乳癌化療副作用 － 辛唔辛苦？點處理？
乳癌化療副作用 － 骨髓功能減弱、甩頭髮、嘔吐、肝炎、傷心臟、肚痾、攰、停經／不育、手腳麻痺、骨痛、敏感、膚色加深／指甲變質、小便變紅色、口爛⋯⋯咁樣講真係講到口都爛，好恐怖咁喎，係咪真係咁辛苦？有副作用時點處理好？
乳癌化療副作用
唔係想嚇你，不過如果詳細列晒出黎，乳癌化療副作用真係有咁多樣（甚至更多樣）。
「Breast HK，唔好嚇我啦，咁多副作用，你叫我點肯做化療呀？」
冇辦法，係呢個冇咗信任、小小事都以為醫療事故、要告人告到甩褲嘅年代，做醫生，只可以一五一十咁列晒出黎。如果仲係好耐以前醫生高高在上嘅年代，你信晒醫生，反而冇咁多顧慮，一條心向住終點直奔，可能對你嘅療程仲好。不過，既然投訴文化已成，醫生又要連D唔緊要／罕有嘅副作用都列出黎，不如我地積極D諗吓呢D乳癌化療副作用點處理／點面對好⋯⋯
骨髓功能減弱
圖片來源：互聯網
1）發燒／免疫力下降：因為化療抑制咗白血球生長（尤其係T針），所以會易D感染／發燒。盡量避免去人多擠迫嘅地方，如果真係要去，就記得帶口罩。如果發高燒，記得去急症室，佢會收你入院打抗生素同升白血球針（升白針）。另外想預防嘅話，亦都可以自費打定升白針先。詳細點樣打，可以參考「乳癌化療療程 － 吊針過程大公開」。想知幾多錢，就去睇「乳癌化療費用 － 要用幾多錢？貴唔貴？」。
2）貧血：因為化療抑制咗紅血球生長，所以會覺得冇氣冇力、唔夠氣咁、好易攰、心跳加速。可以入院輸血解決，不過好少可要輸血咁誇張。
3）易瘀／流血：因為化療抑制咗血小板生長，所以會易D一點點咁瘀／流牙血。所以用牙線時要小心D，唔好整傷牙肉。嚴重嘅可以入院輸血小板解決，不過好少可要輸血小板咁誇張。
甩頭髮
圖片來源：史雲遜護髮中心
甩頭髮係常見嘅，通常好準時，第三個星期就黎㗎喇。化療前點準備，化療緊點扮靚靚保持尊嚴，一定要去睇睇「乳癌化療甩頭髮 － 點處理？幾時生返？」
嘔吐
圖片來源：互聯網
嘔就係A針紅魔鬼嘅特性，如果你要吊紅魔鬼，就去睇吓「乳癌化療嘔吐 － 終極止嘔藥」，教你點處理，買咩止嘔藥食好。
肝炎
圖片來源：香港肝癌基金會
全香港有十份一人係乙型肝炎病毒帶菌，因為化療抑制咗免疫系統，所以乙型肝炎病毒會出嚟搞搞震，嚴重嘅急性肝炎係可以死人嘅。不過又唔洗咁驚，因為醫生做化療前一定會幫你抽血驗吓有冇肝炎帶菌，如果有就會開埋D抑制乙型肝炎病毒嘅藥比你喺化療期間一齊食，直至化療完成三個月為止。
傷心臟
圖片來源：互聯網
一個你感覺唔到嘅副作用，主要係A針紅魔鬼同標靶針Herceptin會傷心臟，所以醫生會定期幫你檢查心臟功能，係未有你感覺得到嘅病徵前，就會幫你調較藥物劑量／轉藥。如果你心臟突然差得好快，你會覺得抖氣唔順／腳腫。
肚痾
圖片來源：互聯網
常見副作用之一，處理好簡單，止痾藥搞掂。
攰
圖片來源：互聯網
化療藥同乳癌細胞喺你身體裡面大戰，作為戰場嘅你，梗係冇精力／精神。要充足休息，其他所有野比晒屋企人幫你做，專心作戰。返唔返工就好個人，有人手停口停繼續如常返工冇辦法，不過如果可以，都係唔好返，勞工法例最多有120日有薪病假，醫生一定會開足比你，放心。
勞工法例：僱員按連續性合約受僱，在初受僱的十二個月內每服務滿1個月，便可累積二天有薪病假；之後每服務1個月可累積四天。有薪病假最多可累積至一百二十天。
停經／不育
圖片來源：互聯網
呢個問題就難搞D。因為化療藥會抑制埋卵巢，所以大部份人都會經期亂／甚至停埋經。年紀近收經（大過45歲），就易D永久收經。後生嘅（細過40歲），可能化療後1年後先黎返經期。不過有經期唔等如有生育能力，好多時生育能力都會差咗，所以如果第時仲想要小朋友嘅就要一早同醫生講，睇吓可唔可以雪住D胚胎（embryo）第時用（公立冇呢種服務，要去私家嘅輔助生育中心求助）。注：未結婚就麻煩D，因為法例規定唔可以雪胚胎，只可以雪卵子（以而家嘅科技，醫生仲未有把握令你第時成功受孕）。
手腳麻痺
圖片來源：互聯網
主要係T針副作用，通常暫時性，化療完會慢慢改善，不過都有人長期麻痺。不過呢個係感覺問題，唔會對身體有大影響，所以要用T針就照用啦，始終命仔要緊。
骨痛
圖片來源：互聯網
打升白針會令骨髓加速做白血球，情況有如工廠加班冇津貼，班工人實嘈啦，所以會骨痛。好在情況係短暫，兩三日就冇事，簡單止痛藥必利痛搞掂。
敏感
圖片來源：互聯網
咩藥物都有可能敏感，不過T針就常見少少。普通敏感就可能出疹／痕，嚴重敏感可以呼吸困難、血壓下降、甚至有生命危險。所以落藥時有咩唔妥，記得話比姑娘聽。敏感嘅處理方法就係食抗敏感藥／類固醇。
膚色加深／指甲變質
圖片來源：互聯網
暫時性，冇長遠影響，遲D會回恢正常，只不過係人都覺得你面色唔好／個樣好病，或者比睇相佬話你印堂發黑。
小便變紅色
圖片來源：互聯網
紅魔鬼黎嘅，小便排佢出黎姐，一兩日正常返，冇影響嘅，唔洗驚。
口爛
圖片來源：互聯網
以上講咗咁多化療嘅副作用，真係講到我口都爛。因為化療會抑制口腔黏膜細胞，所以其中一個常見副作用就係口腔潰瘍。
化療前可以去搵搵牙醫搞搞口腔衛生先，費事爛牙成為感染源頭。要留意香港政府係冇牙科服務嘅，呢度可能要用少少錢。化療時，就用鹽水／醫生開嘅漱口水漱口，都有好大幫助。街買嗰D漱口水如果含有酒精成份，反而會刺激口腔，記住睇清楚成份。
畢業的喜悅
恭喜你睇到呢度，因為你已經完成晒成個乳癌治療療程最恐怖／最辛苦嘅環節。
我希望你知道，大部分副作用都係有得處理嘅，乳癌化療並唔係你想像中咁恐怖。
之後黎緊雖然仲有電療同食藥，但呢D相對濕碎嘅野，已經唔可以再嚇怕你。
加油！向住終點衝呀～
圖片來源：互聯網
好快你就可以同人分享乳癌化療畢業的喜悅⋯⋯
圖片來源：病友
終於去到乳癌化療連載嘅最後一篇：乳癌化療期間之飲食 － 點補身？洗唔洗戒口？
香港乳癌及乳病治療中心 
e生,
我想問紅血球會向邊幾日特別低?我聽人講會暈。。。
我打緊TAC,打左第一針,D副作用都好輕,第三個星期我仲跑番步。但係D人又話會一針辛苦過一針,係真唔係?
