乳癌化療療程 － 吊針過程大公開
一講起乳癌化療，無論係自己要做／定係屋企人做都好，大家都好驚。
其實化療係點做㗎呢？唔知。
係咩都未知嘅情況下，其實驚咩先？唔知喎，睇電視／戲總之好恐怖。
實情乳癌化療療程係點㗎呢？辛唔辛苦㗎？洗唔洗訓醫院？呢篇話你知⋯⋯
做戲呢，個女主角一定係一個後生靚女（唔好話上年紀，盛女都唔會見到），開始咗化療之後，就會甩晒D頭髮長期住院。呢個時候，男主角就會揸住一大束花黎到一個有一大片草地嘅醫院（香港地都唔知邊間醫院有咁靚）探佢，入到一間得女主角一個人嘅病房，見到女主角死吓死吓氣若游絲咁訓係床度，氣都透唔到戴住個氧氣罩。當女主角接過男主角束花，想除底個氧氣罩聞吓嘅時候⋯⋯「吖～～」一聲⋯⋯你即刻放番低你嗰舊夾到一半嘅半肥瘦燒肉集中睇返電視屏幕，鏡頭一轉已經close up緊跌緊落地下嗰束花，重要關頭當然係去廣告，廣告完返黎束花經過5分鐘反地心吸力終於著地，只見到有隻男人手（唔好問點解乜唔係女人黎咩，CCTVB係咁上吓）係床邊垂底fing吓 fing 吓，男主角即時發晒矛咁搵醫生，場景中咁大間醫院居然連人影都冇個，之後男主角好情深咁成傷心埋下半世。睇到呢度，感性嘅你已經忍唔住落涙，好傷心咁食埋舊半肥瘦燒肉，再冇怨阿媽又唔記得攞芥醬。睇得多電視劇，只會比食燒肉冇芥醬嘅負面情緒影響咗你對乳癌化療嘅觀感，實情乳癌化療程序係點㗎呢？
乳癌化療療程
「化療點樣做㗎？洗唔洗日日住醫院？」
化療前要抽血度高磅重，之後見醫生睇吓抽血報告同埋心臟檢查報告正唔正常。如果正常頂得順，醫生就會就住你嘅身高體重去計吓化療藥物劑量，之後開藥單比你去醫院藥房買藥，化療通常都會安排第二日做，唔洗住院㗎，日間化療中心搞掂就得㗎喇。
視乎你打咩組合，有D要前一日食定類固醇。
化療嗰日如果有人陪就梗係好，因為可以幫手排隊攞藥／買野食／執頭執尾，冇人陪都唔緊要嘅，你叻女黎㗎麻。你依預約時間去到醫院，量血壓磅重之後，就要慢慢等叫名。
等⋯⋯等⋯⋯等⋯⋯等⋯⋯公立醫院就係咁，得個等字⋯⋯等⋯⋯等⋯⋯等⋯⋯等。不過真係慳返唔少。
等咗好耐，喺你嘅角度當然冇野做過，不過幕後姑娘就好多野要做，要同藥房聯絡上藥，預備藥物，對名對盛對幾十萬次（因為化療藥一定唔可以錯）。
經過漫長嘅等待，手機都玩到冇晒電，好在有帶尿袋差電，終於等到叫你個名。之後姑娘／實習醫生就會幫你打個以前叫「黃豆」嘅注射器（而家係藍色嘅）用黎落藥。
圖片來源：互聯網
之後就鹽水呀、抗敏藥呀、止嘔藥呀、胃藥呀、化療藥呀根據醫生前一日寫落嘅計畫去落藥。化療藥始終係勁野，要有心理準備可能會乸。
圖片來源：互聯網
滴⋯⋯滴⋯⋯滴⋯⋯滴⋯⋯滴足幾個鐘（尤其T針唔急得，如果太快會敏感），終於滴晒，原來唔經唔覺已經到咗下晝收工時間，朝九晚五又收工。
私家可能快半日，主要係D行政程序流暢D／冇咁多人等等，但係落藥嗰幾個鐘走唔甩。
如果冇咩唔舒服／過敏反應，就可以返屋企。搞咗成日都攰喇，如果仲要跨區返屋企就會好辛苦，所以揀間近屋企嘅醫院係好緊要。
「吓，唔洗住院訓病床㗎咩？」
醫院D床位咁貴，冇野就日間化療中心搞掂得㗎喇，有張舒服D嘅櫈比你坐嘅，放心，唔洗罰企。
