乳癌分期 ﹣ 我係早期定末期?
「醫生,我乳癌咩期數?早期?末期?有冇得醫?」
要打贏呢場硬仗,我地要有一個好好嘅作戰計畫。知己知彼,第一個好重要嘅問題就係「乳癌分期」。
就好似消防員(醫生)救火(醫癌症)咁,第一個問題就係火種源頭(癌症源頭)係邊度?有邊啲通道/樓層(邊啲淋巴/器官)受影響?呢家工業大廈喺幾多級大火(乳癌咩期數)?我地要派幾多人/帶幾多架撐(用咩治療:手術/化療/電療/標靶)入去?淋息啲火先處理火種(術前化療)?定係先處理火種後救火(術後化療)?
TNM 三大元素
要段定乳癌咩期數,要知道三個元素TNM:
1)腫瘤幾大(T – Tumor)
2)淋巴有冇受影響(N – lymph Node)
3)有冇擴散去其他器官,例如肺/肝/骨/腦(M – Metastasis)
圖片來源:American Society of Clinical Oncology
照乜野掃描?
「我點先可以知道我嘅三個元素呢?」
頭兩項(腫瘤同淋巴)可以靠臨床檢查同超聲波睇到,呢度冇咩爭議同分歧。
反而係點評估擴散,就各處鄉村各處例,主要分野都係負擔能力:
1)傳統做法:X光睇肺,超聲波睇肝。基本上呢個做法已經過時(等如625線彩色電視),咁低清,有野都照唔到出黎啦。
2)常見做法:電腦掃描(CT scan)睇肺/肝,骨掃描(Bone scan)睇骨。呢個就等如標清電視,大部分公立醫院都提供到,不過要排要等,好消息係而家香港政府有一個公私營資助計畫(private-public interface),會全費資助你去指定私家度照電腦掃描,唔洗錢仲要好快(約一星期)有得照。如果你負擔唔到照最高級嘅正電子電腦掃描,記得問公立醫生關於呢個計畫。
3)自選做法:正電子電腦掃描(PET-CT scan)睇晒頭顱底至大脾。呢個等同高清電視,公立醫院冇得排嘅,要自己比$8000(公立醫院轉介折扣價)-$16000(正價),就等如要自己比錢買機頂盒解碼器一樣。
2016年3月更新:最近發現原來醫管局有公開各間正電子掃描中心的公立醫院折扣價,你可以按以下連結去睇下正電子掃描收費表,裡面除左有唔同中心的正電子掃描價錢,仲有埋地址電話,咁你就易D比較去邊到做好:
亦都有醫生會選擇三樣都唔做,背後理據主要建基於「臨床早期走散機會唔高」。
乳癌分期 AJCC
有齊呢三個資料,就可以根據American Joint Committee on Cancer (AJCC) 7th edition (2010) TNM staging 去評估第幾期。
圖片來源:American Joint Committee On Cancer
有興趣嘅,可以㩒入去仔細睇下成個staging嘅細項:
https://www.breasthk.com/pamphlet/breast-cancer-staging_AJCC_7th.pdf
有iPhone 又唔介意比$83嘅(暫時免費嘅我搵唔到一個好用),可以下載以下apps
申延閱讀:
冇興趣/覺得好難明嘅,直接問自己醫生。
「知道第幾期(幾多級大火)又有咩用?」
知道第幾期(幾多級大火),消防員(醫生)就估算得到死唔死得人多(存活率),同埋知道點救火(點醫)。
唔同期數點醫?
總共有五個級別(癌症分五期),大方向如下:
1)零期:即原位癌(工廠寫字樓剛剛起火),冇機會擴散去其他器官(樓層),成功醫好嘅機會最大,主要都係手術(處理火種)加減電療/食藥。
2)一期(一級火):早期侵蝕性癌(起火嘅工廠裏面有易燃物品),有機會抗散去其他器官(樓層),雖然機會唔大。要醫得好,就要喺佢未擴散(爆炸及蔓延去其他樓層之前)前處理好。主力都係手術(處理火種)加減化療/標靶治療/電療/食藥。
3)二期(二級火):都仲算喺早期侵蝕性癌(不過啲易燃物品已經發生小型爆炸),有機會抗散去其他器官(樓層),機會大過一期。如果可以喺佢未蔓延之前處理好,都有得醫,主要都仲係先手術(處理爆炸品),再加化療/標靶治療(救埋啲小火),加減電療/食藥。
4)三期(三級大火):屬於後期,啲癌細胞(大火)已經擴散去淋巴(通道/電梯/樓梯),好大機會會擴散開去,先化療(救咗啲通道大火先),再做手術(處理爆炸品及火種),術後電療,加減食藥。
5)四期(四級大火):屬於末期,啲癌細胞(大火)已經由淋巴(通道/電梯/樓梯)擴散致其他器官(成座大廈著哂火),主要都係化療/標靶治療。坐喺電視機前睇新聞報導都心知不妙,大家要有心理準備,消防員盡力拖,拖得一時得一時,希望奇蹟發生。
記住大火級數(癌症期數)係可以隨時間/治療而變嘅,可以唔受控升級要增援,又可以火勢受控降級(術前化療)。
以上比喻包含好多資訊,可能難明少少,唔明嘅請你返睇、遲啲再睇、一睇再睇。
總結
1)記住問醫生會決定你乳癌期數嘅大三元素:腫瘤、淋巴、同埋擴散。
2)記住香港政府有資助計畫可以免費去私家照電腦掃描。
下一篇,我會講一個極其敏感、好多人問、好多人想自己知、好多人唔想家人知、而醫生又唔肯講嘅題目:「香港乳癌存活率:我仲有幾耐命?」
警告:喺你撞入去之前真係要諗清諗楚,你心理上承唔承受到?如果唔得,就跳咗下一篇。
有哂心理準備嘅,我就帶你入去呢個神秘領域啦⋯⋯
我擴散左4粒淋巴,但唔知點解報告寫我係二期B,唔係三期?
你啱,如果真係4粒淋巴受影響,起碼第3期A喇,最有可能係寫錯2B(偶有發生)。你可以叫醫生跟進吓,改返個報告。
好唔開心呀…我的外科醫生同腫瘤科醫生都話我係早期,而家咁計變左後期。割左淋巴之後,而家做緊化療,仲有一針咋,咁化療次數係咪都會唔同?
