香港乳癌存活率 ： 我仲有幾耐命？
警告：內容包括一些極度敏感的資訊，可能令人不安。
如閣下不欲看有關香港乳癌存活率的資料，請立即離開。
如閣下想看這些敏感資訊，不過心理狀況未準備就緒，請立即離開。
如閣下心理狀況準備就緒，亦應清楚明白以下內容僅為過往統計資料，不能推測將來，否則，請立即離開。
如閣下心理狀況準備就緒，亦應清楚明白過往統計資料不能推測將來，亦應注意到此等資訊，可能令人產生不可估計的負面情緒。如果不欲有任何不可估計的情況發生，請立即離開。
如閣下欲看有關香港乳癌存活率的資料，心理狀況準備就緒，清楚明白過往統計資料不能推測將來，願意承受因此等資訊而引起的責任問題，請進⋯⋯
離開最後機會。
離開最後機會。
離開最後機會。
離開最後機會。
離開最後機會。
離開最後機會。
呢一篇係開Blog以黎最沉重嘅一篇，因為牽涉嘅題材最敏感，但亦都係最多人想知，最多人問，最多醫生唔想答，因此最為神秘。
咁點解我仲要涉觸呢個範疇呢？最主要係希望撫平不安嘅情緒。
唐代《千金要方》有云「古之善為醫者，上醫醫國，中醫醫人，下醫醫病。」
病人需要嘅唔係個個都好似國父孫中山搞革命嘅上醫，患病時能遇上一個能醫心的，是為上醫也。
人既不安，好大程度係源自恐懼。點解恐懼？因為未來嘅不確定性，人冇把握／辦法控制自己嘅命運。
人最驚咩？大部分人最驚死。死有咩咁可怕？人人都要㗎啦，由古至今，無分你我，無一例外，咁都仲要驚？大家驚，係因為死後唔知去邊（未來嘅不確定性），同埋控制唔到自己嘅命運。
咩人最唔驚死？係教友。佢地信自己死後會上天堂（未來確定咗），控制到自己嘅命運（開心快樂地生活落去）
末期癌症病人最驚咩？佢地最驚唔係死，未來係點已經確定咗。佢地最驚嘅係有遺憾（後生嘅驚睇唔到仔女大、睇唔到佢地入大學、驚老公同屋企人傷心、驚粗心大意嘅老公唔識照顧自己同仔女；兒孫滿堂嘅驚嘅係死得辛苦，唔能夠舒舒服服走埋最後呢段路），因為呢啲就係佢地最冇把握／最冇辦法控制嘅嘢。
我寫呢篇嘅目的就係等大家有個合理嘅期望（冇唔合理期望就冇失望，你期望好懶唔溫書嘅阿仔考試100分，佢99分考第一你都係唔開心），估計自己仲有幾耐係度（確定未來），把握自己僅有嘅時間安排好一切（控制自己命運）。希望做到我喺醫學院學到嘅其中一句最重要嘅說話「去者能善終，留者能善別」。醫生唔能夠令病人永遠唔死，我地唔能夠醫好嗰病，但我地有能力撫平不安，陪你舒舒服服、安安落落咁走埋呢段路。
停一停，問問自己，凖備好未？再講多一次：離開最後機會。
香港乳癌存活率
好，開始⋯⋯
我地先黎睇睇圖表：
以上嘅圖來自香港本地統計資料，百分百地道。
「我地點去理解佢呢？」
第一你要明白以上資料只係統計，人人命運唔同，對治療反應人人唔同，你絕對有權好過佢（當然都可以差過佢。）
第二，以上研究嘅對象係1997-2001確診嘅病人，醫療科學日新月異，2000年之後化療藥嘅進步（紫杉醇化療 Taxane），2005年後標靶藥嘅突破 （herceptin），呢個表都未能完全反映出黎，所以同樣期數嘅你，表現應該好過前人。
第三，你見到期數越高，表現越差。第一二期（早期），大部份病人都醫好咗，平均八成以上有七年壽命以上。去到第三期（後期），癌症開始悪，得返六成人去到第七年。至於第四期（末期），中位數（50%）只係去到第二年。
「有冇啲新啲嘅本地研究可參考？」
