乳房磁力共振（MRI Breast）－我又洗唔洗照吓？
「我見朋友照咗乳房磁力共振 （MRI Breast），點解我嗰醫生淨係叫我照乳房X光／超聲波？我洗唔洗自己比錢去照吓？」究竟乳房磁力共振幾時做？有冇用？我地一齊去睇吓⋯⋯
乳房磁力共振
「究竟咩野係乳房磁力共振？」
乳房磁力共振其實係乳房造影的其中一種，就好似乳房X光／超聲波咁，用黎照清楚乳房，睇吓有冇生乳癌。
原理係咩唔洗理，只要知道佢係用2個重點去分析吓D細胞肉唔肉酸：
1）磁力（唔係輻射）
2）顯影劑（gadolinium contrast）
「點解呢2樣野係重點？」
因為要利用磁力，所以身體有內置金屬（例如心臟起膊器、骨科手術的螺絲、釘等等）就要小心，輕則影響照出黎的影像，重則直情唔照得。如果真係有內置金屬，問清楚醫生佢係咪照得磁力共振（MRI-compatible），或者上網自己check check（www.MRIsafety.com)。
另外因為要打顯影劑，係有可能敏感，或者傷腎（本身腎功能有問題的朋友又要小心）。仲有懷孕就最好唔好照，因為顯影劑係會穿過胎盤去到BB度，有冇問題冇人夠膽寫包單，所以可免則免。
「咁實際點樣做？同乳房X光／超聲波有咩分別？」
乳房X光同超聲波可以參考返之前文章：乳房造影檢查 （ 乳房X光 ／ 超聲波 ） － 乳房檢查三步曲。
圖片來源：GE Healthcare
乳房MRI呢，就係扒係張床度，兩邊乳房下垂入個凹位度，跟住進入部MRI機度，一路打顯影劑一路照，其間部機轉動會好嘈嘅，D醫護人員又走清光（因為怕佢地身上的金屬影響你），不過唔洗驚，佢地會喺房外面指導你每一步點做。
記著，照就照打顯影劑嘅乳房磁力共振（即係MRI Breast with contrast），千萬唔好貪平照冇顯影劑的MRI Breast without contrast，有野都睇唔到嘅。
乳房磁力共振優點與缺點
「咁乳房MRI有咩賣點？」
賣點就係冇輻射（因為係用磁力），喺搵乳癌方面超級靈敏（high sensitivity），即係有殺錯冇放過。
「咁正？咁我而家就去book⋯⋯」
唔好咁心急，聽埋我講缺點先⋯⋯
「係係係，咁有咩缺點？」
缺點就係唔準確（low specificity），即係殺錯咗良民，sorry。
「仲係唔明？！咩又靈敏又唔準確？你講咩呀？」
圖片來源：蘋果日報
打個比喻，香港D政客對於政府嘅施政就係好靈敏，咩建議連名稱都未洗聽，反應好多時只有一個，就係「反對／拉布」，即係有殺錯冇放過。咁事實上呢D施政／基建係咪真係唔好要反對呢？好多時都係殺錯咗良民，（政客係唔會say sorry嘅）。
乳房MRI對於乳房嘅變化係好靈敏，某變化係咪乳癌黎㗎呢，報告／反應好多時只有一個，就係「唔正常／要切」，即係有殺錯冇放過。咁事實上呢D變化係咪真係乳癌要切呢？好多時都係殺錯咗良民，sorry。
「乳房MRI好似咁廢咁嘅？咁仲有咩用？」
圖片來源：立場新聞
主要用途就係貪佢咩都反對的特性，如果連政客都支持嘅政府政策，呢個一定係派錢，呢個一定係德政。
主要用途就係貪佢咩都話唔正常的特性，如果連乳房磁力共振都話正常，呢個一定係良性，呢個一定唔係癌症。
［編按：呢度個「一定」係為咗排比句（好似D小學TSA咁）行文通暢，係誇張咗嘅，實際係好大好大機會。呢個世界冇咩野係一定嘅，唔好拿著個正常乳房磁力共振報告，就大安旨意冇事，有D乳癌係磁力共振都捉唔到。所以乳房有咩唔妥，都係問返自己乳腺科醫生。］
乳房磁力共振vs抽組織
「我乳房X光／超聲波話有可疑陰影，醫生叫我抽針，可唔可以照乳房磁力共振去替代抽針／抽組織？」
