乳癌荷爾蒙藥 － 究竟食咩藥？
醫生叫我食5年抗荷爾蒙藥，但佢比兩隻藥我揀，咩新藥舊藥咁，咁究竟我應該食咩藥？食幾耐？幾多錢？唔會好似化療咁有副作用架？今次我地研究吓「乳癌荷爾蒙藥」呢個課題⋯⋯
同乳癌手術一樣，未講有咩抗荷爾蒙藥比你揀之前，先要搞清楚你有冇資格揀。
有冇資格揀？
「吓？！資格？咩資格？我點先知自己合唔合資格？」
因為唔係所有乳癌病人都要食藥，就算要食藥都唔係隻隻抗荷爾蒙藥都啱，所以要知道三樣野，先知有咩藥啱你洗。
「咁邊三樣野？」
第一樣野要知嘅當然係你隻乳癌係咪ER＋（陽性）。唔知咩係ER＋嘅朋友，返去睇返「乳癌治療時間 － 我需要用咩方法醫？2」「乳癌荷爾蒙治療－點解我仲要食藥？」。
1. ER＋定－？
如果係ER＋（陽性），請睇落去。
如果係ER－（陰性），唔洗睇落去，因為食藥冇幫助。
「我係ER＋呀，咁第二樣野係？」
第二樣就要知道你隻乳癌係原位癌定係有侵蝕性。
2. 原位癌定侵蝕性癌？
原位癌冇得揀，只可以食舊藥Tamoxifen5年，因為冇臨床證據話新藥／10年舊藥喺原位癌有效。
（2016年1月更新：而家已經有一D新證據話新藥（AI）喺原位癌都有效預防復發，尤其係收經後及60歲以下女士可能更見優勢。呢D係一D好新嘅野，詳細問返自己醫生。）
「我係原位癌呀，但我個醫生叫我唔洗食藥喎，但你上面又話食5年舊藥，即係點呀？」
喺原位癌個情況食唔食藥，係有2派學說，我地先睇吓食咗5年舊藥Tamoxifen，15年內有咩著數先：
同一邊侵蝕性復發由9%降至6.6%。
另一邊侵蝕性復發由5%降至3.3%。
另一邊原位癌復發由2.8%降至1.6%。
存活率冇分別，都係9成人有15年命以上。
醫生話唔洗食藥，主要係佢將個重點放係存活率度，食咗藥15年都冇長命到，更係唔食啦。
醫生話要食藥，主要係佢將個重點放係復發度，減少復發理應減少擴散，理應會長命D，雖然15年覆診未證明到有分別，可能再長期D會有分別呢。
「咁Breast HK你建唔建議食呢？」
我會睇你年紀同埋態度進唔進取。
後生／進取，食。點都好過食埋D冇根據嘅健康產品／試埋D古靈精怪另類療法。
年老／保守，唔食。
另一方面，如果係侵蝕性乳癌，就一定係食好D，不過點食法就要睇第三樣野。
「咁咩係第三樣野？」
第三樣野就係你收咗經未？
3. 你收咗經未？
「收唔收經都關乳癌事？」
仲記唔記得上篇講到你要控制男人，就要扣佢零用錢，咁第一個問題姊妹要問嘅就係「你D錢邊度黎？」
醫生要控制乳癌，就要對抗女性荷爾蒙，咁第一個問題醫生要問嘅就係「你D女性荷爾蒙邊度黎？」
未收經，女性荷爾蒙主要來自卵巢。
收經後，卵巢收工，女性荷爾蒙主要來自脂肪。
「我割咗子宮冇經期喇喎～」
冇經期唔等如收經，例如有D人因為子宮肌瘤割咗子宮，但仲保留卵巢而又未到收經年齡（香港女性平均52歲收經），咁係乳癌角度就當仲未收經。
乳癌荷爾蒙藥：舊藥 vs 新藥
「咁我地知道女性荷爾蒙來源又點？同食咩藥有咩關係？」
原來口服乳癌抗荷爾蒙藥只係得4隻，分為兩類：
1）Tamoxifen 他莫昔芬－同醫生溝通時識讀就照讀英文，唔識讀都唔好講「他莫昔芬」，我幾肯定醫生「他唔識分」，就咁叫「舊藥」醫生就明㗎喇。佢主要抑制女性荷爾蒙作用，所以咩年齡都用得。
2）Aromatase Inhibitor （AI）芳香環轉胺酶抑制劑［包括Femara（Letrozole），Aromasin（Exemestane），Arimidex（Anastrozole）］－又係識讀就照讀英文，唔識讀都唔好講「芳香環轉胺酶抑制劑」，我自己試讀一次都好似鬼上身咁唔知自己噏乜，就咁叫「新藥」或者「AI」醫生就明㗎喇。佢主要抑制脂肪製造女性荷爾蒙，所以收經後嘅女性先用得。
（2016年1月更新：Femara過了專利權已經再次大降價，副廠藥現價為＄1一粒，即最平頭兩年每月＄30）
未收經，冇得揀，只可以食舊藥Tamoxifen。
收咗經，有得揀，可以揀食舊藥Tamoxifen或者新藥AI。
「如果我有得揀，究竟新藥AI好D？定係舊藥Tamoxifen好D？」
新藥好少少，主要係少D復發（8年復發率由13.4%降至10.7%），不過整體存活率冇分別。
所以由治療角度，有得揀就揀新藥AI啦。
如果冇得揀要食舊藥Tamoxifen，千祈唔好心灰，其實都係好野黎，先可以咁多年都屹立不倒，老字號嘛。
「我見有病友先食舊藥Tamoxifen一排，再轉新藥AI嘅？」
有以下幾個可能性：
1）更年期就收經：先食住舊藥Tamoxifen（通常2年），之後確定收咗經，就轉新藥AI食埋餘下年份，總共5年為止。
2）已收經想食新藥AI但唔想比錢：因為政府會全數資助尾3年新藥AI藥費，所以頭兩年就慳錢食住免費嘅舊藥Tamoxifen先。
3）已收經揀咗食舊藥Tamoxifen不過唔受得：例如敏感／有副作用。
「嘩，又新藥又舊藥又先舊後新，仲加埋又5年又10年，頭都大喇，點揀呀？」
就咁講有時都幾難明，等我得閒畫幾幅圖解釋過你聽，你就會明㗎喇。
下次「乳癌荷爾蒙藥－不同年紀嚴選最正確食法」再見⋯⋯
香港乳癌及乳病治療中心 
我收左經，食新葯，點解只可以食五年而不一直食落去以免復發？有病友說五年停葯之後就復發！
好問題！講到底，就係冇人知道新藥其實食幾耐先至係最好。
最初，當新藥AI面世嘅時候，醫生想知究竟係新藥好D？定或是舊藥好D？好自然梗係做研究對比吓咪知囉。要對比，當然要建基於公平基礎之上，嗰時舊藥Tamoxifen標準係食5年，好自然，新藥都係食5年先有得對比（情況有如烹飪比賽，中餐大廚5年經驗，你冇理由搵個西餐大廚3年／10年經驗去對比，咁樣唔公平）。自此，新藥標準都係食5年。
你問會唔會食耐D好D／甚至食足一世好D，現階段冇人知。另一方面，同一隻藥食咁耐會唔會有其他罕見副作用亦都係冇人知。咁多野唔知，最穩陣做法都係摸石過河，跟返大圍食法食5年，直至有新證據先再算。
至於有病友話5年一停藥就出事，情況有如「瞎子摸象」，我可以話比你聽，有人食緊藥未夠5年就已經出事，有人5年一停藥先出事，亦都有好大部份人5年停咗藥都冇事。個個病友期數唔同／年齡唔同／隻乳癌有幾惡又唔同，復唔復發根本就唔應該歸咎於單一因素。
多謝醫生解答。明白。我們也真是要信賴醫生要讓醫生牽着手抗癌。
我40歲。
第一、二次化療都有月經，之後就沒有月經了，是收經了？抑或化療影響沒有月經？咁適合食新藥嗎？
食乳癌荷爾蒙藥使身體沒有荷爾蒙？是不是都影響沒有月經？
當身體沒有荷爾蒙，身體機能是不是開始衰老？
你個情況係化療影響假收經，所以都係只可以食舊藥。
由乳癌／乳腺角度，舊藥係對抗女性荷爾蒙嘅作用，並唔係令身體「冇」女性荷爾蒙，所以唔會話食咗舊藥就令身體開始衰老。不過話分兩頭，佢係有可能令你經期亂／潮熱，所以有D病友覺得好似更年期咁。
Breast HK，我食了Femara 兩年幾，現在骨質疏鬆（ T score L spine -3), L2 也剛剛collapsed(L2 曾電療）正電子掃描沒有異樣，但腫瘤科醫生建議我打骨針，每四星期一次，是否真的比口服雙磷酸有效，如果要打，應該打新藥（denosumab)還是舊藥（zometa)? 我現在還繼續打標把針，經常喉嚨痛流鼻水。
你要電L2同埋而家都仲打緊標靶針，我估即係開初有骨轉移，而家打完化療控制得住。
打骨針其實唔單止好似口服雙磷酸（bisphosphonate）咁可以阻慢骨質疏鬆，佢仲可以減少因為乳癌骨轉移引致嘅併發症（骨痛／骨節／血鈣過高）。
因此我同意你嘅腫瘤科醫生建議打骨針。
Denosumab 相比起Zometa有3個好處：
1）更有效減少以上因乳癌骨轉移引致嘅併發症
2）皮下注射（subcutaneous injection），唔洗吊針（intravenous injection），對打完化療冇晒血管嘅病友尤其吸引。
3）開藥前唔洗抽血驗腎功能去教劑量
但我會建議用Zometa，因為有研究（AZURE，ABCSG-12）顯示，用AI加Zometa除咗可以減少乳癌骨轉移引致嘅併發症之外，仲可能有抗癌作用，包括可以減少復發，什至延長壽命，對收經5年以上人士尤其有效。
Denosumab因為好新，對乳癌復發／壽命有冇幫助，暫時冇呢方面資料（唔代表佢冇抗癌作用，只不過我地冇證據）。
點樣揀睇下你睇重邊方面嘅好處，另外Denosumab本身三千幾蚊針，貴Zometa千零蚊度。
多謝你，Breast HK！你講得很對，我是骨轉移。那麼zometa 和Denosumab 開始了有沒有療程？抑或好似我現在打Herceptin 一樣，看情況而定？四星期一次咁密集，副作用相對大好多，尤其是下顎骨壞死，好擔心。另外Denosumab 和Herceptin 同樣是monoclonal antibody，同時打兩樣antibodies, 我好擔心免疫力會好差！請賜教！
乳癌骨轉移之後打骨針，冇一定章法可言（尤其FDA 2011年先批Denosumab用喺乳癌，根本冇人知點打先最好）。另一方面，雖然Zometa用咗好多年，但係喺轉移病人身上應該點用，一直都缺乏大型數據去支持一個統一打法，所以就各處鄉村各處例：
1）有人一直每月打，打到冇錢／有併發症先唔打。
2）有人每月打，打到骨轉移穩定之後就慢慢疏D（例如每兩個月打，之後再每三個月打）。
