乳癌治療費用 － 危疾保險保唔保？
乳癌治療，醫生都未講方法，病人已經諗費用：「乳癌治療費用幾多？私家醫生收費貴唔貴？保險保唔保？賠唔賠足？」。你未同癌魔抗戰，已經要同保險經紀周旋，睇下以前買落份保險幫唔幫到。呢篇唔係教你對抗癌魔，呢篇係教你做個精明消費者，識破魔鬼細節，唔好比人呃⋯⋯
利益申報：本人沒有與任何保險公司有任何聯系，亦都沒有建議任何人向任何公司購買任何保險產品。以下內容帶有強烈個人色彩（主要源自病人不快的經驗，戥大家心痛），只代表個人意見，保證內容不中立，敬請各持分者留意，唔啱聽就唔好睇，當有個傻佬自己係屋企發噏風算。
醫生平時除咗醫人，其中一個重要工作就係幫人填保險索償書。填得多，並唔係填得快，填得多，你會戥病人不快⋯⋯
小心魔鬼細節！
當醫生話你聽你生乳腺原位癌時，第一個反應一定係「天啊～～點解係我？」；相反，當你中咗六合彩頭奬時，你唔會問「天啊～～點解係我？」，你會問「天啊～～點解頭獎唔係一注中？」
中咗「癌」同中咗「奬」當然差天共地，唯一共通點就係「錢」，不過一個係「洗錢」，一個係「收錢」。癌症病人除咗要面對「有冇得醫」，另一個好重要嘅問題係「夠唔夠錢醫？」
「會唔會用晒屋企啲錢？會唔會要用埋老公都唔掂得嘅子女教育基金？」
就喺你離開診症室，搭緊車返屋企，最煩惱嘅時候，你收到保險公司嘅推銷電話⋯⋯，之後你好興幸自己當年趁後生做嘅一個「精明」決定－「買危疾保險」。你好記得嗰份當年一出黎做野，咩都未買比自己／父母，就比人氹你買嘅保險。嗰一份每個月都食咗你一部份糧，到你結婚生仔等錢洗，你想斷都斷唔到嘅危疾保險。供咗咁多年都未斷，你靠嘅係一份信念，一份「佢地個個都錯，我冇比人呃」嘅信念，一份「到我生癌嗰日，保險會幫到手」嘅信念。
返到屋企，鞋都未除，鎖鑰仲插係大門度，你已經快過劉翔跨過地下雜物衝入房，劉翔冇停係起跑綫都唔夠你快，翻箱倒籠咁搵你嗰一份保障，皇天不負有心人，終於比你搵到⋯⋯
圖片來源：友邦香港
第一眼你見到嘅係保險公司寫喺封面嘅口號「訂下承諾，愛出安穩未來」，仲要加句英文「Only you, I love & care so much about」。簡直感人過結婚嗰日，嗰衰佬講嘅「我願意」。
圖片來源：友邦香港
你急不及待揭去危疾保障範圍嗰一版，第一個字詞影入眼簾嘅係「癌症」！！呢一刻你眼濕濕，你忍住淚水叫老公唔好掛住鎖門，快啲入黎睇睇，睇下自己有冇睇錯／有冇眼花。老公好肯定同好心虛咁答你「冇睇錯，真係寫住癌症」，心虛係因為佢笑足你咁多年「死蠢，買保險，比人呃」。你好驕傲咁同死佬講：「呢D先叫承諾㗎麻，同你結婚嗰日講、事後又做唔到嗰D差得遠⋯⋯」
你好感動，你真係好感動，你正想搵保險經紀嗰電話，除左想打比佢傾傾點索償，仲有想請佢飲茶多謝佢。你揭揭揭，直到你揭到第四十三版，有D細字你睇唔清楚，用埋你小學時買嘅放大鏡終於睇到：
圖片來源：友邦香港
今次你D淚水真係再忍唔住⋯⋯
你供咗咁多年到今日你先知，原來乳腺原位癌唔係癌，原來早期甲狀腺癌／早期前列腺癌／早期慢性淋巴癌都唔係癌，就算喺皮膚癌都唔係癌，喺不在保障範圍之內⋯⋯
保險公司嘅邏輯簡直顛覆你嘅人生觀，原來百事可樂唔係可樂，原來檸檬可樂／低糖可樂／無糖可樂都唔係可樂，就算喺可口可樂都唔係可樂，因為喺保險公司嘅角度，佢地全部都唔「可口」。
保險經紀會話：「因為呢D係早期癌症，存活率高，好大機會醫返好，所以公司唔當危疾。」
喂，你唔當唔緊要，唔好咁鬼鼠，夠膽就大大隻字寫喺「癌症」隔離，睇吓有冇客幫你買。
「哦，唔好咁勞氣，晚期／末期癌症係一定有得賠嘅⋯⋯」
晚期／末期都冇得醫，你賠D錢比我仲咩？我最要用錢嘅時候，就係早期仲有得醫時。