返到屋企，通常都冇咩大問題，有D人可能會肚痾／小便紅色，有心理準備就冇咩野。
2017年8月更新：天大好消息，免費化療陪診服務，真係有咁大隻蛤那：粉紅天使－落入凡間的天使
第一個星期
成個乳癌化療療程最辛苦就係頭一個星期，會冇咩胃口，胃氣脹，作悶作嘔（尤其紅魔鬼就嘔到飛起）。
另外成日都好攰，冇精力去做野，雙腳冇力等等。打T針就有可能手痺腳痺。
第二個星期
如果打T針，身體嘅白血球會喺第七至十日急降，身體呢個時候最易受感染，所以應該避免去人多擠迫嘅地方，費事野到流感。
無論自費定政府包，如果要打升白針，就通常第四日開始打（專登早過我地預期嘅白血球低谷，希望可以谷起佢），打四至七日不等。
「點樣打㗎？」
打肚皮嘅，怕麻煩可以去賽馬會診所比姑娘打，都係$17姐。
如果唔想出街，想減少感染機會，可以自己學打／叫屋企人學打，好簡單㗎姐，支針好幼唔痛嘅。或者叫社康姑娘上門打，80蚊一次。
不過因為骨髓加班做白血球嘅關係，有D人會覺得骨痛，通常食必理痛已經搞掂。
第三個星期
女士最怕嘅事情終於發生，頭髮開始一束一束咁脫落，甩幾多／甩幾快因人而異。
另一方面，身體狀態／白血球水平開始恢復，有D人甚至繼續返工都仲得。嘅然身體頂得順，又係時候進入下一個週期同乳癌細胞搏命，再抽血、再見醫生、再睇報告、再按計畫落藥，直至完晒成個療程四針至八針為止。
有時白血球水平唔合格，就要留班等多一個星期，等身體頂得順先可以再開始。
「有冇咩食療可以幫手催谷白血球水平？」
問西醫，係冇嘅，只有升白針係有科學根據（所以賣你咁貴）可以提升白血球水平。
問病友，好多人都教你煲花生衣，科學根據係冇，不過得唔得就真係信不信由你。
問中醫，花生衣就係升血小板，幫唔到白血球嘅。
問營養師，嗰D幾貴嘅營養奶粉只係補充養分，冇證據話可以提升白血球水平，千祈唔好信嗰D失實嘅廣告。
「甩頭髮點算？」
呢個咁重要嘅題目梗係要開新一篇去講。
下篇「乳癌化療甩頭髮 － 點處理？幾時生返？」再見⋯⋯
香港乳癌及乳病治療中心 
Breast HK,
不好意思，為了做足化療既準備，想問問是否未必每一個人都需要打升白血針？ 見上文，打白血針通常要化療既第四天開始。我應該怎樣決定自已需要與否。是否無論如何先打白血針第七至十日會無禁辛苦？在公立醫院，打升白血針要多少錢？ 謝謝！
升白針＄900一枝。點先要打視乎用咩組合同想唔想自費，如果打TTC x 4，有錢可以打定升白針先，咁就應該如期完成化療；冇錢就唔打住，真係發燒時，升白針政府就包，不過可能會遲少少先完成化療。如果打DD AC + P，一定要自費升白針先可以頂得順兩星期一針化療。
Breast HK你好，
首先非常感激你寫這個網，為徬徨無助的病人提供寶貴的資訊！
我今年33歲，上星期五剛打了第三次TC同Herceptin，因為上兩針都發過38度以上的高燒要入院 (相信你也明白入院的流程和住院的感覺非常折騰人)，所以自從今個月上旬出院以來，我每天都活在「擔心又發燒入院」的陰影下，壓力很大，情緒狀態不太好。