3）有人跟返早期乳癌用zometa咁打（adjuvant setting － AZURE），5年內打19針（頭6針每月打，中間8針每三個月打，尾5針每半年打），之後休息（drug holiday），遲D再算。
如果你跟方案3咁打法，6年內加加埋埋有2.1%嘅人下顎骨壞死（osteonecrosis of jaw），http://www.ncbi.nlm.nih.gov/pubmed/23796998，其實Denosumab研究顯示仲多人有呢個問題。
任何Monoclonal Antibody係「理論上」都有可能令身體免疫力差咗，不過跟據我個人非科學化嘅經驗，我又唔覺我D用緊Herceptin／denosumab嘅病人會比唔用嘅病人易D病。
如果你咁驚「下顎骨壞死」同埋「免疫力差咗」，最簡單做法就係用返zometa先，等遲D研究有新發展先再算。
Breast HK，感激萬分！解釋得非常清楚到位，現在安心很多了，謝謝你！
Breast HK，因應早前十二月 L2collapse而安排了磁力共震腰骨，現在報告出了並且認為傾向癌症引起骨折（more favour metastatic collapse of L2 vertebra)，醫生現轉介脊椎骨科硏究手術的可能性。
非常擔心，欲請教問題：
1. 我現在是在政府醫院跟進，是否需要尋求其它覆檢和意見，例如私家磁力共震、腫瘤科、骨科
2. 骨科切除是唯一有效的方法？唔做後果如何？
3. 脊椎手術是大手術？一聽見脊椎手術就非常擔心
1）覆檢就唔洗，因為都肯定咗係乳癌骨轉移導致L2 collapse，冇咩爭議。腫瘤科都唔洗，因為之前已經電過，冇咩額外野可以提供。骨科呢就可以搵第二方意見，因為公立／私家各有利弊：公立傾向保守，好多時覺得唔嚴重時就話唔洗做，但到嚴重時又唔適合做，即係好多時都唔做。私家呢，就傾向進取，因為始終存在利益衝突。因此，骨科意見聽多個都冇壞，先再決定採納邊個建議。
2）骨科手術主要用途唔係切咗個乳癌轉移去，佢係用黎鞏固（fixation）嗰幾節尾龍骨，等佢唔好霖落黎壓到神經（cord compression）。如果真係壓住神經，係會下半身癱瘓。
3）脊椎手術係超大型手術，係有一定風險（最大風險就係做手術時傷到神經，術後下半身癱瘓）。雖然係咁，不過如果骨科醫生建議做手術嘅話，即係佢覺得「唔做手術」下半身癱瘓嘅機會係大過「做手術」，所以放手一搏。
醫生，換句話說我除了要處理下身癱瘓問題，還要處理L2癌細胞問題？是否要考慮轉藥？
L2骨轉移是手術後化療前發現的，正電子懷疑磁力共震肯定的，大約1cm。自從2011年12月完成療程後一路打Herceptin 和食Femara至今（2011年10月正電子報告指出L2的陰影已解決，但當時沒有做磁力共震）2012年及最近因L2collapse而做的正電子也沒有陰影。
我有個奇想，是否L2癌細胞一路存在，只是縮小了？
即使切除L2,其它骨節也會擴散，做一次手術也未必可以解決癱瘓問題？
下身癱瘓問題係要「預防」，預防嘅方法就係做手術去鞏固尾龍骨。
L2癌細胞問題當然要處理，重點係判斷癌細胞活唔活躍。如果活躍，即係治療失效，要轉治療。如果唔活躍，就唔洗轉住。
L2癌細胞最有可能係好似死灰咁冬眠，唔知幾時會死灰復燃。
其他骨頭將來有冇癌細胞／骨折冇人知，去到呢個地步，都係見步行步。如果同一時間好多節尾龍骨都有，我地叫呢D做multiple levels involvement，就唔會做手術，因為冇可能固定咁多levels。
解釋得非常清楚，我和我家人都非常感激你的幫忙，Breast HK你不只是上醫，還是上上醫，多謝你！
你好，我已經做完手術，化療及電療，但是一直未開始吃藥，原因見到說明書的副作用，就害怕了，點好？
你要明白3點：
1）食藥嘅好處一定大過副作用，即係食藥有著數。
2）說明書一定有咁詳盡得咁詳盡，因為藥廠怕你告佢。結果就係一D罕見唔緊要嘅副作用都列埋出黎，正常人見到水蛇春咁長嘅副作用，邊有人肯食藥。所以唔好再睇說明書紙上談兵，直接問醫生佢嘅實戰經驗，會有一個比較貼近現實嘅概念。
3）食藥唔洗簽合約嘅，你可以試食吓先，隨時停都得（有副作用可停、冇副作用唔高興亦都可以停），冇合約鎖死你嘅。
如果咁都仲係驚，只好唔食藥囉，做完手術，化療同埋電療已經好叻。
可以揀晤食？真的嗎？
當然可以揀，呢D係個人選擇。
唔食藥，自然冇食藥嘅好處，呢個好合理／好公平，喺同乳癌嘅對抗上，自然比食藥嘅病人表現得冇咁好。
唔溫書，自然冇溫書嘅好處，呢個好合理／好公平，喺同考試嘅對抗上，自然比溫書嘅學生表現得冇咁好。
溫唔溫書，呢D係個人選擇。
可唔可以唔溫書，又考得好？得，講運氣。
可唔可以唔食藥，又好長命？得，講運氣。
請問Tamoxifen是否有2間藥廠生產？
剛姑娘回覆我是$180/月，我話乜唔係成千蚊一個月咩！她話呢隻不是正廠出所以平d。
我又問咁又咩分別？她説正廠副作用少d。
是否真呢？
請問政府醫院係比邊隻病人食？
因為專利已過，Tamoxifen唔止兩間藥廠生產。
成千蚊一個月嗰D係AI，正廠Tamoxifen實際幾錢我唔知，因為公立醫院係用副廠藥，不過我估都係幾百蚊咁上下。
客觀地講正副廠應該冇分別，主要成份過咗專利後又唔係咩高科技野，應該好多廠都做到（好似山寨手機咁）。
原廠實話副廠有雜質，副廠又會話自己冇分別／性價比高。
雖然如果經濟許可，我係會覺得原廠係好啲嘅，起碼心理上好D，呢D我地叫placebo effect（安慰劑效應）。同一支紅酒，7－11賣$50，酒莊賣$5000，你實話酒莊嗰支好飲D，7－11嗰支叫「苦」，酒莊嗰支叫「醇」。
原廠貴藥，食完「心理上」都覺癌細胞死快D。
又再麻煩你，我已經完成手術，你知道我可以返回政府跟進嗎? 政府重會唔會每年比我例行檢查跟進架? 如果我食開私家醫生的 Tamoxifen，如將來有機會政府跟進，可唔可以又食政府的 Tamoxifen?
唔同政府醫院唔同部門有唔同做法，有D跟一世，有D跟五年，有D唔跟。
當然可以食返政府嘅Tamoxifen。
有人話食荷爾蒙藥前先去檢查子宮頸及度下子宮壁厚度，等下一次再檢查可以比較下有冇厚咗？請問醫生你覺得有需要嗎？
我應該半年定一年檢查子宮頸一次呀？
並唔係所有抗荷爾蒙藥都要定期做婦科檢查。只有食Tamoxifen先要，AI係唔洗嘅。
因為我地知道舊藥Tamoxifen，係會增加患子宮內膜癌嘅風險，所以如果食緊Tamoxifen而仲有子宮嘅，人地外國就會建議每年都做婦科盆腔檢查（睇住子宮內膜情況，至於子宮頸同食Tamoxifen係冇關係嘅，當然好多時都順手做埋柏氏抹片去篩查早期子宮頸癌）。
香港公立醫院資源有限，我地就當有唔正常下體流血，先會轉介婦科跟進。
醫生意思是子宮頸同子宮內膜係沒有關係，咁子宮內膜有無厚咗係咪由醫生即場可以度到？你會否建議我先給婦科檢查一次先？我真係唔知有冇需要？你說2者沒有關系，咁子宮內膜有冇問題或癌症是怎樣檢查？
我唔知道去睇婦科醫生時，醫生會否肯做度厚？
唔好意思，我對呢方面真的無認知！
麻煩你！
其實真係唔洗諗得太複雜，只要知自己有冇錢／同想唔想做婦科檢查就得：
有錢又想做，就去搵個婦科醫生睇睇。
冇錢／唔想做，就乖乖地食藥，到有唔正常下體流血先話比乳腺科醫生聽，等佢轉介婦科。
去到睇婦科，只要講明自己病徵／食緊Tamoxifen，婦科醫生就會識做相應檢查。至於技術細節／點檢查，呢D交返比醫生啦，跟佢指示就得㗎喇。
明白，唔該晒醫生。
我食咗四個月tamoxifen，十月頭嚟M到現在還未停，已找私家婦科醫生跟進，安排下星期做子宮鏡檢查，我當然希望不是子宮出什麼問題，而是荷爾蒙葯的影響。如真是荷爾蒙葯影響，我是否應該跟腫瘤科醫生商量停葯/減葯/轉葯？
啱啱先食咗Tamoxifen冇耐，冇咁快因為佢而子宮內膜有變異嘅，當然唔代表你子宮冇野，只係時間性上就算有變異都唔關Tamoxifen事。
至於你話可唔可以商量停藥/減藥/轉藥，無論咩原因都好，只有食同唔食過你揀。唔會轉藥，因為你未收經，AI係唔啱你嘅。亦都唔會減藥，因為Tamoxifen只有一個劑量，就係每日食20mg。
吓！咁咪食又死(長期流血死)，唔食又死(復發死) 🙁
唔好自己嚇自己住，睇咗婦科醫生檢查咗，睇佢點講先。
我是乳癌0期，剛做了全乳切除1個半月36歲。
ER十＞90％
正如你們所說，醫生叫我自己決定是否食葯。
我感覺醫生言語間偏向因為我是原位癌，可以唔食葯。只要定期檢查。
我現在唔知食定唔食。因為食葯減低另側乳房的復發率好似不多，但反而曾加子宮内膜病變。
1. ER十的百份率越高，就越應該食？
2. 我的年齡，是否要食？
3. 是否可以考慮下，遲幾年先開始食？
4. 是否食食下可以停食？停食左之後，是否可以再食反？一定是不間斷地食5年才有效？
1）準確D講，應該話百份率越高，食藥越能夠達到研究嘅效果。你原位癌同埋高分，食咗就應該有上面研究嘅成效，呢個唔係百份百等如要食，因為正如你所講「減低另側乳房的復發率好似不多」。如果你認為1.7%功效叫大，就食。如果你認為1.7%功效叫細，就唔食。
2）醫學界無一個統一建議，我個人傾向食好D，因為你後生。
3）冇人知遲幾年先食仲有冇效，所以唔建議咁考慮。
4）食食下係可以停，停食咗之後亦都可以再食返，同3）一樣，冇人知咁樣食仲有冇效，不過合理地預期，功效一定少過不間斷（當然常人總會漏咗有時唔記得食一次半次）咁食5年（即係仲少過1.7%）。
