乳癌二期治療攻略 － 做手術先？做化療先？
我係乳癌二期病人，睇咗2個醫生，一個叫我做手術先，另一個叫我化療先。我頭都大埋，都唔知信邊個好？究竟乳癌2期係點醫㗎？呢次「乳癌二期治療攻略」教你點醫先最好，以後唔洗再怕「有乳癌點算好？」⋯⋯
上回講到，確診為乳癌第二期之後，就可以開始進入治療階段⋯⋯
乳癌二期手術篇
乳癌2期都仲係屬於早期，治療主力同乳癌1期一樣，以手術為主。
「手術有咩揀？」
手術2大部份：乳房同埋腋下淋巴都要做。
乳房：局部切除vs全乳房切除加減乳房重建。
腋下淋巴：前哨淋巴vs全淋巴切除。
乳癌手術 1 － 開刀我有咩可以揀？
乳癌手術 2 － 保留乳房手術 ，我做唔做得？
乳癌手術 3 － 保留乳房手術 ，我揀唔揀好？
乳癌手術 4 － 乳房重建手術 你要知
乳癌手術 5 － 前哨淋巴結活檢術？咩黎㗎
乳癌手術 6 － 專做乳房手術醫生的增值服務
義乳的秘密 － 重建乳房手術外的另一片天
「同乳癌1期手術有冇分別？」
方向同選擇都冇大分別，不過有2點要留意：
1）如果手術前已經知道有淋巴擴散，冇得做前哨淋巴，一定要全淋巴切除。
2）腫瘤越大（例如5cm），要割嘅乳腺越多，局部割嘅效果越唔理想，好易凹。越大越傾向全乳房切除加減乳房重建。
如果腫瘤大，又想局部割，另一方案就係做化療先，縮細咗嗰腫瘤先做手術。詳情參考乳癌化療時間 － 手術前做？手術後做？。
乳癌二期化療篇
「我已經做完手術，都確定係乳癌2期，唔係話早期黎㗎咩，點解個醫生仲建議我做化療㗎呢？」
做唔做化療其中一個重要概念就係易唔易復發？乳癌越惡，越易復發，越值得做化療。乳癌化療需知 － 我洗唔洗化療？
乳癌2期的確係早期，不過已經惡過一期，好多時都要化療幫助。
淋巴有擴散N1醫生會建議化療，腫瘤大T3醫生又建議化療。所以乳癌2期可以有得傾吓唔洗化療嘅得返T2N0。
「我係T2N0呀，係咪唔洗化療？」
仲有其他關卡要過。如果三陰性乳癌又要化，HER2型乳癌又要化，後生又要化。（有咩8大關卡，去睇睇乳癌化療時間 － 手術前做？手術後做？）
「我真係唔想化療，咁乳癌2期做咗化療有幾大著數先？」
咁你要睇睇乳癌化療需唔需要 － 著數計算機火併乳癌基因測試。
如果你係荷爾蒙受體陽性（ER＋）非HER2型（HER2－）T2N0，又唔後生加埋有錢，就值得做吓乳癌復發基因測試，去幫你決定化唔化療好。
「我決定聽我醫生建議打化療喇，但點解有D病友就打4針搞掂，有D就要打6針嘅？」
打咩化療並唔係單純睇打幾多針嘅，因為唔同針藥有唔同打法。最常用2大主力就係A針紅魔鬼同埋T針紫杉醇。想知多D就去睇乳癌化療藥物 － AC針？TC針？乜黎㗎？。
呢2隻藥組合出3代化療組合（乳癌化療選擇 － 咁多組合點樣揀？），乳癌二期通常都用第2第3代組合。
乳癌一般惡（例如T2N0）：打返第2代，有錢就TTC x 4，冇錢就FAC/FEC x 6。
乳癌好惡（例如T2N1）：打第3代，正常就FEC x 3 + TT x 3，三陰性就DD AC + P。
乳癌二期標靶篇
「咁乳癌2期洗唔洗做埋標靶治療？」
如果非HER2型（HER2－）就唔洗。
如果係HER2型（HER2＋）就要。乳癌2期已經乎合資助資格。
有樣野值得留意，因為標靶要同化療一齊用先產生最大功效，所以標靶同化療係捆綁式做（好似手機上台咁），唔會只做標靶唔做化療。
「咁有咩化療加標靶組合比我揀？」
通常都係TTCHx6，詳見乳癌標靶治療 － 乳癌HER2型點樣揀？。
2016年更新：
乳癌雙標靶治療－HER2型乳癌的春天
乳癌類型巡禮 － 與你細數HER2型乳癌的歴史
乳癌二期電療篇
「咁我洗唔洗電療？」
如果醫生進取嘅話，好多時都要，因為N1會建議電，T3又會建議電，局部乳房切除一定要電。
因此剩返T2N0而又全乳房切除先唔洗電。
電療時有咩要注意就去參考返乳癌電療大解構－原來唔洗驚。
乳癌二期抗荷爾蒙篇
「咁我洗唔洗食抗荷爾蒙藥？」
食唔食藥，就睇你隻癌對D藥夾唔夾。
冇荷爾蒙受體（ER－）唔洗食藥。
有荷爾蒙受體（ER＋）食藥。
乳癌荷爾蒙治療 － 點解我仲要食藥？
乳癌荷爾蒙藥－究竟食咩藥？
乳癌荷爾蒙藥－不同年紀嚴選最正確食法
乳癌二期治療攻略
最後呢2個時間表就係你嘅乳癌二期治療攻略：
