香港乳癌醫生 ﹣ 睇公立好？睇私家好？醫生攻略1
香港乳癌醫生－你知道要搵既係一個好嘅乳腺科外科專科醫生，下一個問題就係「我應該去公立醫？定係私家醫好呢？」
正所謂三軍未動，糧草先行。行軍打仗，咁你梗係睇下自己幾多銀両先，再睇餸食飯、豐儉由人⋯⋯
香港乳癌醫生
你有幾多銀両，冇咩嘢可以討論。不過睇餸食飯呢，就大有學問。首先我哋睇睇個餐牌先：
你會見到公立醫院等得最耐嘅係步驟一至七（即係初診到手術），一去到輔助治療（即係化療／標靶治療／荷爾蒙治療），已經過咗嗰樽頸位，唔使點等。
睇完嗰餐牌，可以開始睇餸食飯喇：
1）$0－$40000：全部去公立啦，做正電子掃描／好啲嘅化療／好啲嘅荷爾蒙治療，係公立都要比錢㗎。
2）$40000－$100000：步驟一至六去私家，到所有野齊晒，再去公立等手術，咁就係用最少錢，以達到加速嘅效果。
3）$100000－$200000／有保險包嘅：步驟一至七去私家，做埋手術先，咁就咩都唔使等。
4）$200000－$600000：唔好以為任我行，都要睇吓自己使唔使用標靶藥，因為標靶加化療，淨係藥錢，係公立成本都要$300000。
5）$600000以上：足夠彈藥自由行，追求乳癌名醫另計。
當你知道自己可以食啲乜，又代唔代表你真係要食嗰啲嘢呢？10蚊又有餐蛋飯，120蚊都係餐蛋飯，咁我食10蚊定120蚊好呢？
下一篇同你探討值唔值咁貴⋯⋯
香港乳癌及乳病治療中心 
答你問題
因為有保險界人士睇到
所以咪係咁share 你的中立意見囉
多謝你為我解開謎團。
pet ct 已經加到13-15k 啦！
其實正價唔止添，有D去到萬八蚊，因為係海鮮價（好聽D叫折扣）。
唔同地方轉介個價係唔同嘅，同一個病人，養和醫院私家醫生轉介要萬八蚊，公立醫院乳腺科收萬三，同一間公立醫院腫瘤科可以收八千。
不過呢家咩野都加價，例如標靶藥herceptin 已經由萬四蚊加到上萬六蚊一枝（440mg），可以預期以上價目表會慢慢跟唔上現價，行文之時（2013年）只係以當年水平供參考，等大家有個初步印象。最終想日日慳日日賺，就要靠自己格價。
本來係私家跟進斷症；再轉介公立先做化療，但因為腫瘤不停有積水，請問轉介公立醫院化療後可以係政府醫院要求抽針抽走積水減壓嗎？因為好近皮膚表面，好驚佢爆。私家醫生話腫瘤科唔會做，要返去抽佢，但抽一次針好貴，有咩辦法？我已經抽咗三次（每星期一次）。
如果有需要／有效果，我相信政府醫院冇咩做唔到，但如果政府醫生評定為冇需要則另作別話。
但係會唔會又轉介我去外科再排期約見…等…等…等….
等待幾乎是可以肯定的。
好不幸、我太太本星期係養和確診乳癌、看了以上介紹、如果真的想1至6项係私家醫生做、手術和後績治療到政府做、但不知怎樣能從私家到政府呢？會唔會要等好長時間呢？對病情會否有影響呢？
直接同私家醫生講想返政府，叫佢寫轉介信返去政府排。
等待就係必需，長唔長就見仁見智，癌症病人心急如焚，等多一日都嫌多，影響病情就係肯定的。
你好！本人在私家確認患有乳癌二期，我已排公立腫瘤科醫生，但要等一星期左右先有得見，我明白公立已經安排得好快，但因為我想盡快開始化療，所以決定開始係私家打，但私家的金額實在太昂貴，請問我可唔可以頭一兩針私家打，剩低之後啲針番公立打？公立會否願意接手？同埋會唔會跟番私家醫生用藥同打法嗎？私家轉公立時間上會唔會接唔到？謝謝
可以私家先開針，之後返公立駁尾。公立會收，方案跟唔跟私家就睇個別情況，時間會接到，最多係喺私家打多一針。
私家醫生初診收左 3,200 …
多謝一直的資訊，感激不盡
我剛確診乳癌二期，正考慮 全切左乳+ 肚腩重建
請問用肚腩重建乳房之後，
肚腩有如何的不適？會多影響生活/情緒 嗎？
🙏🏻多謝回覆🙏🏻🙏🏻🙏🏻
會覺得有個內置腰封硬硬地，亦都可能有少少麻痹感覺。一般嚟講唔會影響情緒同生活。