乳癌三期治療攻略 － 醫好機會大唔大？
我係乳癌三期病人，好擔心自己遲咗去睇醫生，究竟乳癌3期係點醫㗎？醫好機會大唔大？呢次「乳癌三期治療攻略」教你點醫先最好，以後唔洗再怕「有乳癌點算好？」⋯⋯
上回講到，確診為乳癌第三期之後，就可以開始進入治療階段⋯⋯
手術前定手術後知乳癌第三期？
乳癌去到第三期，佢已經好惡，所以有得用嘅話，一定用盡乳癌治療5寶：手術、化療、標靶治療、電療、抗荷爾蒙治療。
既然所有野都要做齊，要決定嘅只係佢地嘅先後次序。5寶之中以手術／化療／標靶最為重要，所以可以揀嘅野唔多，只係揀做化療／標靶先，定係做手術先。
一般黎講，如果未做手術已經知係臨床第3期，就應該化療／標靶先，因為直接做手術驚做唔清，第時會易D翻發。
另一方面，如果開頭唔知咁惡第3期，做咗手術先知，咁就照返早期乳癌正常治療次序：
乳癌三期化療篇
「我決定聽我醫生建議打化療先，咁同早期乳癌嗰D化療有咩分別？有咩要注意？」
都係用返2大主力A針紅魔鬼同埋T針紫杉醇。想知多D就去睇乳癌化療藥物 － AC針？TC針？乜黎㗎？。
咁惡嘅乳癌，一定用最進取嘅打法－6至8針嘅第3代化療組合（乳癌化療選擇 － 咁多組合點樣揀？），頂得順嘅話，有好多醫生會建議密集打法（dose-dense）添，即係2星期打一針。
打得咁激，自然要留意身體頂唔頂得順（乳癌化療副作用 － 辛唔辛苦？點處理？）。另一方面，亦都要留意荷包頂唔頂得順，因為好多時都要升白針個免疫力先頂得住，而升白針有時免費有時自費，呢度要預多少少錢（乳癌化療費用 － 要用幾多錢？貴唔貴？），以免失咗預算。
「咁乳癌3期洗唔洗做埋標靶治療？」
同乳癌2期一樣：
如果非HER2型（HER2－）就唔洗。
如果係HER2型（HER2＋）就要。
有樣野值得留意，因為標靶要同化療一齊用先產生最大功效，所以標靶同化療係捆綁式做（好似手機上台咁），唔會只做標靶唔做化療。
「咁有咩化療加標靶組合比我揀？」
都係嗰3個組合，詳見乳癌標靶治療 － 乳癌HER2型點樣揀？。唯一同乳癌2期（通常TTCH）小小分別，就係多咗醫生揀ACTH，因為佢地覺得成個組合有A針好D。
（2015年12月更新：今個月喺San Antonio Breast Cancer Symposium發表咗一個重磅研究BCIRG 006的10年跟進結果。發現TTCH同ACTH效果一樣，不過TTCH嘅心臟副作用就少好多。可以預期從此以後，TTCH將會一統江湖成為首選，冇咩人會再打ACTH／ACPH。）
另外又有野要留意，因為乳癌咁惡，所以有好多研究全世界一齊做緊，睇吓一D新嘅標靶藥（Pertuzumab，T-DM1）對後期嘅乳癌有冇幫助。呢D係一D好值得參加嘅國際研究，因為D藥又新又靚（注：行文之時為2014年，如果你好耐之後睇呢篇文章，可能已經唔update，敬請留意），通常香港只分得幾個研究配額。如果想參加研究嘅話，就去龍頭教學醫院問吓醫生有冇研究啱自己。
2016年更新：
乳癌雙標靶治療－HER2型乳癌的春天
乳癌類型巡禮 － 與你細數HER2型乳癌的歴史
乳癌三期手術篇
乳癌3期雖然屬於後期，手術都仲係其中一大治療主力，所以都係要做嘅。
「手術有咩揀？」
手術2大部份：乳房同埋腋下淋巴都要做。
乳房：局部切除vs全乳房切除加減乳房重建。
腋下淋巴：前哨淋巴vs全淋巴切除。
乳癌手術 1 － 開刀我有咩可以揀？
乳癌手術 2 － 保留乳房手術 ，我做唔做得？