我就快食完5年femara, 請問有冇方案會食多5年？
有人咁做，不過冇大型研究數據話好D，所以主流食完5年femara就算。
你好呀，我上年尾十月確診乳癌二期，ER+, grade 3, 今年32歲，淋巴有2粒受感染，已做手術及完成電療化療，今年四月開始食tamoxifen, 剛照子宮超聲波發現子宮內膜增厚，厚2.4cm.很擔心日後生育問題。想即時停葯。隔半年後生BB。請問有無建議呢？！謝謝！
如果想生BB，係要停Tamoxifen嘅，主要係怕畸胎嘅關係，並唔係因為子宮內膜有冇增厚。
你想即時停藥，隔半年生BB，我見到有以下問題：
1）就算停咗藥，唔代表半年後就可以懷到孕，因為卵巢好多時化療後冬咗眠，經期都未黎返，唔好講話生育能力。至於卵巢幾時醒返就因人而異。
2）雖然冇證據話懷孕會增加乳癌復發風險，不過懷孕時嘅乳房變化（谷谷脹脹），同埋唔照得X光檢測（因為有咗），係會難D發覺乳癌復發。所以一般黎講，醫生會建議康復後兩年（甚至五年）以上冇復發，先好去計劃懷孕。當然生育能力係唔等人，年紀越大，能力越低。所以要係「完滿一個家庭」同「預防乳癌復發」之間攞一個平行點，有時可能為咗要BB要冒一冒險。
3）同上面一樣，如果純粹由「預防乳癌復發」嘅角度去睇，係要食10年Tamoxifen嘅。食到嗰時仲懷唔懷到孕係一個問號，就算當你食5年就算，37歲懷到孕已經屬於高齡產婦，又要面對其一系列嘅問題。
有機會就同自己醫生傾吓，睇吓點樣攞一個平衡。
謝謝你嘅詳細分析呢，我今年三月最後一針化療就停經了，一路都有睇婦科跟進下面，十月頭再check,卵巢同子宮機能正常，但子宮內膜厚左好多。跟住醫生幫我抽左組織驗，細胞正常。之後十月中就好好彩黎返經，但其實我怕食咁耐葯，對下面有影響，因為我只係食左七個月tamoxifen就厚2.4cm….到時食完五年葯後，上面無事但就到擔心下面有事。我又想快d有小寶寶，而且剛剛大檢完，報告一切正常，所以先想停葯再搏。又想問下，如果我現在突然停葯，我身體內嘅荷爾蒙會唔會亂晒呢？！點樣停葯呢？慢慢食少d先停，還是可以一下子就停呢？！謝謝回答！
而家突然停藥，身體內嘅荷爾蒙會短暫亂一亂，好快會揾返秩序。
如果想停，就係一下子就停，唔會話食疏D／食少D咁停嘅。
明白了！！！感謝你！！！
請問oestrogen receptor 90% / progesterone receptor 100% tumour cells with strong nuclear staining 是代表什麼？咁係咪食tamoxifen越耐越穩陣？
代表同D藥好夾，理應有好反應。Tamoxifen如果乳癌惡，就食10年好過食5年。
明白了，唔該哂！
我吃了Tamoxifen3個月了！初2個月的經期正常，但呢個月遲咗半個月還未到，食藥係咪會有機會令經期亂？幾耐唔嚟我要睇醫生？還是可以點做？
呢隻藥有機會令人甩多咗頭髮嗎？
另外想問一邊乳房切除，那邊手是否永遠不能攞重野？
食Tamoxifen太概有三份一人會經期亂，冇咩野可做，知「亂」係新嘅常態就得喇。另外，佢唔會搞到甩頭髪。
乳房切除同攞重野冇關係，重點在於有冇做到全淋巴切除。如果有，我地係會建議盡量愛惜／保護嗰隻手，但唔代表一攞重野就出事。
醫生你好！你說Tamoxifen不會導致甩頭髮，但爲什麽當我google時，幾乎所有網站都話其中一個副作用是hair thinning? 有些forum也有人說自己甩頭髮很犀利？
零點幾percent先會出現的副作用，我個人認為唔當佢係。
您好！
我媽媽60歲剛好「擇界」二期cancer(2cm瘤)，上月做了全乳切除，她選擇不做化療，醫生讓我們選吃5年新藥或舊藥，我們對照兩個副作用的list，選了吃Tamoxifen舊藥，因為怕新藥會食到骨質疏鬆…
領藥回來剛剛吃了Tamoxifen三天，她覺得好辛苦，出現的反應比預期的副作用嚴重，表示想停藥…. 但又唔化療又唔食藥，雖則話已經切晒，但好似好冇保障…. 醫生又冇講實有食藥冇食藥具體有幾大分別…..
有得食藥一定食藥好好多，如果Tamoxifen唔夾，咪食AI。骨質疏鬆唔係想像中咁恐怖，有藥Bisphosphonate可以減慢骨質流失速度。
食緊TAMOXIFEN可否又食鈣片呢?
冇問題。
請問若有子宮肌瘤，因經血多，婦科照聲波發現子宮肌瘤，我遲些會吃Tamoxifen，此藥會令我提早收經，咁是否此藥對控制子宮肌瘤、經血多的問題有幫助？
Tamoxifen 唔一定提早收經，另外佢係有可能會刺激子宮肌瘤生長。
Breasthk,你好，我媽媽完成化療後先照PET scan後個報告有” A calcified mass is seen in right adnexal region, could be an exophytic uterine fibroid with calcification”，她剛開始食Letrozole……想請問會唔會有影響…醫院個復診期要3個月後..未有咁快見到醫生。謝謝
Letrozole唔會影響fibroid。
我老公都係乳癌病患，剛完成手術，下月中開始化療，FEC+DOCETAXEL 各3針，另後電療+5年賀爾蒙藥，其實在男性方面，賀爾蒙藥的副作用跟女性是否一樣呢？他是IIa期，醫生冇提他是那種乳癌。
男性乳癌我地通常用返Tamoxifen，基本上副作用一樣，不過由於男人冇子宮嘅關係，係唔會有子宮內膜癌／經期亂／下體有分泌等問題。
媽2A期乳癌，右邊全乳切，腫瘤2.1cm大，增生速度2級，抽四粒淋巴，有粒細到0.03mm的點，細到不定義為有擴散，癌細胞屬對女性荷爾蒙有反應的一種，不需做化/電療，建議用藥物治療，頭兩年Tamoxifen，跟著三年另一隻（有可能影響骨質疏鬆那隻）
如果連藥都唔食，乜都唔做，復發率1x%，食藥五年可減到7%
醫生亦中肯地說若真係乜都唔做，都已八成機會全好，可能做乜都無用，當然我哋唔知個case屬邊個group，醫生有說既然副作用不是太大，可減復發率就食。
不過考慮到媽本身體質不是太好，睡不好，骨骼唔好，腳步亦見有靜脈曲張現象，究竟點様去客觀平衡去睇食藥帶嚟降減低復率的效益與副作用之間作取捨？
其實副作用相對好處可以話微不足道，九成人都會揀食。唔食嗰一成好多時係因為個人取態，多過醫學上的考量。你所列出嘅理由，唔足以支持唔食的決定。我贊成食。
Thanks! 不過阿媽堅持唔肯食, 擔心長期吃藥帶來的影響……
如果佢清楚明白食藥的好處同唔好處，都堅持選擇唔食的話，只可以尊重佢個人意願，你要做的已經做足。
如果真係食食吓唔食有無咩問題？
冇問題，只要佢肯試食，好的開始便是成功的一半，總好過試都唔試。
就好似盲婚啞嫁咁，結結吓就走到終點。
唔該晒
BreastHK, 你好! 我媽1期原位癌已做手術並正進行電療中, 不用化療但醫生建議食藥, 我們比較過新舊藥後, 較為偏向食AI, 現醫生寫紙食 Anastrozole (Arimidex)這款, 但我媽抗拒食藥, 好擔心骨折,骨痛副作用…. 她67歲, 想問如唔食藥問題大嗎? 如選擇食藥, 那三款AI藥中, 這種可以嗎? 這三種AI中又有否那款之副作用可以降到最低? 感謝!
未答你問題前，你要搞清楚係第幾期先。原位癌係零期，不是第一期。兩樣野處理方法好唔同。
乳癌零期原位癌 － 我係咪0期？
乳癌一期 － 我係咪第1期？
唔好意思, 我都亂了! 是T1 即1期, 但淋巴冇擴散. 2.7 Length. 謝謝
唔會講話唔食藥問題大唔大，只可以話醫生建議食藥即係食藥有著數。
三款我地當同一樣功效／副作用，Anastrozole係其中一個選擇，唔會話有一款有明顯優勢。
唔該你咁快可以回覆! 完全明白了, 謝謝
Breast Hk 你好! 11月中做完乳房局部切除手術! 之前話係鈣化點惡性, 共6粒，最大0.5mm , 醫生話已割清! 今日覆診醫生話係原位癌0期， 只需要電療，不需要食藥! 我有問點解唔使食， 醫生話原位癌不用食! 是真的嗎? 好擔心唔食藥會影響復發嗎?
謝謝!
其實上文第二點已經講咗原位癌究竟洗唔洗食藥。
或者你可以去第二篇度睇：乳癌零期治療攻略－原位癌有咩咁特別？
謝謝你的回覆! 我想問電療完幾耐可覆診同照mammography? 通常幾耐覆診一次? 可不可以密密監察?
Thanks
乳癌檢查 － 醫好乳癌之後點跟進？
你好!
本人母親現年60歲。3年前驗出第2期乳癌。腫瘤大2CM, 淋巴割了13粒其中3粒驗出有擴散。做了全切手術﹐電療及化療。抗荷爾蒙藥的組合是2年舊藥+3年新藥。
母親服藥後一直表示骨痛﹐四肢酸痛﹐混身無力。不能久站/長時間走路。影響了生活及工作﹐使她氣餒不已。最近轉了新藥﹐情況更為嚴重。
問題:
請問現時可有方法減輕副作用?服用維他命D可以嗎?3年後完成治療﹐副作用是否會消失?若加以飲食輔助﹐體內的的鈣質水平會否回升?
痛只可以食止痛藥，「混身無力。不能久站/長時間走路」呢D好虛無的病徵就冇藥搞嘅，只可以建議多休息。
可以服用維他命D（好多時醫生開AI時，都會開埋維他命D鈣片混合藥），不過對以上病徵係冇幫助嘅。
如果以上病徵係因為AI而引起，3年後停藥係會消失。不過話分兩頭，如果以上虛無的病徵本身唔係AI引起的話，停藥係冇幫助。
若加以飲食輔助同負重運動﹐係可以減慢骨質鈣質的流失。
明白。萬分感謝!
