乳癌荷爾蒙藥 － 不同年紀嚴選最正確食法
上回講到乳癌荷爾蒙藥食法都可以有幾種變化，可以食新藥，又可以食舊藥，甚至先舊後新，食幾耐可以5年又可以10年，仲未計副作用，頭都大埋，點揀呀？呢次就住唔同年紀嘅你，教你嚴選最正確食法⋯⋯
乳癌荷爾蒙藥
上一篇講過一個好重要概念：收經前冇得揀，收經後有得揀。
咁作為病友嘅你好自然就會代自己個情況入去：
1）好後生充滿活力嘅你（我知道所有女性都好後生好有活力，呢度講緊實際年齡，唔係講肌齡。）
2）人到盛年，開始會留意吓「靜心」「太太口服液」嘅你
3）見慣世面，冇咩野嚇到你嘅耳順之年
後生未收經嘅你
上面提過未收經冇得揀食咩藥，只有舊藥Tamoxifen啱你。
「舊藥Tamoxifen有咩副作用？」
主要你要知嘅就係兩個罕有、但有可能攞命嘅副作用：
1）子宮內膜生癌：5000個有1個，早發現係有得醫嘅。
2）靜脈血管有血塊塞住：外國人多，中國人唔常見，終於可以大大聲講「我是／我愛中國人」而唔怕比人批鬥。
其他相對小兒科嘅副作用包括：潮熱、經期亂、陰道分秘增加、畸胎。因為經期亂加畸胎加唔用得避孕藥呢3個因素，如果冇諗住要小朋友嘅話，避孕最好用安全套，唔好靠計安全期。
雖然冇得揀一定要食舊藥，但你都可以選擇：
1）唔食藥
2）食5年
3）食10年
「咦？可以唔食藥咁好？」
一般情況醫生都唔會咁建議，始終後生所有乳癌治療都做足晒最好。
「咁咩情況會揀唔食藥？」
主要都係病友唔接受／驚罕有但可能致命嘅副作用，其實乳癌抗荷爾蒙藥嘅效用（救命）一定遠超過副作用（攞命），所以唔洗驚。
另一方面，就係D想生BB嘅女性就會咁揀，因為怕舊藥Tamoxifen搞到畸胎。
「咁如果我肯食藥，應該揀5年定10年好D呢？」
傳統以前就不嬲就食開5年，所以你見好多病友／網頁／甚至唔熟嘅醫生都叫你食5年。
但係2013年3月喺國際醫學權威期刊The Lancet，出咗篇劃時代嘅研究ATLAS Trial（http://www.ncbi.nlm.nih.gov/pubmed/23219286），證明到食10年舊藥係好過食5年。另一大型研究aTTom trial亦都有同一樣結論，所以係可見嘅將來，10年舊藥將會取締5年成為新標準，尤其係乳癌好惡嗰D病友。
另外仲有一樣野要留意，就係食舊藥Tamoxifen時要戒口（SSRI嘅抗抑鬱藥／西柚，詳見乳癌食療及食物禁忌 － 戒食雞？戒豆漿？）
中年更年期嘅你
更年期即係就黎收經，收咗經，自然多一個選擇，可以揀新藥AI。
「新藥AI有咩副作用？」
有部分病友會覺得骨痛，尤其係第一個月同埋手指D細關節，之後食慣咗會好D。另外AI會導致骨質疏鬆。
「我見有3隻AI（Femara／Aromasin／Arimidex），佢地有咩分別？」
主要在於唔同生產商，個個都話自己好過人，你見3隻分庭抗禮，冇一隻做到「AI霸權」就知臨床冇大分別。有D病友總覺得人地嗰隻好D／冇咁骨痛，純粹「老公更係人地嘅好」心理作用居多。
通常正廠藥大概$1300－$1800蚊度一個月，不過Femara過咗專利，有代用品副廠藥$140蚊一個月，想慳錢係一個好選擇。
（2016年1月更新：Femara過了專利權已經再次大降價，副廠藥現價為＄1一粒，即最平頭兩年每月＄30）
多咗一隻藥，咁選擇上除在上面「後生未收經嘅你」嗰3個之外，多咗一款轉藥／混合食法「先食舊藥Tamoxifen，直到停經，之後就轉AI，食夠5年為止」
「咁邊個食法好？」
臨床有證據證明轉藥／混合食法好過5年舊藥。正正因為呢個原因，所以公立醫院AI第三年開始免費。好多病人都問點解唔係一開始免費，因為香港政府諗縮數得黎，又想宣傳佢守護生命的故事。
「咁轉藥食法好D定10年舊藥好D呢？」
冇人知。因為10年舊藥係新食法，同轉藥食法冇臨床比拼研究，所以冇人答到你，不過一般聽落去都係5年轉藥食法吸引D啦，食少5年喎。
已收經嘅你
一開始已經收咗經嘅你，又多一個選擇，就係一開始就食新藥AI5年。
「咁今次又邊個好D呢？」
5年新藥AI好過5年舊藥，主要少D復發，不過命仔冇再長D。
5年新藥對轉藥食法／10年舊藥，又係冇證據冇人知邊個好，不過5年新藥頭2年藥費要自己比錢（$1000×12個月x2年＝$24000），對於手頭唔係特別鬆嘅病人，錢係一個重要因素。（＄30×12個月x2年＝＄720），而家副廠藥價錢已經好親民，錢已經唔係一個重要因素。
揀啱適合自己嘅計畫，乖乖咁日日keep住食，幾年好快過。
已完成乳癌治療嘅你
唔經唔覺我地一齊走過咗人生最黑暗嘅日子，由發覺自己有事，到搵乳癌醫生，做乳癌檢查三步曲，確診要接受治療，做人生第一次手術，谷鬼氣咁同保險公司周旋，好難捱咁捱過化療加標靶治療，當然唔會忘記日日返醫院攰到死嘅電療日子，同埋食足幾年嘅抗荷爾蒙藥。
恭喜你！！你同屋企人終於可以過返D正常日子，而我www.breasthk.com呢度亦都冇爛尾。Breast HK? Best in Hong Kong！從而Bless Hong Kong。我地一齊Keep住呢份無私嘅互助精神啦，香港人～
既然已經講晒乳癌治療五大主力，都係時候幫你由你嘅角度歸納一吓，我會開一個新嘅系列「乳癌治療攻略」：進一步幫你諗埋作戰大綱，一於看圖識字／按圖索驥，睇住自己第幾期，就知條路要點行落去，以後唔洗再怕「有乳癌怎麼辦？」
香港乳癌及乳病治療中心 