你需要做手術，加減化療／標靶治療／電療／食藥。係咪清楚晒？以後唔洗再怕「有乳癌點算好？」。
今次講住咁多先，慢慢消化下。下篇到講「乳癌三期 － 我係咪第3期？」⋯⋯
香港乳癌及乳病治療中心 
點解我唔係HER2型，醫生話要check下先知要唔要做標靶？我係2期，醫生建議我打4支紅魔鬼加4支紫杉醇，我問佢點解要打咁多支，得黎既答案係我地呢度係打咁多支！令我對果間醫院無晒信心。
整體邏輯上唔係太合理：「醫生話要check下先知要唔要做標靶」等如「醫生未能確定你係咪HER2型」，而連「醫生未能確定你係咪HER2型」，咁你又點解可以咁肯定講「我唔係HER2型」呢？呢樣係我覺得唔合理嘅地方。
4支紅魔鬼加4支紫杉醇，如果三星期打一針，屬於第二代化療。如果兩星期打一針（密集打法），屬於第三代化療。要知你實際T幾N幾，同埋係唔係三陰性，先知合唔合乎大圍慣常做法。
請問2期點分AB?我腫瘤1.8cm,
乳癌二期 － 我係咪第2期？
1.8cm 即係T1，淋巴如果冇擴散（N0），就係第一期A。淋巴如果有1－3粒擴散（N1），就係第二期A。
您好，標靶報告出了系her-,是否用做標靶治療呢？系米her- 好過her+ thx
HER2－不用做標靶治療，好過HER2＋。
太好了，謝謝。甘系米可以洗少d錢了？
係。
醫生您好,我太太 pT2N0(i+)(sn) stage, 她剛完成手術,正要選擇跟進治療,她十分擔心化療帶來的不適,我到adjuvantonline睇下化療的好處,其中要選Tumor Grade,是否所指的是modified Bloom and Richardson grading?
Report 上是grade 3/3,是否十分惡?
你這個網站對病人及家人實在太有用了!當中的資料十分詳細，我都不需要到其他地方找資料了。
祝工作順利，生活愉快!
就是Bloom and Richardson grade，grade 3 或者high grade 都係指同一樣野。
剛見左腫瘤科醫生，整體如下:
1. pT2N0(i+)
2. IDC 2.1mm
3. Grade 3/3
4. ER 290/300, PR 180/300
5. HER2 2, FISH equivocal
6. Ki67 40%
7. 太太46歲
由於FISH也不能確定,而指標係1.3,醫生指出係偏向negative,不建議用標靶藥,他的論據係現在算係初期,而標靶受體也不太受,用標靶藥的效果不明顯.
他建議打TCx4.之後食5年Tamoxifen
1. 雖然太太都想化療療程短Ｄ,但唔理標靶受體這個可以嗎?
2. 我哋打算轉到公立做化療,我明白TC要自己比錢，這個無問題,但公立醫生會接受用這個療程嗎?
3. 如果我哋想用標靶藥,在公立是否要自己比錢?
問題比較多,希望不會阻你太多時間.
2.1mm 係T1a，你係咪指2.1cm？
FISH ＜2，仲要睇埋HER2 copy number 先知係唔係equivocal。如果真係equivocal，可以考慮做其他測試去覆檢（DISH／SISH）。
如果當HER2 negative，公立都係會建議TTCx4。
如果HER2 係equivocal 情況下，仲想打標靶藥，請同醫生傾清傾楚好處唔好處。在公立標靶藥係要自己比錢，equivocal更加係完全得唔到資助。
係2.1cm先啱，謝謝。
於手術中取出三組前哨淋巴化驗,其中一組前哨淋巴發現有Isolated Tumor Cell,但醫生不建議再做手術切除,但太太擔心好像有個計時炸彈在體內，你認為這樣風險大嗎?
風險不大，isolated tumor cell 世界趨勢係唔再做手術。
希望做化療時是你負責就好了,太太就不用擔心 🙂
您不止回覆快,連我D typo 都改埋,抵讚!
腫瘤科醫生並未有建議電療, 其實Isolated Tumor Cell 用電療有沒有用?
改你地D回應，係因為想呢度D資料盡量準確無誤，始終生死攸關嘅資訊，大家係有好高嘅期望。
Isolated tumor cell TNM staging係N0(i+)，當係淋巴冇擴散咁醫，現時冇證據話電療有用，所以你腫瘤科醫生冇建議要電療。
手術前只做了MRI,並沒有做你所提及的Bone scan, CT scan/PET-CT scan, MRI足夠清楚看到有沒有走散嗎?
