乳癌零期治療攻略 － 原位癌有咩咁特別？
上回講到原來乳房原位癌喺金錢上／命仔上／手術上／化療上／標靶上／電療上／食藥上，同侵蝕癌有好大分別，呢次同你深入淺出－「乳癌零期治療攻略－原位癌有咩咁特別？」⋯⋯
乳癌零期金錢篇
「仲咩一開始就要講錢，睇小我呀？」
唔係睇小你。因為好多病都係冇錢冇得醫，有錢有得醫，多錢醫得仲好D。你見嘉誠哥八十幾歲都仲咁健康就知我冇講錯。
一開始就講錢，係希望話你聽「唔好高估自己嗰份危疾保險」，因為乳房原位癌9成9冇得賠／賠唔足。（乳癌治療費用 － 危疾保險保唔保？）
當你冇高估自己份危疾保險，加埋返去計計自己銀行戶口／私己錢／床下底月餅罐錢，之後睇埋以下嘅乳癌零期治療攻略，就知原來邊D治療要做，邊D治療唔洗做，最後就會決定到去私家醫好、定公立醫好、點醫先最好。（香港乳癌醫生 ﹣ 睇公立好？睇私家好？醫生攻略1）
乳癌零期命仔篇
「錢唔係問題，我關心我條命有幾長多D～」
講命呢，乳房原位癌叫最好嘅癌症㗎喇，有得醫返好嘅，9成人有15－20年命「以上」。
「咁嗰1成人呢？」
主要就係復發（仲要係侵蝕性嗰隻），所以冇咁好彩有咁長命。因此唔好輕視乳房原位癌，唔好再信保險公司嗰D咩「癌前病變／存活率好好⋯⋯」。原位癌都係要醫嘅，搞唔好，係會侵入性復發死人嘅。
「咁點醫？」
醫侵蝕性癌呢，我地有5大法寶：手術、化療、標靶治療、電療、抗荷爾蒙治療。（乳癌治療方法 － 我需要用咩方法醫？1 ，乳癌治療時間 － 我需要用咩方法醫？2）
醫原位癌呢，原來5大療法都有唔同。
乳癌零期手術篇
同侵蝕性癌一樣，手術係醫原位癌嘅主力，即係一定要做。不過做法都有少少唔同。
「有咩唔同？」
就係未必洗割淋巴。
仲記唔記得我喺「乳房原位癌 － 究竟係唔係乳癌？」講過，原位癌即係浸膜未穿，未穿即係理論上癌細胞冇可能擴散去其他地方，包括淋巴，所以係大部份情況下，係唔洗做淋巴手術嘅（包括前哨淋巴）。
「大部份情況？即係小部份情況要做淋巴手術？」
正確。最常見有以下情況：
1）全乳房割除。呢個時候醫生通常會同你傾，順唔順手做埋前哨淋巴。因為怕之後如果病理報告返黎，先話原來個乳癌有侵蝕性，咁就錯失咗一個做前哨淋巴嘅最佳機會。
2）個腫瘤好大。醫生唔多信淨係原位癌咁簡單，覺得可能有侵蝕性，不過手術前抽粗針抽唔中。
3）惡嘅原位癌（high grade DCIS）。同上面道理一樣。
4）私家醫生手術前冇抽粗針。根本手術前唔知有冇侵蝕性，入手術室先做加減手術。（伸延閱讀：乳房檢查 三步曲3 － 乳房抽組織檢查）
「咁除咗淋巴之外，手術仲有冇唔同？」
冇。幅度／選擇都係一樣。你可以揀嘅就係局部乳房切除，定係全乳房切除加減乳房重整。
乳癌零期化療篇
「咁化療又點呢？」
好消息！原位癌係唔洗化療嘅，因為本身存活率已經好好，化療係冇額外幫助嘅。
咁你而家唔洗咁驚化療副作用／甩頭髮咁啦！你唔洗做化療呀！
乳癌零期標靶篇
「咁標靶治療又點呢？」
又係好消息！同樣道理，原位癌都係唔洗標靶治療嘅，現階段，冇證據話標靶有幫助。
咁你而家唔洗擔心嗰30萬點籌返黎啦！你唔洗做標靶呀！
乳癌零期電療篇
「咁電療係咪又唔洗做呀？」
咁又唔係。電療係要做嘅，當手術你揀咗乳房局部切除時。相反，如果你揀全乳房切除就唔洗電療。
不過都有好消息！相比侵蝕性癌係電少5次，因為唔洗腫瘤位置加電（tumor bed local boost），即係最少電15次就搞掂。
乳癌零期抗荷爾蒙篇
「係咪都有好消息，唔洗食藥？」
食唔食藥，就睇你隻原位癌對D藥夾唔夾。
ER－唔洗食藥。
ER＋就睇你同你醫生信邊套。有2派學說：
1）唔食藥。因為食唔食藥，15年後睇返轉頭，命仔都係咁長。
2）食藥。因為食藥可以少D復發。
「咁我／醫生點決定？」
我地先睇吓食咗5年舊藥Tamoxifen，15年內有咩著數先：
同一邊侵蝕性復發由9%降至6.6%。
另一邊侵蝕性復發由5%降至3.3%。
另一邊原位癌復發由2.8%降至1.6%。
存活率冇分別，都係9成人有15年命以上。
醫生話唔洗食藥，主要係佢將個重點放係存活率度，食咗藥15年都冇長命到，更係唔食啦。
醫生話要食藥，主要係佢將個重點放係復發度，減少復發理應減少擴散，理應會長命D，雖然15年覆診未證明到有分別，可能再長期D會有分別呢。
「咁Breast HK你建唔建議食呢？」
我會睇你年紀同埋態度進唔進取。
後生／進取，食。點都好過食埋D冇根據嘅健康產品／試埋D古靈精怪另類療法。
年老／保守，唔食。
如果揀食藥，只可以食舊藥Tamoxifen5年，因為冇臨床證據話新藥／10年舊藥喺原位癌有效。
（2016年1月更新：而家已經有一D新證據話新藥（AI）喺原位癌都有效預防復發，尤其係收經後及60歲以下女士可能更見優勢。呢D係一D好新嘅野，詳細問返自己醫生。）
乳癌零期治療攻略
最後呢個時間表就係你嘅乳癌零期治療攻略：
你只係需要做手術，加減電療／食藥，並唔需要化療／標靶治療。係咪清楚晒？
今次講住咁多先，慢慢消化下。下篇用相同角度，教你「乳癌一期 － 我係咪第1期？」⋯⋯
香港乳癌及乳病治療中心 
Breast HK, 請問病人後生/進取的定義是甚麼？主診醫生是保守/進取都會影響治療方案對嗎？如果醫生建議食荷爾蒙但病人怕對子官有副作用唔想食嘅話又如何？
