老人家乳癌治療攻略 － 唔做手術／治療得唔得？
我媽媽有乳癌時已經80歲喇，醫生建議佢做手術，不過我怕佢頂唔順，究竟老人家有乳癌唔做手術／治療得唔得？呢次老人家乳癌治療攻略帶你睇吓做咩治療最唔傷⋯⋯
老人家乳癌
唔知你仲記唔記得／有冇睇過，一個好耐之前講過嘅一個概念：年紀越大越易生乳癌。正正因為呢個原因，好多時病友家屬要面對嘅問題就係「佢已經70／80／甚至90歲喇喎，究竟乳癌可唔可以唔做『治療』？」
你只要將以上句式「治療」兩個字，自由代乳癌五寶「手術／化療／電療／標靶治療／荷爾蒙治療」入去，咁就成為典型問題，就好似「佢已經70／80／甚至90歲喇喎，究竟乳癌可唔可以唔做手術？」咁。
不過喺同你探討呢個典型問題之前，當然要加個警告字句：
警告：乳癌種類繁多，身體體質人人不同，心理取向更加是分秒轉變，乳癌治療方案應與自己醫生商量制定，千萬「不要」因為以下文章而做定唔做某一治療。以下內容僅為分享個人見解，帶有強烈個人色彩，不保證內容中立，敬請留意。
警告完之後終於可以入正題，其實呢個典型問題嘅核心就係「我怕佢頂唔順／怕治療辛苦／都幾廿歲唔好搞咁多野啦」，面對呢個複雜問題，係冇可能一篇文章可以解釋得清楚，不過有幾樣野知道咗係幫到你易D去做決定：
1）什麼治療最傷／最唔傷？（咁你先知佢頂唔頂得順／辛唔辛苦）
2）什麼治療成效最大？（咁你先知值唔值得去做某某治療）
3）仲有／仲想要幾耐命？（咁你先知治療係「搞咁多野」定「唔算搞得多野」）
1）什麼治療最傷／最唔傷？
如果要講治療副作用嘅排名，我會咁排（由最溫和至最多副作用）：食藥＜手術＜電療＜標靶治療＜化療。
以下喺一個圖像化嘅表達，等大家易明D我心目中嘅排名。每個人睇事物嘅方法都唔同，有人關心A副作用，有人看重B副作用，根本唔可能有一個統一客觀量化嘅比較。以下所依據的是我個人嘅知識／觀察同體會，係唔客觀嘅。
食藥（荷爾蒙治療）：呢個係最溫和嘅，日日食一粒藥，可以感覺得到嘅副作用其實有限，同埋有咩唔妥可以隨時轉藥／轉計劃，不過前提係你隻乳癌有荷爾蒙受體（ER＋）先得，好在老人家乳癌通常都係ER＋嘅。
手術：好多人一聽到（老人家）要做手術都怕怕（因為大部分人都未做過手術／冇相關經驗），其實老人家同後生做乳癌手術都係面對同樣問題，分別只係麻醉風險輕微上升（當然講緊本身相對健康嗰D，有長期病患就要個別評估），不過整體黎講都係好安全嘅。
電療：副作用一般，都係皮膚灼傷，不過老人家黎講就麻煩D，因為日日去醫院，如果行動唔方便／要後生日日陪都幾麻煩。
標靶治療：可能會傷心臓，同埋通常撘埋化療一齊做，所以喺老人家身上要小心D，有時就算HER2＋型醫生都未必建議做標靶治療。
化療：呢個就最傷，除咗A針可能會傷心臓之外，仲有一系列副作用。呢個亦都係神棍用黎攻擊西醫嘅常見手法：「化療／西醫好傷身㗎，試吓另類治療先啦⋯⋯」，往往令病友錯過黃金治療機會。化療係傷，不過都唔洗一竹篙打一船人（因為所有治療並唔係捆綁式的），用唔用某某療法嘅決定權其實喺自己手上，呢個係一個平衡完好處同唔好處嘅理性決定。
2）什麼治療成效最大？
呢次個排名，我會咁排（由成效最大至最小）：手術＞食藥、標靶治療、化療＞電療。都係嗰句，純粹個人體會，係唔客觀嘅。
手術：成效一定最大，因為成個腫瘤切左佢，如果冇擴散，手術係根治個病，其他四樣治療係做唔到「根治」呢個效果。
食藥：如果選擇唔做手術，呢個係一個好選擇，因為日日食藥，長期有野控制住乳癌。不過都係嗰句，要ER＋先得。
標靶治療／化療：雖然係全身性治療，不過副作用大，搞到性價比唔高。
電療：局部治療嘅一種，達唔到整體長期控制嘅目標。
綜合以上兩個排名，你可以見到／估到，大部分老人家都係揀手術／食藥，加減電療，好個別情況先會做埋化療／標靶治療。
3）仲有／仲想要幾耐命？