唔可以，乳房磁力共振並不能替代抽針評估。就算你真係走去照咗MRI，無論報告有野冇野都好，乳房造影有可疑陰影都係會建議抽粗針／抽組織。
5大常見照乳房磁力共振情況
「咁實際有咩情況醫生會建議照乳房磁力共振？」
通常以下情況會考慮照乳房磁力共振：
1）已確診乳癌，打術前化療／標靶治療，用黎跟進住進展。
2）打過野隆胸，乳房X光造影／超聲波花鬼曬根本睇唔到，就要用磁力共振去睇睇。
3）乳癌基因突變（BRCA1/2），高危復發病人，除咗定期要照乳房X光造影／超聲波之外，仲可以照埋磁力共振去監測。
4）我地高度懷疑乳癌（例如癌指數好高／PET scan著燈／甚至腋下淋巴已經證實有癌細胞擴散），但乳房X光造影／超聲波完全正常，咁就用個超級靈敏嘅磁力共振去睇吓係咪真係冇鬼鼠野。
5）乳房X光／超聲波報告模棱兩可時，例如分唔到手術後陰影係疤痕定復發，可以去照磁力共振攞多D資訊去幫助評估。
手術前要照乳房磁力共振？
「我唔係以上任何一類，但醫生建議我做手術前做Breast MRI，咁係咩原因呢？」
有D醫生覺得MRI可以搵到／排除其他隱藏的乳癌源頭，咁做手術時可以選擇一併割埋／做清D，減低翻手機會／命長D。
現階段2016年1月（第時有咩新證據唔敢講／冇得估），我對呢個做法有保留，因為暫時醫學文獻覺得以上論點都係缺乏支持。
舉個例，呢個2014年刊登的研究（An Individual Person Data Meta-Analysis of Preoperative Magnetic Resonance Imaging and Breast Cancer Recurrence），發覺3169個乳癌病人手術前照咗同冇照MRI，原來手術8年後局位復發／遠端復發率根本冇分別。
https://ascopubs.org/doi/pdfdirect/10.1200/JCO.2013.52.7515
另外針對係咪照咗MRI就切得清D／少D翻手，可以參考以下研究（The association of preoperative breast magnetic resonance imaging and multiple breast surgeries among older women with early stage breast cancer.）：
http://www.ncbi.nlm.nih.gov/m/pubmed/23354364/
研究睇咗45453個乳癌病人（呢個係一個超大型研究，概念大概係咁：香港最新一年有三千個乳癌新確診個案，四萬五千人即係等如研究成功邀請曬超過15年黎香港的新乳癌個案去參加研究，有幾代表性你可以有個印象）發覺兩成人（20.8%）要翻手做多過一次手術，但原來有冇照MRI都係咁上下比率。
你而家知道原來手術前照MRI係「唔可以」降低翻手機會／切清D／命長D，所以如果你唔係以上5個類別病友，手術前照乳房磁力共振，可謂多此一舉。
結論
圖片來源：TVB劇集＜皆大歡喜＞
乳房磁力共振唔係皆大歡喜池力共鎮，唔好見人振你又振，做多餘的檢查只會浪費你時間金錢。錢都事小，但如果因為咁搞搞震而阻遲咗乳癌的正式治療，受害嘅只係自己。乎合以上5個類別人士，就先同乳腺科醫生傾傾洗唔洗照MRI。
香港乳癌及乳病治療中心 
‘千萬唔好貪平照冇顯影劑的MRI Breast without contrast，有野都睇唔到嘅。;
對不起, 不關乳房問題, 因我之前有尿急,尿頻, 尿道口痛, 夜尿後上腹痛, 安排了下周照CT SCAN 是不打顯影劑的, 按你上述說法, 是否也是 ‘有野都睇唔到嘅? 謝謝.
補充information : CT SCAN 是照上腹和盆腔, 但叫我不用空腹, 只要多drink水, 急小便時照.