後唔後生，其實係相對概念，有人覺得自己60歲仲好後生好有活力，有人28歲女已經比人叫「中女」，年齡問題對女人黎講係一個非常敏感嘅話題，男人一答錯就會死㗎喇，所以我上面留D空間比大家自己想像下。不過如果你硬要我為年齡下一個界線，喺原位癌食唔食藥好呢個問題上，我會話61歲。
點解講到咁實61歲呢？當然有原因。上面講到15年壽命食唔食藥都冇分別，即係估計要長D時間先可能見到分別／著數，我地假設要多10年時間（即係總共25年）。香港女性平均壽命係86歲，減25年，即係細過61歲食藥就有可能有著數。
啱啱細過61歲嘅你聽到呢度，發覺原來呢個世界仲有人認同你係後生，係咪好開心呢？相反，大過61歲嘅你聽到呢度，都有好消息，就係唔洗食藥，係咪都好開心呢？咁大個女，到今日終於比你發現呢個世界原來有針係兩頭利嘅。
至於「進取」嘅定義，就係你會唔會想用盡所有辦法去減低乳癌復發嘅機會，例如有D病友會戒口、試中藥、試盡各種食療、自然療法、布緯食療、褐藻糖膠、人體充電、能量水、古方、古法、秘方，呢D人就叫「進取」，與其浪費時間／金錢／精力喺呢D古靈精怪嘅野上面，當然食藥來得有效／有科學根據得多。
你問「主診醫生是保守/進取都會影響治療方案對嗎？」，答案係肯定嘅。喺醫療呢個領域上，醫生掌握咗大部份資訊，因為資訊上嘅不平等，病人係好被動嘅。要睇吓你主診醫生取向，同一樣治療，醫生想你做，佢會話「進取」，醫生唔想你做，佢會話「激進」。就咁兩隻字，都天淵之別，究竟係語言藝術定偽術，睇你遇到個咩醫生。
如果醫生建議食抗荷爾蒙藥，而你又唔想食，最終決定權當然喺你手上。
Breast HK,上網睇過有種原位癌—paget’s disease of the breast，佢初期病徵係乳頭有甩皮現象，但乳頭甩皮亦有機會係佢皮膚敏感的吧？請問2者點分？
問得好好。Paget’s disease of the nipple 正如你所講，病徴就係乳頭乳暈好似濕疹／皮膚敏感咁甩皮／損咗，醫生點分就係靠經驗（睇個樣衰唔衰）、臨床檢查（乳房仲有冇其他可疑地方，例如硬塊／腫塊／淋巴脹大）同時間性（有冇自己好返／搽類固醇有冇好到），喺病人角度黎講係分唔到嘅（唔好嘗試自己分，搞錯就好危險，要做嘅野就係揾個乳腺科醫生睇睇）。當醫生都懷疑／排除唔到係唔係Paget’s disease of the nipple時，佢會叫你係損咗嘅地方，局部麻醉切少少拎去驗，喺顯微鏡底下病理科醫生見到Paget’s cell為之確診（黃金標準）。因為呢個病本身都已經當喺原位癌，加埋同一邊乳房9成機會會隱藏咗癌症，所以乳腺科醫生會根據其他資料（例如乳房造影）去跟進，差不多可以話一定要再做手術去根治／處理佢。
Breast HK,
請問，食荷爾蒙葯的其中一副作用會令經期亂或停，這是否代表此葯會令排卵期亂或停止？
Tamoxifen其實會增加排卵。原理係佢會減低雌激素（Estrogen）對腦嘅抑制，令腦分泌多咗follicle stimulating hormone （FSH）同埋luteinising hormone （LH）。FSH會刺激卵巢，LH會增加排卵。所以其實有不育科醫生用Tamoxifen黎醫因「排唔到卵」而引起嘅不育（當然劑量同點食法係同醫乳癌唔同）。
不過話分兩頭，排唔排到卵都唔係重點，因為Tamoxifen可能會引致畸胎，所以乳癌食Tamoxifen都係建議要避孕。
我月初做完局部切除乳房手術，點知不停咁切來化驗都是不好的細胞，因為之前沒有簽下接受全乳切除的同意書，因為月中再度做手術把一邊乳房切除及做重整，病理報告也出來了，原位癌程陽性，醫生建議吃5年的荷爾蒙藥，我今年40歲，對這病一些認知也沒有，也沒有朋友有經驗，事情發生得太快，請問可以給我多些建議嗎?
第一步要肯定真係「淨係」原位癌先，即係兩次手術報告都要排除有「侵蝕性癌」，呢度有人可以睇漏咗／出錯嘅，因為做咗兩次手術有兩個病理報告（如果睇一個冇為意另一個，就會搞錯），同埋原位癌同侵蝕性癌可以一齊出現（最易錯例如佢寫Ductal carcinoma in situ with microinvasion，microinvasion先係重點）。
如果確定咗真係原位癌，下一步要決定嘅就係食唔食藥，去睇返乳癌荷爾蒙藥－究竟食咩藥？，裡面有詳細講。
有2份報告，其中一份有呢段，我又唔識睇所以想問下你，只睇到呢段好似話我係陽性，想找你確實。
THE MICROINVASIVE DUCTAL CARCINOMA CELLS ARE POSTIVE AND H-SCORE=FOR OESTROGEN RECEPTOR (ALLRED SCORE = 7/8 AND H-SCORE = 120/300) AND PROGESTERONE RECEPTOR (ALLRED SCORE = 5/8 AND H-SCORE = 35/300.) THERE IS WEAK MEMBRANOUS STAINING FOR C-ERBB2 ONCOPROTEIN IN MORE THAN 10% OF THE TUMOUR CELLS (SCORE=2/3). ABOUT 50% TUMOUR CELL NUCLEI EXPRESS PROLIFERATION MARKER KI67.