Breast HK，真係十分十分多謝你無私地用你的時間趣味輕鬆地把這個”可怕”的乳癌清楚地一步一步地”告訴”我們，又容許我們發問，輕鬆多了！不過 hope for the best prepare for the worst, 想問復發或轉移咁又點呢？
Kay Lai，好多謝你一路嘅支持。我一直都冇講乳癌復發／轉移，因為呢D話題從來都唔輕鬆。我覺得breasthk.com呢個網上嘅小小角落，應該要為患者／家人帶來陽光與希望。你呢個要求我一定會記在心中，如果我第時諗到點樣將正能量帶比復發／轉移患者，一定會再同大家分享。
謝謝你，Breast HK！剛剛才認識你這個網址，今天已經急不及待一口氣閱讀你所寫的。你真是一個上醫，感謝介紹你給我的病友! 你以深入淺出、幽默風趣的手法，細心地講解所有關於乳癌的一切，真的造福大眾！雖然我已經過了這個階段，但我還是獲益良多, 並會極力推介給後來的不幸者，有你的指引解釋，她們有福了！
我在2012年確診乳癌並擴散到T3骨做完手術，化療同電療食緊荷爾蒙藥(Tamoxifen)，但在去年9月又在T10骨復發再做了12次電療，在今個月16號回醫院覆診時醫生對我說我的驗血報告指數未到更年期食唔到新藥，她說為有做手術切除卵巢或做電療，但電療只得7成成功率，因我不想再做手術和電療，請問是否一定要做這個手術和電療，除新藥外可否還有其它荷爾蒙藥或暫時都可以食住Tamoxifen
希望你能解答到我的問題 謝謝！
唔想做手術／電療去抑制卵巢，可以每個月打停經針Zoladex 代替。
Tamoxifen 同新藥之外，仲有第四代抗荷爾蒙針Faslodex可選擇。
以上只係説明比你聽就你的提問仲有其他選擇，唔代表一定啱你用，詳情同自己醫生商量。
每月打停經針要打多少針至抑制到卵巢會有副作用嗎？打完是否可以食到新藥，停經針和第四代抗荷爾蒙針是否要自費好貴？這兩種針是在政府醫院可打到
打完第一針三個星期內，身體女性荷爾蒙會跌至收經後女士的水平。
副作用主要係類似更年期病徵（潮熱，心情唔好，下陰乾涸，性慾下降，體重上升，皮膚變差，骨質疏鬆）
打完可以轉食新藥。
Zoladex 千二，Faslodex 六千四。政府有得打，不過要自費。
多謝你，等待你再同我們分享烏雲後的silver lining – 如果有！
Breast HK
我食舊藥Tamoxifen 食咗2年幾上個月覆診時醫生話我的驗血報告未到更年期食唔到新藥，他們話可以做手術切除卵巢或做電療提早更年期，我有以下的問題：1:請問做電療是否會影響腸臟膀胱會有肚瀉，腸塞，出血，尿頻等情況出現. 2:電療是否一定成功抑制卵巢和電療後都要再驗血至知可否食到新藥，3: 做完手術是否即刻食新藥不須要驗血
1）有可能。
2）大部分都成功，當然意味有失敗，所以要再驗血。
3）直接食新藥。
Breast HK，我食緊Femara,如果經濟許可，是否食原廠藥好啲？
客觀地講應該冇分別，主要成份過咗專利後又唔係咩高科技野，應該好多廠都做到（好似山寨手機咁）。
原廠實話副廠有雜質，副廠又會話自己冇分別／性價比高。
如果經濟許可，我會覺原廠係好啲，起碼心理上好D，呢D我地叫placebo effect（安慰劑效應）。同一支紅酒，7－11賣$50，酒莊賣$5000，你實話酒莊嗰支好飲D，7－11嗰支叫「苦」，酒莊嗰支叫「醇」。
原廠貴藥，食完心理上都覺癌細胞死快D。
我終於買了原廠Femara,食了四個月，最近醫生話我可考慮Aimidex,因供應是原廠。想請教你我應否轉藥？我2011年12月開始食Femara, 公立醫院覆診，其實開始食時都很多副作用，骨痛無力，現在好多了。照我所知，AI有兩組，Femara & Arimidex 是同一組，轉藥應該沒大問題，對嗎？
Femara 同 Arimidex 屬同一組，所以咁轉冇問題，但同一時間，功效上亦都冇分別。轉定唔轉，純屬個人喜好。
如果Femara產生抗藥性是否也不可考慮用Arimidex? 因我想留住多一隻藥做後備。
非常非常少咁轉，就算咁轉都係冇咩用多。
如果Femara衰咗，視乎之前用過咩野荷爾蒙治療，後備方案可以咁轉：
1）Tamoxifen
2）Aromasin
3）Aromasin + everolimus
4）Aromasin + Faslodex
5）Faslodex
當我知道女友乳房有腫瘤，當然即時上網睇多d相關資料。睇左眾多網頁，Breast HK這個網頁必定是我的首選，資料詳盡，深入淺出。到得到化驗報告後，得知女友腫瘤是惡性的，更需惡補更多深入性資料，這個網頁便是我的寶庫。在此感激Breast HK不辭勞苦，這種無私奉獻的精神，更是我們香港人尊敬的。雖然女友嘅治療日子漫長，我們也有信心共同渡過；在此萬分感激。
你係第一個男性朋友喺度留言嘅，如果你女朋友見到你零晨5點幾都喺度為佢身體健康而著緊，路雖苦，心亦甜。順祝你地身體健康，治療一切順利。
Breast HK，會唔會考慮寫下完成治療後，要定時做咩檢查？做幾密等等
好提議，不日推出。
tks! 其實係因為睇完香港權威張醫生既書而有呢個諗法… (以下有小小踩場不過我估你唔mind 😛 ) 佢認為除左年年要做既造影, 其他內臟亦要檢測, 包括肝、肺和骨:每年做X光照肺+用超聲波睇上腹腔+要驗CA15.3指數. 好想知你點睇?
