乳癌類型巡禮 － 與你細數HER2型乳癌的歴史
「成日聽人講HER2型乳癌乜乜物點點點，但從來就冇人同我講解過究竟咩係HER2型乳癌⋯⋯」呢次乳癌類型巡禮同你細數HER2型乳癌的歷史⋯⋯
HER2是什麼？
HER2 （Human Epidermal growth factor Receptor 2）原來係正常細胞嘅天線，用黎接收訊號話比細胞聽幾時分裂生長。正常嘅細胞就有正常數量嘅天線，正常嘅天線就有正確嘅訊號，得到正確嘅訊號細胞就會有規律咁生長。
圖片來源：www.perjeta.com
HER2型乳癌
「咁咩係HER2型乳癌？」
HER2型乳癌就係指乳癌細胞有過多嘅HER2天線。過多嘅天線就有過量嘅訊號，得到過量嘅訊號乳癌細胞就會傻咗咁不斷生長。我地知道，大概兩成嘅乳癌細胞有呢個問題，即係兩成係HER2型乳癌。
圖片來源：www.perjeta.com
有一樣野要留意嘅係乳癌原位癌實在太善良，就算有過多HER2天線，我地都唔會叫佢做HER2型乳癌。HER2型乳癌即係要咁：
侵蝕性乳癌 ＋ 過多HER2天線 ＝ HER2型乳癌
「咁我係唔係HER2型乳癌？」
上面講過，HER2型乳癌嘅問題係有過多嘅HER2天線，要知你係咪HER2型乳癌，最直覺就係數吓有幾多條HER2天線。
「點樣數？」
當然係病理科醫生數，不過喺叫人做野之前，麻煩你比一個靚嘅樣本比病理科醫生。
「咩叫靚嘅樣本？」
點為之靚呢就係樣本有足夠嘅侵蝕性癌細胞，呢個只可以由抽粗針／手術攞到，抽幼針係數唔到HER2天線嘅，呢個亦都係點解成日叫你有懷疑生乳癌就唔好抽幼針嘅原因。
伸延閱讀：乳房抽針檢查 － 乳房檢查三步曲3
「我有個靚樣本，醫生會點數？」
點數呢D悶野留返比醫生，你知佢點匯報得喇。一般佢會比一個叫c-erbB2 score你，有D報告寫HER2/neu，其實都係講同一樣野。佢有4個可能性：0，1＋，2＋，3＋。呢度好多病友搞錯以為「＋就等如陽性、等如係HER2型」，呢個係錯嘅。你可以睇成＋代表有天線，數字先反影有幾多天線。最終就會係咁：
| c-erbB2 Score | HER2 天線 | HER2型乳癌？ |
|---|---|---|
| 0 | 冇天線 | 唔係 |
| 1＋ | 正常數量天線 | 唔係 |
| 2＋ | 灰色地帶 | 唔知係唔係 |
| 3＋ | 有過量天線 | 係 |
「咦c-erbB2 score 2＋即係灰色地帶，咁點算？」
醫生會用螢光劑再數一次，我地叫FISH test（Fluorescence In Situ Hybridization），大部份情況佢都會話到比你聽陽性定陰性：
| FISH Test | HER2型乳癌？ |
|---|---|
| Negative （－，陰性） | 唔係 |
| Positive （＋，陽性） | 係 |
少部分情況佢都未分到，出equivocal 嘅結果，嗰度我就省略費事搞到咁複雜。
你只要記住一個重點：「c-erbB2 score 3＋」或者「c-erbB2 score 2＋及FISH positive」就係HER2型乳癌。
針對HER2型乳癌的藥物發展
「我終於明明地咩叫HER2型乳癌，咁對我有咩用呢？」
原來針對HER2型乳癌的藥物係其中一個發展得最快嘅醫學領域，我地有越來越多方法去針對HER2型乳癌。
「點樣針對？」
上面講到HER2型乳癌嘅問題在於太多天線太多訊號麻，咁最直覺梗係去干擾佢D天線，呢種針對嘅策略，我地比咗個好好嘅名比佢，叫佢做「標靶治療」，就好似掟飛鏢瞄準紅心咁，HER2天線就係我地要掟中嘅紅心目標。
皇者Herceptin
第一隻針對HER2型乳癌嘅標靶藥就係你可能已經聽過嘅Herceptin （trastuzumab）喇，簡稱H，1998年正式上市，2005年有三大研究數據嘅加持，成就佢皇牌嘅領導地位。
圖片來源：www.herceptin.com
以前有幾編文章講到herceptin 嘅實戰攻略，可以去睇吓：
核心嘅內圍Lapatinib
「有得第一隻，即係有第二隻啦⋯⋯」
聰明！聰明嘅醫生就好似聰明嘅黎明一樣，發現原來核心嘅外圍喺核心嘅內圍。噏乜嘢呢？原來天線係有分外置部分（核心嘅外圍）同內置部分（核心嘅內圍），Herceptin就針對外置天線（核心嘅外圍），咁我地又發展出第二隻針對內置天線（核心嘅內圍）嘅標靶藥，佢就係口服嘅Lapatinib （Tykerb）。
圖片來源：Novartis
2005年正式上市，開頭我地嘗試過不同的用法（獨立用，同Herceptin組合成雙標靶等等⋯⋯），慢慢發現成效並唔係我地諗到咁顯著，自自然然長江後浪推前浪，佢只可以慢慢退居三線角色，而家主要係研究性質／第一二線標靶藥都唔得／腦擴散先會諗起佢老人家。
長江後浪Pertuzumab
「咁有咩後浪咁巴閉？」
第三隻標靶藥就係Pertuzumab （Perjeta），簡稱P，2012年上市，短短幾年，佢已經站穩陣腳，Docetaxel-Herceptin-Pertuzumab已經成為初次確診（即係之前從未用過任何標靶藥／化療藥）第四期HER2型乳癌的首選，其他用法包括術前化療加雙標靶，詳細可以去乳癌雙標靶治療－HER2型乳癌的春天睇睇。
