乳癌零期原位癌 － 我係咪0期？
我聽人講乳房原位癌係最好嘅乳癌，好似話咩乳癌零期咁，有好好嘅治癒率。咁究竟我自己係咪0期原位癌呢？呢篇教你點樣分⋯⋯
我係咪乳癌零期原位癌呢？
「我係咪乳癌0期原位癌呢？」
最簡單嘅方法就係問醫生。
「佢話比我聽確診乳癌時，個心都離一離，我已經亂到唔識問⋯⋯」
第二個方法，就係睇返自己抽粗針／手術個報告。［記住，唔係抽幼針個報告，幼針係分唔到嘅。因為原位癌同侵蝕性癌都係癌細胞，所以抽幼針嘅話，大家都係有癌細胞（carcinoma cells present），即係C5（咩叫C5，返去睇睇乳房水囊 ／ 水瘤 － 有冇危險㗎？），根本唔知浸膜穿咗未。］
有齊資料，就可以根據American Joint Committee on Cancer (AJCC) 7th edition (2010) TNM staging 去評估第幾期。
圖片來源：American Joint Committee On Cancer
有興趣嘅，可以㩒入去仔細睇下成個staging嘅細項:
https://www.breasthk.com/pamphlet/breast-cancer-staging_AJCC_7th.pdf
有iPhone 又唔介意比$83嘅（暫時免費嘅我搵唔到一個好用），可以下載以下apps
「自己唔係好識睇，可唔可以講多少少？」
乳癌0期有2個重要因素：
1）乳癌冇侵蝕性（大細係冇關係嘅）
2）腋下淋巴冇受影響
圖片來源：American Joint Committee On Cancer
1）乳癌有冇侵蝕性？
「點知乳癌有冇侵蝕性？」
冇侵蝕性，你個報告會寫呢D字眼（carcinoma in situ／ductal carcinoma in situ／DCIS／intraductal carcinoma／lobular carcinoma in situ／LCIS／No invasion／No invasive foci／No stromal invasion）。
有侵蝕性，你個報告會寫呢D字眼（invasive ductal carcinoma／IDC／invasive lobular carcinoma／ILC／carcinoma／microinvasion／focal invasion／stromal invasion）。
返去對一對，如果冇侵蝕性，睇埋落去。
如果有侵蝕性，即係乳癌1至4期，呢篇唔啱你，請參考其他篇章：
2）腋下淋巴有冇擴散？
「點知腋下淋巴有冇受影響？」
一般黎講原位癌係唔洗做淋巴手術嘅，所以可以假設淋巴冇受影響。
但如果你手術有做到淋巴，就要確定淋巴係冇癌細胞。
淋巴冇癌細胞，個報告會寫negative for malignancy。
淋巴有癌細胞，個報告會寫呢D字眼（metastatic carcinoma／macrometastasis／micrometastasis／isolated tumor cell／ITC）。
確定自己乳癌冇侵蝕性，淋巴冇受影響，即係乳癌零期原位癌。
乳癌零期治療攻略
「Breast HK，點解你咁針著係咪乳房原位癌？同我講D咁深嘅野仲乜？」
咁針著，梗係有原因，當然唔會係「我想同你學術交流」D咁悶嘅原因，嘥你D寶貴時間。（注：我D時間都好寶貴㗎）
咁針著，係因為乳房原位癌喺金錢上／命仔上／手術上／化療上／標靶上／電療上／食藥上，同侵蝕癌有好大分別。
究竟有咩大分別？下篇「乳癌零期治療攻略－原位癌有咩咁特別？」再教你⋯⋯
香港乳癌及乳病治療中心 
我的算是矛盾期？
你個乳癌唔係矛盾期（雖然特別D），只不過係手術前粗針確定唔到侵蝕性姐。你睇吓上面嗰表就知，如果淋巴有擴散，就算搵唔到乳癌源頭（T0），起碼已經stage 2a。
Very informative. Looking forward to reading the next post.
確診原位癌後，3月做局部切除，5月份完成電療，依家仍然有針拮感覺困擾，唔知幾時可以消失?又可以做什麼來舒緩?政府提供的“黃色敏感藥”已失效，現在只能用冰敷當止咳，可以解決嗎?