「姜大衞都有教，留底嘅喺一份心意⋯⋯」
我要留心意嘅話，就買重人壽保險，唔係買你危疾保險啦。
有D保險公司都好D，會寫清楚少少，起碼唔洗用放大鏡：
圖片來源：友邦香港
佢地叫原位癌做「自選附加保障」，仲要賠償額打個一折比你，幾慷慨～
今日你就返去睇清睇楚，自己份危疾保險咩野包咩野唔包。
小貼士：你想搵醫生填索償表格，有時唔急得，可能抽針話原位癌，到做完手術，原來有侵食性，咁就唔到佢唔賠。所以都係等做完手術，出晒報告先索償啦。
圖片來源：友邦香港
我見咁多廣告，我最鍾意以上呢一個，因為佢夠誠實，一定冇違反商品說明條例：佢大大隻字話比你聽佢嘅賣點就係「保證續保」⋯⋯⋯⋯不過唔肯定賠唔賠到。真係好似黃子華啲邏輯：「保險公司肯賣呢隻保險最大原因係覺得佢有賣點，而呢隻保險最大嘅賣點就係『佢肯賣』，佢肯賣因為『佢肯賣』，而你肯買嘅原因亦係因為『佢肯賣』」。
喺呢個最需要「誠信」嘅年代，危疾保險咁樣做生意法，真係好難怪人排擠保險行業。
錢，係要搵。錢，不過唔係咁搵。
生意係要做，待人以「誠」，先係皇道。
唔怪得佢地要時時刻刻提醒自己要有「誠」要保「誠」，或者你索償？我「不怕」⋯⋯
下一篇帶你睇睇另一類保險「醫療保險」點樣「幫」你⋯⋯
香港乳癌及乳病治療中心 
其實所有貨品都有優點缺點，食Mcdonald 冇營養會肥好多人都知，你是否認為 Mcdonald 應該在食物包裝上大大隻字寫明『食物營養價值不高』先叫做良心企業？又講每件衫正常都有好細個 Care Insurnction Label 講件衫唔可以做啲乜，我覺得按你的logic, 應該去消位會投訴，因為個label唔顯眼字又細。已經寫到明都仲要串人地唔夠顯眼，你想點係人都知啦，記得去***有「誠」要保「誠」*** 買好野ma… by the way, 『有誠要保誠』都有不保條款，字體又咁上下大，咁點算？我要去邊間買好？連最有誠的公司根據你的說法都變成魔鬼騙子了。求高人指教我應該如何在一個一向都唔用大字寫明缺點的商業社會上生活？我而家覺得個社會充滿騙子，唔知你呢篇野會唔會大大隻字寫明不保證內容中立？ 又唔知你會唔會 Delete 我個 Post廢事我點醒其他睇唔穿真相的朋友？
我講咁多野真係袋錢落你袋，你收到幾多就睇悟性，下次唔好再一知半解，在未做齊資料搜集下扮中立分析了，好唔專業，你的職業應該要專業中立的吧？haha
對唔住，以上文章引起閣下誤會。事實上我冇同任何保險公司有任何聯系，亦都唔建議任何人向任何公司買任何保險產品。
最後，已順應閣下要求申報利益，多謝你嘅提醒。
Comment 都仲要等你批…知你想點…呢個世界騙子太多 笑了
你有所不知，我呢度每日都收到大量賭波／色情／垃圾網站嘅廣告留言，為咗令病友／家屬可以喺一個寧靜嘅環境下，了解一啲生死攸關嘅乳房健康資訊。我著實有必要守護我呢個家，所以我係實行「有篩選、冇普選」嘅留言制度。
雖然閣下嘅留言帶有攻擊成份，但我係唔會刪除嘅。因為希望得到你嘅尊重之前，我會先尊重閣下嘅發言權利。
其實我地一般小市民買保險真係唔係好識，只能信從業員解釋，我有暫時幸運地一年前由龍頭X記轉買Y記，否則今次的原位實百分百冇得賠。
係我嚟講保險公司的plan實在計得太完美，特别是X記完美得來又超複雜，一張summary十個八個item，啲名唔問都唔知保咩。
我一家3份保單，都有同一個item註明免費送你幾多萬人壽，後面收費真係$0架。點知打去hotline問，原來佢地每年會係我份保險到扣$1000行政手續費，咁我就問咩叫免費？為何不預先通知？他們也無言而對。
我老公係X記分别有2份保單，2份都要收$1000，共收2千。就係咁一家三口，4份保險8年就扣咗我3萬2。