當然好唔開心,一路以為係早期,而家變咗後期。
最有可能係病理科醫生寫錯,之後外科醫生/腫瘤科醫生只睇結論/冇仔細睇內文,一個信錯一個。不過都冇辦法,大家都係人,我會錯,你會錯,人人都會錯。只好向前看,問清楚佢地有冇影響之後治療。
一般黎講,淋巴有擴散,醫生已經會建議打第三代化療(6至8針,例如FECx3 + TTx3,DD ACx4 + Px4),所以如果你已經打緊第三代化療,搞錯第2期B定第3期A應該冇影響打幾多針嘅。
另一方面,反而有可能影響電療決定,因為有D醫生會唔電N1(3粒淋巴或以下擴散),只電N2(4-9粒淋巴擴散),所以覆診時記得同醫生傾傾之後治療方向有冇變。
最後推介一本我自己好鍾意嘅書:原諒別人,放過自己。
我之前照完pet mri
醫生話我無事
但係我返到屋企睇報告有句result我好擔心自己係咪就黎會患癌
佢寫 mild 18 FDG avid right jugulodigastric node and shotty bilateral groin nodes are seen and appear reactive in origin
因為我見圖顯示係有著燈 我好驚
謝謝你????????
似發炎,唔似有野。
Thank you so much 擔心了很久??
多謝 Breast HK解答和開解!
想再問:電N1 同 電N2 係唔係2個plan 黎架?有咩分別?
同一個plan,分別在於電同唔電。因為N2有好多證據顯示電療有著數,所以國際慣例建議電,冇咩爭議。而N1呢,正反雙方D證據唔一致/有爭議,所以有醫生電,有醫生唔電。
Breast HK,你好,
ct scan和正電子的幅射是否很強,但比較下始終都好過不照嗎?因為聽過會引發其他癌細胞。
手術前我只照過肺x光,上述沒照過,手術切除腫瘤後為1期,已見政府醫生,安排下月做化療,我應該要求醫生照後才開始化療嗎?因為我擔憂有其他的腫瘤現在未發現,而我化療之後身體虛弱了,不知身體能否承受再次手術。謝謝。
CT Scan 同正電子掃描係有幅射,高唔高就相對概念,如果要段定第幾期,絕對值得照。臨床上,好多病人都一年照一次/甚至幾次,我未見過因此而引致癌症,所以放心去照啦。
如果要做埋化療,當然照吓掃描好D。至於幾時照,我就建議化療前照好D,主要原因係最準確反映現況,如果化緊嘅時候做,就算有轉移/擴散,癌細胞都可能被抑制咗而睇漏。
你叫政府醫生幫你約,無論自費正電子掃描/定公私營計劃電腦掃描,都好快有得照(1星期內),應該會快過化療個期/唔延遲化療期好多。
Breast HK真係好熱心好好人咁快回覆,唔該你呀Breast HK
Breast HK,
啱啱重温你以上篇章,發現幫我做手術的醫生只幫我手術前做了過時的X光及照肝等。手術後我有問過醫生有冇需要做什麼scan,但她就是說沒有需要。手術後報告是1.4mm tumor size有0.2 invasive focus,咁其實我係咪都要揾番做手術醫生做scan,定係同腫瘤科醫生講。但我剛見完政府腫瘤科醫生冇提及scan嘅事。
擔心中……
搞清楚D資料先:你意思係1.4cm tumor,裡面有0.2cm invasive focus嗎?
Oooops!
係1.4cm tumor size, 0.2cm invasive focus.
冇擴散淋巴
即係T1aN0M0,初步黎睇係stage1a。老實講,擴散嘅機會好細,再加上都照咗初步超聲波肝(冇事),手術醫生/腫瘤科醫生冇叫你照scan都好合理。
雖然心嗰句,如果你個情況發生喺我自己身上,我都仲係會去照scan。原因係「擴散嘅機會好細」並唔係我想聽到嘅答案,我想醫生話我聽「恭喜你,你冇擴散」,簡單D講即係「唔照唔安樂」。再者,我地大部份人都係貪心嘅,有免費野點解唔照吓,又唔係多幅射,咪當身體檢查囉,人地自費/保險檢查都係做D咁嘅野咋嘛。
如果想照scan嘅話就同政府腫瘤科醫生講,因為PET scan政府腫瘤科轉介有折,如果CT scan公私營計劃仲免費去私家照添,咁就最慳錢。
我下次只會見腫瘤科設計部,之後就做電療。我唔知幾時先會返去見腫瘤科醫生。但估計中途/電完點都會見一次,如果電完先scan有冇分別?
電完先scan冇問題/冇大分別,因為電療係控制胸口(相對化療控制全身),而掃描喺睇遠端器官(肺/肝/骨),兩個唔同範疇,冇衝突。
明白了,感謝你咁忙都會抽空即時回覆!
唔洗客氣。呢度開放得比你地留言,我就有責任回覆。
香港人比較內斂,通常都係齋睇唔出聲。鼓起勇氣公開問得,都係危急關頭/心急如焚/彷徨無助,將心比己,如果我自己出事,我都想有人即刻幫我,所以如果情況許可,我係會即日回覆你地嘅問題嘅。
太太今天見乳腺科私家醫生,原本是因左胸(五點鐘位置)有密集鈣化點要抽組織,先照超聲波,發現在左胸(六點鐘位置)有兩個0.6cm黑影,即抽組織去化驗!兩曰後才有結果!醫生估計是第一期,要做手術連同鈣化點一起切除!請問醫生黑影與鈣化點位置相近,是有有關連呢?因應診醫生發現黑影後好像已不在理會鈣化點了,是否黑影更嚴重要先處理,太太很擔心,因無心理準備有黑影,現階段應如何跟進醫理,是否要盡快動手術呢?
黑影同鈣化點好有可能有關連。因為照乳房X光係企係度夾住黎照(即係壓扁咗個乳房),而超聲波係訓係度冇夾黎照,所以位置係有些微分別係可以發生/理解嘅,有經驗嘅醫生會話到比你聽,究竟兩樣野喺咪同一個病變(因為有時超聲波細心D睇,都可能見到黑影裡面有鈣化點)。
如果醫生覺得係同一樣野/照聲波黑影樣衰過鈣化點,就會抽咗黑影組織先,因為唔洗X光夾住黎抽,太太會舒服D。
因為兩樣野位置近/甚至同一樣野,如果抽粗針確定係乳癌,就會做手術一併將黑影同鈣化點切除。
你同太太唔好太擔心,跟進就係要跟進,情況並冇因為超聲波發現黑影而嚴重咗。而家要做嘅就係等報告,如果真係侵蝕性乳癌,就做正電子掃描去確定第幾期。如果係第一期,就係做手術先,其他輔助治療就術後再睇報告先決定。
多謝Breast HK超快的解答!