你係荷爾蒙受體陽性（ER＋）。
不過成段野最重點嗰隻字係「microinvasive」，即係代表「有侵蝕性」細胞，而size就係1mm或以下，對你黎講有以下結論：
1）你唔係零期乳癌，起碼第一期，實際要睇埋淋巴／同埋有冇擴散先知第幾期。你要搞清楚醫生有冇幫你切淋巴去驗，如果冇做到，你係要翻做淋巴手術嘅，雖然淋巴有擴散嘅機會唔大。
乳癌零期原位癌 － 我係咪0期？
乳癌一期 － 我係咪第1期？
2）食抗荷爾蒙藥有著數，一定揀食藥。
3）cerbB2 score 2即係唔知係咪HER2型，要做埋FISH test先知，雖然就算HER2型都應該唔會打標靶，因為侵蝕性部分咁細，不過如果淋巴／其他地方有擴散就完全唔同講法。
我有切咗大約5-6粒淋巴檢驗，係無擴散。咁即是什麼都不用做，只係食荷爾蒙藥?
我今天已決定食Tamoxifen，多謝你每次都快速回覆，感激!
根據你提供嘅資料（如果提供錯／漏，結論當然唔同），可以咁講只係食抗荷爾蒙藥。
My mom is 75 years old, 原位癌, 做完局部切除乳房手術. 手術報告都是原位癌. 可唔可以唔電療. Thank you.
原位癌幾大？Grade幾？紙口位（margin）最近係幾多？
Size of DCIS: 5.8 mm, Nuclear Grade: Grade III (high), closest resection margins to DCIS: -posterior- 0.5mm, lateral 0.5mm, superior 4mm, further than 10mm from other margins. Thank you.
由你所提供嘅資料黎睇，你有兩樣野要留意：
1）再唔再做手術？因為原位癌margin最好有1mm以上（傳統覺得10mm仲好D），你媽媽有兩邊都唔夠數，咁樣係大D機會局部復發，所以如果技術上可行，而你媽媽又唔介意嘅話，最好都係再做手術割清佢。
2）第二個問題就係電唔電療？呢個受第一個問題影響。
如果再做手術，就視乎做咩手術／手術結果，先知洗唔洗電療。
如果唔做手術，就最好電療，因為high grade同close margin。
如果唔做手術又唔肯電療，壽命應該冇影響，不境已經75歲，代價就係高一倍機會局部復發。
好多謝你的回覆. 之前十五十六唔知阿媽做唔做電療好, 驚副作用同唔知是否真的需要，但睇佐你篇關於電療的文章和回覆後, 放心和明白了很多. 再次多謝你.
Hi~我剛剛被診斷low grade 原位癌，1.5mm from anterior margin 3mm from posterior margin 3mm from inferior margin 0.5mm from 9 o’clock margin other margins more than 5mm 14mm in size grade 2 nuclei 醫生話叫我再做多次手術 切多d margin再電療 我想問我可不可以不電療 怕有副作用 因為我先24歲 另外呢 我想做前哨淋巴追蹤睇下淋巴有無？我想問前哨淋巴追蹤系要不要割淋巴下來的？
唔電療復發機會會高一D，唔建議。
前哨淋巴追蹤係要割一D淋巴出黎，唔係完全冇風險的，如果你揀局剖割，是並不需要做前哨淋巴的，唔好以為做埋就穩陣。
多謝回覆 還是有一點不明白 為什麼局部割是不需要做前哨淋巴追蹤，我怎樣才能知道淋巴有沒有問題呢？另外我這種情況是不是局部割就可以了，我目前是0.5mm的margin不夠嗎？我看姑娘説是要大於2mm 另外我剛做了第一次手術一個多星期，報告出後醫生說要再做多一次，是不是越快越好呀？
原位癌定義上係唔會擴散去淋巴，所以根本性上係唔洗做任何前哨淋巴追蹤，已經可以下結論話淋巴冇事。如果全乳房切除，醫生會因應同一時間意外搵到侵蝕性癌的可能性，而決定順唔順手做埋前哨淋巴（怕只怕呢次全乳切唔做埋，如果第時需要做時，會錯過做前哨淋巴的最佳時機；相反局部割，第時要做前哨淋巴也是可行的，並不存在錯過時機呢樣野，係唔需要順手做埋嘅）。
0.5mm原位癌黎講，覺得係唔夠的，再割多D margin好D（最好1cm以上）。至於係咪局部割已經可以，呢樣野涉及臨床評估，問返手術醫生好D。
翻手做手術，越早做越好，趁裡面未生實，易D搵返第一次手術的空間，咁就可以割得準D。
感謝回覆 明白了很多 我自己就系好擔心黎樣 b超無淋巴腫大系咪即無影響到淋巴呢？仲有我怕其實做手術過程會不會令癌細胞擴散？
超聲波無淋巴腫脹，加上手術標本話係原位癌，淋巴有事的機會可以話接近零。
手術係唔會令癌細胞擴散嘅，放心。
醫生 多謝你回覆 可能我太多疑 我有樣不明白 其實為什麼醫生在第一次替我做手術時不切多點margin 就只是因為有兩個margin未能達到就又要再多做一次手術 是涉及臨床醫學的問題嗎？
第一次手術時我不在場，作為旁人，真不宜說三道四為何做XX／為何不做XX。只可以話，局部割因為種種原因，大概有兩三成機會度要翻手。
如果第二次手術，是不是找回第一次開刀的醫生最好呢？因為再要做手術，心理壓力真的好大。
第一次開刀的醫生一定係最清楚第一次手術切咗D咩嗰個，係咪最好就見人見智。
醫生，我將會進行電療，但其實網上查一些外國文獻，很多科學家都認為其實low grade dcis不需電療，反而過渡治療，而我看我的報告，ki-67是3%，er pr 陽性 her2陰性，究竟我真的有電療的需要嗎，手術醫生跟我說不電復發有30%，如果電呢？內心真的很矛盾
醫學界一直都想尋找哪一類原位癌病人可以安全地避免電療（例如low grade 係咪唔洗電、好老係咪唔洗電），但一直都未有共識，所以現階段都係建議電埋療穩陣。
明白，醫生目前的方案是要我電30次，局部加電5次，總劑量是50gy，加電共60gy，我總覺得依我原位癌的病情，這樣會不會太多了？
係咪太多好難講實，依你上面提供的資料我睇唔到點解要局部加電，有侵蝕性癌？margin唔夠？呢個你要返去同醫生搞清楚。
另外好多地方已經實行hypofractionated嘅電法，即係電15次，加減局部加電5次。
澳門這邊的醫生只説照一般的做法，局部加電的準則是有侵蝕性癌或margin不夠嗎？兩者我也沒有的。我有跟醫生提及電15次的用法，但她説我們這邊還是以傳統做法為主，怕次數不夠影響效果，所以我也很苦惱。其實15和25次劑量也是一樣的嗎？
所有做法背後都應該有理據支持先站得住腳，局部加電主要原因係我地怕某類情況會易D局部復發，所以加電以加強控制。局部割加上侵蝕性／margin唔夠就係其中常見的加電情況。如果你係原位癌，margin又夠，我睇唔到咩原因要加電。
至於15定25次，它們的劑量係唔同嘅，不過兩個都係合理做法，既然澳門冇得選擇，亦都唔好諗咁多。
如果係好惡嘅原位癌駛唔駛化療電療標靶藥？thanks!
