乳房造影檢查 （ 乳房X光 ／ 超聲波 ） － 乳房檢查三步曲2
上篇講完臨床檢查，今次輪到講下乳房造影檢查（乳房X光／超聲波）。
「乳房X光／超聲波，聽就聽得多，實際有咩唔同呢？幾時同幾密照一照？有冇輻射？幾多錢？」
呢篇為你一一解答⋯⋯
乳房X光造影（mammography）
即係平時我地講嘅「夾胸」。原理就係將乳房拉出撳扁，再照兩照X光（每邊兩個角度）。
圖片來源：互聯網
得出黎嘅影像就好似黑白菲林咁，黑色底睇白色野，所以睇原位癌（白色鈣化點）特別清楚。
咁有咩唔好？X光始終有輻射，雖然非常低劑量，照得過份地多始終唔好。通常建議40－70歲女士每一至兩年照一照。
「我廿幾歲，使唔使照啊？」
過早照（細過40歲）有兩個問題：
1）後生女，乳房組織密度高，喺X光底下係會白濛濛一片，變相白色底睇白色野，根本就唔準（靈敏度低至百份之五十，即係同擲銀冇分別）。
2）太後生開始照，累積太多嘅輻射，第時會唔會導致生癌，都係一個疑慮。
所以第一個常見嘅謬誤，就係細過四十歲都照乳房X光（當然，後生高度懷疑生癌就例外）。所以千祈唔好反射神經快過大腦：「驚生乳癌呀？照吓乳房X光囉。」
乳房超聲波（Ultrasound）
「我廿幾歲，冇得照乳房X光，咁點算啊？」
唔使怕，仲有乳房超聲波可以照。咁咩係乳房超聲波呀？大陸叫佢做B超，台灣叫佢做乳房超音波，喺病人嘅角度，就係瞓喺度，醫生搽D啫喱上乳房，之後攞部機碌吓碌下，一陣就搞掂。
圖片來源：互聯網
得出黎嘅影像同X光啱啱相反，係白色底睇黑色野（好似黑白電視咁），睇腫瘤／水囊就好清楚。相反，白色鈣化點係白底又難睇返D。
咁對比起X光有咩好處？好處有二：
1）唔痛：呢個好緊要，照乳房X光，大部分人都痛到阿媽都唔認得。
2）冇輻射：即係可以無限照密密照，當然荷包要頂得順（都唔係好貴㗎姐）。
但其實兩樣野可謂相輔相成，互相補足。如果是但一個玩晒，第二個收咗檔啦。
乳房造影檢查 － 我應該照邊樣？
當你知道基本分別，又到填鴨策略時段：
1）40歲以下，唔可疑：淨照超聲波
2）40歲以下，好可疑：兩樣照哂
3）40歲以上，唔可疑：淨照X光 （公立醫院做法）；兩樣照晒（私家）
4）40歲以上，有懷疑：兩樣照哂
最後呢度叫得做香港本地資訊，梗係要提供啲本地資料：係大型私家醫院照哂乳房X光同超聲波雙拼都係＄1800-2000 （單拼＄1100），仲去乜鬼公立醫院排年幾吖，俾得起就俾千幾啦。
伸廷閱讀：乳房磁力共振（MRI Breast）－我又洗唔洗照吓？
乳房造影檢查報告點樣睇？
「我已經照咗，點知自己有冇事？」
當然最合理就係搵返叫你照嗰個醫生解釋你聽。如果自己去化驗所照咗，冇醫生解釋報告的話，就睇吓自己個報告有冇BI-RADS 結論，有就對住吓自己屬於邊一類，之後跟住做就得㗎喇。（想知多DBI-RADS 結論，請參考乳房葉狀腫瘤，裡面有詳細講）
下一章⋯⋯
相關醫學專欄：乳房檢查三步曲－幫你分辨良性惡性的利器
香港乳癌及乳病治療中心 
你好! 我今年22歲，左右胸經超聲波檢查後發現total有8粒硬塊，公立話因為資源問題，一次只可以抽3粒粗針，抽完報告個3粒野係良性纖維瘤，叫我一年後先覆診。
但因為我仲有5粒係冇抽過，覺得始終未夠check得清楚，所以出去睇私家，個醫生話我仲有5粒，唔可能粒粒都抽，佢recommend我照磁力共振，話可能check到係唔係癌。但我上網睇話MRI係for一d已經證實癌症既病人去照，咁我需唔需要照磁力共振? 磁力共振又照唔照到邊d係癌邊d係良性瘤?
thank you so much! 🙂
咁多粒硬塊，係冇理由／冇可能／冇需要抽曬黎驗。
至於抽邊粒好，通常就揀D「相對」大機會出事嗰D黎抽，即係本身size大／大咗好多／有變化／樣衰／外型岩岩杉杉（irregular border）／多血管生入去（increase in vascularity）等等。
掉轉黎講，本身size細／冇大到／冇變化／樣唔衰／外型順滑（well defined smooth border）／冇血管生入去（no increase in vascularity）等等，係可以唔抽，定期照住就ok。
至於磁力共振，佢係會比到多D資訊我地描述粒野係點，從而決定抽唔抽組織。不過磁力共振始終有佢嘅局限，就係「過份」靈敏，即係你冇事佢都話你有事。因此我地係唔會隨便照磁力共振嘅，通常以下情況會照：
1）已確診乳癌，打術前化療，用黎跟進住進展。
2）打過野隆胸，乳房X光造影／超聲波花鬼曬根本睇唔到，就要用磁力共振去睇睇。
3）乳癌基因突變（BRCA1/2），高危復發病人，除咗定期要照乳房X光造影／超聲波之外，仲照埋磁力共振黎監測。
4）我地高度懷疑乳癌（例如癌指數好高／PET scan著燈），但乳房X光造影／超聲波完全正常，咁就用個超靈敏嘅磁力共振去睇吓係咪真係冇野。
你描述嘅情況我睇唔到以上常見照磁力共振嘅理由，我傾向相信公立醫院醫生一年再照乳房超聲波已經OK。
良性纖維瘤，知道安全了，你重要再檢咩呀！
Hi 你好
我上禮拜剛做完MRI , 報告顯示也是良性的。不過我看完你上面的post , 我有一些問題，十分希望你可以解答：
我照超聲波發現我2邊乳房均有十多粒的粒粒。我把超聲波報告（報告的impression 是屬於良性和纖維瘤和良性）帶到一位㷌科的醫生。
她說可能有些地方看不清楚，於是幫我免費做多次超聲波。
做完之後她說太多粒粒，很難決定抽那一粒的組織，所以建議我做MRI . 而且醫生也說有些是「唔靚仔」，不平滑。當時很驚，於是很快安排做。
MRI 的報告屬於良性，不過這位醫生也建議我2粒做抽針。
其實現在我看完你上面的comment , 我有想過這位醫生是否太輕易叫我去做MRI 呢? 因為超聲波的片也屬於良性，其實單看超聲波是否真的不夠呢?
