乳癌治療時間 － 我需要用咩方法醫？2
承上回講到乳癌治療方法我地有五大法寶：手術／化療／標靶治療／電療／荷爾蒙治療。
下個問題就會問「咁我需要用咩方法醫先？如果唔關我事嘅，等我唔洗驚定先吖，就好似入戲院睇鬼片咁，我驚就驚咗呀，車～原來冇鬼嘅」
呢一篇「乳癌治療時間」會黎一個乳癌治療方法嘅總結，話比你聽做邊樣先同埋用你幾多時間⋯⋯
唔知你仲記唔記得喺「乳房抽針檢查 － 乳房檢查三步曲3」中我教大家抽粗針嘅好處，唔記得就返去再重溫⋯⋯
我話抽粗針可以知道癌細胞同啲藥夾唔夾，咁即係咩意思？
HER2/ER型乳癌
每個乳癌細胞都會有標靶藥受體（HER2受體），同埋荷爾蒙受體（ER受體）。對呢兩種治療有冇反應，就視乎受體水平有幾高。受體水平越高，即係對種藥越有反應。越有反應即係點？即係同種藥越夾，夾又點？夾即係如果你肯跟醫生指示去打標靶藥／食抗荷爾蒙藥，你會少啲復發，命都長啲，真係好似米雪話齋「日日keep住食，藥箱都變成首飾箱」。詳細關於受體水平嘅野交返比醫生，簡單啲講你只要知／只要識問醫生「我既癌細胞有定冇HER2受體／荷爾蒙受體？」
攻略時間：
1）有HER2受體＋腫瘤（Tumor）大過1cm－＞化療加標靶
伸延閱讀：
乳癌標靶治療 － 乳癌HER2型點樣揀？
乳癌雙標靶治療－HER2型乳癌的春天
乳癌類型巡禮 － 與你細數HER2型乳癌的歴史
2）有HER2受體但腫瘤（Tumor）細過1cm－＞要睇埋其他因素（例如淋巴情況）先決定洗唔洗化療加標靶
3）冇HER2受體－＞冇需要標靶
4）有荷爾蒙受體－＞食藥
伸延閱讀：乳癌荷爾蒙治療 － 點解我仲要食藥？
5）冇荷爾蒙受體－＞唔洗食藥
「講咗咁耐都好似冇提過手術／化療／電療咁嘅？」
有追開嘅／順住去睇嘅，仲記唔記得喺「乳癌分期－我係早期定末期？」中講過TNM 分期同埋救火比喻？
如果唔記得／冇追開嘅，去返嗰篇睇完先返黎⋯⋯
乳癌治療時間表
搞掂拿？好，我地繼續講⋯⋯
做唔做手術／化療／電療就睇你係第幾期
癌症分五期，大方向如下：
乳癌零期原位癌
冇機會擴散去其他器官，成功醫好嘅機會最大，主要都係手術加減電療。醫好後睇吓洗唔洗食5年藥。
乳癌一期
早期侵蝕性癌，有機會抗散去其他器官，雖然機會唔大。要醫得好，就要喺佢未擴散前處理好。主力都係手術加減化療／標靶治療／電療／食藥。
乳癌二期
都仲算喺早期侵蝕性癌，有機會抗散去其他器官，機會大過一期。如果可以喺佢未蔓延之前處理好，都有得醫，主要都仲係先手術，再加化療／標靶治療，加減電療／食藥。
乳癌三期
屬於後期，啲癌細胞已經擴散去淋巴，好大機會會擴散開去，先化療／標靶治療，再做手術，術後電療，加減食藥。
乳癌四期
屬於末期，啲癌細胞已經由淋巴擴散致其他器官，主要都係化療／標靶治療，加減食藥。手術同電療呢啲局部治療，個別情況先用到。
點問醫生？
你要問醫生幾樣野：
未做手術前：有冇HER2受體？有冇ER受體？臨床係第幾期？
做咗手術後：HER2受體／ER受體情況有冇轉？病理學上係第幾期？（因為割出黎後顯微鏡底下睇可能同術前臨床評估有出入）
之後就再對返以上各項，大致估到有咩治療要做。
同你醫生建議冇出入，起碼你都有定心理準備。
同你醫生建議有出入，你就要問淸問楚。
下一篇我會以西醫嘅角度去睇吓乳癌嘅中醫治療⋯⋯
香港乳癌及乳病治療中心 
Breast HK, 又是我^^
我在私家醫院做了手術現在在政府排期等見醫生, 如果我的報告是:IDC grade2, T1N0 ER+PR+, FISH-ve, Ki67 30%, cerB2 2/3
請問一下我多數要做化療嗎?
有2個因素會影響決定：
1）歲數
2）實際腫瘤幾大：因為T1仲有分abc
你個case唔滿意嘅地方就係後生（唔係年齡歧視，不過識上網兼問野，都係後生居多）、Grade2同埋Ki67比較高，所以我會建議TTCx4。
如果想多D資料幫你做決定，可以考慮比$35000做OncotypeDx，睇吓高唔高危復發，先決定打唔打TTCx4。不過做咗OncotypeDx都可以模棱兩可，因為復發指數可以唔高唔低，咁就浪費咗金錢。
比我係你，如果唔太介意化療，就唔做OncotypeDx，直接打化療算。相反，如果好唔想化療，就比錢做OncotypeDx，希望多D證據支持自己唔做化療嘅決定。
謝謝你再次為我解答疑難.那我已有心理準備的了.