感覺人人唔同，大部分人初頭都會咁，大概一年以上好D，不過繼續麻麻痺痺亦大有人在。其實冇咩可以做，「黃色敏感藥」係幫唔到件事，只可以耐心等待。
謝謝回覆，另一問題是政府腫瘤科排一年後做超聲波+mammography 做檢查，私家醫生建議半年後做超聲波+mammography,是否因為是原位癌0期?所以不用做CT 掃描?thanks
ASCO guideline（國際指引）寫到明手術後第一個mammography，應該係電完療後半年以上先照，所以如果冇咩特別原因，應該跟返政府腫瘤科嘅建議，一年先再照乳房超聲波／Mammography。
除非除咗局部切除手術之外，仲有其他可疑陰影／鈣化點要跟進，如果唔係，我睇唔到私家醫生建議咁早照嘅理據。
至於CT scan，因為原位癌本身唔會擴散，所以CT搵到乳癌擴散嘅機會可以話係零，所以唔洗浪費金錢做埋D冇用嘅檢查，仲未計CT本身有幅射。
我係原位癌，3月初做局部切除，5月尾完成電療，2年前因交通意外弄傷腰頸，keep 住在廣華骨科覆診，有時因腰傷我腳膝蓋會痛，唔知點解電療期間有時感覺更痛，我話比骨科醫生知，他就叫我做骨掃描，但要打藥物入全身體內才可做掃描，我好擔心因為我對藥物敏感，2年前就是我對腦掃描的藥物敏感出曬全身風癱和氣管收縮，出入醫院，搞左成年至好番，我驚想唔做，好想你比意見我，謝謝
我想補充的是我現在的膝蓋及附近位置都有時痛，企一陣做運動便開始痺痛。(都唔知係咪幾年前膝蓋跌倒過D舊患有關呢？)
照咗骨掃描，係有多D資訊話比我地聽，究竟骨痛關唔關乳癌事。不過你好唔想照，咁有以下建議話比你聽：
1）照咗搵到野嘅機會好低，因為原位癌理論上冇可能擴散，加上你D痛係有明顯原因／舊患，所以唔關事嘅機會多，值唔值得去照你要考慮吓。
2）唔照骨掃描，都仲有好多野可以睇吓點解痛多咗，例如普通X光照吓痛嘅位置。因為明顯嘅骨擴散X光都睇到嘅，同埋X光係會分別到D痛係唔係由舊患退化引起，仲有一個好處係你有舊X光片可以對比有冇變化。
3）另外可以抽吓血驗吓癌指數，如果真係高咗（即代表大D機會係骨擴散），咁就有多D理據去說服自己去照骨掃描。
4）照骨掃描打嗰D顯影劑同腦掃描嗰D顯影劑係唔同野黎，以前敏感唔代表而家會敏感。不過既然你有敏感病歷，照骨掃描前可以食定防敏感藥以減低敏感機會。
5）要檢查咗，問返自己醫生，先決定到你D痛（包括膝蓋）關唔關舊患事。
非常多謝你詳細的分析，但仍想問bone scan的幅射 大嗎？D顯影劑會殘留在身體？有害/副作用嗎？
For your information, 上次照腦掃描時, (我住緊院)醫生在照前每隔4小時幫我打一支類固醇，共打4支，再加一支敏感針，所以敏感反應至無咁大，但都搞左成年，咪話唔驚！
記得私家醫生幫我做乳房局部切除時也有做淋巴追蹤（及切割化驗）嗰時都有打同位素和scan，我就無嘜敏感，這個又是另類同位素嗎？
5月份做完電療，當時痕痛感覺是7:3比例，知道要時間康復，但現又過3個月，痕痛感覺是4:6比例完全不覺有進展，現在是痛感蓋過痕感，有時痛楚感覺是前到後(極痛);位置都不是手術傷口(是電療乳房的前中及外側)，藥物完全不能舒緩，想到可能要忍受幾年就非常憂慮及沮喪，我可以得到怎樣的舒緩?