我有一種被㧪＄的感覺。
可否建議一下你的意見呢?
好難講實超聲波係咪足夠／實際有冇需要抽針，要視乎你兩個報告係BIRADS幾／詳細點寫？
你個case我見到幾個邏輯上嘅疑問：
1）超聲波既然話覺得係良性，婦科醫生根據咩原因覺得「可能有些地方看不清楚」？如果係咁，咪永遠都有呢個「可能」，永遠翻照落去？
2）佢翻照完之後，一方面「很難決定抽那一粒的組織」，但另一方面又話「有些是『唔靚仔』，不平滑。」。咁點解唔抽唔靚仔嗰D？咁咪搞掂曬囉？
3）最尾MRI 的報告屬於良性，不過今次又「建議我2粒做抽針」。用返上面超聲波嘅經驗，咁今次佢又點決定抽邊一粒呢？
至於係咪呃你錢，呢個問題太敏感，我唔方便／唔合適／唔應該作答。
請問幫你檢查的醫護人員是男是女呀！
醫生當時的意思是MRI 更能她確定那一粒值得抽。
不過我明白，自己也有責任多問幾位醫生的意見，當時好怕有事，想快快知道結果。也沒做太多research .
我會先拿MRI 的report 問多幾位醫生的意見。
多謝你的回覆，希望你在此繼續幫助和祝福更多人。
都唔關你事嘅，好多時驚起上黎就會好倉促做決定，而家要做嘅就係去揾乳腺科醫生睇睇，睇吓MRI究竟係話良性唔洗抽，定係有一兩粒唔靚仔要抽組織。
報告出來了 請問這要怎麼看？
The parenchymal echotexture of both breasts appear normal.
No focal solid or cystic lesion can be detected in both breasts.
The mammary ducts are not dilated.
Both axillary lymph nodes appear not enlarged.
報告完全正常。
但是我摸得到乳房有野 都幾大下 當時照超聲波個醫生就話是乳房發育的時候不同的組織會有軟有硬,請問這是什麼意思？是否代表不用抽針、做手術？這樣出現在乳房的東東是怎麼來的?
呢D要問返自己醫生。
你好，最近發現右邊乳房有硬物，睇醫生初步照，有個3 cm的物體，話中間有液體但又有d雜質，要照入院ultrasound，同埋建議我照完就做埋手術。一講到做手術就好驚，見到d人話抽針都可以check 同抽出黎？其實點決定抽針or 直接做手術？
好多因素會左右決定，好難一刀切咁講幾時抽針，幾時直接做手術。如果唔想直接做手術，可以問吓自己醫生抽針先得唔得。如果唔得，就問清楚局限喺邊度。
Thanks for having this blog to help all of us. 我近50, 近日發現右乳房附近好像有硬塊, 但是在M期間, 去看醫生,她也發現有, 我有說正在M,但她沒有表示. 請問M期間有硬塊是否沒問題? 這2日(M後第5日)又好像細了一些. 其實又好像一直都有, 不太在意!
我沒有家人有breast cancer
另,我將照乳房造影和超聲波, 是否要在M後一星期才可做? 謝謝.
唔可以簡單立論話月經期間有硬塊等如沒有問題。
只可以話月經前乳房易谷谷脹脹，特別易覺得有硬塊，其實本身冇野嘅。不過另一方面，有乳癌硬塊的也會有月經來的（當然講緊未收經的女性），只不過咁啱得咁橋嗰時摸到／發現，所以唔可以單純話幾時發現硬塊便推論有事定冇事。
乳房造影和超聲波唔一定要月經後先做得，因為好多時都夾唔到。不過如果夾到時間，黎完經先照會舒服D（X光夾得冇咁痛），同埋超聲波易睇D。
hi,想請教我宜家應該點做：
1.我媽咪系50歲左右發現有breast cancer（乳管內），發現時非常早期（by體檢），手術后已無事。於是我幾乎每年也去做一次超聲波乳腺檢查。因香港排期/費用/方便等原因，我每年都去廣州照（很top醫院，機器同香港一樣~有相熟的醫生，安排比較方便系其中原因）
2.我今年31歲，正準備要BB狀態，系今年體檢（上星期）發現右胸有一處低迴聲腫塊（by超聲波），大小約6mm X 17mm. 醫院評定BI-RADS 4級。去左三間醫院，醫生都摸唔出任何異樣，唔系俾醫院看超聲波結果，他們都唔信（有一間直接形容我胸部無咩肉，有異樣就好容易知道….算，唔計較尼D了..)，我本人亦無任何感覺，但知道結果之後好多疑問同好驚!
3.返香港即刻book左醫生，但系都唔系即時有得見。宜家想冷靜落來整理思路，請俾俾意見，感謝：a.內地醫生認為要做MRI進一步排查，畢竟BI-RADS四級。如果系良性，就直接手術拎出個腫塊。總之就係，良性or惡性，都需要手術。我想問，去到咩情況需要手術？b.香港似乎唔系個個case都有需要做MRI。我宜家應該點做？再做一次超聲波？跟住做MRI？乳腺x光因為輻射太大，我有些疑慮，x光是否是must要做？
4.sorry，思維比較混亂，之前都系做體檢以預防，完全無計算過如果中招的日子，應該點做，又從邊度做起！哎~~~我上網check，私家乳腺專科醫生就book左浸會，超聲波就book左非牟利機構旗下的一間診所（個期比浸會早幾日），請問仲有咩資源可以介紹，or我宜家應該點樣做？
睇得出你好擔心，不過放心，你個情況其實並不複雜。
首先你現在面對的是一個摸唔到，不過超聲波覺得可疑BIRADS4的陰影。下一步要做的就是超聲波睇住黎抽粗針（Ultrasound guided core biopsy），去搞清楚有野定冇野。
細果只有2個可能性：
1）有癌。咁就乖乖做埋所有所需的乳癌治療。
2）冇癌。呢個時候睇吓你介唔介意做手術。如果唔介意，係會建議切咗成個陰影去百分百確定冇癌（因為怕粗針抽唔中癌的部分）。如果介意做手術，咁就去做埋乳房X光／MRI攞多D資訊去支持你唔做手術的決定（當然，X光／MRI結果係可以都係建議你要做手術）。
非常感謝你的回覆：）聖誕當日，心情非常複雜又沮喪，很幸運google到你的website，得到你即時的安慰同解答，很幸運很感恩，多謝你醫生！
您系一位好醫生！真正醫者父母心！作為一遇到身體不適/檢查有懷疑/治療方案模棱兩可自己看不透就會懷疑人生驚餐飽的普通人，真心多謝您的善良同醫德！其實很希望，您能告知我您系邊間醫院的醫生，我可以排期去穩您幫我治療。當然我理解您的不方便之處，只是嚮往美好的期望。
今日再次認真爬文數篇，了解更多，更加想感謝你！例如我安慰左為我擔心到訓唔到食唔落怪責自己遺傳bad gene俾我的媽媽，其實並非她遺傳我，唔好再怪自己。（按醫生您的介紹，早發病（45歲前）系家族遺傳基因的分水嶺，我媽媽系49﹣50歲因體檢而發現導管原位癌，切除后至今已8年，每年檢查都保持得唔錯，家族中亦無其他女性患此病）。以及對比左公立同私立醫院，衡量過自己的荷包實力。當然仲有scan自己的保險，哎，真系學到好多野！講幾多句多謝都唔夠，很想請你食飯點算！！！！
anyway，最sad系見到你的告別文字，心中真系猶如被棒擊！即便我們多麼不捨得，人的確不能完全理解另外一個人的難處與處境，我相信醫生您的選擇和判斷定是對自己的負責，一切都是最好的安排。為您祝福和祈禱！內心保留希望你快回來的小小願望！
最後，祝你聖誕快樂，新年快樂：）當然也祝福我自己，平安健康！再驚都無用，對現實無幫助，冷靜落來想辦法想對策，努力后希望是好的結果！如果可以，請允許我偶爾繼續留言，待醫生方便時，指點一二就好，感謝您！！
lee~
大家有緣在網上相遇是一種緣份，雖然我地暫時分開，但你地嘅留言我係睇到嘅，佢地係對我最大的鼓勵。當你地有困難時，我總會出現在附近，放心。
醫生，新年快樂呀：）
雖然系2015年最後一日(啊，宜家已經過左12點~~），我更願意同你分享快樂（例如我份新超聲波報告好靚仔~），可惜小小事與願違，更添一點疑惑，希望醫生能幫幫我。
截止目前，我睇左三間醫院。C醫院（私家）今日出左超聲波報告。三間醫院幾位醫生系第一部曲臨床手檢部份，都摸唔到，出左報告對住報告所講位置再摸，亦摸唔到。我本人無疼痛等任何反應，唯是內心迷茫，淚在心里不斷流….
