乳癌荷爾蒙治療 - 點解我仲要食藥?
我已經好乖咁做齊晒手術/化療/電療,點解醫生仲要我食藥?我見隔離位病友都唔洗嘅~「乳癌荷爾蒙治療」呢個方法效用大唔大?⋯⋯
乳癌荷爾蒙治療 vs 抗荷爾蒙治療
「明明聽人講女性荷爾蒙會刺激乳癌,點解仲要用『乳癌荷爾蒙治療』?唔怕荷爾蒙刺激佢咩?」
聰明!正確黎講,係「抗」荷爾蒙治療先啱,但實在太多人講「乳癌荷爾蒙治療」喇,要同人溝通,當然要入鄉隨俗,講返同一樣語言先得。
其實都唔洗理咩荷爾蒙又抗荷爾蒙,簡單D講,就係食藥,好似米雪咁講:「日日keep住食,藥箱都變成首飾箱」,當然唔係食佢推介嘅牌子。
「咁D口服藥有咩用?」
係用黎對抗女性荷爾蒙嘅。
「點解要對抗女性荷爾蒙?」
因為我地知道有D乳癌類型對女性荷爾蒙有反應,即係身體越多女性荷爾蒙,D乳癌細胞就會生得越快。食藥嘅目的,就係用佢黎對抗女性荷爾蒙嘅作用,等D乳癌細胞冇咗D刺激/源料,好似餓死佢地咁。
乳癌對荷爾蒙嘅反應,就有如男人對錢嘅反應。
圖片來源:互聯網
因為我地知道有D男人對錢有反應,即係身體越多錢,D男人就會身痕得越快。唔比/扣起零用錢嘅目的,就係用黎對抗「有錢就身痕」嘅作用,等D男人冇咗D刺激/源料,好似餓死佢地咁。
因此有經驗嘅姊妹都知道,唔好比太多零用錢男人,因為有錢男人就身痕。
因此有經驗嘅醫生都知道,唔好比太多荷爾蒙乳癌細胞,因為有荷爾蒙乳癌細胞就身痕。
咩人要食藥?
「咁邊D乳癌類型先要食藥?」
就係嗰D有荷爾蒙受體(Estrogen receptor (ER) / Progesterone receptor (PR))嘅乳癌,即係你平時聽醫生講 ER+(陽性)嗰D。呢類型嘅乳癌有荷爾蒙就身痕。
「咁點解我隔離嗰病友唔洗食藥?」
因為佢嘅乳癌對女性荷爾蒙冇反應,即係ER-(陰性),甚至三陰性乳癌。呢D乳癌就有如D衰男人,冇錢都身痕,你扣佢零用錢都冇用,所以係冇藥食。
因此唔好理人洗唔洗食藥,最緊要問清楚醫生自己隻乳癌係ER陽性定陰性。
「咁有藥食好D定冇藥食好D?」
有藥食好D。
有藥食,即係代表乳癌細胞有把柄被醫生捉住,有痛腳喺醫生手,咁醫生就可以易D控制佢。
怕扣錢,即係代表男人有把柄被姊妹捉住,有痛腳喺姊妹手,咁姊妹們就可以易D控制佢。
如果你個男人好壞,冇錢都身痕,你都幾難控制佢。
如果你隻乳癌好惡(例如三陰性乳癌),冇荷爾蒙都身痕,你都幾難控制佢。
「但我做完晒手術/化療/電療㗎喇喎,咩癌細胞都冇啦,仲講咩身痕唔身痕?」
做完晒手術/化療/電療,「理論上」係冇晒癌細胞,不過我地見到有乳癌康復者幾年後先黎乳癌復發,就知道「實際上」好多你以為冇可能嘅野正正每日發生緊,所以做足D預防措施係好D。
做足晒本份/入得廚房出得廳堂,「理論上」男人係冇晒身痕嘅理由,不過我地見到有「浪子回頭」幾年後又再出軌,就知道「實際上」好多你以為冇可能嘅野正正每日發生緊,所以做足D預防措施係好D。
食藥有咩著數?