第一次化療的第11天肛門覺得疼痛，第12天晚上發燒到38.2度，入院後首次驗血的WBC是1.5，這次的情況應該是細菌感染吧。我在隔離病房住了四晚，一日吊三次抗生素，但沒有幫我打升白針。到第五天我跟醫生說希望盡快出院，不過出院後的四天我仍然要每天返醫院吊一包抗生素。
第二次有升白針，還以為可以順利一點，怎知第五天晚上發燒到38.3度 (升白針已經打了三天，身體也沒明顯不適)，入院後驗到的WBC是很高的22.1，所以病房的醫生叫我停打一日升白針。這次住了兩晚，只吊了一包抗生素，然後就轉為口服了。
我想問一下，打了升白針仍然發高燒是常見的情況嘛？另外，升白針本身會不會令人發燒的？
謝謝Breast HK你寶貴的時間！
公立醫院資源有限，發燒要absolute neutrophil count （ANC）細過1，先會有免費升白針；如果大過1，發燒只會比抗生素。
升白針本身唔會令你發燒，但另一方面，佢又唔係百份百保證你唔會發燒。
其實升白針只係幫你增加身體裡面嘅士兵、築起長城，對抗細菌外敵。有士兵長城唔代表唔打仗，只係希望打起仗上黎唔好輸。所以一打仗（細菌來襲），都係會發燒，醫生比抗生素就係想幫你增加緩兵。
如果唔打升白針，自己身體又回復得唔夠快，情況有如自毀長城，哪怕敵人只得一兵一卒，都足以攞你命。
因此，就算有打升白針，千萬唔好以為自己無敵。記緊要留意生活細節，盡量乾淨方為上策。
感謝Breast HK你的解答！
其實我平時已經有少少潔癖的了，化療開始後也有跟足醫院那本指引來留意各項護理細節，頭兩星期沒必要也是躲在家不會出街，唯有希望最後這兩次療程會幸運一點不再發高燒吧！
點樣知道化療藥對自己個病有冇效？
等化療完成後，驗癌指數嗎？再做掃描嗎？應該幾時再做掃描？
非常好嘅問題。點先知道化療藥有冇效，好視乎你咩情況下打化療。
一般黎講，打化療係1至3期手術後打，呢D情況係唔知夾唔夾嘅。因為手術後已經清晒癌細胞，冇得觀察／跟進。打化療，係根據前人經驗有著數，「估」同D藥夾。
相反道理，如果仲有癌細胞係度，咪有得觀察囉，所以以下兩個情況可以知夾唔夾：
1）手術前化療，見舊腫瘤縮唔縮就知夾唔夾
2）擴散咗（第4期）化療。可以照掃描／睇住個癌指數（注意：癌指數喺大部份情況係唔靈敏、又唔準確；唯一有用係第四期指數好高時，就可以用黎量化對治療／化療反應）。
至於幾時做掃描好，就好難比一個指引你，因為好多因素要一併考慮，呢D野就交返比醫生幫你做決定。
醫生你好. 化療3星期發燒入院. 打左抗生素就退, 之後又升. 轉去隔離病房會否好點. 有什麼方法可以快點退燒. 謝謝.
反覆發燒即係場仗未打贏，要繼續用抗生素，如果種菌報告返咗（起碼一星期先返），就睇吓D抗生素夾唔夾，可能要轉隻夾D嘅抗生素。
轉去隔離病房，當然好D，因為乾淨D，不過隔離病房好多時都供不應求，僅有嘅隔離病房冇可能應負到化療發燒嘅需求。
要退燒，好容易，用必理痛一定退到，不過冇針對過／解決過問題根源。除咗升白針同抗生素外，有時可能仲要比嘅就係「耐性」。
我35歲，做咗手術1星期，因有買醫療保險諗住係私家醫院做化療及電療，其實都包唔晒，但標把因太貴就諗住去政府醫院打，咁我係咪應該依家就去政府登記定先呢，同埋有無得去邊度有得申請資助㗎?