Report:
Both breasts have normal parenchymal echogenicity.
They are symmetrical in size.
Hypoechoic lobulated lesion is noted at the right breast 8 o’clock position periareolar region.Mild increased vascularity is noted.It measures 1.13×0.55×0.93cm.
An oval hypoechoic lesion is noted at the left breast 12 o’clock position 2cm from nipple,measuring 0.72×0.33×0.64cm.
No abnormal acoustic shadowing is seen.
No nipple retraction or skin thickening is evident.
Bilateral axillary lymph nodes are noted,measuring 1.11×0.66cm on the right side and measuring 1.26×0.86cm & 0.93×0.50cm on the left side.
Impression:
1.Lobulated hypoechoic lesion at right breast 8 o’clock position periareolar region with mild increased vascularity . Tissue diagnosis may help.
2.Oval hypoechoic lesion at left breast 12 o’clock position 2cm from nipple could represent fibroadenoma or fibroadenosis. Follow up study may help.
3.Bilateral axillary lymph nodes are likely reactive in nature.
﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
三年半前，A醫院報告我右乳8點位置有大小8mmX5mmX6mm低迴聲腫塊（當時都系摸唔到），邊緣規則，少量血流信號，考慮纖維瘤，建議每年隨診，無BI-RADS分類。
三年半后，即系今年12月中，A醫院再報告：右乳8點位置12mmX6mmX12mm，邊界唔系太靚仔，血流信號豐富，今次有俾BI-RADS，仲要俾4A級！B醫院相似結論，右乳9點位置，大小系6mmX17mm，但邊界清晰，無血流，BI-RADS都係4級（？）。
兩間醫院系今年12月中，都無檢查出左乳有異常，而今日C醫院就話左乳都有（啊，點解啊！哭！）
今日C醫院醫生建議：左邊靚仔d，右邊肉酸d，根據C醫生多年經驗去判斷都系屬於良性，安慰我同我媽媽唔好太擔心（我媽媽真系好慘，尼排為我擔心到心臟出事，要去見心臟科..唉..一朝被蛇咬…可憐天下父母心！）。C醫生建議我要去抽粗針confirm，如果良性就唔理，因為它太細而且有機會會再生，如果惡性就大家再坐低慢慢講。因為有睇醫生你篇文章教落，一份超聲波報告若無BI-RADS分類，等同於廢，雖然我見到個RAD醫生簽名有FRCR FHKCR FHKAM。當時有問C醫生份報告系BI-RADS幾級？醫生話尼度唔興尼D野。C醫院抽粗針，一針6000，有D貴，而我最怕萬一系壞結果，就要即刻做其他治療包括手術，而我無咁強大的荷包一直留系私家做，唉，人窮面子薄，C醫院醫生直接同我講，如果我系其他地方抽粗針就唔好返來見他啦，之後如果要照超聲波follow up都要留系C醫院做，他唔信其他醫院report，費事report唔同造成理解困難，於是我連叫他幫手寫封轉介信去排公立都唔夠膽即場講。想請教醫生：
1.如果系其他地方做粗針，譬如公立，是否ok呢，會導致結果唔準確嗎？以我目前情況，大概會排幾耐呢，我個病情是否可以承受得到？（我其實唔介意做貴D但快小小知道結果噶粗針檢查，我系驚我份粗針結果唔系政府做，之後再排隊會很慢，又很可能再撞正醫生唔like外院report，sigh~）
2.若良性，是否唔搞好過搞？C醫生話有機會再生，唔通要每幾年割一次？天啊!！我明白用微創手術方法，拎成個腫塊出來做冰凍切片系最精准的確認方法，但只限於良性先可以微創對嗎？
3.超聲波報告可以分辨葉狀腫瘤嗎，還是要等粗針or微創手術結果？我今日的report結果有這樣的擔心嗎？
4.若惡性，無擴散可以選擇保乳嗎？去到幾worse先要全切除？……驚到已經打唔到落去了，幾乎睇完醫生你所有文章，但系心理準備都係太脆弱…
5.因我早前一路系備孕狀態，身體檢查前都有做家庭功課，所以到今日仍未知是否本月懷孕，所以粗針以及微創都想等多幾日。想請問醫生，良性結果的話，手術後幾耐可以繼續要BB？有無咩注意事項？
6.右乳就需要粗針確認同微創手術等等。咁左乳呢，是否都需要抽針呢？
非常抱歉打左咁長篇，其實我非常擔心會阻住醫生你寶貴的休息時間，尤其系新年期間。尼篇野我從9點半打到宜家，中間修減左三次，又del左數次….最後都係決定寫落來，當系幫自己梳理埋思緒同情緒，希望醫生唔好介意，您早前已解答我很清晰很直接，我會按您的建議來做。只是可否參考今日的report結果同埋我個人小小情況，俾多一點建議我。感謝您：）
再次祝新年快樂，祝願2016平安喜樂：）
LEE
C醫生話佢嗰度唔興BI-RADS呢D野，我地又睇吓香港放射科醫學院（Hong Kong College of Radiologists）2015年8月發表的Mammography Statement 點講：
https://www.hkcr.org/templates/OS03C00336/case/lop/HKCR%20Mammography%20Statement_rev20150825.pdf
