兩個方案都要再加食5年荷爾蒙藥
想問下 兩個方案療效都是一樣嗎？因為之後想生BB 那一個副作用會低一點？建議那一個會比較好？
謝謝
Size 3.6cm. Grade 2. 係摸到同埋有D吉吉地痛先發現。Thanks so much!
傾向私家方案。
Thanks a lot!
醫生，你好！
我媽媽上月骨痛睇醫生，發現乳癌復發擴散去骨(最嚴重)，淋巴，肺同肝(少量)
報告：ER: 270/300，PR:20/300, Ki67: 10%
已做骨手術同電療10次
狀態暫時ok，行得食得訓得
醫生建議口服Xeloda或者用Taxotere，之後再食AI
想問下Xeloda其實係未算2線treatment，Taxotere會進取d？
但又擔心Taxotere會副作用好大，因為上次(10年前乳癌)打Taxol耳模有事，聽覺有影響
另外，想問Taxol同Taxotere效用分別有幾大？
謝謝！
Xeloda算二三線，Taxotere進取D。Taxol同Taxotere分別唔大。
醫生您好，我今年52歲，已于7月28日做了局部切除手術，病理報告如下：
Left breast tumour, L2H6cm FN, partial mastecotomy
Left axillary sentinel nodes no.1 and no. 2 – No evidence of metastatic carcinoma
Invasive ductal carcinoma, no special type
Tumor grade : Modified Bloom and Richardsons grade 2 (3,2,1)
Tumor size : gross :18x15x10mm. Micro (invasive only) : 17x14x10mm
Tumor stage : pT1cN0
Distance to margins: Circumferential 10mm and above. Anterior 4mm. Deep 2mm
In situ component : Solid, low grade, 10% of tumour
Lymphovascular permeation : Negative
Perineural infiltration : Negative
Background breast tissue : Degenerative and fibrocystic change
Sentinel lymph nodes : 3 nodes, negative
Non sentinel node sample : 2 nodes, negative
ER : positive (260/300)
PR : positive (300/300)
HER2/C-erbB-2 over expression score 0– Negative
Ki-67 proliferation index – 25% High index
手術后看過兩位腫瘤科醫生。第一位醫生建議治療方案為：
電療＋荷爾蒙新藥治療Tamoxifen+化療TC(taxotere & Cyclophosphamide)x4療程
另一位醫生說電療＋荷爾蒙新藥治療
醫生，可否幫我計復發率?
化療著數大嗎?
謝謝
Adjuvant online未開返，計唔到復發率。化療著數不大。
醫生你好！家人現時37歲一月尾手術後得悉是T1cN1（mi)，是三陰性，私家腫瘤科醫生建議手術後3-5星期內開始進去化療，但可能適逢農曆新年期間，首次約見政府醫生已超過五星期，因為擔心延誤，所以正考慮在私家醫生進行化療。
想請教如果真是遲過五星期，是否真的有問題？另外，私家醫生表示政府不會為家人安排兩星期一次的療程（應該是你解釋的DD AC+P)，只會是三星期一次的，但我亦見回應話政府醫院亦做到，因此很猶豫是否應得待見政府醫生，因為亦擔心化療的昂貴費用。
抱歉心情仍很混亂，表達可能不夠清晰，但很希望醫生可幫忙給予意見。
情況許可下，當然越早開始越好，一般唔好拖多過三個月都OK。以我所見，家人情況我諗超過9成政府係唔會同你兩星期一次。
醫生你好，感激你設立這網站幫了很多迷網的人，簡單易明，衷心感謝你。我媽媽確診乳癌3期，已決定在公立醫院做FECx3+TTx3術後化療，看到這文章提到這組合需要打升白針，但醫生沒有提到要打，反而她給我們選擇的另一組合（TAC ）有提到，FECx3+TTx3 不需要升白針是正常嗎？
FECx3 + TTx3唔一定必要配預防性升白針，醫生會因應病人的發燒風險去決定，如果佢覺得媽媽風險低，佢就未必提預防性升白針。
本人50歲，右乳朣瘤1.2cm,做了部份切除,ER,PR陽性，淋巴全切15粒，有3粒受感染，PET scan 冇轉移，建議做4針紅魔鬼，4針紫彬醇，已打了3針紅針，想請問一下，既然冇轉移，是否可缩短療程？
有冇轉移唔係一個改變輔助化療長短的原因。
你好呀 醫生 有親友有甲狀腺cancer 想問可以解答關於療程或各方面既野嗎 因為宜加毫無頭緒。謝謝回覆
偏離呢度乳癌主題，恕我不作回應，請諒。
醫生你好，我媽媽在22/3做完全乳切除，術後病理報告說是3A期(T2N2a)，HER2(3+)，賀爾蒙陰性，上星期照左PET-SCAN，醫生說報告出黎無異常，想去政府度做化療，12/4第1次見左政府醫生，醫生建議做化療(3針A針+3針T針)+5星期電療+1年標靶，但排期排到28/5先再覆診見醫生先可以開始做化療，私家外科醫生建議先係的家打1針，第2針再係政府度繼續，但我見了的家腫瘤科的醫生，佢話配合唔到政府既療程，我媽媽呢個情況，佢建議打TJHX6+電療+1年標靶，其實2個療程有什麼分別?如果我用私家療程開始左，政府唔可以跟住私家療程打的話，我可以點做?? 謝謝
TJH 即TTCH，常見的打法，冇增加工作量，如果私家開始咗，我相信政府會跟。
但我電話問左政府醫院既姑娘，佢地無J呢隻藥
咁如果我先係私家打1次TJH，第2次開始就係政府打TTCH
藥效方面會唔會有問題?
J即係carboplatin，政府一定有呢隻藥，姑娘唔知咁叫法姐，亦都好難怪佢，成個字都冇一個J字，歷史遺留問題係伊利沙伯醫院出身的腫瘤科醫生先會咁叫carboplatin 。
非常感謝回覆，資訊對我地好有幫助，謝謝
醫生，你好。我家姐1月做咗局切，切咗粒1點幾厘米嘅腫瘤，前哨淋巴切咗兩粒，一粒有事（細過1厘米）。
Invasion component
T1 ER+ PR+ Ki67 60% c-erbB2 –
T2 ER+ PR+ Ki67 60% c-erbB2 –
T3 ER+ PR+ Ki67 2% c-erbB2 –
In situ component
Invasion component
T1 ER+ PR+ Ki67 45% c-erbB2 –
T2 ER+ PR+ Ki67 60% c-erbB2 –
T3 ER+ PR+ Ki67 2% c-
私家外科醫生，手術後，建議 ACT x 8
政府腫瘤科醫生，最初建議 TC x 4（3星期一針），後來外科醫生再建議，佢哋改到 TC x 6（3星期一針），以消我哋疑慮。佢哋話有研究表示6TC不遜6定8AC（我記不清）
家姐已打3針，但我哋心都有忐忑
擔心少咗a針，成效唔知點
醫生你有咩意見？
好多資料唔夠，你上面寫咗三個腫瘤，分別大小為？前哨淋巴一粒有事，咁有冇全切淋巴？之後嗰D有冇事？打咗邊三針？TCx6嗰C係carboplatin定cyclophosphamide ？
我家姐手術前係話1期，開刀時發現有一粒淋巴受感染，所以去咗2a期。
PMH由最初TC x4，應我哋反映意見（做手術個私家醫生建議有a針）後，加到TC x6
你好我媽媽今年65歲，想問下右乳4月6號发现肿瘤4月8日接受了右乳全切手术，手術後病理結果係浸潤性乳腺癌2a期，分級2-3級，ER95%，PR 20%, AR+, her2+，P53+,Eca +, ki6730%，Rs21.8 (中等復發風險)淋巴結無轉移，腫瘤大小2.2cm，是否需要接受化療? 灰色地带中这样的情况接受化療的話是利大于弊定弊大于利呢？
除左呢個病外，身體無咩其他大毛病
HER2+不是灰色地帶了，要化療加標靶TTCH。
之前睇左醫生，建議我們ttc x4,吾加標靶得吾得？想問加標靶的原因是？
你搞清楚係咪真係HER2+，如果係陽性，冇理由醫生冇唔同你講要標靶。
我媽咪係一個+,大6醫生話屬於陰性
一個＋叫score1，即係陰性，同HER2+係兩回事。
之前醫生每3星期一次，共打4次，如果HER2+係咪做化療會好d？因為我媽依家復發風險係中等，有d醫生話做吾做化療都得，可以靠內分泌葯去控制，但有d醫生又建議穩陣起見要做化療(TC x4,每3星期一次，打4次就得)，做左化療會吾會引起身體其他方面有嚴重的影響(嘔，暈，易累個d吾計啦),因為依家都15.16.諗甘做化療係咪得益會大d，因為吾同醫生有吾同建議，但個決定又甘重要，吾知點算好
打TTCx4。
如果呢個情況，靠淨係食葯(內分泌葯)控制病情效果如何呀？thanks??