「咁食藥呢D預防措施實際上有咩著數?」
可以減低乳癌復發機會,命都長D。
「復發機會減幾多?命長幾多?」
如果食5年舊藥(Tamoxifen),15年內:
復發率由46%降至33%。
死亡率由33%降至24%。
「嘩!乜咁高復發/死亡機會㗎咩?」
呢個係一個整體平均數,會因你乳癌第幾期(乳癌分期 ﹣ 我係早期定末期?)/有冇用化療(乳癌化療需唔需要 - 著數計算機火併乳癌基因測試)/有冇打標靶(乳癌標靶治療 - 乳癌HER2型點樣揀?)/有冇電療(乳癌電療大解構 - 原來唔洗驚)/食咩抗荷爾蒙藥/食5年定10年而有所分別,所以唔好太在意實際數字,以上圖表只係想話比你聽2樣野:
1)如果醫生叫你食藥嘅話,最好跟足指示食,因為真係延年益壽。
2)唔洗戒口。食足5年舊藥Tamoxifen復發率/死亡率先降咁少/咁多,而日常進食所攝取嘅女性荷爾蒙只係佔非常非常非常之少嘅部分,就算任你好有恆心戒到好清,根本都幫唔到件事,仲戒口黎仲咩?(伸延閱讀:乳癌食療及食物禁忌 - 戒食雞?戒豆漿?)
「你上面話5年舊藥,即係有新藥?係咪好D?」
係有新舊藥之分,新藥好少少,不過唔係人人啱食。
咁究竟你有冇得揀?新藥啱唔啱你食?食幾耐?貴唔貴?有咩副作用?下篇「乳癌荷爾蒙藥-究竟食咩藥?」為你解開疑團⋯⋯
咁三陰性除左化療,手術,電療,仲有無其他野需要再做?而家準備打第一針TAC, stage 4, 頸有粒0.8cm , 肺有兩粒0.3~0.5cm. 還有機會嗎?
三陰性乳癌係得返呢3樣治療選擇,不過你已經係乳癌四期,主要都係靠化療,手術已經唔再係主力(好多時都唔做),電唔電療亦都係睇情況。
至於機會,我只可以答:「當我地改變唔到客觀環境,就只可以改變自己心境。」
當我地嘗試將要求降低(唔再追求根治個病),而係將目標擺喺控制個病(延長壽命)、舒緩不適、撫平內心不安方面,我地仲係做得到嘅。
算係嚴重的四期嗎?這個答案其實只係想可以自我安慰一下,雖然可能更加絕望。而家其實好精神,只係陰陰痛,化療應唔應該開始呢?一開始左就會開始好辛苦,還是繼續過番以往既生活,順其自然會否更加好,更加自在呢?
應該開始化療(唔會一開始就建議順其自然),醫生會係功效同副作用之間攞一個平衡。
想請教吓,屋企人前幾年係原位癌 其中一邊乳房割哂 剛剛五年 發現復發 喺上次于術位置近胸骨有瘤 喺私家做咗手術 醫生將病人胸骨割咗D 再加金屬片於胸骨上(佢話方便電療 好D 希望做電療時可以好D),醫生建議電療喺私家做 因病人胸骨上的胞位置較~騎呢~,私家會細心D 驚政府電得唔夠細心 唔夠全面,但見你之前的解釋 電療係要劃點位 每次都係電同一位置 咁情况吓 是否可以先喺私家做兩三次 再返政府做呢 我哋住屯門 私家要去九龍法國
多謝你的講解和回答
電療劃位技術上唔係淨係劃幾點咁簡單,實際操作層面牽涉好多計數/定位,所以係「唔會」建議私家/公立咁混合做法,一係就去曬私家/一係就去曬公立。至於你話屯門好定法國好,牽涉嘅因素太多,我係唔合適去草率評論。
本人就快41歳, 係2014年3月發現右邊乳癌, 上年5月12日打第一針,
7月中打完4針化療, 9月尾做完了電療31次.現食緊TAMOXIFEN藥
但到目前為止都還未黎經,.
有沒有統計最快和最遲的人通常會幾時黎番?
咁耐冇黎,是否意味我其實已經提早收經?
如果黎番時會唔會一下子有好多?
另外,不知是否化療藥的關係, 頭髮和身體上的毛髮生長速度是比以前慢了.
這是正常的嗎?