首先，我呢度係唔介意你引用其他醫生嘅建議嘅，因為真理只有越辯越明，原則係理性有建設性咁討論／唔可以詆毀別人。
另外，張淑儀醫生係一個我非常尊敬嘅醫生，佢無論喺點醫乳癌／點做乳房手術／點做一個好醫生方面都教識我好多野，所以以下睇法實無對張醫生不敬之意。
你問我點睇醫好乳癌後點跟進？我只可以答你公立醫院資源有限，所有野除咗要有根有據之外，最好就乎合經濟效益（cost-efficient），所以我地通常跟外國指引做法。人地指引係會定期更新，所有檢查都要有證據支持（evidence-based）有效先會建議做。
其中最權威嘅就係ASCO同埋NCCN guideline。
American Society of Clinical Oncology (ASCO) Guideline 全文
https://ascopubs.org/doi/pdfdirect/10.1200/JCO.2012.45.9859
ASCO guideline 截圖：
https://www.breasthk.com/wp-content/uploads/2014/04/ASCO.png
你可以見到人地係唔建議（not recommended）定期做抽癌指數／照肺／照肝／照骨嘅。因為冇證據話咁樣有效早D發現有復發，從而可以長命D。
National Comprehensive Cancer Network (NCCN) Guideline
https://www.breasthk.com/wp-content/uploads/2014/04/NCCN.png
另一個NCCN guideline 就冇建議要做以上檢查。
所以公立醫院係有限資源之下，以上檢查（除左有D部門會抽癌指數之外）一概不做。
不過guideline唔一定啱晒，因為新證據可以隨時出現。再者，每個醫生都會根據個人經驗去決定跟定唔跟指引。張醫生有這樣建議，因為她緊張病人，喺私人市場資源相對豐富嘅情況下，當然寧枉無縱，總好過掉以輕心。對於病人黎講，要顧慮嘅就係費用問題，同埋假陽性（false positive）時虛驚一場。點樣取捨，真係因人而異。
嘩！好詳盡！多謝你呀醫生，我會好好考慮下應該幫媽咪安排做咩檢查架喇。
如果早d 知道呢個網頁就好 …..
我媽咪係第二期，睇公立醫生話做 6針化療，但係佢 打完第一針後 肝酵素 升得好緊要 ,要 休息 大約一個月先至打第二針 , 打完第二針 肝酵素又係升得好緊要 , 個 醫生建議 我媽咪 唔好打，話會損壞肝腎功能，同療程之間隔太耐 打左等如冇乜用，跟住 叫佢電療 , 我地接受左呢個建議。 後尾我地去睇一個私家醫生，佢話就算隔咁耐都要完成化療。
現在我每天都很後悔，是否做錯決定，還是公立醫院資源太緊拙，想快d close file 就算 , 好似搞到唔嗲唔吊咁。之前同媽咪去公立醫院腫瘤科覆診，每次都睇見大堂都坐滿了人，心情真係好沉重。但願大家都身體健康。
好難評論當時實際情況，因為太多資料欠缺。係咩都唔知嘅情況下，貿貿然評論誰對誰錯，對任何一方都唔公平。再加上，事後孔明批評別人，總比當時做建設性建議易得多。所以以下好多野都係靠估，主要想令你了解多D事實，從而解開自己係咪做錯決定嘅鬱結。
化療期間肝酵素上升，最常見有3個原因：
1）中藥（包括所有藥材）。病人好多時都用中藥／湯水補身，而冇話比醫生知。
2）急性乙型肝炎。一般化療前都有驗乙型肝炎狀況，有帶病毒就要食定抗乙型肝炎藥。
3）Taxane紫杉醇化療。佢相比起其他化療，仲易搞到肝酵素上升。
你媽咪第二期打得6針化療，通常係FECx6或者FECx3＋TTx3（2個方案頭3針都係一樣）。如果排除咗以上3個因素，打FEC肝酵素都升得好利害嘅話，真係好難繼續落去，轉藥都冇咩用，因為我地知道Taxane紫杉醇仲易搞到肝酵素上升。
另外療程密度係會影響治療效果嘅，所以其他病友嘅乳癌惡，醫生係會進取D兩星期一針（正常三星期一針）。另外你見其他病友好介意延期「留班」（雖然最終都係打咁多針㗎喇），其中一個原因就係咁解（佢地唔想影響治療效果）。
公立醫院資源係好緊拙，不過我傾向相信世界係美好嘅，大部分醫生都係為病人福祉著想，唔會因為非病人原因而貿然提早中止化療（要懶就一開始叫你唔好打，兩針都慳埋添）。
你每次都陪媽咪覆診，所做嘅決定又係跟當時醫生指示，姑勿論結果如何，你都冇做錯到，冇害到媽咪。相反，佢有你陪佢行呢段路，著實幸福。
十分感激，咁快就已經詳盡地回覆我!!
因開頭連做唔做化療，對我媽咪黎講已經係個問題，佢驚頂唔順，結果叫醫生開d 好d 既止嘔藥，都冇乜嘔，只係訓左好耐覺。
一直擔心，冇完成化療 同完成化療 ，個治療效果係唔同。現在什麼都改變唔到，唯有向前望啦 ! 最後好多謝你咁用心整左呢個網站！
Breast HK 你好! 首先真係好感激你無私的詳盡講解, 有時睇醫生都唔識點樣問, 而家起碼知道有乜嘢要提出.
我係第二期 (2B) 患者, 已經做左全乳切除手術, 化療完成左 Taxol x 12 同埋 FEC x 3. 因為淋巴有2粒擴散, 同埋算後生 (35歲) , 醫生建議我做15次電療, 之後再食5-10年 Tamoxifen.
我打左 Taxol 一個月之後已開始停經了, 一直都冇再來. 我想知食 Tamoxifen 係咪仍然會停經? 有停經同埋冇停經會唔會影響引致子宮內膜癌的機會? 其實我做化療/ 電療都唔驚, 最驚係因為食藥又再引致其他癌病呀!
Tamoxifen本身唔會停經，不過有D病友會經期亂。不過你之後一兩年都可能繼續冇經期黎，主要係化療令卵巢冬眠未醒返。
「停唔停經」同「Tamoxifen有可能引起子宮內膜癌的機會」係冇關係嘅。風險其實唔大，我地quote 0.02%，即係5000個病友食先有一個出事。
明白了, 謝謝你的回覆. 我開始放心了!