比加埋化療差一些。
T1 1.4×1.3×0.9cm
T2 0.7×0.7×0.4cm
T3 0.25cm in diameter
只知手術時割咗兩粒淋巴，就係驗咗個兩，之後無再做過手術。
我唔知係邊個C，喺瑪嘉烈安排，兩種c有咩分別，只知t一定係歐紫醇。
但有個私家醫生話家姐已打3針，無彎轉，無得改變針藥安排，我聽到後，個心一沉，擔心。
淋巴有擴散，本身就唔應該用TTCx4（唔夠力），同意私家講，最好有A針，亦都同意打咗TTCx3，之後好難轉落去，因為點轉都係缺乏數據支持，唔認同TTCx6係一個代替品，因為冇大型研究係咁打。
但依家仲可以點做？仲可以加返a針嘛？
加唔加都係怪，點都係同自己醫生傾。
打第二針時，同瑪嘉烈嘅醫生傾，話外科醫生建議有a針，佢已經好勉強叫加多兩針TC，我哋又唔太識，只有接受。
我哋依家可以點？
我最擔心再傾，醫生話唔加得，會影響家姐心情？
其實依家係咪真係唔加得a針？
我話得定唔得都只係塘邊鶴，係瑪嘉烈接受治療就只可以同瑪嘉烈醫生傾，唔想傾就只可以接受現方案。
唔係唔想傾，只係怕，若真的唔可以再把剩餘3針改AC針，咁我唔想再喺家姐面前提。若其實可以改，我會同醫生堅持要求把剩餘3針做AC。
唔傾唔會知可唔可以改。
因為依家去緊見瑪嘉烈醫生，如無意外，聽日打第4針
因為打咗3針後，有去consult 另一個私家腫瘤科，話依家打咗3針，無得改。
唔好意思，心好煩，好亂，要麻煩你??
你再問十次我嘅答案都係唔會有分別，建議你同瑪嘉烈醫生傾。冇理由依賴一個素未謀面的塘邊鶴說三道四，去影響自己醫生的專業判斷，點講都唔通。
明白，多謝秒回及詳細回答
抱歉，我心煩多問??♀️
麻煩晒??
您好，您真是一位無私的仁醫，你幫了很多人。
我太太 39歲
乳癌2B 期
ki67 : 45%， grade 3
ER/PR： positive
HER2: negative
3 粒淋巴感染
手術時發現不只單一腫瘤，係多發性，乳頭也有癌細胞。
政府方案係 fec x 3 + T x 3。6月中開始
之後睇左個私家，話佢隻can 算惡，建議做 fc x 4, p x 4。 兩周一針。感覺上好似用藥勁D, 有效D.
我的想法對嗎？應如何選擇？
兩周一針係可能好D嘅，不過應該係ACx4，並唔係FC。
醫生，你好!
我媽今年67歲，剛完成右邊全切，醫生解釋報告，前哨淋巴切2粒冇事，另外2粒脂肪，有荷爾蒙受體，HER2 -ve，no special type，grade 3。
有以下疑問:
1) 醫生一時說切4粒淋巴，一時說2粒淋巴，2粒脂肪，脂肪也是前哨淋巴嗎？
2) 醫生說腫瘤屬no special type和grade 3, 建議食藥及化療。no special type是什麼？
3) 她的腫瘤算唔算惡? 化療組合哪個比較好? (150cm, 62.5kg, 糖尿及類風濕)
4) 手術前一星期，醫院突然說肺x ray有陰影，要照CT，結果無異樣。因為之前不懂，現在應該再照PET scan嗎? 還是等化療後再做?
謝謝!
1）脂肪不是前哨淋巴。
2）No special type 是最常見的類型（8－9成乳癌都係呢類），相比起唔常見特別的類型如tubular type，no special type係惡D。
3）腫瘤幾大？ER/PR幾多分？Ki67如何？
4）CT話無事，就已經取締咗X光的結論，唔會因為呢個原因照PET scan。
切脂肪的目的是什麼？也是驗擴散嗎？
腫瘤2.1cm，因為係公立做手術，醫生沒有告知仔細數據，只說ER/PR positive
切脂肪不是目的，最有可能係手術中途誤以為脂肪係前哨淋巴，所以一開始話切咗四粒，之後病理切片發覺得其中得兩粒真係淋巴而已。
化唔化療屬灰色地帶，如果化，就打TTCx4。
Breast HK 你好！
我今年41歲，剛剛6月尾做完局部切除手術及前哨淋巴（第一粒淋巴有嘢第二粒無嘢），報告結果如下：
Invasive Ductal Carcinoma;
Grade 3;
Tumour size 14mm;
Lymphovascular invasion present;
TNM pathologic Staging: pT1c pN1mi;
Anterior margin close 1mm from invasive carcinoma; other margins clear >=2mm;
ER positive, PgR positive, HER2 negative, Ki67: 40%;
SLN 1 – Micrometastasis detected (1/4);
Non-SLN 1 – No malignancy (0/1).
我本身有乙肝帶菌現食緊 Entikav Entecavir 0.5mg 每日一粒，並有 semi-cystic nodule size 4.9cm x 4.9cm x 5.7cm、甲狀腺有結節。
應點樣醫呢？（電療、化療、荷爾蒙藥？若化療的話，邊隻會較適合？）
若電療、化療、荷爾蒙藥會否嚴重影響/加重本身病症？
另外，可否幫我用Adjuvant online計一計呢？謝謝！
1）化療（FECx3 + TTx3）、電療、荷爾蒙藥。
2）化療可以誘發急性乙型肝炎。
3）Adjuvant Online未開返。
Breast HK 你好！
睇晒以上講法，好想知道：
我係政府醫院做全切手術加化療電療，本身係乳癌3期，腫瘤約1.125cm, 淋巴割14粒有7粒擴散，醫生比兩個選擇我，一種係唔洗打升白針，另一種係自費打7支升白針，因為我係公務員關係，所以選擇自費打針，咁醫生就幫我寫左打嗰隻叫TAC 嘅化療針。我好想知道其實我係咪唔一定要打呢種你講到咁毒嘅化療針呢？聽講政府醫院係進取啲架係咪？
其實我已經接受左，亦已經響今日落第二針，副作用都唔太大，所以都希望順利完成！
謝謝！
唔一定打TAC，不過第三期打第三代化療走唔甩。
政府醫院唔係特別進取。
醫生你好！
我今年41歲，在6月22日在私家做完局部切除手術及前哨淋巴（第一粒淋巴有0.3mm, 第二粒無嘢），報告結果如下：
Invasive Ductal Carcinoma;
Grade 3;
Tumour size 14mm;
Lymphovascular invasion present;
TNM pathologic Staging: pT1c pN1mi;
Anterior margin close 1mm from invasive carcinoma; other margins clear >=2mm;
ER positive, PgR positive, HER2 negative, Ki67: 40%;
SLN 1 – Micrometastasis detected (1/4);
Non-SLN 1 – No malignancy (0/1).