乳癌手術 3 － 保留乳房手術 ，我揀唔揀好？
乳癌手術 4 － 乳房重建手術 你要知
乳癌手術 5 － 前哨淋巴結活檢術？咩黎㗎
乳癌手術 6 － 專做乳房手術醫生的增值服務
義乳的秘密 － 重建乳房手術外的另一片天
「即係同早期乳癌嘅手術冇分別？」
理論上冇分別，實際上有幾點要留意：
1）難D做保留乳房手術（局部割），主要因為腫瘤大，割咁多乳腺組織，做完手術都凹晒，一定同你理想嘅手術效果有落差。如果真係好想好想保留乳房，就打化療先，睇吓縮唔縮細到嗰腫瘤先做手術，成功機會大D／效果好D。詳情參考乳癌化療時間 － 手術前做？手術後做？。
2）如果揀全乳房切除，又想做乳房重建，就要考慮幾時重建。因為乳癌三期相比乳癌一二期係大D機會復發，所以可以考慮「延遲重建」，即係完成晒D輔助治療（化療／標靶治療／電療／抗荷爾蒙治療），等一兩年穩定D先重建。費事揀咗即時重建，之後唔好彩好快復發，重建手術咪白做，白白多個傷口。
3）前哨淋巴通常唔做得，因為第3期乳癌好多時已經影響咗淋巴。手術前淋巴確定有擴散，當然冇得揀。手術前唔知淋巴有擴散，做咗前哨淋巴，急凍切片通常都係有野㗎喇，又係要全淋巴切除，所以要有割晒淋巴嘅心理準備。
乳癌三期電療篇
「咁我洗唔洗電療？」
一定要電療。因為N2會建議電，T3／T4又會建議電，基本上第三期乳癌電療冇走雞，唔好誤會全乳房切除就可以避咗唔洗電。
電療時有咩要注意就去參考返乳癌電療大解構－原來唔洗驚。
乳癌三期抗荷爾蒙篇
「咁我洗唔洗食抗荷爾蒙藥？」
食唔食藥，就睇你隻癌對D藥夾唔夾。
冇荷爾蒙受體（ER－）唔洗食藥。
有荷爾蒙受體（ER＋）食藥。
「點解乳癌三期咁惡都可以唔洗食藥？」
因為通常惡嘅乳癌都係冇荷爾蒙受體嘅（ER－），所以就算乳癌三期都有可能唔洗食藥。向壞嗰方面諗，隻乳癌少咗把柄比我地捉住，難D箝制佢。向好嗰方面諗，唔洗日日食藥食足幾年。
乳癌荷爾蒙治療 － 點解我仲要食藥？
乳癌荷爾蒙藥－究竟食咩藥？
乳癌荷爾蒙藥－不同年紀嚴選最正確食法
乳癌三期醫好機會
「咁Breast HK你都未講，究竟乳癌三期醫好機會大唔大？」
我只可以講：「有得醫」，而唔會講幾大機會醫好。
因為無論咩數字都好，人總係好難滿足嘅。
你只會同我講：「唔夠大，有冇得再大D？」
就好似D靚模同整型醫生講：「唔夠大，有冇得再大D？」
乳癌三期治療攻略
最後呢2個時間表就係你嘅乳癌三期治療攻略：
手術前已知第三期，做化療／標靶先：
手術後先知第三期，咁就照返乳癌正常治療次序：
你需要做手術／化療／電療，加減標靶治療／食藥。手術前已知乳癌第三期，做化療／標靶先啦。係咪清楚晒？以後唔洗再怕「有乳癌點算好？」
下篇到講唔開心野，如果唔想睇／未有心理準備前，唔好撞入去。雖然唔開心但都仲係要講，因為逃避／忌諱唔等如冇事發生，每一日都有病友／家人要面對人生逆境，佢地正正就係徬徨無助但被忽略咗嘅一群：
「乳癌四期 － 我係咪第4期？」⋯⋯
香港乳癌及乳病治療中心 
Pertuzumab…香港已經註冊左架啦…
你啱，係metastatic setting （乳癌四期）Pertuzumab 已經註冊咗。但上文嘅對象讀者係乳癌三期病友，即係Neoadjuvant／Adjuvant setting，呢一刻2014年9月都仲係trial use 或者 off label use。為免大家誤會同埋希望文章可以歷久常新，已修正上文，多謝提醒。
Thanks for sharing !!!