因為紅血球壽命有成120日，所以就算身體受化療影響製造唔到紅血球，驗血都唔會咁快反影出黎（反應有D濟後），相反白血球壽命5日，身體造唔到就驗血好快知，快上快落。你可以睇到，就算紅血球有事起上黎，都要幾針後先見到，所以冇人講邊幾日特別低。
因為好多化療嘅反應都係同身體「累積」咗幾多化療有關，所以真係會一針辛苦過一針。不過你頂得順第一針（始終後生），總好過連第一針都已經頂唔順。
e生,
又係我。今日返去驗血, neutrophil出奇地低,得1.7,雖然合格升班, 但係打左7支升白針(第4至10日連續打),都只係得呢個數,聽完結果,有D詫異,但係轉數慢即場都唔識點問e生。
係咪D升白針對我無效,定係反應太熱烈,一兩日骨髓工廠就交完貨,之後5 day死光光,所以個數只係反應自身的recovery?如果後尾個兩支升白針推到第11同13日打會唔會好DD呢?
TAC其實真係好激嘅，neutrophil合格就夠，唔好期望好高。升白針推遲打都唔會有咩幫助，真係頂唔順，一係就留班，一係就化療劑量打9折。
打到第五針亦都係轉T針，打完第四日頭暈頭痛，然後又要打升白，打完腰背勁痛，已食醫生開的止痛藥，但都試過半夜痛醒…
跟住牙肉又紅腫，影響進食，之前打AC都試過但用鹽水沖下口，兩三日就無事，但今日已第八日仲係甘，好灰。
醫生你好，我4月初號做完手術，政府醫院安排6月初化療，聽聞4至6星期就最好，等足2個月有冇問題好大影響，我應唔應該唔好等直接搵私家醫院做呢
三個月內做到就OK，有好多人都因為其他問題（例如傷口發炎／未拆引流）而多個6星期先做化療，冇問題嘅。
唔該醫生，咁我放心了
我在7月中完成了4針TTC化療了。係第3針後抽血驗時發現了肝酵素高了少少，指數是43。到了完成第4針，抽血之後指數是61。醫生叫我2星期後再抽血驗多次。之後雙眼在一個月內生了4粒眼瘡。另外，雙腳在第4針後非常攰，行路急時好似有點氣喘，之前打3針冇這感覺。以上這都是化療藥引起?
現有什麼方法？肝那邊我問醫生有冇藥食佢又話冇….
打T針係可以搞到肝酵素高嘅，雖然你冇詳細講邊隻酵素（AST／ALT／LDH）同cutoff，不過一般黎講，61都係少少高姐，同人地百幾差好遠。因為已經打晒化療，而家除咗等之外，冇咩野可以做／需要做，記得唔好食古靈精怪野／中藥／補身住，呢D可以干擾肝酵素。
眼瘡可以關事亦可以唔關事，唯一同化療嘅關係，就係化療令低抗力弱咗，易D發炎感染，不過冇大礙嘅。
至於腳攰／氣喘，呢D就係化療常見副作用，遲D會康復，冇事嘅。
謝謝你為我解答。現在安心了。因為我見打緊化療針時都冇咁多其他如眼瘡，氣喘等副作用…
其實我都唔清楚係邊隻酵素…因為醫生冇講，原來連指數都冇講。我只識問指數唔知有分咁多類，下次見醫生時再問下先。
我今年三月做完局部切除和前哨淋巴手術後曾經腋下術後水腫，醫生幫我抽咗淋巴液3次後冇事。跟住之後我都有keep 住去運動場散步運動一下。通常都是做舉高下右手呢d動作。但最近呢2個星期我每次去完運動場之後成隻手腫了。度手踭位置両手相差3cm，現右手指手背都脹了。
想請問一下有沒有方法解決？不理會的話自然會消腫嗎？通常約多久？好像之前術後水腫那様去抽出來可以嗎？
呢D要搵返自己醫生現場睇先知。不過呢D水腫同之前手術後傷口積水係唔同嘅，無得抽。通常都係避免某D誘發因素（時間性上似同運動場某D活動有關），加減物理治療推淋巴（唔係按摸店嗰D），同埋加減著壓力衣。
謝謝Breast HK解答。那我去見一下醫生了解情況
請問現時的化療針是不是無乜副作用？
我朋友1月在政府醫院做了切割手術，接住2月及3月打了2次化療針(共須4針)，現時她說只間中晚上有D骨少少痛，有時睡唔着！…
是否現在的科技進步左，無乜副作用影響病人？
副作用係有嘅，不過反應人人唔同，有人好辛苦，有人好舒服。
謝謝！
我媽媽是第二期,進行了oncotype test之後,結果顯示復發率為中級(recurrence score:25; tam alone:16%),建議她要進行化療; 但在oncotype test 結果出之前,私家和公立醫院的醫生都說她可以選擇不做化療; 請問醫生她是否值得做化療/需要做化療的程度有多大?謝謝!!