呢個就要睇你第幾期乳癌同埋而家幾多歲，以前D人就話人生七十古來稀，而家70係非常普遍，香港女性人均壽命去到86，當你有癌症打個折80歲先算，70歲病友仲有10年行（申延閱讀：香港乳癌存活率：我仲有幾耐命？），太早放棄主流治療／根治性手術係不智嘅。
話分兩頭，如果你90歲，本身已經長命過人，看破塵世，每過一日都心懷感激「醫生幫你日日賺」，咁你揀一D保守D嘅治療係可以理解嘅。
老人家乳癌治療攻略
如果年紀相對後生，身體相對健壯，仲熱愛生命，治療就揀做乳癌手術，ER＋就食埋藥。個別病情有需要，性格又進取，身體又頂得順，先做埋電療／化療／標靶治療。
如果年紀相對老邁，身體多毛病，樂天知命，ER＋就抗荷爾蒙藥「食住先」，希望可以「食一世」。睇反應／情況，先考慮做唔做手術，至於化療／標靶治療／電療呢D就太遙遠喇。
最後長氣都要講多句，乳癌治療有5寶：手術、荷爾蒙治療、電療、化療同標靶治療，老人家揀咩野治療唔係捆綁式，好似去茶樓飲茶點心紙咁，鍾意嗰樣先剔嗰樣。千祈唔好因為怕「某某」治療，就放棄「全部」治療，走去試D古靈精怪野，我敢講呢D另類治療九成九呃人，最終受害嘅係自己／自己心愛嘅媽媽。
下一次，教你點樣「醫乳癌公私營合作 － 教你點保障自己」⋯⋯
香港乳癌及乳病治療中心 
感謝醫生又寫文，對老人家多好多疼愛，謝謝您。
醫生你好，我婆婆70歲最近被確診為乳癌，但佢同平時個樣生活習慣都差不多，只係易攰小小，腫瘤有3.7cm。我想問老人家容吾容易係末期同埋想問隻癌係咪應該比年輕人冇甘惡？因為下星期先做手術同埋照一部機睇有冇擴散，所以想求個安心。吾該哂你
第幾期就要照咗同做咗手術先知，年齡同第幾期冇一個關係。大方向係老人家「相對」後生冇咁惡。
吾該哂醫生，有咩新消息再同你講
你好醫生，我婆婆做完手術，今年70歲，岀左院。確診為第三期，3.8cm同有6粒淋巴擴散。但由於做手術個個醫生話割岀黎既面積比較多，有800幾g，因為婆婆粒野已經有2年幾。所以佢建議我地打埋化療(佢覺得婆婆身體支持到)，FAC針x3 加Docetaxel 針x3，可以食荷爾蒙藥但未知可吾可以打標靶。我想問你既意見係做咩治療？純粹想聽到個意見參考，因為我聽到有d醫生話化療吾辛苦，有d就話驚辛苦頂吾住，我地都有d混淆，所以好想聽下你既專業意見，吾該哂。
要見過個人先可以評估到。
醫生你好，我婆婆依加打緊化療第一針，但佢胸個到d血水成日搞到佢吾舒服。我地完成左手術大概一個月，拆左引流。我想問d血水幾時先會冇，同埋有咩方法可以令佢舒服d，thx a lot
呢D由手術醫生答最好，佢最清楚。如果太多積水，都係抽咗去再加壓力衣去處理。
我想問化療期間係咪吾可以抽？同埋胸口痛係咪正常，thx a lot
可以抽。唔正常。
醫生你好，我婆婆已經打緊第6支化療針，亦都係最後一針。初時確診為第3期有6粒淋巴擴散，想問下需吾需要岀私家診所補再多2支化療針？定完左本身個6支再電療就可以了，謝
唔係淨睇支數，好多因素要考慮的，要問返自己醫生。
你好，感激你既善心，我媽媽79歲有高血壓，腰骨灣曲45度，5月中才發現右胸有硬塊，超聲波加抽針驗有癌，私家A醫生話冇擴至淋巴及冇痴住肌肉，建議安排入院先評估心肺，ok就可手術切除。私家B醫生建議，去政府醫院處理(因政府有深切治療部)。琴日到左Q醫，佢話應該係三期及有8cm大，定左7月尾見麻醉科醫生評估，如Ok 就8月10號做手術。但如果吾做手術，可以點治療？腫瘤會幾耐惡化？定係搵返私家？但媽媽吾想做手術，怕之後要化療，想靠飲中藥排毒會好，感激幫忙。
而家先6月，8cm咁大的瘤怕就只怕等到8月10日已經惡化。
治療方向要睇埋癌細胞屬性。
靠飲中藥唔會好，只會害死佢。
搵私家做手術會否危險d？點樣會知有冇惡化到？同埋要檢查咩先會知癌細胞屬性？私家會否因想接手術，而風險高都照接？我應該怎做好？萬分感謝你!