Breast HK,
我34歲, 本身係(3A)期乳癌,已完成化療電療同全乳加淋巴切除，係化療第二針時已停經，直到現在都未有番。我本身食緊Tamoxifen，但知新藥AI會比較有效不會令病復發，我想問可否轉食AI藥呢？若有天經期有番我又可否打停經針，KEEP住食AI藥？
34歲化療後只係假收經，唔可以轉食AI。
我食左tamoxifen約一個月，呢2,3天覺得腰背痛得好緊要, 想問會否有關？
另外，食抗荷爾蒙藥會否較易有骨質疏鬆呢？
背痛同Tamoxifen冇關。
食AI係會骨質疏鬆，食Tamoxifen相反增加骨質密度。
想問下食tamoxifen 會唔會有脫髮嘅副作用？
唔會。
本人47歳，乳癌一期，抽了兩粒前哨淋巴冇擴散。完成放療後，現在吃了半年Tamoxifen, 婦科檢查後發現子宮多發性肌瘤，最大的有9cm，又有卵巢囊腫，婦科醫生建議切除子宮和卵巢。請問醫生1. 我可否只切除子宮而保留卵巢？ 2. 若全切後我是否繼續吃Tamoxifen？定要轉藥？謝謝你回覆！
1）可唔可以保留卵巢要是視乎臨床覺得佢係乜，呢個要問返自己婦科醫生。
2）如果切咗卵巢，可以選擇繼續食Tamoxifen，或者轉AI。
Breast HK,真係好多謝你多年來幽默又無私地解答丶撐住我哋。
我從化療－手術－電療－標靶到吃了2年的Tamoxifen，52歲停經3年，現剛開始吃Femara，請問可否吃含有SSRI嘅藥呢？
一路走來，始終有你的支持，感覺真好。
Take care!
SSRI唔影響Femara，可以放心食。
Breast HK, Thank you so much indeed.
Breast HK,對不起我表達錯誤，想說的是吃Femara可不可以吃Estazolam呢？
謝謝你寶貴的時間。
可以食，冇問題。
Breast HK, 再次多謝醫生，宇宙神級別快速的回覆。
醫生你好，我媽媽今年58歲，兩年幾前確診乳癌一期，她當時做左全乳切除手術，之後打左四支紅針(化療)，18支HERCEPTIN(標靶)，食左兩年TAMOXIFEN，上星期覆診，醫生問我地轉唔轉新藥(AI)好，我媽媽的子宮同卵巢於8年前已經切除，所以TAMOXIFEN的副作用–>子宮內膜增厚就唔關我媽媽事，但媽媽又怕食新藥(AI)會骨痛同骨質疏鬆，所以我地想問下醫生你的意見，因為主診醫生都無咩意見比到我地，淨係叫我地自己決定！謝謝！
成效上轉AI好過唔轉，主要係睇佢肯唔肯接受AI可能的副作用。
謝謝醫生的快速回覆。
我亦聽過另一個說法，現在食住舊藥，到touchwood復發時都有新藥AI可以食，想知醫生你的意見，謝謝！
我唔buy呢個說法，呢度牽涉一個「預防vs治療」的概念。
打個比喻，汽車保養，有兩種車主：
1）比錢定期返廠保養，唔希望架車會壞。（預防）
2）慳錢唔做保養，希望留返D錢可以架車壞咗時有錢整。（治療）
你會點揀？我希望架車從來冇壞。
身體保養，有兩種病人：
1）轉藥，唔希望復發。（預防）
2）忍住唔轉藥住，希望第時復發可以有藥可用。（治療）
你會點揀？你識揀嘅。
咁又係，正所謂預防勝於治療。
如果轉新藥AI的話，醫生有無一些數據關於會出現骨痛/骨質疏鬆的機會率可以分享下？謝謝您！
數據係死嘅，人人反應唔同，太執著數據冇咩意思。
我去年9月確診乳癌2B, 已完成化療及電療，4月底開始食賀爾蒙藥Lerrozole-Teva 2.5mg, 最近發覺手前臂及膊頭位置毛孔粗大，毛亦較長，懷疑是賀爾蒙藥影響，有可能嗎？
唔關事。
chan oct27.我11年乳癌做了手術化療4針,因未收經食左tamoxifen5年,醫生話可以轉新葯,但我做左骨質梳鬆驗查,結果已經輕度,我想如果轉食femara不出一年應該會有骨質梳鬆,我是否吾應該轉葯,我好容易胃痛所以怕食骨質梳鬆葯,想問下意見
如果有顧慮，咪繼續食Tamoxifen。
你好，我係原位癌，8月尾做全乳切除手術，10月起食tamoxiten, 刚做超聱波.，子宫膜由7月份0.28cm增到0.81cm, 在2個月內增厚了0.53cm, 想停止食藥，請問好嗎？ 好驚有子宮膜癌.
幾多歲？收經未？
56歲，己停經3年以上，每年都有檢查，子宮膜由0.4, 0.3, 今年7月為0.28cm, 還有子宮肌瘤由7cm 縮细為6cm, 但吃藥後也回到7cm，增大了1cm, 婦科医生都話咁短時間增長咁快，少見。所以才想停藥。
8mm係厚，真係怕的話可以停藥。
謝謝意見。想問停藥後，子宮膜會變薄D嗎？子宫膜會樣經期流血一樣流出体外嗎？
要視乎厚咗嗰D係咩黎，冇得估。
chan 2016年十月覆診轉食左femara, 抽血驗左荷爾蒙話都可以轉, 巳經食左幾個月,最近幾天有子宮位置好聚,似以前經期黎前的感覺,醫生話如果經期又出現既就要反去覆診,想問下都食左幾個月有無機會經期出現反,我十五號至覆診,如果經期真係黎係咪停葯定食反tamoxiten,咁到時醫生會再試另一的A1葯定當我未收經食反舊葯?thanks
如果真係黎返經期就要食返Tamoxifen。
醫生你好
我30歲 已做全乳切，Stage 1, ER&PR+, Her2 -ve
已打T針x4, 而家要決定做邊款荷爾蒙治療
政府醫生問過我生育傾向，咁我都想係唔影響病情下，有機會我都想要小朋友，所以醫生俾左3款我揀，想請問你意見
1. Temofixen 5年
2. 停經針 Zoladex 3年
3. 停經針 Zoladex + Femara 3年
感謝！
我會揀1，雖然傾向食10年，不過考慮到你想生育，食5年都OK。2的選擇成效相約打第一代化療，既然已打，就唔再考慮。3的選擇冇大型數據支持成效，好大程度上靠推測，所以唔係首選。
多謝你咁快回覆
另外我5月4號已完成最後一針T, 但醫生俾下個期我係6月6號先再覆診，隔左超過一個月先開始荷爾蒙治癒ok嗎？Thanks!!
而家已經係23號，6月6號都OK啦，去私家都快唔到幾多。
Hello! 本人38歳，之前抽針話良性，CT 話有可疑，之後聽醫生建議做右乳局部切除術(3點，9點），cross section frozen 話良性，點知final tissue 話係低度原位癌，約0.3cm）㚈科及oncology 醫生都說whole right breast RT已ok，無須食葯，已於5月尾做完30次RT，以為已告一段落。近日返外科醫生覆診，他說要test hormones受體，看是否須食藥。整過程如坐過山車。亦有説早期原位癌亦未必能check 到，究竟我check 的效益有幾大。對我的副作用會否超越益處？big thx!