第5頁佢咁講：
我嘅結論係BIRADS喺寫乳房造影報告嘅業界標準，唔係韓風潮流玩物講時唔時興。
1）只要係合標準的地方抽粗針就可以了，公立醫院係其中一個合標準地方。結果理應準確，不過任何採樣檢查，都有假陰性（false negative）的可能性發生。如果你轉介信寫明BIRADS4，係會有優先權，不過幾耐睇要視乎嗰間醫院本身條隊有幾長。只要合水平的報告，所有地方都會接受的，唔到醫生like唔like。
2）如果抽針係良性，你面對的就是一個檢查結果唔一致的問題。乳房造影話可能有野，抽針話冇野。呢個時候睇你個人取態，寧枉毋縱的就做手術／微創切曬佢黎百分百驗清楚，寧縱毋枉的就觀察住定期覆檢／照MRI。（注：微創、冰凍切片、最精確之間冇關係，你句句子是錯的。）
3）超聲波有可能看出葉狀腫瘤的端倪，但確診還是要等手術結果。你的報告係有可能係葉狀腫瘤。
4）乳癌手術 2 － 保留乳房手術 ，我做唔做得？
5）如果係良性，可以隨時有BB。
6）左邊唔可疑，可抽可唔抽。
hello,醫生~未過正月十五，依然都要講句新年快樂，祝您新的一年，事事順意，身體健康：）
多謝你之前俾我的信心同資訊，從12月12日恆常年度身體檢查后，歷經無數心理障礙同疑惑，終於做左以下醫療安排：
1.超聲波檢查為BI-RAD4a，右乳乳頭8點位置，但臨床完全摸唔到。
2.考慮抽粗針，但亦考慮到萬一粗針只抽三點而偏抽唔中，又或者抽到系有問題，都係要進行下一步。參考醫生你的建議，唔介意做手術可以考慮做手術，於是我考慮手術。
3.考慮開放式or微創手術。入院先做MRI檢查，以落實用邊種手術方式。誠然，微創會美觀同創傷性低些，但要視乎MRI結論，綜合考慮是否適合做微創。
4.MRI結論同超聲波一致，同為BI-RAD4A，建議考慮良性。醫生綜合考慮后，認為良性程度高，於是建議微創手術，抽取全部腫瘤做化驗以確診。
5.手術進行順利，但過程中醫生偶爾自言自語「哎，太靠近乳頭了，再切多d乳頭就無了」，這裡埋下我擔心的種子。
6.術後，主刀醫生表示按其臨床經驗，切出組織大部分肉眼睇都不錯，似良性。唯有一條有硬質感，感覺十五十六，告訴我一切以化驗結果為準。
7.第二日，快速冰凍結果出：發現導管上皮不典型增生，冰凍切片不能確認，建議做石蠟切片以及免疫組化檢查。當時真係低落谷底，不典型增生，算系原位癌的前一步嗎？我的天啊！！
8.等左差不多1個禮拜左右，石蠟結果同免疫報告一起出。醫生，以下系我的手術的最終結果，請幫我看看，現階段我應該如何做，可以做D咩幫自己？
石蠟切片報告結論：（右側）乳腺導管內乳頭狀瘤及腺病，導管上皮不典型增生，並見鈣化。
免疫表型：ER(90%+), PR(80%),HER-2(0),CK5/6(-),CK34β E12(-),E-cadherin（＋）,Ki-67(<1%+)。p63，SMA顯示導管周圍肌上皮完整，導管內部分缺失。
建議：每半年隨訪。
9.手術醫生未詳盡解釋個報告，只話俾我知，無事了今次，但要定期隨訪，超聲波MRI都要做。同埋，她認為今次好彩系直接做手術抽出來檢驗，粗針三下應該很難抽中有問題果部分。
10.以上，系我這一個幾月的醫療過程。醫生可否幫我睇下份石蠟以及免疫報告，有咩我可以幫自己？以及手術醫生都提到，因為個腫瘤位置太靠近乳頭，她已盡量去切，但如果範圍再大D，乳頭就無了。我有問紙口位留得夠唔夠，她回答當時超聲波下睇唔到了，但如果系傳統的開放式手術，她一定會再刨清d，微創她已經做到最大化去切了。請問，我有無需要再補做一次傳統的開放式，以求切多D？？ 其實宜家，手術后不足一個月，我乳頭下方位置仍塌陷ing，原本右乳就只有小B杯，現時望落去好可憐，哎，心酸。
11.石蠟切片我已借出，請問醫生我有無必要再向其他醫院申請化驗檢查？以及我今次系非政府醫院，鑒於我人生日後每半年就要follow up check，是否系政府排期好D? 恕我問一個「蠢」問題，我家離瑪麗醫院較近，可否排它？
12.醫生，對唔住呀，我又寫長文了。誠懇俾個機會我日後可以請你食飯補番：）上次我話希望講個好消息你聽，今次我都唔知算唔算好消息，哎~~我很感恩，感謝主，感謝身邊所有的人，感謝所有為我努力的醫生護士，感謝素味蒙面但很信賴的你！再次，祝你新年快樂：）
乳腺導管內乳頭狀瘤（intraductal papilloma）及腺病（papillomatosis），導管上皮不典型增生（atypical ductal hyperplasia），附近係可以有癌細胞隱藏的。已經做咗微創盡刨，究竟做唔做多次手術冇一個明確優勝答案，要視乎以下兩個因素：
1）負責手術的醫生究竟幾有信心刨得已經足夠：佢好有信心覺得夠清，就傾向照住觀察。佢冇咩信心都覺得蚊蚊地，就傾向做多次手術。
2）同埋你有幾介意做多次手術：唔介意有可能再下陷多D，做多次手術。好介意外觀，觀察。
你信得過呢間醫院，就唔洗去搵其他病理科醫生覆檢石蠟切片。你信唔過呢間醫院，就先去搵第二方意見。
排唔排政府視乎手頭資源，官方建議係跟自己所住區分去排，現實係可以跨區的。
感謝醫生，多謝您的回覆：）
醫生新年快樂，假期愉快：） 多謝你咁快回覆我，非常感動！！！
當我聽到C醫生咁講BI-RADS，已經即場諗起你的教導，宜家再次得到你回覆確認，我決定唔系C醫院抽粗針了。作為一名普通的病患，我好尊重醫生，亦相信他有他的道理，但最基本我希望自己份report可以有科學性以及被廣泛接納性，唔系只only for某一位醫生睇。
感謝你俾我的好建議，理智上我已大致梳理明白我即將要做的準備，只系情緒上還未能完全接受得到，從12月12身體檢查到今日，只不過半個月時間，卻彷彿真系跨左一個年咁漫長。我會積極面對，寧枉勿縱應該系好的人生態度，分析＆平衡后自己即將要面對的各種情況，心中有份淡定。希望下次可以同你分享好的消息：）
謝謝你聽我講，又俾意見我，非常感謝！愿愛同信念一直與你同在：）
with LOVE and THANKS，
LEE
醫生你好!