唔足夠。
吓!做MRI都唔平,醫生都冇提過BONE SCAN/CT SCAN/PET-CT SCAN,我都係喺呢度學…
可否做化療時，再叫公立的醫生寫紙去做?
可以同醫生傾傾做唔做返、同埋幾時做。
見報紙有講新免疫療法治癌:
http://hk.apple.nextmedia.com/international/first/20150602/19168923
指免疫治療藥物對肺、腎、膀胱、肝、頭頸等部位癌症有效，其中用於治療多種常見肺癌，存活率比化療高一倍，治肝癌對兩成病人有效，又令死亡率原達1/3的頭頸癌，一半患者腫瘤縮小。
不過唔見有提乳癌,以你所知,免疫療法對乳癌有冇幫助?
現階段仲係停留喺研究階段，第時得唔得冇人知。
太太很擔心化療引起的嘔吐,雖然將選用TTCx4，明白嘔吐並不是主要的副作用,但有需要用終極止嘔葯嗎？
絕大部份人都唔洗。
你好,以下是我親友的手術後的報告,請問是第幾期,須要做化療嗎?是不是不會太嚴重?
Both paraffin and frozen H&E stained serial sections on the sentinel lymph nodes show no metastatic carcinoma. However, subsequent immunohistochemical staining of AE1/AE3 show a focus of micrometastasis measured 0.1cm in the largest lymph node, located in the sinus, with no perinodal invasion. The other 2 lymph nodes are negative. Sections on the breast tumour show invasive lobular carcinoma. It is characterized by infiltrative single cords of tumour cells with fibrotic stroma. It shows lobulocentric growth pattern around dilated lobules which are involved by lobular carcinoma in-situ. The tumour cells exhibit mild to moderate nuclear pleomorphism. There is no evidence of tubular formation…..
你段文字沒有講清楚究竟invasive lobular carcinoma 幾大，同埋唔知遠段有冇擴散，所以唔知第幾期。
以下是附加資料:
Left breast, Sentinel lymph node biopsics and mastectomy
– invasive lobular carcinoma
-estimated size of tumour 2.2cm
-no lymphovascular permeation by tumour
-lobular carcinoma in-situ present
-posterior(deep) resection margin:no evidence of tumour involvement
estimated clearence of tumour from final posterior(deep) resection margin:0.3cm
-nipple:no Paget’s disease or tumour involvement
-micrometastasis present in 1 out of 3 sentinel lymph node (0.1cm in size with no perinodal invasion)
-subareolar atypical ductal hyperplasia
-fibroadenoma
T2N1mi，如果冇遠段擴散，就係第二期B，要化療。
化療期間口腔易爛,Vitamin B and C據說可幫助傷口埋口,化療期間可否食維他命丸呢?
可以。
請問一下，因為看到媽媽的報告是HER2=3 在您的文章中是用正負來區分的，那麼即是什麼解釋呢？謝謝。
全句是 history of Ca L breast L BCT+ SLNB done 2006. ER +ve, HER2=3. Declined adj chemotherapy, complete 5 year tamoxifen.
3分即係＋。
了解，謝謝您！
經過數個月的化療，太太總算捱過了,之前都知道化療是難捱,但實際上比想像更難過。。多謝你的資訊，幫我們渡過這難關，祝工作順利，身體健康，加油!
你好：我病理是這樣的T2N1 ER／PR(十) HER2(－) 現在做了第二次化療了TTx4 第一次有些頭痛同脖痛，同理個乳房開刀位置有一些刺痛，係唔係正常？第二次就感覺無幾大反應，係唔係只藥對我冇用呢？我做完化療第二天就做運動可以嗎？
你已經順利打完第二針，之前D痛雖然唔可以話正常，但問題唔係持續，又唔見得有咩大問題。
個人感覺／反應同藥物有冇效係冇關係嘅。
只要身體應付得到，幾時做運動都可以。
好多謝您！
你好！我是乳癌康復者，2012年發病，2a 期，做了手術、化療及電療。而家食緊荷爾蒙藥。近一年發現胸骨無端痛幾日(好輕微)，跟住又不痛。幾個月後又痛過。驚有事，所以走去照x光，話有陰影。我而家好驚。想問轉移去骨/有骨癌的機會大不大？
冇得唔睇片靠覆述就話機會大唔大，等醫生安排進一步檢查自然有多一點眉目。
謝謝你的回覆。
醫生已幫我排期做CT, 但要下星期尾才知結果，希望不是壞消息。
另外，做完CT是否已知是什麼？需不需要再做進一步的檢查？謝謝！
呢個要視乎CT結果，同埋放射科醫生有冇信心下結論，現階段講唔實。
明白！謝謝！
CT 的報告出來了。一切正常，沒有異樣。
謝謝你在我徬徨時成為一盏明燈，解答我的疑問。謝謝！
我生完BB5個月確診乳癌, 硬塊在BB個多月大開始發現, 因為乳線塞所以喺BB差唔多一個月就停餵人奶, 請問乳癌會唔會影響BB?