想問問做完即時重建後（矽袋）,再做電療，殖入物是否一定會變硬／變形？
而矽袋排斥又是否普遍？
謝謝回復
唔係一定，不過係有機會，我地quote就「最多」四成機會會咁。
您好醫生
我剛打完第一支AC針第三日，覺得有d傷風，有鼻水，留眼水，但無發燒！可以食一些傷風感冒成藥嗎？thx
Haha，醫生梗係唔會叫你亂食成藥，尤其係化療緊。
好想知關於第四期既資訊，請問幾時會有呢？
盡快。
剛剛家人被斷症第四期，希望可以得到多些資訊，謝告知。
請問做完手術通常格幾耐會打第一針？
傷口埋曬就可以打，大概四星期度。
醫院剛剛打黎話有新藥(研究) 比我亞媽試(乳癌3期)
咁係米應該試？(之前還未開始過打其他針)
做白老鼠怕唔怕？會唔會有反效果？危唔危險？
去見負責研究嘅醫生時問清楚，乜資料都冇咩情況底下，係唔適合去說三道四。
醫生，你好，我証實了第3期，先化後術，而係3陰，想問下用以往的經驗，3陰病人好返的機會高不高？會不會容易覆發？
我仲好後生，孩子還是個bb。好想長命d陪他成長呀~~
三陰性乳癌 － 係咪真係咁惡？
醫生，我想再請問，如果打術前化療，照到腋下淋巴已經無事，會唔會有機會做前哨淋巴都無事，從而唔洗做腋下淋巴切除？Thx!
會，不過呢個特定情況做前哨淋巴要滿足以下兩個條件先準確：
1）用齊藍藥水同放射性藥水追蹤（dual tracer）
2）搵到3粒前哨淋巴或以上
其實我估唔洗做腋下淋巴切除都渺茫 d ，但我都要比信心自己努力完成個化療先，希望在人間 ^^
你好！我剛剛做了全乳房切除，之後做了正電子素描，發現腋下還有兩粒淋巴需要切除，是否要再開刀？為什麼會這樣？醫生漏了?