其實好多藥物可以止痛，我相信你應該冇試過晒，可以同你醫生傾傾仲有咩藥可以試。
如果唔想食藥，就可以試吓冷敷／熱敷，冷敷通常舒緩發炎引起嘅痛楚，而熱敷就用黎鬆弛緊張嘅肌肉。
我見MRI報告有寫DCIS是否無入侵性呢？
large segmental area of.heterogeneous enhancement in the right breast with.type 3 signal intensity time graph,positive restricted
diffusion highly suspicous for DCIS with or without focal carcinoma.
two additional lesions seen at right 2:00 plastered against.the chest wall these lesions are indeterminate. they are too close to the chest wall for.biosy. consider surface.meadurements for location.
no malignant criteria left breast.
唔係好清楚講咩，因為拿報告時醫生不在診所，所以無問到，下星期親友要做手術，宜家佢心情都上落大，唔知道係咪早期可以令佢安心些。 這報告說什麼呢？謝謝您
MRI見到右邊乳房有一大片地方懷疑有癌，係咪原位癌／有冇侵蝕性就未知。另外右邊兩點鐘位置有兩粒性質待定嘅陰影，佢地太近胸腔，抽針有困難，可以考慮做手術時一併割除。
我手術前医生話原位癌，但手術後有三粒侵出細胞，分別是0.2mm,0.2mm,0.8mm,淋巴沒擴散，抽了2粒前哨驗冇事，是一期嗎，報告依然寫D C I S with mirco invasive cells, 我不用电化療，但因為3+，要吃tamoxifen,我是否可不吃藥，因為吃了睡得不好，經期又亂，本時又多，每次逾400 至500cc. 謝謝！
不是原位癌／零期，你是第一期A（pT1miN0(sn))。唔食藥，自然冇咗藥嘅功效。癌始終有侵蝕性，都係建議食藥。
多謝你極速回覆。
醫生，你好~又是我，因為我是到美容院按摩胸部乳頭出血而發現原位癌的，本來是說乳頭狀瘤，手術後化驗為原位，準備再做多一次手術，現在我很擔心之前到美容院按摩胸部或通淋巴會不會令到癌擴散？或者會不會是之前按摩令到我病情加重？
按摩沒有任何影響（無論好壞）。
醫生，你好！
我係BRCA 1 carrier，跟醫生建議一直每隔半年做Mammograph+Ultrasound或做MRI檢查。
上年4月時照MRI時左邊照到3.6cm segmental clumped nodular enhancement in L breast 12 O’clock position。報告一出，隔個禮拜就被安排照ultrasound，但ultrasound照唔到有異樣。
跟醫生指示，6月時做左MRI-guided biopsy，病理學報告結果為”Features represent at most focal atypical ductal hperplasia and not involving more than 2 duct spaces. No in-situ or invasive carcinoma is seen.” “Left Breast 12 o’clock biopsy – focal atypical ductal hperplasia”。醫生認為當時未有需要開刀切除組織，但安排更密的照MRI。
到了10月照MRI，報告出來後醫生建議做手術，”Segmental clumped nodular enhancement shows increase in extent. Associated or progression to DCIS cannot be excluded, as these two entities exhibit similar MRI characteristics.”。而12月的例行Ultrasound只顯示”no focal mass or abnormal echogenicity in both breasts apart from a small 6mm cyst at 4 o’clock position of L breast. No suspicious lymph nodes in both axilla. 但因10月的MRI顯示有問題的組織比之前有變大的跡象，雖然醫生當時也沒提及「原位癌」，還是選擇做手術。
今個月初，入院進行MRI hookwire guide excision。
昨天前往診所覆診，病理學報告結果為LCIS，也有提及ADH，small Papilloma，fibrocystic disease。還顯示我為ER+及PR+。當時醫生告訴LCIS是十分罕見。醫生也有提及我可以做的是服用荷爾蒙藥，也告訴我副作用，並提及因LCIS十分罕見，荷爾蒙藥對我的LCIS未有太多數據。因我還不太清楚，當時並無有立刻決定是否服用。但醫生並未有提及電療。
「原位癌」這一詞，我是到昨天才聽到，所以一直對這病沒有什麼概念，當時也不懂向醫生提問，也不知原位癌有電療的需要。我有以下問題想請教：
1) 6月時做的biopsy並未有診斷LCIS，只提及ADH。兩者是有關？
2) 我媽媽也是BRCA 1 carrier，曾患乳癌及卵巢癌均，前年也做了MRI-guided biopsy，並同時放了個biopsy marker。及後，病理學報告指出她ADH，也選擇了做手術，但因她當時放了marker，可以用mammograph hookwire guide。但為什麼同樣地，我在6月時也放了biopsy marker，但只可透過MRI才可見到有問題的組織？