現已轉介公立醫院 1/8 做療程 （(FEC x3 + Docetaxel (Taxotere) x3)); 但於注射 FEC 時，痕癢並打針隻手手出現粒粒（像俾蚊咬的腫塊，有紅豆及1亳子的大小），䕶士打鹽水和防敏針沖淡）；醫生 stop 咗第一針，改 plan 改下星期再打！
醫生，若咁嘅的情況，邊隻化療會較適合？會否唔夠力控制隻惡癌？及與原先的療效百分比有多大不同 / 影響？咁兩個化療效果係咪一樣? 萬分感謝！
而家講緊對藥物敏感，唔再係純粹成效的考量，之後就交由自己醫生決定。
Okay, many thanks
醫生，您好。母親剛完成化療，將準備接受電療。上次覆診的時候，政府的主診醫生建議母親到私家診所檢查骨質疏鬆。
想請教若想做骨質疏鬆檢查，應趁電療前這空檔時間儘快進行以便及早跟進，還是應待完成整個電療後進行較好？
感謝醫生為一眾病人及其家人提供專業意見！
唔急的，冇咩所謂，幾時做都得。
醫生您好，
本人今年38歲，已完成局部切除手術。腫瘤size 2.3cm, grade 3, ER 300/300 positive, PR 75/300 positive, HER2 0/3 negative , Ki-67:40%
前哨淋巴3粒有1粒中左，再割多18粒無事。
想問問係私家腫瘤科醫生建議打6針TC， 昨天去屯門醫院，醫生建議打3針AC, 3針TC。
我而家唔知點好，兩個醫生唔同講法，請您可以幫忙分析一下嗎！感謝
兩個方案都係怪，唔知你有冇覆述錯，TC如果係指Taxotere cyclophosphamide 就通常打4針，唔會打6針。如果TC 係指Taxol carboplatin，通常用係三陰性乳癌，唔會用係荷爾蒙受體陽性乳癌。
3AC + 3 TC就更怪，唔會咁組合。淋巴有擴散，屯門應該會用FECx3 + TTx3。你返去搞清楚先。
好，我到時返政府再了解清楚先。
私家我check 了佢叫我打Taxotere cyclophos-phamide多西紫杉醇6針，醫生話A針有機會傷心臟同副作用大d，所以就唔揀用呢隻。
其實想問政府每日見咁多病人，我係咪無需質疑佢用咩套餐嘅藥，直接交俾政府醫生安排呢？
政府醫生用心對病人呢方面係不容置疑，基本需求上係冇問題。只係有時限米煮限飯，未必時常滿足到個人的需求／追求。
醫生你好，
我今年56歲，剛先後完成左乳房局部及全乳切除手術。第一次手術後証實係原位癌及發現1粒入侵性腫瘤size 10.5mm，第二次手術切除全乳後再發現附近有2粒分別1.5mm 及 3mm 腫瘤及原位癌分佈。
病理報告指是三陰性1期，Grade 3，Ki-67: 15%, 前哨淋巴冇感染: 0/3。
醫生話雖然係一期，但係三陰性，所以要做化療。
睇完你介紹咗好多種化療方案，請問我呢個情況適合那個組合？ 幾時開始化療好？
如轉介政府醫院跟進，會遲嗎？
感謝你回覆！
譚太
TTCx4。傷口癒合後盡快開始。
政府係慢D，不過可唔可以接受好講個人資源。
謝謝回覆！ 看了你介紹的組合TTCx4好像是要自費，那麽和私家收費是否一樣呢？即可以快啲去私家睇，不用排政府醫院？
當然私家會貴D，政府自費只係收返藥錢，私家仲有燈油火蠟。
謝謝回覆！ TTCx4這組合是否自費在私家才有呢？
公立都有。
你好醫生，太太術後報告
左面有3.1cm腫瘤。左液下淋巴有15粒感染。PR/ER 8, HER2 negative. ik67:40. 現在有兩個化療組合建議。已做重建。小時有心漏，但已經無事，只是每年覆診。
1) DD AC + P
2) FEC x 3 + TT x 3
想問下醫生上述两種化療組合比較合適？感謝🙏
我會傾向1。
Hello 你好！
好幸運今天可看到這個網站！因為多天來好煩亂！謝謝你！
我妹妹今年50歲，2個月前發現糖尿病，現正服藥中，佢好積極，也比之前減少藥量！
但一個月前發現有乳癌，剛做全乳切除，報告是三陰性T2N1（IIB期）21mm大，淋巴抽咗25粒，有3粒擴散！未做手術前有做CT，未有發現擴散到其他器官，因為要安排工作事宜，差不多延遲一個月後才做手術，因之前妹妹不知道是三陰性又惡又快！唉！
請問現在需要補做 Bone Scan & PET Scan嗎？
另外私家醫生建議做ACx4+TCx4（每兩星期1療程）同打升白針！
之後頸淋巴電療25次（5星期）費用約25萬！
這費用我們負擔較重，請問政府做法是否相同，我見有些是3星期1針，對付這三陰性是適合嗎？
另外如在私家醫生那裡做化療又是否可以往後由政府醫院跟進呢？
好徬徨！好無助！請指示！謝謝！
另外我見醫生寫的TC是Taxol是否跟你寫的同是一樣呢！
謝謝你！
1）可以考慮補做，一係做bone scan，一係做PET Scan，唔會兩樣一齊做。
2）政府都係會化療電療，不過好大機會唔係兩星期一針密集打化，佢地一般係三星期一針。三陰性乳癌兩星期一針係好D嘅。
3）可以私家做化療往後由政府跟進。
4）兩星期一針嘅TC係Taxol-Carboplatin，同平時三星期一針嘅TTC x4係指Taxotere-Cyclophosphamide 唔同。
Hi, 可介紹一下乳癌治療上的免疫治療？
有時間會講下呢方面的發展。
醫生，我47歲，已經做完手術3個星期，tumor 1.4cm Grade 3，ER+(moderate to strong staining 90%)，PR+(moderate to strong staining 10%)，cerbB2 negative ，ki67 40%。做左前哨淋巴4粒，3粒冇事一粒有小小(Sections shows 4 lymph nodes with one showing isolated tumor cells (a few tumor cells) visible only on IHC. The remaining 3 nodes are nagative as confirmed by serial sectioning and nagative staining for cytokeratins ) 我做埋oncotype DX，Recurrence Score 40，Distant Recurrence Risk (with Al or TAM alone) in 9 years 28%，Absolute Chemo Benefit (RS26-100 all ages)>15%。我家族有兩個姐姐都有乳癌，病發都係under 45歲，醫生建議我每兩星期打4xAC 4x Taxol，因為擔心我復發率高，所以打咁多，但我一期咁打8針我怕頂吾順太辛苦，醫生請問你可吾可以比個建議我呢？感謝
其實唔洗每兩個星期打八針咁多，始終係第一期姐，其實三星期一針TTCx4或者FECx3+TTx3都已經夠。
多謝醫生，其實我個Oncotype test係咪話我復發率好高呢？打8針4xAC+4xTaxol係咪可以清盡D身體入面嘅癌細胞細胞而減低個復發率呢？
OncotypeDx 個分數只係交代復發風險，同用咩化療組合暫時冇一個線性關係。
Dear Dr,
Wife’s oncotypeDX RS 30, Distant Recurrence Risk at 9 Years 19%, Absolute Chemo Benefit > 15%. Would you recommend chemo?
The Oncologist gave her two options: TC or ddAC-T. I would love to hear your thoughts.
Thank you so much.
CSSue
I would recommend chemotherapy. You need to provide more information regarding tumor status before I give my comment.