可以睇得出佢係上緊位嘅，再過幾年等再多研究數據出爐，佢再受歡迎D我並不感到奇怪。
「點解佢可以遲黎先上岸？」
原來佢發現干擾外置天線的新方法。
以前未係數碼廣播的年代，天線訊號嘅接收受好多因素影響，我地為咗電視收得好D，有人會加天線放大器、有人用魚骨天線、高級D就用衞星碟，原理不外乎額外加強天線嘅接收。
原來HER2型乳癌都有咁醒，識得加強HER2天線嘅接收，佢用一個叫HER3嘅天線去痴埋HER2度，等佢訊號強D，不斷亂咁生長。
你有張良計，我有過牆梯。Pertuzumab 就係分開HER2同HER3嘅利器，等佢訊號冇得加強。加埋Herceptin針對HER2天線，達到相輔相成雙標靶的威力。
圖片來源：www.perjeta.com
「咁真係HER2型乳癌患者的春天⋯⋯」
故事未完嘅，仲有今日最後一個主角T-DM1。
自殺式襲擊T-DM1
「T-DM1又係咩黎呢？」
2013年上市嘅T-DM1正名為trastuzumab-emtansine（Kadcyla），即係第一隻皇牌herceptin 加埋隻化療藥emtansine 落去。原理就係我地知道herceptin會走去HER2天線度，為咗做成更大破壞，梗係個身綁滿自殺式炸彈emtansine，炸死D癌細胞。
圖片來源：www.kadcyla.com
T-DM1好識do嘅，暫時嘅定位都係喺第四期HER2型乳癌、用過Docetaxel-Herceptin-Pertuzumab唔得，佢先出黎做最佳後備第二最愛。
HER2型標靶超新星
以上4大標靶藥物係經歷無數歷練、研究先可以成功上市嘅，呢篇叫得做巡禮，點都要係咁咦提吓D新人名，話唔定幾年後回望，有D新人已經成功上位，咁我地同佢都叫做識於微時吖，唔係位已上先痴埋去。排名不分先後的包括：
| Class | Example |
|---|---|
| HER2-targeted TKI | Neratinib, Afatinib, ARRY-380 |
| HER2-targeted liposome | MM-302 |
| Trifunctional antibody | Ertumaxomab |
| HER2 Vaccine | AE37 |
| PI3-kinase inhibitors | GDC-0032, BYL-719 |
| HSP90 inhibitor | Ganetespib |
2018年1月更新：最近發現羅氏大藥廠整咗個幾全面嘅乳癌教育網頁，http://her2morrow.com.hk，有興趣嘅朋友可以去睇下。
HER2型乳癌實戰攻略
當你知道我地有4大標靶藥物，係時候睇吓實際點應用。行文之時為2016年5月，如果你係將來睇返轉頭，小心同現況已經有出入，徴詢自己醫生為準：
1）手術前打化療標靶去縮細腫瘤：打TTCHP／TTCH。
乳癌雙標靶治療－HER2型乳癌的春天
2）手術後腫瘤惡輔助治療：打TTCH。
乳癌標靶治療 － 乳癌HER2型點樣揀？
3）乳癌擴散打化療標靶去控制：DHP。
乳癌雙標靶治療－HER2型乳癌的春天
唔受控第二線就用T-DM1。再搞唔掂就用第三線Lapatinib ＋ Xeloda。
HER2型乳癌的歴史
一口氣已經數盡HER2型乳癌的來龍去脈，雖然你見有D藥連名都冇（得個number就知佢地幾咁清澀），唔識唔緊要呀，只要知道希望在人間就夠喇⋯⋯
下一次帶大家了解下另一隻乳癌：荷爾蒙受體陽性乳癌－是福還是禍？
香港乳癌及乳病治療中心 
感謝你一直提供不少的資訊,令我在黑暗中,尋找出一點光.但是總是沒有治療後,應該如何去療養?進食甚麼?令身體能夠復原.我很期待….再次謝謝
這次要你失望了。其實我都有諗過寫呢D大家關心嘅題目（例如養生、食療、湯水、氣功等等），但係我實在沒有科學化的證據去支持任何說法，最終就係有機會散播咗一D錯嘅資訊，哪怕只有一個人受誤導，實在過唔到良心嗰一關。所以為咗保持呢度嘅質素，等大家可以安心下來吸收正確的乳癌資訊，寧可不寫，也不想寫錯。
Dont’ think you let anybody down. Don’t worry. It is good enough to read what you write based on your medical knowledge. Thanks
寫得好精彩生動。我剛定為HER2,將會接受化療。朋友推薦可以配合4日斷食或5日嘅fasting mimicking diet 以啟動正常細胞自我保護程式，減少被化療藥傷害。以及截段tumor cell嘅糧草(gluscoe). 係由Dr.Valter Longe研究得出的結果。請問你有何睇法？
另外， 坊間有種叫褐藻醣膠日本出的純天然膠囊，話說可以減少化療副作用，最重要係可以誘發癌細胞自我毀滅程式。請問你又有何睇法？
其實我正預備試一試fasting mimicking diet 方法，由化療前三日開始到化療後一日，估計就算無作用，影響也不大。
兩樣我都唔信。
敬禮，謝謝解釋和分享
Miss you. You are really good.Not only in the field of breast clinical knowledge, but also the professional ethics.