冇咁嘅統計,化療後好多時都係咁,現階段唔可以話已經提早收經。經都未黎,唔可能知流量。毛髮生長慢了亦都好正常,要時間康復。
你好呀!想請問我的ER+指數很低的話,食藥仲有無效用?
OESTROGEN RECEPTOR: 20% tumour cells with weak nuclear staining.
PROGESTERONE RECEPTOR: There is no staining for progesterone receptor.
仲係有效,雖然冇高分成效咁顯著。
明白。我之前曾患子宮肌瘤,食藥後,會增加子宮內膜生癌的機會嗎?
食Tamoxifen會增加風險。
我未收經呀,應該食tamoxifen是吧?食藥的效用還是高於副作用的影響吧?
是。
好的,明白了。麻煩你呀!
你好,媽媽於mammogram中看不到腫瘤,但見到淋巴腫大,抽針結果後醫生告知是乳葉癌,建議用herceptin,想請教如擴散到淋巴,腫瘤應有相對大小?為何mammogram看不到(只看到些鈣化,抽細針後表示有可疑)?是否腫瘤有機會真的不大故看不到?還是被乳腺遮住故看不清?另外醫生無告知是否her2, 但建議用herceptin, 應該一定是her2吧?現待照pet scan, 如發現腫瘤大過1cm, 就可向醫生提出資助是吧?最後乳葉癌會否比乳腺癌難醫呢?還是只是區域不
同?
盼可收到你的專業意見,謝謝!感激不盡
擴散到淋巴,腫瘤沒有一個相應大小(雖然腫瘤越大,越大機會擴散到淋巴)。如果你想知腫瘤大細係因為herceptin資助問題嘅話,「擴散到淋巴」本身已經乎合資助,腫瘤大細喺資助呢個問題上已經不再重要。
乳葉癌(lobular carcinoma)本身特性就係好鬼鼠,所以可以mammogram係睇唔到,唔一定代表佢好細。呢個時候通常照埋超聲波,甚至MRI,去睇吓搵唔搵到。至於難唔難醫就觀點與角度,治療方法同乳腺管癌(ductal carcinoma)一様,不過我地知道佢對化療嘅反應係冇咁顯著。
謝謝醫生的快速回覆!當天已睇左但因忙著處理媽媽事宜和上班,無即時回應你!你的回應令我感到稍安心了,因相似的問題問過醫生,都無正面回答,故不斷胡思亂想,為何照到淋巴有,但乳房卻不見腫瘤,是否媽媽在別處還有腫瘤,還未知道呢。
1)媽媽的pet scan report出了,涉及數個淋巴,包括supraclavical, jugular, 而骨亦照到有mild hypermetabolic, 很可能骨轉移(整條都是),而乳房亦只是mild hypermetabolic lesion (好像是2.4cm, suggest primary breast cancer). 如這樣的情況, 醫生你會建議哪種化療?pertuzumab適用嗎?
2)腫瘤不大,report寫是primary breast cancer, 卻已去了遠處淋巴及整條脊骨,這個情況臨床上常見嗎?
3)醫生你有開門診嗎?想帶媽媽來見你問多少少意見。
4)這個情況會是第幾期呢?可能資料唔夠,大約推斷?
謝謝!感恩
1)PET scan 顯示擴散去骨,而醫生之前建議用Herceptin(暗指HER2+),會建議用Docetaxel + Herceptin + Pertuzumab。
2)唔罕見。
3)我在公立醫院服務,看看大家有沒有緣份。
4)第四期。
原來是公立醫院,還以為你是在私家呢!那媽媽的情況,治癒率是多少?是比擴散到內臟好一點吧?
轉移到骨,是否完成治療後會對脊骨進行電療?可否提供一些治療方案?謝謝醫生!
乳癌四期治療攻略 - 末期仲有冇得醫?
謝謝你提供的資料!令一無所知的我稍感安心!起碼能入睡一會
早前醫生打算做化療後就會全乳切除,現時的情況,還會做手術嗎?骨針是否有用?該幾時打?
不好意思,經常打擾你,太多問題了。一開始就留在錯的topic中,會否去第四期乳癌發問會較好?