本人今年45歲，最近因買保險作了身體檢查，醫生觸診發現一邊乳房有一硬塊，再做了超聲波檢查，因檢查務保險公司安排，照超聲波後醫生並無任何說明，我是後來經保險公司取回報告才知結果。
報告指我兩邊乳房共發現八個 well-circumscribed oval or lobulated hypoechoic nodules.其中兩個大於1cm(小於1.5), 三個小於0.5cm。Sonographic appearance are probably benign, may represent fibroadenomata, focal fibroadenosis or cysts with thick content.
報告結論是BI-RAD 3.
想請問我下一步應怎樣做?
是否需要抽針?
帶同報告看家庭醫生,請他轉介專科或政府醫院跟進?這種情況政府要排多久?
是否可自己直接找專科醫生? 醫生你的網頁說乳腺外科並非正式認可專科分類，如何可得知醫生專攻此科?
還是直接等六個月後找化驗診所再照超聲波?
因沒有醫生講解報告，雖然得知患癌機會不大，但仍然有點不知如何是好。上網搜索時發現這網頁，感受到醫生你的熱誠，冒昧求助。先謝謝醫生你費心。
乳房超聲波報告描述屬良性，可以選擇抽針或者觀察。無論選擇咩都好，點都搵返個乳腺科醫生跟好D。保險公司只照而冇任何解釋或跟進，點講都唔係一個負責任行為。
想去政府醫院跟進就叫家庭醫生寫轉介信，你個情況要有心理準備有排排，因為乳房超聲波報告冇任何可疑／急的重點。
如果想睇私家，就要靠人介紹先知邊位醫生專攻乳腺科。
唔建議自己直接搵化驗所再照，因為今次的問題（照完冇解釋／冇跟進）會再次發生。
謝謝你的回覆。
身邊朋友都好像沒這方面的求醫經驗，上網看了些資料，初步決定直接到私家醫院的相關專科門診就診，相信那裏醫生應有相關經驗，亦無須轉介。
麻煩你了。
你好，我做了乳房ultrasound 右邊有一粒irregular hypoechoic lesion 1.15cmx0.82cmx1.23cm. 約了外科醫生將做檢查。但見到自己右邊腋下淋巴位係比另一邊腫。ultrasound report 有話the axillary regions are remarkable 但係非常擔心。請問淋巴位一日未做手術都未能確定有無問題嗎？
Ultrasound report suggest 做FNAC，如果外科醫生無提，有須要問是否應做粗針嗎？明天檢查，很擔心。麻煩你，先謝謝你花時間回答。
你指remarkable 定unremarkable?
淋巴最終結果以手術為準。
Ultrasound report寫得irregular，唔好抽幼針喇，直接抽粗針啦。
係unremarkable. Sorry 心太亂。好擔心係咪大可能有問題？
佢話unremarkable 即係照嗰個覺得冇問題。
如果淋巴受影響ultrasound 是會睇到的對嗎？淋巴照ultrasound 會有不同照法還是只有一種？淋巴覺得酸軟算是痛嗎？我明白沒有absolute 但想知呢個combination (irregular lesion + 淋巴見到腫但ultrasound話unremarkable）大唔大risk?
另外想問如果irregular, 代唔代表無論抽針結果係點，都會係手術切除再化驗先至可以安心？
唔好意思可能問得好唔科學但心很亂，多謝你回答。感激
淋巴受影響ultrasound可以見到，又可以見唔到。
淋巴照ultrasound沒有特別照法，只有照得夠唔夠仔細嘅分別。
酸軟就係酸軟，痛就係痛。兩者同有冇抗散可以話冇關係，指示性好弱。
Irregular可以話手術無可避免，抽針結果會影響手術幅度。
請问我可否在這方塊內问问题呀？我不肯定怎樣可以進入与医生对話！
就在這兒發問。
Dear Breast HK Dr,
最近做了Mammogram and Ultrasound 檢查, 報告發覺左乳房鈣化點比前二年
多左, BI-RADS 4B, 建議x-Ray 下 抽粗針.
抽粗針報告是 benign breast ducts and lobules with adjacent fibrofatty stroma;
Features are consistent with fibroadenosis with microcalcifications. 不是惡性.
乳科醫生說雖然抽粗針報告不是惡性.,但Mammogram報告是BI-RADS 4B,
安全D 叫我做乳房CT Scan, 可以360度照,左邊加顯影劑,右邊就咁照.
上網找過, CT Scan輻射勁多, 加上我舊年因肚痛,全腹腔照過CT Scan,
今年又做乳房x-Ray; 又x-Ray 下 抽粗針, 因怕累積太多輻射返而會影响生Cancer
(1) 現非常煩惱做吾做CT Scan, 請你比D意見我. (2) 如吾做, 可否未來只keep住檢查呢? 謝謝!
唔知你有冇搞錯／理解錯醫生嘅建議，乳房係唔會照CT scan嘅，CT scan最薄一個cut一般為5mm，就算high resolution CT一個cut都起碼1－2mm以上，而微細鈣化點係細過1mm，即係D鈣化點好有可能在片與片中間「被消失」了，所以CT係冇用嘅。
另外CT嘅顯影劑係打落血管，而乳房就一齊照，並唔可能「左邊加顯影劑,右邊就咁照」。
Dear Dr Breast HK,
多謝你的回覆, 咁我不用考慮 CT Scan了.
你好！
我今年25歲，上個月中發現右邊乳房11點位置有硬塊
今日係公立醫院做左抽粗針同超聲波
醫生話個樣似係良性腫瘤 因為外形比較靚仔係係鵝蛋形 但我見到入面有啲白色既陰影 同埋有流血信號
但當時大驚又問唔到醫生啲咩
其實我想知有流血信號代表啲咩？
同埋因為屋企父母家族加埋都有五個親戚患乳癌（幾個姑媽同姨媽）30-40歲時有乳癌咁會唔會增加左風險？
同埋最近兩星期覺得背部好痛 有時會好似針吉咁
又會唔會有關係呢？而我自己摸到液下淋巴有兩粒好細粒既硬塊 但今日照既時候又照唔到 點解會有咁既情況？
唔好意思太多問題 不過實在有啲困擾
先感謝你耐心閱讀我既提問！
超聲波?面的細節交返比醫生，醫生嘅經驗係日積月累睇成千上萬嘅超聲波得返黎，唔係你睇第一次就會識。
流血訊號（vascularity）唔代表乜，所有生的組織自然有血到，過量的流血訊號（increased vascularity）代表嗰度生長得活躍。
家族多人有乳癌兼早病發，係會增加你有乳癌的風險。
背脊痛多數唔關乳房事，除非你粒野係乳癌而又擴散去骨，呢個可能性好微，唔好自己嚇自己先，抽針報告一出就水落石出。
你摸到腋下兩粒野，但又照唔到，9成係自己唔識摸，1成機會醫生遺漏咗。
多謝你咁快回覆 聽完你咁講個人都定啲
醫生你好, 媽咪上星期做左ultrasound, 報告如下:
An inhomogeneous solid hypoechoic nodule is seen at the 2 oclock sector, 3cm from nipple, measuring 1.4×1.2×1.7cm. The lesion is homogeneous and ill-defined. Relatively fixed underneath the skin.