冇，以上係暫時唯一一個研究。唔可能有新啲，因為新啲嘅病人冇足夠嘅覆診去睇佢地表現成點。
「以上最多得七年，七年之後點？即走？」
唔係，只係越長嘅跟進，越困難去做。病人長時間冇事，總會鬆懈而唔去覆診。你可以預期，越長時間，存活率會下移。有幾快幾急？你可以從條線嘅斜度去估，記住只係估，估可以估錯，最好嘅估錯／結果係條線平穩。
「幅圖都冇零期癌症（原位癌）嘅？」
零期係最好嘅，九成幾人有十年以上壽命，記住重點係「以上」，十年後點？冇統計資料，因為好多人唔覆診。你可預期，如果唔侵蝕食癌病復發，二三十年係好平常嘅事。因為咁好存活率，所以好多保險原位癌係唔當你有野，危疾保險係唔賠嘅。
「醫生一年前話我得返一年命，聽日係大限喇～」
唔好咁諗，醫生講嘅係統計／估計，統計／估計都係會錯。唔會今日仲好地地，聽日就大限「叮」一聲將至。故事嘅發展係會慢慢走下陂，你會感應得到嘅。即係點？即係你會覺得唔精神／冇精力，平日鍾意嘅野都唔想做，慢慢冇胃口，唔想食野，個人漸漸消瘦，之後唔想落床，沖涼大小便都唔想去／唔想郁，慢慢連呼吸基本維生既野都有困難⋯⋯總之你會感覺到嗰分別，唔係醫生話邊日就邊日，佢邊有咁神。
「我唔想比我老婆／阿媽知佢仲有幾耐，醫生可唔可以幫我呃佢／唔比佢知？」
你估你唔講／醫生唔講／人人唔講，病人自己會唔知？身體係佢自己，唔想食野／漸漸消瘦，佢比任何一個人都清楚，佢自己會感覺到，冇得呃。呃佢只會令佢對未來產生不確定性（明明差緊，醫生仲話冇事有得醫），產生一大堆問號，加重佢控制唔到命運嘅無力感，加重佢嘅恐懼，令佢錯失僅餘嘅光陰，增加大家嘅遺憾。所以呃係冇得呃，點表達，就可以搵個令大家都舒服嘅方法。
最後記住記住呢句話「去者能善終，留者能善別」
下一篇帶你入火場前，講吓我地有咩架撐法寶，作最後救人策略上嘅部署⋯⋯
香港乳癌及乳病治療中心 
高估咗自己，睇完灰咗添。
你有勇氣入黎呢一篇已經好叻好叻，證明到你正面咁面對自己嘅問題。雖然啲資料可能令你唔開心，但退一步，降低自己嘅期望，可能令自己更開心。
人就係貪心，我同你講你一定中六合彩，派彩三千八百萬你都唔開心，你會問點解唔係十期冇人中嘅中秋金多寶。比你中埋中秋金多寶都冇用，你都係唔開心，因為你都唔夠李嘉城有錢。
人就係貪心，我同你講你有五年命，你唔開心，點解唔係十年？我比夠十年你，你都係唔開心，點解唔係十五年？我再比十五年你，你都係唔開心，點解唔係最長命嗰個。
倒返轉，我話你得一年命，活到第二年已經感謝主，五年仲會唔開心？
改變唔到環境，就只可以改變自己心境。每日都係最後一日，一覺醒來又賺多日，珍惜同家人嘅每分每秒，邊日走邊有得估。
2012年今日嘅意外，又有幾多個家庭唔能夠捉緊共處嘅每一秒⋯⋯
我明，其實相對我已經好幸運，灰灰地啫，改變唔到環境，就改變自己心態，昨日行多一步，淋巴無事，當中個安慰獎先。
咁諗就啱喇，繼續努力，比心機捱埋佢，睇得出你老公好錫你，祝你身體健康。
我聽說的是第5 年後會回升生存率，第6,7 年會回升得慢，過10 年就接近沒問題了，不是這樣嗎？
因為，我婆婆活了過30 年，只是我不知道她是第幾期。。。但多數不是0 期。因為聽說她要手術加打針『化療？！』，加上30 年前的醫學也那麼雞。。。
如果你就的越長就越小活率，那她30 年也就太奇蹟了
注： 我沒質問的意思，因為我家人也有了，所以十分關心這問題，謝謝
