乳癌化療副作用 - 辛唔辛苦?點處理?

Posted by in Chemotherapy 化療

乳癌化療副作用 - 骨髓功能減弱、甩頭髮、嘔吐、肝炎、傷心臟、肚痾、攰、停經/不育、手腳麻痺、骨痛、敏感、膚色加深/指甲變質、小便變紅色、口爛⋯⋯咁樣講真係講到口都爛,好恐怖咁喎,係咪真係咁辛苦?有副作用時點處理好?

乳癌我可唔可以唔化療?馬國權醫生
2招解決血管變幼,從此輕鬆落化療⋯⋯馬國權醫生

乳癌化療副作用

唔係想嚇你,不過如果詳細列晒出黎,乳癌化療副作用真係有咁多樣(甚至更多樣)。

「Breast HK,唔好嚇我啦,咁多副作用,你叫我點肯做化療呀?」

冇辦法,係呢個冇咗信任、小小事都以為醫療事故、要告人告到甩褲嘅年代,做醫生,只可以一五一十咁列晒出黎。如果仲係好耐以前醫生高高在上嘅年代,你信晒醫生,反而冇咁多顧慮,一條心向住終點直奔,可能對你嘅療程仲好。不過,既然投訴文化已成,醫生又要連D唔緊要/罕有嘅副作用都列出黎,不如我地積極D諗吓呢D乳癌化療副作用點處理/點面對好⋯⋯

骨髓功能減弱

乳癌化療

圖片來源:互聯網

1)發燒/免疫力下降:因為化療抑制咗白血球生長(尤其係T針),所以會易D感染/發燒。盡量避免去人多擠迫嘅地方,如果真係要去,就記得帶口罩如果發高燒,記得去急症室,佢會收你入院打抗生素同升白血球針(升白針)。另外想預防嘅話,亦都可以自費打定升白針先。詳細點樣打,可以參考「乳癌化療療程 - 吊針過程大公開」。想知幾多錢,就去睇「乳癌化療費用 - 要用幾多錢?貴唔貴?」。

2)貧血:因為化療抑制咗紅血球生長,所以會覺得冇氣冇力、唔夠氣咁、好易攰、心跳加速。可以入院輸血解決,不過好少可要輸血咁誇張

3)易瘀/流血:因為化療抑制咗血小板生長,所以會易D一點點咁瘀/流牙血。所以用牙線時要小心D,唔好整傷牙肉。嚴重嘅可以入院輸血小板解決,不過好少可要輸血小板咁誇張

甩頭髮

乳癌

圖片來源:史雲遜護髮中心

甩頭髮係常見嘅,通常好準時,第三個星期就黎㗎喇。化療前點準備,化療緊點扮靚靚保持尊嚴,一定要去睇睇「乳癌化療甩頭髮 - 點處理?幾時生返?

嘔吐

化療嘔吐

圖片來源:互聯網

嘔就係A針紅魔鬼嘅特性,如果你要吊紅魔鬼,就去睇吓「乳癌化療嘔吐 - 終極止嘔藥」,教你點處理,買咩止嘔藥食好。

肝炎

乳癌化療發燒

圖片來源:香港肝癌基金會

全香港有十份一人係乙型肝炎病毒帶菌,因為化療抑制咗免疫系統,所以乙型肝炎病毒會出嚟搞搞震,嚴重嘅急性肝炎係可以死人嘅。不過又唔洗咁驚,因為醫生做化療前一定會幫你抽血驗吓有冇肝炎帶菌,如果有就會開埋D抑制乙型肝炎病毒嘅藥比你喺化療期間一齊食,直至化療完成三個月為止。

傷心臟

乳癌化療療程

圖片來源:互聯網

一個你感覺唔到嘅副作用,主要係A針紅魔鬼同標靶針Herceptin會傷心臟,所以醫生會定期幫你檢查心臟功能,係未有你感覺得到嘅病徵前,就會幫你調較藥物劑量/轉藥。如果你心臟突然差得好快,你會覺得抖氣唔順/腳腫。