第四期乳癌化療後做唔做手術,要考慮好多因素,到時再問醫生值唔值得做。
簡單黎講,有骨擴散就應打骨針,化療後開始。
去返相應嘅題目,問返合主題的問題,會比較好,好讓後來者易D參考。
好的,謝謝醫生這麼晚還回覆!再有問題會去番相應主題問!
你好,剛完成電療1個月及剛開始食荷爾蒙藥。同一邊乳房一直有個水囊,大約1.7cm,但近星期突然脹大,大動作亦感疼痛,會否是藥物關係?這代表乳癌復發比別人高嗎?謝謝。
同藥物無關,亦不影響乳癌復發機會。
Thank you
醫生你好,又係我呀,今日覆診時醫生話我知,我嘅瘤兩種荷爾蒙都係强陽性,是否真的食葯好幫到?因為我要食十年,而嗰D抗荷爾蒙葯副作用有時都幾幸辛苦,包括一陣陣發熱,有時小腹會有D痛,脾氣都會燥D,我食了大概八個月,而我本身有個子宮肌瘤,都驚大D機會引發子宮內膜病變……
好幫到。
医生你好:我44岁了,得了丅2N1 ER(+)做完TTCx4.化疗,30次电疗,现在吃荷薾蒙药,但系唔系Tamoxifen,系食紧Anastrozole。你讲过末停经無得揀只能吃Tamoxifen,我现在好担心,未做化疗前我是有经期的,因化疗后到现在就停经了这样我可以食Al药吗?如果不可以要医生转药吗?因为我都未系真正更年期!
你擔心假收經的問題的確存在,其實T2N1打TTCx4我會覺得唔夠,你可以同醫生商量吓打停經針加AI,呢個係一個好選擇。
打TTCX4唔够系唔系容易以後會復發?因我自電療完后(本月20號完成).發覺脖骨同兩個膀頭好痠痛,有筋拉住咁,擔心會骨轉移·
雖然可以咁講,不過略嫌負面,正面D嘅睇法係「有比TTCx4更好的選擇」。
至於擔心骨轉移就要睇返手術前D掃描檢查,如果有做檢查又話冇事的話,好少話咁快出事。
多谢医生你宝贵意见!
醫生你好,我這幾天去咗旅遊,昨日吾好彩在意大利米蘭比爬手偷了我放藥物的包包,我成盒Tamoxifen被偷走了。我今天到過米蘭及蘇黎世的藥房,全都要求我比醫生紙才可買藥,我還有4天才返香港,請問吾食藥共6天可有大影響嗎?我很焦急,想過叫家人速遞Tamoxifen比我,現在不知如何是好。希望醫生你可以比小小意見比我
速遞太費時失事了,你可以喺意大利搵個普通科醫生睇,叫佢寫紙你去藥房買。如果真係買唔到又唔洗太擔心,病人唔夠藥都唔罕見,例如約咗四個月見但只開得16個星期藥,就會冇食幾日,問題又唔大。
謝謝醫生迅速回覆
醫生你好,
我在私院割除右胸原位癌,問醫生是否適合食抗荷爾蒙藥,佢話原位癌唔駛食藥,無驗ER同PR。睇晒成個報告唔見有ER、PR、 Ki6呢d關鍵字,凈係得DCIS of low to -intermediate grade,佢已經轉介我去伊院電療,請問驗血是否可以知道這些資料?如果沒有這些資料醫院會否開抗荷爾蒙藥?原位癌是否等如Luminal A? 謝謝!
驗血唔會得到呢D資訊,可以用返切出黎的標本補做ER/PR。
「冇」就一定唔會開抗荷爾蒙藥,雖則「有」都未必會開,要睇醫生取態。
原位癌唔等如Luminal A,侵蝕性我地先分intrinsic subtype。
醫生,我是上星期做手術的,即係要問做手術的醫生補做?由於他好像不太信食藥呢套,話電療已經可以了,怕佢未必肯做。
如果手術醫生唔肯做而你又好想做的話,另一個方法係請伊利沙伯醫院的醫生借返私家的樣本補做。
謝謝醫生,這個網真的幫了我很多,由徬徨無助到感覺到有人在背後默默支持,多謝你!