惡嘅原位癌相對侵蝕性癌都仲係小巫見大巫，並不需要化療／標靶治療。
醫生，你好！再次詢問你，目前我已完成了21次電療，總劑量也達42gy，我也想停止，不想電到25次或局部加電，局部我也跟我醫生說過我認為我並沒有需要，但她說你可以選擇不電但局部復發可能性或者會大，若果就我目前不不電的話，可以嗎？
冇話可唔可以，個人選擇問題。唔跟主流做法去做，自然唔能夠要求有主流做法的效果。不過你low grade DCIS 加埋電左大部分，我覺得電唔電落去效果分別不大（純主觀睇法，冇數據支持）。
感謝你的回答，幫到我很多！
想問剛確診原位癌(4月27日)，由於我希望部份切除，醫生話要照MRI，而家由政府排期，但因確診前已報旅行，六月頭出發，月中才回港，想問算唔算拖得太耐，因為覺得就算唔出門，ㄧ樣係等，所以想完成旅程。希望比D意見
其實局唔局部割呢個決定，絕大部分情況下乳房X光同超聲波已經決定到，唔應該要等咁耐嘅MRI去決定。
由確診日至到做手術計，超過6星期就點講都唔理想。醫管局喺有限嘅資源下，都會要求一個月內開始治療（任何治療，不是獨指手術），雖然有時呢個服務承諾未必達到。
所以你問我去完旅行先手術有咩睇法，我會覺得唔好，不過如果你就算取消行程都幫唔到快D治療嘅話，咁去埋又冇所謂。你個情況主要係我睇唔到有咩理由要等咁耐MRI去幫助決定。
多謝解答，但仲有問題想問，因為而家政府醫生其實覺得全乳切最安全，但我想部分切除，所以佢建議做MRl，話咁樣可以睇得最清楚，我想知道，政府醫生會不會認為全乳切最安全，所以係唔係都全乳切，但點解上網睇，好多女士話睇私家，反而可以部分切除，我又疑惑，私家醫生又會不會為左証明自己高明，反而係唔係都話可以做保乳呢？
按照你覆述，似係你唔肯全乳切，所以醫生先決定做多D檢查（去證明比你睇局部割唔安全）。
至於唔同醫生有唔同睇法，背後原因／理據／利益衝突，實不適宜一竹篙打一船人。
我都明日，可能我太多疑，麻煩哂
?
我個MRI report出左，有段咁寫area of confluent non mass enhancement of measuring 4.65cm(CC) X 2.36cm(TS) X 4.37Cm (AP) in size is noted in the upper outer quadrant of the right breast extending into 12o’clock position, showing type I to II kinetic curve with no significant washout.Segmental distribution of the enhancement is seen. FINDINGS can be due to DCIS or fibrocystic disease. Suggest correlation with mammogram and histology for presence of microcalcification 醫生建議全乳切，但我想問MRI係咪最清楚，點解上面果段話Findings can be due to DCIS or fibrocystic disease.同埋果D數字係咩意思呢？type I to II kinetic curve係咩黎?醫生建議全乳切，憑報告睇，係咪必要呢？
MRI係最靈敏，不過唔準確，所以我唔會評它為最清楚。咩叫靈敏又唔準確，詳細自己睇乳房磁力共振（MRI Breast）－我又洗唔洗照吓？
嗰D數字話右邊乳房上側12點鐘位置有一4.6cm嘅範圍有顯影劑積聚情況，type I to II curve 係指顯影劑的積聚同散開的動態數據，令醫生多D資料估有冇野。而家報告話「可以係原位癌，又可以係乳腺增生，建議參考返乳房X光報告」。你呢個情況正好引證我上面的建議，唔好隨便無端端走去照MRI，一來浪費時間／金錢，二來出黎報告係廢嘅，「可以係原位癌，又可以係乳腺增生」，咁同話比你聽摘銀「可以係公，又可以係字」有咩分別？仲要加多句叫你參考返之前乳房X光報告，如果點都係要靠X光，人地咪晨早出咗報告囉，仲咩要搞完一大輪先發覺原地踏步，自己擁有的原來已經是最好。
在缺乏臨床資料同完整檢查資料下，係咪一定要全乳切唔敢講，只可以話根據你嘅描述，醫生由頭到尾比我嘅感覺係一路都建議你全乳切。如果你而家繼續堅持局部割，你將會大大阻遲自己的治療，因為要安排second look ultrasound，或者MRI guided biopsy去研究上側有冇野，隨時搞你一兩個月，仲要未必清清楚楚。
你好, 我於去年10月切除腫瘤, 12月開始化療,標靶和電療, 現還欠標靶未完成. 請問我之情況復發機會大嗎?
