幫我開刀嘅醫生冇得我揀，一定要成個乳房切晒，但我又唔想做重建乳房手術，唔想多條疤痕，咁仲有咩辦法？原來手術世界之外，仲有另一片天叫「義乳」⋯⋯

以禮待人

「其實我就唔貪靚，不過切晒成個乳房又唔重整嘅話，咁我點著衫？」

係，我同意所有女性無論中女、盛女、定沒女，無論作戰唔作戰都好，都係唔貪靚嘅。不過全乳房切除之後，一邊平一邊凸，諗起都怕D膚淺男人覺得自己冇禮貌。

係，我都同意男人無論鑽石唔鑽石都好，都係膚淺嘅。

「咪係囉，咁點先可以著衫有禮貌D？」

原來呢個世界上有樣野叫「義乳」。

唔好問我佢個「義」字係咪代表好有「義氣」？定係同「關二哥」有冇關係？

義乳的秘密

「唔明，咁義乳即係咩？」

恕我通俗D講，即係「裝假狗」，就好似平時姊妹墊pad／用砵仔糕／水餃墊咁。雖然咁講好粗鄙，但真係一講就明。不過為咗提升返呢度嘅文化水平，以下我都係用返「義乳」好D。

「哦～～咁我明喇，不過我係裝假狗方面又冇咩經驗，咁有咩義乳過我揀？」

唔同階段嘅你，有唔同嘅需要。主要分為：
1）啱啱做完手術
2）已經康復後

剛完成手術

「啱啱開完刀，有咩要留意？」

啱啱開完刀，嗰傷口如果順利嘅話，大概兩個星期埋口，引流幾時拆就因人而異（有人幾日拆，有人幾星期先拆）。

呢個時候，通常咩都唔戴，不過亦有部分有禮貌嘅病友會揀戴胸圍加義乳。

胸圍就揀一D冇硬膠條／鐵線嘅，例如運動型胸圍（sport bra），貪佢有彈性同埋冇硬膠條／鐵線，唔會整親個傷口。

同埋最緊要前扣式，因為做完手術隻手開頭冇咁靈活，拗去後面解胸圍扣會好唔方便。

圖片來源：互聯網

義乳就揀一D輕身嘅義乳，例如纖維質地或者綿質（有D係內裡D綿花可填補嘅，可以自行調節理想嘅大細，想大D就入多D綿花，想細D就減咁D綿花）。

圖片來源：互聯網

而呢D輕身型義乳，亦都好合適訓覺用，貪佢唔洗有舊重野壓住，同埋又透氣D，咁就可以訓得舒服D。

不過咁輕身，你都估到摸落去手感一定唔好，覺得好虛／冇彈性嘅，唔太合適長久用。

康復之後

「咁短暫手感差D都可以接受，但康復之後長期點算呢？」

康復之後，傷口已經穩定晒，佢唔再係一個考慮，呢個時候（手術後四至八星期後）就可以去義乳公司揀一D合適嘅胸圍同義乳。佢地會有專家去陪你試身（breast prosthesis fitting），介紹一D啱你／sell你一D產品。

義乳公司

「咁有冇義乳公司資料？」

有，以下資料係由病友搜集所得。（利益申報：我冇同任何一間公司有聯系，自己亦都未試用過佢地產品（我係冇易服癖嘅），所以我係唔知佢地嘅服務／產品係好定唔好。但都寫出黎嘅原因，係希望幫到大家，做咗第一浸搜集工夫，唔洗連個公司名都要周圍搵。排名只係分區加隨機，並不表示邊間好D，你可以自己排嘅。）