要視乎醫生想睇泌尿系統D乜，先決定要唔要用顯影劑。如果睇結石，唔洗用顯影劑。如果睇軟組織，就要用顯影劑。
我上面咁寫，係因為我知道有公司為咗鬥平，會幫人照MRI Breast without contrast，咁就可以將價格降低至2千蚊。平時MRI Breast with contrast 起碼幾千蚊至過萬的。
我左胸有粒嘢約0.9 cm, 照咗mammograms無事，ultrasound 指粒嘢邊界唔清晰 (category 4a)，建議抽針, 抽完無發現惡性組織，以為已完結
但乳腺科醫生話”唔夠細胞去證實佢係良性纖維瘤，只知唔係惡性” , 就叫我再照MRI, 要證實粒嘢一定唔會變cancer, 但MRI真的可以預測嗎 (會變cancer有樣睇？)我怕MRI 假陽性高, 更擔心!!
他也有叫我做手術，但我半信半疑! “唔夠細胞”去證實佢係良性纖維瘤，但”夠細胞”去證實佢唔係惡性，真係超級矛盾，好亂，好擔憂!!!
請詳細解答，萬分感謝!!!
MRI可以比到D關於屬性的額外資訊，令你傾向信粒野有野定冇野。如果好唔想做手術，安心就咩都唔做，唔安心就做MRI。如果想做手術，就直接做手術，唔需要MRI。
您好!想問如果做假體隆胸，手術前需要做乳房檢查嗎？手術後又應該做什麼檢查呢？謝謝
我見整型科會隆胸前照一照乳房，以免做咗手術先知本身乳房有野要跟進處理（通常隆得胸都係後生，所以都係照超聲波為主。如果40歲以上就照埋X光。）
手術後同一般女士一樣，都係建議定期照乳房。照X光夾胸時記得話比技術員知乳房有假體，佢地就會知點做。
好多謝您咁快嘅回覆呀!! 想再問多一樣^^”其實假體隆胸手術安全嗎？隆完後唔會增加患乳癌嘅機會呢⋯⋯
如果用假體（implant）就安全，只係面對一般手術的麻醉風險，並不會增加患乳癌嘅機會。
請問打過野隆胸係咪指打脂肪入胸到？
如果入左野入去，係咪會增加患乳癌風險？ 同埋打完之後，想keep住check係咪都係做MRI?
唔該曬你。
一般影響照乳房的物料並非脂肪，以前唔同年代曾經興起唔同隆胸物料［silicon, paraffin, polyacrylamide gel（PAAG）］，而家都發覺唔安全已經被淘汰，佢地會令乳房X光／超聲波廢咗。以前打落嗰D病人，就要照MRI去檢查住。
而家興打自己脂肪（fat graft）去隆胸，可以如常照乳房X光／超聲波，不過係會多咗鈣化點，並不需要MRI。
如果有鈣化點應該點做？ 唔該曬
乳房鈣化點 － 係咪好危險？
請問如果進行過矽膠隆乳，那應該去照MRI嗎？
應該。
7月頭確認了左邊乳癌復發，Pet scan report 個瘤係1.72×0.66×1.59 SUV max 2.7，冇擴散，淋巴應該都冇事。
預備做手術前做了磁力共振，磁力共振報告話右邊有粒0.4cm。為左安全起建安排再抽針，但X光照唔到所以依家要再等用磁力共振抽針，仲未知要等幾耐。都知抽左針再做手術會好D，但如果等磁力共振抽針要等好耐係唔係都係安全呢? 謝謝。
等得耐當然唔安全，7月頭搞到而家已經6個星期，比我寧願做咗左邊乳癌手術先慢慢研究右邊，冇理由為咗研究一個唔知有冇野嘅東西，而阻遲一個乳癌治療，着眼點聚焦錯咗。
謝謝你的答覆。想問多少少。
因為想做左邊乳房重建，所以醫生要睇埋右邊個粒，一來穩陣D，二來因為右邊結果會影響左邊整形。依家要一個月先可以做到磁力共振抽針，九月尾先做手術，其實係呢個Case等三個月先做手術係咪都可以接受呢? 定係應該先做左邊全部切除唔做重建。
磁力共振抽針要等一個月，睇怕都係公立醫院醫，唔好忘記抽完針仲要等2個星期報告出，之後見完醫生仲要等手術期，我怕你九月尾都未做到手術。
我唔會接受等咁耐，因為有研究顯示等多過6星期會影響病情，所以醫管局内部亦都以「55日內開始任何型式的治療」為目標，唔達標係要解釋的。