有詳細病理報告後（知道洗唔洗化療／標靶治療／電療），就可以叫私家醫生寫轉介信去公立醫院登記，資助就見到醫生時問佢有咩啱你。
我媽剛打化療tc*4,已過半天沒有太大副作用，明天會否嚴重？
明天的事留給明天的你。
明天要安排吃怎麼？
乳癌化療期間之飲食 － 點補身？洗唔洗戒口？
ttc化療第一次副作用有疴，便秘,很倦，失眠，無力，掉頭髮。ttc第二次會有更重副作用？
人人反應唔同，唔能夠一概而論。放鬆D，有咩副作用都易過D。
謝謝醫生的詳細講解!請問醫生服食”雲芝”的效用有根據嗎?在化療進行期間能否服用?謝謝!!
雲芝／靈芝等等中草藥有冇效／有冇根據就見人見智，要求佢地好似西方醫學咁做曬研究／實驗／對照係不切實際，所以西醫好少建議服食呢D中草藥（因為都唔知得唔得，尤其喺呢個咩都講求證據嘅evidence based medicine 年代）。但你問中醫呢，呢D中草藥就有根有據，可能由黃帝年代幾千年前已經用起，西醫話冇用因為西醫唔識野／貨。所以結論係講個信字，信則有不信則冇。我嘅立場係化療期間盡量避免，費事節外生枝（怕佢搞到酵素高，抽血唔合格）。到完成曬化療，你鍾意點補身都得。
我想請問打白血球針會不會令血壓降低？ 請問有什麼方法可以令血壓回復正常？ 謝謝
不會。沒有藥物係用黎長期提升血壓。
謝謝回覆，另一個問題想請教，為何打了化療針後，胸部會特別脹痛？是否正常？ 謝謝
術前化療就可能因為化療同癌細胞打仗所以痛，術後化療就冇咩關係。
醫生，你好。
我媽53歲，T3N1M0, Er as 4, Pr as 8, HER2 score1, Tumor grade 3, 淋巴23 粒中有3粒有事，有高血壓. 打Fec x3 + TT x3.
現在打完Fec ,近日本來要打TT , 因白血球不夠所以廷遲了一星期。
但我媽近日開始左頸旁有少少頭痛『也是left BC』，但她未打TT, 更重要是未打白針，因此有點擔心，請問醫生這是正常嗎，不會那麼快有轉移的情況吧？
本身腫瘤係惡，佢未打曬針，即係仲要好密見醫生，有咩擔心／病徴盡快話比醫生知，等醫生幫佢安排相應檢查。
明白哂，謝謝你。
媽媽不合格要打3天升白針，但醫生無開止痛藥，如果自己買必理痛的話，應該打針前食還是打針後食呢？3天都要定時食嗎？謝謝！
開初可以試吓痛先食，如果真係長期痛楚，先定時食。
化療期間感冒,又有微燒,可以吃成藥嗎?
