乳癌手術 1 － 開刀我有咩可以揀？
「醫生，我決定做乳癌切除手術喇，開刀時可唔可以割少D？幫我保留乳房？」
「我見D病友割晒格勒底淋巴後隻手腫晒，可唔可以唔割淋巴／割少D？」
乳癌手術咁多款，你應該點揀？又局部割，又全個乳房割，又前哨淋巴，又全淋巴割除，花多又眼亂。一連幾篇帶你走出迷宮，揀一個明智嘅選擇，做一個唔會後悔嘅決定⋯⋯
重點一：乳癌手術有兩大部份
一係乳房，二係腋下淋巴。
重點二：乳房部份基本上有兩個元素
一係乳癌割除，二係乳房重建。
重點三：乳癌割除有兩個選擇
一係局部乳房割，二係全個乳房割。
局部割主要為咗保留乳房，省卻乳房重建，不過唔係人人都做到，有咩條件？去乳癌手術2－保留乳房手術，我做唔做得？睇睇。
咁如果我有得揀，保留乳房好？定全個乳房割好呢？去乳癌手術 3 － 保留乳房手術 ，我揀唔揀好？睇睇。
如果揀全個乳房割，你就要諗開刀時重唔重建返嗰乳房出黎。點決擇？去乳癌手術 4 － 乳房重建手術 你要知睇睇。
如果揀全個乳房割，但又唔揀乳房重建，就要去睇睇義乳的秘密 － 重建乳房手術外的另一片天。
重點四：抽針結果影響手術幅度（洗唔洗做淋巴）
格勒底淋巴咁洗唔洗做呢？視乎你個乳房腫瘤有冇侵蝕性而有兩個情況：一係冇侵蝕性（即原位癌），割唔割淋巴就選擇性，因人而異；二係有侵蝕性（非原位癌），淋巴就一定要割，割幾多就因人而異。仲記唔記得我喺「乳房檢查 三步曲3 － 乳房抽組織檢查」中講過，手術前一定要抽粗針去分別喺咪侵蝕性癌，其中一個用途就係決定開刀時洗唔洗割格勒底淋巴。
重點五：割淋巴又有兩個選擇
一係割前哨淋巴加減全淋巴割除，二係直接全淋巴割除。醫生有得比你揀，就揀前哨淋巴，就係咁簡單。
重點六：四個基本組合揀一個，再加減增值服務
撇除乳房重建，乳癌手術有兩大部份（乳房同淋巴），每個部份有兩個可能性（局部乳房割／全個乳房割；前哨淋巴／全淋巴），二乘二即係有四個開刀組合／可能性：
1）局部乳房割＋前哨淋巴
2）局部乳房割＋全淋巴
3）全個乳房割＋前哨淋巴
4）全個乳房割＋全淋巴
答返標題條問題「開刀有咩比你揀」，就係以上四個常餐揀一個，至於其他增值服務（乳房重建、手術超聲波、急凍切片等等）就因人而異。
之後會一連幾集，仔細啲講吓以上選擇⋯⋯
香港乳癌及乳病治療中心 
Hi Breast HK, my wife have a breast cancer checkup today. However, Doctor asked her to meet again in November (5 months) later. Is it because of any particular reason Doctor would like to meet with my wife again in 5 months later? Since it is not a short period, we will live under pressure and depress. Should my wife do any scan checking now and know the detail as soon as possible? Or, it is just a regular checking nothing special?
My wife is pharmacist and previously she work for chemotherapy department. I understand she may have ideas of the next appointment with Doctor. I feel nervous and don’t want to make her getting depress. Please share with me your experience and what should I do at this stage?