你話我地一般小市民點會咁清楚細節！
一個人2份單都收2次，無奈！
如果我們會咁清晰了解到保險，我地做埋啦！
不過今次自己都未賠償到8月初的手術，我都擔心有爭論！
唔好意思，本人專登買左2017年最新第483期選擇月刊講保險，公開晒d保險資料，都搵唔到乳房原位癌保險，本人家族有呢個病，好想在市場上千百份保險中找到一份真正可理賠的，我花了差不多半年找相關保險，見過好多經紀，睇過好多計劃書，都係空手而回, 好高興遇倒Breast HK 呢個網頁, 又見倒chinchi幸運地一年前由龍頭X記轉買Y記, 希望 chinchi 或Breast HK 主持能夠從你們寶貴的經驗帶倒啲相關保險資料比我, 畢生感激.. 我唔想浪費一生儲蓄去買一份保險，到頭來有事係不理賠的。。。 謝謝
以上文章行文之後，保險公司係有進步嘅，2015年有一隻產品叫「癌症全方位保障」（邊間公司自己查，廢事有人誤會賣廣告），標榜包埋一D傳統保單唔包的項目：例如原位癌、有癌症病歷、乳房重建手術等，就咁條款睇落去好似幾均真，可以自己了解一下，我自己就冇買過冇claim過，以上純粹塘邊鶴言論。
哈哈哈，講得好好啊！我以前有個friend ，佢呀媽俾人冧左幫佢買女性危疾保，仲要個經紀叫佢呀媽唔好俾佢知住，偷偷地幫佢供幾期(過左冷靜期咪無得取消囉!)之後先叫佢自己供返，我個friend 知我讀Legal拎俾我睇下D條款，我當然知道炸彈越大字體越細的道理，嘩下，一睇D細字我食緊野幾乎噴出黎!
衣樣唔賠果樣唔賠，N咁多種癌唔賠都算，仲要未到未期都唔賠，死左又唔賠，咁即係維持未期一段長時間唔死先有得賠？咁機率係幾多？等佢賠我唔好去買六合彩? 知道中伏，佢想退保啦，點知又寫左退保的話唔只攞唔返D錢，仲要一次過賠N年的保金俾保險公司做掟煲費，佢O左嘴問我點算，我都俾唔到意見佢，見佢呀媽咁俾人呃法，真係心都寒埋！
衣度有D保險業從業員留言鬧醫生，同樣令人心寒，醫生讀書一定多過佢，見病人多過佢見客，更重要的係有良心過佢N咁多倍，先至會寫出黎提醒人，良知先係做人既基本，淨係識講的人，你的笑容比癌症更可怕!
我在某某王國見到有保險從業員駡吾買危疾保的人是無質素無能力無意識！真是可笑
一個咁好嘅醫生竟然俾人鬧，但公道自在人心！希望醫生唔好唔開心，唔好理d咁嘅’人’，要繼續努力，我地支持你！
我有買危疾保，供左幾年。講真，保險公司個plan都計過度過，啲“醫學名詞”雖然隻隻中文字我都識，但砌成一個term，我跟本唔知代表啲咩。
請問版主，作為一個普通人，危疾保仲有邊啲惡魔細節要留意？謝謝。
P.S. 我啱啱同我既經紀做年度review, 佢話公司又出左隻新產品，係保障初期既危疾喎！但以普通人既知識，就算我上網做幾多資料搜集都好，都根本分辨唔到份單個保障其實有幾多。
其實主要爭拗都係在於「原位癌係唔係癌」，同埋一D存活率好的癌究竟係唔係危疾。不能否認，近年保險公司的確有進步，有D產品會標榜包埋原位癌，甚或有過癌症病史都照受保，呢D保障係舊保單／舊產品冇嘅。作為普羅市民，只可以貨比三間去搵一D啱自己的產品。
醫生你好，我今年33歲，我媽上年（65歲）在內地診斷乳房有腫塊，醫生安排手術切除腫塊及一邊乳房，返到香港做埋化療，我想查詢咁嘅情況如我申報媽病歷會唔會唔受保與乳房有關嘅疾病？如果不申報保險公司會不會查到我媽嘅病歷？
會唔受保。查唔查到好難講，不過呃保險係刑事罪，切勿以身試法。
請問做咗切除癌細胞，保留乳房手術後，傷口是硬，要多久才變回自然柔軟？
電療後會再硬D，之後先軟返，你預幾個月至一年。
知道，謝謝！
原位癌係癌症，係危疾保險當中屬於早期危疾項目，會賠償20% / 25%保障額