乳癌唔會直接影響BB，唯一顧慮係乳癌會唔會遺傳比BB。
我的標靶治療Herceptin 我選了皮下注射不是吊針，我的腫瘤科醫生說療效一樣，請問從外國的研究這是對的嗎？
皮下注射的Herceptin 2013年8月先上市，暫時缺乏長期數據，初步數據見到療效係一樣。
您好，請問手術後幾耐要做化療？要出一次遠門，擔心拖太耐有影響，已做右側全乳+淋巴切除手術，T1N1M0，仲未知HER幾多
最好三個月內。
你好，我媽咪在上個月已經做了 left lumpectomy and left axillary dissection ，手術後去照了PET scan result NAD咁係咪即係冇擴散？現在已經開始化療，打了第一針AC，要打4xAC和4xTC.
她的patholog stage result is pT2N1mi
醫生你可否解釋一下個patholog result ，同埋呢個組合嘅化療是否最好呢？媽咪化完先去電正確嗎？定係會同步進行？幾時電最理想？
不好意思我實在有太多不清楚的地方，希望你不要介意為我解答。
PET scan NAD 即係冇擴散。媽咪屬於乳癌第二期B，打ACx4 + TCx4係其中一個選擇（冇話係咪最好的）。化療唔會同電療同時進行，九成九都係先化療後電療。化療最好手術後三個月內開始，電療則半年內開始。
請問打AC針side effect 多D定 TC 針side effect 多D？打TC針是否會發燒？我見媽咪打了第一針AC頭一個星期唔係好舒服冇胃口，但第二星期就開始好些，是否每次不適都會只維持一個星期左右？
AC辛苦D；所有化療都有機會發燒。每次不適都差不多。
如果腫瘤發現在乳頭附近，是否要整個切除？
不代表，雖然有機會要切除乳頭，不過乳房夠豐滿的話，仍然有機會保留乳房的。
但醫生告訴她要把整個切除，我也十分疑惑
腫瘤大小？腫瘤多少？乳房cup size ？
4cm, 1粒 另1粒鈣化了，B cup
4cm加埋margin 都要切6cm，就算有B cup都應該佔多過20%，局部割會變型。如果仲係好想局部割，可以同醫生傾吓術前化療縮細先做，睇吓可唔可行。
但當初醫生都認為是良性，既然抽驗後也需割掉，因此把腫瘤割掉再化驗，沒想到得出結果為惡性，現在醫生建議整個乳房割掉，割掉整個乳房前還需要抽淋巴化驗，這樣做法是否正常？
另醫生建議割掉後還需要化療，落那種化療藥取決於什麼？
對不起! 太多問題，因不知如何處理。
所以一路我都強調先抽針後做手術的重要性，就係唔想出現你而家面對的困境。
如果係惡性腫瘤，全乳切除時一併割淋巴化驗為正常做法。
化療問題參考返化療嗰十幾篇文章：
乳癌化療需知 － 我洗唔洗化療？
家人剛確診係 stage 2
醫生話要做 Colour Doppler ECG, 個用途係邊???
用來檢查心臓功能，為化療作準備。
真的非常非常欣賞閣下無私的付出.
我的病理報告為: T1N1, 2期A, HER2 Negative, Infiltrative carcinoma, in favour of infiltrative ductal carcinoma, Grade 3, ER+, PR+
請問以下是甚麼意思?
– Final resection margins clear (distance from the deep resection margin: 0.5cm), 0.5cm距離是否合理或沒異常?
– 在總結部份, 醫生又寫: “As reported in the frozen section, the tumour is very close to the deep resection margin of the lumpectomy (less than 0.1cm away from it). 距離是否合理或沒異常 ? – 醫生這樣寫令我有點擔心.
– Ki-67: 20%. 20%叫正常或快速?
– Sentinel lymph node metastasis present (1/4). 1/4 代表甚麼?
謝謝!
1）0.5cm 距離已經足夠。
2）呢度就話急凍切片腫瘤底部紙口位好近（<0.1cm）。不過一般急凍切片報告，醫生手術中途應該已經知，應該就會再切多D，所以有上面話Final deep margin 0,5cm。
3）快。
4）4粒前哨淋巴有一粒受感染。
1. 4粒前哨淋巴有一粒受感染。私家醫生把28粒(兩組)全切。這是比較好的做法嗎?
2. (我)做乳癌化療4AC,4T 是否只是針對乳癌? 既然化療好壞細胞都殺, 如其它部位e.g.卵巢又有衰野, 會不會有少許冶療作用?
1）兩組全切係最大路做法。
2）如果身體有其他種類的癌，也可能受惠於化療，當然要睇種類同D藥夾唔夾。
左下方乳房手術 於2015年 4月20日完成, 之後4AC 4T + 30次电療, 現食Tamoxifin.