Check 嘅效益唔太大，3mm 低度原位癌已經係最好最細類別，食藥效益預比其他人細。詳情參閱乳癌零期治療攻略－原位癌有咩咁特別？。
您好Breast HK E生, 首先謝謝你, 你的資料, 真係令我心安好多, 由確療到手術後, 一路看著其他同行者的情況, 令我更了解自己情況.
由於我居於外國, 報告是法文, 但我不想改了原文而令意思有所出入誤會, 所以我依文寫上情形, 我相信你會明白意思, 希望你能給我一點意見.
Carcinome invasif NST grade de histopronostique 2 selon Elston & Ellis (3+2/3+1) avec différenciation neuroendocrine(90% du volume total de la masse tumorale)
– mesurant 3,3 cm
– associé à des foyers de carcinome is siut (DCIS) de grade intermédiaire avec un petit foyer de nécrose
– avec quelques images de lymphangite carcinomateuse
– sans signes d’infiltration périnerveuse mis en évidence
Récepteurs hormonaux
– ER: 90%, modérément à fortement positif.
– PR: 95% foretment positif.
– Ki67 (MIB-1): Hétérogène entre 10 et 20%
– HER-2: non amplifié
Classification TNM selon OMS 8ème édition 2017: pT2(3,3 cm), pTn0 (0/4) (sn-) (i-), pL1, pPn0, R0, pTis (DCIS associé).
我今年44歲, 上年曾做過一次IVF, 不成功, 也沒有再做第二次, 睇完你的資料後, 我想這兩者應該昰有關係, 因為我剛接受IVF前, 做過婦科檢查, 雖然只是E生係咁意用手檢查乳房, 但也不致於一年內長得這樣快. 手術完成了, 現在我婦科E生會transfer我到另一個腫瘤科E生跟進其他療程.
我記得我手術後睇報告時E生說, 手術切得好好, 淋巴也沒有驗出有癌細胞, 我問佢我係屬於什麼癌, 佢就話係Canalaire, 根據size 3,3 cm, 期數是二期, 然後就話其他都係E學上的名詞, 意思即係你問完都唔明. 連報告副本都無比我 (因為我曾經在確療時問過佢攞報告副本, 佢婉拒了). 最後過左一日, 我唸唸吓都係唔對路, 返去再三問, 佢先肯比.
我的問題是, 究竟我屬於原位癌, 還是入侵性二期(Stage IIA)呢? 我腫瘤是3,3 cm , 淋巴4粒無事, 屬T2N0M0, 但報告裏又寫著 Carcinome invasif NST grade histopronostique 2, 也有寫是pTis (DCIS).
下星期就會見腫瘤科E生, 我了解更多我的病情, 就能更幫到自己做下一步.
Thanks in advance your reply.
第二期A，有侵蝕性癌就唔洗理原位癌嗰部份。
多謝BreastHk 醫生無私既提供咁詳盡既資訊為我地解惑同解答我地既問題。 想請教醫生本人29歲乳癌1期，her2+ ， ER+。 醫生建議打停經針食新藥仲要食10年， 如果咁長期打停經針係唔係會使卵巢無法恢復？（本人在化療時已打左6支） 我擔心副作用大過佢既效益同影響生活品質咁又係唔係值得。many thanks !!!!!!??♀️
一期通常唔會建議停經針。
醫生，您好，感謝您們一直以來提供全面的乳癌資訊，令癌症病人減少不少不必要的疑慮及心理壓力，實在造福社群
本人亦有困擾要請教，事關今年10月底做了部分切除手術，年齡44歲，我病理報告情況是：
1。0.8 mm invasive：未到1a期
2。只有一粒前哨有事: < 0.2mm
3。ER+, Her2-
4。Ki-67: low
今天看了私家腫瘤科醫生，認為我需要接受電療（預期內）、打停經針及骨針，同時開始食AI藥，這令我十分困惑，因我連一期未到，就要打停經針？會否過於進取，而效果又不會有很大分別？
謝謝您們的專業意見???
你提供的資料T1miN0(i+)已經係第一期A。不過我同意你個情況冇需要停經針。
吃了2年Tamoxin, 因有新擴散，醫生要轉吃Letrozole,
請問如這隻藥控制唔到，仲有無賀爾蒙藥是免費？這隻藥大约可以控制多久？謝谢你的寶貴時間。
其他荷爾蒙藥沒有免費的。好難講實控制幾耐，你預第一個目標為一年。
感謝醫生解答，請問如letrozole 抗藥，接著用那隻藥？費用多少？如quit 咗份工？身體多休息會不會好些？但又擔心無錢食藥，因骨針已需要錢，非常苦惱！
之後用Aromasin （千幾一個月），或者Faslodex（六千幾一個月）。
Quit唔quit份工對癌症控制其實冇乜幫助，不過「多休息」呢個建議又永遠唔會錯。
非常非常感激醫生解答，對我非常有用，祝生活愉快，心想事成*^O^*
Hi 醫生
我今年36歲，her2 positive, Er PR positive, grade 3, ki67, 65%, 1.6cm , 3粒淋巴抗散，T1N1, 剛化完6針TCH, 會開始電療，建議我食tamoxifen on top 打埋停經針，其實我病情需唔需要咁做？定一路keep 住食藥就可以？有無其他choice?唔該晒，thanks a lot !
3粒淋巴擴散打埋停經針係好選擇。
明白，唔該晒! 其實打停經針要打幾耐打幾多次先夠？同埋個人係咪老得快啲架？
5年，老得有幾快呢D野好個人。
Thanks, doc, 問埋最後一條問題，因我就快照thorax, 大唔大機會照到咁就返法？係咪會照埋個肺架，因術前嘅petscan 照到有幾粒細過0.5cm 嘅結節喺肺所以好擔心好驚!
最後多謝你造呢個網站出唻，睇完真係幫到我好多, thanks again!!!
Thorax即係照肺，冇得估。
Thanks~~~
你好，唔好意又有問題請教你
我35歲，3+ 乳癌，私家叫我食荷爾蒙藥加打停經針，而政府又話打唔打都得，可否給我一點意見？謝謝你！
咁個人化的建議，未見過你，唔想胡亂回答，差之毫釐繆之千里。
請問醫生 我在公立醫院 醫生開的藥名稱是LETROZOLE TABLET , 請問這 藥 是新藥嗎？
對。
醫生你好，tdm1的藥會有什麼副作用
常見的就有：易累、作悶、肌肉骨痛、血小板低、頭痛、便秘、肝酵素高。
不常見但嚴重的就有：傷心臟、傷肝、肺病。
醫生你好, 多謝你的用心寫左咁多資料俾我哋參考.