Treatment and outcome
Admitted for left breast USG guided wide local excision+ sentinel node biopsy under GA. Post-op stable.
Path: Grade 3 IDC, ER & PR -ve, CerbB2 + ve (score 3), MIBI stain 15-20%. pT2 (2.3CM), margins clear,
pN0 (0/5sn).
發現時幾多歲？點樣發現（有病徵vs健康檢查）？打咩化療／標靶組合？
不好意思,遲了回覆. 當時是44歲, 自行檢查發現硬塊, 化療4針用紫杉醇, 電療25次+5次加強(共30次), 標靶Trastuzumab 18針. 請問我是屬於her2 型嗎?
是HER2型，回應返你之前問題，adjuvantonline仲未開返，用另一個 nhs predict model去計，五年存活率88％，10年存活率81％。
存活率即是五年內有88%無返發定有88%唔會引致死亡. 謝.
88%在生，冇指明有冇復發。
抽針報告寫:
In place.there are Intermediate grade ductal carcinoma in-situ. The on-site carcinoma cells display moderate nuclear pleomorphism. They exhibit comedo, solid and cribriform patterns. Calcified desposits are also seen in the comedo-necrotic areas. No invasive tomour is discrerned in this biopsy sample.
需否加做前哨淋巴檢查？
局部割，唔洗。全乳切除，可以考慮。
謝謝你回覆！ 我都屬年紀輕同進取，但醫生並沒有建議我食，而我四月尾才覆診，請問到時先再問醫生會唔會太遲?另ER +同PR+的分數高低有分別嗎? 會成為醫生考慮因素嗎？
四月就太遲，最好係食就半年內開始食。ER/PR越高分食藥越大著數，係醫生考慮其中一個因素。
我的分數ER 270/300 PR 200/300,請問高嗎?我應該致電醫院嗎?因為是公家醫院，所以唔知點搵到醫生。其實醫生並沒有同我講過我的ER PR 分數，我問過兩次佢地只係話唔使食
中高，因為好多人滿分的。打電話／Fax去醫院約見醫生。
謝謝你的建議！感激
想問下，如果醫生話係原位癌，要做手術，揀左全乳連淋巴切除，咁係咪基本上確定手術後唔駛做電療同化療？（第幾期話要手術後切左先知？咁即係點⋯?）
如果最尾真係淨係得原位癌，而邊界又清的話，就唔洗電療化療。
實際腫瘤幾大、淋巴有冇受影響，呢D影響期數的因素，係做完手術先可以作實。
您好!我47歲, confirm 為原位0期，
剛剛做完左邊局部乳房切除手術，但手术後報告如下：
High grade ductal carcinoma in Situ with 0.1 mm focus of microinvasive dutcal carcinoma.
Whole area of high grade ductal carcinoma in Situ measures about 30mm in greatest dimensions. Solid and comedo type.
The DCIS focally touches the 3o’clock margin, and shows less than 1mm clearance from the nearest anterior and posterior margins, 1mm clearance frim the nearest inferior margin, 2mm clearance from the nearest superior margin, and more than 5mm clearance from the 9 o’clock margin.
我在自家医生度做這次手术，報告出左尼，医生叫我refer 腫瘤科医生去睇下是否想再番手割多D。
兩個医生都叫我再割話因為吾夠margin (一個話最少2mm, 一個话最少1cm) 但我好吾想，請問我可否吾割，直接做電疗，有什么impact呢？其中一位腫瘤科医生話放射科医生会吾收我(因吾夠margin).如果我排政府，会不会同樣理由吾幫我做电疗。
P.S. 我confirm 冇擴散去淋巴.兩位医生話我嗰0.1mm microinvasive ductal carcinoma 無需理会。
Thank you
未割清建議再做手術，唔肯做手術就要承受大D機會復發嘅後果。
發現原位癌後 做全乳切除後重建唔需要做電療
如果切清，唔需要。切唔清，需要。
想問下剛收到X光造影及超聲波報告，左邊胸有two well-defined cysts from 0.3-1.2cm, and one well-defined hypoechoic lesion from 0.5mmx 0.7mm x 0.7mm, can be an area of fibroadenoma. Slightly prominent ducts 0.4cm diameter at right retroareolar region, can be due to ductal ectasia. 份報告最後結論係 follow-up ultrasound for progress. 我初時睇婦科，佢睇完報告話無咩特別，話乳房痛可食止痛藥。但當初我係因爲右邊乳房痛、乳頭有淺黃色分秘及自己模到腫腫地去睇醫生，但婦科話模唔到腫。但報告出了說無事。但我依然keep住痛同覺腫，去了睇第2個乳腺專科，佢一模話我右邊腫同硬，由於腫硬範圍大不能做抽針，故建議做contrast MRI 睇下有無機會係癌。這情況只有MRI 最適當嗎？會否有其他steps可以先做？大機會是癌嗎？有癌或腫塊是超聲波及造影照不到的嗎？因造影亦看不到有白點，但醫生有提及原位癌有時超聲果D檢查未必睇得出，是這樣的嗎？
MRI係其中一個選擇，唔可以話最適當選擇。
冇咩其他step可以先做。
係癌的機會不大。
可以有癌但X光超聲波照唔到，不過機會少過百分之五。
原位癌最好係睇X光鈣化點，超聲波同MRI都唔係一個好選擇。
My mom 上月已完成原位癌 左邊全乳切及切了部分淋巴去驗, 本月報告說淋巴無事, 但說乳房”擲界” (本人不太眀白,是切除乳房邊界/外圍還有那些細胞嗎？), 醫生建議電療確保完全清除, 請問這個case通常要電多少次？my mom已年過六十，做電療有何副作用? 如果不做電療復發機率會大嗎？希望比D意見
冇得就咁估，要睇病理報告搞清楚咩叫擲界先可以討論落去。
請問病理報告是可直接問主診醫生拎或是去醫院拎一份copy? 因為在公立醫院聽報告當日醫生都沒有俾..