醫生你好，我原位癌，已完成二次手術，第二次手術醫生説已經和我清曬，報告也顯示沒有侵入性，病理報告re pr都要陽性,8分，her2陰性score1,ki-67 index3%,醫生跟我説不用食葯，現正準備電療，有幾點想問:
1. 我個人其實是不想電療的，但醫生説不電療有30%復發率，我查資料即使配合電療復發率也有15%,不是説原位癌預後良好嗎？究竟有沒有一個確實的數據來表明復發率？復發一般是原位或侵入性？
2.我就很怕我電療會破壞好的細胞，反而增加了我將來的復發？而且我看了一些資料，一些low-grade的可以不電療，是對嗎？其實我原本的病灶都已經切走，為什麼還要電療，這樣不會過度治療嗎？
3.因為我er pr>90%,但醫生說因為我是原位癌不用食葯，如果我不吃葯是不是就如上述數據所顯示的降低1-3%復發率？
謝謝
1.原位癌已經係最好的乳癌，命仔長，不過唔等如唔復發。復發數據從來只係統計數字，唔會確實的，就好似強積金咁，過往數據不代表將來表現。原位癌復發可以係原位，又可以係侵蝕性。
2.你的疑慮並沒有證據支持，電療是降低復發，不是增加復發。如果你的說法成立，它便是一個害人的舉動，在現今高度透明的年代，是站不住腳的。
醫學界一直都想尋找哪一類原位癌病人可以安全地避免電療，但一直都未有共識，所以現階段都係建議電埋療穩陣。電療的目的就是清理埋餘下乳房見不到的癌細胞源頭。
3.不吃藥好自然是「不能」降低復發率。
多謝及時回覆，我想我也是會選擇電療的，另外醫生我想問，我完成電療後多久可以懷孕了？還有如果我選擇不吃葯，但我er pr是陽性，是不是代表我應該要控制雌激素的攝入量呢？
電療完成後隨時可以懷孕。
ER PR陽性，唔代表要戒口。乳癌食療及食物禁忌 － 戒食雞？戒豆漿？
如果成日諗住控制雌激素的攝入量，不如正正經經食藥，不過提提你，食緊Tamoxifen係會叫你避孕。
媽媽70歲， 3星期前私家做完全切手術，infiltrative ductual carcinoma grade II Tumour size=2.2.cm，腋下淋巴冇擴散 (No lymphovascular invasion, No sentinel lymph node metastasis 0/3).
Oestrogen Receptor (+ve): 95% tumour cells with strong nuclear staining / Progesterone receptor(+ve): 40% tumour cells with strong nuclear staining
HER2 (C-erbB2): 15% tumour cells with faint incomplete membrane staining Score: 1/3 (-ve)
Ki-67 Proliferative index: 15% (borderline proliferative activity)
剛轉回政府腫瘤科跟進。兩邊醫生都建議無需化療，私家醫生建議5年新藥(Femara)，政府醫生建議考慮2年舊加3年新藥(Femara)。讀過Breast HK，知道對媽媽的情況似乎係新藥好過舊藥，但5年新藥同轉藥又好似是沒有分別。我們熟意5年新，不過又擔心再過一兩年骨痛 / 骨質疏鬆會好影響年老媽媽的日常生活(媽媽現在生活正常，可以自如上落3層樓梯)。星期四要見醫生了，我們仍然舉棋不定，希望了解下Breast HK的意見。
謝謝Breast HK呢! 當知道媽媽有了乳癌，也是靠Breast HK的資訊幫我們做了好多治療決定和安排，感激一位好好的乳線外科醫生診療，由收到報告到做完手術也是三星期的事，感激Breast HK的資訊和當中經驗豐富的臨床判斷指引, 令我們好有信心去安排和去解釋給媽媽聽她的病情及治療過程。
過一兩年什麼光景冇人知，如果已經熟意5年新藥，就由心出發，放心去馬。只要記住食藥唔冼簽合約，如果到時真係同某隻藥唔夾，隨時都可以轉。係有人食咗一輪新藥，轉返舊藥轉頭的。先舊後新，先新後舊，我唔認為有咩大分別，尤其係而家副廠藥平咗咁多的情況之下，以前就話先新後舊要自己比錢。
明白了，謝謝呢！
請問喺一月確診LCIS後未有即時決定服用Tamoxifen，到四月覆診時先至同醫生講開始食，會唔會太遲？係咪應該早D見醫生早D開始食？
還有，Breast HK，多謝你花時間同心機提供詳盡的乳癌資料！Thank you so much!!
如果已經有咗決定，要求早D覆診同醫生再傾好D。
你好，醫生安排左媽咪食Femara，見佢副作用有很多，例如輕微頭暈，腹瀉，乏力，作嘔作悶等，請問會大約持續幾耐架。見佢捱完化療，電療，而家每21日去打鏢靶，見佢好辛苦，又好努力！真係好想有野可以舒緩下，求解，謝謝！
你以上所講的病徵我唔會歸咎於femara，相信好快會過。
Jenny
你好，我已吃了Tamoxifen 年半，樣樣正常只是沒有經期。但最近感冒咳嗽嚴重令到氣速，醫生開了兩隻氣管藥和感冒藥給我。我吃了四天，經期就來了，還多到漏，到現在仍未停（3）天。請問這是Tamoxifen 的副作用還是氣管藥引發？請問我現在需要点做？
純熟偶然，冇咩特別處理，同平常黎經期一樣，如果持續數天又好擔心，就去急症室（雖則如果唔係嚴重貧血都冇咩野搞）。
Jenny
經期過後，去看婦科。因吃Tamoxifen 又經期來過，醫生話子宮內膜厚左和荷爾蒙多左，醫生話可以做刮宫，驗下有無事但手術要全身麻醉。真的要做嗎？做了之後子宮內膜仍會變厚嗎？
係咪真係要做要視乎婦科醫生嘅評估，Tamoxifen係有機會導致子宮內膜增厚（endometrial hyperplasia），甚至罕有的情況會導致子宮內膜癌（endometrial cancer）。做刮宮的目的就係攞一D子宮內膜組織去排除生癌的可能性，並唔係想令佢薄返（當然你刮咗D野去咁一定會薄咗，不過呢個唔係刮宮的目的）。
你好！我兩年多前患乳癌1A期，右邊乳房做咗mastectomy, ER +ve, PR +ve, 無須做化療和電療。食咗兩年Tamoxifan, 二月開始?食AI (Letrozole), 兩年前醫生說食2+3, 但現在說要食5年。四月開始手指關節比較僵硬丶有點腫，有時還很痛，腳指關節亦有類似情況。覺得早晚和日間多做一點運動可以改善情況。有時坐得太久站起身時，全身關節都有點僵硬。我擔心副作用會越來越嚴重，是否要轉藥呢？除了食鈣片外，有沒有其他可以改善方法呢？
轉唔轉藥主要視乎你頂唔頂得順D副作用，頂得順就繼續食，頂唔順就轉藥。不過要提提你「你D病徴可能關／可能唔關隻藥事」，因為二月已經轉AI，但四月先有以上問題，時序上唔係太典型，一般病友都係第一個月最唔慣。如果最終真係唔關隻藥事，即係轉藥都幫唔到件事。
鈣片並不能幫助以上病徴，只可以好被動咁學習接受，痛就食止痛藥。
你好！剛剛做完全乳房切除，證實為乳癌0期， low grade. 有醫生建議食Tamoxifen， 因為我有family history， 此外，也因為我另一面乳房很 lumpy. 但是另一醫生不建議食， 因為是0期， 還有不需要增加子宮內膜癌風險（大約每年 0.3%，食5年後，子宮內膜癌風險為1.5%）， 請問：
1) 子宮內膜癌風險率真如以上所說嗎?
2) BreastHK有什麼意見呢?
謝謝!
1）唔同研究會有不同結論，如果睇一D高質素的綜合研究（meta-analysis），風險同幾多歲開始食有關：54歲或以下開始食，子宮內膜癌風險可以無視，55到69開始食，15年內子宮內膜癌風險由1.1％增加到3.8％。
Relevance of breast cancer hormone receptors and other factors to the efficacy of adjuvant tamoxifen: patient-level meta-analysis of randomised trials
http://www.thelancet.com/pdfs/journals/lancet/PIIS0140-6736(11)60993-8.pdf
2）我會睇你年紀同埋態度進唔進取。
後生／進取，食。點都好過食埋D冇根據嘅健康產品／試埋D古靈精怪另類療法。
年老／保守，唔食。
本人現在剛好手術後一個月，去年確診一期後只接受局部手術，但手術後醫生說邊緣不清要再全乳切除，但我就沒有再接受手術，這一年甚麼治療都沒有做，一年過去再發現硬塊，所以今年決定再做手術，算是全乳切除，全乳內部挖空，但保留了乳頭和乳房下半部皮膚。ER十、PR十、HER2一。外科醫生說我肯定不用化療，連電療應該都不用。但腫瘤科醫生也說他個人認為不用化療，電療也應該不用，但他想和其他醫生開會，討論一下聽下其他醫生建議，可能建議我16次電療。現在我好像做唔做電療就看我自己的選擇，所以請問我做唔做好？
要睇幾樣野先可以比意見，1）侵蝕性腫瘤幾大，2）割得清唔清，尤其posterior margin有幾多，3）淋巴有冇受影響
Breast HK
你好，你的資訊好詳細，謝謝。
想問下，在食Tax荷爾蒙藥期間，未有經期，那會否懷孕嗎？
冇經期都有機會懷孕。主要因為你唔會知佢幾時黎返，如果唔做其他避孕措施，萬一原來卵巢已經開始排卵，但滯後的經期未到，就有可能成孕。
你好! 現42歲，我本身雙眼有黃班點病變出血，做過两次光動力療，現只有右眼看東西，我擔心用Tamoxifen會對眼視力造成傷害，如視神經炎、視網膜病變或視覺神經病變等副作用，對我視力造成傷害害。Breasthk可否給與意見呢？
全世界係有零聲報告話食Tamoxifen的病人出現眼角膜病變、色弱、視網膜靜脈栓塞及視網膜病變，不過都係零聲個案，究竟係咁啱得咁橋，定有因果關係，根本無辨法去肯定／否定。
一個大型少少的硏究NSABP P-1 trial就話Tamoxifen 會增加患白內障的風險，不過其實冇咩有建設性的結論可以得到。
你問我，除非你係原位癌，如果係侵蝕性癌一定係食好過唔食，唔好擔心一D罕有的情況（甚至好有可能根本冇關係）。
我0期原位癌， 剛在私家醫院做了局部切除手術，將會在私家醫院做3個星期電療。醫生建議服五年乳癌荷爾蒙藥。藥費差不多每月1000 元。請問可請醫生轉介政府醫院跟進和配藥嗎？
可以。
醫生你好
我三十幾歲，真係冇得揀要食舊藥嗎？
上次醫生有提過話打停經針，就可以用新藥，這方法可行嗎？請問建議用舊藥還是新藥呢？
因為上次見醫生吾係咁清楚荷爾蒙藥，佢都係比初步建議，我就冇詳細問醫生，諗住化療完先決定，自己再搵下資料。
謝謝解答
抑制卵巢加新藥係其中一個方案，常見於一D比較惡嘅情況，例如第三期。至於你個情況邊一個方案好D，就要問返自己醫生。
我巳吃了tamoxenfin 3年左右，心煩出汗一直都有，但最近心情開始低落，請問醫生這是否也會是副作用之一？謝謝解答
時序上唔吻合。
即係話應該一開始食藥嘅時候就會有症狀？而家先有就未必係隻藥嘅副作用？多謝你嘅解答
都食咗3年，有副作用理應一早出現咗，而家先話心情低落呢一D咁主觀嘅病徵，我唔會歸咎於佢。
Ok 謝謝你的解答
醫生，我太太剛剛開始食tamoxifen ，就覺得膝頭痛，請問這是一般常見副作用嗎？
不是。
我妹先在私家打针，因經濟突然出問題轉左去政府。政府話打八針，私家話因為下十五粒淋巴中十粒有，所以要打多兩針。今日，政府度打第八計時，政府醫生生話佢肝酵素高，一定吾可以再打多兩針。請問究竞點選擇？
你意思打10針化療？
Hello! 本人38歳，之前抽針話良性，CT 話有可疑，之後聽醫生建議做右乳局部切除術(3點，9點），cross section frozen 話良性，點知final tissue 話係低度原位癌，約0.3cm）㚈科及oncology 醫生都說whole right breast RT已ok，無須食葯，已於5月尾做完30次RT，以為已告一段落。近日返外科醫生覆診，他說要test hormones受體，看是否須食藥。整過程如坐過山車。亦有説早期原位癌亦未必能check 到，究竟我check 的效益有幾大。對我的副作用會否超越益處？big thx!