The axillae are clear.
現在等緊抽針, 想問下….
1. 點解份報告一時又 inhomogeneous, 一時又 homogeneous, 代表啲乜?
2. 依照上面咁睇, 我媽咪屬良性或惡性機會大啲?..
3. 上面報告係咪代表淋巴暫時無事?
4. 根據呢個報告… 擴散器官機會大嗎?.
謝謝…
1）我諗打錯字機會多，同你發現問題一樣，前後自相矛盾。
2）粒野可疑的，佢話相對痴住皮。
3）初步淋巴冇腫脹，如果粒野真係惡性，就睇埋PET scan。
4）冇得咁樣估，佢只係照乳房，係唔會話到非乳房情況。
醫生你好，我是男性，今天26歲，在一個前發現左邊乳房腫大，按落去有硬塊，用力按會痛，有時會脹痛，沒有分泌。早前去急症看，醫生沒有明確說明是什麼，只是轉介去專科，要排期等一年時間。這等太久了，我應該是去看什麼科？還有上網爬文看到可以用超聲波檢查，現在不知道怎麼辦，我要去那裡看，請幫幫忙給我一點意見！謝謝！
男人都係一樣睇外科乳腺科，等唔切就去私家。
你好，我今年22歲，前幾天突然發現右邊乳房有好小量液體出現(唔係血). 自己嘗試檢查左一下，睇落正常，兩邊乳房外側摸落都硬(內側無這個問題)。唔係一粒粒，係一片硬的。想請問係腫塊還是乳房組織?雖要去睇醫生嗎？
Thank you so much.
唔可能單靠你的描述去做一個判斷，只可以話有擔心就去睇乳腺科醫生。
剛照完超聲波醫生評為4A級，抽了粗針評為良性，醫生說兩個做法：1. 觀察6個月再跟望，2.做微創手術，而醫生的建議是做微創拿走，請問我應該做手術嗎？
補充：6mm大
當乳房造影同抽針結果有出入時，大多數我都會建議做手術去作一個了斷，因為始終寧枉毋縱的態度，相比起寧縱毋枉，更能駛得萬年船。
I used to have fibroadenoma in both breasts since 17 yrs old. There was a lump with pain (superficial) in my left armpit but it disappeared after few days. Would it be a concern or anything related to the lumps inside my breast?
Resolved spontaneously usually represents benign pathology.
Hi, I just performed ultrasound and mammogram today and there is a 0.8 x 0.5 x 1.2cm palpable oval hypoechoic solid nodule with echogenic striations is detected in the subcutaneous fat layer at the 12 o’clock of my left breast, but probably it’s benign. The doctor say 抽針 may not work well based on such size, so if I really want to know if this is benign or not, I may conduct an excisional biopsy.
Is this a reasonable comment?
The conclusion is reasonable, but the reason behind is not correct.
Judging from the size, it is feasible to perform fine needle aspiration or core biopsy. However, as the lesion is located in the subcutaneous fat layer, it is likely a fat lobule (which is difficult for pathologist to comment on the nature base on the biopsy result). In this sense, fine needle aspiration or core biopsy may not work well.
醫生, 你好。我想問問… 我近幾日period..發覺左胸上方骨位痛, 因為擔心系個胸生野, 所以去左睇家庭醫生。佢觸診之後，就話完全摸唔到有瘤，話系我胸骨發炎，俾左D藥我食。但我仲系唔太放心，所以book左聽日去醫院照超聲波。
我想問, 如果聽日照ga時候真系照到有野, 醫生系咪會話我知有野架? 定系一定要等報告出左佢先會答我呀?
我好擔心…
睇你際遇。兩種情況我都見過，有D醫生好好會即刻話比你知，有D醫生就講多句都廢事。
謝謝你呀DR. Breast HK
我琴日去醫院照左.. .個醫生幫我照完之後話一切正常，然後叫我星期一再番去聽外科醫生講，順便問埋佢點解胸骨痛。
甘D個超聲波醫生話照五到有生野，系咪就代表我個胸真系正常啦??
淨照超聲波準確度大概8成。
甘我需要照埋X光嗎?
但醫院果方面就唔建議我照X光..佢地話甘後生, 照完超聲波+摸過都冇野…
其實定系我自己諗得太多.. 因為D幾日D骨成日痛, 總系覺得有事甘..
但琴日醫生照埋淋巴, 都話搵五到野..
如果後生，超聲波已經足夠，唔需要X光。
[…] 這是我在“香港的乳癌治療資訊”看到的總結，精簡有用： […]
醫生 你好
1）40歲以下，唔可疑：淨照超聲波
點樣為止唔可疑啊？？
25-30 歲 係咪 超聲波都足夠?
需要做臨床嗎？
醫生問完病歷做完檢查，先可以斷定可唔可疑，呢個係一個專業判斷，唔係自己决定到。
醫生你好，我係廿歲，準備想搵身體檢查下乳房，因為我媽媽，和媽媽的三個妹妹，都先後生過乳癌。咁我應該都算高危的，咁如果我只係照超聲波，足唔足夠呢？
廿歲足夠。
你好，本人37歲，本月初經期第一天，瞓低突然覺右胸內側下痛，自己摸不到硬塊(又或是不識摸)，深呼吸，咳嗽，打乞痴時都會特別刺痛，大概8天後冇乜痛便沒理。前幾天發現右腋下凸起，摸到裡面有硬塊(舉高手才有，但這不是最近才有的，實際多久不太清楚，但肯定超過1年)，只是因為右胸之前疼痛，才聯想到是否有關連，以前沒多為意，還以為兩邊都一樣。
非常擔心是否有問題，於是約了私家醫生檢查，同時也預約到政府門診。政府醫生說摸不到硬塊，說那是肌肉，左邊也有，而深呼吸時胸痛是肋骨問題與乳房無關，也安排了照超聲波，但排期在6月。。。然後也看了私家，醫生摸到我痛的地方有硬塊，安排下星期照超聲波(沒安排照x光)，我聽到有硬塊非常擔心，醫生說要等報告才知，只說多數沒事可能是纖維瘤，現在很擔心不知道是否得了惡性腫瘤，腋下凸起又會否是乳癌淋巴轉移……
(現在的症狀是右胸痛(但搞不清楚是肋骨還是硬塊痛)，右腋下凸起(大概1毫子大小)，右邊乳房比左邊小，而其他症狀如乳頭凹陷，乳頭流血/流出液體，皮膚改變等都沒有)
Ps，我有濕疹十多年，不算太嚴重，每到夏季才發作，多流汗的部位會痕癢，腋下多汗有時甚至紅腫，不知與腋下凸起有否關係呢～
不好意思留言很長，因為很擔心患上乳癌…
照了超聲波便一清二楚。
完全明白的，只是等待的日子很煎熬呢～~心裡總是忍不住向壞處想,很怕自己得了惡性腫瘤而且擴散至淋巴……不好意思打擾了，謝謝你先前的回覆。
你好,
如照X光有鈣化點(4b), 而超聲波唔可疑, 提議夾胸抽組織, 大約幾錢? 有其他選擇嗎?
thanks.