3) 因我乳癌及卵巢癌均是高危？我是否應電療作follow up？即我要盡快再book期向醫生提出？
4) 病理學報告列出：
ER+: Intensity: strong staining (3); Percentage of nuclei positive: 66-100% (5)
PR+: Intensity: strong staining (3); Percentage of nuclei positive: 66-100% (5)
我是否要食藥？但我有另一concern，因我有pituitary microadenoma，經期不準，要服用bromocriptine。而昨天醫生指服荷爾蒙藥副作可能有唔正常出血，甚至子宮癌。我實在有點擔心。
5) 另外，10月時的ultrasound提及到的6mm cyst at 4 o’clock position of L breast是什麼？有可能變成癌嗎？因也是在左胸，有點擔心。
問題較多，因昨天實在沒有任何概念，請見諒。
謝謝！
1）LCIS 同 ADH冇關係，雖然兩者都會增加患癌風險。
2）如果放了marker，理論上X光都可以見到。不過你10月個MRI可疑嘅部分係大咗，「目標仲係咪同marker同一位置」會影響用咩方法黎放hookwire。
3）BRCA mutation carrier乳癌同卵巢癌均是高危，不過呢個唔係決定應否電療的原因。Classical嘅LCIS同DCIS唔同，係唔洗電嘅。
4）BRCA mutation 加上LCIS，將來患乳癌風險確實是高，食Tamoxifen係其中一個預防方法，食唔食好睇個人意向。「Pituitary microadenoma／bromocriptine／經期不準」對於食唔食Tamoxifen唔係一個concern，至於子宮內膜癌係Tamoxifen一個罕有副作用。
5）如果係simple cyst，就係良性嘅，唔洗理佢。詳情見乳房水囊 ／ 水瘤 － 有冇危險㗎？
醫生，你好！
suggestive of low-grade ductal carcinoma with focal mucinous features
係咪即係0期？
因為診治醫生話要做手術先知咩期，原本做影時又話唔係，而家又話又啲嘢，搞到我都好迷
暫時係。
醫生您好： 我上星期五巳做了lumpectomy on my left side, that’s a 3cm DCIS. (Biopsy of lymph nodes: No regional lymph node metastasis histologically, negative IHC – no tumor cells are identified). Moreover, under the microscope, there are extensions of the removed tumor cell, Dr suggested mastectomy in two weeks time then a reconstruction surgery to follow in the same surgery (optional but considering). Then the real implant surgery shall be in another two weeks time.
I don’t understand why MRI couldn’t identified the actual margin before the lumpectomy surgery?
Is mastectomy the most common solution in this case? What’s your views?
Regarding reconstruction… which options you think is most safety and convenient in terms of personal daily activity and convenience?
Many many thanks!
Stelljj
1）MRI Breast本身係出名靈敏，不過唔準確，所以係well-known「唔能夠」準確認清margin／降低翻手機會。
2）洗唔洗全切視乎位置、局部再割後淨返幾多，未見過你唔能夠準確判斷全切係咪最好。
3）針無兩頭利，無一個選擇係最安全又最方便的，如何選擇視乎醫生評估及個人取態。
Many thanks Doctor! After my mastectomy in 3 days now! I don’t need radiotherapy or chemotherapy?
Thanks again!
視乎最終mastectomy 報告先可以決定。
謝謝醫生回覆！我巳做了 mastectomy 十天了，癌細胞巳完全切除。幸運的不用化療或電療！過幾天會見 oncology, 可能要服用 苛爾蒙藥一段時間來控制另一邊患癌風險。請問大概需要服多久及有什麼副作用？謝謝！
原位癌？有沒有侵蝕性？收經未？
是零期原位癌，並無侵蝕性！ DCIS ！50 歲並未收經！腫瘤科醫生話我只得一種選擇就是Tamoxifen 但要做個婦科檢查先，不知道要看什麼result 才可開始服用？ 他們說這葯是用來控制另一邊患癌風險，但有等等副作用！請問這藥是否必須的? 因為好像 要接受這藥的風險來控制未必發生的風險！請指教??????