淋巴有受感染嗎？
沒有。而且她的荷爾蒙接收體呈陰性（編注：該為陽性）,(ER:8/8,PR:6/8,Ki-67 index: 35%),腫瘤為漿液瘤,謝謝你!
Recurrence score 18-30分屬於intermediate risk中級，究竟呢組病人做化療定唔做化療好，暫時醫學界冇一個定案，我地等緊兩個研究TAILORx Trial 同埋RxPONDER Trial 嘅結果。
http://breast-cancer.oncotypedx.com/en-US/Professional-Invasive/Resources/ClinicalTrials.aspx
腫瘤科醫生好多時都用中位數25分黎做分界，你媽媽Ki67咁高，係屬於Luminal B類型（詳情唔洗理），結論係建議化療。
另外ER8/8荷爾蒙受體係陽性，並唔係陰性。
很清晰!多謝醫生的建議!!
醫生：
我媽媽要打4枝ac針，4枝tc針，我睇左你既文章，安心了很多。但化療中的病人可以日對夜對3歲以下幼童嗎？我媽怕影響個孫，話要隔離自己，我好心痛！謝謝！
化療病友接觸小朋友，對小朋友而言係沒有問題，怕只係怕小朋友好易傷風咳嗽，易傳染抵抗力弱的病友。所以帶口罩、勤洗手，已經可以大大減低受感染機會，唔洗好疏離嘅自我隔離。適當地同屋企人接觸，對打呢場硬仗好緊要，孫子女係好好嘅精神支柱／捱下去嘅動力，叫你媽媽放心，加油。
Breasthk 你好，唔好意思比較長
我媽媽現正接受TCx4化療，剛剛打左第三針….佢每一次係打針時塊面都會標紅，但休息15分鐘後就無事，事情係佢係打第二針既十日後突然出現全身痕及出現一撻撻風”爛”咁，手頸都腫曬，當時入急症打左抗敏感針就散左但個身keep住痕，咁再見腫瘤科醫生時見了兩位醫生就令我有點迷茫…第一位醫生就話媽媽係藥物敏感建議我地轉番紅針…我地有表達過媽媽去過一個新裝修的地方及食到少少鴨(但之前都無試過因為這兩樣野而引起敏感)，這一位醫生都極力建議我地轉紅針….但拎文件時又被第二位醫生叫左入房，佢認為中途轉藥會影響效果而且認為應該係裝修令媽媽過敏。但當前日媽媽打左第三針TC後兩日打左一枝升白針當日下午就突然出現喉嚨腫脹及少少呼感困難及繼續全身皮膚痕，現留院只打了抗生素喉嚨仍腫
我們現時還未見到腫瘤科醫生。
好想問以上程況係唔係應該最後一針為媽媽轉藥及會唔會影響個治療效果…..佢已經撐左三針……
無論如何都感謝你為有需要的設立這個網站,thank you
好難講實咩野敏感，不過老實講，我地好少話對裝修敏感，所以我傾向相信係藥物敏感多。已經打咗3針TC，最尾嗰針轉AC其實療效影響唔大，因此我會建議轉藥。
醫生，多謝你的回答。我想請問，就家人已哂化療(4 針)差不多有3 星期，但最近發現有腳踵的情况 這個情況是否仍是化療的後遺症 請問會持續幾耐 應該怎樣可以令佢舒服D。
好難講實，因為腳腫有太多可能性。雖然通常都冇咩大問題，不過我地要小心去排除「化療傷心臓引起腳腫」呢個可能性。
咁即係化療完成差不多3星期 仍然會有負作存在？
今日屋企人剛巧政府內科覆診 醫生開一些去水丸給她 請問有作用嗎？
要視乎打咩針，打A針傷心臟係可以有長遠影響。去水丸係有效消腫（解決病徴），不過就冇處理到腳腫原因（雖然想揾都唔一定揾到單一原因）。
但係打T 針 又會晤會咁呢？
T針就唔關事。
多謝你的解答
醫生好：媽媽打緊AC針，真係嘔到飛起，呢幾日胃口都唔係咁好，佢心動動想食豬腳薑呀!但是這種食物正正是不新鮮的，這樣還可以吃嗎?謝謝!!
你都識講唔新鮮，我諗你都知答案，叫佢忍耐吓，最辛苦呢個時候，好快過。
謝謝！知道啦！
你好！請問市面上有種專為癌症病人而設的營養奶粉，聲稱增強癌症病人抗抗能力以及增加癌症病人白血球及T淋巴細胞（T-Cell）的數量，請問是否有用，如果它所增強T淋巴，是否不適合有切除淋巴的乳癌病人，謝謝！
沒有聲稱的功能，自然沒有任何顧慮。
即它表示增強T-Cell不會對切除淋巴的病人有所影響的？
沒有影響。
Thanks!