私家第一個病灶$12000，其他選擇就係做微創／手術。
Hi 你好,
另外, 如乳房造影評為4B級, 是否不論抽針結果怎樣,
都是最好做手術, 是不是直接做手術比較化算? SORRY, 因為實在能力有困難.
謝謝
無論抽針結果如何，最後尾好大機會都要做手術。至於係唔係直接手術比較化算，則要醫生評估，人人情況唔同。
你好,我28歲,因為左右乳房都照晒超聲波,確定左有約10粒既乳腺纖維瘤.
朋友話種情況既人7-8成機會都有伴隨子宮都會生瘤,建議我盡快去做埋子宮超聲波,
我想問下係咪真架呢? 實在係好擔心…..
兩者沒有任何有意義關聯，我地「唔會」一見到病人有乳腺纖維瘤，就叫人照子宮。
左右乳房都照晒超聲波,確定左有約10粒既乳腺纖維瘤.
咁食避孕藥有無影響,會唔會刺激到d瘤?
避孕藥有機會令它變大。
醫生你好，請問照得多X光同搭長途飛機會唔會增加患癌機會？特別係風險較高人士。定係一年搭兩三次長途影響不大？謝謝你！
照得多X光同搭長途飛機都係有輻射，不過同致癌的水平相距很遙遠。如果撘兩三次都有事，機師同空姐咪死得？
請問下普通檢查時醫生建議去做ultrasound, 轉介紙寫“irregular mod…” ,睇唔清楚，約左個星期後做ultrasound
依家好驚
咁係唔係惡性機會多d
冇得憑你睇唔清楚的資料去評估的，照咗先。
你好，啱啱診所打黎話報告有不明硬塊， 要約醫生覆診， 再跟進
想問下其他實超聲波是否已排除硬塊是纖維瘤?
很擔心
謝
超聲波可以有初步印象，最終以抽針為準。
你好！我右胸摸到一粒硬塊睇咗醫生照咗乳房造影右邊四粒，左邊三粒，右邊最大果粒抽粗針確診原位癌，醫生提供兩個手術方法，1局切，2全切，但係醫生又建議我去俬家將其余幾粒都抽針檢查清楚係咩先決定做邊個手術（因為政府冇可能幫我抽晒咁多粒），睇你上面回復提到咁多粒都冇可能粒粒抽哂，咁嘅情況我決定唔到做咩手術，最後醫院幫我再左右各抽一粒，報告出來後係癌嘅唔使煩切晒佢，但係如果唔係癌我都幾頭痕，右邊局切又擔心其余幾粒如果係癌點算？全切又驚蝕抵咗，又要考慮左邊要唔要切埋佢？請問醫生有冇試過咁嘅案例？做法又係點？
作爲病人冇專業知識又點識揀治療方案？傷風感冒得多先話識得食咩藥啫，而家講緊癌症、手術哦！一個普通人識咩呀醫生，叫我點揀呢？
同意冇可能抽曬咁多粒。呢個時候可以考慮MRI，如果話有野，就全切。如果話冇野，就可以局部割。
本人27歲 我兩星期前覺得乳暈痕 望下見到一堆堆埋一齊特別乾的皮 咁我就met走佢 跟住冇幾耐傷口位開始滲水 過幾日乾左後皮冇左後再重複好痕再滲水 我去睇左皮膚科醫生 醫生比左類固醇藥膏我搽 佢叫我連續搽7日 之後停 停左如果都好快又黎過就叫我去做檢查 結果過左幾日真係又再痕 再滲小小水 依家有點擔心 同唔知要做邊種檢查
再檢查離不開乳房造影（你的歲數先照超聲波），之後再抽組織（要切少少皮去驗），去排除Paget’s disease of nipple。
好擔心?好驚只有27歲就有乳癌
你的建議是照超聲波+抽組織驗 同步做呢兩樣 對嗎？
對。
醫生你好。一星期前照左超聲波，粒粒全部良性，2日前做左3d mammogram,報告話有2粒係一星期前的超聲波裏沒有的，要再照超聲波，一粒10x10mm,oval,另一粒18x12mm，冇寫咩形狀，請問:
1.是否一星期內可以生出呢2粒(谷緊m,下星期會來)
2.book左3日後照，即係m come前幾日，需要改m完後照，才會準確嗎?
3.如果超聲波又係冇呢2粒，要點?做手術?點做法?
謝謝你。
4.請問似有冇事?
1）一星期唔會生到兩粒咁大嘅野。一係超聲波睇漏，一係真係冇嘅不過3D mammogram誤嗚。
2）m後會好D，不過唔係必需。
3）要視乎3D mammogram覺得有幾可疑，唔可疑就觀察，可疑就夾胸抽針。
4）要臨床評估睇過片先知。
请问能从超声波中看到乳癌，并且已经扩散到淋巴吗？可以仅凭超声波，不抽针就可以确诊乳癌和淋巴扩散吗？谢谢
可以看到，但不能「僅以超聲波不抽針」去確診。
醫生你好，
早排發現乳暈下面有一粒物體，而且發現乳頭有少少出血，去看醫生後說懷疑是乳頭狀瘤，因化驗分泌物後說有非典型細胞。再去看了專科醫生，做了3D mammogram和超聲波。想問下有需要抽針嗎？醫生說等報告出了再決定，因為我本身患有一型糖尿病已有十年，如果是乳頭狀瘤，需要做手術嗎？謝謝。
如果size 有5mm以上，最好先抽針再做手術。
想請問抽針的目的是什么？因為之前已拿分泌物去化驗了。
去排除癌症，因為就算無論如何都會做手術都好，事前知係咪癌症會影響切幾多。
多謝解答。
你好醫生，好奇一問，想問超聲波報告話乳房硬塊Doppler positive係咩黎架？我第一次照既時候，個報告話我有d硬塊係doppler positive,但第二次照返果d硬塊就係doppler negative,想問點解同樣既硬塊，照第二次，報告講既呢個feature會有唔同？
Doppler positive 即係有血管生入去個硬塊度，有多血入去即係有營養，可以生長得快。唔同時間唔同機唔同醫生，特徵可以有出入。
謝謝醫生解答。仍想問，如果有這些不同醫生的報告出現，我如何理解自己所生的硬塊的情況？係咪真係買大細咁，睇我信有定無血管存在？
我想起第一次睇第一個醫生，佢話有呢d養份供應，所以就考量佢有無惡性既可能,所以安排左有養份供應既硬塊抽粗針，最後良性，同埋兩位醫生都覺得觀察就得。我見第一次睇果個醫生當時都比較concern有養份供應既硬塊，所以想問問，之後我繼續觀察的階段，有無血管養份供應，仲係唔係concern?