你好!我41歲,上年九月發現有原位癌,十二月剛完成15次電療。醫生話唔使食藥。我個ER 同PR都係positive
ER: H score 270/300 Allred score 8/8
PR: H score 200/300 Allred score 8/8
請問這樣其實是否要接受賀爾蒙治療呢?
兩派意見,詳情睇https://www.breasthk.com/stage0-treatment/
Hello 好好醫生,
我服用了Tamoxifen 2年(至少食頭五年)。我暫時沒有服用任何維生素或礦物質補充劑.
1. 我的婦科醫生建議我服用鈣 (i.e. calcium cabonate) supplement 500mg(含維生素 D3 – 200 iu),因為這樣可以在服用 賀爾蒙A.I.之前增加骨密度, 現在可以build up 儲備。 請問這是否合理及正確?
2. 我的婦科醫生亦告訴我, 為了更好的吸收,早餐後只服用鈣片, 同時服用鈣劑時不要服用其他藥物或任何維生素/礦物質補充劑. 晚飯後才服用Tamoxifen,這是合乎邏輯的嗎?
3. 我也需要每天服用 Cresta(5mg)。請問是否可以同一時問服用Tamoxifen AND Cresta ? 抑或最好分開食 e.g. Cresta at noon, Tamoxifen at night.
非常感謝 Dr M., See you later.
FYL
1)可以減慢骨質密度流失,並唔能夠增加骨質密度。所以你的敍述未夠精準。
2)有部份藥同calcium supplement 有反應,所以要隔開食,但並不包括Tamoxifen,所以說法唔正確。
3)以我所知冇cresta 呢隻藥,你係咪打錯字crestor ?
哎呀….串錯字….
3. 我也需要每天服用 Crestor(5mg)。請問是否可以同一時問服用Tamoxifen AND Crestor ? 抑或最好分開食 e.g. Crestor at noon, Tamoxifen at night.
Thank you muchly.
兩隻藥冇interaction,可以一齊食。
Dear Doctor,
我乳癌stage 1b, grade 2, estrigen positive 135/300. 我58 歲,已停經,做了局部切除,化療TC x4, 現於公立醫院開始電療和Femara, 但醫生一開始就話要打 Zoledronic acid IV 去抵抗Femara 的骨質疏鬆,但似乎Zoledronic acid 有很多副作用,我dexascan result 後天才有,想請教
服用AI 藥是否一定要食biphosphinates醫或預防骨質疏鬆?若果是,那一種最少副作用?謝謝你寶貴意見。
冇話一定要,以前一向睇DEXA報告先决定比唔比,不過開始有醫生例行咁比。一般都係打Zometa (Zoledronic acid),或口服Fosamax。
我確診了2期乳癌,在6月底己完成了8針的化療,現有以下的問題:-
1.) 日間不停的流水, 食了很多隻止鼻水, 防敏感藥都無效
2.) 手指, 腳指麻痺,食了維他命B6, 都沒有好轉.
醫生, Breast HK , 請幫忙!
Many thanks!
1)再轉藥。
2)耐心等待。
醫生、你好!我的病理報告是:T1bNo.Grade2,ER8,PR7.HER0,Ki-67 25%腫瘤0.6cm,年齡59,做完局部切除手術,在QE看腫瘤科,未開始電療,但己食AI藥LETROZOLE 2.5MG,請問抗荷爾蒙藥會否影響放射治療的效益
謝謝!
可以一齊用,唔會影響放射治療的效益。
謝謝醫生,再請教ki67指數高是否有藥食。
冇藥針對Ki67。
醫生你好!
之前我有問過關鍵HER2 標靶藥問題,感謝你的回覆!! 我43Yr, Stage 0, T(DCIS)N0(sn)(i-)M0, ER8/8, PR5/8, Ki-67 index 9%, c-erbB2 3+, 我在私家醫院做了部份乳房切除手術, 現轉介回瑪嘉烈醫院電療. 我的手術/主診醫生知我有family history(媽媽有乳癌), 加上ER/PR positive, 在轉介信中建議開tamoxifen我食. 我剛見了瑪嘉烈腫瘤科醫生, 他拒絕了說我是0期不會開…….我很煩惱… 想請問我可以自己在藥房買到嗎? 或要我手術/主診醫生署方才可以在藥房買? 因為我的手術/主診醫生的收費都貴, 我害怕從醫務所買, 5年的藥費是很大的負擔…..又請問tamoxifen藥費大約如何呢? 謝謝!
