乳癌化療費用 － 要用幾多錢？貴唔貴？

Posted by in Chemotherapy 化療

乳癌化療費用 － 化療要錢，升白針又要錢，標靶針仲要好多好多錢，點算呀？成個化療標靶療程有咩地方要用錢／用幾多呀？呢篇幫你計計數，仲教埋你點申請傷殘津貼⋯⋯

乳癌我可唔可以唔化療？馬國權醫生
乳癌化療黃金期，我係咪等得太耐？馬國權醫生

乳癌化療費用

1）化療前檢查：因為要做完心臟檢查先可以打A針／Herceptin，所以想化療早開始，一係叫醫生未做手術前已經約定幾時做心臟檢查，一係出去私家做，大概$2500。

2）化療藥物：睇你揀咩餐，詳見「乳癌化療選擇 － 咁多組合點樣揀？」「乳癌標靶治療 － 乳癌HER2型點樣揀？」，由免費到$48000不等。

3）化療輔助藥物：如果打A針，終極止嘔藥Emend$700／每一週期。如果打T針，升白針又自費嘅話，每針要$900（2015年6月更新：升白針已降價至$350一針），每週期打4－7支，大概＄3600－6300／每一週期。當醫生評估你揀嘅化療組合，有大過20%機會有低白血球發燒（neutropenic fever）嘅話，升白針係會免費。另外如果你試過低白血球發燒而要住院，升白針都係免費。

4）日間化療中心費：化療唔洗住院，每次吊針都係去日間化療中心，每次$100。

5）標靶針Herceptin：由全資助免費到全自費$250000－270000。

2018年1月更新：有病友話我聽，原來而家已經有網上計數機可以自己入資料估算自己得到幾多資助，快D去自己計一計，就唔洗再等見醫務社工已經可以有眉目：https://sfecal.ha.org.hk/

6）標靶針Pertuzumab：$27000一針，打幾多比幾多。

7）私家醫生收費：以上所有收費都係公立醫院基本收費（批發價），如果喺私家做療程，零售價就好海鮮價（額外可收費嘅項目包括醫生診金，吊針費，日間化療中心費，心臟檢查費，燈油火蠟等等⋯⋯），你預1.5倍批發價落樓差不多。

有晒價目表，係時候攞個計數機同銀行戶口簿出黎，計一計夠唔夠錢去做自己心目中嘅方案。

 

傷殘津貼及傷殘證

傷殘津貼乳癌患者想申請：要滿足呢一個條件⋯⋯馬國權醫生

「Breast HK，我計黎計去都計唔掂，有冇得平D？」

以上批發價已經係成本價，冇得再平。如果真係唔夠錢／要幫助，醫生唯一可以幫嘅就係幫你申請傷殘津貼幫補吓。

「點申請㗎？洗唔洗資產審查？」

首先你要去搵醫院嘅醫務社工，同佢講你想申請傷殘津貼，佢就會將表格交比你主診醫生／同一組醫生審批，當中唔洗資產審查。如果醫生肯批，你會收到每個月$1685資助，當幫補吓呢段洗咗咁多錢嘅時間。之後可以申請傷殘八達通，搭車搭地鐵2蚊。

傷殘證申請表（注：呢個同傷殘津貼係唔同，醫生批得鬆手好多。）

伸廷閱讀：乳癌資助計劃 － 為你搜盡全城最紅乳癌優惠

「醫生點先批？」

基本上冇準則，睇醫生行唔行洗酌情權。

「點解大家都係乳癌，人地有傷殘津貼但我冇？」

要視乎批嗰個醫生點睇你個病／有冇需要。

「冇準則㗎咩？」

有，不過如果跟足社署個準則，大部份人都攞唔到傷殘津貼，因為佢定義為雙目失明／斷一對手／斷一對腳。所以批唔批，要視乎批嗰個醫生揸得正唔正。揸得緊，乳癌唔係傷殘。揸得鬆，乳癌可以當傷殘。

「即係有人濫用？」

係，但如果要生乳癌先可以申請傷殘津貼攞著數，我諗冇人想要呢千幾蚊。再者，千幾蚊香港地可以買得D乜？所以唔洗羡慕，亦唔好妒忌，人地患乳癌已經好慘，醫生先行洗少少嘅酌情權。如果你見過有D乳癌媽媽，為咗屋企嘅小朋友，連＄700蚊止嘔藥都唔捨得買，寧願自己嘔到死去活來，咬緊牙關捱化療，你唔會再諗有冇乳癌病人濫用傷殘津貼呢個問題。

睇晒之前幾篇，知道自己乳癌惡唔惡，洗唔洗化療，幾時化療好，如果化療又用咩套餐好。今次連錢銀都幫你諗埋，萬事俱備。唔好怕，係時候放心去做化療喇，我地下次睇吓「乳癌化療療程 － 吊針過程大公開」

有唔明？係下面寫低佢，我會盡量解釋你聽⋯⋯

封面圖片來源：互聯網