想再問下黑影是否正是惡性癌細胞腫瘤呢?
可以係,亦都可以唔係,所以點都要等埋抽針報告先知。不過你醫生咁肯定同你講埋「估計是第一期」,我估黑影都係樣衰(惡性腫瘤)居多。
黑影的報告是良性,醫生建議不做鈣化點抽組織程序,安排兩星期後入院做手術切除黑影和鈣化點!是否正確?
手術後鈣化點標本若是良性,是否表示無事?如果是惡性,是原生癌嗎?正如Breast HK說手術後三至四4期做電療(轉介到政府排期)
程序可正確?
究竟直接做手術啱唔啱,好難答你,因為我冇睇過你D片。要視乎黑影同鈣化點有幾樣衰,即係BIRADS幾?如果係BIRADS4或以上,直接做手術係「其中」一個選擇,並唔係「唯一」一個選擇,你可以揀抽埋鈣化點粗針,先一次過開刀。究竟邊個好?真係個人選擇,同埋醫生有幾多信心黑影同鈣化點同一樣野。
覺得同一樣野,就正接開刀,因為黑影粗針都抽過冇野咯。
覺得唔同野,就抽鈣化點粗針先,因為黑影冇野唔代表鈣化點冇野。
如果BIRADS3或以下,即係乳房造影唔樣衰,咁我會揀抽鈣化點粗針先,唔會直接開刀。
至於做完手術病理報告有萬千可能性,而家唔想擾亂你,到適當時候再教你。
你而家要知3樣野先幫到自己做決定:
1)乳房造影報告BIRADS 幾?
2)醫生覺得黑影同鈣化點究竟係咪同一樣野?
3)自己想直接開刀定抽鈣化點組織先?
BIRADS 4A 幼針抽黑影組織!
即係超聲波黑影就BIRADS4a,咁乳房X光鈣化點係BIRADS咩?
誤會了,政府醫院乳房造影的鈣化點是BIRADS 4A
私家醫生超聲波照到的黑影,用幼針抽组織,結果是良性!
方案一:
先抽鈣化點粗針,睇吓係咪癌。如果係癌,要做根治性嘅手術。如果唔係癌,就有三個選擇:半年後再照觀察住D鈣化點/做微創刨清佢/做手術割清佢。
好處:做完抽粗針後,會多咗選擇比你揀,可以唔做手術(啱D好怕手術嘅病友),可以做微創(啱D鍾意傷口細嘅病友)。而就算做手術,都希望一次搞掂(唔洗好似方案二咁,有可能要做兩次手術)。
方案二:
直接做手術,睇吓係咪癌。如果係癌,好有可能要做第二次根治手術。如果唔係癌,就搞掂晒,可以收隊。
好處:慳咗抽粗針呢個步驟,如果係良性,就一站式一次搞掂晒。不過如果係惡性,就做咗2次全身麻醉手術。
究竟之後點揀,好睇個人取向。
至於超聲波黑影,因為唔係正規放射科醫生照,又冇BIRADS分級,抽幼針又話係良性,我會揀如果鈣化點要做手術先一併處理。如果鈣化點唔洗做手術,就去搵放射科醫生照返個正規乳房超聲波。
不明白Breast HK所講的二次全身麻醉手術的意思,若鈣化點抽粗針是良性,但黑影如何處理呢?應診醫生是把黑影和鈣化點一齊清除,因位置相近,可用微創嗎?如切除是整個或部份呢?手術後鈣化點化驗若是惡性,是否就是第零期原生癌,只需電療便可以?再一次麻煩Breast HK解答!
你如果揀方案二,直接做手術(第一次全身麻醉手術),如果返黎有侵蝕性,要再做腋下淋巴手術(第二次全身麻醉手術)。就算係原位癌唔洗做淋巴手術,但如果第一次切唔清,都係要再做手術切清佢(第二次全身麻醉手術)。
如果鈣化點係良性,黑影就去搵放射科醫生,照返個正規超聲波,先再決定。因為黑影可唔可疑都未知(都冇BIRADS分級),乳腺科醫生自己照嘅超聲波只可以作為輔助性質/參考,並不能取代放射科醫生的正規報告。再者,你個醫生都抽咗黑影幼針話良性,如果正規超聲波都話黑影係良性,著實冇必要切除黑影。
黑影能唔能夠同鈣化點一併用微創清除,要視乎係咪同一撻野。如果係同一撻,可以。如果唔係同一撻,唔可以(因為做微創時係要超聲波「或者」X光一路照一路做,超聲波睇唔清鈣化點,X光睇唔到黑影,如果唔係同一撻,係唔能夠有信心準確地清除兩樣野)。
至於切幾多,我未見過病人,冇睇過片,係唔合適比意見。
惡性腫瘤即係癌,癌可以係原位癌,又可以係侵蝕性癌,詳細有咩分別,請參考「乳房原位癌 - 究竟係唔係乳癌?」。
至於之後要做咩治療,而家言之尚早,都未肯定有事,確診後再教你。
Breast HK,我照完先知,有分正電子顯影電腦掃描,正電子平面電腦掃描,其實有咩分別。
我照咗正電子平面電腦掃描而且原來只由眉骨照到腳大臂
PET-CT scan 係有兩款嘅,分別在於電腦掃描嗰部分有冇落顯影劑,即係PET-plain CT(冇CT顯影劑),或者PET-CT with contrast(有CT顯影劑)。
有CT顯影劑嗰D係比可以切除轉移嘅癌症用嘅(例如大腸癌),等我地可以睇清楚D位,準確D切除轉移。
乳癌黎講,轉移一般冇得切,所以位置唔洗睇得咁準確,只係要知有定冇(著燈)轉移就夠,因此我地平時都係安排PET-Plain CT嘅。
範圍由眉骨照到大臂亦都啱(呢個已經係我地所講嘅全身),因為腦細胞活躍,有冇轉移都會著燈,所以除非有懷疑腦轉移,如果唔係一般唔會照腦。大臂以下就因為血液循環係由下而流向上,所以一般癌症係唔會轉移至小腿嘅,結論又係唔洗照。
所以放心,你冇照錯。
再次多謝Breast HK詳細解答
好難過知道Breast HK要關閉這個平台!希望多些像你站在病人的角度的醫生!