醫生您好，
本人太太今年50歲,已完成全乳切除手術。腫瘤size 2.cm, grade 3, ER 60% positive, PR 50% positive, HER2 3+ , Ki-67:40%
前哨淋巴無事。
想問問係私家腫瘤科醫生建議打6針TCH (TC+H係一齊打)， QE醫院的醫生建議打4針TCH, 但TC同H分期打(先完成TC才打H)。
我而家唔知點好，兩個醫生唔同講法，請您可以幫忙分析一下嗎！感謝
兩個方案也可行。
還有，我老婆手術後已7星期了，傷口還有少少未埋口，化療已預訂第8星期左右開始落針，如果到時候傷口還差少少，可以做化療嗎？如果真的不可以，10星期內落針會否太遲嗎？因我睇了一些文章，話6至8星期最理想。感謝🙏🏻！
傷口未埋就唔可以開始化療，唔存在遲唔遲的問題，身體狀況未準備好，都唔到你揀。
兩個方案落針數量都有分別，照我太太情況，實在邊個會好啲呢！🙏🏻🙏🏻🙏🏻
差不多。
醫生你好！上月确診高度浸润性導管癌伴局部微乳頭状形態，属三阴性，腫瘤1Cm，Grade 3，Ki67 70%，巳做全切手术，冇抗散淋巴，癌细胞是否很恶，现等見腫瘤科化療，請問醫生什么化療组合适合我？麻烦你。
保守就TTCx4，進取就DD AC + P。
如果做完化療有什么方法知道體内有冇残餘瘤细胞，謝謝醫生。
好多時要復發先知。
唔好意思想問醫生DD AC+P一共要打几針，要几長時間。麻煩醫生。
上文已經有詳細講。
謝謝醫生！
醫生你好，三星期前而做全乳房切除，2A HER2+現在要準備開始化療，請問化療有黃金期嗎？因擔心到公立醫院排期會太耐，要七月尾先可以第一次見醫生。所以先到私家醫生睇治療方案，醫生建議TCH x 6 + Herceptin x 13, 擔心費用好貴，如果到公立醫院排期，會否錯過黃金期？請問公立醫院費用大約會多少? 可以先到私家開始2個cycle再轉去公立醫院繼續餘下療程可以嗎？因為七月尾先排到公立醫院第一次見醫生，唔知可以怎樣去查詢這個問題，如果可以的話，公立醫院會否跟私家醫生的建議去完成餘下的療程。最後想請問如果Herceptin x 13係公立醫院做，費用公立醫院費用大約多少。
現在好擔心亦都好徬徨，希望醫生能解答我的問題，，萬分感激。
化療最理想為手術後四至六星期開始，三個月以內開始都叫可以接受，三個月過外就唔係咁好。
公立淨herceptin一年大概三十萬，得到幾多資助就要入息審查。
可以私家開始，再公立收尾。
Herceptin 係打一年，即係17或18針，並不是19（6+13）。
我個case係Her2+，2A, 但淋巴冇感染，請問係咪一定需要化療呢？
係。
Hi BreastHK,
Million thanks for all the post on the web, just would if it is feasible to add back the “year” on each post in the Q&A section?
Thanks,
Thanks for your suggestion. It is omitted for historical reason. Let me think over it.
Hi BreastHK,
If a left breast mactectomy done w immediate reconstruction last July & plastic surgeon has placed a tissue expander w magnetic insert for fluid injection. Just wonder if still can have the PET scan done now? Would the magnet of the tissue expander affect?
Thanks,
It is feasible to have PET scan, the tissue expander would not affect the PET scan result.
你好，
我太太今年39歲, 已在17/7完成局部切除手術
術後報告如下:
ER 8/8
PR 0/8
C-erb2 -ve
Ki67 50%
Tumour grade 3
Tumour size invasive 14x17x18 mm
Tumour stage pT1cN1a
Axillary lymph nodes: total 13 nodes, 2 positive, up to 23mm
公立醫院建議 Adriamycin & Cyclophosphamide x 4 + Docetaxel x 4 (每3星期1針)
私家醫生建議兩個plan:
(i) Doxorubicin+Cyclophosphamide x 4 + Docetaxel x 4 (每2星期1針及加升白針)
(ii) Epirubicin+Fluorouracil+Cyclophosphamide x 3 + Docetaxel x 3 (每3星期1針)
現有問題如下:
1. 請問那個化療組合比較合適
2. 是二A期嗎?
謝謝!!
1）三個也可以，傾向私家的兩個（不過你打錯每兩星期一針，係用paclitaxel，唔會用Docetaxel的）
2）是。
請問這三個治療組合的副作用分別大嗎?
不大。
請問打DD AC + P呢個組合，入面所用到嘅升白針會有咩副作用？做資料搜集時睇到話會有急性骨髓性白血病或骨髓機能不良症候群，好擔心捱完化療後會有其他問題。想了解升白針嘅風險，謝謝
主要係骨痛。
醫生您好, 我媽68歲, 報告如下
LEFT BREAST, Radical Mastectomy
Invasive ductal carcinoma, grade 2
tumour size 2.9cm
Focal lymphovascular permeation present
No extensive in-suit component
No satellite tumour nodule
No Tumour involement of the overlying skin
No paget’s disease of nipple
Lymph node metastasis present (29/30 with perinodal infiltraion)
Resection margins clear (distance from deep margin:0.5cm)
已做左邊乳房, 乳房根治切除術,
浸潤性管導癌
想問如果唔想媽媽太過辛苦, 會用什麼療程較好?
剛做完手術, 淋巴也切除了, 黎緊會想想用什麼療程, 多吸收意見, 謝謝!
要睇ER/PR/HER2，不過29粒淋巴有事，如果頂得順嘅話，會建議化療電療。
醫生你好! 我今年38歲, 剛做完全右乳切除加level 2 淋巴切除, 右邊乳房2粒分別1.1cm及0.8cm (grade 2), 淋巴2粒, 分別0.7cm 及0.5cm。ER +ve, PR+ve, HER2 -ve, KI-67: 3%. 醫生建議化療方案一: TACx6 方案二: TCx6。醫生建議我做第三代的比較好，但我怕辛苦，以我的情況，是否還有其他選擇? 還是要最辛苦的TACx6? 請問我算第幾期?
淋巴有擴散就揀第三代化療，除咗TACx6，仲可以揀FECx3 + TTx3。
T1cN1第二期A。
醫生，請問以我的情況應該唔算嚴重，是否有什麼原因醫生要建議TACx6這個十分進取的方案？
中中挺挺。睇唔到背後有咩原因要咁進取。
醫生，你好。我今日又見了另一個醫生，他建議我再去醫院比錢做埋另一個腫瘤的cancer marker，確定一下是否2個腫瘤都是相同，我想問：
1. 為何之前醫院唔一次過做呢？為何之前另一個醫生又唔需要，這個又要？
2. 報告話有擴散去淋巴，但又說是非惡性，我問醫生，佢話都唔明，咁是否要問醫院？
3. 這醫生建議打DCx4，這方案是否也可以？我本人傾向打少啲，快啲完療程是最好的。
不好意思，那麼多問題，先謝謝抽空回覆。
1）成本考慮。冇咩懷疑，就驗大嗰個。有懷疑或錢唔係問題，就驗曬。
2）唔知你講乜，咩又擴散又非惡性，兩者自相矛盾的，總有一個錯。
3）有淋巴感染都係建議打第三代化療，DCx4怕唔夠力。
本人於十月尾確診患上乳癌，於十一月中由私家醫生做了全乳房切除及重整手術，病理報告及外科醫生的診斷為multifocal neuroendocrine carcinoma, Grade 2, extensive lymphovascular invasion present. T2(26mm) N1a(3/5) My. ER:8/8, PR:6/8, Ki67:25%, Cerb2:negative.