你醫生想睇睇子宮內膜厚度先。原位癌食Tamoxifen不是必須，詳細睇乳癌荷爾蒙藥－究竟食咩藥？。
我因乳頭破損看醫生， 已照x光和超聲波， 沒有硬塊異象 ，在乳頭取皮膚化驗確診為乳頭濕疹 癌，醫生建議 做磁力共振 ，看結果再討論治療方法 ，但醫生都是建議乳房全割除，磁力共振準確嗎 ？聽聞出名的醫院器材比較先進 ，而次级醫院的都是比較舊器材， 這會影響數據嗎？而乳頭濕疹癌，一般治療效果如何？
如果點都選擇全乳切除，就唔洗照磁力共振多此一舉。如果會考慮局部割，先去照磁力共振。
所有檢查都一樣，器材同寫報告的醫生經驗，都會影響結果。
乳頭濕疹癌同一般乳癌無異，治療效果都係睇最終期數同屬性。
醫生你好， 已做了全乳手術，引流未拆 ，今天已是手術後第八天，發覺血色沒有淺淡，但流量還在標準30cc內，星期二（17號）才覆診， 正常嗎？急需處理嗎？
手術後的護理真係要搵返自己醫生，冇可能網上比到意見。
補充， 雖然沒有超標 ，但量也沒有減少， 血色不是鮮紅帶點 棕黑色
都係嗰句：揾返自己醫生。
醫生你好
我身體檢查時，照超聲波發到左胸上方1-2點位，有個陰影（0.64×0.4cm）！觸診摸不到！做埋乳房造影，各個報告話似良性features! 我之後再去睇專科，做埋抽粗針，報告話係benign breast tissues! 我是否可放心呢？
但因醫生說超聲波照到我的瘤的型狀似惡性(高長過闊)，都建議我切左去！我問抽針報告有冇說明是什麼，佢叫我唔洗理…
想知道你的建議是如何呢？
如是良性切左，係咪都有機會再生過其他瘤？
其實我瘤咁細，抽粗針會否抽不中呢？
1）你的描述前後矛盾，一方面話「各個報告話似良性features」，另一方面又話「超聲波照到我的瘤的型狀似惡性」，所以我唔會就咁比意見。
2）良性切咗只係解決咗嗰個問題，唔會令你以後唔生瘤。
3）抽唔抽得中要睇抽針記錄先知。
如果被告知係原位癌，係咪一定要切？
會唔會有其他方法醫？
抽針驗（但我唔知係幼針定粗針）有冇機會驗錯？
會唔會切完先知係其他乳房疾病？
可唔可以驗多次？
好擔心
1）要切，冇其他方法替代手術。
2）甚少錯，雖然呢個世界冇咩野冇可能。
3）可以。
4）可以覆驗。
可以去邊度覆驗？公立醫院唔俾我驗多次。
通常原位癌會唔會突然惡化得好快？
係咪唔會有任何徵狀都會有原位癌？
1）私家
2）唔會
3）可以冇徵狀
你好， 我測試report是ductal carcinoma in situ size 12x4x12mm (R6H). 醫生見意我做手術時取埋3粒前哨淋巴羅去test 有無擴散， 我有點猶豫是否有需要開多一刀做前哨這test, 能比點意見嗎？
如果做全乳切除／high grade／摸得到一舊野的原位癌，都可以考慮做埋前哨淋巴，以防做手術時已經演變成侵蝕性癌。當然就算係以上情况，都可以拒絕唔做前哨淋巴，只係要承擔一個細風險要翻刀做第二次手術。
醫生你好，我2020年4月份去做乳房超聲波，醫生發現有一粒是有可疑建議我抽幼針，因為我有買保險的所以轉介睇外科醫生，那給外科醫生看超聲波報告及醫生建議抽幼針，所以去了醫療中心做了夾胸和超聲波和抽幼針，當報告回覆有病變那醫生再叫我再去夾胸和超聲波和抽粗針，當報告回來是良性的，但醫生建議我做手術割左粒瘤，當割後那粒瘤是原位癌，醫生就建議我全乳割除或者見一下腫瘤科醫生睇下要點處理，那我當然選擇見腫瘤科醫生，當醫生睇哂報告話可以只需要做25次的放射治療就可以了，當8月頭做完放射治療後，到12月尾就再見外科醫生，跟位再去夾胸和超聲波，報告出了話割除原位癌那位置附近有一粒0點幾cm的，留意跟進，之後我5月又去見外科醫生，跟住就去夾胸和超聲波和抽幼針，報告話非典型導管，那外科醫生就同我講再去抽粗針如果報告返嚟好似之前咁就叫我做手術，話今次會割大範圍所以右胸會凹陷，叫我考慮全乳割除，那我在想之前做那些放射治療是多餘的嗎？