太太剛做完鈣化点與黑影切除手術,有做急凍切片,化驗是良性,同一組東西,傷口約4cm,不用拆線,黑影是乳腺管增生,按此狀况是否可收隊,按時檢查便可以?
祝Breast HK工作順意,此平台可很快再見!!!
補充:
鈣化点是BIRADS 4A,
黑影是 (C1) Scanty benign cells
啱,可以收隊,定期檢查就得。
醫生你好.
我媽咪5月27號做乳房照影照到有粒腫瘤同抽幼針, 發現有腫瘤1.5*1.58*2.62CM (W*AP*L)同腋下有粒淋巴核. 4號去政府醫院, 醫生話要抽粗針再判斷, 另外腋下淋巴核亦都抽左幼針去化驗. 今日醫院打來話淋巴核驗到有壞的細胞, 建議我地去做PET CT SCAN. 醫生建議SCAN可以去香港體檢中心做, 因為報告寫的詳盡的,但係12號先有期, 我地自己都有打去其他醫院問, 有D 9號都有的做, 但醫生話果幾間麻麻, 除左養和, 但養和最快要11號.
我想請問
1. 腋下淋巴核有壞的細胞係唔係即係代表癌細胞已經擴散?
2. 早一日做PET CT SCAN可以對之後的治療有幫助嗎? (原本政府約左12號覆診睇粗針報告, 但係因為要去體檢中心照, 就改左19號至見醫生.
3. 癌細胞擴散係一下子定係慢慢.
問題比較多, 希望醫生唔好介意
1)「腋下淋巴核有壞的細胞」代表癌細胞已經擴散至淋巴,即係比較惡,但手術都仲處理到。「腋下淋巴核有壞的細胞」不代表癌細胞已經擴散至其他器官,呢個要照掃描先知有定冇。
2)一講到癌症,所有野都係越快越好,不過一日呢,差別就當然唔大。
3)快同慢係一個相對概念,未有定義之前係好難討論,你嘅快可以係我嘅慢,或者你嘅慢可以係我嘅快。一般常人理解,擴散係需要時間嘅,唔係「呢秒鐘冇,一下子下秒鐘就出事」。
好多謝醫生你的回覆
醫生,我媽咪於2012因為bilateral nipple discharge with elevated prolactin在私家左MMG,findings係bilateral benign scattered breast calcification, suggest MMG in one year.
終於早2日喺公立醫院再照MMG + USG,opinions話:
Bilateral lactiferous ducts are prominent in diameter. The maximum diameter of ducts at retroareolar region is 3.0mm bilaterally.
At L6H retroareolar region, a prominent duct shows an intraductal isoechoic nodule (size 4.2mmx2.2mmx3.9mm). The duct is also filled with echo. Suggest USG guided FNAC.
At R6-7H periareolar, another prominent duct also shows an intraductal isoechoic nodule (size 4.0mmx2.8mmx5.2mm).Suggest USG guided FNAC.
其實後來已經發現媽媽最初的symptoms nipple discharge with elevated prolactin係cased by pituitary prolactinoma, 未必同乳房病變有關。
現在我的問題是:
(i) intraductal isoechoic nodules是否代表乳房有腫瘤?如果抽幼針之後有問題是否要再抽粗針斷症?如果是我們可否一早決定抽粗針?
(ii) 公立醫院排期見醫生聽報告要等到明年4月,根據以上findings你認為是否urgent,值得比錢出私家抽針嗎?
(iii) 另外,呢類nodule抽針結果通常有什麼可能性呢?
sorry, 因為我同媽媽都好擔心,所以好多問題,麻煩breast hk為我們解答。
(i) 不代表乳房一定有腫瘤。如果抽幼針之後有問題,係要再抽組織斷症,不過就未必係粗針,因為粒野4至5mm太細喇,你郁一郁/透一透氣已經移咗位,粗針都未必能夠對準。因此如果有需要嘅話,醫生有可能會建議你直接做手術割咗去。
(ii) 我唔係一個適當嘅位置去評論係咪Urgent,我只可以話,如果經濟許可,當然早D檢查早D知,就有事冇事都係好D。有事可以早D醫,冇事可以早D放下心頭大石。
(iii) 可以好多可能性(由冇野,到要跟進,到有事都得),但結論都係離不開定期檢查/抽組織,之後再見步行步。
謝謝你,咁我諗都係先抽針化驗再決定好d,那麼呢個case抽幼/粗針分別都不大?因為結果有問題都係要再抽組織驗,是嗎?
如果做手術切除,應該只係切除嗰粒nodule?
麻煩你的解答,Thanks!
因為粒野太細,粗針同幼針一樣咁大機會抽唔中,所以分別不大。結果有問題就做手術,一併確診同清除粒野。
手術就放鐵線定位之後切嗰粒野(Hookwire guided excision)。
你好breasthk, 我媽媽已經做左全乳切乳,腋下淋巴取走了15粒,淋巴沒有癌細胞,(媽媽當時最終都選擇了她認為安心做法全組淋巴切除)
見了腫瘤科醫生,醫生話腫瘤1.9cm大,不適合標靶藥,要食荷爾蒙藥,要選擇AC或TC x4針..就五月中開始化療, 因為自從媽媽確定係癌症後都沒有做過任何CT/ PET scan, 而我有問醫生需唔需要做pet scan,佢係話臨床睇啲癌細胞無走去其他地方唔需要做PET scan,係唔係真係無問題…需唔需要自行去私家照?同埋係應該趁未落藥前照定完左療情先去照一次?