你呢個情況偏離正常做法（先做正電子素描，再切除乳房，同一時間加減切淋巴），要問返自己醫生背後的原因，不適宜胡亂猜測。
最後也要再開刀,現在接受化療中，但腋下淋巴位置發現了硬塊，為什麼會這樣？
去睇醫生。
抽粗針報告指出化療中有癌細胞出現，我下一步應該怎樣做？
建議搵多個醫生拿多個意見，你成個故事發展由一開始已經偏離正常做法，每一步也很奇怪，比唔到什麼具體意見你。
這是否是醫生的疏忽？
呢個係一個非常嚴重的指控，實在唔適宜單憑你三言兩語就妄下判斷，咁樣對任何一方都唔公平。面對偏離一般常態，只可以叫你揾多個醫生幫下眼，睇吓係情有可原？一或是牽涉疏忽。
政府醫生建議做手術先，但私家醫生建議做化療先，我應該如何處理？
你可以向一方提出另一方的見解，睇吓背後支持／反對的理據，再決定信邊個。
上星期再做了正電子掃描，只有腋下淋巴有腫瘤，今日做了電腦掃描，發現肺後面的氣管有一粒2cm淋巴，這已經去了第四期？
腋下淋巴腫瘤很近血管及神經，手術也有風險？
說實話，你的個案如此奇怪，實在不敢下任何定論。既然上星期已經做咗正電子掃描，仲咩無端端今日又走去做電腦掃描？？
任何手術也有風險，近血管／神經，風險就係意外傷及佢地。
電腦掃描是醫生建議我去做的
問題就喺呢度，2cm氣管淋巴如果有野，理應PET scan 已經睇到，就唔係你所講的「只有腋下淋巴有腫瘤」。
如果你所講的「只有腋下淋巴有腫瘤」係真，即係高級D的PET Scan一開始都唔懷疑胸腔有野，咁又仲咩要走去照個低級D的CT scan？
再推論落去，如果醫生覺得CT scan 準D／可靠D所以補照，咁又點解唔一開始直接照CT scan，要走「冤枉路」走去照PET Scan？
你睇唔睇得出成個邏輯上的矛盾？我實在唔理解你醫生建議的原因。
醫生說想睇清楚腋下淋巴腫瘤有沒有黐住血管及神經，所以照電腦掃描
現在電腦掃描掃出肺部有2cm淋巴，會是什麼東西呢？
都係講唔通，難道一開始唔想睇清楚？仲咩要分開兩次照食多D輻射？
肺部有淋巴脹大，最擔心當然係乳癌擴散，下一步理應睇吓點樣去抽D組織去驗下。
我覺得自己好似一個波咁，政府醫院叫我出去搵私家醫生做手術，私家醫生就叫我返政府做化療，這個私家醫生已經是新睇的，我沒有找舊的私家醫生了，因為失去了信心，另外有些醫生聽了我的個案，連見面也不肯
好似被踢來踢去⋯我只是不想病情惡化，盡快醫好
好難怪新私家醫生唔想執舊私家醫生手尾，私家醫生可以揀病人，但政府醫生係唔可以揀病人，建議你全部返公立跟進，如果公立腫瘤科覺得要做手術，就叫佢轉介同院的乳腺外科做。
之前政府要等三個月，現在肺部又發現了東西，唔知等到的時候我會怎樣，我明白政府醫院太多太多病人了，不能遷就到每一位，政府醫生說我很急切，快快再去找私家醫生(-_-),想在外求醫也不容忽易，政府又要等⋯
其實如果政府醫生覺得急切，寫信清晰，癌症轉介去同院其他部門，冇理由一個月內見唔到醫生。當然私家醫生賣點就係快，不過而家問題係冇人想幫你執手尾。
今日見了政府醫生，10月頭可以在腋下淋巴做手術，他們説肺部的不會是癌細胞
星期三我約了另一新外科私家醫生（經私家的腫瘤科醫生介紹）睇睇，希望可否盡快做手術
如果已經決定做手術先，而中間沒有任何治療，等2個月實在太耐，可以的話，去私家做啦。
一位68歲第3期a患者,已做手術除去腫瘤及腋下淋巴,健康一般,
做6針化療會頂得到嗎?
如太辛苦可否中途停止?
如中途停止會有咩問題?
冇人估到究竟完唔完成得到，不過既然醫生提供得化療呢個選擇，起碼佢覺得合適去試一試先。唔行出第一步，永遠都唔知去唔去到終點。
中途可隨時停止，不過唔係隨意停止，呢個係一個深思熟慮的決定。
中途停止冇咩問題，只係享受唔到化療的效用。
你好, 我剛做了乳房部份切除, 而且都切了5粒液下淋巴, 照埋個PET-CT SCAN 就知用咩藥, 但多數用 TAC (唔記得定係TCB), 但我現在液下淋巴還有水腫情況, 醫生話佢會自己吸收, 我需要配合其他運動嗎?
冇咩運動要配合。
醫生 我想問下 割出黎發現淋巴大同實等唔等於已經受左癌細胞影響?
