乳癌零期治療攻略 - 原位癌有咩咁特別?

Posted by in Treatment 治療方法

上回講到原來乳房原位癌喺金錢上/命仔上/手術上/化療上/標靶上/電療上/食藥上,同侵蝕癌有好大分別,呢次同你深入淺出-「乳癌零期治療攻略-原位癌有咩咁特別?」⋯⋯

乳癌零期金錢篇

「仲咩一開始就要講錢,睇小我呀?」

唔係睇小你。因為好多病都係冇錢冇得醫,有錢有得醫,多錢醫得仲好D。你見嘉誠哥八十幾歲都仲咁健康就知我冇講錯。

一開始就講錢,係希望話你聽「唔好高估自己嗰份危疾保險」,因為乳房原位癌9成9冇得賠/賠唔足。(乳癌治療費用 - 危疾保險保唔保?

當你冇高估自己份危疾保險,加埋返去計計自己銀行戶口/私己錢/床下底月餅罐錢,之後睇埋以下嘅乳癌零期治療攻略,就知原來邊D治療要做,邊D治療唔洗做,最後就會決定到去私家醫好、定公立醫好、點醫先最好。(香港乳癌醫生 ﹣ 睇公立好?睇私家好?醫生攻略1

乳癌零期命仔篇

「錢唔係問題,我關心我條命有幾長多D~」

講命呢,乳房原位癌叫最好嘅癌症㗎喇,有得醫返好嘅,9成人有15-20年命「以上」

「咁嗰1成人呢?」

主要就係復發(仲要係侵蝕性嗰隻),所以冇咁好彩有咁長命。因此唔好輕視乳房原位癌,唔好再信保險公司嗰D咩「癌前病變/存活率好好⋯⋯」。原位癌都係要醫嘅,搞唔好,係會侵入性復發死人嘅

「咁點醫?」

醫侵蝕性癌呢,我地有5大法寶:手術化療標靶治療電療抗荷爾蒙治療。(乳癌治療方法 - 我需要用咩方法醫?1 乳癌治療時間 - 我需要用咩方法醫?2

醫原位癌呢,原來5大療法都有唔同

乳癌零期手術篇

乳癌零期治療攻略

同侵蝕性癌一樣,手術係醫原位癌嘅主力,即係一定要做。不過做法都有少少唔同。

「有咩唔同?」

就係未必洗割淋巴。

仲記唔記得我喺「乳房原位癌 - 究竟係唔係乳癌?」講過,原位癌即係浸膜未穿,未穿即係理論上癌細胞冇可能擴散去其他地方,包括淋巴,所以係大部份情況下,係唔洗做淋巴手術嘅(包括前哨淋巴

乳癌零期治療攻略

「大部份情況?即係小部份情況要做淋巴手術?」

正確。最常見有以下情況:

1)全乳房割除。呢個時候醫生通常會同你傾,順唔順手做埋前哨淋巴。因為怕之後如果病理報告返黎,先話原來個乳癌有侵蝕性,咁就錯失咗一個做前哨淋巴嘅最佳機會

2)個腫瘤好大醫生唔多信淨係原位癌咁簡單,覺得可能有侵蝕性,不過手術前抽粗針抽唔中。

3)惡嘅原位癌(high grade DCIS)。同上面道理一樣。

4)私家醫生手術前冇抽粗針。根本手術前唔知有冇侵蝕性,入手術室先做加減手術。(伸延閱讀:乳房檢查 三步曲3 - 乳房抽組織檢查

「咁除咗淋巴之外,手術仲有冇唔同?」

冇。幅度/選擇都係一樣。你可以揀嘅就係局部乳房切除,定係全乳房切除加減乳房重整。

乳癌手術 1 - 開刀我有咩可以揀?

乳癌手術 2 - 保留乳房手術 ,我做唔做得?

乳癌手術 3 - 保留乳房手術 ,我揀唔揀好?

乳癌手術 4 - 乳房重建手術 你要知

義乳的秘密 - 重建乳房手術外的另一片天

乳癌零期化療篇

乳癌零期治療攻略

「咁化療又點呢?」

好消息!原位癌係唔洗化療嘅,因為本身存活率已經好好,化療係冇額外幫助嘅。

咁你而家唔洗咁驚化療副作用/甩頭髮咁啦!你唔洗做化療呀!

乳癌零期標靶篇

乳癌零期治療攻略

「咁標靶治療又點呢?」

又係好消息!同樣道理,原位癌都係唔洗標靶治療嘅,現階段,冇證據話標靶有幫助。

咁你而家唔洗擔心嗰30萬點籌返黎啦!你唔洗做標靶呀!

乳癌零期電療篇

乳癌零期治療攻略

「咁電療係咪又唔洗做呀?」

咁又唔係。電療係要做嘅,當手術你揀咗乳房局部切除時。相反,如果你揀全乳房切除就唔洗電療。

不過都有好消息!相比侵蝕性癌係電少5次,因為唔洗腫瘤位置加電(tumor bed local boost),即係最少電15次就搞掂

乳癌電療大解構-原來唔洗驚

乳癌零期抗荷爾蒙篇

乳癌零期治療攻略

「係咪都有好消息,唔洗食藥?」

食唔食藥,就睇你隻原位癌對D藥夾唔夾。

ER-唔洗食藥

ER+就睇你同你醫生信邊套。有2派學說:

1)唔食藥。因為食唔食藥,15年後睇返轉頭,命仔都係咁長。
2)食藥。因為食藥可以少D復發。

乳癌零期治療攻略

「咁我/醫生點決定?」

我地先睇吓食咗5年舊藥Tamoxifen,15年內有咩著數先:
同一邊侵蝕性復發由9%降至6.6%。
另一邊侵蝕性復發由5%降至3.3%。
另一邊原位癌復發由2.8%降至1.6%。
存活率冇分別,都係9成人有15年命以上。

醫生話唔洗食藥,主要係佢將個重點放係存活率度,食咗藥15年都冇長命到,更係唔食啦。
醫生話要食藥,主要係佢將個重點放係復發度,減少復發理應減少擴散,理應會長命D,雖然15年覆診證明到有分別,可能再長期D會有分別呢。

「咁Breast HK你建唔建議食呢?」

我會睇你年紀同埋態度進唔進取。
後生/進取,食。點都好過食埋D冇根據嘅健康產品/試埋D古靈精怪另類療法。
年老/保守,唔食

如果揀食藥,可以食舊藥Tamoxifen5年,因為冇臨床證據話新藥/10年舊藥喺原位癌有效。

(2016年1月更新:而家已經有一D新證據話新藥(AI)喺原位癌都有效預防復發,尤其係收經後及60歲以下女士可能更見優勢。呢D係一D好新嘅野,詳細問返自己醫生。)

乳癌荷爾蒙治療 - 點解我仲要食藥?

乳癌荷爾蒙藥-究竟食咩藥?

乳癌荷爾蒙藥-不同年紀嚴選最正確食法

乳癌零期治療攻略

最後呢個時間表就係你嘅乳癌零期治療攻略:

乳癌零期治療攻略

你只係需要做手術,加減電療/食藥,並唔需要化療/標靶治療。係咪清楚晒?

今次講住咁多先,慢慢消化下。下篇用相同角度,教你「乳癌一期 - 我係咪第1期?」⋯⋯

有唔明?係下面寫低佢,我會盡量解釋你聽⋯⋯

封面圖片來源:互聯網
分段圖片來源:改篇自互聯網