生存率唔係咁計嘅，佢係一個百分比去睇吓確診咗乳癌嘅病人，仲有幾多人在生。假設一百個人確診乳癌，隨年日過去，唔同人會因為唔同原因（有人因病，有人因意外）走咗，所以呢個數只會向下調整，直至零為止，並唔會上升返（因為人係唔會復活嘅）。我諗你混淆咗病友好鍾意講嗰D「幾多幾多年就高危復發，過咗幾耐就冇咁易復發」。
謝謝你用心解答，其實我還有一個婆婆有乳癌，但最後死因是心臟病，我想知道這生存率是包括其他因素『自然死，其他病而死』，還是死因必定與乳癌或相關的『如轉移』。
假定這生存率有2個因素，(一) 是包括所有死因，(二) 是只包括與乳癌或轉移有關的。
如果是(一) ，那這生存率就降低了其參考價值，因為一般人也會因意外而死亡。 要是一，我希望老師你可以加個『注： 這生存率是全包的』，因為我有心理準備看到時，不是我有ca, 而是我家人，也灰心了，本人的話就更。。。
如果是(二), 那為甚麼5年復發率降低了，存活率還下降那麼多？ 不是5年後，生存率應該不變，或下降幅度應該更慢『減少5 至10 倍』。
當然，我也知道這也是參考用，不同人有不同命數，但都做了出來，就做準確一點，病人或家人也可以安心點。
最後，再次感謝你寫了這文章，因為這文章的確解答了我不少疑問。
其實醫學上我地分得好仔細嘅，你講嘅假定一，就係我地所講嘅整體存活率（overall survival），即係唔理你有冇復發，總之在生就是了。
你假定二牽涉究竟咩原因走，我地呢D叫cause specific mortality，如果針對因乳癌而走嘅，呢D叫breast cancer specific mortality。
我專登唔寫到咁細項，因為喺病友角度只會越聽越唔明，咁樣係幫唔到佢地嘅。如果你對細項好有興趣，可以上網查吓以上keyword。
關於存活率同治癒率我係咪可以問腫瘤科醫生定乳線科醫生？
兩個都可以。
醫生你好。
請問有冇2018年數字?同埋人地講嘅 10年「安全期」可信嗎?
無限感激
冇2018數字。10年冇事係相對安全，不是絕對安全。
唔好意思，又係我，
想問除左定期檢查外，仲有咩方法減低復發率？
唔好意思愚問。
無限感激
跟醫生指示做相應的輔助治療。
十分感謝你的文章分享
我係零期, 但睇完都好驚… 除左覆診同睇醫生外, 吾知可以再做D咩..
零期就唔洗驚，99%醫好。
2018年現今醫療技術藥物，乳癌已第四期轉移到肺、肝同骨，但食得瞓得存活率會否超過10年？
難。
連上問題～36歲性格樂觀，積極面對治療，存活率大約可以幾耐？謝謝醫生🙏🏻
既然積極樂觀，控制唔到嘅野就交返比個天。
請問一下這個數據是包含所有的嗎？ 包括三陰性的嗎？ 曾經看到一些文章，說乳腺癌第1期第2期的治愈率生存率很高，但是並不包含三陰性的。 媽媽是三陰性的乳腺癌2期，淋巴沒有感染。 說是預後不好及復發率高，實在很擔心。
概括所有。
媽媽74歲， 自己怕痛怕睇醫生，收埋有事2年幾，現食出皮膚，出水俾我發現，明天睇醫生，勸左好耐先肯，佢怕知道真相仲灰心，仲易惡化，我應該點同醫生溝通，唔好嚇親佢，或變成俾壓力佢？
佢好唔想做治療，覺得現在行得食得，但眼見瘤大，應該都唔樂觀，怕醫生打沉佢意志，求心得
睇吓可唔可以自己先見咗醫生，一早溝通定先再帶媽媽入去見。
好不幸我太太都得咗1期，未知是否感染淋巴，做老公真係好擔心，真係唔希望老婆咁早就離開我，真係唔想知太太仲有幾耐，好想好好生活落去
明白你嘅擔心，盡快收拾心情，打好呢場仗，加油！