Check 嘅效益唔太大，3mm 低度原位癌已經係最好最細類別，食藥效益預比其他人細。詳情參閱乳癌零期治療攻略－原位癌有咩咁特別？。
醫生你好!
我今年48歳,未收經,母親廿年前(53歲,也確診了乳癌)。我在7月初在私家醫院接受了右乳全切除,腋下淋巴也全切了。以下是手術報告:
Grade 1 invasive ductal carcinoma, NOS
pT1aN0 (max dimension of invasive component=0.25cm).
Associated low-grade ductal carcinoma-in-situ.
Right axillary lumph nodes negative (0 out of 11).
Oestrogen & Progesterone receptor positive.
c-erbB2 oncoprotein not over-expressed.
Low proliferative activity.
Invasive component: The invasive ductal carcinoma cells are positive for oestrogen receptor (Allred score = 7/8 and H-score =140/300) and progesterone receptor (Allred score = 8/8 and H-score =270/300) . They are considered as negative for c-erbB2 oncoprotein (score = 1/3). About 10% tumour cell nuclei express proliferation marker Ki67.
In-situ component: The in-situ ductal carcinoma cells are positive for oestrogen receptor (Allred score = 7/8 and H-score =150/300) and progesterone receptor (Allred score = 8/8 and H-score =280/300) . They are considered as negative for c-erbB2 oncoprotein (score = 1/3). About 12% tumour cell nuclei express proliferation marker Ki67.
手術後腫瘤科醫生表示不用化/電療,因未收經,所以建議我食5年舊藥,7月尾已開始食。
因移民原因,在8月份返回美國,剛剛覆診了美國的腫瘤科,也同意無需化/電療,但表示有較進取了做法,就是給我打停經針,轉吃新藥。
不知道吃舊藥、打針停經轉新藥的效果有什麼分别,我的子女只有十多歲,還需要我的照顧,我希望可以陪伴他們成長,我不介意提早更年期,只想治療效果較好。我是不是應該採用較進取的治療方案?
希望醫生可以給予建議,感謝萬分。
Winnie
T1aN0唔需要用停經針，舊藥已經足夠。
感謝醫生這麼快便回覆,謝謝你!
自從得知患乳癌後十分忐忑不安,所以醫生表示可以採取進取方法來治療時,心中也不知如何作決定,我也有担心舊葯的副作用,我的乳癌是屬於善良的嗎? 所以継續吃舊葯也可以?
通常stage 2B 或者stage 3要打化療嗰D，停經針先有額外幫助。你stage 1化療都唔洗打，根據TEXT同SOFT Trial，停經針根本冇幫助。
您好！婆婆70歳，年初確診左邊有乳癌，淋巴有一粒感染，切除全乳及一組淋巴。之後，在政府醫院跟進，沒有做化療，只做電療。服用AI荷爾蒙藥2+3五年療程方案。最初一個月已有骨痛，有食鈣片補充。但差不多一年了，她的骨質疏鬆已達嚴重！！
今天見醫生，建議要打補骨針半年一支，至食完抗荷爾蒙藥為止，下月覆診驗血後再定打唔打得，醫生稱因為食抗荷爾蒙藥所以導致骨質疏鬆！
?另一隻荷爾蒙藥，睇下一個月後膝蓋痛有冇減少！
請問有沒有什麼可補助她完成療程呢？
害怕繼續食藥，會引致嚴重不良於行？
打骨針丶轉藥，有用嗎？
曾經見文看過，停藥後，骨質疏鬆是會轉好的，對嗎？如屬實，只要忍受5年完成療程，就可以了！?
由發現至今，所有治療疑問，我都在這裡找答案！真的感激！謝謝你的無私！
你提供的資料有D怪。如果淋巴有感染，好少half-hearted咁切一組淋巴，通常都切兩組。
荷爾蒙治療2+3轉藥的方案，一開始係食2年舊藥Tamoxifen，佢係會強化骨質密度（同新藥AI相反），你搞清楚先再問。
瑪麗讓我吃5年Tamoxifen，是不是我的ER不算很高呢？報告說有6。還是政府衹能資助5年，其餘要自己自費？
Tamoxifen 唔洗錢的。
謝謝！那麽我ER是6，也是吃10年較好嗎？如果醫生話吃5年，我可以要求10 年嗎？
10年好D，醫生都會叫你咁食。
你好！我家人當時46歲，已切除子宮，較肥胖。患乳房原位癌2011年做完化療電療，食咗舊藥6年，醫生宜家停食舊藥。現年52歲，停藥覺得心裡常擔心復發，是否應繼續服用呢？食幾耐較好呢？
你要搞清楚D資料先，原位癌根本就唔會化療或食6年藥。
未收經。食 Tamoxifen 後周身骨痛及僵硬，胃也不舒，有朝熱問題。可怎樣？謝謝你??
唔嚴重就慢慢接受，嚴重就食藥舒緩病徵。
您好！我29歲，乳癌2B,her 2~
局部切除了～
所有treatment都有做晒，宜家食緊Tamoxifen ~
請問點解化療後三年，頭髮還是長不回的，頭頂總是禿禿的，髮量都少了很多～是不是Tamoxifen 的影響？如果停左藥頭髮會長回以前嗎？謝謝您????????????????
唔關Tamoxifen 事。
你好! 今年43歲。 剛有乳癌，剛完成化療 TC 6針，私家打。將在政府開始電療。我是ER 2/300. 1期，stage 3, 是三陰性。 T1N0. 腫瘤是1.2cm, 淋巴無感染.
但政府醫生建議我食5年Tamoxifen. 由於我 ER 是2/300， 數字十分低，私家醫生說可以唔食。 但政府醫生話食好D .
我是否應該食？ 因為十分擔心副作用，特別是有機會生子宮內膜癌。
是否應該食？ 希望醫生幫忙應如何是好? 十分多謝解答，感謝!
ER2/300即係荷爾蒙受體陰性，如果PR都係陰性的話，就唔洗食藥。
多謝回覆。 但為何政府醫生會比Tamoxifen 我食? 我PR 是 0。是否現在的標準改了？
叫得做三陰性就唔洗食藥，標準沒有改變過。政府醫生點解咁做要問返佢，我持有不同睇法。
乳癌做了手術，切咗2組淋巴，化療6針都完，還有標把，發現手腫，現在1星期3次物理治療穿著壓力手襪，請問點解會手腫，是否永遠都不會消退，永遠都要穿著壓力手套？
乳癌淋巴水腫 － 真係冇得搞？
馬醫生你好, 我今年41歲, 於7月底完成手術, 剛剛開始食Tamoxifen, 請問食咗藥幾耐之後要去做婦科(子宮內膜)檢查? 其後幾耐做一次?
另外, 請問: 我的個案, 應該食5年抑或10年?
muscinous carcinoma, Grade 1, negative for lymphovascular invasion;
T2 (23mm), N0, Mx.
ER: 8/8; PR: 7/8; Ki67: 20%, Cerb2: negative
另, oncotype recurrence score: 14, 寫著10-year risk of distant recurrence; Tam Alone 9%, 但好像沒有寫5年…….
一年一次婦科檢查。
10年。
Annie Aug 19 我食左Tamoxifen 五年,而家食新葯兩年,驗骨質疏鬆比兩年前又差左,吾想又多樣病,骨質疏鬆葯副作用又多,係咪所有新葯都會令骨質疏鬆,如果轉食反舊葯又會吾會無咁好!
所有新藥AI都會令骨質疏鬆。唔常見咁樣轉來轉去。
不是有10mg嗎?
Tamoxifen 10mg 不是給乳癌用的，是給男性乳腺增生( gynaecomastia)用的。
我今年38歲
已經做完化療，手術，電療排期中
但醫生開了Tamoxifen，請問應該何時開始食藥？可以在電療後才吃嗎？謝謝
隨時可以開始食，不需要等電療完成。
醫生你好，已食五年tamoxiifen。今次覆診醫生問我繼唔繼續食多五年。請問應該食定唔食呢？
食。
醫生你好，我媽媽(69歲)去年確診乳癌1B期 ，去年8月已切除左乳，服用AI荷爾蒙藥1年，有食鈣片。但最近1個月每晚睡覺時上半身冒大量的汗(以前沒有的)，要換兩三次上衣才能入睡。剛於10月底在政府醫院腫瘤科覆診，當時我媽媽懷疑是感冒並把冒汗情況告訴醫生，而醫生只建議驗血和照肺，有問題才致電給我媽媽，至今仍未收到醫院電話。
1. 請問每晚睡覺時上半身冒大量的汗是否與服用AI荷爾蒙藥有關?
2. 下一步有什麼可以做以改善冒汗情況?