我家姐57歲，今年3月11日在私家做手術，切除9mm大腫瘤，乳癌一期，Ki-67 index 30% (invasive component)，現在公立醫院化療中，需打４針Taxotere，三周一次，已打2針，6月10日會打第三針，家姐的HER2score是2(Equivocal), FISH test 又是equivocal:
Average no. of HER2 signals per nucleus: 4.00
Average no. of CEP17 chromosome signal per nucleus:4.13
Ratio of average HER2 signals / CEP17 probe signals: 0.97
Interpretation: Equivocal, with ≥4.0 and <6.0 HER2 signals, but HER2/CEP17 ratio <2.0
家姐打咗2針化療最近一次見医生時提出問佢，佢話呢Ｄcase是有1/3機會是HER2，我哋知道如果真係HER2，化療加埋標靶藥一齊先可以發揮抗癌最大威力，現在只是化療，是否唔湯唔水？医生見我哋提出，就話如果病人要求，可以中途加標靶藥。家姐係公務員，藥費應有資助，但家姐唔想節外生枝，不是說標靶同化療係綑綁式做先產生最大功效嗎，已經打了兩針都冇用標靶，她只想快快完成化療，早日回復正常工作和生活，之後還有电療和食抑制荷尓蒙藥，是否已足夠？如果真係1/3機會是HER2都算高，是否因為2/3機會不是HER2，所以医生沒有一開始建議用埋標靶藥？你個網頁正正無提FISH test都唔清淅的case應該點？
我對「三份一／三份二機會」嘅講法有保留，原因係呢D equivocal 嘅病人就正正係醫生最尾都唔知係咪HER2吖麻，連分子（HER2型乳癌）係幾多都唔知道，點樣除分母？點可能得出一個機會率嘅份數。反轉黎講多次，如果醫生最尾知道邊個係／邊個唔係HER2型，嗰D case根本一開始就唔會叫做equivocal。
「化療加埋標靶藥一齊先可以發揮抗癌最大威力」嘅主要意思係兩樣治療都做齊，不代表要一定要同一時間做，係可以前後腳，有先有後，好多時因各種原因，都會導致咁嘅情況發生。所以而家先加標靶藥，唔存在「錯過黃金時間」／「唔湯唔水」呢樣野。
面對FISH equivocal，做法係先覆檢多次，可以喺同一樣本唔同位置嘅癌細胞數多次，又可以同一樣本用唔同測試方式（eg SISH，DISH）再做多次。可能性只有三個，明確係HER2型／明確唔係HER2型／仲係模棱兩可。頭兩個可能性易明又簡單，第三個可能性就係最頭痛要同醫生傾清傾楚嘅情況：
係咪HER2型未知，打唔打又標靶未知，2×2只有4個可能性：
1）真係HER2型，冇打標靶，做少咗
2）真係HER2型，有打標靶，做啱咗
3）唔係HER2型，冇打標靶，做啱咗
4）唔係HER2型，有打標靶，做多咗
究竟採取寧枉毋縱，定寧蹤毋枉嘅生活態度要姐姐自己同醫生傾。
多謝你的詳盡回覆，我仍然想問番FISH test 嗰interpretation後半截”but HER2/CEP17 ratio <2.0”是什麽意思？是否腫瘤科医生當初沒有建議打標靶的依據？
我會建議家姐揾番外科医生請做手術嘅私家医院再覆檢嗰FISH test 或做多次其他測試，不過唔知得唔得？記得腫瘤科医生最開始建議做化療時(無提標靶)，家姐曾徵詢外科医生佢個case需否化療，医生建議去做個叫”endopredict”嘅腫瘤基因表現檢測(本港有得做，比去美國做的oncotype 便宜和快捷，還有一個好处endopredict 是不會有灰色地帶)，家人勸家姐唔好做，如果測試結果是低復發率，佢唔做化療又驚日後佢仍然會擔心自己會唔會做少咗，所以佢就接受咗化療。其實類此測試只是睇復發率高定低，與是否HER2無關，對嗎？都想知道究竟多唔多equivocal case(即使測試多次)，會打埋標靶藥？該藥對某些人來說會傷心臟，是長期的影响還是短期(就好像化療副作用，過後會消失)？是否應該考慮做埋endopredict，如果高復發率才有打埋標靶(寧枉毋縱)的依據？
分析HER2 status要睇2個原素：HER2 copy number 同埋HER2/CEP17 ratio，唔係拆開單獨睇一個原素，「ratio細過2但同時copy number又未去到6」意思就係話HER2 status equivocal。
私家醫院可唔可以覆檢要你自己問返嗰間私家醫院，我唔能夠代表佢。
呢類基因測試主要推測復發機率，同HER2其實有關，一般係HER2型陰性先會去做呢D測試，再者部分測試內容其實有評估HER2反應（OncotypeDx 有，Endopredict冇）。
最終equivocal case打唔打標靶係好個人嘅事，沒有硬指引／統計數據。
Herceptin傷心臟可以係短期，亦可以係長期。
Endopredict唔應該作為打唔打標靶嘅理據，因為高危可能只代表需要化療，同標靶治療冇一個恆定／線性關係。
繼收到你6月9日的回覆後，我哋曾向外科医生診所要求覆檢家姐嗰FISH test，獲回覆謂全港的FISH test 都由Q.E. 處理，未聽聞可再要Q.E覆檢這回事。家姐終於去做咗Oncotype DX test，原來都好快有結果；Recurrence Score Result:13 (low risk)，HER2 Score: 9.6 Negative, (10.7 to 11.4 是他們的equivocal range, 10.7以下Negative, 11.4以上positive)一切都明確晒，多謝你的寶貴資訊和意見。
