教你醫生不會告訴你的秘密，我到底係咪生乳癌？
死啦，我摸到乳房有硬塊呀，但我唔敢睇醫生，怕檢查、怕痛、怕有事、怕手術、怕化療，總之乜都怕。究竟我點先知自己係咪生乳癌？乳癌有冇咩前兆？點樣做乳癌檢查㗎呢？懷疑乳癌又點樣做先啱？入黎教你醫生不會告訴你的秘密，一文看清到底自己係咪生乳癌⋯⋯
摸到乳房硬塊嘅你
第一樣野你感覺到嘅係擔心同奇怪。
「幾時嗰度開始有舊野㗎呢？」
「唔係自己中咗招呀？而家講到乳癌好易中⋯⋯」
「會唔會係纖維瘤咋？會唔會變惡㗎？」
「要點樣檢查先知舊野有冇事？我好怕痛㗎，唔想抽針同手術⋯⋯」
未睇醫生前
先了解一下自己風險先，D人成日教舊野硬唔硬、郁唔郁得、痛唔痛去估有冇事，其實對你係冇乜用嘅。你都冇經驗冇得比較，點知自己舊野叫硬定唔硬？叫郁得定唔郁得？同埋之後結論都係「估」有冇事，如果萬一估錯呢？代價就係自己條命自己健康。所以最安全最穩妥嘅做法就係睇醫生，檢查清楚，咁就安心又放心。
「唓，廢話～」
唔好唓住，上面第一句「先了解一下自己風險先」就係重點，原來歲數決定命運，同一病徵年紀越大出事機會越大。想了解多D，去以下文章睇下：
乳癌特徵
「就係咁簡單？」
當然冇咁簡單，原來乳癌有5大病徵，當中以乳房硬塊最為重要及常見，另一方面，好多人以為可以用痛同唔痛去分辨係咪乳癌，其實係出於誤解。乳房痛可以係冇事，又可以係有事。另一方面，乳房唔痛亦都一樣，可以係冇事，又可以係有事。所以有病徵就睇醫生，唔好再靠估。
想了解多D 乳癌5大病徵，去以下文章睇下：
懷疑乳癌
「我真係年紀有返咁上下加摸到舊野，咁點算？」
相對簡單，搵外科醫生檢查去確定有事定冇事。
「唔係搵婦科咩？」
好多人誤以為乳房係婦科問題，應該搵婦科。其實係出於誤解，原來乳房問題係隸屬乳腺科，佢係外科其中一個分支。而乳腺科唔係一個可以引用嘅名銜，所以搵外科醫生就啱。
乳房檢查三步曲
「睇外科醫生之後會做D咩？」
見到乳腺科醫生之後，醫生會幫你做乳房檢查三步曲。
「咩係乳房檢查三步曲？」
乳房檢查三步曲即係臨床檢查、造影檢查、抽針檢查。㩒入去睇下你就會知每個步驟做D乜。
乳房造影檢查 （ 乳房X光 ／ 超聲波 ） － 乳房檢查三步曲2
「我要照乳房造影，即係照乜野？」
主要係X光乳房造影（即係我地所講嘅夾胸），同埋乳房超聲波，好特定嘅情況先要照MRI磁力共振。究竟邊一樣先啱你，去睇一睇片：
「咁照完又點？」
得兩個可能性，一係有事有野揾到，一係冇事冇問題。有事有野揾到就去抽針，冇事冇問題就觀察。
「我醫生話有可疑，咁抽乜野針？」
乳房有可疑，就抽粗針，唔好抽幼針（因為分唔到原位癌定侵蝕性，同埋唔可以加驗屬性）。腋下淋巴有可疑，就抽幼針（幼針已經足夠，粗針反而高風險）。粗針究竟有幾粗？痛唔痛？過程點做？同幼針有乜分別？去睇以下條片你就明：
報告話我
「我已經做完檢查，報告話我⋯⋯」
如果中咗招，不幸患上乳癌嘅，去睇下：教你醫生不會告訴你的乳癌秘密，做一個唔會後悔一生的決定，呢篇文章就係你嘅救生圈。
如果係乳房纖維瘤的話，去睇下：乳腺纖維瘤 － 其實好簡單，入面有乳房微創手術係點樣做睇。
如果係乳房葉狀瘤的話，去睇下：乳房葉狀腫瘤 － 究竟係咩黎㗎？，原來葉狀瘤係有機會變㗎。
如果有鈣化點的話，去睇下：乳房鈣化點 － 係咪好危險？，入面教你鈣化點幾時要驚？幾時唔洗驚。
如果係水囊／水瘤的話，去睇下：乳房水囊 ／ 水瘤 － 有冇危險㗎？

香港的乳癌治療資訊
圖片來源：selih.si
歡迎來到香港的乳癌治療資訊，一個充滿愛、喜樂、同埋希望嘅香港乳房健康網站。
要講乳房疾病，首選當然係乳癌，當大家面對突如其來嘅乳癌侵襲，無不感到沮喪、痛苦、孤單、同埋絕望⋯⋯
呢度希望透過輕鬆嘅表達方式，深入淺出大家要知的、實用的、「香港的乳癌治療資訊」。
從網絡世界散播正能量，為嘅係希望大家在苦難中能感覺到「甜」，在孤單中能感覺到「愛」，係呢度重新搵到「希望」。
呢度就係你嘅救生圈，加油！
香港乳癌及乳病治療中心 