兩樣都可行。
您好,本人39歲,2006年右乳乳腺癌1期,行保乳手術,淋巴結正常,已化療電療.因三陰指數,不用吃內分泌藥; 2009年發現左乳乳腺癌,1期,左乳全乳切除,已化療,吃五年TAMOXIFEN.2014年停藥.2018年做右乳保乳的MAMMOGRAPHY常規檢查時,發現鈣化點比以前增多,呈微少粒狀態,ULTRASOUND報告正常.建議抽組織. 請問我是否複發? 是否需要連右乳也要切除?
抽咗組織就會有明確方向。
First of all, this web site provides excellent and professional information about the disease. I wholeheartedly thank for your efforts inputting the info together and openess in answering visitors’ questions.
My wife is 41yo.
Stage 0: DCIS; Total Mastectomy; Margins are not involved (at least 0.7cm from the nearest deep margin); No invasive carcinoma identified; Lymph node is negative for malignancy (sentinel lymph node); Extensive Intermediate to high grade DCIS, about 7cm in extent; ER+ with Allred score 7; PR+ with Allred score 8; Ki-67 index 13%; HER2/c-erbB2 overexpression 2 Equivocal)
What’s your view on taking Tamoxifen ?
When assessing the chance of recurrence, are we focusing more on the opposite side of the breast following the complete removal?
Tamoxifen同上面文章內容一樣。
唔會側重某一邊，兩邊同樣重要。
感激醫生回應。
吃 Tamoxifen 能防止原先一邊以及另一邊復發，唔知我以下的理解對不對 :
– 原先一邊復發，我理解成涉及割唔清(儘管是全乳切除及足夠孖展)，所以癌細胞以同樣biomarker再出現，所以吃抗 Tamoxifen 能有效對付它的 ER + 特性。
– 至於另一邊的遠端復發，其腫瘤的 biomarker 是否同初病發的原位癌有很大關連性 (基於同樣的DNA缺憾?)，所以吃 Tamoxifen 對另一邊同樣有積極意義?
另一個疑問: 原位癌進化成侵蝕性是，係否只是時間的問題, i.e. 是否具必然性? 若東果是或然，其影響因素是什麼呢?
Many thanks again!
你提及的見解理論可以正確，亦可以錯誤，因為呢個世界唔係非黑即白，可以同時存在多過一個正確答案／可能性，正所謂條條大路通羅馬。所以唔洗諗到咁複雜，知道兩邊都有幫助就得喇，雖然原位癌幫助嘅幅度唔大。
至於原位癌係咪一定會演變成侵蝕性，呢個難答，因為一方面我地相信佢假以時日係會變嘅，但另一方面亦都有人走嗰日（因其他原因走）都仲係原位癌，咁呢個角度我地又唔可以話佢一定會變。至於有咩因素令佢變，醫學界係唔清楚，所以原位癌都係要醫嘅。
多謝咁快的回應! 明白了醫生看法背後的原因。
請問有無研究論文，把焦點放在當另一邊復發時，其腫瘤特性跟原先原位癌腫瘤的相似性?
一問關於定義: 以確診原位癌來說，所謂於另一邊復發，其實係咪可理解成一個新develop出來的腫瘤?
Thanks!
總會有呢類研究，不過冇乜重要性，同定唔同都係跟最新嗰個去醫，所以冇放上心，有興趣就自己搵。
可以理解成新的源頭。
Thanks Dr Ma.
你好，本人65，剛做完左边乳房局部手術，確診為原位癌，但有0.5mm microinvasive carcinoma,(医生話可以唔駛理会),這是我的病理報告:oestrogen receptor,negative allred 0/8,progesterone receptor,positive allrex 4/8,score 35oh/300, ki-67 proliferation marker status, high proliferative index, 38%, HER2(c-erbB-2) onc0rprotein overexpression,positive,score 3,and a 65mm extensive DCIS, but
margin less than 1mm,
因可能割唔清，医生提議我返做手術全切，也可避免电療及日後復發机会微，我想問如選擇电療，不再做手術，我這情況復發机会是否会高过返做手術全切呢？
Microinvasive 即係invasive，要做返前哨淋巴手術的，並唔係「可以唔洗理會」，加上margin唔夠，最合理的做法係全切加前哨淋巴。選擇電療唔做手術係危險做法。
謝謝你的建議，在做局部手術時已割了4粒前哨淋巴化驗話冇事，0.5mm的microinvasive margin 都有5mm ,只是DCIS的margin less than 1mm ,在這情況下需要做化療及電療嗎？如果選擇返做全切手術後冇找到有入侵性癌是不是不需化療和電療呢？
DCIS Margin 唔夠係要返手做手術，洗唔洗化療電療視乎最終係咪全切同最終病理報告。
明白了，thanks doctor.
Hi ! Doctor. I am now 46 and just finish surgery. The result confirmed as Stage 0, no invasive. I am ER positive 6(4+2), PR 4(2+2), Ki-67 Proliferative Index 9% (Low), c-rrbB2 overexpression 2. The tumor size is 0.8×0.6×0.4. My Doctor advised me to take 電療then is OK.
My question is :
1) If I take medicine after 電療, is that the chance of getting 復發 is less than just 電療?
2) Per the test result, I got hormone receptor for my cancer. I would like to know whether I got hormone receptor before I got cancer ? If so, am I inclined to get breast cancer more easily than others if I expose to food/cosmetics with 雌激素?
3) I would like to prevent 復發or another breast has the same problem later. Please advise.
Thanks!
1）係，不過存活率一樣。
2）我地唔會喺正常細胞做ER/PR，所以你的推論無從引證。
3）定期檢查，食藥。
Dr, Thanks very much.
抽針後結果係導管原位癌+微浸潤細胞癌，呢期情況係屬於零期定一期呢？
起碼一期。
因為真係呢樣野一無所知。。我好擔心我媽媽…
1)Mass 4b係指?