其實唔止QEH有得做FISH，另外QEH 都有得做DISH。不過呢個都唔係重點，最緊要係所有野都明確曬，恭喜。
朋友5/7由私家醫生作乳房腫瘤切除，跟著告訴她很少事，但就要化療加標靶，她於上星期到瑪嘉烈見腫瘤科，但醫生問她是否做了第二次手術，說病理報告有說’whole tumour 20mm in size, with 2 discrete invasive foci each 5mm in size identified, in background high grade DCIS component. Anterior and medial margins involved by DCIS and cancerization of lobules, other margins unremarkable :pT1a，即margin吾清。
另estrogen,progesterone negative,CerbB-2 3/3, Ki67 80%。但醫生竟然說如不是margin吾清，她只需打4針化療，不用標靶，現先替她約了星期一見外科醫生再決定。
請問她是否一定要再做第二次手術去切清 d Margin?如是，那奇怪為她做第一次手術的私家外科醫生竟然沒有告訴她要做！為何她her2 是3/3，瑪嘉烈竟然說不用打標靶？我再詳細看報告，是否因為雖然腫瘤是20mm,但主要是DCIS,只有2個invasive foci each 5mm,所以不需要打標靶？
謝謝！
Hilda
如果仲有得再割，做多次手術去確定clear margin，先係最穩妥做法。
私家醫生冇講解比佢聽，橫睇掂睇都係唔理想／唔應該。如果醫生自己都唔知／睇漏，咁就係疏忽。如果醫生自己知但唔講，呢度就牽涉隱瞞成分。
不是所以HER2型乳癌都要打標靶，T1c或以上打，T1b要傾（開始都有證據話有用），T1a暫時冇證據話有幫助（所以現階段2016年8月，瑪嘉烈的做法係正確嘅）。你後段理解正確，我地只睇invasive foci，所以你朋友係5mm，並不是20mm。不過呢度有一個註腳，如果再做手術，出黎結果如果有更大的invasive foci則另作別論。
很感謝你那麼快回覆，因為距離第一次手術已一個月，今天見外科又不知要排多久，朋友並擔心如再切也不知能切割乾淨否，她不想令自己太多壓力，她說自己絕不介意做全切，請問這是否更好的方案？
（我自己內心亦讚同她想法，我有另一位朋友在公立醫院翻了2次刀，但我當然沒有向這位朋友説出，不能這樣影響她的信心）
「係咪最好」唔合適咁草率下結論，只可以話全切係一個簡單D（少咗再翻手的顧慮）的選擇。
明白，再一次謝謝你的意見！
你好 我得20歲,8月中做左手術,Pr/Er係positive,但係Her2 SISH test都係出equivocal
1）想問ratio 4.02算係尷尬定係尷尬偏negative？
2）因為咁候生所以4.02都應該進取d打埋標靶？定係再做多個咩test先？
3）如果標靶係唔洗打既但係打多左會唔會有咩影響（除左心臟問題外）
Thanksssss
1）灰色地帶，冇分偏唔偏negative。
2）如果只做SISH，可再覆檢DISH／FISH，如果都係equivocal，就睇自己究竟第幾期，TNM如何。不過咁後生，好多時都傾向進取D打埋標靶。
3）除咗心臟，就係錢嘅問題，其他冇問題。
多謝你既解答，遲d見醫生再睇下打唔打。Million thanks!
醫生你好！我8/8曾代朋友詢問関於翻刀的事，她之後聴從公院醫生建議只做再清margin手術，可惜前幾天複診時醫生說仍未割得清，朋友終於決定全切除，暫排期26/9。但今天她跟原先schedule （6/9 驗血，8/9 開針）去抽血，然後跟進她的nurse officer 竟然對她說為了爭取黃金時間治療，會先8/9打第一套TC, 26/9 做手術，然後3-4 星期再打第二套針（共4套），她還説另要打18針標靶，這些複診時醫生完全沒提過，我覺得如是需再切及要趕化療，那就不應再拖3個星期才再開刀。想請問只打一針，等到26/9手術，再等3-4星期才落第二針有効用嗎，會否是做完4套才做手術更好點？不知為何姑娘忽然又說要打標靶，可能是翻刀時invasive foci 大了，但醫生亦是冇提及。
咁大幅度的治療方向改變，最好直接問清楚自己醫生，靠姑娘口中覆述，對任何一方都係唔洽當／唔公平。
是，明天會和她一起見公院腫廇科醫生，我們先且不理會是否姑娘攪錯以為要打標靶（最初醫生亦睇錯），但如他真的要病人先1針chemo,跟著手術,跟著再打餘下3針，我們是否就照做呢
對呢個做法我有保留，拿拿聲打一針，又要等一輪回氣先手術，手術後又等傷口復原再繼續化療，咪仲等得耐／兩頭唔到岸，唔好忘記手術傷口癒合唔一定順順利利的。
如果真係等唔切，想盡快開始化療，我同意你上面睇法，不如做曬4針化療（甚至6針化療加標靶）先，先做第三次手術（可以當成人地打術前化療咁），手術後先完成埋餘下標靶治療。
Sorry,不知為什麼我剛剛才看到我的發問和你的回複
好多朋友都唔知道browser 有cache，會顯示已閱讀的舊內容，所以我就算即日答咗都唔知，好多browser要㩒多幾下reload先會出最新version。
很多謝你的寶貴意見，是，會盡量請求醫生如此做。
希望醫生會寫荷爾蒙受體陽性乳癌這種類,謝謝!