謝謝你
T1cN0擴散嘅機會唔大,做唔做PET scan好視乎個人喜好。我個人傾向做嘅,因為唯一風險就係浪費金錢。如果錢唔係問題,做PET scan百利而無一害。如果係照,就完咗療程先照,因為而家啱啱做完手術冇耐,手術地方冇野都可能著燈。
您好,想了解有關PET SCAN應該幾時做的問題的。媽媽超聲波報告BI-RADS 4-5 / 在做過局部切除的左邊乳房再發現一個1.16cm irregular speculated hypoechoic solid nodule , probably shotty or reactive lymph node
約了明天抽粗針檢查,大約下星期一有報告,一方面我會帶媽媽約了一位乳腺專科醫生帶所有報告去了解,另一方面媽媽在公立醫院是舊症,會繼續遞報告排隊,就想知道PET SCAN 應該是在抽針報告後及手術前做嗎?謝謝
啱,抽針報告確定真係復發後就做PET scan。
謝謝您,會和媽媽積極努力面對,也謝謝您的分享,感謝主。
您好,想請問PET Scan 向手術前做對進行手術的決定有沒有影响?還是之後嘅化療/電療有影響?謝謝。
兩樣都有影響。例如PET scan 搵到原來有擴散(第四期),咁唔應該做手術先,而應該做化療先。另一情況,如果PET scan搵到有腋下淋巴擴散,就唔應該做前哨淋巴,而應該做全淋巴清除。
謝謝。因為看過兩位乳房外科醫生都沒建議要做PET scan, 約了星期二做局部切除+前哨淋巴手術,那麼星期一做PET scan還有用嗎?謝謝。
我只可以話PET scan唔係必需,係一個額外檢查,如果決定做,就手術前做好過手術後做。可能你的醫生覺得冇需要,所以冇建議做。
星期二做手術,星期一先做PET scan應該出唔切報告。
維園哥哥:
你好!現年51歲。
History:
Oct 2010 右邊乳房確診3C期,18/25淋巴擴散,已做全切& 化、電、食AI
Nov 2015 照PET scan, 左邊乳房 & 一粒淋巴著燈,SUV 分別為 2.4 & 2.3
政府腫瘤科隨即轉介到乳腺科照超聲波和乳房X光,粒嘢2mm,在x光機夾住乳房抽了粗針,明天覆診睇報告,至於那粒淋巴則未收到進一步指示點檢查處理。
想問:
如是良性,為免日後要擔驚受怕,我都傾向切咗佢,決定得對嗎?
如是惡性,手術就是必然的步驟。
政府醫院有前哨淋巴測試嗎?
還有什麼選擇可以做以滅絕一切復發的機會?
謝謝!
如果真係2mm,我心裡有一D疑問:
1)一般黎講,一粒咁細嘅野,就算係癌,以PET scan嘅解象能力,應該唔會著燈的。所以要搞清楚係咪醫生搞錯咗cm定mm。如果佢話真係mm,就要問清楚究竟佢有幾肯定呢粒2mm嘅野就係PET scan著燈粒野,唔好搞完一大輪先發覺認錯目標。
2)如果唔肯定就係同一粒野/抽出黎結果係良性,我會建議做MRI Breast去排除鬼鼠的乳癌。
3)淋巴方面,應該照乳房超聲波時睇埋,如果發現任何可疑淋巴,就抽幼針去確定有野定冇野。
4)手術方面,跟據PET scan結果會建議割出黎穩陣D,不過預見有一定困難。因為乳房粒野咁細,抽兩野粗針已經冇咗,仲揾唔揾得返都成疑問。粒淋巴呢,醫生冇指示,可能代表照超聲波都見唔到,敵人都唔知係邊又點做手術呢。因此,有可能搞完一大輪野,醫生都只係叫你幾個月後再照PET scan去覆檢。
5)政府有前哨淋巴測試。
6)「滅絕一切復發的機會」呢個驚世發現只會發生係騙案之中,我地都係做返現實的香港人吧啦。
謝謝宅心仁厚的維園哥哥火箭速度的回覆,好希望明天覆診的結果如你所料。
順祝 新年快樂!
維園哥哥:
今天報告出了,醫生話粒鬼鼠嘢3mm, 係0期原位癌,所有的不確定因素都明朗化,沒搞錯cm/mm, 亦沒有搞錯抽針對象。
咁細粒都照到,能否解讀為養x部機特別超卓,貴d都值得?
養和部機就唔係特別超卓,不過名牌醫院的服務/配套的確係有過人之處,喺呢一方面,我同其他被人話港女的女士一樣,都係鍾意名牌的。
維園哥哥:
3mm 事件解決了,3陰0期原位癌,但點解報告寫係2.5cm?
此外,今日抽中針(醫生係咁講嘅,唔係粗針唔係幼針係兩者之間)處理PET 另一個淋巴著燈位,兩粒嘢都係1cm, 如果係癌,會是初期嗎?上網找資料鮮有提及要做手術,對嗎?若我想找私家醫生跟進,應該是屬於那一科呢?
這兩粒嘢理論上是否和乳癌沒關係的?
謝謝!
唔出奇,好多時顯微鏡底下睇的原位癌都大過乳房造影的陰影。另外,原位癌冇話三唔三陰,因為HER2係唔緊要。
如果淋巴有明顯擴散,起碼都第二期。
做唔做手術要視乎PET scan有幾可疑。可疑,做。唔可疑,唔做。
私家係去揾外科乳腺科醫生去跟。
理論上同原位癌冇關係,怕嘅只係怕佢地係隱藏嘅侵蝕性乳癌擴散開去。奇就奇怪在點解上次未搞清楚呢2粒淋巴係咩,就咁急咁做咗乳房原位癌手術?一般都係搞清楚曬,先一次過手術。
謝謝回覆!
但我有一連串的疑問……
(My medical history:
右乳 2010 stage 3C 已全切
左乳 0期 剛全切)
“如果淋巴有明顯擴散,起碼都是第二期” 請問:
從那裡擴散?右邊已全切,左邊0期。
“怕佢哋係隱藏侵蝕性乳癌擴散開去”:右邊全切都會隱藏侵蝕乳癌嗎?
有冇可能淋巴那2粒嘢係淋巴腫瘤而完全唔關乳房事?
我也是依然政府醫生的指示做手術(不過最終是找了私家做),12/1完成手術,今天才排到期淋巴抽針。
右邊全切了,只代表現在沒有乳房、沒有癌細胞,不代表未做手術前乳房沒有侵蝕性癌細胞。
你可能會問「咪切曬囉,病理報告咪話原位癌冇侵蝕性囉~」
當你了解完「做完手術個乳房標本」會點處理就會明。當病理科醫生收到標本,佢地會集中精力睇目標位置(即你乳房造影陰影嗰部分),其他部分只會隨機每個象限(quadrant)切一至兩刀黎睇。因此,好多乳腺組織其實係冇睇過,而呢D組織正正可以隱藏了侵蝕性癌細胞。如果病理科醫生一早知道淋巴有癌細胞,佢先會懷疑乳房有侵蝕性,呢個時候佢先會切多幾下再反覆仔細睇。
所以正確次序為:1)先搞清楚淋巴有冇事,2)才做全乳切除加減前哨淋巴/全淋巴切除。
而家未檢查淋巴就做咗全乳切除,唔可以話錯,只可以話唔理想。
你嗰兩粒淋巴可以冇乳癌,可以有乳癌,亦可以係淋巴腫瘤(當然,以呢個可能性最細,一個人一個病,好少可咁黑仔一個人中兩隻癌)。
好迂迴曲折,多謝你的分析。
政府腫瘤、政府乳腺科、甚至城中名醫(幫我做手術的醫生)三個單位都沒有提過淋巴和乳房應歸納為同一件事處理!!
