乳癌手術風險 － 開刀安唔安全？高風險嗎？
一聽到乳癌要做手術／開刀，病人／家人心裡面第一個畫面一定係電視劇中家人心急如焚喺手術室外等嘅一幕。因為除咗生仔，醫生會「恭喜」男主角老婆順產、母子平安（一定係母子，永遠唔會母女）外，其餘一比九十九都唔慌好野。手術室燈箱熄滅，醫生走出黎，重要關頭就去廣告，廣告返黎，醫生回帶再一次走出黎，除低頂手術帽講「我地已經盡咗力」，之後搖搖頭走左去，咩事又唔交代，屋企人雖然一頭霧水，但劇情發展到呢度，總之就呼天搶地喊咗先啦。睇得電視劇多，手術仲邊會聯想到好野，仲邊會有人敢開刀？現實係唔係咁呢？做手術前你一定要知「乳癌手術風險 － 安唔安全？高風險嗎？」⋯⋯
乳癌手術風險
乳癌手術，我會話係非常安全（如果醫生肯同你做嘅話），當然你唔好誤會成百份之一百安全。
「咁你講嘅『非常』即係有幾非常先？可唔可以量化佢具體啲講？」
圖片來源：SOMIP Report
講講本地醫管局數據：
喺2011－2012年度（已經係最新最update），全港十六間公立醫院，一共做咗1766個乳癌手術，其中有一人喺手術後30天內去世（即30天死亡率為0.06%），報告冇講明原因／年齡／本身身體狀況，即係可以關手術事，又可以唔關手術事。而手術後30天內併發症平均為6.6%（主要為傷口發炎3.3%，瘀血積聚1.7%，及傷口因血氣不足而久久未能愈合0.8%）。平均住院日數為全乳切除（3日），局部切除（2日）。
「咁即係點？」
即係如果醫生肯同你開刀（因為有啲太高風險嘅女士，例如年齡大／心臓病，醫生可能唔建議做手術），99.94%（仲勁過一比九十九）落得到手術枱，出得返手術室，返得到屋企。93.4%冇併發症，平均住2－3日醫院就可以返屋企。
「聽落都幾安全，好似小手術咁⋯⋯」
又啱又唔啱。安全係安全，因為冇影響內臓。乳房始終係身外物，所以乳房手術大部份風險都係黎自麻醉。呢方面（麻醉）嘅風險，同你做所有全身麻醉嘅手術一樣，取決於年齡／身體狀況／長期病患。
但乳癌手術又唔係小手術，因為其實好大程度係唔止割咗嗰瘤咁簡單，最重要係要「美」。
局部乳房割要做得好（胸型要原整，唔好凹，兩邊要對稱，疤痕要隱蔽，乳頭唔好址埋一邊）。
全個乳房割都要做得好（皮膚要平順，疤痕要埋得好，格勒底唔要有多餘嘅肉頂出黎阻住手活動）。
乳房重建更加要做得好（兩邊大小／形狀要一致，手感要好，仲要夠襟用）。
所以乳癌手術唔係小手術，佢係一啲成功率高、病人有要求、講求美感嘅大手術。千祈唔好求求其其搵個外科醫生（甚至婦科醫生）割咗去就算，出黎嘅效果一定唔夠好（最差情況係要割幾次，仲要變哂型）。要開刀就正正經經搵個做開乳腺科嘅外科專科醫生去做，雖然唔係保證一定唔洗返手／唔會變型，但一講到經驗、一講到點樣可以割少啲、條疤痕點樣藏好啲，乳腺科醫生係有其過人之處，佢地對美感嗰份堅持同執著，就係你要求嘅野。
結論：
1）睇少D電視劇，乳癌手術絕對係救你一命嘅主力中之主力
2）乳癌手術好安全，放心去做啦
3）開刀就正正經經搵個乳腺科外科專科醫生去做
而家你肯做手術，下篇就講吓要做咩手術，有咩比你揀⋯⋯
香港乳癌及乳病治療中心 
你好，我住洛杉磯，11/21/2014做了left breast lumpectomy, sentinel lymph node biopsy和axillary lymph node dissection。
12/1/2014回診，開刀醫生只拆了drain就讓我回家，但自那天起腋下drain的位置到乳房邊緣感到有一長方形硬塊，會痛不舒服，這幾天的體溫是97.9-.98.2，
我有聯絡開刀醫生，但他很忙，叫我先去看我的primary care醫生，12/8/2014她說我infection，開了抗生素要我吃兩星期。
本來想聖誕節那周開始做化療，但依我目前的情況，我該怎麼辦好呢？
拆咗Drain後如果發現有硬塊，最大可能係仲有D積水（seroma），雖然佢都可以自己自然慢慢吸收，但而家身體微燒，加上家庭醫生覺得drain exit site infection，用針抽咗seroma 去會好D。至於家庭醫生識唔識／肯唔肯抽我唔知，因為香港呢D一定係operating surgeon 跟進返。
呢D普通發炎好快退，唔會太影響化療時間。
首先我非常感激你這麼快回覆我，再感激你為乳癌病友提供這麼多的資訊，你的網站是我目前找到最實用的breast cancer網站，加上我是香港人，看你的網站我很有歸屬感，多謝！
我終於confirm好明天下午可以去見我的surgeon，希望趕快處理好我infection的問題。
我是pT1cN1aMX, ER/PR Positive, HER2 Negative, Ki-67 proliferative index Low, 已見過我的oncologist，他提到我如果做化療，會用TC(taxotere, cytoxan), 我記得你講過化療嘅功效，係取決於：1）用咩藥（Drug）2）藥物劑量（Dose）3）打幾密（Dosing frequency），以我的pathology report 來看，你有什麼建議？
另外，我本來要跟的那位onconlogist從十二月起就放長假出國了，要元旦後才回來，換來了一個年青醫生代替他，感覺上這年青人就是那種依書直說和只會用電腦來計算各樣formula和possibilities的醫生，他2008年才畢業，好像沒什麼經驗，我對他信心不大，定係oncologist沒什麼行醫經驗也沒所謂？該怎樣選oncologist?