我今年37歲, 乳癌一期, 腫瘤0.2cm, ER+/PR+, cerB2-, Ki67 30%
我在私院做左部份切除手術, 私家醫生建議我食五年Tamoxifen,
但政府醫院就建議我唔需要食藥, 如果想食藥就有兩個選擇,
1. 食五年Tamoxifen
2. 打2年Zloadex
請問醫生你有什麼建議, 本人沒有生育的打算
我會食10年Tamoxifen。
多謝你的建議
您好醫生，我除了每月打xgeva, 每日要吃Letrozole, 近期醫生建議加埋CDK4/6抑制劑會好些，以下問題，
~ CDK4/6 實在價錢在是多少？有無資助？聽聞好貴，驚負擔唔到，唔食和食有什麼好處？如果暫時借埋錢都食唔到，會不會等到指數過咗標準才食？到時有無效？
~ 如吃此藥，Xgeva 是不是可以繼續打？因打骨針已2年半，近期覆診，醫生問我繼唔繼續打？如唔打，癌細胞會不會更活躍侵食D骨？好擔心會癱！
~ 我知Xgeva 好似唔可以長期打，需不需要轉吊針個隻Zemeta？
麻煩晒，勞煩你解答。
三萬幾一個月。有部份資助，可以去聖雅各福群會問問。
食就可以控制個病耐D，不過唔建議借錢去食。
佢同Xgeva冇關係，亦都冇話轉zometa就可以少D副作用。
你好醫生，我吃了半年Femara，(之前兩年是吃Tamoxifen)，現在手指關節開始痛，用交剪時拇指感覺痛。背部有時感到痛。知道手指運動可減少痛楚。知道這是吃藥的副作用。請問醫生，這痛是因為骨質流失嗎？會越來越嚴重嗎？我可以减小吃這藥的分量嗎？例如兩天才吃一粒。(醫生有開鈣片比我)。又一次謝謝你的解答。
呢D痛唔係骨質流失的表現，會唔會越來越嚴重就要放長雙眼睇。
藥的份量得一個標準，唔可以減。
Dear breat hk,
想問下Ki 67 指數點為知算高？
想補充係三期 荷爾蒙管道b型
Thanks 🙏🏻
大過16%為高，12-16%踩界。
想請教你我現在３５， 打了停經針食ＡＩ藥， 你覺得效果如何？ 我是２Ｂ期， ３＋。 謝謝你。
都係一個好選擇。
你好, 我想問下做左全乳房手術(右邊), age 65, 醫生話係二期, 無擴散到淋巴,醫生叫我食賀爾蒙葯, 但我驚有副作用, 請問唔食葯可以嗎?
正面作用遠遠大過副作用。
咁佢叫我再打埋補骨針, 咁補骨針又有無副作用呢?
好少，1%顎骨骨枯。
請問打補骨針, 會發燒嗎?如果剩係食femara, 可以嘛?
不會發燒。剩食femara，無上文下理比唔到意見。
因為姑娘打黎話要打返枝補骨針和要食femara, 呢度都有一些駛費, 如果轉去政府, 係咪無補骨針打?
如果只食femara,不打補骨針, 是不是一樣也控制病情?謝謝你…
政府都有骨針打。
要視乎咩原因打骨針。
請問,手頭上的femara 差不多食完, 請問可以在哪裡配葯?還是一定要回私家診所看完醫生先有得配?約左政府期, 但要等多幾星期….
有醫生紙就可以出去藥房配藥。
我今年70歲 ，今年五月做了手術,發現有乳腺管原位癌(intermediate grade), ER+ strong,瘤腫8mm，已做保乳手術及電療
我已知吃藥有副作用,但我已做了全子宮切除手術, 另外我的家姐也有乳癌
私家腫瘤科叫我服五年tamoxifen,但公立腫瘤科説我不用吃，因吃藥,只是預防，對我作用不大及他們會繼續跟進。
我不明白私家説可預防40～50%復發 ,而政府卻説對我作用不大。
為什麼政府說作用不大？
我應不應該吃藥?
謝謝
為什麼政府說作用不大，因為作用真的不大，並沒有私家說的那麼神奇，你的情況藥物並不能延長壽命（因為已經好好）。
唔洗食。
本人在2011年做了乳癌完全切除手術。本人今年(2019_Aug) 51歲2個月，15th Aug 2019公立醫院醫生要我做切除卵巢手術，因要配合服用停經後的荷爾蒙抑制藥，這樣就不用花錢打停經針，本人質疑大多數女性會在52歲左右自然收經，是否有必要為省錢（不打停經針）急於做切除卵巢手術？公立醫院醫生好壞都擠著無可揀！本人在此查詢，請及早回覆！謝謝！
要視乎咩原因手術8年後突然要抑制卵巢，同埋自己對錢同手術的睇法。
你好呀！本人32歲，1.5×1.8 cm, 局部切除，er+ , her2+ , ki 24%, 已經完成6針化療，電療，重打緊herceptine + 食緊tamoxifen。外科醫生建議完成治療後打兩年停經針預防兩年復發高危期，但腫瘤科醫生就話可打可唔打，想問咁嘅情況打定唔打嘅好處更多呢？thxxxxx!!
淋巴有冇感染？現在有冇經期？
5粒前哨淋巴都無事，經期自從1月尾打第二次化療後到而家都未黎，醫生講過我係er強陽性，咁係咪吾黎經係好事？thxxx!
補充：1.5×1.8旁邊都發現有少少原位癌，手術過程中都切除左
不需要打停經針。
吾該哂你！我都好怕打停經針再有副作用，因為而家食藥已經不斷潮熱，而且面毛，手毛出得好濃密,是否都係正常反應?
潮熱正常，出毛唔關事。
馬醫生, 媽媽自2019年7月開始食緊AI藥, 上星期去了照骨質:- Lumbar T-score -2.2, Hip T-score -2.6, 想問下是否去見骨科跟進? 是否可以打骨針?
不用見骨科。要打骨針。
明白, 謝謝你的回覆.
我今年34歲，1b期（一粒淋巴1mm)，ER,PR+.
政府建議10年舊藥.
