乳癌化療嘔吐 - 終極止嘔藥

Posted by in Chemotherapy 化療

死啦,我就黎要吊紅魔鬼,聽病友講會嘔到飛起,咁辛苦我頂唔頂得順㗎?唔洗擔心,原來醫生處理「乳癌化療嘔吐」有秘密武器-終極止嘔藥⋯⋯

乳癌我可唔可以唔化療?馬國權醫生

乳癌化療嘔吐

乳癌化療

圖片來源:互聯網

仲記唔記得邊隻針會搞到你嘔到飛起?

係喇,就係上面已經寫咗嘅「紅魔鬼」。

「咩叫紅魔鬼?」

就係A針(Adriamycin)囉,冇追開嘅返去睇「乳癌化療藥物 - AC針?TC針?乜黎㗎?」。

「睇咗喇,咁T針嘔唔嘔㗎?」

T針係唔嘔嘅。如果你唔洗打紅魔鬼,呢篇可以唔洗睇。

「唉~~我要吊紅魔鬼呀,咁點算?」

首先記得食飽唔好即刻訓

「俗語都有話『食飽就訓、訓飽就食』,乜唔係化療冇精力,要多作休息咩?」

係要多作休息,不過唔係食飽即刻訓落床。因為吊完紅魔鬼頭幾日最易嘔,有D病友甚至飲水都嘔,好辛苦。食飽D野未落晒格就打橫訓,只會仲易D嘔。

「咁有冇咩唔好食?」

野食應該少油/少肥/少煎炸,因為高脂肪食物會有「好飽」頂住唔舒服嘅感覺。化療已經冇胃口/易作嘔,仲要頂住就咩都唔想食/好辛苦。另外為咗減少「頂住」嘅感覺,醫生會建議少食多餐,好多病友都覺得有幫助。

「隻紅魔鬼真好勁,我已經冇食飽即刻訓/冇食肥膩野,都仲係想嘔,點算?」

嘔就梗係食止嘔藥,一定搞得掂,有三個級別比你揀:

基礎止嘔藥

「佢叫咩名?」

Maxolon(Metoclopramide),Kytril(Granisetron),Dexamethasone(即係類固醇)。呢三隻最基本嘅止嘔藥,醫生一定開比你。

「咩價錢?」

咁基本嘅野,公立包晒,免費

「點樣食㗎?」

餐前食三日。Maxolon一日三次,Kytril同Dexamethasone一日食一次。

「都係唔夠勁,點算?」

食上級止嘔藥。

上級止嘔藥

叫得做上級,即係好D/有效D啦。

「佢叫咩名?」

Zofran(Ondansetron)

「咩價錢?」

公立醫生未必會主動開嘅原因,係因為呢隻貴過基礎止嘔藥好多,以前要自己比錢嘅。近年好好多,醫管局已經包埋,即係免費。不過你都要識多D野先識叫/提醫生開

「點樣食㗎?」

8mg一粒,早晚食,化療後食3日。

「都係唔夠勁,點算?」

食終極止嘔藥。

終極止嘔藥

叫得做終極,梗係最好/最靚嘅止嘔藥啦,食完真係好好多,大部份人只會作悶/覺得有胃氣頂住,但真係冇嘔

「佢叫咩名?」

止敏吐(EMEND)- Aprepitant

乳癌

圖片來源:互聯網

「咩價錢?」

公立冇得免費提供(2015年4月好消息:止敏吐已經納入醫管局藥物名冊,如果打A針可以免費提供),要用就要出去買。大概$700一盒,包三粒藥丸,一個週期用一盒

所以如果嫌貴,可以試咗zofran先

「點樣食㗎?」

第一粒(較大粒,粉紅色加白色膠囊)就化療前一個鐘食。

第二同第三粒(細粒D,白色膠囊)就第二日同第三日早餐前食。

總結

知道呢三個級別嘅止嘔藥,就可以睇住自己荷包好好同醫生溝通,搵一個自己最舒服嘅止嘔方案。

呢兩集搞掂咗甩頭髮同嘔呢兩大副作用,其實化療已經唔再可怕,其他嗰D小問題,下集再比多D護理小貼士你:乳癌化療副作用 - 辛唔辛苦?點處理?

有唔明?係下面寫低佢,我會盡量解釋你聽⋯⋯

封面圖片來源:互聯網