肚痾

乳癌化療針

圖片來源:互聯網

常見副作用之一,處理好簡單,止痾藥搞掂。

乳癌化療副作用

圖片來源:互聯網

化療藥同乳癌細胞喺你身體裡面大戰,作為戰場嘅你,梗係冇精力/精神。要充足休息,其他所有野比晒屋企人幫你做,專心作戰。返唔返工就好個人,有人手停口停繼續如常返工冇辦法,不過如果可以,都係唔好返,勞工法例最多有120日有薪病假,醫生一定會開足比你,放心

勞工法例:僱員按連續性合約受僱,在初受僱的十二個月內每服務滿1個月,便可累積二天有薪病假;之後每服務1個月可累積四天。有薪病假最多可累積至一百二十天。

停經/不育

乳癌治療

圖片來源:互聯網

呢個問題就難搞D。因為化療藥會抑制埋卵巢,所以大部份人都會經期亂/甚至停埋經。年紀近收經(大過45歲),就易D永久收經。後生嘅(細過40歲),可能化療後1年後先黎返經期。不過有經期唔等如有生育能力,好多時生育能力都會差咗,所以如果第時仲想要小朋友嘅就要一早同醫生講,睇吓可唔可以雪住D胚胎(embryo)第時用(公立冇呢種服務,要去私家嘅輔助生育中心求助)。注:未結婚就麻煩D,因為法例規定唔可以雪胚胎,只可以雪卵子(以而家嘅科技,醫生仲未有把握令你第時成功受孕)。

手腳麻痺

乳癌化療副作用

圖片來源:互聯網

主要係T針副作用,通常暫時性,化療完會慢慢改善,不過都有人長期麻痺。不過呢個係感覺問題,唔會對身體有大影響,所以要用T針就照用啦,始終命仔要緊。

骨痛

乳癌化療

圖片來源:互聯網

打升白針會令骨髓加速做白血球,情況有如工廠加班冇津貼,班工人實嘈啦,所以會骨痛。好在情況係短暫,兩三日就冇事,簡單止痛藥必利痛搞掂。

敏感

乳癌化療副作用

圖片來源:互聯網

咩藥物都有可能敏感,不過T針就常見少少。普通敏感就可能出疹/痕,嚴重敏感可以呼吸困難、血壓下降、甚至有生命危險。所以落藥時有咩唔妥,記得話比姑娘聽。敏感嘅處理方法就係食抗敏感藥/類固醇

膚色加深/指甲變質

乳癌治療

圖片來源:互聯網

暫時性,冇長遠影響,遲D會回恢正常,只不過係人都覺得你面色唔好/個樣好病,或者比睇相佬話你印堂發黑。

小便變紅色

乳癌化療過程

圖片來源:互聯網

紅魔鬼黎嘅,小便排佢出黎姐,一兩日正常返,冇影響嘅,唔洗驚

口爛

乳癌化療副作用

圖片來源:互聯網

以上講咗咁多化療嘅副作用,真係講到我口都爛。因為化療會抑制口腔黏膜細胞,所以其中一個常見副作用就係口腔潰瘍。

化療前可以去搵搵牙醫搞搞口腔衛生先,費事爛牙成為感染源頭。要留意香港政府係冇牙科服務嘅,呢度可能要用少少錢。化療時,就用鹽水/醫生開嘅漱口水漱口,都有好大幫助。街買嗰D漱口水如果含有酒精成份,反而會刺激口腔,記住睇清楚成份。

畢業的喜悅

恭喜你睇到呢度,因為你已經完成晒成個乳癌治療療程最恐怖/最辛苦嘅環節。

我希望你知道,大部分副作用都係有得處理嘅,乳癌化療並唔係你想像中咁恐怖

之後黎緊雖然仲有電療食藥,但呢D相對濕碎嘅野,已經唔可以再嚇怕你。

加油!向住終點衝呀~

乳癌化療時間

圖片來源:互聯網

好快你就可以同人分享乳癌化療畢業的喜悅⋯⋯

打化療針

圖片來源:病友

終於去到乳癌化療連載嘅最後一篇:乳癌化療期間之飲食 - 點補身?洗唔洗戒口?

有唔明?係下面寫低佢,我會盡量解釋你聽⋯⋯

封面圖片來源:互聯網