搵私家做手術唔會危險D，只係如果要深切治療部支援的部，張帳單唔係講玩。
喺抽粗針的樣本做測試已經可以知道屬性。
接唔接手術，唔同醫生有唔同準則。
Dear doctor, my mom is 67 years old and has either stage 2B or 3A breast cancer. She has two tumors in her left breasts. Both IDC and DCIS are identified, measured at 2.5cm and 2.2cm respectively. She had a mastectomy and removal of auxiliary lymph nodes. 3 out of 14 lymph nodes were involved. One lymph node enlargement is measured at 7.2 cm and extra nodal extension is present.
Her subtype is ER+ (90%), PR-, and HER-.
My mom refused chemo therapy but is willing to go through radiation and hormone therapy. She is receiving treatments in the US and the doctors here recommended chemo as an insurance. My mom feels that she is 67 and doesn’t want to take the risk of the long term side effects caused by chemo.
I support her decisions but I am worried about her… how are her chances without chemo in her case??? Other than breast cancer she is overall healthy.
Thank you very much!
What are the tumor grade, Ki67, size of invasive foci?
Thank you for your reply. Tumor grade is a 3. Ki 67 unknown. maximum size of invasive foci is most likely 2.5cm, but i am not 100% sure.
Without 6 cycles of chemotherapy, her overall 10 years survival will be 11% less.
How much % will chemo improve her survival rate?
11%
Thank you! Your blog has been really informative. Thanks again.
你好,我想問, 我媽媽72歲,上個月確診乳癌,剛在外地做了乳房切除手術. 當地的醫生說要做化療同標靶藥治療, 但她想在香港做, 想問一下程序上要點樣處理, 是否可以網上見你們的醫生先取一些意見？她有當地的醫療報告 Subtype Her2+. Grade 3 (T3, P3, M2) 11mm and 11mm + 1mm fragment. All embedded in A1 (3), levels1-3
需要個人化的建議，面談係比較合適。
你好, 我媽71歲, 確診乳癌三期(屬三陰性), 右胸腫瘤<1.5CM, 淋巴腫瘤2.6CM, 未擴散, 沒有長期病患. 想請問一般療程是先化療後手術嗎? 長者是否要先手術後化療? 成效會否打折?三陰性三期存活期可有幾耐?
年紀唔輕，如果肯化療的話，先化後手術。10年存活率大概50%。
謝謝! 我媽是三陰性第3C期, 現在政府只安排我媽做術前化療(每2週EC針 X4, P針 X4, total 8 針 16週), 想請問免疫治療是否只能用於晚期已擴散病人身上? 可否配合用於我媽術前化療上? 若可以, 可在哪裡做? 若術前用了免疫治療, 術後是否仍要繼續免疫治療? 會否出現抗藥性?
晚期已經可以考慮，唔一定要擴散左先用。
術前化療上面加免疫治療，已經開始有啲初步數據話得，不過未得到FDA正式批准。如果香港，我諗只可以係參加研究或者係私家先做到。術後通常打足一年免疫治療。有冇抗藥性而家冇人知，不過通常都會有，唔會咁理想冇。
你好, 我媽已在政府醫院進行化療(三陰性第3C期, 已打第3針EC針, 每兩星期一針), 腫瘤有收細, 請問最佳的手術時機是在什麼時候? 化療中段做手術, 之後再繼續化療? 還是完成整個化療療程後做手術?