矽膠義乳

「咁佢地有咩產品啱我／sell我呢？」

喺去見sales之前，了解吓產品特性，係有助成為一個精明嘅消費者。

已經康復後，呢個時候「禮貌」嘅要決在於重量、手感、同埋型狀。

「點解重量咁緊要？」

首先，因為切晒成個乳房，脊骨兩邊嘅重量唔平衡，係可以搞到背脊痛嘅，呢個情況喺乳房豐滿嘅病友身上尤其嚴重。因此希望搵返個差唔多重嘅義乳，去平衡返佢。

「但我唔係太豐滿咋喎⋯⋯」

重量都緊要，冇返咁上下重量，係唔夠墜手嘅。如果上身太大動作，胸圍可能縮咗上去，如果喺社會場合發生D咁嘅事，會非常尷尬，就好似D女明星比記者影到高低胸一樣。

圖片來源：網易論壇

所以適當嘅重量，係有助墜住個胸圍，等成個外型／動態自然D，有禮貌D。

「咁我明喇，邊D義乳有重量D？」

通常都係矽膠義乳，佢無論喺重量定手感，佢都係勝人一籌，所以最多人揀，價錢亦只係貴少少。

圖片來源：東網

不過佢都有唔好處，就係如果太大嘅義乳，可能「過重」，返而令膊頭位痛。

仲有膠質嘅關係，佢係唔索汗嘅，夏天大熱天時／做運動時，配帶矽膠義乳就冇咁舒適。

「嗰間公司話有超輕身矽膠義乳喎～」

雖然都有D矽膠義乳標榜自己超輕身，不過唔好處通常就係手感硬身D，摸落去冇傳統矽膠咁自然。

當然有D品牌／型號講到自己無敵咁，又輕身、又自然、又透氣、手感又好，係咪真係咁正，定係違反商品說明條例，真係要試過先至知啱唔啱自己。

另外有樣野要留意，雖然膠質防水，但都唔好浸佢落太熱嘅水度／浸溫泉／焗桑拿，質地會變㗎。

「重量同手感我明喇，咁型狀呢？」

揀完重量／手感就揀型狀。

乳房型狀呢樣野，其實人人唔同，並唔係好似D明星隆胸咁，個個都警鐘型嘅。原來義乳胸型都有分幾款，有三角型、有雨滴型、有心型、有分左右嘅不規則型。自己鍾意咩類型，可以去試身（prosthesis fitting）時試清佢。

義乳胸圍

「吖，唔記得咗問埋配合義乳嘅胸圍添～」

胸圍除咗可以揀平時用開嘅款式之外，好多病友都會揀埋專登設計比配戴義乳所用嘅胸圍，貪佢令義乳冇咁易移位。

大部份特製胸圍都係含有暗袋／夾層，方便攝自己嘅義乳入去。

圖片來源：互聯網

有D公司可以幫你直情車埋纖維／綿質嘅義乳落去個胸圍度，連成一體咁就一定唔會移位。

「咁呢D義乳同特別胸圍貴唔貴？」

如果最基本嘅矽膠義乳，加埋一套有內格嘅胸圍，大概$800度起步，當然有D靚D貴D嘅選擇，去襯返高貴嘅妳。

「咁襟唔襟用㗎？」

一般正常耗損，義乳公司就話用2年度。如果保養得好，用幾年都得嘅。

義乳泳衣

「我鍾意游水㗎，戴義乳點游水呢？」

當然冇問題，呢D公司都有相應有暗袋／夾層嘅特製泳衣，可以配合充滿活力嘅你。

重建乳房手術外的另一片天

最後喺youtube搵咗幾段片比你睇，希望你見到原來除咗重建乳房手術之外，天空仲係好闊嘅⋯⋯

下回預告

當完成晒成個乳癌治療階段，而家連扮靚靚都搞掂埋，下一個最關心嘅問題當然係「醫好乳癌之後應該點跟進？乳癌點check？要做咩乳癌檢查？幾耐做一次先最好？」。

下次「乳癌檢查 － 醫好乳癌之後點跟進？」再見⋯⋯

有唔明？係下面寫低佢，我會盡量解釋你聽⋯⋯

封面圖片來源：電影關雲長

• 乳房重建手術
• 乳癌手術
• 心靈復康
• 成功戰勝乳癌的妳
• 義乳