醫生，又係我，媽媽打針無肚呵，佢係呵唔出呀！即便秘！建議可以點做呀？謝謝
話比醫生聽，好多藥物可以幫助排便。另外多飲水，多運動，也有助排便。
我是HER2四期乳癌患者，我知我不可痊癒，一世都要用藥，醫生回答療程都無奈，其實我是否真是咁冇希望！現在正打緊雙標靶加化療。
不是沒有希望，只是要調節好心態、祈望，仲有好多野我地係做到嘅。
乳癌四期治療攻略 － 末期仲有冇得醫？
我都知道要與癌共存，除了藥物控制，我本人自身可以做D乜令佢變成睡火山
自身可以做嘅野唔多，跟足醫生指示，保持健康生活習慣。
化療期間係唔係會便秘架，媽媽化療左三天，打ac針，食得到，無嘔，就是沒有想大便的感覺！
冇關係，冇便意亦都唔係大問題，放鬆心情，冇嘔係值得高興。
三天了，但肚仔鼓鼓叫的，好似頂住頂住咁，昨晚灌了，便了一點點
醫生，剛剛轉了針，由ac針轉左tc針，星期一打左第一次，副作用係便祕和腹痛，胃痛和心口痛，為減輕痛楚，而家單靠每4小時服用一次必理痛！謝！
医生，你好。想问下her2病患要打足18支针，但系我打停经针最多可以12个月，你有什么建议？
唔明白你的提問，HER2 18支嗰D係標靶藥Herceptin，同經期／停經針沒有任何關係。
不好意思，讲到不清楚，我33岁，我听讲化疗期间打停经针可以保护卵巢， 这个星期开始打TC+H 针， 但系停经针最多可以打12个月，而herceptin打足18支都要年几， 请问herceptin针会影响生育吗？
有幾點你有D誤解：
第一，停經針冇話最多打12個月呢樣野，有人打甚至5年。
第二，打Herceptin 18針需時一年，不是年幾。
第三，Herceptin不是化療，唔會影響生育能力。不過打Herceptin期間係會建議避孕，因為會影響胎兒。
好，多谢你甘清楚的回复
你好，我係20歲果個，想長氣d問下
1）黎緊做化療，我知每個人身體狀況唔同，但一般黎講係咪建議defer一個sem好d？我想keep住番學但又驚到時唔知點
2）我呢個年紀化療完對生育能力既影響會唔會細過30歲先化療既人，定係無分別？有無大約數據（整體/同我同一年齡層）話幾多成人仲可以正常生到bb?你覺得我有無需要雪藏卵子？
3）而家香港解凍完卵子又受孕既成功率暫時係幾多？網上太多數據唔係好識分邊樣打邊樣。
4）切左4粒前哨淋巴，打排球/羽毛球會唔會驚水腫？定係4粒唔算多？
Thanks!
1）Defer好D，專心醫好病先再上學。
2）無呢方面的數據，太多因素會影響到。如果錢唔係問題，可以考慮雪卵子，話曬後生比多D空間自己，最多唔成功㗎姐。
3）根據2015年人類生殖科技管理局的統計資料，暫時係零。http://www.chrt.org.hk/tc_chi/publications/files/table14_2015.pdf
4）4粒算普普通通，唔建議做太劇烈拉扯手部的運動（包括排球/羽毛球）。
請問醫生，
我媽媽本來有乙型肝炎和膽固醇過高問題，在化療第一次後，抽血發現肝酵素和膽固醇都有上升。
請問為何在化療前吃了肝丸還會出現這個情況？（媽媽沒有吃任何中藥，只有吃過速癒素，期間有腸胃炎和發燒，有服用過止瀉丸和退燒藥）
如果肝酵素和膽固醇都有上升，這個情況應該如何改善？
還有不到兩個星期就要接受下一次療程了，請問這情況會否影響下次化療療程？
另一負責跟進膽固醇的政府醫生建議先停止服用膽固醇藥，請問為何要停？
因為那位醫生十問就不應，只好過來請教醫生了。
謝謝醫生
保肝藥只係預防急性乙型肝炎，並不能完全防止肝酵素上升。肝酵素上升的原因有好多，呢個要靠醫生。
如果肝酵素高不下，係有可能阻遲化療療程。
「停降膽固醇藥」同「高肝酵素」有兩個互動關係。第一，降膽固醇藥本身係可以令肝酵素輕微上升的，尤其是政府用副廠的Zocor。第二，肝酵素高係會令降膽固醇藥的副作用增加，例如肌肉發炎。基於呢兩個原因，一般都會建議暫時停止服用，等遲D情況明朗化先再作打算。
你好，
我媽媽的report :
Invasive Carcinoma, grade 2
CerB2 score 2 (equivocal)
Tumor A: grade2, Er 8/8, Pr 5/8 Her 2 Score 2, ki67 10%
Tumor B: grade2, Er 8/8, Pr 5/8 Her 2 Score 2, ki67 5-10%
醫生建議我們可選擇AC of TC , 文章中提到 T針較好，我媽媽的情況是否應選擇TC ？
另外醫生未提及過是否需要標靶藥物治療，請問我媽媽去到Score 2 是否需要標靶藥物治療？
我非常感激你的解說及文章資料，亦懇請提供一點意見給我媽媽.
謝謝醫生
CerbB2 score2要做FISH test去確定HER2 status，先可以知洗唔洗用標靶，亦會影響化療選擇。另外要知腫瘤侵蝕性部分幾大，同埋淋巴有冇受影響，呢D係重要資料你要提供返，先可以討論落去。
Stereotatic guided biopsy of microcalcification :
invasive carcinoma, no special type, Provisional Grade 2 (out of 3 grades)
focal ductal carcinoma in situ
estrogen receptor positive, progestogen receptor positive
cerB2 overexpression score 2 (equivocal)
microcalcification identified
USG guided core biopsy of L12H mass
– invasive ductal carcinoma
補充: 已做全乳切除
Left total mastectomy + SLN biopsy Dissection
pT2 (m) (2.1cm & 1cm) N0 (0/3 Sn). Margins clear
Tumor A (2.1cm): Grade 2 inviasive ductal CA
ER 8/8, PR 5/8, HER-2 score 2. Ki 67 10%
Tumor B (1cm): Grade 2 inviasive ductal CA
ER 8/8, PR 5/8, HER-2 score 1. Ki 67 5-10%
以上是report 上的資料，另外我見到plan of management 果part 註明已sent tissue for HER-2 fish , 我們後天會見腫瘤科, 到時要決定做哪種化療, 或會知道Fish 結果？ 但我們想聽多一點你的意見
唔好意思、因我唔太了解哪一部份是重點所以打得太長篇, 非常感謝！
重點在於FISH結果，假設媽媽唔太老同埋身體冇大毛病，FISH +ve打TTCHx6 加一年herceptin。FISH -ve就打TTCx4。
Thanks for ur advice
如果FISH +ve , 但唔打一年Herceptin, 對病情的惡化有多大影響？
大影響，易D復發，短命D。
醫生您好！我係轉移至大肶骨及肝，明天第一針化療，用紅針，我上月已做大肶加固手術；請問需不需要打骨針；如要打，打新針好，還是舊針好呢？謝謝！
完成化療後才打骨針，新舊兩者差不多。
醫生你好，我老婆打了第二次化療針後心跳得很快﹝通常過100最高去到146﹞入了QE四日，；之前每日做甩手操運動，現在怕影響停了。我們現在可以點？
無咩主動嘅野可以做，只能信靠並配合QE醫生。
完成化療，未電療，係咁想小便，正常嗎？
要排除尿道炎。
醫生, 您好, 老人家84歲, 4年前做左手術, 而家驗到復發, 兩腳板腫晒, 手無腫, 無骨痛, 但係成日胃氣脤, 無食欲, 無精神, 請問可以點做?