Thanks for your time.
regards,
Tony
最常見就係照乳房造影見到BIRADS3嘅陰影，想早D覆檢去確保無變化，呢D通常6－9個月再照乳房。
不過聽你口吻好似咩都未照咁，所以要做嘅就係搵個乳腺科醫生，做齊乳房檢查三步曲，咁就清楚晒。
至於點解你醫生想5個月再見咁特別，就真係要問返佢先知，始終局外人好難估原因，亂咁估亦都唔係咁恰當。
非常感謝醫生在百忙中抽出寶貴時間講解如此清晰易明的乳癌知識，獲益良多！
Hi breast hk,
我媽咪被確診第二期，醫生見到x 光片有原位癌亦有侵食性，但超聲波見到淋巴位未有腫脹，醫生要求去做全身靜電子掃描，怕擴散去左其他位，你覺得是否有必要做？
如果醫生有咁嘅建議／有咁嘅擔心，正電子掃描係幫到手嘅。
我媽上周第一次檢查便確診二至三期，淋巴有4-7粒invasive。醫生提議馬上開刀做手術。可選全割或部分，但係話全切乾淨，部分切返發率有三，四成。
問題，點解醫生唔做化療，標靶先？要直接切是否好嚴重了？
如果三，四成返發，即係冇得揀要全切。
醫生提議越早做越好，即本周。我想多看醫生拿2nd opinion。能等嗎？一，兩周？一個月？
多謝你。
如果淋巴有4粒或以上有事，即係N2，臨床已經係第三期，並不是二至三期。
乳癌三期 － 我係咪第3期？
未做手術前已經知道第三期，原則上我係同意先做化療（加減標靶，要視乎係咪HER2型）。
乳癌三期治療攻略 － 醫好機會大唔大？
局部割定全乳房割的選擇上，撇除數字上的爭拗，邏輯上我睇到有D問題：你話醫生一方面比你揀A同B方案，而另一方面A方案又好過B方案好多。合理地推論，如果A方案真係好咁多，佢應該幫你決定用A方案而唔應該比你揀。如果真係冇得揀，仲咩一開始要假民主比2個方案你？
如果你話唔係假民主，真係有得揀，咁我就會疑問A方案係咪真係好D／好咁多。
心裡有疑問，揾多個醫生睇係好，不過都建議盡快，始終癌症嘅野，唔理你第幾期，早D知早D醫，點講都係好D。
Breast Hk 您好，我媽咪乳房有粒瘤，約2.5cm，睇左公立醫院，抽左粗針係惡性，我爸&妹陪佢去見醫生，比佢揀局部切除+電療或全乳切除，我爸&妹話局部切除+電療復發率比全乳切除大好多好多，同埋電療好辛苦，皮膚會燶左咁，又會起水泡同紅腫，又痛，叫佢全切，但佢又唔想，好唔開心，其實電療係唔係真係咁傷?同埋全乳切除復發機會係唔係少好多? 謝謝﹗
電療係可能會有你以上所講的副作用，不過所有野都係暫時性，並唔係想像中咁辛苦。另外，全乳切除唔等如一定唔洗電療。
復發率係有分別，不過只係少少，講緊長期（大概20年）局部割局部復發率大概5－22％，全乳割局部復發率大概4－14％。最重要係存活率一樣，所以醫生會睇成兩個選擇成效一樣。
謝謝您，打返去問左姑娘，話佢粒瘤係攻擊性最高級別的，全乳切除比較好，所以佢揀左全乳切除啦﹗
Breast hk 你好！我媽咪抽針證實乳房下側有導管癌惡性腫瘤一粒大概1.4cm ，另外淋巴都有一粒相約的轉移性腫瘤！醫生診斷為第二或第三期，醫生話照超聲波淋巴有一粒，但有機會有些細粒的照唔到，如果做手術見到會割埋！但由於媽咪冇買保險，所以拎轉介信到政府醫院預約專科！姑娘話醫生睇完報告會兩星期內通告！
我想問如果做手術發現超過四粒淋巴就是第三期，係咪需要做第二次手術的機會率提高？但不是說第三期應該化療後手術嗎？
根據媽咪現時情況可以等政府醫院做手術嗎？（還是把握時間做手術先？）因為我少盡積蓄可以應付私家醫院手術費用，但絕對應付不了第二次手術費，所以我在想應該把錢用於手術費上，還是後期的化療上！因為醫生說手術後化驗才知道是什麼類型！我怕如果是最惡的那種，需要買價值不非的鏢靶藥！
謝謝解答
排政府專科urgent care會不會錯過最佳手術時間？
淋巴受影響數目同第二次手術機會率無關。
如果會考慮術前化療，就應該先化驗屬性，可以係抽粗針的樣本補做，唔洗等手術後化驗先知。
等唔等得好睇個人可動用資源，一去到癌症治療，冇醫生夠膽講放心等啦，一切都係盡能力盡快。
Thx…已經做了手術！現在要等報告看淋巴受影響數目和排期公立醫院化療
我剛確診係2B， 諗緊全部切除定局部切除。
但， 醫生無提到先術前化療 ，如果唔搵私家做手術， 排政府的話， 一般要等幾耐。其實有無需要手術後做矯形 ?