化療呢D關鍵時刻，有咩事當然係見醫生好D。
我媽媽打緊化療的第一針，頭2日都正常無事，第三日開始無力，而醫生開左升白針叫我地係第四日打，其實如果無咩唔舒服需要打嗎？還是依照醫生指示打？因為打左驚會周身骨痛 反而加重身體負荷
會建議依照醫生指示打。因為升白針係用黎「預防」白血球過低而引起的感染，並唔係用黎「治療」媽媽的不適，所以就算佢而家冇咩唔舒服都會建議打。
我媽媽剛打完第二支化療第二個星期 而頭部出現紅點、癢、腫已經有3日，請問是否需要看醫生？
化療期間身體特別虛弱，事無大小總之有唔妥，都係會建議返去搵負責的腫瘤科醫生睇睇。雖然聽落好似好神經質，不過小心使得萬年船，嗰個係自己媽媽，千萬個小心仍然係唔足夠。
那裡可以找到護士上門打白血針？
要麻煩醫生轉介社康姑娘。
https://www.ha.org.hk/visitor/ha_visitor_text_index.asp?Content_ID=10090&Lang=CHIB5&Dimension=100
心臟檢查係唔係每次吊針前要做？可唔可以講吓係點樣嘅檢查？政府醫院係會安排吊針同一日做嗎？
如果要打A針（開始第一針之前）或者用標靶藥Herceptin（用藥期間每三個月做一次）先要做心臟檢查。
心臟檢查有兩大款：一係做心臟超聲波（echocardiogram），一係就做MUGA scan。
無論做邊一款都好，都唔會係做化療同一日做，出唔切報告。
醫生, 您好 :
本人48歲, 今年5月16日確診乳癌, 5月26日已在私家做了全乳切除, 由於已轉介政府醫院做化療, 現正等待7月4日首次約見, 而我的病理報告如下:腫瘤3cm,共切去5粒前哨淋巴和14粒淋巴, 只有一粒前哨淋巴有0.4mm的轉移,ER:70/300是Low positive, PR:0/300是Negative, 不是Her2型(C-erbB2 : -ve), Ki-67是30%, 細胞grading 2, (T2N1miM0, IIB期). 像我這種情況, 用以下那種化療較好呢 ? option 1 : TTC x 4 + 電療 (12星期) or option 2 : AC x 4 + Taxol x 4 ( 16星期) 謝謝.
我妈妈现在做了化疗前3支AC针，本来计划是这个星期一做第四次（最后一次），然后就要换药水 以后每一个星期打一针，一共打12针（T针）。
到最后先安排做手机
结果我妈因为智慧牙在萌生，医院建议去把2只智慧牙都拔左先再做.
现在还在担心中要延迟左化疗啦。
我低系生活系美国哩边，但好多关于医学上的资料都唔系好明白，看了你的论坛，现在清楚很好了，
很甘多你，
你好，我媽去伊院做代療，打Tac,第4-7日要打升白針？每針2千，咁一次化療要萬4，另外止嘔藥600，咁6次代療咪要近10萬？咁去政府也很貴，有沒有辦法可以平d?醫生話一定要打升白針
升白針已經平咗好多，＄350一支，打4日都係＄1400。止嘔藥打A針又係政府包，唔洗錢。無你上面計條數咁誇張。
醫生，你好，
我的太太左胸患了2B期的BC，做了全乳切除及重建。之後安排在QM4月10日打了第一支FEC，17日驗血，醫生說她的WBC指數略低（但沒有說出準確數字），於是安排昨天（24日）再驗，指數是0.15，醫生說很低，叫她打升白針4天，並開了抗生素及止痛藥給她，並且要每4小時量一次體溫。早前預算第二針會在下週二（5月2日）打。
想請問
1. WBC數量是否會在打化療針後的第三週仍會處於極低水平？
2. 太太昨天晚上接近發燒（耳深的讀數是37.8－38.0），今早又回落至37.1，這是否打了升白針的反應（因護士祇提及會有骨痛）？
麻煩你告知，謝謝你。
Vincent
1）因人而異。
2）升白針唔會導致發燒。
醫生: 你好!
我係her2乳癌三期病患者，腋下淋巴感染13/30，做完手術，而家化療和標靶同步第五針，準備第六針，之前因睡眠麻麻，食了處方開的俗稱白瓜子安眠藥，食左17日後自行停藥，，之前見腫瘤科醫生，話我白血球未達標要延遲下星期抽血再睇，但我之前已打10支升白針，呢兩周經常頭暈和腰痛，四肢冇力，噁心，我想問，化療加標靶期間發生骨轉移機會大嗎？好擔心!
唔大。
醫生:
多謝你甘快復我!多謝晒你!而家我個心定左好多!
醫生，你好!
為什麼竹第四針化療打左7支升白針都不達標，第五針打了10支升白針也不達標，情況罕見嗎？
骨髓受化療的抑制影響係會累積的，情況唔罕見。
醫生，多謝你百忙中甘快復我! 感激!