有得控制就控制嗰病，冇得控制就舒緩病徴，胃氣脹有藥可試，無食欲無精神無得搞。
多謝回覆, 請問胃氣脤有咩藥可以介紹, 定係要見醫生先開到? 網上有人話若真無胃口食唔落，要飲速愈素(萬0有售), 有用嗎? 腳腫點做好?
所有關於藥物都唔會建議自己去藥房配。
速愈素你喜歡可以一試，我個人唔係好信咁神奇。
腳腫要搵醫生查明原因。
Thank you!
打完化療第一針(FECX3), 5天後樣樣安好身體康復起來., 不過左邊乳房成日有突然痛. 直頭類似未同腫細胞分手的針刺感覺. (明明已經全乳割加重建). 病理報告話割MARGIN 清曬, 有3MM MARGIN, 是否神經線未縫合的感覺 ? 很懼怕是癌細胞復生………
痛唔係一個令人擔心的病徵，放心。
你好,
想請問下做緊化療(剛打完第4針)，但氣管不順的情況愈來愈嚴重。請問有什麼方法可以舒緩？
謝謝解答!
氣管唔順可大可小的，去睇咗醫生先啦。
醫生您好！
媽咪已打完4支紅魔鬼，本應下星期一開始打4支丅針，但呢幾日持續低燒，姑娘話有機會延遲下星期的丅針。
請問這會影響康復進度嗎？我怕她持續低燒不退又完成不到治療怎麼辦…
謝謝回覆！
身體不適合繼續，只可以耐心等待。
化療其間月經無停過是否荷爾蒙水平太強? T3N2A. 打FECX3+TTX3 暫時只完成FEC 等打TT. ER/PR 8/8, KI36% Type 2, 5 out of 18 淋巴感染/全割左邊. 月經去到第三針之後好似特別多. 是否正常. 另外我完成電療後可否選擇唔食抗荷爾蒙藥. 用天然一點的方式預防例如生食, 食升糖指數慢的食物等?
月經冇停代表初步黎講，卵巢功能大致冇受影響（唔代表受孕能力冇受影響）。
乳癌第三期選擇唔食藥實屬不智，放棄一種過百萬人實證有效的方法唔用，走去苦苦追求如花似夢的幻象，同D衰男人放棄槽糠之妻，走去苦苦追求賢良淑德的小三冇分別。珍惜隨手可得的瑰寶，幸福就係前面等緊你。唔好再沉迷小三，自己老婆就是最好的。（呢句我老婆好buy）
明白了….. 其實我父親糖尿病食了12年藥, 越食越重. 最後腎臟病死. 所以對長期食西藥有點害怕. 感謝告誡
我打第二支化療針時近針口位一撻紅腫痛，跟住仲打唔入藥水，姑娘轉打鹽水，一打我就痛，最後轉另一個針口打埋嗰支紅針，姑娘幫我敷冰，返家後已退咗紅，依家打第二針升白針傍晚發覺手腕嗰撻又紅腫返，有一輕微紅圈添，姑娘話滲漏會起水泡同損但依家無，計埋化療嗰日今日係第4日，想問是否滲漏或者係輕微滲漏定敏感呢？明天再打升白針時俾姑娘睇但又驚佢未必見過咁樣問題，都唔知点好，定係要去急症室俾醫生睇吓呢？
睇醫生。
我隻手依家仲係腫，會唔會影響下一針呢？我現在可以点做呢？
見醫生，網上問病唔能夠替代醫生正式評估。
唔好意思，現在只是小小腫但無紅，是否都要見醫生呢？
擔心／有疑問就見醫生，唔擔心／冇疑問就觀察。
你好，媽媽正接受TC x 4, 但當佢打完第二針時，隔左9日後媽媽身上出現痕癢及風癩，其後睇左私家醫生及腫瘤科醫生，食左藥有輕微改善。現在，身體繼續痕癢。醫生建議餘下兩針改為 AC 針。請問這樣會唔會影響化療效果？
影響少少。
8月尾證实乳癌，HER2，醫生建議用
TC+H x 6次，之後手術，再12次H。
好擔心，因我系花芸師，在自己home制作，我能否在化療期間，做到少量工作？
在家工作應該冇咩問題。
醫生，媽媽打tt針第一針，第五日發燒入院，白血球得0.01, 入左正壓房，打緊升白針，加上不繼努力飲奶，第二日已排升到1.3啦，但無論係化療前定入院期間，問姑娘可否下次自費預防打升白針，她們一律都說不行（未有機會見到醫生問唔到），會是甚麼原因拒絕讓她打預防的升白針呢？??白血球跌到零難度不值得預防嗎？謝謝醫生
今次低白血球發燒，下次醫生會自動開升白針，放心。
Thanks! 回覆速度簡直是神速
醫生你好，我媽媽二期，已在私家做部分切除，淋巴有一粒3mm, 故只切除前哨淋巴。Her2 equivical （但抽針報告則屬Her2）, ER positive, PR positive, Ki67 proliferative index 70%. 手術後再照CT scan, 發現有一粒9mm, L level I axillary LN SUVmax 12.41. 私家認為可能是手術後發炎，無需做全淋巴切除。但今天政府醫生認為要，之後再做化療，無需做標靶。請問1. 全淋巴切除需要嗎？2. 標靶需要嗎？3. 政府說化療是A和T針，但這兩針副作用大，有其他更好選擇嗎？
麻煩請給見議。感激不盡。
1）3mm 係macrometastasis，PET scan明顯有殘餘癌細胞，要全淋巴切除。
2）N1加上之前抽針係HER2，要化療加標靶。
3）方案選再次手術後TTCH。
謝謝神速回覆。那我可以要求政府給我們做標靶嗎？TTCH 是否不同於A 和T 針?我可以要求政府給我做TTCH 嗎？
如果抽針真係HER2型，可以要求。TTCH 個T就係T針，呢個組合冇A針，自己爬下文章，標靶組合嗰幾篇寫曬。
醫生你好，我左乳癌2A，已做全切除手術，做了第一次化療，但期間不知藥物或個人不受癌症奶粉問題，第三日開始肚痾七日，停了奶粉第二日開始發燒，白血球由Day 7 – 3.87 到 Day 8 – 0.73，打了兩支升白針，開始嘔，消化唔到所有嘢，腸同胃都發炎到食止痛藥都減唔到痛。
我真係打唔到第二支針，是否可有其他方法嗎？
白血球升返就已經可以打，病徵係辛苦，不過唔係唔打得嘅理由，頭痛醫頭腳痛醫腳就已經ok。
醫生你好！4月尾證实乳癌，HER2，醫生建議用TC+H x 6次，之後手術，再12次H。
HA排期到5月尾才見腫瘤科醫生，再約見做化療估計等一個月，可能到六月尾，會唔會不會太遲？
遲。
醫生你好，TCH化療四針完成11天後待電療期間牙根發炎要拔牙，但牙醫說電療影響牙骨，要電療前先拔牙。
如果要電療前拔牙的話，真希望盡快完成，不影響電療進度，請問化療後什麼時間可以拔牙？要注意什麼？感謝！
電乳房唔影響牙骨，同幾時拔牙無關。
你好醫生，首先想多謝你，因為睇你既文章，我真係學到好多野，同埋減低左我好多恐懼，我岩岩27歲，發現乳癌，剛前幾日做完部分切除手術，醫生表示似係導管入侵性癌，現等緊病理報告，醫生表示如果大過2cm就要做化療加電療，細過就只做電療
我想問
1. 細過2cm 點解吾洗做化療？因復發機會較低？就算細過2cm的話，照做化療會吾會安全d?