2)同埋我見個size係 7 x 4 x 8(mm) 係屬於大嗎？
3)size 會唔會係其中一樣決定要做全切定局部切既因素之一? (見到報告寫既野係 冇侵蝕性，margin 係microlobulated,)
4) 我見其他case有提到 係咩grade, 睇返報告 佢寫 intermediate nuclear grade. 請問會係影響 決定 做邊種手術嗎？
感謝你…
1）我估你指BIRADS 4B，如果係的話，即係中度可疑，要抽粗針或做手術。
2）唔大。
3）係。
4）唔影響。
請問我零期一月尾做了手術,三月尾完成電療，請問最遲要開始食tamoxifen. 因為老公last minute先挑戰我食了藥不能懷孕，有否其他藥用可考慮….謝謝
直情唔食藥。
你好。我的個案是0期乳癌（左邊），屬於low grade
在今年9月12日做了切除癌細胞手術，手術後轉介政府醫院做電療，排到12月中見腫瘤科醫生。請問會否太遲接受電療呢？因為私家醫生說最好手術後1個月開始做電療。我擔心會過咗最佳電療時間。謝謝回覆！
Low grade 原位癌唔急電，半年內開始都ok。
謝謝醫生回覆！我放心了！
馬醫生你好！
我外科同oncologist都話我原位癌唔需要食tamoxifen
我係ER+/PR+
請問唔食藥，勤d檢查可以嗎？我37歲….
原位癌可以唔食。
醫生你好，想請問我抽針原位癌，但我知道最終結果要做完手術先知，但之前見人講抽針會知屬性，但公位醫院話原位唔睇，係米指抽針階段唔睇？
另我之前做完癌前病變個手術，係乳暈度開，覺得乳頭有d痛如件衫接觸到，唔接觸到就無咩，問左醫生話正常，係米咁的？
同埋因爲癌前病變個手術，檢驗後有原位癌細胞，所以最後揀左局切，因個日我無拆紗布，唔知原來乳暈開，醫生話用舊位開，咁米會keep 住與頭痛？
最後想問吓小手行拎左癌前病變去檢驗到原位癌，但都要大手術再切先知屬性同有無侵蝕？因醫生話個紙口位唔夠
原位癌唔需要標靶治療，荷爾蒙治療又觀點與角度，所以屬性唔重要。
乳頭敏感好常見。
做清就知有冇侵蝕性，有侵蝕性先睇屬性。
謝謝你的回覆^_^
媽媽確診原位癌5mm大，但她巳85歲，是否應該做手術？風險是否很大因她巳85歲？
醫生說有3個方案……
全切除
局部切除加電療
食藥 控制
請問那個方案比較好？謝謝
85歲年紀係大D，不過都要睇本身身體狀態。局部切加電療最好。
醫生， 你好！
我是確診乳癌零期， 已診斷為原位癌，沒有侵蝕性， 已做了局部切除手術，我的腫瘤科醫生建議要做20次電療. 現在我有以下這些問題。
1.）手術後多久才可以開始電療？
2.）私家醫院 同 政府醫院做， 除了費用不同外， 會有什麼大差別？
3.）如排政府做電療， 會否因為排的時間太耐， 以令到有機會好快會復發？ 是否應有一個合適的等候期，如手術完成後， 多久時間內便應該開始電療？
謝謝！
1）手術後4-6星期。
2）是否用呼吸法／弧型式電療（IMRT／VMAT），主要都係副作用多寡。
3）唔會。半年內要開始。
謝謝醫生那麼快的回覆
1.）IMRT 和 VMAT 有哪些不同的副作用？是否根據乳癌的屬性去決定用哪一種？ 我是ER Negative, PR negative, cerbB2 positive 3+, Ki67 index 35-4
0%
2.）哪一種是現時比較建議採用的？
感謝幫忙！
1）同普通電療一樣，只係程度嘅分別。不是根據屬性去決定。
2）人人情况唔同，唔係單一選項。
馬醫生你好，我剛做了左乳局部切除腫瘤，病理報告是invasive carcinoma, grade 2, 1.8cm,但有3 foci of DCIS ,size 0.1-0.2 cm across microscopically, low to intermediate grade,resection margins: 0.9cm from 6H margin, 0.7cm from anterior margin, 0.5cm from deep margin. 請問:
1. DCIS margins 清嗎？
2. 同時有invasive carcinoma and DCIS 是否很少有？是否很大機會仍有其他 DCIS 在冇切走的左胸和在右胸呢？要再做手術嗎？
3.PET scan 和 前哨淋巴冇擴散，ER,PR positive, HERs 0,Ki67 of carcinoma is 20%, Ki67 of DCIS is 9%.Oncotype 等緊結果，如果要做化療，能否殺死有機會存在的DCIS ?如果不需化療，賀爾蒙治療能否殺死它們？
4.賀爾蒙治療對付癌细胞是把它們殺死，還是只抑制生長？將來停药後癌細胞工會否有可能甦醒重新生長？
5.我之前是在浸會抽粗針，Ki67是30-40,手術是在養和做， Ki67是20,為何相差這麽大呢？以那個為準呢？
6.Ki67 高，是否 Oncotype 的 recurrent score 多數都會高呢？Oncotype 的建議信得過嗎？
Thanks a lot.
1）答唔實。你提供嗰三面就清，但你冇提供3H, 9H, 12H margin資料。
2）很常有。有冇殘餘要視乎手術前造影評估同手術的病理報告去判斷。
3）兩者都有機會殺死殘餘癌細胞。
4）兩者都有可能。
5）Ki67本身係主觀嘅，某程度上受撰寫報告的病理科醫生所影響，唔同醫生寫報告，可以有出入。以手術為準。
6）有關聯，但唔係必然關係。OncotypeDx信得過。
Dear Doctor Ma,
好想請教你及聽聽你的意見，本人45歲，正計劃生BB中，但上個月突然發現DCIS，所以我上兩星期做咗右邊乳房局部切 right lumpectomy ，報告出咗係DCIS，intermediate to high grade. No invasive malignancy is seen. The superior margin is involved by the Tumor. ER positive (Allred score 7/8) PR positive (Allred score 8/8)，現左等傷口埋好，之後才開始電療。我的問題是我仍然可以進行原本生BB plan嗎? 因為年紀不小了，可唔可以生完先開始食10年荷爾蒙藥or 可以不吃？因為8年之前亦做過子宮肌瘤手術, 亦害怕食荷爾蒙藥對子宮有影響? 真的不知如何選擇?