我快將40了….
而我的腫瘤是16mm,那是屬T1C嗎??
係T1c。未夠40，都係打TTCx4啦。
完全明白了, 再次感謝Breast HK為我解答.
Breast HK，早幾天我已見了醫生，正如你所説TTCx4。但那醫生説電療時，除了電乳房還要電淋巴。為何我電療要電埋淋巴？如果我做化療加電療（乳房）加食藥5年，只是不接受電療淋巴的話有大問題嗎？可以的嗎？不電淋巴覆發比電的話多幾多%？
我真的佷怕水腫。因為早前我做了前哨淋巴手術，割了五粒淋巴是沒有發現有拡㪚。
但術後格勒底水腫去抽水3次。其中第二次抽水在星期五的下午，但星期六上午又開始水腫了。於是我星期一下午又再去抽，但這次痛到不能伸不直手，手臂一伸直少少已覺扯住了，所以除衫也有困難。醫生説我這麽痛是因為水腫壓住了神經線。我當時除衫已痛到眼淚也標了出來…
你之前冇講清楚做咗咩乳房手術，究竟係局部割定成個乳房割？因為你要電療，以下建議我係估／假設你係局部割先。
你整體期數係T1cN0(sn)，我睇唔到有咩理由要電腋下淋巴。呢個你要返去問清楚腫瘤科醫生兩樣野：
1）電淋巴係咩意思？我之前一路講嘅電淋巴係指劃位時專登包埋「所有」淋巴位置（regional node irradiation），其實有時電乳房（whole breast irradiation）都會包到「少少」淋巴位置，所以你問清楚係邊一樣？如果只電乳房包到少少淋巴，即管去馬，冇咩大問題，係常規做法。
2）如果佢話要專登劃位包晒所有淋巴位置，你要問佢咩原因／有咩理據T1cN0(sn）要電淋巴？暫時我睇唔到有咩理據要咁做。
再次謝謝你。看到你的回覆後個心定了很多。
我是局部割的，希望是我聽錯／誤會了醫生說電淋巴的意思。我下次覆診時會再跟醫生確認一下。
下星期看抽血報告了，通常睇完抽血報告是不是很快會開始化療的呢？
將會做化療，心情有d忐忑，因為看到很多副作用…希望自己捱過到啦。
睇完抽血報告就好快（一兩日）開始化療。TTCx4最舒服㗎喇，好快見到曙光。
Breast HK
Is it necessary to have the whole breast removed if it is Carcinoma in situ? If not, will it re-occur again easily?
The decision of removing the whole breast DOES NOT depend on the tumor histology (ie not related to invasive or in-situ cancer).
For both invasive or in-situ cancers, the whole breast should be removed only if :
1) there is contraindication for radiotherapy
2) the specimen margin still contains cancer cells despite multiple attempts of surgery
3) multicentric disease (meaning that there are multiple cancers in one breast)
So what is the difference in surgery treatment between in-situ cancer and invasive cancer? Sentinel lymph node biopsy is optional in in-situ cancer surgery; while axillary lymph node surgery is a MUST procedure for invasive cancer.
If adequate normal surrounding tissue is excised together with the tumor (ie adequate negative margin) and one receives adjuvant radiotherapy, the recurrence risk for in-situ cancer will NOT be higher even when the whole breast is not removed.
Hello Breast HK,
我媽媽60歲﹐遇上乳癌﹐於7月13日做了右乳整個移除手術。病理報告得出的結果是ER/PR strong +ve ; Her2 -ve ; Ki-67 20% : Grade 2/3 ; No lymph node metastasis ; max. tumour size 30mm ;T4N0。而手術前做過靜電子掃描﹐其他器官亦沒有問題。
因我媽發病了一年多﹐當時腫瘤已侵犯到皮膚面層﹐爛出來甚至流血。所以術後醫生建議打4針化療+電療+5年藥確保復發機會減到最低。但我媽身體一向不是很強壯、零運動、血壓有時候還會頗高﹐所以擔心她會受不了那4針化療。加上﹐她自己心理上其實好害怕化療會帶來的副作用 (而我覺得心理質素在治療當中亦很重要的)。作為子女﹐其實一方面擔心媽媽受化療後會很辛苦亦更加擔心往後復發的嚴重性。
希望Breast HK可以多給點建議… 以我媽這個CASE, 如果不做化療會否是個正確的選擇呢?