謝謝
1）無關。
2）沒有好建議。
醫生, 你好, 想請問一下 乳癌stage 2B, HER 2 -VE, 荷爾幪 +VE. 己經完成ACT X 6 , 6針化療後做了全乳+12組淋巴切除手術(手術前PET-CT(plain) 報告寫之前有事的地方問題已經解決, 而腫瘤科醫生在手術前前的解釋是所有癌細胞己經驗唔島有活躍度), 做完手術再做埋電療.
我現今32歲, 好辛著苦才捱過之前的治療. 因為看了很多舊藥的副作用, 有點害怕會10年通宵溫書還是會考試不合格.
我明白醫學是研究統計數據, 所以想請問有沒有研究數據参考 “曾否吃舊藥” 的復發率?
最辛苦的化療都捱過，仲怕食藥？食藥副作用少功效強大，唔好諗喇，強烈建議食。
謝謝醫生的解答, 我明白你的意思, 但10年溫書確實是一種長時間的折磨, 食舊藥萬一出現的副作用又要去食其他藥去舒緩….
所以才想先了解一有沒有相關的研究數字 或 網路計算機 有 “唔溫書下的不合格率” 和 “溫了書下的不合格率”? 我想得知相關數字後才決定賭不賭運氣.
我相信總有呢D數字，但唔影響決定／方向的我冇上心。
明白,謝謝解答
食左6年tamoxifen後，發現了輕微脂肪肝，需要停藥嗎？
不需要。
你好！醫生，今年53， 17 年4 月確診1 期，2A, 做咗全切重建，冇需要電同化。之後已再沒有月經，我食左一年半taxmoxfin, 子宮內膜已經2.4cm, 入院做了手術，再化驗，良性。再繼續食咗五個月再 check, 又再厚過上一次！請問我要即停藥先嗎？因未到政府覆診，上次政府醫生建議我食足兩年轉新藥食五年。腫瘤科私家醫生又放大假，我應否停了藥先？謝謝你！
停定經就可以轉藥，唔一定等足兩年。上次咁近期已經刮過宮良性，再厚都唔太擔心，唔建議自己停藥。
馬仔你好, 我9月8日完成左乳局部切除, stage 1B(0.8cm), HER 2 -VE, 荷爾幪300/300, ki-67/2%, 淋巴無感染. Dr要我電20次(15大5細在10月30已完成)和食5年taxmoxfin. 問題1. 乳房傷口到而家仍是硬硬和無感覺, 正常嗎? 問題2. 乳房位間中仍有D痛, 我無咩做爬牆運動, 主因嗎? 問題3. 我個術後報告, 你覺得復發機會高嗎? 問題4. 我就快返腫瘤料覆診(2/15), 其實有咩檢查我應該要做呢? PS: 12月19已返左乳腺料覆診, 超聲波2邊正常.
1）常見。
2）同有冇做運動冇關。
3）唔高。
4）乳癌檢查 － 醫好乳癌之後點跟進？
馬仔, 你真係堅勁, 咁快回覆, 十分多謝你. 我想問, 左乳對上位置仍間中有D痛, 而同有冇做運動冇關, 咁點解呢?是否因之前電療過, 電死過D神經引至呢? 另外, 而家好唔好開始’茶’去疤膏呢? 就快初一喇, 我祝你身體健康, 依然咁好笑容, 幽默, 可愛!!!
要檢查先知。傷口埋曬就可以搽去疤膏。
多謝你！去疤膏有沒有令個疤痕位軟返嘅功能呢？不好意思，咁多嘢問！
佢聲稱有，我唔覺有。
早晨馬仔, 前2日返去腫瘤DR覆診(私家),C15.3手術前係6.1(9月7日), 覆診係4.2(2月16日), 其實呢個指數係咪睇吓身上有無癌細胞?如果係, 那4.2咪即係仲有?另外, 我食荷爾蒙藥已4.5月, 頭2個月經期正常, 第3個月遲了1星期, 而今個月遲了2個星期仍未來, 是否唔會再來?忘了話你知我43歲的, 我約左3月25去見見你.
癌指數其實唔準確，高唔代表一定出事，低唔代表一定冇事。
經期黎唔黎冇人知。
明白, 謝謝你.
想問一下, 食荷爾蒙藥好易有血栓塞, 對嗎? 咁做咩檢查可以知有無血栓塞? 一向都有背痛, 而家都有, 好驚係轉移到骨, 有咩症狀架?
有機會令靜脈血管栓塞，不過是不常見甚至罕見，不是「好易」。檢查主要係有懷疑時照血管超聲波睇下有冇塞，平時冇得定期檢查。
明白, 咁如果懷疑時, 應該同外科DR定係同腫瘤DR提出照血管超聲波呀?
兩個都得。
一向都有背痛, 而家都有, 好驚係轉移到骨, 有咩症狀架?
骨轉移可以骨痛、骨折或血鈣高。
Thank you so much Dr Ma 🙂
Dr Ma, 有個問題, 我係浸潤性導管癌, 0.8cm, HER2-, ki67-2%,荷爾幪300/300, 咁我係管腔A型定B型呀?
管腔A。
Thanks Dr Ma😘
馬仔，本來3/25去見你，但法國腸胃科 Dr叫我去五年一次的照腸，胃，腎，肝，膽，胰臟和血鈣，所以改了4月6去見你，我見你之前可否先 fax哂所有報告你先呢？謝謝你:)
冇急野就唔需要，都係到時先睇。
明白, 謝謝!
你好，我想問食舊藥如果來月經係唔係效果沒咁好？洗唔洗立即同醫生講？
月經並不是評估藥效的指標。
好啊，多謝！
醫生，咁舊藥加停經針會唔會好過剩食舊藥？
唔係一刀切，取決於係咪高危復發。高危復發，係。低危復發，唔係。
唔該！
49歲化療前未停經，一期但 grade 3 , 想盡量減低復發， 建議打停經針而服用 AI 嗎 ？
唔建議。
但我的醫生建議過，服用 AI 一定要自然停經的嗎 ？ 謝謝
唔需要，人為停經亦可。
但我的醫生建議，服用 AI 要自己停經才可？不能靠停經針 ？ 謝謝
服用AI只要停經便可，自然或停經針亦可。
謝謝你的高速回覆，咁點解你又唔建議呢？
一期即係冇淋巴大型擴散，復發機會唔高，Tamoxifen vs 停經針加AI，其實差不多，所以唔建議轉。停經針加AI係用係二B期或三期，先有額外優勢。
我是乳癌荷爾蒙呈陽性，已做了6次紫杉醇化療，骨及肺的癌細胞暫受控制，但乳房的腫瘤卻不受控制很快曼延，因我只有46歲，醫生建議最好方法是切除卵巢，或電療卵巢但電療效果未必會完全停止荷爾蒙，想請問醫生是否一定要傷害卵巢才可有機會繼續生存呢？有否更好的方法治癒？
切除卵巢對你的情況最好。
你好！家人剛完成全乳切除手術，癌細胞ER+/PR+/Ki67低，所以腫瘤科醫生建議5年AI藥療程，同時每日食1000mg鈣片，療程剛開始數天。但她有腎石問題，吃AI藥和鈣片有壞影響嗎？
呢個劑量冇問題。
你好。我有兩個問題希望醫生你能幫忙解答。
1. 我服食了正藥廠我抗荷爾蒙舊藥(Nolvadex-D Tamoxifen 20mg，每次1粒)差不多半年，最近轉食政府醫院副藥廠抗荷爾蒙舊藥(Tamoxifen “Ebewe” 10mg，每次2粒)。這種轉法或食法，可以嗎？
2. 自從服食荷爾蒙舊藥後，雖經期未見紊亂，但經血很多時也是凝固成一團團的狀態，這現象正常嗎？
1）可以。
2）唔可以輕下結論，睇婦科。
謝謝解答！
我媽已84歳, 4期已擴散, 曾經食過Femara, Aromasin同理Tamoxifen, 每隻依次序食咗年半, 已經再冇其他AI藥可以食, 唔知可唔可以再食返Femara呢? 重有冇效呢? 又或者食Arimidex?
用faslodex + Palbociclib 。
你好, 我是乳癌患者, 上年11月已切除乳房和淋巴手術, 今年8月初也打完18支標靶針. 現在只是每天食2粒Tamoxifen, 每3個月回去醫院覆診. 但最近面腫得非常嚴重, 連開眼也有困難, 非常辛苦. 請問這是什麼問題? 由於太辛苦, 我停了幾天不吃葯, 情況就沒了…. 請問我應怎樣做?
怕係敏感，睇醫生。
醫生，請問我已經驗血證寶已更年期，食左AI 十個月，突然來經五日，量不多的，半年前先做了子宮栢氏抹片，正常。請問醫生，點解會有M ? 是否AI 唔啱我食，又要轉返Taxmoxfin? 之前食咗一年子宮超厚，做了挖宮手術，之後先轉食AI , 謝謝你
幾多歲？
醫生你好，17年11月復發，做咗左面全切，1期，her2，食咗2年tamoxifen ，今日婦檢，內膜增厚，仲冇息肉，醫生建議做刮宮取出化驗，想問如果係良性，係唔係下次就算增生都唔洗再刮呢？觀察就得？如果係惡性，就要切除子宮呢？定係唔係都切咗先，咁繼續食葯都唔怕有副作用呢？
次次都獨立考慮，當然如果今次係良性，下次同樣情況發生會冇咁擔心。
如果惡性，當然要切。
切咗只係免除子宮副作用，血塊的副作用仍然存在。
本人的侵蝕癌3cm，前哨淋巴 1粒，手術結果是2期pt2 n1，要做化療6針，當8月打第一針時，腫瘤科醫生話會安排食荷爾蒙藥 Tamoxifen，但這藥與Sertraline會對抗相沖，叫我與醫生商討。
但打到第5針就突然叫我食另一種自費藥Aromatse Inhibitor，腫瘤醫生話不會與焦慮藥物相撞，每個月要2百幾元，但要每4星期打停經藥LHRH，約7百幾元，今年45歲。
1. 請問新藥A.I.是否真的與Sertraline不相撞嗎？(因為本人要1月才覆診)
2. 有件事很不明白，點解在腫瘤科初診症時，為什麼不告訴我有新藥呢？既然與焦慮症的藥又不相沖，而且復發的機會有較低! 呢兩點也較優勢!
3. 所以現在打第6針時，我未能即時決定簽同意書，打停經藥對我來說，有沒有壞處呢？是到醫院打? 還是普通診所打都得嗎？這些資料的利與害，我都不清楚，麻煩你結我一點意見!
(當我打到第4針，月經就不來，12月尾要再抽血。)
1）不相衝。
2）你要問返佢點解唔講，旁人唔會知。
3）早一D骨質疏鬆。兩度都可以打。
請問停經針可不可以自行在家裡打呢？打什麼位置?
因為本人要打升白針，也是由妹妹學識後，在家中幫我打在肚皮!
不可能自己打，支針十分粗。
1.我想知打停經針和食AI藥是否可以同時開始?