整型醫生怕右邊結果會影響乳房重建選擇，怕嘅只係怕左邊用咗肚皮重建，右邊想用時冇得用，其實仲有其他選擇：
1）右邊第時有需要時用假體重建
2）右邊第時有需要時用背脊重建
3）右邊第時有需要時用背脊加假體重建
4）左邊今次只做全切，等右邊結果明朗化先延遲重建。
就算作最壞打算今次左邊手術真係影響重建效果，健康始終凌駕外觀之上，尤其是今次已經係復發。
如果依家先做左邊加重建，之後做化療。遲啲如果發現右邊都有問題，要做局部或者全乳切除，會唔會要再做多次化療架？？
咁近時間，唔會／無需要再次化療。
近時間既意思係幾耐？
如果做左邊加化療療程完結後一年發現右邊有問題再做手術，咁係咪都唔洗做化療呢？
謝謝你的資料啊對我們的決定很重要！
「近嘅意思」冇一個客觀定義，我會當一年內都叫近。你個情況係唔會化療完成後一年先發現右邊有問題，原因有數得計，假設你化療6針（18個星期），休息3星期後右邊做抽針／手術，半年內其實已經知道／定性右邊有冇事。
如果有事，幾個星期前先完成化療，咪當佢係術前化療，點會要再次化療。
如果而家冇事，第時先有事，都唔可以賴今次有任何遺漏。
你好!
上星期已切除腫瘤及做了重建，但重整的情況有點反覆，現在還未穩定下來，傷口一直發炎。所以短期內應該未出得院，未有得開始做化療，想問下正常應該係切除後幾時開始做化療最好，依家個情況會唔會太遲做化療而有問題?
三個月內。
你好，本人發現乳房有無痛的硬塊，有幾塊，有的細粒，但右胸左邊有一大塊很硬，照左超聲波、抽組織都顯示為發炎，但食藥一直沒有好，後醫建議下做了MRI, 結果顯示有一粒需要實體化驗，做了手術，化了炎非癌亦不是肺癆菌。但經過成年乳房中那一大塊硬塊並沒有消腫，請問我應怎樣辦？
連手術都做埋話冇野只可以信，自己只可耐心等待，如果有惡化／變化就去覆檢。
你好, 我就是你說沒有以上5種而私家醫生建議我去做MRI. 我本身大肚3個幾月時自己發現右邊乳房有粒硬嘢, 政府醫生安排我照ultra sound 同抽針撿驗 (幼針), 醫生話良性 1.5cm, 不用担心, 政府一直有安排覆疹, 沒有異樣, 不需要做手術, 到現在生完BB 1年半, 政府醫生話我既然唔放心, 安排了我4月做手術, 但我唔明既然話良性, 點解又會安排手術 (雖然我表示不安,怕會變惡性, 亦有問是否需要做手術)? 是否抽幼針不是太準確? 我便出去搵私家乳腺專科去了解多D 同攞second opinion, 佢有說過抽針雖然比較準確，但也不是100%, 視孚取樣的準確性，建議我做MRI, 我現在很迷網, 不知道做唔做, 如果唔做, 我跟住可以點, 要搵另外一個醫生攞意見, 定係有其他選擇 ? 請賜教!!
依你描述，政府醫生安排手術的原因係你個人擔心。客觀去睇，「擔心」呢樣野並唔會影響粒野的屬性，良性就良性，惡性就惡性。如果擔心幼針唔準確，下一步攞多D組織就係抽粗針（準確D），要攞哂就係做手術（最準確）。唔想抽針或手術但又想複檢就再照超聲波，我睇唔到有咩理由「臨床冇變化下，唔信幼針，唔肯抽粗針，唔肯手術，又唔信超聲波而走去照MRI」。
我2年半前發現左邊胸有粒野1cm左右 之後驗左係纖維瘤 最近我覺得個纖維瘤好似大左咁但去檢查醫生話摸唔到有野 因為我睇你之前講纖維瘤有機會自己消失 但我依家先25歲 會唔會有機會真係冇左？
機會細，似手摸唔靈敏，想準確都係照超聲波。
Small nodes in the left axillary region ( 0 . 9cm ) are more in favor of reactive node . No suspicious node can be seen in the internal mammary chain .
