懷孕中乳癌治療攻略 － 腹中BB點算好？
「我地嘅BB仲有幾個月就出世，可惜天意弄人，老婆呢個時候確診有乳癌，究竟仲保唔保到個胎？」懷孕中有乳癌，的確係一個棘手問題，呢次「懷孕中乳癌治療攻略」我地一齊睇吓點保住個大時又保住個細⋯⋯
懷孕中有乳癌
「乳癌我聽人講有好多治療要做，又咩手術、化療、電療咁，但我老婆啱啱先有咗，咁點算？」
「落咗去（中止懷孕）⋯⋯」呢個係醫生最直覺嘅答案。
亦都係病友／老公最唔想聽到／最唔鍾意嘅答案。
喺醫生嘅角度，梗係醫咗乳癌先，保咗媽媽嘅命，先仲有家庭、先仲有將來⋯⋯
喺準父母嘅角度，除咗媽媽條命，BB條命一樣重要⋯⋯
「我地就係想保住大時，又保住個細麻！我地呢胎得來不易⋯⋯」
如果想保大時，又想保細，咁就要考慮以下三個問題：
1）願唔願意承擔「治療可能對BB有害／有後遺症」嘅風險？始終懷孕中接受治療，如果BB有咩冬爪豆腐（早產／流產／畸形⋯⋯），總之有關冇關嘅野，都關／都瀨治療事㗎喇，呢個時候一定自責／責怪醫生揀錯治療。因此要問自己，究竟心理準備好未？願唔願意承擔「治療可能對BB有害／有後遺症」嘅風險？
2）之後BB照顧問題？究竟媽媽係早期定末期？醫唔醫得返好？如果媽咪要長期接受治療／甚至日子有限，究竟邊個照顧小朋友？
3）第時如果不育點算？乳癌治療有可能影響第時生育能力，如果呢次選擇落咗去，第時冇得生時，會唔會抱憾終身？
如果諗清諗錯以上三大問題之後，答案都仲係想保住BB嘅話，好，我就帶你去睇吓我地點樣調節乳癌治療五寶：手術、化療、標靶治療、電療、荷爾蒙治療，希望保到個B之餘，媽媽嘅治療亦都妥善處理。
懷孕中乳癌手術篇
首先，返去睇返一般人做乳癌手術有咩過你揀：
乳癌手術 1 － 開刀我有咩可以揀？
乳癌手術 2 － 保留乳房手術 ，我做唔做得？
乳癌手術 3 － 保留乳房手術 ，我揀唔揀好？
乳癌手術 4 － 乳房重建手術 你要知
乳癌手術 5 － 前哨淋巴結活檢術？咩黎㗎
乳癌手術 6 － 專做乳房手術醫生的增值服務
義乳的秘密 － 重建乳房手術外的另一片天
「啱啱睇完，咁懷孕中有咩過我揀？同一般人有咩分別？」
1）乳房方面：傾向全乳房切除，因為希望避咗電療，尤其係懷孕仲喺初期階段（first trimester）。如果懷孕已經去到就足月（third trimester），都仲可以諗吓保留乳房，因為可以生完先電。
2）腋下淋巴方面：傾向全淋巴切除，因為現階段醫生唔敢拍心口話前哨淋巴百分百安全（雖然外國有人照做）。
3）乳房重建：超大型手術都係遲D先搞喇。
懷孕中乳癌化療篇
又係返去重溫舊文章：
乳癌化療需知 － 我洗唔洗化療？
乳癌化療時間 － 手術前做？手術後做？
乳癌化療需唔需要 － 著數計算機火併乳癌基因測試
乳癌化療AC針TC針 － 乜藥黎㗎？
乳癌化療選擇 － 咁多組合點樣揀？
乳癌化療費用 － 要用幾多錢？貴唔貴？
乳癌化療療程 － 吊針過程大公開
乳癌化療甩頭髮 － 點處理？幾時生返？
乳癌化療嘔吐 － 終極止嘔藥
乳癌化療副作用 － 辛唔辛苦？點處理？
乳癌化療期間之飲食 － 點補身？洗唔洗戒口？
「其實懷孕期間化療安唔安全？」
醫學文獻就話懷孕中至後段（second to third trimester）用化療其實安全嘅。不過你估都估到，呢D研究都唔方大型，參與人數唔會好多，所以大部份醫生嘅疑心都係好重嘅，間接導致本地經驗唔多，所以通常都係勸你係做化療都生完先做。
懷孕中乳癌標靶治療篇
呢個就唔洗溫書喇，因為標靶治療喺懷孕中係唔做得嘅。標靶藥Herceptin係有機會導致流產、胎水小（肺部發展不健全）、或者骨胳問題。
當然，如果真係有需要，可以生完先補做返。
懷孕中乳癌電療篇
同上面一樣，懷孕中又係唔電得，因為有輻射，可能導致流產／畸形。生完先補電又係唔同講法。
懷孕中乳癌荷爾蒙治療篇
Tamoxifen都係唔用得，因為可能會導致畸胎／流產。都係嗰句，生完先食返。
懷孕中乳癌治療攻略
睇完細項，去睇結論：
懷孕中有乳癌要治療，首先考慮三大問題去決定要唔要BB。如果想保住BB，一般黎講，都係先做手術（全乳房同全淋巴切除），加減同一時間生埋BB（要睇吓夾唔夾到），之後如果有需要而又勇嘅，就懷孕中做埋化療（或者推遲生完先做）。至於標靶治療／電療／荷爾蒙治療／乳房重建手術，就等生完BB，有需要先做。
呢度可以幫你嘅野就係咁多，最後送上祝福：祝你母子平安。
今次講完嫩，下次到講老：「老人家乳癌治療攻略－唔做手術／治療得唔得？」
香港乳癌及乳病治療中心 