間間唔同，要實際排先知。一般由交信到做手術，等六至十二星期都叫合理。
術後洗唔洗矯形要臨床評估過先知。
媽媽做了左邊全乳房切除手術 過了十日 引流量尚有20-40 左邊腰間瘀了一大片 腳踝浮腫,請問以上情況是正常嗎？
要問返主診醫生。我手術唔在場，術後亦冇檢查過，唔應該說三道四。
好的 明白 謝謝你
你好，請問如果確診左係早期侵蝕性癌，如果選擇全切既話咁係咪一定要割淋巴，全切手割使唔使做前哨淋巴活檢去決定淋巴要割幾多？如果唔使，咁根據咩去決定要割幾多淋巴？
侵蝕性得就要做淋巴，乳房選擇局部定全切唔影響的。
醫生，我做左手術前雙標雙化，也都手術左，手術出來淋巴沒感染，腫瘤就仲有2.2cm, 係原位癌，但手術後十幾日，引流管口都恢復了，發現傷口下生左粒痘，開始都大粒，依家小粒左，會唔會復發？
唔似，不過最終評估要問返自己醫生。
你好醫生
未做手術醫生建議術後要R/T
我做完left lumpectomy + SLN +F/S
N1 Result metastatic ductal carcinoma 3.5mm in size no extraxcapsular invasion
N2-4 negative
lumpectomy result invasion ductal carcinoma no special type grade 1 15mm in size nuclear grade 1-2 in solid and cribrifrom pattern with microcalifation
最初F/S 話SLN 全部negative,術後第一份報告出,,醫生現在建議手R/T+Chemo, 但還有一份報告待出,之後再見oncology 先決定用什麼治療,請問這情況是否一定要chemo 呢?
要。
最近我發現乳房有硬塊照過醫生建議我去抽針，抽針 醫生是不是很重要的，可否推介
抽針係一個重要步驟去搞清楚係咪乳癌，為免瓜田李下，不作推介。
醫生你好！我媽 65 歲確診乳癌，醫生說檢查結果為 ER+PR positive, Her2 negative，照到 1cm 影， 但摸到 2.5 cm 左右，最初醫生讓我媽選擇全切/部分切除手術 ，我媽希望保留乳房，但今天覆診時發現乳頭有透明分泌物，已採樣化驗，請問分泌物檢驗會有那些可能性？對手術選擇有影響嗎？醫生說有化驗結果當日便要決定全切/保留手術，醫生傾向進行全切手術，但我媽還是猶豫，希望做保留手術，可以多給我們一些專業意見嗎？謝謝🙏
可能出現良性或惡性結果。對手術選擇冇大影響。要檢查先知可唔可以保留乳房。
馬醫生你好。本人10年前35歲時患上乳癌，屬2B期數，ER+PR Positive，當時已切除左邊整個乳房並已重建，左邊腋下淋巴全部切除，之後進行8次化療(4AC+4T)，30次電療及食10年的荷爾蒙藥至今，化療期間停經後一直再無月經。本人剛發現乳癌轉移至肝及肺，肝有多個腫瘤，最大一個腫瘤有6x5x5cm，其餘比較細，請問是否要做手術切除肝或肺部腫瘤? 往後的possible treatment可以是什麼呢？謝謝你的意見! 萬分感謝! 🙏
肝同肺轉移唔會做手術，切唔清的。要做嘅係搵一個安全的位置抽粗針，去睇下今次癌細胞屬性有冇變，再決定用咩藥。