點解我阿媽無擴散到都要8次化療，每期隔21日會唔會太耐
有D組合係要打8針的，同擴唔擴散之間冇一個等號的關係。三星期一針好標準，身體係要時間恢復的，唔急得。
我想問現在乳腺癌的復發率是幾多
冇簡單數字，視乎期數、屬性、所接受治療而有所不同。
我母親剛開始接受政府醫院的化療（PACS01(FEC100+Docetaxel)），由於她已是一名長者，很擔心她化療期間的感染風險…她現接受的化療每針的第4-10天須打升白針，想問第10天後白血球一般會回復正常水平嗎？可以向政府醫院要求自己補錢買額外的升白針嗎？還是根本沒此需要/沒作用？
另外，身邊很多病友都在化療期間進食雲芝糖肽膠囊，說對減輕化療副作用很有幫助。其中很多都已諮詢其主診西醫、中醫師及營養師，他們都沒反對；但亦有主診西醫極不主張，說怕影響化療成效……但我看香港癌症基金會免費癌症資訊都好像說雲芝可改善化療的副作用……到底化療期間可否進食雲芝糖肽膠囊呢？？？
懇求儘快回覆，非常感謝！
第10日一般白血球水平係最低的，所以事前第4至10日打升白針谷高佢。一般打7日都足夠，唔需要自己要求額外補針，有需要的話，醫生自然會叫你。
無話一定唔可以食，呢個問題上，我同主診睇法一樣，唔食就少隻香爐少隻鬼，冇得賴。
非常感謝您在假日仍解答病人及其家屬的疑惑，感謝~
由於母親化療後感不適，正猶豫可否藉雲芝精華替她減輕痛楚…聽取您的意見後，還是不吃以免她的身體對化療和雲芝的反應有衝突。
最後祝您端午節快樂！
醫生: 你好!
我係三陰性乳癌病患者，是接受先化療後做手術，現在已經打了7次化療針，合共打8支，4AC X 4Taxol，即將會接受做手術，想問一下我3月份化療前已經做了一次pet scan當時結果只有胸部和腋下淋巴其他身體部位沒有擴散，請問化療後手術前是否要再pet scan？感激
最好照一照。
醫生，多謝你百忙中回覆! 感激!
醫生 ，想問問見你無講p針既？我黎緊要打4針ac+12針p針，請問p針負作用勁嗎？
P針即係Taxol，有講過的，自己爬文：
乳癌化療AC針TC針 － 乜藥黎㗎？
請問咩情況之下，做咗化療加雙標靶場，落藥後兩日，再打升白針，驗血結果係白血球過高，指數係46，咩情況下會咁?
打完升白針咪咁囉。
醫生你好 我媽媽是三陰性乳癌患者 打完2次Paclitaxel後出現skin rash
見左oncology醫生話係對化療藥物敏感 唔可以再打
想問下呢個情況常見嗎？
黎緊會再照pet scan 睇下清況點再按排做手術
好擔心媽媽的情況 她只是54歲 仲算後生😞
唔罕見。
醫生你好，我今年55歲，十一月十號發現有硬塊，十一月三十號在私家做了右乳全切除手術，ER negative (<1%) PR negative (<1%) CarbB2 negative(0) Ki67 40% 是屬三陰性，腫瘤1.8cm with satellite module 0.6，14粒淋巴有1粒擴散，PetScan沒有擴散到其它器官，醫生對我說還屬於二期但看到手術後的切片報告是寫Grade111，令我有點混淆，請問醫生我是屬於第幾期？ 威爾斯排到一月廿四見腫瘤科，但手術醫生說我的癌細胞屬於活躍性高的，手術後要差不多兩個月才化療會不太好，建議我去見私家腫瘤科醫生，可先打三至四針後才銜接到威爾斯打其餘的~腫瘤科醫生說要化療和電療不可用標巴和服荷爾蒙藥，一共要打8針，頭4針兩星期一枝，每針未計醫生費和抽血要一萬五千幾包埋升白針，後4針三星期1枝，他說是用較多醫生選擇的藥物，所以去到威爾斯應該在銜接上沒問題…但我沒有問他用什麼藥！希望後4針可到威爾斯，只因害怕太久做化療會影響癌細胞復發才無奈這樣選擇，實在無力付這昂貴藥費！請問醫生正常手術後要多久才化療，真的有影響嗎？請問我的情況應該用那種化療藥較好？不可服荷爾蒙是否復發率會較高可否替我計計？三陰性是屬於較惡嗎？手術半月後手臂內側有麻痺痛感覺，腋下和傷口未端好像夾著半邊雞蛋似的很不舒服，甚至衣服磨擦也有微痛的感覺是正常嗎？太多問題真的不好意思喔～謝謝你的耐心更感謝建立這個平台，令不少徬徨的病友得到很多實用的知識。