手術唔做都做咗,如果那2粒淋巴有癌細胞,下一步會點醫/點處理/點補救?
我這個case, 三個單位的醫生處理方式有點“付碌”,真害怕再付碌多次把我當成惡性淋巴瘤處理。
在你行醫的經驗中,有見過我這類case嗎?
如果那2粒淋巴有乳癌細胞擴散,下一步就係再做手術全淋巴切除(所以之前話搞清楚先做手術咁緊要,因為想避免做兩次全身麻醉手術的可能性)。而家望就只可以望佢地冇野,係虛驚一場。
你呢類case唔罕見,亦唔常見。
非常感激回答,在這刻非常徬徨不安時個心定咗好多,最怕你答我話要補番做化療。
偉大無私的維園哥哥,你似乎是24小時standby來照顧我們這班無助的網上病人!
壞消息係如果淋巴證實擴散,除咗手術外,仲要做埋化療加減標靶治療,加電療,加減荷爾蒙治療。
24小時standby就誇張咗,不過我知你地急,盡可能我都會極速回覆。
我似乎表達得唔清楚/表達錯了,2粒著燈淋巴唔係喺腋下,係>>>>頸接近肩膊位置,咁上面假設性的情況係咪冇變?
正如你所講如有隱藏的侵蝕癌,咁會唔會咁猖狂從乳房飛站飛到肩頸淋巴?
醫生有輕描淡寫提過可能係淋巴發炎。
你的回覆比睇急症還要快!感激不盡!
腋下淋巴同頸淋巴差好遠,因為頸淋巴主要引流頭頸位置的淋巴液,所以上呼吸感染(傷風咳嗽)都可以淋巴腫脹,就好似醫生咁講「可能係發炎」。
隱藏的侵蝕性癌可以飛站,不過可能性低好多好多。
這兩天不斷徘徊於地獄天堂之間,在極度忐忑的時刻,你又把我從地獄帶回天堂,興奮過度失眠了!
感恩有你的扶持!
維園哥哥,今天覆診看肩頸淋巴抽針報告,抽唔中,已安排再抽多次。
醫生話左乳DCIS應該唔會擴散上淋巴,右乳(2010確診3 C 18/25 淋巴擴散,正服AI)擴散上左邊肩頸淋巴的機會唔大,但唔係冇可能。
至於會否是淋巴癌腫瘤?醫生的答案和你一樣:一個人一種病…………。
如果真係右乳復發擴散上去,將會點醫?要再打化療嗎?我有問醫生,佢好似答我「唔洗化療,要食藥」,我聽唔清楚。
明天的事留給明天的自己,不要過早胡思亂想。
多謝你安慰!過了煎熬的一個星期,全賴有你!
你好,pet scan 收費表個 link 已開唔到,請問可否 update link. Thanks so much.
已改回在breasthk.com底下。
你好 我屋企人發現乳頭附近有腫瘤 仲有紅卜卜 已經有一年 因為驚使好多錢 所以唔講我地知 想問下係咪要去公立醫院排左街症 先可以轉介 可唔可以俾建議 感激
最快係去樓下幾百蚊搵個家庭醫生寫轉介信到公立醫院乳腺科。
唔好意思 我頭先留左言先發現有其他介紹 唔識先再麻煩你 多謝你
唔好意思 又再麻煩你 因為我不停睇你其實分享 我記得佢好耐之前係有驗過話摸過硬塊 但係個時個醫生唔係幾好 咩都無答佢 好似有抽過針 又話好似無事 佢而家好似怕左 唔想睇醫生 佢剩係俾左小小我睇 見到佢紅色腫左一舊野 佢話有一年 而家會唔會幫佢私家book 左照x光同照聲波先會好d? 因為我都好亂 唔個點先幫到佢 可能睇醫生都要逼佢去睇 可以俾小小建議我嗎 唔該哂你
之前唔清唔楚嗰D其實冇關係,點都唔能夠取代現有檢查。
醫生要鼓勵佢去睇,乳房檢查三步曲要做齊,有錢去私家,冇錢等公立,其實都離不開呢D。
明白 好似你之前咁講 拿拿臨去私家驗左 係咪都可以叫佢俾報告同轉介信再去返公立? 唔該哂
係。
醫乳癌公私營合作 - 教你點保障自己
唔好意思啊 今日打左去浸會約時間 個姑娘話既然肉眼見到 不如直接約醫生 可能唔使做哂兩樣x Ray+照聲波 但係睇左你之前既分享 應該呢兩樣都係必須既 而家係見醫生好d定我直接去驗好d 有朋友叫我去睇急症 可以即刻驗埋 應該腫到有雞蛋咁大 豬肉眼見到 你會建議邊樣好d 唔該哂
所有檢查都應該由乳腺科醫生評估後先決定做/唔做,唔建議自己直接安排(即使你估到/知道做什麼檢查),因為始終都要醫生解釋報告,以及決定下一步點做。
急症室係可以快D見到醫生(不過唔係乳腺科),但唔會即刻驗埋,只會比封轉介信你去乳腺科,或者收你上病房由相關醫生跟進。由宏觀角度,我係反對去急症室,因為咁樣係濫用急症服務。由自私角度,我明白及理解點解會有人咁樣選擇/咁樣建議。
醫生 唔好意思 我尋日留左言 因為一路睇落去一路問 所以搵唔返自己既留言 只好係呢度再留過 星期六睇私家醫生睇完之後 佢建議我用轉介信入急症 而急症醫生就建議除非我地好唔願意留院 先俾醫急轉介信 星期六睇到係紫色一大舊 醫生話表面有20cm 就快蝕出皮膚 今日安排抽組織 想問下咁樣係咪已經至少到第三期?第三期多數要食標靶藥 係咪俾唔起就唔可以化療?唔該哂
如果未蝕出黎,都仲有可能係T3,如果淋巴冇受影響(呢個可能性不大)同埋冇擴散去其他器官,都仲可以係第二期B(雖然我相信期數不止於此)。
標靶藥物大部份係吊針(不是口服),如果有需要用但又比唔起,理應可以成功申請撒瑪利亞基金資助。如果咁唔好彩因某原因申請失敗,仍可以單獨化療。
醫生 有標靶藥物同無標靶藥 對病人既作用影響有幾大?或者係壽命係咪會耐d 雖然我知呢d無保證 但係會唔會有知大概時間?唔該哂
住院醫生已經確定要佢出院做左化療先 其實佢而家精神ok 做化療會唔會反而提前左 唔好意思 我有點亂 唔知點先可以對佢最好
做哂所有檢查(抽針/造影/掃瞄),出曬報告,先決定下一步點做。
主要問題係「係咪HER2型」,你針都未抽,唔好煩太多假設性問題。
醫生 好多謝你
醫生,想請問做完化療(吊針)後, 什麼情況或原因要再加口服化療?