於十二月初見了兩個私家腫瘤科醫生及十二月中見了HA醫生。三個醫生都建議要做化療、電療及荷爾蒙治療。治療方案如下：
私家醫生1
化療: ECx4(每三星期) + Px4(每星期)；
電療: 5星期 X 5, 共25次；
荷爾蒙治療: 十年
私家醫生2
化療: ACx4(每兩星期) + Px4(每兩星期)；
電療: 3星期 X 5, 共15次；
荷爾蒙治療: 十年
(化療可於十二月內開始(十二月初時的估計))
HA醫生：
化療: FECx3(每三星期) + TTx3(每三星期)；
電療: 3.5星期 X 5, 共18次；
荷爾蒙治療：未定
(化療於一月尾開始)
正考慮究竟是採納私家醫生2定HA醫生的治療方案，現有問題如下，想徵詢醫生的意見。
(一) 本人並非三陰型乳癌，是否需要採納比較激進的DD AC + P方案 (HA醫生的意見認為打密啲及打多的相對效果可能好啲，但他只能根據本身醫院的相關指引提議療程，不能採納私家醫生2的方案)？
(二) 一月尾纔䦕始療程會否比較遲(HA醫生話這已是最快的排期)，相對私家醫生2的十二月尾期？ 一個月的分別對治癒影響大嗎？
(三) 私家醫生2及HA醫生都提議在療程時打升白針，是必需的嗎？ 會否有副作用或對未來身體有其他不好的影響嗎？
(四) 本人明白唔同醫生有唔同方案，可能是揀醫生多啲，睇下對邊個有信心啲(但HA無得揀醫生，次次都唔同)。 對私家醫生2有信心啲，但HA整體配套好啲(在HA醫院的日間治療中心打針，感覺上有醫療團隊在背後，而私家醫生就只能在醫生診所打)。所以好難決定。
最後，感謝醫生在此網站提供了很多有用的資訊，幫助患者認識癌症、瞭解病情及各種治療方法。
謝謝。
未答你問題前，首先先搞清淋巴做清未，你切得5粒係唔夠數，最低限度都要有6粒以上先叫全切，一般十幾廿粒。
1）雖然你唔係三陰，但Dose dense 係好少少。
2）當然越快越好。
3）雖未至話必需，但好多時都要。打時會骨痛，冇長遠問題。
之前見政府醫生，太慌亂，唔記得問，docetaxel+cyclophosphamide 是否同herceptin一同做？
病人是一期Her2
係。
非常謝謝你的解答，相信你亦明白，政府醫院醫生時間有限，病人又多，第一次見醫生時總有些問題唔記得問……PMH醫生給我們兩張藥物須知，只寫上docetaxel+cyclophosphamide，另一張則是herceptin，之前私家醫生提讓TCHx6, 不過政府醫生只提供4針docetaxel+cyclophosphamide及Herceptin一年，我忘記問是否同時進行。由於政府排期開始化療時間較遲(手術後2.5月)，所以打算到私家醫生開始第一針先(跟政府4針方案)，跟住第二針回政府做。
唔好介意，我有這欵惑，因為我有睇上面好多問答，有d her2病人係先做化療，後做標靶，不是同時進行，令我有d擔心私家做完政府接唔返。
因為輪候時間問題，而家考慮緊好唔好喺私家開針先，之後先返政府接第二針。
政府醫生喺第一次診症時已講化療、標靶用咩藥物(有藥物須知)、次數。
除咗通知以上資料俾私家醫生外，仲有乜野須要留意、提供，以順利銜接回政府醫院繼續餘下療程。
都夠資料。
已做保乳手術，clear margin ,腫瘤2.2cm,前哨淋巴切8粒無事，T2N0M0, ER+, HER2-, Ki-67 5% ,需要化療嗎？
歲數、tumor grade、點發現？
醫生，你好！本人Her2型二期，已做局部切除腫瘤手術，正在公立醫院接受化療(紫杉醇)+標靶(Herceptin)。由於癌細胞並沒有擴散到淋巴(前哨淋巴3粒都無事)，所以醫生只會為我安排4次化療，而標靶維持一年。我見很多人都會打6次化療的。請問我只需打4次是恰當安排嗎？會否影響治療的成效呢？
謝謝你一直以來在網上的寶貴意見！獲益良多！
QE常見有咁嘅安排，可以接受的，只是基於不同研究，所以有不同的打法。
謝謝你回覆！化療打少2次，我應該開心的！只是心底內又担心影响了治療效果，增加了復發率！請問有冇人會在公立醫院打完4針化療+標靶後，自己去私家醫生打多2針化療+標靶，然後再繼續回公立醫院打標靶的呢？
唔會，4針嗰C係cyclophosphamide， 同6針個C係carboplatin，唔同藥唔會咁駁。
多謝你清淅的意見及回覆
醫生您好。我已經完成右面乳房及淋巴全切除；
胸部腫瘤13mm; 擴散到2粒淋巴其中一粒31mm
ER 5/300
PR 0/300
Ki-67 95%
HER2 negative
46歲
有什麼較合適的方案？想去公立醫院做。謝謝
最好打DD AC+P，公立最常見打FEC x3 + TTx 3。
你好，媽媽今年54歲， 6月8號證實三陰性乳癌第2期A, 做完手術，政府排期到9月10號才開始做化療，想先去私家打一針，但想出發前問問你的建議，他應該接種那些針？
媽媽已經切除左面乳房的癌細胞，淋巴、肺，肝等沒有發現轉移；
胸部腫瘤25x28x12mm; T2N0
Modified bloom’s and Richardson’s grade 3 (3,3,3)
Ki-67:high index 35 %
HER2 negative(1+)
想問問有什麼化療方案較合適？想先去私家醫院打第一針，然後再到公立醫院做🙏🏼🙏🏼謝謝
DD AC + P。
Hi doctor
我是Grade3十HER2, 想問Taxol n Docetaxel (又名Taxotere)是不同藥，副作用是否都不同，Docetaxel 是否傳統，Taxol 好似係第三代化療藥，是吗?那一種好?
是同類但不同藥，副作用大致相同。係咪第三代視乎用藥組合，唔係取決於邊隻藥。HER2通常用Taxotere。
醫生你好，呢個網真係令好多病人同家人都安心，多謝你嘅付出！
想請教下，媽咪（57歲）有三陰性乳癌二期，T2N0M0 ，Grade III
私家醫生提議化療安排係 TTC x 6 加止嘔藥同升白血球針，但公立話打4 次就得，想知應該點決定打幾多次好？打多兩次係咪就係叫做屬於第2代治療，而唔係1.5代？
感激不盡！
打幾多次視乎醫生覺得幾大風險，公立第二期A標準打TTCx4，三陰性私家通常打DD AC+P。你私家醫生建議打TTCx6已經唔係常見選項，都唔會講係咪第二代。
你好，本人48歲，將開始乳癌化療療程，看過兩位腫瘤科醫生，分別建議3個化療療程，請問以我情況，應選哪個療程? 有何利弊?
本人情況:
– Infiltrating duct carcinoma with ductal carcinoma in situ. grade I, 1.5cm
– 1 of 17 lymph nodes with metastatic duct carcinoma (Metastatic focus measures 0.4cm, no extracapsular spread and positive for tumor)
– T1N1M0
– ER positive (85%)
– PR positive (95%)
– HER2 negative(0)
– Ki-67 index 15%
醫生建議療程:
1. FEC x 3 + TT x 3
2. TTC x 4
3. TTC x 6
淋巴有擴散，打化療就第三代，揀方案1。
醫生 您好,
我的女性朋友49歲, 報告如下：
LEFT BREAST,
Mastectomy & axillary dissection
– Invasive ductal carcinoma
with extensive micropapillary differentiation
( first tumour, 1-2 o‘clock, 5 cm from nipple )
．- Grade 3.
．- Size of tumour: 3.3 cm.
．- Lymphovascular permeation by tumour present.
．- Deep margin: negative ( 1.3 cm ).
．- Negative for oestrogen receptor.
．- Negative for progesterone receptor.
．- Negative for C-erbB-2 oncroprotein.
．- High proliferative activity.