COMMENTS : 1 ) Small lesions in both breasts ( R3H , R12H and L9H ) show rapid initial rise of the signal intensity of the lesion followed by washout . Overall features raise the suspicion of malignant lesions . Please correlate clinically .
2 ) Multiple small lesions scatter in both breasts show initial rise of the signal intensity of the lesion followed by continues slow increase in signal intensity . Such enhancement pattern favour benign nodule such as fibroadenomata .
3 ) Bilateral breast cysts . The one in R9H region is a complex cyst but without contrast enhancement which is more in favor of a non – aggressive lesion .
這是我在經期前一天去做的MRI報告。
在月初時，發現右邊11點方向有一硬點，約1CM，經醫生手術切除後証實是低等級及低標準原位癌，因此醫生建意做第二次手術將部位再切多一D，再做電療。
但照超聲波時發現在右邊9點方向有另一粒，安排抽了幼針後，是良性的，但醫生怕有其他問題，就安排了MRI，夾胸，及抽粗針。
MRI報告出來後，醫生說有幾粒超聲波看不到的，所以可以用MRI抽針，但費用太貴，就選擇了集中超聲波抽針，現在還沒抽針及夾胸。
有幾個問題想先問問：
1.來經前的MRI準確嗎？
2. MRI報告所說的是什麼意思
3.有需要MRI發現的都做抽針嗎？
1）來唔來經都好，MRI本身就唔準確。
2）右邊3點12點，左邊9點，三度地方有可疑。
3）有需要，如果發現有可疑都唔抽針，一開始就唔應該照MRI。
你好.
我幾年前摸到乳房入面有0的硬粒, 但因為細個唔識以為正常, 到近年知多0的先知有問題, 去婦科檢查安排左照乳房超聲波, 見到都幾多鈣化點, 所以再安排照3D乳房造影, 確定係鈣化點, 但因為數目都幾多同埋摸得到, 而本身自己有SLE, 醫生懷疑鈣化點同SLE有關, 所以寫左轉介信去外科(公立)建議照MRI, 咁其實定係直接抽針會好0的? 會唔會有機會係乳線纖維瘤? 可唔可以直接做微創抽取? 因為本身出年結婚, 亦打算懷孕, 害怕呢0的硬粒影響出奶, 雖然餵奶粉都可以, 但想了解自己咩事先. 謝謝.
簡單黎講唔會用MRI去睇鈣化點，正正經經揾個乳腺科醫生睇睇。
發現左邊乳房有硬塊 照了乳房做形 超聲波檢驗抽了粗幼針 照了pet scan 確診乳癌一期 醫生看過報告沒有擴散跡象 將會做乳房部分切除手術 但因為淋巴位懷疑有擴散需要於手術中抽取再化驗 詢問了另一醫生都是同一建議 不過另一醫生提意手術前做MRI 是否真的需要？
根據你提供的資料就唔需要。
我五月身體檢查：
超聲波沒事，
manogram 發現有1.8cm 不規則異樣
所以再照MRI, 結果照不到異樣，classify 為0
擔心再做粗針活檢， 結果是非典型乳腺增生， 良性
政府醫生建議我做手術切割出來化驗，我問是否可以做微創手術，唔想傷口太大， 醫生話這手術沒微創，但係其他文章看到可以做微創，是否真的？
現在情況這樣，真的要做手術嗎？有沒有其他較好的療方法康復？
微創技術上做到，不過唔建議，因為非典型乳腺增生我地要排除原位癌，微創斬件式抽取會影響病理評估。