為你寫咗篇：荷爾蒙受體陽性乳癌－是福還是禍？
你好 Dr. Breast HK, 先非常多謝你建立這網絡惠及好多像我這樣之病人.
想請問FISH Test 是否準確? 因我 c-erbB2 IHC score 2 在clinical details 是 (Equivocal) 但經FISH Test 是 Negative, 我有小小擔心!
FISH test 比IHC score 準確，所以當IHC 係equivocal時就做一個高階D嘅FISH test。
醫生您好，母親於去年8月確診係Her2已擴散到骨屬4期。有幸睇到你寶貴資料並於9月開始選擇了Herceptin+Perjeta+Docetaxel,今年1月完成全乳房切除手術，到現在已經係第18針雙標靶了。現醫生提議打骨針Denosumab or Zometa，想問兩者分別？另外亦想問問我怎樣跟進下去，先前有帶她到私院做pet-ct（已去年12月） ,現只有做骨核子掃描，要否再做pet-ct ,公立有無得早？謝謝！
如果講用喺骨擴散嘅情況，Denosumab 相比起Zometa有2個好處：
1）更有效減少因乳癌骨轉移引致嘅併發症
2）皮下注射（subcutaneous injection），唔洗吊針（intravenous injection），對打完化療冇晒血管／想慳時間嘅病友尤其吸引。
Denosumab三千幾一針，Zometa過咗專利，副廠藥只係三百蚊一針。
如果只係監察骨擴散，定期照骨掃瞄已經足夠。如果想睇埋其他地方／器官，可以再照PET-CT，而家打完18針係一個覆檢的時機。公立醫院PET scan只提供服務給公務員及家屬／醫管局員工／綜援人士，其他人一率要比錢，好自然D人會揀私家醫院去照。
多謝晒你寶貴意見
你好。請問何謂“浸潤性乳癌”？
即係invasive carcinoma，或「非」原位癌，可參考乳房原位癌 － 究竟係唔係乳癌？
不好意思, 想問多一樣, 我是否可再做DISH test或有冇其他test可以check到究竟是否her-2?
你冇上文下理好難準確回答，一般HER2係靠immunohistochemical staining 去睇cerbB2 score，如果係灰色地帶就做FISH/DISH/CISH/SISH。
你好! 媽媽是HER2, 已擴散至肺部, 打了18針 Herceptin, 可能己有抗藥性, 近期3打針加了Taxol Paclitaxel. 醫生請問如果效用不大, 癌指數高, 仲可以有咩方法: HERCEPTIN + LAPATINIB, 定T-DM1 呢？ 點好？ 望解答
視乎醫生點睇Herceptin失效，有可能Herceptin+Pertuzumab，或者T-DM1。唔會揀Lapatinib，除非腦擴散。
醫生請問知不知T-DM1有沒有資助? 還是自費藥物, 知不知幾$?
冇資助，全自費6萬幾一個月，有時有promotion就3萬幾。
醫院處方我媽媽呢隻藥，打去防癌會問，話目前只資助綜援人士。
Where can we check the price/ the promotion? Is there any places/ websites in HK?
商業秘密應該冇得check。
謝謝!
醫生你好，我在13年第一次手術，是原位癌，之後加上電療，17年10月發現復發，11月再做了全乳切除，沒有重建，服食抗荷爾蒙葯5年，由於是一期，醫生不建議化療。請問還有復發的機會嗎？如果有，會有什麼徵狀？機會有多大？
有機會復發，機會幾大要臨床評估先知。乳癌復發10大病徵－你記緊要留意
多謝醫生你咁快就回覆，我想再問吓，報告係ER 110/300，C-erb-2 3/3，Ki-67 25%，pT1miN0(sn)，咁係唔係1期，同埋屬於高危嗰種呢？即係好容易再復發，因為上次只係原位癌，冇諗到咁快就復發，所以今次想清楚知道，公立醫院醫生實在太忙，問唔到咁多，只有麻煩你了。
第一期，五種種類之中屬於中間惡。
醫生，估你是太忙了，不要緊，我會耐心等待回覆。不過看多了同路人的病案，發覺1期限也很多要化療的，以我的個案要嗎？因為公院醫生話只減低1%復發率，所以不必。
不需要化療標靶。
Excuse me. Do you know how much is trastuzumab and t-dm1 respectively? As I know that only trastuzumab is covered by the Samaritan Fund. Morover, I would like to ask where can we buy t-dm1 in Hong Kong? I would be appreciate if you can provide any websites with evidence or reference.
Trastuzumab ＄18000/440mg IV。
TDM1 $21500/100mg。
兩個都係要計重量的。
去搵腫瘤科醫生開藥用，唔會自己買的。
http://www.herceptin.com
https://www.kadcyla.com
你好 我媽媽發現胸有硬塊 去左照 有腫留 之後抽左針 her2 negative 醫生係話luminar 2mm 之後係私家醫院切左右乳 淋巴都無感染 術前照埋PET SCAN全身都無事 全家人都好開心已為解決哂, 後尾病理報告出左,
er positive:allred: 8/8 h-score:270/300
pr postive 5/8 h score 36/300
ki-67 high 28%
her2 equivocal
宜家應該再等REPORT應該係FISH TEST REPORT看哂你文章最壞打算係管腔B型 如果呢種應該係化療同標把? 抽針結果點解會同病理報告不同? 化療鏢把正常會用邊隻 見醫生有咩要注意 有無咩特別問題要問清楚醫生?