手術至今, 左下方之手術位置 一直肌肉都很硬, 問過私家及公營醫生, 他們都叫我慢慢來,冇辦法. 现在已20多個月, 那處的肌肉還是掹掹緊, 這倒是正常嗎 ?
有冇方法可以快啲令肌肉回復正常柔軟, 例如,有冇藥膏可搽?
是否要多等一兩年才能回復正常?
冇檢查過好難一口咬實話「正常」，不過情況由手術後一直持續至今，沒有變化／惡化理論上冇咩野好擔心。
除咗按摩，冇咩野（包括藥膏）可以令組織回復柔軟。時間性上冇得一概而論，不過已經年幾，相信往後有突破性進展的機會不大。
你好，3星期前媽咪睇政府醫生確診為乳癌2期，亦已擴散至腋下淋巴。今日連同正電子報告見同一位醫生覆診，醫生雖指無擴散但卻講唔出是屬於第幾期，話需要做手術切除後才知，亦不願多對話令我們了解病情，只安排13/1/2017做手術將整個乳房及淋巴切除。請問如相距手術時間尚有接近2個月，會否令病情惡化而有急切性去私家醫院做手術? 萬分感謝
等二個半月才開始治療當然唔可以接受，連醫管局最低的服務承諾（55日開始治療）也達不到。如果有保險／負擔得到，去私家做手術先方為上策。
醫生你好,我媽咪今年49,在澳洲生活,香港人.最近被診斷出得了乳癌而且已經係末期,上個月她回港時身體都好健康行走食得,只是說有時會頭疼,突然間就診斷乳癌末期⋯請問佢應不應該接受化療？ 因小弟不了解,有人說化療令情況更加差⋯
要睇ER/PR/HER2，身體狀況，擴散情況，唔係簡單一句做／唔做。
醫生你好，我太太(40歲)1個月前（1月24日) 在私家醫院完成局部切除手術，病理報告如下：
Invasive 0.9 cm (T1b)
有1粒 0.45 cm 前哨淋巴受影響 （共割了十多粒)
Grade 1
ER + (8/8;250/300), PR + (8/8; 290/300)
cerbB2- 0/3
Ki67 40%
Peritumoural vascular / perineural
permeation absebt
數個樣本都顯示 margin clear
PET scan 顯示冇擴散至其它地方
現計劃轉住政府醫院做化療，但回覆1個月後（3月17日)才第一次見腫瘤科醫生，未知見完醫生幾時開始做化療，但起碼前後超過2個月，請問會否已過了化療的黃金時間？
非常感謝你的分享，提供咁多詳盡而又易於理解的資料，幫助我們釋去不少疑慮，挨過最傍偟擔心的時候。
祝你新工作順利！
Derek
見完醫生好快可以開始化療，最好自己比2千幾蚊去私家做埋心臓測試（echocardiogram），咁就可以理順成過過程，趕得切治療黃金時間。
謝謝你的回覆!
私家醫生建議打4針TC，你覺得這個方案合適嗎？
此外了解政府醫院TC要自費亦無問題，但他們一般會否建議不同方案？
淋巴有擴散，唔會建議打4針TC，會建議打FECx3 + TTx3。
淋巴有擴散T針唔洗錢了。
昨天見醫生，3星期後開始化療，建議打 AC x4 + TT x4 ( Docetaxel) 共8針，請問這是否新方案呢？
當時我想問醫生可否打 FEC x3 + TT x3, 少2針唔使咁辛苦，但怕她覺得我地挑戰她的決定而冇問到，覺得我們應否下次見醫生時問下呢？謝謝！
請問17x12x20mm需要立即做手術嗎？因為政府醫院排期做手術要到四月中四月尾，擔心等待政府醫院會令病情更加惡化。
無人會反對有癌一定建議盡快醫的，等6星期以上實在唔理想。
謝謝呀，由於16話才再約見醫生，見醫生前會再做骨掃描同埋電腦掃描，觀察有無擴散，我個人想等待這兩個結果，待16號見完醫生再決定會否轉到私家醫院做手術，請問要再等待2個星期會唔好嗎？因為經濟困難，知道政府醫院資源有限，16號見醫生依然話要等到四月中四月尾就會影響病情就決定不再等下去，但現時想等16號見醫生的結果請問會不好嗎？
我媽媽是HER2型，兩粒共5.x cm,照了pet scan 話未擴散。
私家建議先療後術，公立比我地選擇.