同政府建議一致。沒有其他更好方法。
咁做這手術後，要留院嗎？多少天？？傷口要多久才能愈合好？
假若做完手術做化驗之後，係咩情況下，要做第二次手術將部位再切多一D，要唔要再做電療？
留院兩日一夜。表面傷口兩星期愈合。
切唔清或有侵蝕性癌就要再做手術。
如果有癌又成功局部切，要電療。
醫生, 你好！ 先多謝你做左呢個網站, 我在懷疑期間從這裡得到好多資訊, 多左概念, 做檢查同見醫生都唔會太驚嚇。
因為自己摸到有D硬, 就去照。
超聲波報告：BI-RADS 4a
Bilateral Mammogram: Bilateral multiple microclacifications, most numerous at bilateral upper outer quadrant, more on left side. These are probably benign in nature. Suggest follow-up MMG in 6 months’ time for monitoring. (BI-RADS 3)
之後去左私家醫生睇, 佢幫我抽左4針粗針。結果：
– Fibrocystic change
– No atypical ductal hyperplasia, in situ nor invasive malignancy
醫生叫我半年後覆診。
又話我鈣化點比較多, 叫我去照MRI, 會比較全面知道乳房情況。
但睇左你呢到既講法, 我唔屬於以上5類人士, 係咪唔使做呢？ 因為照MRI都要萬幾二萬, 好貴。
麻煩你指教指教。
正確，唔洗做。
謝謝醫生清楚和肯定的回覆。
想問多句，我依家係咪可以安心正常生活，只需半年覆診觀察住有無變化就得? 有什麼其他要注意的嗎？
係，正常生活半年後再照已經足夠。得閒就自己摸下有冇硬塊，有變化就早啲睇醫生。
醫生，你好，我確診了是原位癌，做了MRI，發現係同一邊乳房不同位置有d嘢 ，著燈第三級（BI-Rads4），請問需要全切還是可以局部？還是要做MRI抽針後才決定是否跟原位癌一同處理？謝謝
想局部割就要MRI抽針搞清楚係唔係多源頭癌症先可以考慮。
謝謝醫生，請問你這邊有否得做MRI抽針？謝謝
可以安排醫院或影像中心做。
謝謝醫生回覆。MRI抽針難度是有d高，是很昴貴收費的嗎，要再次打顯影劑嗎？然后先可搵返出事的位置定位再用粗針抽？是否唔建議MRI抽針？等待觀察有鈣化點先X光來抽？ 謝謝
MRI抽針貴嘅，大概兩萬幾到三萬幾，要再打顯影劑，搵到嗰個目標先可以抽。唔搞清楚就要全切。
Hello! 想問下做咗假體隆胸係咪只可以做MRI? 唔該哂！
唔係。有假體係可以做超聲波同X光嘅。
請問照咗3次超聲波都照唔到嘢, 但照MRI(有顯影劑)照到有粒1點幾CM, 但醫生再照超聲波都睇唔到粒嘢, 所以落唔到針抽, 還有什麼應該要做? 謝謝
有懷疑，就MRI抽針。冇懷疑，就6-9個月後再照MRI。
九月中左面乳房做咗抽粗針化驗確診咗乳癌二期，(腫瘤size2.17×1.77×2.55cm)，冇擴散到淋巴位置，位置貼近乳暈下面，醫生話我夠肉地適合做乳房保留手術，但腫瘤位置在乳頭乳暈區下方，手術中乳頭和乳暈可能不保，這樣的話還可以保留到大部份的乳房嗎？需否切除四份一個乳房呢？醫生還建議手術前做Petscan，做左Petscan還需要做MRI breast嗎？
1-2）要臨床評估先知。
3）根據你提供的資料，我睇唔到要照MRI的理由。
醫生，你好！首先十分感謝此網站提供眾多有關乳病方面的資訊。
本人早前做了X光、超聲波、MRI 檢查，其中一邊乳腺超聲波評估BI-RADS 2級，MRI 評估3級，當中有2 粒鈣化點，醫生建議6個月內再覆查追蹤，或抽取鈣化點做病理分析，由於鈣化點太細難以抽針，需要做微創，屆時會清理所有鈣化點。
請問這種情況是否需要做全麻的微創手術去確定良性還是惡性？