2. 我上網都無乜見過咁後生就有乳癌，好多人話愈後生有乳癌即係個種癌係惡d, 咁係咪代表留係身體既癌細胞會多d?將來復發既機會更多？
1）細過2cm唔代表唔洗化療，仲要睇屬性的。例如大過1cm的HER2型乳癌已經要化療加標靶。
2）後生病發通常屬性偏惡，加上人生仲有漫漫長路，所以復發機會多D，唔代表留係身體既癌細胞會多d。
醫生你好，
我有另一問題:
剛看完你有關化療副作用的講說，文中提及”化療前可以去搵搵牙醫搞搞口腔衛生先，費事爛牙成為感染源頭。”
我本身有一隻補過嘅牙齒有牙瘡，醫生話要脱咗再鑲假牙。如今又要面對化療，牙齒的問題要先處理好？還是待化療後才處理呢？
請幫忙解答！
譚太
有瘡就要處理咗先。
醫生你好，本人現年50歲，乳癌切除完食左五年tamoxifen，剛剛做檢查發現子宮有個2cm息肉，醫生話要刮子宮，請問是不是一定要刮呢？還有這種葯是不是不適合我呢？因醫生要求我食多五年，咁我可以怎樣呢，月經已一年沒有來了
有瘜肉就刮宮好D。適唔適合你就視乎刮宮結果。
Hello 醫生，
我媽媽是一期三陰，确定左chemo方案系AC4+TC4, 本來安排尋日打第一支AC針，結果上個星期五做的心電圖顯示T波 inversion, 所以現在要先看心臟專科，打針要往後退。我想知道：由於媽媽是10月20日做完單邊切除手術，如果再往後推，會否影響復發的機率？或者係影響復發的機率有多高呢？
另外，由於我屋企裝修，一家三口加工人搬去媽媽屋企。本來想在化療期間陪伴她，給她精神鼓勵，但聽一個媽媽同樣有乳癌的朋友說，化療期間要盡量的干淨無菌（她一個朋友的媽媽化療期間細菌感染，之後發燒走了）但係流感季節快到，我女同我已經感冒了，所以我們最好盡快搬出去。你同意嗎？不過我們最快都要過多兩個星期才可以搬回自己屋企，如果媽媽過幾日就第一針，我們會有一個多星期一齊住，你建議我們連那一個多星期都搬出去酒店住一段時間嗎？
最後，想說真的十分感激你開的這個blog，幫助了很多人呢。
身體未準備好，想急都急唔黎。
住唔住酒店好個人，怕流感其實好似以前沙士咁戴口罩、一比九十九、洗手洗手洗手已經好夠。
醫生你好，我五日前打左第一針，尋晚開始出現身痛既情況，感覺有點似骨頭痛~但我重未開始開始打升白針，這情況正常嗎？一感覺到骨頭痛，就好怕係轉移左做骨癌！
痛的感覺好個人，好難就咁隔空評估正唔正常，怕就話比自己醫生聽，等佢評估。
醫生你好
我已經係政府醫院排期，但8月先到我，請問我這段時間好唔好去私人醫院做住其他治療先？thanks!!
負擔得到就去。
醫生你好
我16/12 打完最後一針T 針（三星期一針的），之後要做電療及食荷爾蒙藥！
請問我什麼時候可以開始食中藥調理身體？是不是16/12的三星期後就可以？
隨時可以，打完最尾一針已經唔影響。
化療後小便混濁 及尿頻是否正常？ 半夜可能起身三四次去廁所
要排除尿道炎。
是否需要睇醫生及驗尿？我已做了 7 次化療, 之前冇呢問題. 但最近這星期有數日小便混濁, 有点擔心. 我下週要做第8 次化療, 會否有影晌？
擔心就睇醫生，冇發燒就唔影響化療。
醫生我2019年10月月開始打TC針，打完第一支兩星期後就出風癩，之後一直每日幾乎都出風癩。12月底打完第四支最後一支化療針，到而家2020年2月了，都係仲有出風癩，通常每晚夜晚先出。請問這種敏感狀況一般會維持幾耐?
要搵出致敏的源頭，先能夠估計會維持幾耐。
醫生你好，我今年50歲，2月10日剛做完局部右乳及前哨淋巴切除PT1cN0(sn-i)，腫瘤grade2, ER +ve 250/300 , PR +ve 290/300, ki67 21%, Her2 -ve score 1，在等待endo predict 執告， 好擔心要化療。
1) 公院排期5月5日，是不是太耐？如果我等到5月，中間的風險是什麼？
2）值唔值得去私家做電療？
3）萬一要化療，若果在私家開始左，是否可以在公院接着做？
4) 切了5 粒淋巴，無擴散，長遠來說，右手不宜抽血、量血壓，如果拿重物、打波之類有影響嗎？會水腫？
原諒我多問題，等待的時候心情忐忑。
祝安康
1）如果要化療，耐。如果唔洗化療，都ok，所以視乎EndoPredict 結果。風險就係遲咗輔助治療，影響治療成效。
2）視乎自己預算。
3）可以。
4）盡量愛惜，不過唔係想像中咁弱。
多謝你耐心回答，這網頁讓我了解很多乳癌知識。
Endo predict 結果是low risk, 是不是可靠？
醫生建議是電療就夠了。
做得就信佢。
想問，如果化療期間同化療後水腫，可以點樣解決？謝謝
要研究點解水腫，心臟檢查點樣等等，先可以對症下藥。
做完化療2個月，手關節同條頸都仲係痛，正常嗎?