但公立醫院提到：
公立話：
如果媽媽揀切全乳，沐巴切嘅情況都有兩種，1. 前哨，2. 液下。跟次序有關係。pet scan 也照唔到前哨，一定要落顯影劑，而政府在手術時落（減少了一次開刀？？），若d癌細胞只走到前哨，只需要切前成哨幾粒，而水腫是5-7%。但若果是先療後術，由於有假陽性機會，所以手術時會直接切腋下淋巴，水腫多一倍15/20%
咁呢個係咪算手術放前嘅好處？
急問 謝謝 感激不盡
你所描述的公立說法錯誤。
如果現在冇淋巴擴散的話，做完化療標靶後，前哨淋巴都係準確可行的，因為假陰性的情況唔嚴重。
擔心假陰性的情況只發生在現在已經有淋巴擴散。不過其實只要達到特定條件，唔一定唔可以試前哨淋巴。
所以你所描述的唔係手術放前的好處。
媽媽是HER2 型，SIZE2粒加埋5.XCM ，PET SCAN 睇暫時無擴散。
正正私家建議先化療加標巴再手術，公立本來是安排先術後療，但現開綠燈可以安排先化療標巴再手術。
媽媽打算無論先療後術定先術後療都係打算割全乳。
咁想請教醫生2個方法各有咩利弊? 會建議先療後術定先術後療?
一般性的利弊可以參考乳癌化療時間 － 手術前做？手術後做？，至於個人化建議，未見過個人冇檢查過，不作網上評論。
我上網搵到以下術前好處：
在2013年美國腫瘤醫學會(American Society of Clinical Oncology)發表一篇統合12000名乳癌患者的整合分析研究(meta-analysis)發現，HER2過度表現的乳癌患者在接受術前輔助治療後達到病理完全緩解者(pCR)，也能顯著提高其整體存活率(overall survival)。而在術前輔助治療結束後的手術可能變得較無侵犯性，能增加後續乳房重建的機會，同時減少手術前潛在癌細胞微量轉移的可能性。此外，術前輔助治療的另一好處是能提早得知腫瘤細胞對於術前輔助治療之敏感性(sensitivity)與有效性(efficacy)，而病理完全緩解（Pathologic complete response，pCR）可做為後續化學治療的配方選擇依據，病理組織之切片也可作為疾病復發之生物標記監測。
但先術後療，唯一就係將病灶盡快根治？
篇資料有幾處誤解：
研究係話如果達到pCR的病人，其存活率係好D（呢個係關聯關係association），並唔係pCR提高存活率（此乃因果關係causality）。即係考試（術前化療）如果達到高分（pCR），其名次（存活率）應該係好D。並「唔係」考試（術前化療）能提高名次（存活率）。
另外唔係增加乳房重建的機會（重建得即係全切，全切就縮唔縮咗先無關係），係增加保留乳房（局部切除）的機會。
pCR係可以睇到腫瘤對藥的反應，不過就唔係「為後續化學治療的配方選擇依據」，因為都已經完全緩解，就唔會再有後續化學治療。
「病理組織之切片也可作為疾病復發之生物標記監測」，呢個係恆常正確，並唔關治療先後次序事。
先手術後化療，主要好處係盡快解除威脅，同埋唔係隻隻乳癌屬性都同術前治療夾，唔夾嗰D就做手術先。
多謝醫生詳盡解釋!!! 感激感激!!!!
我妹51歲，四月確診兩邊乳房患上不同性質的乳癌。左邊已手術全切除，右邊局部切除。病理報告如下﹕
左乳﹕腫瘤 2.5CM, 腋下淋巴有一粒擴散(1.3CM) 期數是﹕T2N1M0 HER2+ ER/PR -VE 腫瘤性質 Gr 3 Ki-67 : 80%
右乳﹕腫瘤 1.2CM, 腋下淋巴沒有擴散。 期數是﹕T1N0M0 HER2-VE ER/PR + 腫瘤性質 Gr 3 Ki-67: 15%
見了兩個私家腫瘤科醫生，建議術後治療如下﹕
1) TTCH x 6 (每3 星期一針) + 12 H標靶+ 25次電療 (兩邊) + 口服荷爾蒙藥 五年
2) AC x4 (每2 星期一針) + TH x 4 (每2星期一針) + 14H 標靶 + 25次電療 (兩邊) + 口服荷爾蒙藥 五年
公立醫生冇 個建議﹕
1) DJ x 6 (醫生說即是TTCH x 6 )(每3 星期一針) + 12 H標靶+ 25次電療 (兩邊) + 口服荷爾蒙藥 五年
2) FEC x3 + THx3 + 15針H 標靶 + 25次電療 (兩邊) + 口服荷爾蒙藥 五年
請問你推介那個療程﹖
叧外，患者同時兩邊患上不同性質的癌，普遍嗎﹖這又是否表示其人身體的體質較容易患癌?
母親也曾患不同的癌，先是乳房，9年後是卵巢，再年後因食道癌離世。母親的病史對我妹的情況有影響嗎?
多謝!
