乳癌一期治療攻略 - 早期都要做化療?

Posted by in Treatment 治療方法

明明醫生話我係乳癌一期,我上網睇過,係早期黎㗎,點解醫生都仲建議我做化療㗎呢?究竟乳癌1期係點醫㗎?呢次「乳癌一期治療攻略」教你點醫先最好,以後唔洗再怕「有乳癌點算好?」⋯⋯

上回講到,確診為乳癌第一期之後,就可以開始進入治療階段⋯⋯

乳癌一期手術篇

乳癌手術

乳癌1期係屬於早期,所以治療主力以手術為先。

「手術有咩揀?」

手術2大部份:乳房同埋腋下淋巴都要做

乳房:局部切除vs全乳房切除加減乳房重建。
腋下淋巴:前哨淋巴vs全淋巴切除。

乳癌手術 1 - 開刀我有咩可以揀?
乳癌手術 2 - 保留乳房手術 ,我做唔做得?
乳癌手術 3 - 保留乳房手術 ,我揀唔揀好?
乳癌手術 4 - 乳房重建手術 你要知
乳癌手術 5 - 前哨淋巴結活檢術?咩黎㗎
乳癌手術 6 - 專做乳房手術醫生的增值服務
義乳的秘密 - 重建乳房手術外的另一片天

做完手術,有齊病理報告,先再決定下一步點做/有咩輔助治療要做。

乳癌一期化療篇

乳癌化療

「我已經做完手術,都確定係乳癌1期,明明係早期黎,點解個醫生仲建議我做化療㗎呢?」

做唔做化療其中一個重要概念就係易唔易復發?乳癌越惡,越易復發,越值得做化療乳癌化療需知 - 我洗唔洗化療?

乳癌1期的確係早期,不過乳癌期數只係乳癌惡唔惡嘅其中一個因素,仲要睇埋其他因素嘅。(有咩8大因素要注意,去睇睇乳癌化療時間 - 手術前做?手術後做?

例如我80歲先有乳癌,你40歲就有,當然係你嘅乳癌惡D。就算當係一樣惡,假設大家都希望有85歲命,醫生保我5年就搞掂,你仲有45年行喎呢段路,要保你健康咁耐,當然你要做化療我唔洗。

「咁乳癌1期做咗化療有幾大著數先?」

咁你要睇睇乳癌化療需唔需要 - 著數計算機火併乳癌基因測試

「我決定聽我醫生建議打化療喇,但點解有D病友就打4針搞掂,有D就要打6針嘅?」

打咩化療並唔係單純睇打幾多針嘅,因為唔同針藥有唔同打法。最常用2大主力就係A針紅魔鬼同埋T針紫杉醇。想知多D就去睇乳癌化療藥物 - AC針?TC針?乜黎㗎?

呢2隻藥組合出3代化療組合(乳癌化療選擇 - 咁多組合點樣揀?),乳癌一期通常都用第1第2代組合

乳癌少少惡:打少少穩陣啲(用第1代至第1.5代),有錢就TTC x 4,冇錢就AC x 4。

乳癌一般惡:打返第2代,有錢就TTC x 4,冇錢就FAC/FEC x 6。

乳癌一期標靶篇

乳癌標靶治療

「咁乳癌1期洗唔洗做埋標靶治療?」

如果非HER2型(HER2-)就唔洗。
如果係HER2型(HER2+)就視乎侵蝕性部份幾大。

侵蝕性部份大過1cm(T1c)要做化療加標靶。因為呢類病人有好強烈嘅證據顯示佢地需要標靶藥,所以Herceptin有得資助。

侵蝕性部份大於5mm至1cm(T1b),開始有國際指引/證據話標靶藥對佢地都有幫助。不過呢類病人想用標靶藥就要自費

至於侵蝕性部份細過或等如5mm(T1a),暫時冇證據話標靶藥有幫助,所以唔洗做標靶

有樣野值得留意,因為標靶要同化療一齊用先產生最大功效,所以標靶同化療係捆綁式做(好似手機上台咁),唔會只做標靶唔做化療。

「咁有咩化療加標靶組合比我揀?」

通常都係TTCHx6,詳見乳癌標靶治療 - 乳癌HER2型點樣揀?

乳癌一期電療篇

乳癌電療

「咁我洗唔洗電療?」

因為乳癌1期腫瘤唔大,同埋淋巴冇大型擴散,所以通常都係揀局部乳房切除先要電療。另外一個情況就係紙口位好近(close margin),都可能建議電。

有咩要注意就去參考返乳癌電療大解構-原來唔洗驚

乳癌一期抗荷爾蒙篇

乳癌荷爾蒙治療

「咁我洗唔洗食抗荷爾蒙藥?」

食唔食藥,就睇你隻癌對D藥夾唔夾。

冇荷爾蒙受體(ER-)唔洗食藥
荷爾蒙受體(ER+)食藥

乳癌荷爾蒙治療 - 點解我仲要食藥?
乳癌荷爾蒙藥-究竟食咩藥?
乳癌荷爾蒙藥-不同年紀嚴選最正確食法

乳癌一期治療攻略

最後呢個時間表就係你嘅乳癌一期治療攻略:

 乳癌

你需要做手術,加減化療/標靶治療/電療/食藥。係咪清楚晒?以後唔洗再怕「有乳癌點算好?」

今次講住咁多先,慢慢消化下。下篇到講「乳癌二期 - 我係咪第2期?」⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網
分段圖片來源:改篇自互聯網