「你西醫要我做手術，但我唔想喎，我想搵中醫／試下中醫得唔得先返黎。」 作為西醫，梗係信自己嗰套，我一定叫你唔好一開始就試乳癌中醫治療。明明仲有得醫／有得早醫，點解要浪費自己時間，錯失根治癌症嘅好機會。 中醫成日講「固本培元」，我地見到嘅係「顧本賠圓」。 即係顧唔到自己老本／伴，有排你賠圓（港圓呀，賠美圓嗰D唔會黎呢度啦，呢度係香港本地㗎麻） 希望你睇完呢一篇，終於都賠完⋯⋯

2018年8月後記：近日，承蒙各位的厚愛，將2013年的舊文推返上水。突然間收到無數的留言，如果是合理有觀點的，我會接受並尊重。如果只是漫罵式派別之爭，我無意牽涉其中。始終咸魚青菜各有所愛，就如唔同宗教信仰的討論落去都唔會有結論。引用一個舊回應「行文之時正值血氣方剛之年，不知天高地厚，所想難免周詳。不過唔打算河蟹了，只因發文目的純為幫助病人，就當是黑歷史／一面鏡子，忠誠的面對自己過去，讓自身反省吧。」作結。

警告：以下內容帶有強烈個人色彩／偏見，只代表個人意見，保證內容不中立，敬請留意。

乳癌中醫治療

「點解我信中醫呢，因為中醫有幾千年歷史⋯⋯」

中醫係有幾千年歷史，不過係積弱嘅歷史，佢輸畀西醫嘅重點就係唔夠科學化同埋冇進步。樣樣野都標榜「古法」「古方」「祖傳」「秘方」，如果一個舊有棘手嘅問題「癌症」，可以用一個舊方法就解決咗，仲有人會驚？仲有人叫佢做「絕症」？

「唔係喎，而家中醫現代化喎⋯⋯」

舊酒新瓶就係舊酒新瓶，任你點包裝，舊酒始終冇變過。白花油就係白花油，任你點包裝，你鍾意叫福仔239又好，叫和興白花油－清幽味又好，就算出埋咖哩味都好，佢始終都係白花油。

如果一樣野積弱咗幾千年，你估你係咪咁好彩，一用中醫，中醫就因你而中興？定係你都成為積弱嘅一份子，好快仲成為歷史？

股票市場有隻仙股積弱咗好多年，你估你係咪咁好彩／獨具慧眼／價值投資，一買仙股，仙股就因你而爆上？定係你都成為積弱嘅一份子，蟹貨咗好多年？

曹仁超都教你「有智慧不如趁勢」，要買就買強勢股，要醫就搵西醫醫。

「唔係喎，今次有內幕料，隻仙股真係會爆上喎。」

點解有內幕料要話你聽？同你有親？定係黑社會大佬上咗身「街外錢齊齊搵」？

「唔係喎，今次遇到上水彩園商場神醫有祖傳秘方，乳癌真係醫得好。」

點解有秘方要話你聽？同你有緣？定係你有港圓？自己都唔敢叫自己做醫生，因為佢知道冒認醫生係要坐監㗎麻。我諗功效同你將五碗香爐灰煲埋一碗飲差唔多，吖唔係，應該係一樣先啱，一樣咁冇效。 笑就講完，回到最開初嘅一個問題：

「你西醫要我做手術，但我唔想喎，我想搵中醫／試下中醫得唔得先返黎。」

我從未見過一個返到黎拆西醫招牌嘅，有人返到黎，不過係搞衰咗，返黎執手尾（仲唔係個個可以執得返），亦都有人返唔到黎，車～可能人地醫好咗開心快樂地生活落去呢？你估公主王子嘅故事真係存在咩，現實有就唔洗當童話講比細路聽，你日日都見到嘅話仲有咩咁值得講？你估如果真係醫好咗，中醫師會唔會開記者招待會大肆宣傳一下呢？

「六合彩都有人中啦，點解中醫一定唔得？我都係想試吓」

六合彩係期期有人中，不過你估你係咪咁好彩期期都中呢？現實大部份人係買足一世都唔中。

「唔中咪下次囉～」

唔好忘記，今次嘅注碼唔係20蚊，下次黎過。今次嘅注碼係你條命，係咪咁輕鬆生命有take two 下次黎過，你要諗清諗楚⋯⋯

「好喇好喇，我兩邊都信，中西醫合壁又得唔得？」

中醫又唔識西醫啲野，西醫又唔識中醫啲野，點合壁？有衝突時聽邊個講？最驚第時衰咗兩邊都話／賴你冇跟足指示。

「唔係喎，我睇嗰個係識哂兩樣㗎喎⋯⋯」

你醫癌症走去搵周身刀？古語都有話冇張利啦。醫癌症一搵就搵最專業、最鋒利嘅刀，雖然姜大衞教你要驚佢有生銹嘅一日。

「咁手術前補補身都得掛」

好多人做手術前都好鍾意補一補身，中醫行氣活血麻。現實就係搞到凝血功能差，我地外科醫生做手術時好難止血，受害嘅係你自己。

「做完手術先補身囉」

都係唔好，因為會影響化療。中醫好鍾意用「複方」，又藥引又盛，幾十隻藥材撈埋一齊，就算中醫師都估計唔到對啲化療藥嘅影響（本草綱目都冇教）。由西醫嘅角度，我地好多時都見到啲草藥令肝酵素上升，令到我地喺冇辦法嘅情況之下要停化療（因為化療都可以搞到肝酵素升），咁就阻礙你嘅治療啦。

「咁講法，咪點都唔用得中醫？你西醫都好霸道姐！」

又係唔哂，有兩個情況我唔反對中醫：

1）完成晒西醫療程，你鍾意點補身，點固本培元都得，因為已經唔會影響我地嘅治療。
2）末期癌症，到西醫都舉哂白旗頭晒降時，你去試其他野都無可厚非，有乜理由你西醫話冇得搞又唔比我去搵第二個搞姐。不過都係去啲大嘅出名嘅，例如香港大學中醫學院、北京同仁堂等等，佢地有根有據，唔會離晒譜。千祈唔好去啲門口仲賣緊啲假鮑魚、櫃位仲有個客嘈緊斤定両嘅街坊中醫鋪。

睇到呢度，你可能覺得我好偏激，但你細心咀嚼吓，你又唔可以話我錯。而且我嘅偏激，好大程度係源自我對好多原本有得醫，後尾比自己／比人搞到冇得醫嘅乳癌患者嘅痛心。

生命冇take 2，請小心選擇⋯⋯

封面圖片來源：香港政府廣告截圖

• 乳癌中醫治療
• 面對乳癌挑戰的妳