Many thanks!
藥唔使食， BB可以繼續計劃生。不過反而最大問題係你手術未切清，你係要再做多一次手術，並唔係就咁等傷口埋之後做電療。
Dear Doctor Ma,
非常感謝你的快速回覆！
我可以不用吃荷爾蒙藥，並可繼續我的生BB的計劃，實在太好了太開心！但我想請教你，完成電療後，要等多久才可重新我的生BB計劃會比較安全？
另外，那裏看到我的手術未切清？因為我入院一星期內內已經做了2次局部切除手術，對不起，可能我上面寫得唔清楚，加上自己唔識睇那份報告，或者我喺下面全部打一次，麻煩你幫我望多一次，萬分感激！
手術1:
1) Right lumpectomy
– DCIS, intermediate to high grade
– no invasive malignancy is seen
– the superior margin is involved by the tumor
– the medial margin is focally involved by the tumor
– other resection margins are clear
2) Right breast mass
– fibrocystic change and fibroadenoma
– no evidence of malignancy
3) Right superior margin
– DCIS present
– the true margin is focally involved by small focus of DCIS
手術2:
Right breast margin
– sections show a piece of benign breast tissue. There is no evidence of malignancy
– negative for malignancy
Many thanks!
完成電療，唔使等，隨時可以生BB。
你第一次手術未切清，所以要做第二次手術，嗰次就清。
Thank you Dr Ma 🥰
馬醫生你好, 我56歲, 已在5月19日全割右邊乳房, 病理報告是：residual high grade ductal carcinoma in-situ with a single focus of microinvasion, size of residual ductal carcinoma in-site:1.2cm. size of microinvasion: 0.05cm. no tumour involvement of skin, no paget’s disease of nipple. No lymphovascular permeation. No perineural invasion. Deep market clear of in-site and invasive carcinoma. No sentinel lymph node metastasis. This microinvasion corresponds to a grade 2 carcinoma. The focus is surrounded by tumour infiltrating lymphocytes. Immunohistochemical staining for p63 shows complete loss of myoepithelial cells in the microinvasive focus. There is no lymphovascular permeation or perineural invasion. 最後, 再驗, deep sections for immunohistochemical study for breast cancer markers show no residual microinvasive tumour cells. Assessment of breast cancer markers on the microinvasive focus is not possible.
醫生話不用做化療和電療, 咁請問high grade ductal carcinoma in-situ 是惡性原位癌嗎?易復發嗎? 是否食AI葯可減低復發? 我又怕骨質疏鬆會令我不能工作, 因也有經齊壓力, 實在很擔心呀!
我哋唔會話惡性原位癌，原位癌分低度中度高度，你係高度。
易唔易復發就視乎整體病情，你報告寫residual，即係之前已經做咗啲嘢（例如手術／微創），要視乎嗰度有冇侵蝕性先可以答到。
AI能唔能夠減低復發，好視乎個屬性，但而家驗唔到，所以唔知道。
咁請問如有microinvasive ductal carcinoma要食葯嗎?
ER/PR +就要。
你好醫生，我2019年原位癌，局部切除加電療。今年四月抽針話覆發DCIS high grade. 因在外國，現在還未有治療方案，等緊約專科跟進， 有冇話最好多久要做手術？怕在外國等太耐，考慮緊返港醫。係咪最好全乳切除防止再覆發？還要再電療嗎？感謝
局部復發，由於之前已經電過療，今次唔可以再電，所以一定要全乳切除。
最好一個月內做手術。
請教醫生，右邊係high grade DCIS，no invasive carcinoma, 4.2cm, ER+ve PR +ve, Ki-67 15% Deep margin: clear (0.8 cm clearance) Anterior margin: clear (at least 0.3 cm clearance), Equivocal for c-erbB2 oncoprotein
已做了「兩邊」「全乳」切除加即時重健，康復中
請問是否不用食荷爾蒙藥？亦不用電療？對嗎？
謝謝醫生指教
啱，不需要食藥／電療。
Dear Dr Ma, it was said in the post that “相比侵蝕性癌係電少5次，因為唔洗腫瘤位置加電（tumor bed local boost），即係最少電15次就搞掂。” but a doctor suggested 15+5 as the norm and recommended 15+8 perhaps due to 1 close margin <1mm. I am worried that the dose is too much. Thanks for your advice.
DCIS唔使加電前設係要割得夠清。
你Margin 唔夠闊，如果可以再切應該要再切，如果唔能夠再切先用局部加電去替代。
Dear Dr Ma, some information suggested that 1 week delay of radiotherapy reduce the recurrence reduction percentage by 1%. Is it true? Will half a year wait too long then? Thanks.
我冇留意到有啲咁嘅說法，亦都唔相信現實可以做到一啲咁嘅醫學研究去證實。
其實close margin <1mm 是否未割清？
叫做清，但未達安全標準2mm。
Dear Dr Ma, 如果deep side margin <1mm, 是否太近chest wall就無法再割而必須做電療？Thanks.
可以再割，乳房底床係胸大肌（pectoralis major)，可以掘深啲去令個deep margin達標。
Dear Dr Ma, thanks you very much for your generous advice and clear explanations.
Dear Dr Ma, what is the down side / drawback / risk of doing a 2nd operation? What is the best timing to do it (as soon as possible?)? As the initial operation was done a few weeks ago, is it too late to do it as the original wound might have been healed? Will the 2nd operation badly delay radiotherapy? Thanks again for your advice again.
唔好處就係要做多一次手術，心裡不爽/費用/延遲復康。
如果係做，就盡快做。幾耐都仲做到，當然越早就越易做。
如果做清咗個deep margin，加埋已經全切，已經唔洗電療，冇再有delay問題。
Thanks Dr Ma again!
你好，想問原位癌，做左切除一邊全乳房手術，但病理報告發現有1mm入侵性曠散，要排期睇腫瘤科，想問下咁既情況要唔要再做電療
全切唔洗電療，反而要確定上次有冇切前哨淋巴，有就冇問題，冇就要做返。