唔可以話正常，原因就要睇醫生。
馬醫生，我在9月17日已完晒8針化療，想請問:
1. 化療藥一般會殘留身體幾耐？
2. 如果想從飲食方面加速排毒功能，排走残留嘅化療 藥，會否影響化療作用？ 抑或等化療藥自然流失更好？
3. 完左化療後仍有手指麻痹，胃氣脹/胃口不佳，行路唔夠氣(好似拖住條鎖鍊行路咁辛苦)等徵狀，是否等於化療藥仍未完全消失？
真的好想身體快點回復正常。
謝謝馬醫生！期待回覆。
1）三個星期。但有時副作用例如手痺腳痺可以持續好耐。
2）根本冇得加速。
3）化療縱然消失，但身體始終需要時間慢慢康復過來。
馬醫生，感謝您的迅速回覆呀！唔該晒！
馬醫生，我確紾左右乳房分別零期及一期，做咗局部切除，現等安排電療，醫生話我個case可選擇唔做化療,我睇過-啲資料是否可以打收經針代替化療？
因為我怕唔做化療會容易復發
提供的資料唔足以去判斷。打停經針大概等如最入門嘅CMF化療，但CMF効力太弱，已經冇乳癌病人打。
馬醫生，謝謝您的回覆！
醫生，你好！
我媽媽驗出左乳房有4.6cm的HER2+，腋下淋巴也有，PET scan沒有擴散，醫生話先做術前化療，用紫杉醇，雙標靶雙化療，每一星期一針，連續18星期。剛剛已完成第一針，想問下呢個治療方法常見嗎？因為我見到其他人都係每三星期一針。是每個星期都會落化療藥嗎？還是第二，三星期是標靶藥？
謝謝！
唔常見，不過可以嘅，只係將每一針拆散三針，少食多餐舒服D。
你好 我媽咪確諗乳癌 無去到淋巴但癌細胞有影響神經線 同媽咪有肝炎（食藥中）
Stage IIB
Size 5.5*5.7
ER 8 PR 3 Ki-67 index 45% Grade 3 FISH neg
我想問我媽咪應該擇TC *4 定AC*4+ P*4?
遲d 會做電療16 次同食荷爾蒙藥at least 5 年
因為個病理報告話係grade 3. 我好驚做完4 針復發率會高:(
Thank you so much
淋巴冇感染又唔係三陰性，TCx4夠。
你好醫生，
本人40歲，醫生建議打TCx4，醫生同時建議每週期打5次升白針，因為疫情加上怕打針，醫生說可考慮只需打1次的長效升白針。
請問兩者針後副作用有沒有大差別，我只希望身與心可以好過一點，不考慮價錢了，謝謝。
副作用沒有大差別，主要都係價錢同方便程度嘅分別。
你好醫生，本人49歲，我係HER2 positive (ER-negative, PR – negative, ki67 around 70-80%, CerbB2 -score 3), 現在剛剛打咗第三針雙化療雙標把（TCHP)，但係肝酵素已經到85，醫生話如果下次抽血肝酵素太高就要停一停，請問肝酵素要升到幾多才要停化療，要停幾耐？有冇藥可以降低肝酵素？醫生現在要我先停膽固醉藥，第四針前抽血再決定。其間我可以怎樣幫到自己改善肝酵素？我沒有食中藥，不過食蟲草。謝謝。
沒有一個硬指標。
好可能蟲草就係元兇，要停。
明白，多謝醫生。
本人於6月完成局部切除，腫瘤1.3cm，ki-67 8%，1粒淋巴受感染，基因報告13%復發率，政府話要做6針化療，現已做2針化療，可否停止接受化療而開始電療。對治療有沒有影響？
提早停止化療，就得唔到化療嘅好處。
因基因測試超過一個月才有報告，所以我在黃金時間2個月內開化療針，請問根據報告我是否需要化療？
基因報告recurrence score 幾多？幾多歲？
41歲，基因報告復發率13%
Recurrence score 一般來講係0至100分，唔係要復發率%。
Recurrence score 13
都係建議繼續化療。
醫生你好，我係一個三陰性乳癌三B期，已經完成化療，並切除左胸，左邊淋巴⋯⋯但係，最近右腳突然冇力，入院檢查，照頭⋯⋯現在懷疑已經轉移上頭了⋯⋯我唔知道下一步會點做⋯⋯你可唔可以話我知？謝謝
腫瘤科醫生會睇吓需唔需要做減腦壓手術，或者電療個腦，之後要再化療加減免疫治療。
馬醫生您好。
請問, 完成化療後，有冇乜嘢方法/做啲乜嘢可以令白血球低和貧血嘅情況有更好嘅改善？
完成化療，就等佢自己自自然然康復。
嗯嗯，唔該晒。
口裏面生滿大大小小嘅痱滋，完全食唔到嘢，點樣可以消滅痱滋，或者減輕痱滋嘅痛楚⋯😞
去買痱滋藥膏，或者用漱口水漱口。
醫生，感謝您的網站給我們這麼多的資訊.
我媽媽乳癌復發, 左邊全切已經是20多年前（以前是原位癌，只做了電療)
今年是全切了右邊，今年64歲. 以下是報告結果
T2 (2.7cm), N0(0/2+7), G3 ER8 PR8 HER2 1, Ki67 40% , 冇擴散.