擴散性乳癌醫生想繼續㩒住個腫瘤、或者三陰性乳癌特定情况下醫生可能咁考慮。
謝謝醫生
你好, 我做了超聲波檢查,報告是4a, 請問是乳癌機會大嗎?thanks!
2-10%
Hello Breast DR HK
I am 33 years old
2 Mar 2019 left breast 2pm partical excision
ER 150
PR 120
KI 67:8%
C-erB2:0/3
T1cN0(sn)——請問SN是什麼意思?
Bloom and Richardson:Grade 2 腫瘤1.1Cm
切左4粒前哨淋巴化驗是沒有受感染
今日即3/22 onco type test結果已出來 私院腫瘤科醫生証實不用化療!私家腫瘤科醫生說要做25次電療及食十年荷爾蒙藥!但醫生未講是食新藥定舊藥!我估是食舊藥T字頭
想請教醫生你。
1/我用以上術後治癒我存活率是幾多?復發率?
2/ 3D mammogram 顯示右邊有粒芝麻咁細良性鈣化點?外科醫生無告知實際size..只同我講無需擔心。是良性同埋好細,只而觀察就可以!如果是咁細,鈣化點會自己突然無左嗎?
3/電療機器問題。私院是3D螺旋形,想問一下
瑪嘉烈醫院有沒有這種儀器?
Thanks and Regards
心急人
Sn 即係sentinel node前哨淋巴。
1)10年存活率94%。復發率計唔到,因為adjuvant online未開返。
2)唔會冇咗。
3)冇。
Invasive面積5mm,前哨淋巴2粒無癌細胞。乳科醫生表示不用做其他檢查(CT scan / PET scan)睇下有無擴散,因為淋巴無就唔會去左第二個地方。最近一次CXR 2018年7月因其他事照的。有齊TNM才知道第幾期,去制定治療計劃。現在這樣安全嗎?說實話我有點擔心!第一同第四期處理差別很遠。
臨床1A期,遠端有事的機會好細,同意唔洗照PET/CT。
醫生你很早起床呀!多謝你快速解答疑難,十分感激!
現在剛完成手術等待見腫瘤科醫生商量電療食藥的安排。不用作CT/PET scan,這段期間除了等傷口埋口外,有沒有其他檢查化驗需要做呢?我想爭取時間做好準備,希望順利開始下一步療程。
另外,另一邊乳房2018年8月MMG+U/S驗到有a few bengin-looking microcalcifications scattered & a few small cysts。現在有無事情需要處理?醫生開了MMG & U/S檢查,2020年7月只檢查Ca一邊。想問我是否應該出私家照埋另一邊呢?
冇其他化驗需要做。
另一邊可以觀察。
要照曬兩邊。
醫生麻煩多你一件事,乳日誌Breast Friend個app是否不能再註冊?每次註冊都顯示network error,發電郵去開發人員詢問未有回覆。醫生你知道個app仲用得嗎?有問題應該聯絡那方面?謝謝!
因為我已經離開了,開發人員亦已經易手,只可以聯絡Hong Kong Hereditary Breast Cancer Family Registry 問。
醫生聯絡左HK Hereditary Breast Cancer Family Registry,回覆有些電話型號未能支援。但今日更新了Breast Friend個app後,可以使做了。多謝醫生幫手setup同推介畀大家知道這個有用的app,謝謝你!
醫生,我Rt breast T1aNO(sn),ER+,PR+,HER2-,Grade 1。5月中旬做手術切除腫瘤&前哨淋巴,8月初完成30次電療,現正食抗賀爾蒙藥。電療進行至一半時,7月中開始背痛。最初右邊肩甲骨痛,至最近兩星期背痛範圍去到右邊腰背近脊骨位置。痛之外間中有麻痺。30/7局部劃位時告知腫瘤科醫生有背痛情況,安排照肺部X光,但3/2020才覆診。確診後除X光,未做過CT/超聲波/PET scan。醫生請問背痛會唔會係唔好嘅徵狀,會唔會係擴散?7/8先做完電療,現在做PET scan會唔會影響準確性?聽過病友講電療後要等半年先可以做PET scan,唔係乳房電到實晒睇唔到有無嘢,是否真的?擔心擴散,我現在應該點做好?請醫生指點迷津。
背痛可以係唔好嘅徵狀,不過你期數早屬性好,擴散機會唔大。如果擔心就做PET scan,電療唔影響。
感謝馬醫生很快回覆!下星期會見其他科醫生希望肯幫忙轉介private照PET scan。
女皇醫院醫生表示要第三期以上先可以參與公私營資助計劃或轉介私家自費照PET scan。我係第一期,所以一一被拒絕。講就叫留意擴散徵狀,留意到又唔理。點解要輕視第一二期的病人?能保證不會擴散嗎?希望多一些醫生能像馬醫生一樣理解病人,樂於幫助病人!
朋友發現右邊乳房有硬塊, 照完超聲波醫生建議去抽針 RT Breast lump FNAC/core/bnx,
請問是否等於 “乳房組織活體檢查術” 呢?
如果抽針, 屬於是小手術嗎? 還只屬檢查性質, 她擔心 claim 不到保險。
請問你們這中心不單是檢查, 都有醫生做手術的, 是嗎?