唔等同。
醫生 我媽出左病理報告 腫瘤有兩粒分別系2.5和1cm 但淋巴有10粒轉移 但9月尾個時做過ct 其他器官無問題(肺脾膽腎) 咁系咪屬於第三期嚴重個種? 系咪需要標靶?
要照埋骨（bone scan）都冇野，就係第三期C。要唔要標靶唔係睇期數，主要要睇有冇標靶受體。
醫生，我媽報告ki67有60%，但系醫生話驗血個個指數唔高，其實睇邊個好啲?
60%係高，驗血的癌指數唔準，冇咩用的。
咁嘅情況系咪雙標好啲，我地系澳門，公立醫院只提供單標， 同埋雙標如果完全冇資助， 大概要幾錢到
雙標靶好少少。一年雙標靶淨藥費都80幾萬。
醫生 你好 我媽媽57歲 成日都很累。Check了 左邊7cm腫瘤 淋巴都有一粒 無擴散其他器官。荷爾蒙-ve，ki67 50%，Her2報告未有。 找了私家外科醫生可下星期做全乳房切除手術。1）想問是否可考慮在政府做術前化療，這同術後才化療有什麼利弊分別呢？2）會否因術前化療太累 影響身體質素做手術 擔悟病情。3）術前術後化療選擇 會否同復發率有關 4）術後化療無了腫瘤大小做refernce 可知化療成效嗎？
1)可以考慮，不過主要取決於政府化療時間快唔快。快就術前化療縮細先做易做D，唔快加上如果外科醫生有信心切清就手術先，因為時間唔一樣，唔係同一起跑線去對比。
2）唔會。
3）媽媽情況冇關。
4）所有治療以術前size 去決定，化療如果可以縮到冇曬係好事。
一位49歲第3a期, ER +ve患者,已做全乳及腋下淋巴切除,健康一般，現等候政府化療，已見腫瘤科醫生，她見議做PACS01(FEC100 ~Docetaxel)或TAC 共6針，請問如何選擇？
唔怕辛苦、想做盡D，就TAC。怕辛苦就PACS01。
您好, 医生,我想请教您：我太太是her2+ 乳癌3期,现在威院做tchp治疗,2月18最后一次TcHP,共六次,3月19北区医院手术,但我2月15日见了威院医生,他说3月8日再见医生,3月11日打单标靶,请问打单标靶不是要手术后才打吗,如果是,请告诉我手术完多久才开始打,如果真要3月11日真要打单标靶,那3月19可以做手术吗,有影响吗？医生,我现该怎么办,麻烦您回复一下,感恩
完咗雙標靶6針就緊接單標靶，唔影響手術所以唔洗就。
醫生你好
3期乳癌荷爾蒙型 her- 局部切手術完成 化療第四針中 胸部皮膚出現橘皮樣是否正常？是癌細胞沒有被化療藥物殺死？ 時間久了皮膚會否回復正常？
感謝
唔正常，要話比醫生聽。
馬醫生，想問我做手術前雙標雙化，治療前係三期，腋下有感染，但打完6針後手術出來，腋下無感染，雖然粒野仲有2.2，但醫生話係原位癌，想問我這情況，叫做幾期？
以治療前為準，三期。
謝謝你！
醫生你好，我媽上星期做左全切右邊乳房手術，連同腋下淋巴組織都切埋，確診第三期，化驗左27粒淋巴，結果係無擴散跡象，咁係咪代表未有擴散?
淋巴冇擴散，好少係第三期，要腫瘤蝕穿皮膚T4先係，你搞清楚先。
淋巴冇擴散，其他地方擴散機會細D，不過唔係0。
手術前，腫瘤的確係蝕穿皮膚，已做手術，明天睇大報告後再做下一步治療
媽咪3c期 頭兩針係私家做 之後返咗政府
做完紅魔鬼加紫杉醇 中間第5針出私家檢查曾經有變細一半。但去到第八針做完同原本冇分別 , 而家轉左另一隻藥打住先 逢day1day8打 2針為一cycle……….
