乳癌雙標靶治療－HER2型乳癌的春天

Posted by in Chemotherapy 化療, Target Therapy 標靶

「你又話HER2型乳癌標靶治療得一隻Herceptin，但我見隔離位病友用緊乳癌雙標靶治療，究竟我又啱唔啱洗？」原來HER2型乳癌已經悄悄迎來治療的春天⋯⋯

乳癌我可唔可以唔標靶治療？馬國權醫生
正廠副廠大比拼，乳癌標靶治療效果相差⋯⋯馬國權醫生
乳癌標靶治療，吊針好？打皮下好？馬國權醫生

HER2型乳癌

好似現實社會所有野咁，喺未講你選擇什麼之前，係要先講你有冇資格選擇。就好似港台節目「我係乜乜乜？」咁，你係乜乜乜先？你咩package先？

HER2型乳癌

圖片來源：香港電台節目＜我係乜乜乜＞截圖

呢篇文章嘅主要對象係HER2型侵蝕性乳癌病友，如果你係HER2型呢個package，請你繼續睇落去。如果你唔係HER2型，咁可以慳返D時間唔洗睇。

「我點知我嘅乳癌係咪HER2型？」

方法有2個：
1）問醫生
2）自己check一check病理報告

「點樣check病理報告？」

搵出以下幾個重點：
1）要係侵蝕性癌（invasive cancer）。原位癌係冇分HER2唔HER2型嘅。
2）HER2陽性（HER2＋）：一係cerbB2 score 3，一係cerbB2 score2 ＋FISH positive。

伸延閲讀：乳癌類型巡禮 － 與你細數HER2型乳癌的歴史

「我係HER2型呀，請講落去⋯⋯」

乳癌標靶藥Herceptin

唔知你仲記唔記得好耐之前我講過，乳癌標靶藥物一線只得一隻，就係叫Herceptin。佢要同化療一齊用先發揮出最大威力，傳統Herceptin加化療嘅組合有三個：

1）TTCH
2）ACTH
3）ACPH

喺2015年12月舉行的乳癌世界大會San Antonio Breast Cancer Symposium之中，發表咗一個重磅研究BCIRG 006嘅10年跟進結果。發現打TTCH同ACTH嘅治療效果一樣，不過TTCH嘅心臟副作用就少好多。可以預期從此以後，TTCH將會一統江湖成為首選，冇咩人會再打ACTH／ACPH。

重點一：TTCH係化療加單標靶的基礎。

乳癌標靶治療

「有單即係有雙啦，咁咩係雙標靶？」

聰明。人總係貪心的，得一自然想二。一隻標靶藥得，自然醫生想雙管齊下，希望可以發展出第二隻標靶藥去加強乳癌控制。

「咁第二隻標靶藥係乜？」

以前好多精力放咗係一隻口服標靶藥Lapatinib度，希望可以Herceptin加Lapatinib，不過副作用太多，始終影響咗佢喺乳癌治療上的定位。就係呢個苦無吋進嘅時候，另一隻明星標靶藥已經悄悄地空横出世，佢就係今集嘅主角－Pertuzumab（Perjeta）。

乳癌標靶藥Pertuzumab

「Pertuzumab係咩黎㗎呢？」

佢係一隻吊針標靶藥，2012年美國推出市面，2014年引入香港，詳細藥理可以去乳癌類型巡禮 － 與你細數HER2型乳癌的歴史睇睇，重點只要知原來佢加埋Herceptin效果非常好。

「有咩副作用？」

同Herceptin一樣，都係有可能會傷心臟，所以治療中要定期檢查住心臟。

另外會多D肚屙，同埋白血球過低而發燒（febrile neutropenia）。

仲有一個現實D嘅副作用就係傷荷包，因為隻藥新加靚，你都估到藥廠唔會平比你。

「咁有幾貴？」

Pertuzumab 一針420mg 成本價要$27000，頭一次要打兩針（840mg）之後三星期一針。假設先打最基本六個週期，總共七針藥＄27000 x 7 = $189000，以上未計私家收費（政府當然唔洗收），同理Herceptin條數。如果係擴散無限打雙標靶，條數係好襟計。

「嘩，好鬼貴，有冇得申請資助？」

冇。因為隻藥好新，暫時未有任何一個資助計劃涵括Pertuzumab。不過如果你係公務員或者醫管局員工，可以申請免費。

2018年好消息：Pertuzumab已經納入撒瑪利亞基金名單，第四期乳癌第一線用佢加標靶Herceptin加化療Docetaxel，可以申請資助。以後唔洗怕冇錢冇得醫，有靚藥但用唔起（成幾十萬）。