還是要先打停經針，要相隔一段時間，才可開始食藥呢？
2. 預算1月初會做電療前的設計程序，要排到2月幾才做15次電療，請問什麼時食藥為最理想配合呢？
1）打咗一兩個月，真係收咗經先可以開始AI。
2）化療最尾一針後四星期，可以開始荷爾蒙治療。
12月2日打最後一針
12月27日抽血檢查
1月3日做電療設計模型，到時才會見醫生開藥單。
1. 這些日子推算下，1月才可以打針，2月幾才可食AI，咁樣算是遲左食藥嗎？ 會有影響嗎？
2. 另一方面，醫生曾講過可以「先」食舊藥一段時間，才轉食新藥，最大問題係舊藥與Sertraline有相衝，我又未有新的焦慮藥在手!
但到食新藥時，又食回Sertraline! 呢類型既藥的適應期係好麻煩。
請結我意見，千萬感謝!
1）遲咗少少。影響幾大估計唔到，不過應該唔大。
2）要自己衡量。
1. 為了食新藥AI, 中年人值唔值得打停經針呢？
2. 停經針的負作用什麼呢？是否像普通人更年期的改變?
3. 化療後，腳仍然無力，現在的體重是重過未做手術前8磅，是否要節食?
1）冇一刀切答案，要視乎好多因素。
2）提早收經影響骨骼健康。
3）目標BMI唔好過22.5。
1. 今日去覆診，驗血報告話我是停經， 荷爾蒙低，而我上次來經是9月尾，所以醫生話我只可以Tamoxifen，我理解唔到，問來問去!! 你可否可否理解告訴我知呢？
2. 現在超苦惱! 不同醫生講法有些出入，在未來8個月，以我理解果個醫生講，不來月經是好的事? 是嗎？
本人45歲，在中間位!
1）45歲唔當真收經，所以抽血係咩結果都好，一般都只係用Tamoxifen。
2）係咪好事你都控制唔到，唔好咁執著。
1. 腫瘤科醫生堅持同我講Sertraline與Tamoxifen 是不相衝，他說是這間醫院的藥劑師講! 在電腦上有記錄。
2. 我告訴他說，另一間政府的精神科醫生同我講話會相撞，因為藥物會經過肝……..而在電腦上也有精神科醫生的記錄，腫瘤科醫生回答，佢不能側疑精神科醫生。
點解會咁架?
Sertraline 係mild to moderate CYP2D6 inhibitor, 所以同Tamoxifen 係有可能有衝突，雖未至於唔一齊用得，但要小心監察有冇復發。
醫生
本人53歲，2018 年確診，不需要電療化療，食左一年tamoxifen , 之後食飯住AI, 驗左血是更年期，但毎三個月就黎兩三日經期？正常嗎？上一次有來經，醫生挖左少少去化驗，結果正常！但三個月一次就有經期一兩日，很擔心，怕子宮內膜癌
唔正常，要再搵婦科醫生check下。
53 歲！
驗了血，已經是更年期！
謝謝你！
醫生，
請問食住AI 是否一定不會有經期？
驗左血證實已經更年期，但幾個月就會有幾日經期，但唔多的。
謝謝你
AI唔影響收唔收經，但收咗經係食Al的先決條件。
臨床情況同抽血果有出入，就睇睇婦科醫生穩陣。
我已完成化療電療, 準備食Tamoxifen，請問食Tamoxifen期間可以食中藥調理身體嗎？
唔反對。
你好，我嫲嫲84歲，剛發現乳癌2期，有腎病，無糖尿，她如何選擇呢？做手術or 食藥？新藥or 舊藥？
好視乎佢整體情況，行得走得就做手術，長期臥床就食新藥。
你好 我媽媽3星期前開始食tamoxifen 呢幾日發現下體有唔正常出血 公立醫院腫瘤科醫生refer 去婦科 referral Letter寫（fresh blood stained on glove)
想問下急唔急於出去搵私家check左先 ?正常會咁快有反應嗎？ 好驚係子宮內膜癌
流血如果可以快D check咗先當然好。食咗藥只有三個星期，D流血唔關Tamoxifen事。
你好，讀完以上內容有問題想問一下，因為疫情下更加問唔到主診醫生，希望閣下能解答，謝謝：
我媽媽70+歲，2018年中因「原位癌」已做了一邊的全乳切除手術，因為病來得急所以在私家醫院做手術，其後再到公私院檢查，公私院均表明不用食藥；之後大約半年，到另一邊出事，得了「浸潤性非原位癌」（正確病名公私院均冇提供），非做全乳切除手術不可，最後在公院再做一次全乳切除手術，跟住在公院做檢查（已冇再到私院檢查），醫生話要食藥，以確保不復發，唯有食，最後揀了新藥–> Letrozole，由7/2019開始食，到目前6/2020差不多一年，發現媽媽有出現了並沒有列明的副作用 –>脫髮，有部分位置更脫至有秃頭現象，佢情緒本身在手術後有點負面，現在因為脫髮，負面情緒開始更有點加強，想問下，响這個情況下，仲應唔應該食呢？
可以考慮轉食舊藥Tamoxifen。
醫生，手術報告係原位癌，但公立醫院醫生話病理個邊因原位無睇屬性，而醫生話原位唔使食，再加上公院無得要求食，咁其實係米原位唔知屬性就唔使食，因為我今年36歲，我見你講後生進取食，想問吓唔知屬性都要食嗎？同埋我如果需要食係米無得要求公院比我食，要去私家嗎？
唔知屬性唔食。公立醫院已經有決定，唔洗強求。
醫生你好！我係Her2+ ER+ 40歲，腫瘤1.5cm, 做咗局部切除、化療、電療，鏢靶都喺四月完成左。由去年8月開始食Tamoxifen, 月經今年1月再嚟返，呢幾個月都係大概2個月左右嚟1次。因為最近搬咗去澳洲，改喺這邊繼續睇醫生，剛剛今日見完醫生，醫生叫我考慮每月打停經針+食新藥。醫生你覺得這個做法合適嗎？
視乎淋巴有冇感染。
淋巴沒有感染
繼續食Tamoxifen已經ok，唔洗轉。
謝謝醫生
醫生您好，我太太今年39歲，大約上年年中開始食tamoxifen, 一個月前做婦科檢查發現子宮有息肉，現安排宮腔鏡手術切除，請問（1）這息肉和tamoxifen有關係嗎？（2）這息肉是否就是所謂的子宮内膜增厚？（3）太太醫生並無特別告知我們內膜厚度，請問要再做什麼其他檢查量度嗎？
不好意思，問題較多，謝謝您！
1）可有可無。
2）類似，不過實際係兩樣野，同一光譜唔同階段。
3）唔需要，做宮腔鏡括咗佢排除唔係癌就搞掂。
醫生你好，我36歲，腫瘤2.2cm大，7月中做了全乳切除手術.
醫生有講過話可選擇性做唔做化療，但我選擇唔做，請問唔做會否不太好？
現在已經食緊Tamoxifen
請問現在我可以食雲芝嗎？
唔能夠由你咁少資料去判斷做好定唔做好，不過你都已經選擇咗，唔會返轉頭。
可以食雲芝。
醫生，我食左Tamoxifen半年，家人買左雲芝，葡萄糖胺一類保健食品俾我。我想問下可唔可以一齊食？
可以。
馬醫生
媽媽75歲去年5月確診2期, 已做手術及電療, 食AI藥有1年3個月, 2019年12月去照骨質報告係脊椎骨-2.2, 大腿骰骨-2.6, 醫生建議食福善美幫助減慢骨質疏鬆, 但食咗9月個開始佢話個胃唔舒服已停藥, 請問有沒有其他方法減慢骨質疏鬆? 佢有食開鈣片及維他命D, 定還是轉賀爾蒙藥好些?
-2.6值得考慮打骨針。https://www.breasthk.com/zometa-denosumab/
謝謝馬醫生
想問下我媽咪個CASE打邊隻骨針較有效?
Prolia。
馬醫生你好，我今年43歲， 未停經， 本身有朱古力瘤 4.8cm， 2018 年確診乳癌一期，需要電療化療，食左一年多tamoxifen，最近檢查醫生說內膜好厚（15毫米）、唔規則可能瘜肉、要處理，話可以做刮宫，驗下有無事但手術要全身麻醉；
請問若刮宮後發現異常/子宮內膜癌，需要點跟進？（中醫建議我最好方法是切除子宮及卵巢），請問我應該點揀？是否應全切除较好？定還是只處理刮宮和朱古力瘤？或有否更好的方法治癒？
如果刮宮後發現異常／子宮內膜癌，下一步就係切子宮，卵巢切唔切則睇情況。
馬醫生你好，我今年44歲 ，乳癌三期，上年已完成全切除、化療、電療手術，現食緊TAMOXIFEN1年多，一年以來都冇黎月經，今早發現有經血，想問下情況是否正常？需要觀察？因政府醫院1年先覆1次診，如發現有問題我可向婦科定私家醫院檢查？有沒什麼情況出現需特別注意？？ 謝謝
之前停經主要因為化療引起，而家黎返都正常，觀察多幾個月先。
1）我剛剛做完右邊全乳房切除手術. 醫生話stage 1, 因有一粒有大概0.08cm有擴散性. 醫生提議吃荷爾蒙藥, 我是不是一定要食？擔心有副作用(子宮內膜癌). 想問問您意見。2）子宮內膜癌的機會有幾多？3）如我之前做過子宮肌瘤移除, 會不會增加子宮內膜癌如服用荷爾蒙藥?4）如要服用, 要吃多夠? 可唔可以食食吓停? 如停了, 有什麼副作用?5）如我現在不服用荷爾蒙藥, 可否遲些服用? 有什麼分別如現在服用或遲些?6）如果之前我做埋左邊乳房切除, 是不是就不用吃荷爾蒙藥?7）如果唔食, 復發機會是不是很大?8）我剛剛做完右邊乳房切除手術2個星期我幾時適合睇中醫？
謝謝你
1）醫生建議得食，就當然最好聽醫生意見。
2）6000千份之1。
3）本身舊藥係可以引致子宮內膜癌，同你有冇做過肌瘤手術冇關係。
4）食5-10年。唔建議食食下停。停了便沒有抗癌作用。
5）冇數據話遲啲服用仲仍然有效。
6）唔係。
7）要睇多個因素。
8）唔冼化療就可以隨時睇中醫。
感謝您的回覆
我係零期乳癌者，但有遺傳基因，剛剛做左切除進乳房手術，食AI Letrozole, 但我發覺食完就起風癩，咁我要轉藥，抑或要食敏感藥
一係轉，一係停，唔會食抗敏感藥。
另外食標靶可唔可以睇中醫
可以。
馬醫生你好. 謝謝你的分享, 很有幫助.