謝謝！
不需要，微創真空抽吸鈣化點絕大部份情況下都係局部麻醉做。
醫生，你好！我今年45歲，十年前做咗隆胸手術，估計係 silicon, 十年來未照過胸，請問我是否要做 MRI 來檢查假體有冇問題？如要做，是否做 contrast 會好啲，可以 check 埋乳房有冇腫瘤，謝謝。
檢查假體有冇問題，超聲波已經足夠。
如果做MRI，有contrast係好啲，順便檢查埋乳房有冇腫瘤。
醫生，你好。我今年37歲，現在身處海外。上星期夾胸及超聲波發現左胸有22mm 區域性鈣化點。低聲音波病變。今日做左MRI,星期五將會做抽針。
若本人打算回港就醫，今星期做完MRI及抽針後。短時間回港再做MRI造影及抽針，會否對健康做成傷害嗎？
做咗就等報告先回港，返到香港未必使重複。
家人已確診乳癌約1cm, 預備明天做手術，但MRI照到同一邊其他位置多一粒，上次超聲波照唔到。
現在醫生先安排再照超聲波去追踪這粒再抽針，找不到才安排去其他醫院做MRI抽針。再用超聲波追踪合理嗎？我擔心誤差，抽組織個粒不是MRI照個粒。定醫生有能力判斷就是MRI照個粒？
最直接了當係應該做MRI抽針，再照超聲波去睇吓照唔照到只係一個折衷方法，有經驗嘅醫生會判斷到，當然都唔係百分百。
摸到乳頭下面有粒硬嘅嘢，照咗超聲波同X光，發現粒嘢有鈣化點，大概0.75cm, 跟住做咗抽針，話係invasive carcinoma, 再做埋MRI, 出嚟嘅結果係有問題嘅部分有6cm深，5cm闊，未見有擴散，醫生建議全乳切除！請問醫生決定是否正確？
如果真係如MRI評估咁大，全乳切除就正確。
只不過係MRI有時都會假陽性，咁就有可能做多咗。
如果3D照到有陰影，但超聲波又見唔到。
醫生話抽針範圍又大，需照MRI。
另外一位醫生睇片報告又話見唔到特別野，模上去又冇特別異常，但都要等文字報告。
請問需要甚様做？謝謝提供寳貴意見
等埋文字報告先決定。
馬醫生
照3D 顯示 有位置有懷疑陰影Bi raids 4A-3 .
但超聲波 未有見到那位置有問題.
之後醫生話方便抽針，要照MRI
MRI結果顯示那位置沒問題。
請問，我仍否需要抽針？
聽落去有大問題嘅機會就唔高，唯一要小心嘅就係一啲生得好慢嘅病變，例如低度乳腺管原位癌（low grade DCIS)，MRI可以假陰性。所以如果要求萬無一失嘅做法，就係夾胸去抽組織。如果唔想抽針，就定期照住乳房都應該可以。
多謝馬醫生回覆
我當然擔心、請問如果這情況，回去覆診再照，是否需要每次所有檢查做齊？最安全隔幾耐？這種生得慢的原位癌，是比較無殺傷力？還是會一様危險？
邊樣檢查有問題，就做返嗰樣檢查就得。
如果選擇唔抽針，就隔半年後再照。
低度原位癌係低殺傷力，唔係冇殺傷力，你唔理佢一樣可以惡化。
馬醫生:
兩星期之前, 左邊乳頭壓後有深啡色液體流出 (單邊單乳), 照完MRI/ultrasound話乳管有反應 (cluster of small T1 Hyperintense foci in a regional distribution in seen), 睇咗2個醫生, 第1個話叫我做乳管切除手術, 取出有事乳管來驗, 第2個生叫我先做MRI抽針, 再先決定做咩手術, 請問我應該點好? 謝謝回覆
兩個選擇都可以。
你好 馬醫生,
我多年前曾矽膠隆胸.
本來術後初期，摸下去好像是假體飽滿，手指有回彈的感覺。
現在近乳溝和近底部的邊緣位 摸下去會有一點感覺像是矽袋有部份不似原本的飽滿，有些像漏氣的籃球..
其實我也不知道摸到的是假體還是皮膚還是什麼….
想了解該選那一項乳房檢查呢? 另外, 如果該選乳房MRI檢查的話, 是不是一定要打顯影劑? 我臉部顴骨位置有鈦金屬, 可以嗎?
謝謝!!
超聲波或者磁力共振都可以。
磁力共振睇假體嘅話，唔使打顯影劑。如果睇乳房嘅話，就要打顯影劑。
臉部的鈦金屬做唔做得磁力共振要問返植入嘅醫生先知。