你淋巴有擴散，即係代表乳癌惡，香港會用第三代化療，通常係FEC x 3 + TT x 3，大部分醫生會覺得第二代TTCx4唔夠力。
無論什麼職業，同人講「冇經驗唔緊要」，我諗冇人會相信，大家都知道「冇經驗唔緊要」只會係騙案／非法活動中發生，所以喺搵oncologist黎講「經驗」係緊要嘅，尤其當其他因素一樣嘅時候。
不過「經驗」雖然緊要，但佢唔係揀醫生「唯一」嘅指標，仲有其他好重要嘅因素要考慮，例如醫德、智識、技術、收費等等。另外，經驗係靠「犯錯」累積返黎，人人都有第一次，人人都係由零開始，所以唔應該用「年青」去判斷佢好唔好，可能人地青出於藍呢？
揀醫生冇一個分數可以客觀比較，所以只可以由心出發，比到信心你嘅醫生就係好醫生。
補充:本人53歲，一向健康良好，家中無有其他乳癌病患。
我有睇過你用AdjuvantOnline計數乳癌病患十年復發率和死亡率，可否幫我也計一計？
萬分感謝！
你要提供埋tumor grade先可以準確D計。
感謝你的回覆！
NUCLEAR GRADE: Grade II (intermediate)
OVERALL GRADE: Grade 2: scores of 6 or 7
另外，想請問你贊成coffee enema排毒和布緯食療嗎？
Thank you！
幫你用Adjuvant Online計一計：
1）唔化療、唔食藥：10年死亡率：16.8%；10年復發率：36.5%
2）打第二代化療、食5年Tamoxifen：10年死亡率：8.2%；10年復發率：15.8%
3）打第三代化療、食5年Tamoxifen：10年死亡率：6.8%；10年復發率：12.8%
我唔贊成coffee enema排毒和布緯食療，理由以下文章有講：
乳癌食療及食物禁忌 － 戒食雞？戒豆漿？
非常感謝你的回覆，我會配合醫生的乳癌療法，手術、化療、電療同埋荷爾蒙治療都會做，努力抗癌。
今天下午去見過我的surgeon，他檢查我的腋下硬塊後，說是我對dye藍藥水有reaction，很少會發生，他叫我繼續食抗生素，下星期四再回診，如果有好轉就冇事，否則就打開拿走那團tissue，看來我好黑，連對做前哨淋巴結活檢用的dye都詳產生副作用，想請問你對dye有reaction是什麼回事？會自己好翻嗎？
盼望各病友都積極面對乳癌，勇敢抗癌！當然更感激你的網頁，我和其他病友得益良多，無言感激！！！
對你surgeon嘅說法有保留，以下係有疑問嘅地方：
1）如果係對blue dye有reaction，點解唔係打完dye即有？而係拆咗drain先有？時序上唔太吻合。
2）點解食抗生素有機會好轉？blue dye reaction又唔係感染。
3）未聽過會用手術去處理對藥物嘅不良反應。
另外，我好高興知道呢個網頁幫到你地。
我也同意你的疑問，今天去請教另一位醫生，她說probably是seroma，所以我下星期真係要找我個surgeon傾一傾，看看如何解決是好。
你講生果唔好連皮食，但如果係organic嘅水果呢？
非常希望你這個網頁繼續寫下去，你有很多fans嫁！
Organic 水果都係一樣，始終皮就係污糟，化療期間萬事小心為上。
我想請問切除乳房後 要怎樣補身？
均衡飲食，多做運動。
醫生，想請問，已玩成了術前化療及手術（全乳切除/右邊），還有幾次就完成電療，而標靶要繼續打到17針爲止。最近一次是1月份見外科醫生（手術在12月尾）。外科要我4月回去復診。想請問一下，再見外科醫生主要是什麽呢？傷口等等已經回復好好了（1月份外科醫生這樣説的）。
定期保養。
我今日啱啱睇完醫生做抽針，醫生真係仁心仁術本來好驚但係抽針過程一啲都唔痛好專業，姑娘同醫生令到我喺好放鬆嘅環境之下做左抽針手術，感激萬分多謝