管腔B型都要睇期數先決定洗唔洗化療標靶，我好懷疑你有冇打錯size，2mm唔會表現成硬塊，同埋極難抽針，而且咁細唔需要全切，再加上luminal你都寫錯成luminar。
抽針結果同病理報告暫時都冇出入。
化療標靶最常見用TTCH。
你好，我家姐啱啱喺私家醫院做完手術，轉介下個星期去睇公立醫院。腫瘤size 22mm, 但私家醫生嗰份report, 冇講到ER+, PR+, HER2.
請問當我哋去睇腫瘤科醫生嗰陣，佢點知要落幾多針呢?
等候回覆，謝謝你！
要有呢D資料先知落幾多針，一係未出齊報告後上，一係已經寫在內文細字你唔識睇。
感謝回覆，願平安！
您好！感謝您分享十分清楚的資訊，剛確診0期，ER-,PR-,her2+,已做全乳切除，但政府醫院未有腫瘤科期俾我，是否不須做治療？🙏🏻
零期全切後已經治療好，腫瘤科冇额外治療要做，只係定期跟進下。
醫生你好！
屋企人現76歲，14年發現乳癌， HER2+, 全乳切割了。
15年擴散去肺，之後 H + V 共6針，之後一直打H，打左3年，反應非常好。
近日應該開始有一點抗藥，CEA約10。PET scan 發現同一邊肺多左兩個 SUV max 2.5 至7 的點。其他地方無事。似乎癌細胞在同一邊肺再次活躍。
公立醫院醫生建議用 Lapatinib + Xeloda. 但係又解釋唔到有咩好。由於無擴散去腦，所以我問多左幾次，佢都解我唔明。
其實家人上述的情況，值不值得試用 H + P? 用了3年 H, 先再加P 是否有用？這樣的情況還能否在公立醫院享用買 P 送 H?
還是應該直接試 T-DM1?
感激萬分！祝新年快樂！
用緊Herceptin 失效，第一線暫時係TDM1，會好過lapatinib + xeloda。至於Pertuzumab ，我相信總有佢角色、遲早會出場，但幾時出場呢個個別情況暫時醫學界冇定案。
能唔能夠在公立醫院享用買P送H最好問返公立醫院醫生，始終我已經離開了公營體系兩年，公院政策已經唔係最update。
非常感謝回覆！🙏🏻🙏🏻🙏🏻🙏🏻
T-DM1 有化療成份，請問副作用重嗎？如與 Herceptin 相比，是否相差很遠？
家人因爲已76歲，用了 Lapatinib + Xeloda 一個療程（2星期+1星期）已覺得有點辛苦。
感謝！
副作用唔重，好受得的。
多謝醫生解答！😊😊
希望你唔好介意我問得刁鑽⋯⋯
過去我見有些板友與我家人遇到的情況有些相似，大家都是 HER2+ 擴散，並用了一段時間Herceptin 抗藥／失效。
過去有些板友問過可否在Herceptin 抗藥/失效時，轉用H + P 雙標耙，當時我見醫生你也認為適合。
所以我純粹想請教消楚 H + P 是否一個可以探討的方案，用於出現 Herceptin 抗藥的病人。
如果是，我可能想先試 H + P 雙標耙，然後先再試T-DM1。
感覺萬分！
喺你角度相似，喺醫生角度可以好唔同。其中一樣野叫washout period，究竟係一路用緊herceptin出抗藥性，定係停藥半年內出，抑或是停藥一年後出，情況已經大大不同，會影響醫生決定。再加上你睇緊嘅討論係橫跨幾年，醫學發展日新月異，睇法要隨新證據去更新。所以可以參考人地個案，但切忌直接套用自己身上，始終太複雜要靠自己醫生。
H+P係一個可以探討的方案。
你好醫生，想問以下問題：
報告列出：Invasive ductal carcinoma cells are positive for oestrogen receptor (Allred score = 8/8 and H-score=270/300)
Progesterone receptor (Allred score = 8/8 and H-score=250/300)
They are considered as negative for c-erbB2 oncoprotein (score =1/3)
About 50% tumour cell nuclei express proliferation marker Ki67.
A 4.3×2.4×3.5c irregular heterogeneous hypoechoic mass lesion is noted .
Two small well-defined ovoid nodules with echogenic hila are noted in the right axilla, which measure about 1.5×0.6×0.9 cm and 1.3×0.5×0.9cm.
現於瑪嘉烈醫治，主診醫生用AC X 4 及TC X4 以先縮少腫瘤後再做手術, 手術後再電療，電療後再服抗荷爾蒙藥5-10年，對嗎？請問本人之腫瘤於第幾期及邊一個類別, 是否屬容易覆發之一？請問淋巴腺該切除多少？一組？
淋巴有冇抽針去確認有擴散定冇擴散？
謝謝醫生回覆，淋巴沒有抽針確認。
由於腋下淋巴冇抽針確認，所以可以係：
1）淋巴有事，T2N1，第二期B
2）淋巴冇事，T2N0，第二期A
如果係第一個情況，主診醫生建議就冇問題，係其中一個選擇。
如果係第二個情況，主診醫生建議就打多咗，T2N0術後打化療TCx4已經夠，如果全切唔洗電療添。
類別就管腔B非HER2型，屬中上好。
淋巴切幾多就：
如果係第一個情況，就全切。
如果係第二個情況，就前哨淋巴。
如果係第二個情況而需要切除前哨淋巴，請問會否導致水腫出現?