– Invasive ductal carcinoma
( second tumour, 1 o’clock, 1.5 cm from nipple ).
．- Grade 3.
．- Size of tumour：2.2 cm.
．- Lymphovascular permeation by tumour present.
．- Deep margin：negative ( 2.5 cm ).
．- Anterior soft tissue margin：0.2 cm from tumour.
．- Negative for oestrogen receptor.
．- Negative for progesterone receptor.
．- Negative for c-erbB-2 oncroprotein.
．- High proliferative activity.
– No extensive in-situ carcinoma component.
– Nipple：No Paget’s disease and no tumour involvement.
– No tumour invasion to skin.
– Lymph node metastasis present
( 19/21, maximal size of metastasis：5.0 cm,
perinodal invasion present ).
左邊乳房, 乳房切除術及腋部解剖法
– 浸潤性管導癌
( 三陰性乳癌 )
．3月11日- 私家醫院做了切除及重建手術
．4月13日 – QE見腫瘤科
5月初開始
．化療6個月 ( 每個月打一針 )
FEC x 3 + Docetaxel x 3
．化療之後會做電療
請問
( 1 ) QE 只提供一個方案，沒有其他選擇。
這個方案是否適合？
還是要選擇 DD AC + P ( DD AC + T ) 比較好？
或有其他選擇？
( 2 ) FEC 副作用 較常出現是 嘔吐？
Docetaxel 副作用 較常出現是 發燒？
( 3 ) 升白針 是否有需要時才打？
期待你的意見, 感謝！
Michelle
1）可以接受，不過DD AC + P更好。
2）是。Docetaxel仲會手痺腳痺。
3）第三代化療通常都會打埋。
醫生你好，我媽媽在2018年(3年前)做完全乳切除，術後病理報告說是3A期(T2N2a)，HER2(3+)，賀爾蒙陰性，手術後照左PET-SCAN，醫生說報告出黎無異常，之後做左化療(TTCHx6)+25次電療+1年標靶
2021年5月(媽媽65歲)再照pet-scan，心口有一粒淋巴照到有野，約1cm，其他地方未照到有反應，醫生話唔可以做手術割走，只可以做化療靶
1. 其實無咪已經擴散，無法根治？
2. 私家醫生初步建議打雙標靶，咁係咪最好不停永遠打落去？定係做一個療程就停，之後再監察？
3. 呢個情況算係第4期？
4. 如果第4期巴話，其實係咪即係所有療程都係減慢癌細胞生長速度？最終都係會擴散曬去全身？
謝謝
1）擴散咗去淋巴，視乎地方／數量先評估到可唔可以根治，如果電得到，都仲有機會可以根治。
2）兩個方案都可行。
3）視乎原發腫瘤位置同擴散淋巴位置先可以判斷。
4）係。
你好，我至親係前兩星期發現係第四期三陰，去政府就咩都無解釋，俾左張紙佢，用fac /fec (張紙係空白，唔知係頭個2針係甘定轉),我地雖然點都政府醫，但極不安也不知做咩，所以今日搵咗私家醫生consult,佢建議用paclitaxel，每星期一次，再叫我地驗血睇可否加到個immune therapy,但我見網站資訊三陰係做DD AC + P,中間的差距是何解？多謝你無私的貢獻
DD AC + P 係比一至三期用，第四期基本上唔能夠根治，所以唔會打到咁盡，溫和D算，始終最終所有藥都會用上。
請問我63歲，21年10月18日在HA醫院做了粗針及幼針，10月27日覆診確診浸潤性導管癌3期了，請問什麼是浸潤性導管癌？
https://www.breasthk.com/dcis/
醫生你好。 想問下媽媽65歲，左胸T1N3aM0，乳癌三期。 己經做左左面全面切除。依家諗緊化療組合想問下你拎意見。
ER+ PR+ HER2- Ki67 9%
腫瘤size 1.8cm
Grade 2
但16/24粒淋巴有癌細胞
拎左兩個意見，但兩間建議都有d唔同
意見1： FEC x 3 + TT x 3
意見2: AC x 4 + TT x 4 (每3星期一次)
想問下醫生
1) 兩種化療組合有咩分別大唔大 點解要打多兩個星期？
2) 因為公院要 3 月先安排到做化療，如果簡意見2(AC x 4 + TT x 4 ) 私家先開針公院會唔會唔肯接個case?
謝謝
1）兩個都係第三代化療，分別唔大，有醫生想打多啲，因為16粒淋巴都真係比較多感染。
2）接就一定肯接嘅，同唔同意個方案就好睇醫生意見。
謝謝你的回覆
如果真係選擇意見2(AC x 4 + TT x 4 ) 下星期係私家打左1針AC ，2月頭先開始公立見醫生
公立醫生大唔大機會照跟定會要佢轉組合?
講唔實，兩個都有可能。
醫生，你好。
本人46歲，21年12月底做了左胸局部切除手術，切除了一個淋巴冇事，醫生給了兩個方案，想聽聽您的意見，兩種方案的10年死亡率和復發率分別是多少，是否值得做化療，謝謝。
具體情況如下：
Carcinoma of left breast Stage IA
pT1cN0(i-)(sn)M0 ER 8 PR 0 Ki-67 index 25%
c-erbB2 score 2+ FISH neg
Oncotype DX test- RS 18, ARDR 5%
Operation:
L11-12h segmentectomy and sentinel node biopsy
IDC G1 1.3cm, DCIS(15%) G1 1.5cm, LN 0/1
兩個方案分別是：
1. 化療（TTCx4），電療，荷爾蒙藥
2. 停經針，電療，荷爾蒙藥
兩個方案差不多，第二個方案只係用停經針去替代第一代化療咁樣做。
醫生你好，媽媽今年62歲，2月私家已做右邊全乳切除，要3月尾先見政府腫瘤科醫生，有問過出面腫瘤科醫生，建議頭一年做化療+標靶，一星期做一次，第二年標靶，三星期一次，再食5年口服藥。
想問下係要做咁多次化療? 私家咁做要成50萬，真係負擔唔到，想問下正常會用咩治療方法，報告如下，
ER positive (7/8)
PR positive (8)
C-erbB-2 positive (3/3)
Ki-67 25%
Invasive ductal carcinoma
grade 2
No peritumoural lymphovascular permeation
pT1cN0 (sn)
腫瘤size 1.9cm
多謝醫生
唔會做足一年化療嘅，你誤會咗醫生意思。
最溫和嘅就打Weekly Taxol x12 + 1 年herceptin
正正常常嘅就打TTCx4 + 1年herceptin
或者TTCHx6 + 12針Herceptin。
Dr Ma 您好！
已見政府腫瘤科，判斷乳癌一期，左胸全切重建，前哨淋巴正常。
病理報告：
CA L Breast cT1N0 Multifocal
ER0 PR0 HER2 3 Ki67 40%
4 hypermetabolic lesions in L upper breast size 2, 6, 9, 14mm
Hormone – ve; HER2 +ve
腫瘤科建議：
Chemo: Paclitaxel + Carboplatin
Target: Trastuzumab (Herceptin)
問題一：
相比Docetaxel，對我黎講，用Paclitaxel 有乜著數？
問題二：
我嘅情況適合用雙標靶嗎？同只用 Herceptin 單標靶, 會復發嘅機會相差幾多呢？謝謝！
1）冇着數。如果係三個星期一針嘅話，甚至蝕底添，因為paclitaxel 係合適一星期一針，三星期一針成效冇咁好。
2）可以選擇，但係唔需要。三年復發機會相差大概0.9%。
多謝醫生回覆，媽咪4月中開始做化療，TTCHx6加一年Herceptin，打完化療打4日升白針。
不過打完化療同升白針有一個星期都好辛苦，完全食唔落野，連水同營養奶都飲唔到，又屙又嘔，體溫keep住37.4，體重由51kg跌到46kg，到今日過左2星期先開始有番小小胃口，同埋行路都無咩力行，想問下之後果5針都係咁？有無咩方法可以減輕副作用？
有人副作用持續，有人慢慢適應。
都係頭痛醫頭，腳痛醫腳。
醫生，你好。本人50歲，22/4/22做了兩邊乳房全切重建。左邊係DCIS, 攞咗一粒前哨淋巴化驗無擴散。右邊三粒 DCIS，另一粒入侵性2.5cm, 攞咗3粒前哨淋巴無擴散。
T2N0
Size 25mm
Grade 2, Ki-67=17%
三陰性
腫瘤科A醫生建議：
1）TTC x6 三星期一針 =18wk
另一腫瘤科B醫生建議
2） ACx4 +Px4 dose dense 兩個星期一針=16 wk
3) TC x4 三個星期一針 = 12 wk
B醫生話方案2&3，復發率相差大約3%。因為我有二尖心瓣下垂，年輕時工作壓力大間中有心口唔舒服，不過檢查後無發現異常。醫生話如果我擔心影響心臟可選擇3。B醫生覺得我個情況如果用TTC打4針就可以，因為冇數據話三陰性打多兩針有幫助，對荷爾蒙陽性嘅就有數據支持打6針有好處。
馬醫生，你覺得我打TTC×4 係咪最好嘅選擇?