1）第二期A。
2）手術後四至六星期開始化療最理想。
3）Dose Dense AC + P。
4）三陰性係最惡的屬性。
5）手術問題要問返自己醫生。
非常感謝醫生這麼快回覆，今早已接受了化療，真正用藥時間只約1小時沒想像中久，醫生說頭4針是用AC打，剛看藥名是寫著 IV CHEMOTHERAPY的，和你寫的好像有點不同不是以A第一個字母不知是否有誤解了？而後4針是用TC打，希望到時可銜接到政府…再謝謝的解答。
IV 即係intravenous（靜脈注射），chemotherapy即化療，它們不是藥名。
喔～明白，謝謝你你解答
醫生你好，我是那位三陰三期已做手術及重建的病人，已於5月9日打了第一針紅針，11日開始打升白針共打了6支，到今日驗血報告白血球升唔起只有2.48，中性白血球得0.53，醫生剛建議明天再追加多兩針，我再加兩針會否打得太多呢？白血球升唔起會危險嗎？除了打針還有別的方法升白嗎？我現很害怕
升白針冇絕對上限，睇住血報告黎調較的，加兩針冇問題。
白血球升唔起就有感染風險。
冇其他方法。
還有，從打第二支升白針開始，我的左腳膝蓋以下的脚骨很痛，食止痛藥也沒減輕痛楚，能否有其他方法幫助到呢？謝謝！
轉止痛藥，加減物理治療。
馬醫生你好，本人58歲，屬三陰性乳癌2B, 17/7已割除右邊整個乳房，16/8進行第一針化療。23-26/8打升白針，28/8驗血報告顯示有些微小白血球增長。醫生建議進一步檢查血液，或過兩天再抽血檢查。但第二針如期於30/8照打。想請教你，有白血球增長不是好事嗎？為什麼要要抽算檢查呢？另外，如果白血球有增長，是否可以唔打4枝升日針咁多？定抑或時間要調校前些/後些打？謝謝回覆。
唔係好明咩叫「有些微小白血球增長」，你不如講得具體少少。
升白針時間預設就白血球低谷，唔會隨便改時間。
醫生你好, 我今年38歲, 15/9於私家醫院做了左乳局部切除手術. 現時排緊威爾斯腫瘤科, 25/11見醫生.
Invasive ductal carcinoma, grade 2, with extensive and multifocal intermediate ductal carcinoma in-situ. Tumor size 1.8cm. Sentinel lymph nodes: metastatic carcinoma (1/8, 0.45 cm in size, no perinodal invasion). Axillary lymph nodes: no additional metastasis (0/12)
ER positive (270/300, 8/8), PR positive (270/300, 8/8), CerB2 1/3 (negative), Ki-67 2%
請問我的情況有幾差? 適合哪個組合的化療藥? 如果等政府期會唔會太遲? 謝謝!
二期A。
PACS01。
政府就預咗要等。
醫生您好， 本人在私家打緊標靶同化療針， 每3星期1針，巳經打了2針，現想轉政府打餘下的針， 但政府說只能做到4至6星期1針 ， 我不知怎樣好，可否提供一些意見， 謝謝
政府醫院繁忙，有時四個星期一針都冇辦法，六個星期先一針就誇張咗D，都冇乜嘢可以做到，只可以不斷同醫生表達你嘅擔心，睇吓可唔可以盡量安排快啲。