我會揀1。
唔罕見。唔代表。
要驗乳癌遺傳基因。
醫生你好！本人41歲，9月做了全乳切除，及兩組淋巴清除。腫瘤1.8Cm，一粒淋巴感染。腫瘤科醫生話是2期最常見的腔管型。10月初化療及後電療。有兩組化療選擇1:pacs01 (FEC100 x3十Docetaxel x 3)2.TAC x6(自費升白針)。家人曾患乳癌離世，請問我應該選擇那個組合。最適合我的病情。Thank you .🙇♀️🙇♀️🙇♀️
PACS01。
太太剛確診左邊有乳癌細胞，有轉移到淋巴。醫生建議盡快安排手術切除。為安全起見，會安排這兩天照pet-scan. 是否合理？
另外是否術後才知道確實期數？後續治療方法？感謝🙏
合理。
對。
太太做完乳房手術，轉介信寫如下
2SN+with other 18 nodes negative
HR++,Heu 0,ki 67 25% 是何意思？
謝謝謝！
2粒前哨淋巴有感染，另外18粒淋巴冇感染。
荷爾蒙受體陽性，標靶受體陰性，生長速度高。
你好醫生，23/11見完腫瘤科醫生，我媽媽case係53歲 her2+ 左胸有大概3cmx2.2腫瘤, 腋下有擴散，但未知幾多粒受影響，選擇左局部切除，要術前化療+電療及後食荷爾蒙藥物。
因為未做手術醫生都講唔到屬於第幾期乳癌，但因標靶受體，
佢有建議打1.(TRASTUZUMAB) / 2.(TRASTUZUMAB+PERTUZUMAB)既標靶藥，請問選擇2的話好處多幾多呢，我有問醫生但佢只話好ｄｄ，我係你網站只見到佢對４期效果幾好，我媽媽做左pet scan顯示無擴散，請問醫生你有幾建議我地去做方案２？因為政府話方案２無得資助，而方案１傳統以黎效果都好好，12月頭就開第1針，係咪要係開第１針前就要做好決定?
雙標靶比起單標靶喺縮細腫瘤方面好一倍。
我會揀雙標靶。
要開始時就決定好。
請問係咪完全無辦法拎資助？我見到係關愛基金既藥物名冊，但醫生無寫字比我地去申請，咁係咪要籌錢做
有得資助嘅，資唔資助到／得曬就要見醫務社工去做資產審查，不過都要由醫生發起申請先。
之前見腫瘤科醫生佢話無得資助，不過佢有提及優惠價去做P針，比頭3針後3針free，個program無再提之後，即係打6針就完？
可以打打下雙標轉打單標？會有咩影響
thanks a lot doctor
Herceptin 肯定有得資助，另外亦可以揀買Pertuzumab 送herceptin。你講嗰個program我唔清楚。打完6針雙標靶，做手術睇完病理報告再決定單／雙。
你好，我想問下呢嫁her2 型乳癌係咪多左一種taxol-－Carboplatin）同H（Herceptin） 既治療方法？同（TaxoTere－Carboplatin）同H（Herceptin）有乜唔同？另外，herceptin+perjeta同淨係herceptin既治療效果係咪差好多？謝謝
唔係多左種，只係用Taxol代Taxotere，大家都係紫杉醇，你可以當功效一樣。
視乎咩情況用Herceptin + Perjeta，相比起淨Herceptin，術前治療／擴散性治療效果好好多，術後治療效果就好少少。
謝謝你的解答!
醫生您好，本人41歲，12月28已做右全乳房切除及液下淋巴全切，浸潤性度管癌2期，T1N1, ER+, PR+, Her2-, High grade, 有2位唔同醫生既建議
TC x4 + 荷爾蒙藥10年
TAC x 6 + 電療+ 荷爾蒙藥10年
請教下點解2個方案甘大分別既？邊隻適合我？刨過化療编TAC係最強最辛苦既組合，點解會放我身上？我不是Her2, 三陰性
謝謝。
淋巴有感染就唔會打TCx4，唔夠力。最常見做法係打第三代化療（PACS01 vs DD AC+P vs TAC），至於邊個好則唔同醫生有唔同喜好。
謝醫生解答
甘以下邊個適合我？
DDAC x4+ P x4 (2 week@)
TAC x6 (3 week@)
DD AC + P。
36歲剛做完右邊胸房腫瘤切除 3.4cm 大，淋巴無感染
以下係手術前檢查report :
-Low grade invasive ductal carcinoma, NOS with focal mutinous features
-oestrogen receptor positive
-progesterone receptor positive
-c-erbB2 oncolrotein not over-expressed
-low proliferative activity
明白到電療同食藥都無得避免，化療會怎樣建議？
感謝回答！
化療可做可唔做，最好做埋OncotypeDx 先決定。
想問下乳癌（黏液癌）第二期，冇買保險，已經知道需要做手術，有機會要電療化療，公立太耐，如果睇私家有冇得資助？