感謝馬醫生抽空回覆!! 已進行肝部抽針但未有報告, 希望之後既治療唔會太辛苦…
醫生好，2月及7月都有做正電子掃描，沒測出淋巴有感染，8月做前哨淋巴有一粒有癌細胞，需做全貌＋淋巴切除，會否因相隔太耐而有機會擴散了去淋巴？我是術前化療，2月開始，6月尾已打完6次化療針，現仍需打標靶，遲d要電療..謝謝
如果已經打咗術前化療加標靶，手術時前哨淋巴依然有感染，即係代表一開始已經有感染，並唔係因為治療中的等待而令到病情變差。
醫生你好, 我媽左邊乳房證實有大約2cm 惡性 (連帶附近有好多點點), 所以醫生話呢邊要全乳切除, 但因為右邊又發現有tumor (5粒), 跟住醫生幫佢最大個2粒 (BIRADS 4B x 2) 抽左粗針 (報告寫系纖維化良性), 跟住醫生話想幫佢做埋呢邊右邊局部切除, (1) 你認為有需要嗎? (如果是因為
怕良性會變惡性/切左之後就唔洗做有傷害性的檢查, .e.g X光, 先至可能算是有需要? 始終她身體體質太弱太差) (2) 如果抽出黎系良性都要切除, 咁點解當初仲要去抽粗針? (3)同埋右邊其餘3粒 (BIRADS 3) size 只是細一點點, 點解又唔抽埋呢3粒? (4)如果右邊的確是有需要做埋局部切除, 咁其餘3粒就不需要理會嗎? 會有更他風險嗎?
萬分感謝!
1）可做可唔做。
2）良性唔一定要切除。
3）可以抽，不過只睇形態醫生都已經好放心。
4）切唔切埋／抽唔抽針要睇片睇分佈先知。
你好。我今年3月21日自己摸到右乳房10點位置有一粒硬塊，展轉至昨晚做曬所有檢查，連pet scan也做哩，糸乳癌2期，醫生解釋我知屬性糸Her2 negative，是温和派，建議我可擇全切(+一電療)/部份切+電療。同時我也排政府中，5月5日見政府醫生，因去年才停了保檢，想請問，
1)我等多約2星期，視乎政府排手術期的日子才决定做手術，對病情有否影响?
2)如部份切除必要電療的，我怕難忍，那麼全切康復期要多少，及因不平均，是否影響脊骨?
謝謝你!
YK 26/4/2022
1）癌症治療係爭分奪秒，等多一日都嫌多，等待對病情會有壞影響，幅度就好難簡單量化。
2）大概四個星期。如果乳房唔係太豐滿，唔會影響脊骨。
我太太下月接受全乳及淋巴切除手術。
請教一下, 切除淋巴兩層及全切除, 日後淋巴水腫的機率有分別嗎？分別多大?
https://www.breasthk.com/sentinel-lymph-node-biopsy/
首先謝謝Breast HK. Very comprehensive information.
Ultrasound 報告話個tumor 約0.6cm. biopsy 報告係invasive ductal carcinoma provisional grade 1. 醫生建議做手術後有報告再定治療方法。
請問術前化療是不是只適合腫瘤大？細腫瘤是否不會用這方法？
見完醫生後才聽到有美國朋友做了化療後不用做手術，只做電療。請問這是一個可考慮的選項嗎？如否，點解？
以你們的經驗，請問術後化療機會vs化療後不用做手術的機會比較？
謝謝！
術前化療適合一D腫瘤大／品種惡（例如HER2/三陰性）嘅病人。
細腫瘤大多直接割，當然最理想係睇埋品種先決定。
唔做手術唔係一個可行選項，唔切唔知化療能唔能夠清除晒所有癌細胞。