5％。
謝謝你的神速回覆，祝安好。
醫生請問我上星期一剛完成TC第一針，之後有以下情況：
口腔及喉嚨腫脹，舌頭麻木沒有味覺，完全感覺不能吞食。沒有需要進食感覺。吞嚥困難。
頸上出現紅疹，手指頭麻疼。請問是否有藥物敏感?還是藥物反應？
是否藥物敏感要現場評估的。
醫生你好，
媽媽57歲，10月10日在私院做全乳切除手術，
昨天覆診收到病理化驗報告，報告如下：
Prognostic parameters:
Histological type – invasive ductal carcinoma, no special type (left at 5 o’clock)
Size – 23mm
Histologic grade – 3 (modified Bloom & Richardson)
Nuclear grade – 3
Mitotic rate – high
Peritumoral angio – lymphatic invasion – absent
in situ component – extensive high grade DCIS associated with the invasive tumour, forming a lesion about 35mm in total size.
Nodal status – 5 negative sentinel lymph nodes, confirmed by negative cytokeratin immunostaining.
Specimen margins – not involved(with at least 10mm negative deep margin)
Breast cancer biomarker studies – a supplementary report will follow.
Pathologic stage: T2 N0
Summary(Left breast invasive carcinoma):
Estrogen receptor : Negative 0/8 0/300
Progesterone receptor : Negative 0/8 0/300
Ki-67 proliferation marker status : High proliferative index 75%
Her2(c-erbB-2) oncoprotein overexpression : Positive 3
醫生初步估計需要化療加標把，因費用太貴我們想在公院做轉介到瑪嘉烈醫院，
1. 我擔心要排很久，係咪愈早做愈好？或者幾耐之前做係最好？
2. 是否屬容易覆發之一？做完所有冶療係咪就可以算安全？
3. Ki-67 有成75% 我見個range好高，咁係代表D咩呢？
4. 你建議冶療係咪都係TTCH?
5. 媽咪係乙型肝炎帶菌者，會唔會比其他人做化療既副作用強烈D？
6. 化療前有無咩要做準備？打升白針之類？
7. 手術前有做左其他檢查都話無其他問題，咁想問下黎緊仲有無野建議要check左先？
不好意思，問題及內容有點長及多，希望你唔好介意，期望你的回覆，謝謝！
1）最佳時間係手術後4-6星期。
2）易唔易係相對概念。完成治療算安全。
3）代表腫瘤生長得快。
4）係。
5）唔會，只要食埋抗干擾素就得。
6）冇咩特別，跟醫生指示便可。
7）要檢查心臟。
好多謝醫生你既解答，簡單易明！
呢個blog令我同哥哥都了解好多野，非常感謝你幫助呢度咁多同路人！
最後還有幾條問題想問：
1. 因為媽咪都係比較瘦，未手術前109磅左右，手術後覺得佢再瘦左d、請問會唔會對化療有影響？而且聽人講瘦既人副作用會大d？
2. 手術後已經買左營養奶，燉豬肉汁，日日飯菜肉都齊，咁樣夠唔夠？好驚佢化療時唔夠營養抵抗力會差。
3. 因為T針會令白血球降低，我擔心自己或家人會令佢病，其實有冇需要買市面上個d空氣殺菌噴霧機？
4.化療期間係咪都建議全天候有人係佢身邊照顧佢？因為我考慮要唔要請一個大假去睇實媽咪。因為我最擔心佢發燒敏感呢d情況發生。
因為我係一個好擔心好容易驚既人黎，所以內心有好多恐懼擔心，所以都有好多問題問，感謝你的回覆！
1）冇大影響。副作用同體重冇關係。
2）均衡飲食已經足夠。
3）嗰D機冇用的。
4）大部份人都自己照顧到自己。
好的，明白！
感謝你醫生，咁耐心回答我哋既問題！
祝 工作順利，身體健康！
你好醫生，
媽咪已經完成左一半療程了，
現在只剩9針標杷針就完成冶療，
我地有問醫生要唔要做身體檢查防復發之類，
醫生話可以完成治療先做身體檢查，
但我睇你post話建議手術完計頭2年都應要3-4個月做檢查，媽咪係10月中做手術，請問有需要去做檢查嗎？謝謝！
有需要。
媽媽65歲 3c期 完成術前6針TTCHP 術後病理報告淋巴24/24有癌細胞 鎖骨 內乳仲有癌細胞殘留 切唔到
公立醫院一個月內會做電療 但話未必電得晒 現在食緊AI +雙標靶
醫生話用藥方面最進取可以而家停荷爾蒙藥轉用TDM1 但就擔心萬一復發會少左藥可以用 叫我地自己做決定
想問下醫生
一樣睇法。
如果轉用TDM1 本身打緊既pertuzumab會唔會一齊打埋？定都會停？
如果轉TDM1，pertuzumab 就會停。
你好醫生，我地早前再見多左一位醫生，佢都建議電療同時轉用TDM1, 但我有疑問就係媽媽手術後病理報告HER2由陽性變左陰性得返1分，咁TDM1會唔會帶唔到化療藥去癌細胞到？
現時媽媽用左大概1個月letrozole, 腫瘤摸落冇大到，又擔心會唔會轉左藥反而控制唔到
有可能帶唔到。
咁而家呢個情況繼續用AI定轉TDM1會安全d呢
唔能夠網上判斷。
呢個webpage好好睇，寫得好生動
醫生你好，我媽媽今年79歲，stage 2b。抽針同術後化驗報告個Her2 score 都係equivocal，兩次都有什Fish test，但抽針報告係+ve，而術後化驗報告係-ve。之後有做Oncotype dx test，個結果係Her2 -ve。點解抽針同術後報告會唔同？咁仲使唔使化療+標靶？
唯一解釋係腫瘤可以多國籍，有HER2 +ve有HER2-ve，抽針時已經抽走哂HER2+ve嗰啲，剩返落嚟就係HER2-ve。79歲傾向保守D唔做化療標靶。
謝謝醫生。又想請教一下，咁如果一個腫瘤，又有Her2+ve 又有-ve，但可能次次拎去化驗個部分都咁啱係Her2-ve，咁個治療方向咪同有Her2+ve好唔同?