T4N0已經係stage 3B，復發機會高，正路係會建議做化療。不過媽媽睇黎都係諱疾忌醫類型，乳癌到爛出黎先去醫，睇怕未必咁易接受化療建議。如果最終佢唔選擇化療，唔好諗「正唔正確」去俾自己額外壓力，換個角度睇「其實佢係有進步空間」。
如果我媽昨天確認了是乳癌 下個月19號才做手術切除右邊乳房 但未肯定是否已擴散至淋巴 會否在手術前惡化得很快？例如 本來沒擴散至淋巴惡化成已擴散至淋巴？
有呢個風險。
Hi 我媽媽60歲，2013年CA Breast 做了Mastectomy，三陰性，發覺已牽連淋巴，做了紅魔鬼chemo。 2016年發現Lt Axilla有粒野，做左fna發現係惡性，Pet scan顯示已擴散至胸腔同某部分淋巴位置，再做chemo(taxol+carbo) 2017年1月尾完化療,而whole body pet顯示complete metabolic response。 2017年4月頭發現嘔吐、頭暈, pet scan with brain +mri 顯示metastasis to brain, 有成起碼10幾粒係腦，其他身體位置唔見，目前剛完成wbrt, 請問可否以chemo+抗血管增新標靶藥治療呢？如可以，是否適合繼續用taxol+carbo呢？需否額外試用其中非乳癌之標靶藥？謝謝
咁個人化的建議最好同自己醫生商量，初步我未必會建議再化療，因為好大程度上係賺唔到。
今日見左HA醫生，佢建議兩條路，一係oral Xeloda, 二係觀察，有新發現先再考慮做化療。而私家醫生建議chemo+Avastin（因全腦電療後有統計化療藥有可能通過血腦屏障）,或者blindly試其他標靶藥，如Everolimus。 對家人黎講，四月知道腦轉移已經係新發現，剛剛完成全腦電療，其實肯定仲有殘留癌細胞係腦，家人和媽媽都好擔心腦轉移變快，與其觀察情況變差，大家都希望積極對付癌症，媽媽亦想再試化療，但請問Xeloda成效如何呢？因感覺上口服藥冇靜脈給藥咁強。另外，如果我地真係想選擇化療，以HA醫生咁講，係咪最後都唔會批準呢？（假設媽媽血報告同general condition合格）謝謝醫生解答?
實不相瞞，依媽媽情況，估計只剩下4-6個月時間。如果仲花時間去做化療而降低生活質素，什至可能因此而要住院，實在是本末倒置，唔好話賺，可能要蝕添。明白媽媽和家人希望積極面對，但呢個時候，唔再浪費精力去試藥，珍惜剩下來的光陰，可能係最好的建議。
醫生,不好意思，阻你寶貴時間。有一問題詢問?我3月7號已做左粗針抽取組織化驗，只有1粒，而同一位置是抽取三次組織。今天已有報告亦巳约了醫生3月14號上診所講解報告內容。之前粗針抽查時，做過造影及超聲波，掃描醫生看圖片說粒野唔係生得好靚，但成份好高係癌。所以要見醫生做粗針檢查。醫生看過報告說：粒野很細16x15mm，同時再用超聲波再掃描一次淋巴，說還未有擴散到淋巴位置。請問16x15mm等如多少呢？是否擴散第一時間係走淋巴位置先擴散其它地方嗎？謝謝！
如果粒野係16mm，即係T1c，淋巴冇擴散的話係N0，假設冇擴散去其他器官，係M0。T1cN0M0即係第一期A。
唔一定要先擴散去淋巴先可以擴散去其他地方。不過話分兩頭，如果有淋巴擴散，比起冇淋巴擴散，係大D機會走去其他地方。
醫生你好，
不好意思，因萬分緊急，我手術於22/6，化療將安排於1/8，不在你所建議的4星期內，會否有問題？化療時間是否必須於20/7做（即緊接在4星期），萬分感謝！
我冇建議過四星期內做。腫瘤科醫生一般希望六星期內開始就最理想，最遲唔好多過三個月開始。
明白了, 謝謝醫生！
醫生，想請教，本人33歲，上星期已做全乳切除及乳房重建，報告為Invasive ductal carcinoma;
max tumor size:5.6cm
ER: positive
HER2: 3 positive
Ki67: 20%
Tumor grade:2
1粒淋巴受感染
請問有無建議用咩治療呢？打邊隻化療針好呢？另外因爲做了全乳，唔電療有無影響？謝謝
要食全餐，化療加標靶TTCHx6，之後淋巴有擴散，即使全切都要電療，仲有食抗荷爾蒙藥。
醫生你好，我50歳，剛完成手術兩星期，確診pT1miNo(sn)，ER & PR Positive，c-erbB-2 Negative，Ki-67 10%，已排期政府醫院22/5見腫瘤科醫生，我需要接受什麼治療，電療+食葯？定再加化療？
局部割就要電療加食藥，全切就淨食藥。唔洗化療。
想由私家轉去政府医院化療，請問要排幾耐？会否延遲了接受治療会影響成效？
另，政府和私家用药、疗程是否一样？
另，是否如果要求可加錢用好些嘅药，政府医院都肯？是否一開始要講？
間間醫院唔同。
延遲可能會影響成效。
政府同私家用藥／療程可以一樣，可以唔一樣。
唔存在加錢的選擇。