抽針等如乳房組織活體檢查術,屬於小手術,可以當日間門診手術咁claim保險。
有提供手術服務。
你好醫生,本人媽媽53歲,9月頭有發現硬塊,即刻bk睇醫生做檢查,一開始以為只係水襄,中間做哂抽針同造影檢查,點知10月中就被告知係cancer,建議佢去做pet scan,其實建議得照pet scan的話,係咪好大機會擴散左去其他地方,好擔心好想喊
唔等如。10月中已經安排,而家都已經成個月,理應已經知道報告結果,點解仲要估估下?
hello 醫生, 其實佢唔係出報告, 而係公立既醫生當下照超聲波既時候話粒野睇落唔靚, 而且睇到淋巴有結, 佢估計係2期, 當初無諗過去私家抽針, 因為媽咪好怕唔想太快, 所以由見專科醫生到依家岩岩照左pet scan都有成個月..
上次抽針報告醫生講得好簡短,,我睇過你寫既野,抽針既時候乳房係粗針、淋巴係幼針,佢當下話睇完抽針報告只有話淋巴都有驗到d唔好既野叫我地去做pet scan,但又無講咩受唔受體,我問佢咁激素個d受唔受體,佢先答我係受體,係咪等於唔係三陰仲可以有得醫?
同埋佢約左我地黎緊聽醫生講解受體。。姑娘又無講太多,請問我到時應該有d咩可以準備去問醫生?
你提供的資料太零碎,唔敢講實。到時都係問期數、屬性、點醫。
呀同埋我地做pet scan係有打埋顯影劑。。岩的嗎,因為係我自己打去約,當時搵姑娘幫手約個陣d電話都唔通,跟住佢同我講約pet scan with contrast,唔知我有無聽錯,岩岩先知原來有2種。。唔該哂醫生
唔洗打顯影劑已經足夠,你做多咗、貴咗姐,冇其他問題嘅。
你好。我媽咪最近做左電子掃描。
報告上有一項係”small enhancing foci in both breasts”,請問即是甚麼?
要睇片加埋上文下理先知係咩。
乳癌一期,完左化療電療,而家重落緊標靶藥,幾時照正電子掃描好?
因咩原因要照PET scan?
39歲,2月中時左乳發炎有3cm濃瘡入院,照mri有幾個Briads 3和一個briads4b的腫瘤,之後抽針4 b腫瘤發現係1cm原位癌。濃瘡抽針之後冇癌細胞而種箘也沒發現。医生局部切原位癌同前哨淋巴亦做了冰凍切片,原位癌冇侵食性冇擴散。不過手術之後我左乳一直發炎,未好返,医生叫我去做電療,我做25次,做到第20次時,左乳頭開始劇痛,然後有黃色液體分泌物。医生話我左乳又再發炎有濃因為電療刺激到左乳,但沒辦法抽,因為濃太结加上我既皮膚已經電傷。今次濃瘡位置同上次唔同但都係乳頭附近。医生話可能有個粉瘤,但只可以先觀察。我想知我既發炎同乳癌有冇關係?有冇需要重新再抽濃做化驗?
原位癌唔會搞到發炎。
你覆述醫生話冇辦法抽。
你好醫生,我右有一粒3cm HER2 陽性腫瘤同有兩粒原位癌既腫瘤,無腋下淋巴結轉移,我想問下我宜家咁既情況。需要做 pet scan嗎
屬個人選擇。
剛照左pet scan to rule
Out ? metastasis, 請問:
1. Two minimal hypermetabolic lesions at 12 o’clock 40 mm and 2 o’clock 25 mm positions of left breast are in keeping with biopsy proven malignant breast pathology. The overlying skin and the underlying chest wall muscles are not involved.
2. Two minimal hypermetabolic nodes in level I left axilla are in favor of reactive nodes or lymphadenitis. As understood, early or micro lymph node metastases can only be confirmed or excluded by histopathology. No hypermetabolic node in levels II & IlI left axilla and left internal mammary chain.
3. Minimal to mildly hypermetabolic nodes in level I bilateral jugulars and level II-Ill right jugular are likely due to reactive nodes or lymphadenitis also.
4. A hypodense isometabolic lesion (~20 mm LD x 17 mm PD) in left adnexal region can be due to benign ovarian pathology.
5. No 18F-FDG avid lesion in the remaining body survey.
即系我可唔可以半切左乳房?
感謝回覆🙏🏻
初步睇唔得,個報告話你有兩個源頭一個係十二點方向,一個係兩點方向。
補充資料:剛confirm invasive lobular carcinoma (according biopsy, 之前Dr 話19mm breast lump 是stage 1)
謝謝回覆🙏🏻
請問CT scan with contrast能夠detect到乳癌嗎?
可以,不過靈敏度唔高,所以早期乳癌可以偵測唔到。
醫生你好,我右邊乳房有鈣化+0.5mm 可疑lump, 而家等緊去做抽針,有cancer機會大嗎?
估計唔到。
馬醫生:
你好!
本人公立醫院抽針後報告為T2N1 or T3N0, 醫生話要等另一份標靶報告才知道確實期數,要照埋PET CT SCAN再確認有否擴散其他地方才可以定立治療方案。
醫生叫我等政府排期照PET CT SCAN, 我們已表明想快會轉私家照,但醫生話佢可以安排1個月內照,其實同私家差唔多,但價錢爭好遠,我們已表明唔介意比錢,但醫生又再強調同私家差唔多,但價錢爭好遠,但我問醫生要一個月時間,我擔心一個月時間的變化,醫生答一個月唔會有太大變化……
請問馬醫生為何公立醫院醫生會這樣答,是否我這個情況真的可以等?還是什麼原因醫生會叫我寧願揀公院棄私院?
註:
公立醫院最終照PET CT SCAN 期是3星期內。
問過私家醫院是1星期內。
(公私院已相差2星期)
癌病是與時間競賽,但公立醫生那麼強調排公院,我這情況真的可以等,還是有其他程序要做?縱使我在私家照完還要等公院一些程序才可以進行治療?
不好意思,小小問題卻長篇大論,請見諒!
如果經濟可以負擔得到,梗係越快越好。公立醫院醫生日常照顧大量基層市民,經濟負擔壓力一般比較大,所以佢哋好想幫你慳錢。另外一個可能性就係個樽頸位都唔喺個PET scan度,就算你快照完有報告都好,佢都要等其他野/樽頸位係其他地方度,咁就相對急唔嚟。
我好!已照pet ct scan並沒有發現任何地方有癌細胞,但照超聲波檢查發現有一個襄腫要求抽粗針,惡性機會高嗎?報告指90 %良性‘係咪一定要抽針?定係可以半年追踨?診所又約太耐要一個月後才可抽針,謝謝!
按你說法應該係BIRADS4a,90%良性換句話說即係10%惡性風險,抽針好D。