完成化療後才手術。
醫生你好，我媽媽今年79歲，確診乳癌第2B期，剛做全乳切除手術，腫瘤4.2cm，淋巴有3粒(out of 22 粒)有發現, 未擴散。病理報告指Ki-67: 65%, grade 3, ER+, PR+, Allread score for ER and PR: 8, Her2 negative。想問下如此情況是否需要化療? 定係電療同食藥已足夠?
年紀大，電療加食藥已經足夠，唔化療咯。
謝謝醫生解答。因為真係好兩難，化又驚頂唔住，唔化又驚復發。
媽媽79歲有乳癌，可能3期，本身有腦退化，柏金遜，營養不夠，吞嚥有困難，需坐輪椅，是否不適合手術？電療/化療等。謝謝!
牌面上睇落去唔適合做手術、電療、化療，最溫和就係食抗荷爾蒙藥（前提係要荷爾蒙受體陽性）。
醫生你好！我媽媽2022年年初確診患上乳癌，當時我們很慌張，幸好找到BreastHK網站，才令一家人鎮定下來，實在感謝你！就媽媽的病況，我們有一些問題，如蒙回覆，不勝感銘！
媽媽今年74歲，去年底因骨折入院，期間確診雙邊乳癌，公立醫院的醫生建議她進行雙邊全乳切除手術，但因為她體弱多病，有抑鬱和類風濕關節炎等長期疾病，也曾患過多發性骨膸瘤和腦中風等，故我們傾向保守治療，只食抗荷爾蒙藥。
現在骨折初癒，公立醫院的醫生又提出做手術。之前外科醫生曾解釋，做手術才可以根治乳癌；食藥雖然在初期可能可以有效控制，但擔心一、兩年後會出現耐藥性，令縮少了的腫瘤再次變大，甚至蝕出皮膚和出現轉移，到時想做手術也未必有醫生願意。
1. 媽媽說她不擔心手術失敗，但如果出現手術後遺症，就生不如死了。請問，既然醫生仍願意替媽媽做手術，我們是否應該讓她接受手術？
2. 媽媽骨折初癒，現在只能在有人協助上落床、站走來和坐下來，以及使用助行架行幾步，手術後她的行動能力能否維持或只會轉差？我們很擔心她之後只能臥床……
3. 如果不做手術，只服食抗荷爾蒙，請問是否需要定期監測腫瘤情況？如是，需做什麼檢查呢？
____
公立醫院醫生在2022年3月10日為媽媽寫的轉介信上這樣寫：
PHM:
– Seronegative RA
– Myeloma
– Old CVA with left hemiplegia
– hx of Pituitary microadenoma
– severe depressive episode with psychotic symptoms, hx of prolonged stay in KH Psy
– HT
– Dyslipidemia
MMG/USG 14/1/2022:
– BIRADS 4B complex cystic mass 5.0cm x 2.5cm x 4.5cm R8H 1cmFH
– Another BIRADS 4B mass at L2H 2cmFH 1.4cm x 0.8cm x 1.2cm
– Axilla NAD
R8H biopsy: DCIS
L2H biopsy: DCIS with small focus of IDC
Physical exam showed
R8H 1cmFN 4.5×4.5cm mobile hard mass; skin intact
primary closure feasible
No palpable L breast mass
No axillary LN
____
公立醫院麻醉科醫生在6月底的評估：
– 手術死亡率為1-2%，各種併發症風險為6-30%不等。
– 由於曾試過深部靜脈血栓，手術時需要在腳部血管內安裝支架。
– 由於傷口較易發炎，術後初期需入住深切治療部監察。
– 如傷口有膿，可能需要再做手術放膿。
– 由於正服用抗抑鬱藥，術後可能會神智不清。
1）應該接受手術。
2）手術唔影響行動能力。
3）需要定期監察。用超聲波。
感謝回覆！
如果40幾歲，做完手術，ER+, PR+, Her2-,Ki67:50%, Oncotype test:30,
打完－針CT, 副作用大，酐酵素過高，Gamma GT去做二百幾，之後停藥，有慢慢回落…仲值唔值得繼續打化療？怕即使換藥，對身體傷害都大.. 好掙扎，難做決定，可否俾D專業意見，十分感激🙏
考慮減劑量、或者轉藥。
媽媽今年89歲, 醫生懷疑佢乳癌轉移到背脊, 醫生提議我做PET scan, 有需要做電療, 但係真係擔心電療對於89一個婆婆係咪真係頂得住, 醫生有叫佢打骨針, 因為佢嗰啲骨嘅密度係-2.5, 唔知點樣選擇
跟足醫生指示去做，電療同骨針好少事，頂得順。