20年前她在私家做手術，今次在政府，而政府醫生建議她化療Taxotere-Cyclophosphamide針 x4 次，另外食半年荷爾蒙藥
1. 請問政府醫院係咪用副廠化療針藥？咁請問如果去私家做化療，副作用會唔會少啲？
2. For減少副作用的藥物，例如止嘔藥那些，政府藥是否冇咁有效？係咪要出邊另外購買更加有效嘅藥？定係可以問政府醫生自費購買？
3. 我媽媽呢個情況，你覺得去私家醫生度係咪都會建議打TTC針x4? 有冇啲更加低副作用嘅藥適合佢？
4. 你所講嘅將樣本送去外國做基因測試，係唔係我媽媽已經做唔到？佢已經喺政府醫院做完手術.
5. 成日聽人講最新有免疫治療，請問係咪唔適合我媽媽做？係咪避唔過做化療？或者有冇其他國家有更加好的治療方法？
謝謝你！再次感謝你的資訊!
1)係。唔會。
2)TTC 唔點嘔嘅。
3）係。冇。
4）做到，不過Ki67: 40%，預計結果都係叫佢化療。
5）唔適合佢。想睇下避唔避到就做OncotypeDx。冇。
感謝醫生這麼快和詳盡的回覆！
1. 我聽聞私家診所可以一星期打一次針instead of 喺政府醫院三星期先打一次，請問我媽媽的case 可唔可以一星期打一次？係咪真係副作用細dd(因為每次打量少咗)?
2. 如果選擇喺你哋診所度打，第一次落針使唔使入醫院做，因為避免驚有過敏？TTC 容易會有過敏嗎？
3. 請問政府同私家打升白針嘅日期是否一樣？都是打完第一針之後才打升白針？如果喺政府醫院度打，有冇自付費叫姑娘上門打針服務？
再次感謝醫生你的回覆！
1)可以。係舒服D。
2）唔需要入院。係有機會過敏，診所已經處理到。
3）係。政府打針就通常去賽馬會門診打升白針／自己學打。
你好，我剛完成左第一針TC,落完第一包紅魔鬼出風疹，打敏感藥就退左。 覆診後，血報告睇到肝酵素偏高，醫生話下一次化療藥減劑量，落藥前要打類固醇，抗敏藥。
請問：
1. 肝酵素偏高，所以化療減劑量，本身計劃6針，會否因為減劑量而增加針數？
2. 第一針TC就出現敏感，出風疹，係唔係之後幾針都要先打抗敏藥？落藥時，我仲有咩要特別注意？坦白講有啲辛苦，因為好那，打完我即刻暈，成個人無哂力…
3. 有啲病人話打化療，會甩牙，一般副作用好似無提到，甩牙屬於副作用之一嗎？食鈣丸有無幫助？
1）唔會。
2）係。你冇咩野可以做到。
3）化療唔會導致甩牙。食鈣片冇幫助。
另外TC針，係紫杉醇（白針），並唔係紅魔鬼。
感謝回覆啦！我安心繼續治療🙏🏻
醫生你好，本身係初期HER2型乳癌，做左全乳加全淋巴切除手術，係私家做緊化療+標靶（每一星期一次，三個星期為一個療程），將會係14號打第一個療程嘅第三針。去咗公立醫院醫生話下個月15號先有期，想問一問如果14號係私家打完第一個療程之後，直接等一個月先到公立醫院做第二個療程，中間一個月空窗期對化療效果影響大唔大？
如果私家開始得，就建議打到公立駁到先停。你下個月15號見醫生，最怕係見完醫生，唔係即刻安排到你打針，都要睇吓化療中心有冇期嘅，通常等一兩個禮拜（即係你隔咗五至六個星期先打第二個療程，咁就唔係咁好），所以你第二個療程都應該係私家打埋，第三個療程先返去駁。
你好呀！
有事請教！
姐姐乳癌化療中…………
上月尾進行咗吊三針後，連續發燒兩次，入了院！第一次燒咗兩三天，發燒38~37°7左右，打抗生素七天(其中最尾一天的口服抗生素(因姐姐想出院)！
第二次燒咗好多天，至今依然……住了4天昨天已出院……
今次一到 午餐和晚餐後，就慢慢發燒…………
想請問是甚麼原因，引致發燒？
入咗院，醫院又查不出甚麼因由！
可否解答我的疑難？
入埋院都查唔出原因，你夠期望我可以隔空搵到原因，呢個有點強人所難。
Hi 醫生
媽媽化療第一針第四日打docetaxel同cyclophosphamide, 便秘同有胃氣，肚脹冇胃口，可唔可以食啲通便嘅成藥。牌子名係dulcolax
可以。
醫生您好，
我媽媽確診第二期，剛開始化療第一針AC針後，而家抽血肝酵素偏高要停第二針，再抽血驗兩星期後先再睇係咪要換藥。期間佢都冇進食中藥，不過佢本身有三高有食降血糖同膽固醇藥，請問肝酵素偏高現象係咪常見？而家要停針又冇嘢可以做，所以有啲不知所措。
都常見，而家冇嘢可以做，都係等再抽血驗吓有冇回落到。
醫生你好，我已打了兩針紫杉醇（一共四針），但之前做前哨淋巴手術的傷口有細菌感染，第三針要延遲。視乎傷口情況，可能延遲兩星期，對化療效果大影響嗎？十分擔心…
冇得擔心，身體狀況唔合適打落去，有冇影響都係要暫停。
醫生你好，家母66歲，早前已作進行全乳切除手術，報告是Right mastectomy + SNB reported 17mm grade III IDC with all SN benign (Cold SN=bx benign node).
HR + Heu – ki 67 20%
術後醫生話情況踩界，建議做化療，但家母十分害怕，因此想請教：
1）請問家母這個狀況，是否應該化療？
2）另外，醫生有建議做Oncotype DX，請問是否值得做？再判斷是否進行化療？
謝謝，祝身體健康！
1)灰色地帶。
2）值得做OncotypeDx 。
馬醫生你好！本人第三針化療後出現發燒 1月1號發燒入了急症室 住四五天醫生給我出院出院時医生跟我說白血球指數43已回落11了 出院當天沒有發燒。但是出院後幾天還有的微燒 已探左邊37.1或37.2。但右耳就37.6 37.7 37.8。這樣我該如何是好。請問是否要入急症室呢？
啱啱過少少界，可以觀察住先。
馬醫生，請問化療期間可唔可以食黃薑粉？聽到好多人話有幫助抗癌，但又唔知會唔會同化療衝突。想聽聽你嘅意見
雖然可以食，不過唔食、唔多生支節仲好，因為根本冇科學根據話有效。