Chu Chu
應該要醫生紙先可以係藥房買到,正廠你預1200一個月,副廠大概600一個月。
醫生你好,我今年44yrs, 1月發現右乳有鈣化點,3月抽針確診乳癌0期, dcis high grade,4月27日喺私家醫院做局部切除手術+前哨淋巴,冇轉移,冇侵潤性,所以術後只需附加電療,因之前在你的專欄得知如屬賀爾蒙受體最好接受賀爾蒙治療可減低復發風險,但術後覆診問主治醫生才知沒有化驗到腫瘤屬性,她回答說沒有証據証明零期用賀爾蒙治療會減低復發風險,故她認為不需化驗是否屬於賀爾蒙受體。現已轉介到威爾斯排期電療,亦已見腫瘤科醫生,她說我是癌前病變,不算是癌,又說抽針時已化驗屬於賀爾蒙受體,但唔建議我服用賀爾蒙療程,理由一是零期不用吃,二是我本身有子宫內膜有不正常增生,如服用賀爾蒙療程會有內膜增生的副作用,而現在又要等待電療不知要等多久,所以現在很迷網,究竟我應否用賀爾蒙療程??不用又會否增加復發風險呢?如術後2~3個月才做電療效果會否冇咁好?希望你能幫忙解答我的難題……
可以唔食,復發風險差別好細。
電療都係越快越好,不過唔等都等咗咁耐,冇得時光倒流。
醫生, 你好:
我51歲, 腫瘤3cm, 做了局部切除手術, 病理報告是T2N0, ER allred 得分是 3, Hscore 是2/300 , PR Negative, HER2 Negative Ki67 70%,完成4次化療 DCx4, 即將開始30次電療, 醫院說會安排我完成電療後吃荷爾蒙藥, 我想問:
1. ER得分咁低, 吃荷爾蒙藥作用大不大? 會否副作用大過藥效?
2. 腫瘤很接近三陰,化療4次是否足夠?
3. 如果不吃荷爾蒙藥, 會否被視為拒絕治療, 之後的5年癒後觀察期醫院會否不再跟進
醫生, 謝謝您!
1)作用不大。副作用大定藥效大好難講實。
2)觀點與角度。公立DCx4就算,私家腫瘤科部份傾向DD AC+P。
3)會被視為拒絕治療,不過唔會因而受罰。
醫生你好,我36歲,腫瘤2.2cm大,7月中做了全乳切除手術.
醫生有講過話可選擇性做唔做化療,但我選擇唔做,請問唔做會否不太好?
現在已經食緊Tamoxifen
請問現在我可以食雲芝嗎?
唔能夠由你咁少資料去判斷做好定唔做好,不過你都已經選擇咗,唔會返轉頭。
可以食雲芝。
醫生你好,我媽媽今年68歲,她大約十年前確診乳癌,是三陰型,做了切除手術,電療和化療,曾經在頭幾年復發後再做切除手術,之後醫生開了Femara荷爾蒙藥,食了五年無再復發。最近複診醫生建議可停服藥物,如果想繼續服就會改另一隻Aromasin以減少副作用。
請問醫生她應否停藥?復發機會高嗎?
如果現在身體冇任何擴散/癌細胞跡象,應該停藥。
我五年前乳癌一期,做了手術切除和電療,因已停經,服了五年新藥,但公立醫院覆診時,専科醫生仍開藥給我,我不知現在是否應繼續服藥?謝謝你🙏🏻
可以停或者聯絡醫院問清楚。
你好, 我的家人現在已64歲, 於23年前左邊乳房患乳癌, 已進行全乳房切除並康復
上年輪到右邊乳房患乳癌, 亦已完成全乳房切除, 由於荷爾蒙受體呈陽性反應, 醫生要求要食5年抗荷爾蒙藥 (Letrozole Tablets 2.5mg), 現在已食咗1年, 但藥物副作用很嚴重, 出現骨痛 及肌肉痛,有⻣質疏鬆(已打過一支⻣針)
食藥是為防止復發, 但其實兩邊乳房已切除, 為何還要食藥? 若現在停止會否有任何問題?