因為我5月尾過了澳門，所以7月中才回港，那我在這段時間想我應該要睇關於乳房的專科再了解多啲，因為那個外科醫生是可以做乳房手術，但不是乳房科的醫生，我想了解清楚究竟需要點做，問題是什麼才最好，不是都是全乳切除手術，希望係以安全又可以減少做手術的情況下安全穩健的處理就最好，所以想請教一下
情況複雜，點樣處理最好都係要睇片，去搵個乳腺科醫生睇。
在你們中心有乳線科醫生嗎
有
醫生，我2月份在私家做了原位癌切除，然後排公家電療，要5月份先有機會做，現在手術後過了兩個月未做電療，傷口有小跳痛～乳頭有小脫皮，正常有這些情況？
會有機會短短兩個月再復發？
另外想了解原位癌是否大部分醫生都健議吃賀爾蒙藥？(因為醫生說我的情況可以選擇不用，所以想了解更多意見)
痛就常見，脫皮就要睇現况先知。
唔會兩個月咁短時間復發。
乳房原位癌大部份醫生都唔會建議食抗荷爾蒙藥。
乳房摸到有硬塊，在乳房左邊9點位置，抽了粗針確定是原位癌，腫瘤太約2.5cm，而腫瘤旁邊就有鈣化點範圍就太約5.5cm，是否需要連鈣化點一起切，還是可以切除腫瘤2.5cm就可以？鈣化點之後一定會變癌細胞嗎？還是範圍太大必需全乳切除？切部份乳房可以重建嗎？謝謝
1）實際要視乎D鈣化點有幾可疑，你預好多時都需要一併移除，除非嗰樣真係好善良。
2）鈣化點唔一定會變癌細胞。
3）聽落去大機會需要全切，最終定案就睇臨床評估。
4）局部切除就唔會做重建。
幾日前發生乳頭溢液，淋巴同乳房都沒有腫塊，最初係透明水狀，跟住變成有血，之後去咗照超聲波，醫生話超聲波見到好似血渣，不確定腫瘤，嘅陰影
跟住做咗抽針，想請問我呢個情況乳癌嘅機會有幾大？
可能性可以好闊，既然已經抽咗針，就靜待結果。
你好Doctor,
原位癌零期，noninvasive,2cmx3cm,醫生建議局部切除，請問切除後可以不做電療嗎？如果一定要做電療，手術後幾時開始做？
要做幾多次呢？
多謝醫生解答。
局部切唔可以唔做電療。
最理想手術後四至六星期開始。
15次。
乳房做咗抽幼針，昨天收到報告，寫住 Highly Suspicious for ductal carcinoma (C4) 有以下問題
1. 這是原位癌嗎？
2. 我好亂，下一步應該睇外科乳房專科？定係腫瘤科？
GP叫我再照全身PET CT,排期最快都要6天之後，我本人意願係想切走嗰啲有可疑嘅細胞，如果要同時間競賽，未來6天我可以做什麼？
1）未知道，幼針係分唔到原位癌定侵蝕性癌。如果想知，就要再抽粗針。
2）睇乳房外科。
3）未確定係侵蝕性癌之前，照PET scan 係做多咗，因為原位癌唔需要照。
所以你要做嘅係盡快睇乳腺科醫生。
醫生，請問如果 DCIS high grade，做局部切除及電療足夠減低復發風險至最少嗎？
足夠。
醫生，請問high grade DCIS, 準備做局部切除及前哨淋巴。睇到不少個案喺術後病理報告出面 margin 唔夠，要再割多次。其實點樣先可以減低要做多1次嘅情況？是否我主動叫主診醫生放緊第1次割多啲就可以？
手術中途做冰凍切片快速測試（Frozen section)。
割多啲係可以減低機會，不過唔代表機會等如零，同埋就會肉酸咗。