另外有冇需要化療前做PET scan, 對用藥決定有冇大幚助？ 感謝！
TTCx 4可以。
PET scan 純個人選擇，對用藥決定有少少幫助。
醫生你好，本人48歲，4月中發現乳頭凹陷，所以去做三步曲，之後又做了粗針及MRI,4月30日確診浸潤性導管癌伴導管原位癌，5月10號左乳全切，取了3粒前哨淋巴，無擴散，報告：ER positive 6/8,PR positive 7/8, C-erbB-2 Negative (score 1/3),ki-67 40%, pT2, Modified Bloom and Richardson grade 3, 腫瘤3.2cm,6月1號才見私家腫瘤科醫生，現想大約知道要否化療及電療嗎？
如要，請問用咩藥？謝謝。
要打四針化療TTCx4，唔需要電療。
醫生多謝回覆，謝問如果唔想化療，復發幾會大幾多%？只食藥可以嗎？政府排期要去到9月6號才第一次見醫生，已經距離手術4個月，太耐吧！她們說醫生會看是否緊急才通知我們改期，請問會有機會改期嗎？謝謝。
都係建議打化療。
有機會提早見你。
醫生，已看私家腫瘤科，都是要打TTC X4，不用電療，食藥5年，佢計出化療多7%.而計到食5年同食10年藥都係一樣多8%，所以佢話食5年就可以，這樣ok嗎？醫生請問如果私家貴，我先打第一針先，之後返政府，但政府排到9月6號，我想請問我有咩途徑問政府醫院可以早些見我？我見上面的留言排政府都是大約兩個月，但我四個月，現十分無助。謝謝
1）做得化療，就食10年藥。
2）冇途徑。
醫生，您好！我有兩個問題，1:我照B超同正電子掃瞄都話有兩粒（一個0.77，一個0.71）等我做完乳房全割手術之後的化驗報告話，只係一粒2.1Cm的三陰，點解會咁呢？點解手術之前的報告會差咁遠？
2:我2013乳癌一期（1.2CM，淋巴冇感染，但都係三陰）今年第九年屬於復發嗎？淋巴冇感染冇其他地方轉移，但又係三陰，做完全割手術，還需要化療嗎？如果化療，應該用哪一套方案？謝謝🙏🏻
1）只能夠話術前評估未能凖確反映現況，有好多可能性，例如癌細胞鬼鼠照唔到、之前做過手術疤痕影響評估等等⋯⋯
2）同一邊嘅話算係復發，需要化療，用哪一個方案要視乎淋巴狀況同埋2013年用過D咩藥。
醫生，你好。
本人150cm高，39kg重，34歲，6月頭發現左乳有硬塊。以下為8月中報告內容：
L12H 1 cm FN: 4 x 1.3 x 3 cm lobulated mass with internal microcalcifications, BIRADS 4B.
→ USG guided core biopsy L12H breast mass.
Left breast mass, 12H, core biopsy – Ductal carcinoma in-situ, high nuclear grade with necrosis and calcification,
invasive carcinoma cannot be excluded.
Left axillary lymph node, FNAC – Metastatic carcinoma.
ER – Score 3; >90%
PR – Score 2; >90%
Ki67 – About 40%.
CerB2 – Moderate to focally strong, incomplete membranous staning for CB2 (score 2) ［現正等待FISH test結果］
8月18日已照PET/CT Scan，沒有發現遠端擴散。
現正進行雪胚胎療程，預計9月3或4日取卵。
醫生暫時建議AC x4, Px4
有幾個問題想請教：
(1) 一位醫生建議兩星期一針，另一位則三星期一針。以我本身低BMI指數以及平日抵抗力差，應該選哪個方案比較好呢？
(2) 如果身體支撐不了要由兩星期改三星期，會對治療有壞處嗎？因為一開始用高劑量但之後放緩，怕癌細胞已習慣高劑量而令後續效果降低
(3) 想打停經針去保護卵巢但要待取卵完成，最快可以9月5日。這樣子又要等一星期即9月13日才開始化療。以我6月頭發現的情況來說，值得等多一星期先打停經針才開始療程嗎？始終已相距3個月了。
1）視乎淋巴有幾多感染，兩者效果差不多。進取就兩星期一針，保守就三星期一針。
2）冇壞處，只係得唔到密集式化療嘅好處。
3）唔值得，盡快開始治療先係皇道。
Hi, 我同仔你情況好相似, 可以交流一下嗎?
醫生你好，希望可以得到你的回覆。
left mastectomy and axillary dissection
Invasive solid papillary carcinoma, grade 2, pT1c(2), pN1mi
T1 : 1.3cm, ER8/PR 8, c-erbB2:0, Ki-67:85%
T2 : 1.8cm, ER7/PR 8, c-erbB2:0, Ki-67:85%
請問腫瘤算唔算惡? 化療組合哪個比較好?
算惡，PACS01 or DD AC + P。
可以介紹一下淋巴管靜脈吻合術（LVA）嗎? 邊間醫院有得做?
LVA成效唔顯著，所以大部分情況香港都係做淋巴移植加減抽脂。
醫生你好，感謝你創立左呢個網站，等迷惘嘅病者得到正確有用嘅資訊。
本人媽媽患二期乳癌。
07/19 全乳（左乳）切除+腋下淋巴全部切除
左乳房有兩個浸潤性癌瘤,1粒前哨淋巴感染（out of 44粒）
TI: ER-positive. PR-positive. c-erb82 score 0 (negative). Ki67 index high (40%):
T2: ER-positive. PR-positive. c-erb82 score 0 (negative). Ki67 index high (35%)
pTNM stage (AJCC 8th edition): pTlc(m)Mla.
-> overall 1/44 nodes positive for metastatic carcinoma.
想問以下幾個問題：
1.醫生建議我地去做Fecx3+TTx3, 電療, 荷爾蒙藥5年，係唔係一個合理方案？
2.另外政府排期，10月20號見醫生，第一次化療能否在政府醫院進行？會否錯過黃金治療期？還是應該在私家醫院先打第一針化療？
3.等待10月20號見醫生期間，我們又有什麼可以做？
4.另外，Pet scan 驗到兩邊腋下同頸部有好多粒活躍淋巴結，但媽媽本來有類風濕關節炎，醫生估計唔係轉移性, 建議我哋去做右邊腋下淋巴活檢。是合理建議？
1）合理。
2）會錯過黃金期，可能嘅話就係私家開始住先，之後先銜接公立。
3）心臟檢查，因為紅魔鬼會傷心臟，做化療前一定要檢查咗先可以開始。
4）可以考慮抽幼針，不過角色好含糊，因為咁多粒活躍，都抽唔晒㗎啦，一粒抽針冇事又唔代表其他冇事，大方向都係要化療。
感謝醫生回覆！我哋會積極治療的
醫生，係到再想問多少少
媽媽07/19做手術。
化療與化療之間的可以有一個月的空檔期嗎?