防其他器官復發。現在停便得不到食藥的功效,會高D機會復發,短命D。
醫生,請問如果癌細胞擴散到右鎖骨上,其他器官冇擴散,算是第三定係四期?
第三期。
多謝醫生極速回覆
醫生你好,我今年43 歲,乳癌二期。已經完成化療及手術,現接受電療。醫生開了賀爾蒙藥食。請問應該在電療之後才開始食或者是現在食,效果比較好?
食賀爾蒙藥之前,是否需要做一次婦科檢查,以對比食藥後子宮內膜厚度?
隨時可以食。
唔需要,食咗一年之後先檢查。
您好醫生,想問下食Tamoxifen, 能减底多少復發率,食與不食的復法率多少?
視乎好多因素,一般大概3-4%度。
您好,醫生,ER/PR positive, HER2 negative, 2.1cm, 冇擴散。一般情況復發率有多少?
淋巴有冇事?Tumor grade?Ki67?
割了4粒前哨淋check, 冇事,Grade 2A, ki67 20%
你意思係Grade 2? 冇Grade 2A嘅。
Grade 指期數是嗎?如是, Grade 2, 第二期,2.1cm, 冇擴散
唔係,grading 唔係staging。Grading 指Modified Bloom and Richardson grading。
我已於10月份完成了腫瘤切除,即部份乳房及6粒前削淋巴,醫生開 Tamoxifen(因我未收經), 然而本人一直服用政府醫生開既fluoxetine(APT)20mg,每晚一粒,無其他精神科葯物了。請問有無影響? 我問過腫瘤科醫生,佢話無問題的,若我擔心可叫政府果邊換葯。我問政府醫生可唔可以轉葯,呢個醫生問我食邊隻葯,我當時唔記得個葯名,話係舊葯果種。之後佢係電腦㩒幾下,唔知佢係幫我查定祇係入其他資料,跟住同我講話呢隻葯無影響,可照食。
p.s. 我見 Fluoxetine 通常都跟住 PROZAC, 我唔識分係咪牌子定成份再有咩分別,我網上搵左好耐都唔肯定,而我食果隻葯祇寫Fluoxetine (APT),我唔敢懷疑2位醫生,但想安心d,請問可解答一下我嗎,謝謝!
Fluoxetine 係強的CYP2D6抑制劑,即係會影響Tamoxifen 功效,所以應該要轉藥。
感謝回覆 !:)
想請教如果食tamoxifen期間,半年前因為內膜太厚做過宮腔鏡刮宮,之後又厚翻,醫生建議打催經針令佢來經變薄,對乳癌治療有影響嗎?有必要停止服用tamoxifen嗎?謝謝
如果做過刮宮,之後已經證實冇事,係唔需要處理厚呢個問題,我哋係醫病,唔係醫厚度。冇必要停用Tamoxifen。
醫生你好,
我的腫瘤科醫生建議我食vitamin D3,她說對防癌有幫助,是嗎?
另外我食緊雲芝丸,請問如果要食tamoxifen, 要分開時間食嗎?會不會影響各種藥物嘅效果?
謝謝
Anna
D3對防癌冇幫助,只係幫助鈣質吸收。
雲芝丸唔影響Tamoxifen,唔需要分開食。
醫生你好:我母親乳腺原位癌已經手術完成,醫生建議電療+食Letrozole,母親手術完約二十日開始食Letrozole,但尚未開始電療(因手術刀口尚未完全恢復),想請教您,在未開始電療前,先食荷爾蒙藥物可以嗎?謝謝!
可以。
感謝您的回覆,再辛苦您,請教一下,我母親67歲,有冠心病,佢係左側須進行電療,是否進行質子重離子治療副作用會小一些,不知質子重離子對乳腺治療效果如何?另外,還想請教醫生,是否可以吃海參補充蛋白質?感恩您!
質子重離子治療唔係一個正規主流乳癌治療,屬研究項目,原位癌唔會建議使用。
可以食。
感恩醫生您的回覆,有您的專業建議,終於有了方向。再次感謝您的耐心解答!