我想問下出去私打停經針食AI好d定舊藥好d？
差唔多。
醫生你好，我食左一年tamoxifen（31/12/2018開始食），最近檢查醫生說內膜好厚（15毫米）、唔規則可能瘜肉、要check 下有冇野，話可以做刮宫手術要全身麻醉；（我今年43歲， 未停經， 本身有朱古力瘤 4.8cm），請問若選擇將兩邊卵巢、兩條輸卵管及子宮一併切除，有助預防乳癌復發嗎？有多大好處？或有否其他建議？感謝妳🙏🏻
唔可以籠統咁講有幾大幫助，要視乎本身乳癌期數、屬性、做咗D乜治療。
謝謝醫生，乳癌 1 期，做咗電療化療；以下為補充資料：
Left breast carcinoma;
a left breast palpable amss.
MMG/ USG 9.6.2018
-L1H 3cm FN 1.59 x 1.18 x 1.5cm palpable ovarl circumscribed heavily calcified lesion BIRADS 3 cysts up to 0.81cm
FNAC done: C5
Left wide local lumpectomy +SLND 22.6.2018
IDC Grade 3 Tumour size 14mm, LVI +ve
Anterior margin close 1mm from invasive carcinoma, other margins clear >2mm
ER 8/8 PR 8/8 C-erb B2 score 1Ki 67 40%
SLNFS negative
Formal path: microme tastasis detected 1/5 (<2mm)
切除卵巢對預防復發功效不大。
今年45歲，pT1a(m)﹐本身有類風濕關節炎。5/2019開始食tamoxifen﹐LMP 6/2020﹐可能開始收經。開始食賀爾蒙藥時因未收經只可食tamoxifen﹐想問如確定收經，有RA病歷可唔可以轉食AI? AI有無邊隻唔會影響關節痛？我見醫生寫會指關節痛。
可以轉。
隻隻都有可能影響關節痛。
馬醫生謝謝解答。如果轉AI關節痛頂唔住，係咪轉另一隻再試，最壞打算係試晒3隻都唔得就食番tamoxifen?
可以咁講。
醫生你好，親人剛剛做完右乳全切手術，病理報告如下：
-Right breast mastectomy with sentinel lymph nodes boipsy
-invasive ductal carcinoma , grade 2
– maximal tumor size 1.8cm
– focal lymphovascular permeation
– isolated tumor cluster in 1 sentinel lymph node (pN0i+)
– no skin invasion and no Paget’s disease of nipple
– clear margins
– breast cancer marker:
Estrogen receptor: positive
Progesterone receptor : positive
HER2 oncoprotein score : 0 negative
Ki67 procreation index : 2%
1.請問是否只需要食抗荷爾蒙藥？無需要電療化療、標靶藥物？
2. 抗荷爾蒙藥是否 Femara 最好？政府醫院會否提供femara? 我查過醫管局藥物名冊，有LETROZOLE，是否Femara?
3. 手術前沒有照pet scan ,現在手術是否需要去照？
4. 之後的跟進，是否每半年去照ultra sound ?
先多謝你的回覆
1）是。無需要電療化療、標靶藥物。
2）AI黎講femara最常用，但唔可以話最好，因為三隻成效同副作用相約。政府醫院有letrozole（即等同Femara，Femara係正廠藥）。
3）不用。
4）https://www.breasthk.com/follow-up/
醫生，好多謝你咁快回覆。
1）咁Femara 係正廠藥，政府用副廠藥，理論上相等，但係會唔會食返Femara 好d? 個醫生有提過Femara 係最靚嗰種，政府果d 次一級。
2）而家食緊私院femara,遲啲轉介去政府醫院食Latrozole ,會唔會有影響？
2）如果手術後吾使照pet scan ，係因為果病理報告顯示無需要？
多謝你
1）個人喜好。
2）冇影響。
3）早期冇需要照PET scan。
另外係呢個網站得到好多知識同資訊. 多謝晒
請問係你醫療中心拎Femara正廠藥，一個月嘅藥費係幾多呢？謝謝
大概2000。
吾好意思，我吾記得提及親人已經65，有骨質疏鬆，仲可唔可以食Femara?
可以，不過骨質疏鬆有風險會惡化，最好打埋骨針。
Specimen #1 right sentinel lymph nodes 1-4
Specimen #2 right sentinel lymph nodes 5-6
Follow up specimen #3 right breast
There is no tumor metastasis in the sentinel lymph nodes in the frozen section. However, deeper paraffin section in specimen (1) shows a tiny focus of tumor cluster measuring less than 0.2 mm (pN0i+). No further metastasis in all other 6 sentinel lymph nodes and 1 lymph node in the mastectomy specimen.
我仲有一個擔心位，報告話前哨淋巴有癌細胞，但外科醫生又話淋巴無擴散，吾使切。即係有擴散定無？你意見如何？甘而家只係食抗荷爾蒙藥，無電療化療，會唔會吾夠？
外科醫生話無切淋巴，係咪即係只係切左前哨淋巴？水腫會唔會發生？
多謝回覆
手術中途冰凍切片前哨淋巴見唔到癌細胞，所以冇全切淋巴。手術後複驗詳細切片見到有癌細胞，不過少於0.2mm，情況尤如冇癌細胞感染，所以當冇癌細胞咁樣去處理。
夠。
總共切咗8粒淋巴，水腫風險大概3%。
多謝醫生詳細講解同回覆。
你好啊, 家母已服舊藥Tamoxifen超過10年, 上年2020年尾照petscan後, 12月胸椎有復發跡象, 當時亦做了電療。本年2021年5月份亦照多次petscan身體無明顯腫瘤活躍跡象。最近6月初醫生開始轉新藥Letrozole 2.5mg, 服用1個月後, 開始左下腹接近卵巢/子宮位劇痛, 斷斷續續持續了一個月。現時家母睇急症後在公立醫院留院照過x光, 驗大便, 初步排除了腸胃問題。公立醫院只能出轉介信在出面私家照電腦掃描左下腹位置。
請問新藥會有影響子宮或卵巢的可能嗎?
請問公立建議照電腦掃描 而不是petscan 是最好的檢查嗎?
如果已經食了兩個月新藥, 突然轉舊藥會有不良影響或身體會失去耐藥性嗎?
家母正值危難,還望解答疑慮,感激不盡!
1）唔影響。
2）5月先照完PET scan，基本上唔會有大問題，照CT主要係安你地個心，已經足夠。
3）食緊Tamoxifen都復發，證明佢已經失效，轉舊藥已經唔係一個選擇。
感謝你解答我地這些不幸的人們
醫生你好，請問六月中做完全乳切除手術，引流管已拆，乳房傷口近腋下位置腫左一舊，有d痛，（通常副乳出現位置）比雞蛋細小小，前日醫生用針筒抽左d血水出黎，係咪正常？遲d呢舊肉會吾會消失？ thank you.