我2月9日完成部分切除手術, 術後報告如下:
Age: 49
Left break, 5 o’clock, 1cm from nipple tumor
Tumor type: Invasive breast carcinoma of no special type
Tumor grade: Grade 3 (2,3,3)
Tumor size: Invasive carcinoma 15mm in greatest dimension
Tumor stage: pT1c pN0(sn)
ER: Allred score: 8 (3+5) H Score: 240; Percentage staining: 90%
PR: Allred score: 6 (3+3) H Score: 150; Percentage staining: 70%
HER2 IHC scoring: Negative (1+)
Ki67: 60%
之後打了四針化療 TTCx4: 3月19日, 4月9日, 4月30日, 5月21日.
現正進行電療 到7月9日為止, 已驗血知道可食荷爾蒙AI 新藥, 也可以盡早食.
但是現在排了政府在7月12日看醫生, 會不會太遲食AI 藥? 有大影響嗎? 應先找私家先開始食嗎?
唔急，可以等政府先開始。
請問Femara 正廠藥同副廠藥有咩分別？
私家醫生用正廠藥，公立醫院用副廠藥。正廠藥會唔會較有保證，少啲副作用？
病友的骨質密度屬於骨質流失，骨折風險屬於低至中的長者，是否應服正廠藥較穩陣？
有原廠牌子同冇牌子嘅分別。就好似printer啲墨盒咁，有原廠墨盒，有代用墨盒，大家都係墨盒，都係咁print野。
正廠藥會較有保證，但唔可以話較少副作用，始終配方過咗專利，大家都可以抄，爭在大家抄唔抄得足。
幾時都係正廠藥較穩陣，只不過現實迫人，成本都係大家會考慮嘅因素。
感謝馬醫生的回覆
醫生你好!
想請問1期48歲病人需接受荷爾蒙AI藥及電療,如經期自去年12月不穩定,3月經期後5月只有幾點經血,Triptorelin Acetate 停經針還應每月注射嗎?還是3月一針便可以? 有可能一段時間後減少注射次數還是必需按月注射５年? 急需專業意見參考,謝謝！
未停定經就要定期打停經針，Triptorelin 有一個月一針（3.75mg）同三個月一針（11.25mg）版本。
想問下,3期有淋巴感染. 44歲打完化療後就停左經無再黎, 醫生睇完指數話我可以唔駛打停經針食AI , 但要密住CHECK 荷爾蒙指數, 我想問咁樣係咪安全做法. 如果開始左食AI, 可唔可以轉返食TAMOXIFEN?
打埋停經針／切埋卵巢先食AI就萬無一失，就算check得再密荷爾蒙指數，始終唔知卵巢幾時醒返，嗰段時間就係一個空窗期、一個漏洞。
開始咗食AI，可以轉返食Tamoxifen。
Hello Dr Ma
食咗 Femara 3個月，半夜總是雙手手指痺痛醒來，腳部關節不靈活，而且體重持續上升，有輕微水腫現象。
請問是正常副作用？
可以怎樣改善？
需要轉另外一款Al藥物嗎？
關節痛有可能關事，水腫有D報告都有咁講。冇咩好方法去處理。轉另一種AI都有咁嘅副作用。
醫生你好，想問下如果我打3個月一針嘅Triptorelin，第個月中就來月經，係咪代表支針唔夠力壓制個卵巢，要轉針？我33歲，剛剛轉打Triptorelin, 之前係打另一隻粗針（一個月一次），打了2次。。。AI仲應唔應該繼續食？謝謝。
未夠力壓制個卵巢，要俾啲時間佢生效。有返經期， AI要停，暫時食返Tamoxifen 先。
你好, 如果食Tamoxifen, 可同時食雲芝丸嗎? 謝謝
可以。
醫生你好，
我住係加拿大嘅，oncologist 叫我食tamoxifen, 但我唔係好想食，最主要係驚副作用，但佢話我young age, 又有family history, 食左係可以減低復發機會，佢話除左減低breast cancer之外，係減低埋其他organ生cancer, 佢話如果復發係其他地方，多數係liver同lung, 咁就好難醫
但好似好好笑，初時叫我食20mg, 我話如果side effect好勁咁點，佢話可以cut half, 不過隻藥cut half好貴，自己又好難切細落藥, 咁可以隔日食
佢話有d人如果真係完全tolerate 唔到，就會停藥，佢講到咁，好似隻藥食又得唔食又得咁嘅
醫生你有咩睇法？ 謝謝
標準劑量係20mg Daily，唔會因為怕副作用而減劑量。
馬醫生你好！
我想問 我係乳癌二期t1b n1b腫瘤科醫生建議TC×4加電療25次再加荷爾蒙藥舊約藥
想問第一針化療針可唔可以私家做之後第二至第四針喺政府做有冇可能呢？
可以。
長者85,相信骨質都較差，如食letrozole,就會影響骨質，不如食tamoxifen係咪適合些？醫生上面有提及長者可以行保守方法，如果完全唔食，番發的機會率有幾%？如果85歲病人係醫生親人，身體一般，醫生你會建議佢行保守路線嗎？謝謝你。
食Tamoxifen 喺患者感覺方面，會溫和啲。如果係荷爾蒙受體陽性，就唔會建議唔食藥。
你好，我是乳癌1期病人，完成電療及剛完成5年Tamoxifen荷爾蒙藥，公立醫生已停藥，我停藥了大約2個月，停藥後胸部回覆未食藥前排卵期乳房疼，乳房疼是荷爾蒙分泌問題產生，乳癌亦是荷爾蒙分泌產生，請問我這情況做否容易再復發？
希望醫生能夠解答到我的憂慮，謝謝🙇🏻♂️
一期順利過渡5年，算安全。
馬醫生你好,
我今年34歲,
一個月前發現在乳癌, Stage 1A, 1.8cm, ER+,PR+,HER2-,Ki67 15%, pT1c pN0(sn) 做左局部移除手術前哨淋巴冇擴散.
做左EndoPredict Report: Score 3.2, Low Risk, 0-10years recurrence 9%, Chemo -3%
請問馬醫生,我電療加荷爾蒙藥這個治療方案可以嗎?
另外,我有生小朋友既打算, 自已好擔心40歲會有高齡產婦既問題. 同埋都會怕食T藥對卵巢既影響
請問馬醫生有比較折衷D的方法可以比我早D嘗試生育嗎?
如果3年停經針+AI 可以考慮嗎?
呢個方法是否比食T藥好?
如果我3年停藥後有幸順利生小朋友, 之後應繼續食回2年AI/T 藥嗎?
電療加荷爾蒙治療可以。
Tamoxifen 對卵巢冇影響。
要生小朋友，就要暫停荷爾蒙治療，要自己衡量乳癌復發風險。
你個情況唔會用停經針+AI，因為喺治療功效上、或者喺打算生小朋友方面上，冇任何優勢。
生完小朋友就繼續食返藥。
$1000 也想再平？
馬醫生, 您好!
本人44歲, 剛完成右乳全切手術, 現在已服用Tamoxifen 藥大約2個月, 由於想多了解呢隻藥, 係網上做research時, 發現有文章提到呢隻藥會增加排卵, 請問是真的嗎? 那麼, 我長期服用tamoxifen, 每個月的排卵日是否會改變? 日日都排卵嗎? 是否會變得更用易受孕? 我知道服用tamoxifen是不能懷孕的. 以上的疑問, 可以請教馬醫生嗎? 謝謝!
可以增加排卵，經期亦都可能變得紊亂，但唔會增加受孕機會，亦都唔應該懷孕，會搞到畸胎。
下 我屬於一期 ki67:8% 42歲 醫生都系叫我食AI同打停經針 咁會唔會過份治療😔
要視乎淋巴有冇感染，如果冇感染，Tamoxifen 已經足夠，唔需要停經針加AI。
你好馬醫生 乳癌一期 全切乳房 冇淋巴轉移 腫瘤1.9cm 兩陽（8分高）－陰 KI67:8% 42歲（有家族遺傳性乳癌） 冇放化療 以家食緊A l加停經針（三個月一針） 我想問我系唔系可以唔打停經針食舊藥 我剛食Al藥兩個星期 如果可以下個月可唔可以轉食舊藥🙏🏻
舊藥已經足夠，可以唔打停經針。
多謝回復🙏🏻🙏🏻
我已打咗三個月一針停經針 咁我幾時可以轉舊藥🙏🏻
隨時。
你好! 馬醫生, 請問服用Tamoxfen會引致抑鬱, 焦慮嗎? 我44歲, 食左大約2個半月Tomoxifen, 情媎越來越低落, 好唔舒服, 但出汗潮熱呢D副作用我又無乜!
可以影響情緒。
你好, 如果食Tamoxifen 感冒了
可唔可以食必理痛感冒藥 🙏🏻
可以。
“轉藥後出現嚴重関節問題”
我已經食咗tamoxifen 5年，2023年6月醫生話我可以𨍭食letrozole， 約～4個月後手部関節出現僵硬問題,由最初只有少少晨僵，之後更出現左右手中指及右母指彈弓手，右手腕関節痛，每日早上起床時，雙手手指未能完全屈曲，要做一輪手運動先可以屈曲,現在雙手亦只能免強完全屈曲(loose fist only),並需要經常伸展,才保持到loose fist, 手指屈曲伸展亦會痛，揸筆寫字、用鉸剪、扭毛巾等等都受到影響
想知如果想𨍭藥,𨍭其他 AI藥較好，還是轉回tamoxifen ？還是可以停藥較好？
馬醫生你有什麼建議？我真的唔希望因食藥而影響手部功能
可以試吓其他AI，如果副作用都冇改善嘅話，就轉返Tamoxifen。
馬醫生好, Tamoxifen係阻斷雌激素受體而不會阻斷製造雌激素, 同AI阻斷製造雌激素既原理不同
對於未收經的女士, 是不是不會造成性慾低落? 如果會, 應該點做好?
Tamoxifen 一樣會降低性慾。
冇好嘅處理方法。
請問醫生， 我42歲， 食左tamoxifen 兩年， 子宮內膜增生，化驗後 showing foi favouring simple hyperplasia with no atypia.
腫瘤科醫生建議解決方法係割子宮 或者 打停經針加轉AI 藥。 係唔想割子宮之下，我想選擇打停經針， 但打呢隻針安全嗎？
你化驗後都冇非典型，基本上即係冇嘢，唔需要處理。唔需要切子宮或者打針轉藥。
馬醫生您好, 媽媽在2019年(當年74歲)確診2期乳癌, 淋巴有擴散, 已做全切乳房, 沒有化療, 一直食AI將於7月底完成5年藥期, 我擔心停藥就增加復發機會, 可否一直食藥多數年?
可以考慮食足10年。
我之患子宮頸癌做咗電療化療（已經沒有經期來）而家再患上乳癌（已經切除咗整邊乳房及腋下淋巴）28粒淋巴入邊有一粒吾好，想請教一下，我應該食那一隻荷爾蒙藥會比較好？！因為我問政府醫生佢叫我自己揀。
AI