另外安排咗做電療月尾做電療
佢嘅情況根本做唔到手術
其實情況係咪好差?
如果反應唔好做唔到手術，你自己都心裡有數。
你好醫生，我媽咪睇開公立醫生打左術前6針雙標靶藥，腫瘤縮細左一半大概由3cm到1.5cm，原本術後打單標靶+電療，依家醫生話轉用新藥tdm1，請問轉新藥做法常見嗎，效果會比雙標更好？
另外想問下術後醫生建議再照CT既做法都係正常嗎？係咪個個病人都會咁做
術前化療加單標靶後，手術時仲有殘餘癌細胞，術後就會考慮用TDM1。至於術前打雙標靶，則冇數據話術後雙標靶好D，定TDM1好D。
至於照唔照CT則視乎醫生有冇野擔心。
醫生，你好。我是her2+ 乳癌3期, 現在公立醫院做緊雙驃靶和化療，手術也將會在公立醫院做。明日（3月1日）將做第六次療程，並將在3月21日打第7針，手術日期則未有，要待三月下旬乳房超聲波，X光及PET Scan 報告後再確實。
請問，手術前的第7針驃靶，是要打單驃還是雙驃靶？是否兩者皆宜/好？如果要打到第8針後才排到期做手術，又如何？
再者，手術的日期和打驃靶的日期又是否需要相隔若干天？
謝謝回覆。
雙好過單。淨打標靶唔影響手術，隨時都可以。
謝謝!
馬醫生，您好。
我已經打咗第七針，係打雙驃靶。而手術有望提早在三月下旬進行。
關於手術後的驃靶治療。請問，單驃靶同雙驃靶的療效有什麼分別呢？有否相關資料？因為兩者費用相差太大，實在需要好好思量。
謝謝回覆。
要視乎化療之前淋巴有冇感染，同埋做手術後個樣本仲有冇殘餘癌細胞，先可以決定術後做單標靶定雙標靶。
馬醫生，你好。
我淋巴有感染。手術已完成，病理報告已出，概述如下。
1. Breast
Micro Exam: The resected breast tissue show benign breast ducts and lobules. There is no residual DCIS or invasive carcinoma in this breast. Features are compatible with post-neoadjuvant therapy (stage ypT0)
Diagnosis: Breast, left breast tumour, lumpectomy: – No malignancy
2. Lymph
Micro Exam: The left axillary dissection shows a total number of 13 lymph nodes with no evidence of malignancy. Features are possibly related to prior lymph node metastases with pathologic complete response.
Diagnosis: Lymph Nodes, left axillary dissection specimen: – No evidence of malignancy (0/13)
請問，根據上述情況，單/雙驃靶可以怎樣選擇？
化療前淋巴有冇感染？
有呀, 當時 (Oct 2022) 嘅 PET Scan Report stated 超過10粒.
繼續雙標靶。
And 當時 (Oct 2022) 嘅 PET Scan Report stated “It is overall AJCC stage IIIC”.
我明白雙驃靶係好嘅選擇，但係費用相差接近10倍喎😰。而據公立醫院的醫生說，術後單/雙驃靶的「療效」(?) 只相差唔超過5%。如是，兩者的取捨是什麼？
你係問緊命緊要D定係錢緊要D。
你好啊醫生 媽咪上個月確診乳癌 ER+ve PR+ve her2-ve 本身照左正電子掃描係無影響到淋巴 前幾日做左手術 手術後既病理報告岀左發現影響到淋巴 19粒受影響 請問媽咪情況係咪都好嚴重？
19粒淋巴受影響屬於第三期，情況屬於嚴重。
多謝醫生你既回覆！媽咪已經做緊手術 等緊化療 私家醫生就建議 acx4+paclhaxelx4 兩星期一針 係咪會好過FECx3+taxoterex3 三星期一針？ 同埋私家醫生話acx+paclhaxel呢個組合副作用會少啲 係咪真係好大差別？
兩星期一針打8針打盡D好D，副作用差不多。