醫生,想再請教多幾個問題,麻煩您了:(1)我母親食嘅AI新藥,據我在此頁面學習到的,有三種,不知Letrozole的副作用對比其他兩種如何?(2)食AI藥物可能導致骨質疏鬆,我去市面幫母親買鈣片,但有眾多種類,例如:檸檬酸鈣、碳酸鈣、乳鈣等,還分有機鈣和無機鈣,由於種類繁多,想請教您,我母親近七十的年紀,乳癌這種情況,不知適合食用哪種鈣類產品來減少AI藥的副作用?(3)鈣片和AI藥物可否同時吃? 再次感謝您的專業解答,感恩!
1)差不多。
2)冇所謂,醫生通常開calcichew。
3)可以。
我睇到電視講飲豆奶對乳癌有幫助
但大豆有植物雌激素
請問確診了三陰性乳癌
飲豆奶會唔會增加復發風險?
三陰性對荷爾蒙冇反應,唔會增加風險。
詳細可以睇:
乳癌要戒黃豆?戒咗就唔會復發?
https://youtu.be/5qJVLPcJFBA
醫生你好,
媽媽乳癌復發,肺有6cm瘤,淋巴及甲狀腺均有轉移,依家因為氣喘血氧不足而落唔到化療,只可以落雙標靶
想問問
1)只落標靶有冇成效?
2)化療一直落唔到,病情係咪會一直惡化?
1)有。
2)有雙標靶頂住,未必一定惡化。
你好👋我想問一問,我今年44歲末收經,食藥會減少女性荷爾蒙,如果減少女性荷爾蒙,會唔會變成好似男性咁樣皮膚差會生多毛毛?因為想皮膚靚就會食女性荷爾蒙,但現在反而要減少🙏🙏
未收經只可以食Tamoxifen,佢係唔會令到少咗女性荷爾蒙,佢只係喺某D組織(例如乳房)同女性荷爾蒙競爭,達到抗女性荷爾蒙效果。
請問食緊Femara抗賀尔蒙藥可否食云芝(胶囊)
可以。
我食tamoxifen一星期後有皮疹問題,跟醫生討論後停藥3個星期左右,再試吃,但吃了8天又長出紅疹,請問這副作用能否解決?
如果真係藥物過敏,就只可以停藥解決。
醫生你好!我今年46歲,確診乳癌2期,做了局部切除手術。因為有一粒前哨淋巴感染,所以也做了axiliary clearance 。腫瘤科醫生建議做八次化療,之後再做電療和荷爾蒙治療。請問每個月打停經針(為期五年)和食荷爾蒙藥10年會否加速衰老和增重?謝謝!
可以有咁嘅副作用。
點解又要食藥又要打針?雖然未停經,請問可以只食藥不打針嗎?
淋巴有感染就值得打。
乳癌停經針,點解我要打?
https://youtu.be/w0NJS5cNP2k
非常感謝馬醫生!
本人34yrs 剛確診三陰性乳癌第一期
腫瘤<2cm 無擴散淋巴 局部切除保乳
2/2已經做完手術啦,睇咗腫瘤科醫生建議要做八次注射化療再加15次電療,另外醫生再建議食口服化療
呢個係我有啲concern需唔需食口服化療?同埋做化療係咪收要打收經針?
謝謝醫生寶貴嘅意見
第一期唔需要口服化療藥。
化療如果想保護卵巢就打埋停經針。
Hi 👋醫生你好,我喺2021年10月確診1期乳癌,已喺2021年12月做手術切除腫瘤,亦接住做化療電療,完成所有療程亦開始食TamoxifenTab荷爾蒙藥,已14個月無嚟經期,今日突然有經期嚟,喺咪正常,我而家好擔心🙏醫生我而家應該點做?謝謝
你幾多歲?
醫生,您好!我係52歲確診2-3期乳癌,手術是2023年11月底做了全切除左乳。2024年2月27號至7月8號打完6針化療及電療15次由8月6號,同時在9月17號轉食荷爾蒙藥LETROZOLE TABLET,1個星期後就出現皮膚敏感痕癢直到現時全身都係
藥物敏感就要話比醫生聽轉藥。