乳癌雙標靶治療

「咁幾時用？如果真係好，錢都要自己諗辦法⋯⋯」

因為隻藥好新，佢係乳癌治療上的定位醫生仲摸索緊。呢一刻（2016年2月），美國FDA開咗綠燈的情況有兩個：

1）第四期乳癌
2）術前化療加雙標靶

第四期乳癌

因為成效顯著，Docetaxel-Herceptin-Pertuzumab已經成為初次確診（即係之前從未用過任何標靶藥／化療藥）第四期HER2型乳癌的首選。

「有幾好先？」

原來加埋Pertuzumab落去Docetaxel-Herceptin度，可以令原來存活中位數（median overall survival）由40.8個月，增加去到56.5個月。條命足足長咗成15.7個月，即係成年有多，呢個係一個好驚人的數字，唔怪得藥廠收咁貴。

乳癌

圖片來源：Genentech

「咁實際點樣打法？」

化療加雙標靶每三星期打一針，總共打六針（化療因應個別情況有可能增加），之後淨雙標靶每三星期一針（無限打），直至身體頂唔順／荷包頂唔順／乳癌細胞不再受控制為止。

乳癌治療

「無限打，咁條數點計？」

都幾襟計。假設喺政府醫院打（即係已經最平啦），化療Docetaxel唔洗錢，Herceptin要睇下申唔申請到資助（由全資助到全自費不等），Herceptin一年大概＄300000，Pertuzumab打半年要用＄243000（＄27000×9），打一年要＄486000（＄27000×18）。之後繼續打繼續計⋯⋯

2016年7月更新：HER2型第四期乳癌病友好消息，Pertuzumab 嘅母廠提供優惠，如果擴散第一線打雙標靶（Pertuzumab + Herceptin），頭兩年公立病人只需比Pertuzumab錢，藥廠送Herceptin，可以慳咗成60萬。另外如果有幸繼續打落去，2年過外兩隻都免費，真係病人之福。

2018年好消息：Pertuzumab已經納入撒瑪利亞基金名單，第四期乳癌第一線用佢加標靶Herceptin加化療Docetaxel，可以申請資助。以後唔洗怕冇錢冇得醫，有靚藥但用唔起（成幾十萬）。

乳癌治療方式

2018年1月更新：最近發現羅氏大藥廠整咗個幾全面嘅乳癌教育網頁，http://her2morrow.com.hk，有興趣嘅朋友可以去睇下。

術前化療加雙標靶

另外一個開綠燈的用途就係要打術前化療加標靶的病友。

「有幾好先？」

暫時知道加埋Pertuzumab落去術前化療標靶度，可以令手術時乳癌全消失（pathological complete response, pCR）嘅機會率大概增加約一倍。至於命仔係咪長D，暫時都未有數據去肯定／否定。

「咁實際點樣打法？」

上面提過化療加單標靶主力係TTCH，今次我地就加埋Pertuzumab落去，變成TTCHP。化療加雙標靶每三星期打一針，總共打六針，之後做手術，手術後淨單標靶Herceptin每三星期一針，直至打足一年Herceptin為止（即係總共17至18針，或者可以睇成手術後打11至12針）。

乳癌治療指引

「呢次條數又點計？」

今次平少少，雖則都仲係好貴。假設喺政府醫院打（即係已經最平啦），化療TT-carboplatin通常唔洗錢，Herceptin要睇下申唔申請到資助（由全資助到全自費不等），Herceptin一年大概＄300000，Pertuzumab要用＄189000（＄27000×7）。

其他情況

「我唔係以上兩個情況，咁又用唔用得雙標靶呢？」

暫時我地仲等緊研究數據，先敢講Pertuzumab係其他情況的定位。例如手術後化療加標靶，用雙標靶係咪好過單標靶呢？雖然暫時係唔知，不過觀乎以上兩個情況咁好反應，假以時日，Pertuzumab被更廣泛採用，我唔會覺得奇怪。

2017年12月更新：美國食品藥物管理局（FDA）已經批出雙標靶藥物在高危復發病人術後輔助治療的應用。

HER2型乳癌的春天

多咗呢隻Pertuzumab，有錢的HER2型乳癌病友真正迎來治療的春天。係，冇睇錯，係有錢人先係春天。冇錢的病友，唔好灰心，加油呀，加油搵錢呀～

既然講開錢，下一篇幫你計吓數，成個化療標靶療程有咩地方要用錢／用幾多，仲會教埋你點申請傷殘津貼。

密切留意「乳癌化療費用 － 要用幾多錢？貴唔貴？」

相關醫學專欄：治療新突破 兇惡乳癌可望根治

馬國權醫生

有唔明？係下面寫低佢，我會盡量解釋你聽⋯⋯

封面圖片來源：互聯網