冇資助。
乳癌（黏液癌）第二期，擴散機會高唔高？
唔算高。
病人今年31岁，Er 90% Pr80%, Her2 – , T size 4.4cm, 一个淋巴结转移。医生给的方案是先化疗（Acx4，Tx12）再手术。请问是先手术好 还是先化疗好？补充一项患者有brca2基因，是否连健康一侧也需要预防性全切呢？
1）先化療
2）最好預防性割埋佢
懷孕21週，確診乳癌，腫瘤3cm，外科醫生話要切出嚟先知第幾期，已擴散到淋巴，已安排手術，康復機會大唔大？
要視乎屬性同淋巴有幾多粒受感染先可以判斷。
醫生你好，我29yr，做USG同抽針後確診IDC (Grade 2 , 2.28cm)，PR -ve; ER+ve; HER2要做Fish等緊結果。
醫生安排我做MRI而非CT，MRI見到主瘤以外附近位置都有2小處癌細胞，係咪會愈生愈多？
想請問現階段我係咪要做CT/ Pet scan 先可以確定第幾期？因為只知道T2但唔知N幾？但醫生冇安排我做CT，只建議我做BRCA基因測試。
另外想請問BRCA基因結果對治療方案有幾大影響？有冇逼切性去做？ 因見到普通體驗中心收費$5000+ 但私家收費$16000-$20000+，同一個測試收費range相差懸殊，有冇必要去私家做？
係咪應該要等齊所有檢查結果先決定治療方案？定愈快做手術愈好？ 因手術傷口都要4星期復原。
等候嘅過程都好忐忑，好多謝你嘅文章，令我可以更了解自己病情及選擇。
1）等待嘅時間越長，越有機會惡化。
2）要知道有冇擴散，最好就係做PET scan。
3）BRCA結果會影響冇事嗰邊，手術會唔會做埋預防性切除。收費嘅差異，好視乎驗幾多個基因。唔好去體檢中心做，因為做完你都要專科醫生解報告，直接去乳腺科或腫瘤科醫生度做。
4）做得檢查，就會等埋報告先決定。定左方案之後，當然越快開始治療越好。
你好，本人太太剛6月中確診，為乳癌（黏液癌）第二期，ER & PR +ve, Grade 3, HER2 – ve. Size 3.0cm Ki-67 30% pT2 pN0(sn) 想問： 1.化療係咪做好過唔做？因醫生認為黏液癌不需化療，荷爾蒙治療＋電療已夠，2. 做Oncotype Dx是否因黏液癌有機會缺乏代表性？ 3. 擴散機會高唔高？
最好係做咗OncotypeDx 先決定，因為而家係灰色地帶。OncotypeDx 喺黏液癌都係準嘅。
擴散機會唔算高。
非常感謝你的解答thanks；本人太太最終也決定了做化療DC x 4. 13/7開始第一針。反而後續荷爾蒙治療有些疑犯：有不同建議用傳統舊藥日服Tamoxifen 或之後每月打停經針+日服Ovarian Abl.， 想問兩種用藥有什麼分別及哪樣會較好？太太40歲，謝謝。
唔明咩叫日服Ovarian Abl.，所以答你唔到。
可能我誤會了：應該係有建議1）用傳統舊藥日服Tamoxifen 或2）之後每月打停經針+日服AI藥，請問若是用2）似要提早更年期，是否有此建議有可能是AI藥較tamoxifen好？謝謝！！
2成效會好少少，不過代價係提早更年期，易啲骨質疏鬆。
媽咪最近確診二期，2.3cm，醫生話淋巴暫時未有感染，政府唔知排到幾時先可以做手術，私家又好貴，想問下係咪一定要即時做手術先得？正常治療程序應該點做好？謝謝！
治療當然越快越好，正常程序就係上面文章所講咁樣。
馬醫生,
你好！
我是HER2二期, 當時感到很傍惶無助沮喪, 好幸運看到你的網站, 資料詳盡, 內容實用, 講解詳細又深入淺出，幫到我選擇了合適的治療方向, 我已順利完成了手術, 現在進入化療階段.
十分佩服你的專業之醫療知識和豐富之臨床經驗, 最難得是你熱心與人分享及幫助患者和家屬, 相信這是你作為醫生的使命感.
送上無言感激, 祝你和家人永遠安康！
謝謝！
Michelle Lee
醫生 你好 媽媽最近已經確診乳癌2期(腫瘤2.1cm)ki67:30% T2N0M0 已經做左一邊全切手術，要食AI藥。冇HER2受體。 醫生話荷爾蒙受體Allred 係8分。但指數都有啲責界，所以建議做化療。想問下依個情況下 想問化療係咪做好過唔做？因為媽咪唔大想做。 謝謝
做OncotypeDx 基因測試去幫媽咪做決定。
你好馬醫生，我都係打緊4紅+4白，每兩星期嘅打法，但我係er+ 60% pr+ 35% , ki67 15%, cerb2 1+ negative, 打完化療先再做手術，但無提及過要唔要電療，腫瘤size 3.1cm*1.5cm*6cm，淋巴照左pet scan 有兩粒細的不足1cm,醫生建議全切右乳再重建，是否術後食荷爾蒙藥便可以？
淋巴應該要抽針加減放記號。
腫瘤大過5cm，手術後要電療。