因為醫生建議在8月尾開始第一次化療, 但10月20日才到政府見醫生, 我地因為金錢考慮，唔想係私家做三次化療，一般而言可以等到公立醫院(即10月20日後)才做第三次化療嗎？
又或是可以遲少少9月頭先開始做化療嗎？
冇研究數據咁樣兩個方案邊個好／點樣影響成效。如果點都會係喺私家打兩針，點都有空隙時間，我寧願早D打，搏一搏公立會唔會有得提早早D見。
醫生, 先感謝意見
我打 4 Taxane, 還是3 Taxane+3 AC, ?
CUT 了三粒前哨淋巴, 其中一粒游離, 要加AC針嗎?
40歲, 30MM Grade 2, ER7 PR6, HER2 negative by Fish, Ki67 15-20%. One of t sentinel node contained isolated tumour cells
TTCx4。
你好 醫生感謝意見
代友問 35歲 有家族病史
已完成左右全乳切除
Report:
Greatest dimension of largest invasive focus:3mm.
PN1mi
Grade 2
Er+ pr- her2 – ki67:10%
淋巴25粒，前哨有一粒1.3mm，其餘冇事
已全左邊淋巴切除
第一位醫生建議ac4+tc4 再加16次電療 加5年藥
另一位建議tc x4, 不用電療 加5年藥
請問哪個方案合適？🙏🏻
第二位。
Hello. Breast HK,
好多謝你係呢度咁多㗎資訊，真係好實用。
我剛完成右邊乳房全切手術，PT1cN1a,Er/PR+, Her2-,Ki67 35%.腋下淋巴有兩粒前哨淋巴有擴散.
我睇完你㗎資訊，覺得自己可能需要打第4個方案化療（FEC X3+TTX3）
但見完腫瘤科醫生佢建議我打ACX4+TX4,而且係私家打大概$30000一針（包所有化療輔助藥物），但公立醫院我未等到期見腫瘤科。
請問我係未真係需要用ACx4+Tx4方案？（而且費用也頗高）還是需要再見多一位腫瘤科醫生？
謝謝🙏🏻
FECx3+TTx3已經足夠。
謝謝您們的回覆🙏🏻❤️❤️
My wife is 46, she did surgery already, full removal and removed 19 lymph nodes.
The tumor invasive part is 4.5mm (total size 2.5cm), 1 out of 19 lymph node positive (6mm), grade 2, HR+, Her2-, LVSI is seen. Stage IIA
Her mother had breast cancer at age of 70, father had cancer at age of 50.
Consulted one oncologist so far who recommended chemo using dense dose AC x 4 + P x 4, injection every 2 weeks. Total 16 weeks.
The tumor is HR+ (ER is 90%), would hermone therapy alone a possible option instead of chemo?
Appreciate your advice.
Thanks.
Hormonal therapy alone would not be enough. She should undergo chemotherapy. The regime PACS01 (total 6 cycles of chemotherapy) would be enough, dose dense regime is usually reserved for triple negative or stage 3 disease.
Thanks for the response Dr.
My wife has started the DD AC x 4 + P x 4, every 2 week regime. She finished the 1st treatment, on the 10th day after tst treatment, her white blood cell level dropped to below 0.6×10^9/L, stayed in hospital for 3 days in isolation, total taken 11 shots of Nivestim. White blood cell level back to 2.71×10^9/L.
She could eat, do exercise and rest. Already delayed 2nd treatment for a week, her white blood cell level is still at 2.77×10^9/L. Is there anything can help other than taking more Nivestim shot?
Thanks in advance.
坊間有啲人會試吓煲花生衣去飲。
你好 我28歲 2星期前做左局部切除 冇家族史
report: invasive carcinoma nos focal intermediate grade DCIS final margins clear, 19mm, grade 3
ER 7/8 PR 8/8 C-erb B2 score 1, Ki67 50%
前哨淋巴有2粒isolated tumor cells 外科醫生話唔當擴散所以冇清淋巴 不過腫瘤科醫生話都有concern
recommend 6次化療(頭3次3種藥,後3次1種藥 咁應該係FEC*3+TT*3?) + 25次電療 + 10年荷爾蒙藥
請問會唔會有其他意見?
thank you.
同意上述方案。
謝謝回覆
睇左第2個私家建議TTC*4 + 15次電療 + 5年停經針+AI
話FEC*3+TT*3係2期先要
依家有啲十五十六
請問效果分別大嗎? 復發率會唔會差好遠?
醫生點睇ITC?
如分別不大可能傾向揀TTC*4時間短啲
效果差不多。
ITC等同淋巴冇感染。
你好醫生，媽媽62歲，已做左乳+淋巴2/3切除
腫瘤25MM大，grade 3, 1 of 12 axilliary lymph nodes shows metastic carcninoma, biggest focus measures 1.8mm
ER+, PR-, HER2 -, Ki-67 50%
是否都需要化療電療?
謝謝醫生
傾向化療，如果仲想清楚D嘅話，就做埋OncotypeDx，睇吓有冇偈傾。
你好
我42歲，
有BRCA1 基因
ER weak positive (about 1%)
PR negative
Her2 negative
Ki67 30%
做完PET-CT scan 後，右邊腫瘤7.5cm, 淋巴擴散14粒（擴散到頸淋巴），無擴散到其他器官，醫生話係3c期
而家打緊紫衫醇+卡鉑 （打12針 每星期1針，已完成第7針）由放銜接公立醫院，第6針omit左，醫生話好難計第6針分量，（因為私家係第1，4，7，10針先打卡鉑+紫衫醇，其餘只打紫衫醇；而公立係每針都有這2隻化療藥），打少1針會唔會有影響？
跟住仲有4針AC (每3星期1針）
另外免疫治療打左2針 （要打一年，每3星期1針）
我將會2邊全切+2組淋巴。
私家同公立醫生都無詳細講術後嘅治療安排，只係話會做電療，化療，同食藥 （荷爾蒙藥或有標靶藥啱我食），我諗住完成晒所有治療後做預防性切除2邊卵巢（因媽媽同姐姐都患卵巢癌），甘係咪可以唔食荷爾蒙藥？我唔想食5年或10年嘅藥
我聽到做完手術仲要做多一輪化療，諗起都覺得係惡夢，係咪一定要做？定係要睇埋術後報告再定？
差一針差唔遠。
可以唔食抗荷爾蒙藥，因為你都類近三陰性。
手術後唔使打化療，睇手術報告再決定需唔需要食口服化療。
Dr. Ma, 首先十分感謝你d的資訊, 令病人及家屬們都可以透過哩個網站同短片比較全面地認知乳癌及其醫治方法/流程/費用。大大地降低了我們因為無知而帶來的不安及恐懼。
本人媽媽的病理報告/情況如下:
1) Invasive cancer 左邊局部切除
2) Age:66
3) Size: 22mm
4) ER & PR +
5) Her2 –
6) Type: T2 N0(i+) M0 Total 5 nodes, 4 SLN, 2 Nodes having isolated tumour cells
7) Grade: 3
8) Ki-67: 30%
9) 身體健康狀況: 普通 主要係長期服用血壓血脂藥
依家困擾緊我們的是如何選擇合適的化療方案 睇左腫瘤科醫生 他們提出以下兩個方案:
1) 第二代 DC*4 (3禮拜一針)
2) 第三代 AC*4+P*4 (2禮拜一針)
基因測試不考慮了, 媽媽係一個灰色地帶case, 所以我們偏向做化療。
我們知到兩個化療方案各有利弊，希望馬醫生卑個意見 對於 我媽媽的情況 邊個化療方案比較著數 🙏🙏🙏 many thanks!!!
方案一。
Many Thanks !!