呢個係假陰性，係用少咗藥，不過冇辦法，系統性風險嘅野。
咁請問如果抽針報告同術後報告個結果唔同，係咪術後報告個結果會準過抽針報告，應該信個術後報告多D?
信手術樣本，因為成舊驗，理應準確D。再加上有OncotypeDx嘅結果去支持。
明白，謝謝醫生。
醫生，您好。我星期三ultra sound & mammogram 報告出咗，16x17x17mm with irregular margin noted at mid-depth outer left breast… BI-RADS category 4c, 醫生幫我喺有硬塊地方抽咗3針，係 lymph node 度抽咗一針，今日診所話會做埋 FISH test, 咁係咪我多數係 HER2 型乳癌？星期一再去見醫生，請問要有咩心理準備或者要特別問醫生呢？
做得FISH test，即係未肯定係唔係HER2型乳癌。
醫生,您好, 想問下我係her2 4期,已打左六次雙標加化療,已再照正電子,見左私家同政府醫生都建議全乳割除,但不同醫生講法有些可重建,有些不建議,但其實做了重建有沒有影響到復發機率或者難照到?
重建冇影響復發機率或者難照咗，只係擔心四期享受唔到重建成果。
我妈咪HER2 3+,淋巴结未见癌转移，是否需要做双标靶？还是单靶就足够？
單標靶已經足夠。
馬醫生你好
我40歲 第一期b er+pr+ ( strongly+> 90 % ) Ki-67 少過5% grade 1 但her2 是2 灰色地帶未知+定- 再做test 如果是+ 咁是否進取D都要化療？
等咗報告先。
馬醫生你好
我太太her2四期骨轉移，已試過雙標靶一年內失效，tdm1(無效，期間有腫瘤熱+快速惡化），轉用enhertu後改善了九個月後也開始惡化了。。請問還有沒有其他辦法？
可以考慮小分子TKI (small molecule tyrosine kinase inhibitor)加口服化療capecitabine:
1) lapatinib + capecitabine
2) neratinib + capecitabine
3) tucatinib + capecitabine + herceptin
呢啲都係一D被證實有功效嘅組合。
謝謝 我太太已選用neratinib + capecitabine組合3個月左右，但因為公立醫院無法做到每3星期覆診一次，要相隔一個月才能覆診拿藥，結果這藥每次吃兩星期就要停食兩星期（比建議的多了一星期）。。最近我太太停藥後幾天開始出現強烈骨痛和發燒（腫瘤熱？）, 在上次覆診時已向醫生反映過但可是是是制度的問題也無可奈何。。
自從上次TDM1無效也引起腫瘤熱的現像，我猜這藥應該也是無效了。。我太太將會再照一次pet scan看看
請問還有其他藥嗎？最近有新的臨床試驗可以有途徑參與嗎？我們不想放棄，可是眼前和網上搜尋到而有能力負擔到的就好像就是沒有其他了。。我還可以怎樣做？謝謝
1) lapatinib + capecitabine 2) tucatinib + capecitabine + herceptin
太太三陰性乳癌，經過化療及免疫治療，以及27次電療，本來以為漸康復過來，但轉了服Xeloda個多月又復發，現試行Enhertu，請問這是否一個適當治療方向；同時如果都沒成效，是否選擇藥物巳不多？😭
如果cerbB2係1-2分就正確方向。
藥物選擇誠言越用越少。
Ki67 index 80% ，HER2 score 3 , ER alfred 8/8 H 250/300, PR alfred 4/8 H 18/300 。3月摸到，後知後覺4月17日 照到2cm PET 冇擴散，38 歲，請問如果等政府第一次化療最後日期限期是？上星期抽粗針之後連續低燒咗4日酸汗，個瘤嗱住，心理作用嗎？還是需要提早自費打第一次私立化療針？公立排左5月9 見醫生， 請問你有什麼建議對化療及鏢靶藥行邊一套最啱我？
最好確診後一個月內開始治療。
抽針可以有幾日唔舒服，不過大部分情況唔會引起發燒。
負擔到就越快開始越好。
打TTCH+/-P。
另問如有乳癌遺傳基因便基本上會有幾成復發？謝謝醫生！
唔同基因突變有唔同風險，你指什麼基因突變？
Hello 👋
My sister recently diagnosed, details below
Invasive Ductal Carcinoma (IDC) grade 3 with ER (Estrogen Receptor) positive, progesterone positive, HER2 (Human Epidermal Growth Factor Receptor 2) negative, and lymph node positive