要問返做手術醫生，旁人好難判斷。
請問未收經的情況下服食新藥 letrozone ,會有反效果或副作用嗎? 謝謝
沒有效果，錯誤以為自己有用藥控制，重則復發。
請問要打停經針的話, 支針打邊度?
打肚皮。
本人今年35歲，第三期her2，er/pr positive ，已完成六針化療及雙標靶、手術（全切及重建）及電療，現需接受單標靶及荷爾蒙治療。若食十年T或五年AI後是否復發風險仍很高？十年後，我才45歲，屆時應該仍未停經，仍有荷爾蒙。如我切割卵巢是否就可免除這憂慮？
第三期本身復發風險高， 切除卵巢加AI會比較好。
醫生你好：
我52歲，今年2月乳癌四期到肝，骨都有，做化療3針D再3針D十C共6次化療，原本6月覆診開咗AI药食咗一星期，再做PET CT ，報告乳房中2.9cm縮到1.5。SUV由21.4到6.3而肝由13cm縮到6.9cm,SUV則由27.6去到7.7。所以建議再打多2次C十D。另停咗食AI,在15/7共完成8次化療，4/8覆完本安排開始食AI的，但醫生話之前無驗過荷爾蒙，話要驗咗先，確定已停經，我在病發前半年已没有來經，要8月尾覆診才决定會太遲嗎？另荷爾蒙指數多小才可食AI，其實醫生建議化療後，食AI十CDK4/6但標把药太貴，所以只選擇食AI，想問是否同時食2種會好D？
）要LH/FSH/Estradiol 三個指標都去到收經水平先可以食AI。
2）加埋CDK4/6抑制劑會好啲。
馬醫生，你好，患者28歲，1期，淋巴冇事，局部切除，做咗Oncotype DX test，只須電療，主診醫生建議除了食tamoxifen外，還可以加停經針，增加防止復發機會，請問這建議好嗎？十分多謝！
如果低危唔需要化療，加停經針亦都冇咩大幫助。
馬醫生，抱歉想了解多啲；患者 ER 和 PR 嘅 H-Score 和 Allred Score 都係 300 和 8 滿分，會不會是決定使用停經針，去增加防止復發機會嘅考慮因素？萬分感謝！
分數唔係決定用唔用停經針嘅指標，係唔係高危復發（例如淋巴有冇感染、需唔需要化療等）先係決定因素。
馬醫生，非常多謝你的寶貴時間，回答我自己推斷的問題，衷心感謝！
有無邊間私家推介 食荷爾蒙藥🙇🏻♀️🙇🏻♀️🙏🏻？
Sorry 啱啱先睇到香港乳癌及乳病治療中心
你好馬醫生, 我於2018首次確診乳腺原位癌, 當時做了右乳房局部切除及21次電療。2022年初右乳房復發, 有4粒淋巴感染, 做了淋巴切除術, 6次化療(T針)及15次電療。我現時43歲, 正服食Tamoxifen及打停經針(Goserelin), 想請問我的情況適合轉食AI新藥嗎? 謝謝
合適。
我未到更年期，要食AI同打停經藥, 打停經針嗰日係咪就可以開始食AI？唔記得係邊度聽過話打完停經針要隔一個月先至可以食A I，如果唔係會變咗好似食多仔藥咁，是嗎？謝謝醫生！
隔一至兩個月等停經針生效先食。未生效的話AI係唔能夠有效抑制女性荷爾蒙，唔關乜嘢多唔多仔藥事。
醫生您好, 請問AI是否最多食5年? 嫲嫲當年管腔B型, 目前剛好食完5年letrozole.
最多食10年。
醫生你好 我28歲 上年發現乳癌1期, luminal b型, grade2. 做完手術 化療 電療。食左nolvadex d 4個月左右. 副作用開始好嚴重，訓唔到（食stilnox都係broken sleep)，潮熱，個人長期好攰，超級抑鬱,日日都有suicidal thought. 明明之前做緊化療電療都好樂觀好正面。其實可唔可以轉食AI加停經針。請問AI係咪對情緒影響冇咁大？
可以考慮，藥物嘅野人夾人，要試吓先知。
你好！
今天食重覆咗 letrozole ，原本是每天一粒2.5mg，但攪錯了，食多一次，請問怎樣辦？
啲藥嘅安全系數好高，食多咗一次冇大問題。
BreastHK，您好！先在這裡感謝您對癌友們的慷慨！這個網站的確為我們帶來了知識和希望！
我今年47歲，在2017年確診患上乳癌二期B，her2+ ER+ PR-，當時接受了手術，8針化療和放療，及後打了一年標杷，兩年停經針和已經吃了5年Tamoxifen，直到今年二月驗血確定到達收經水平之後醫生安排我轉食AI，並建議持續食5年，請問我的情洗有必要繼續吃多5年AI碼？
還有，現在的follow up為每半年檢血和每年照一次胸腹盆的CT，這樣是否已經足夠？
選擇性，食好D嘅。
足夠，當然要每年夾胸同超聲波。
馬醫生，我今年47歲未收經，2019年確診乳癌pTla(m) ， 前哨淋巴無感染。ER+ve PR+ve ，c-erbB2 Score0， Ki67 2%。本身有類風濕關節炎，5/2019開始
食tamoxifen。請問抗荷爾蒙藥食5年還是10年好呢？HA現時有無傾向那個年期？
你個病好早期，5年都已經足夠。
Brest HK,您好！
我今年35歲，乳癌T1c2cmN1a(30粒淋巴檢測2粒淋巴前哨感染）ER+，PR+，Her-,Ki67-35%,已完成全乳切除及凍卵手術，正在化療中（DDACX4+TTx3)，現剛完成DDAC第4針，化療期間有打停經針，未來會考慮生小朋友，正在考慮荷爾蒙治療的方案：
1. Tamoxifen
2. AI +停經針（擔心會有骨質疏鬆）
未知以上兩種方案哪種會比較好或是有其他方案？感謝🙏🏻
成效就方案2比較好。
好多謝你的回覆😊😊
感謝你能閱讀大家訊息且一一回覆❤️❤️
馬醫生，你好。我今年62, 上年12月在公立醫院完成乳房部分切除手術和電療，需要服食荷爾蒙藥Femara 5年。公立醫院取的副廠藥在印度生產的，正猶疑藥物的功效。請問可以到你中心取藥嗎？價錢大藥多少？想有個預算。謝謝！
正廠Femara 大概$2100一個月。