其實相隔左幾個月，d硬塊都無蹟象變大左，有血管養份供應就有變大既可能，咁如果唔變大其實係咪可以話根本唔存在有養份供應？
唔好意思我問左咁多，我無任何立場話信邊個唔信邊個，可能係白痴既問題，只係曾經醫生姑娘特別道出左既concern,曾經抽針前我因此擔心過幾日的野，第二次唔同醫生唔同機唔同時間照左之後發現原來咁簡單，有感confuse,究竟自己經歷左d咩既感覺。
要評估過先知，不適宜網上判斷。
謝謝答覆。話說我第二次照超聲波係搵左馬醫生你照，咁其實係咪之後再返check既話，以你部機為準就可以？
每日照顧很多病人，個別情況已經唔記得清楚，以我們當時的對話作準。
好，謝謝醫生。
醫生你好,
最近右邊乳暈附近摸到到一小粒東西(如芝麻大小),像不會移動,’meat’起乳頭,摸上去像是乳暈皮膚下的酒米般,但亦很擔心,還有,前兩天摸到左邊腋下近背部有兩粒嘢,能滑動的,但試過有些痛,請問以上有機會有事嗎?
另外,上年做了檢查,內容如下:
No Previous history of breast surgery or biopsy is noted.
No clinically palpable lump is noted in the breast.
The breast parenchyma is normal in echo-texture and appropriate for age.
A 0.5 x 0.35 cm small cystic lesion is seen in L2H1 cm from nipple.
Both axillary lymph nodes are not enlarged.
Comment:
One small cyst 0.5 cm in left breast.
本人今年40歲了,請給意見及看法,謝謝
要臨床檢查同埋再照先知。
醫生你好，
我太太今年四十一歲， 在2017年10月份 他作例行婦科檢查時 發現左 乳房 有七粒腫塊， 超聲波評級為BI-RADS 3-4a, 乳房x光評級為BI-RADS 3。 於是我們在 17年 12月份 找了 一位乳腺科醫生A 跟進。
在醫生A的診所, 他看了我太太的報告 跟著 在診所幫太太 照超聲波， 然後同我太太講佢都幾多粒粒， 如果同你抽針都唔知抽邊粒好， 唔想针到我太太 好似箭豬咁, 所以建議我太太到醫院A 照磁力共振, 話咁樣可以確定啲抽邊一粒, 於是我們便安排了 到醫院A照mri。
2018年1月， 醫院A mri報告， 左右乳房均評級為BI-RADS 2。 我們問醫生A如何處理， 她建議可以抽針, 不過起碼抽四針。 我們當然愕然了一下， 又話唔想針到老婆好似箭豬咁， 照完mri又話要抽四針， 當時佢建議照mri 話因為mri最準， 仲可能準過頭, 感覺報告評級為二級, 點解又要抽四針, 我哋心諗如果係咁 就唔使照mri。 不過佢最後都話可以觀察下半年後再跟進。 於是我們諗住搵另外醫生攞下意見。
2018年7月， 我們到了醫院B 找醫生B 跟進， 醫生B睇完報告及檢查後, 建議照超聲波有需要就抽針， 當時去建議我們在醫院B做，因為 寫報告的 醫生好有經驗， 又話唔明白我們住在九龍為何醫生A叫我們到香港照mri。 當時心想 醫生B 都幾好， 希望能把 情況弄明白。 最後我們在醫院B 做了超聲波及抽四針幼針。 今次醫院B超聲波報告冇評級, 抽四針 左邊乳房 報告全部沒有發現癌細胞, 其中 1-2點鐘 迪一粒建議維纖維腺瘤, 另外9-10 點鐘的一粒 建議管道內乳頭狀瘤。 當時醫生B 解釋 如果是 管道內乳頭狀瘤 比較要關注, 因為變癌的風險比其他纖維瘤高, 他給我們兩個選擇, 一是做手術, 第二時觀察半年 再照ultrasound跟進。 他這樣說， 我們 選擇了 半年後 再照ultrasound跟進。
2019年一月, 我們回到醫院B找醫生B， 一進房間未檢查, 醫生B 已經問太太會否考慮做手術， 說管道內乳頭狀瘤比較危險, 當時我們感到很奇怪, 為什麼 半年前他建議我們回來照ultrasound, 照都未照就講做手術。 最終我們在醫院B照了 ultrasound。 不過由於原來醫生B 在一月後 便不在該醫院工作， 報告要到他香港區診所取回。
結果3月份到了他診所聽報告, 今次的報告同樣沒有評級。 主要是寫 左邊乳房9－10 點鐘及12－1 點鐘的兩粒腫塊appear slightly more prominent when compared with the last ultrasound scan dated xx july 2018, while the other lesions show no significant interval change. 而9至10點鐘嗰粒之前做咗抽針, 無發現癌細胞。 我哋問醫生B點算, 因為經歷咗一年幾, 又照又抽咩都試過, 醫生B 當時叫我哋成年冇照mri不如照下 ，清楚啲。當時我哋心想又照？ 我太太安耐不住， 同醫生講不如做手術, 醫生b話 呢個唔係最好時候做手術, 都係照mri先. 我哋無奈只有聽從他吩咐。 不過今次又好特別， 佢好似失咗憶 唔記得咗 半年前 佢同我哋講 醫生A點解 要叫我哋去香港照mri， 今次 去安排我哋都到特定的 LAB 照， 佢話 嗰個化驗所 啲人佢train过曬, 寫啲報告commit啲。 我當堂O曬嘴, 好似前言不對後語, 但無奈地 通常病人只能聽從醫生的吩咐, 於是我們在診所找姑娘約時間。 今次更特別， 姑娘說診所慣例需要收按金, 如果約咗唔去按金沒收。 最終有點肉隨砧板上的感覺， 安排了照mri 。更加奇怪的是, 而我們經驗照乳房mri, 比較準確的日子是在月經後的一個禮拜內照, 但姑娘安排的時間 並不在一個星期內。 我們見此詢問姑娘, 姑娘的回覆反而是說醫生沒這樣吩咐。 最終我們 在他安排 的日子照了MRI。
2019年3月， 我們回診所 找醫生B聽報告, 這次醫生B 看來比較嚴肅， 還問我太太做過什麼? 因為今次mri報告說左邊 一兩點鐘 有一粒BI-RADS 4a. 另外右邊八點鐘 又有一粒4a! 右邊兩點鐘仲有人粒BI-RADS 3 , 應該係纖維瘤。
當時我和太太當然很緊張， 完全唔識問問題。 後來 回想起之前他一直很關注的 9 -10點鐘 管道內乳頭狀瘤, 他好像完全忘記了, 只是照著mri報告來處理 。 但醫生B 的建議唔係做手術, 而係叫我哋搵啲靚啲嘅ultrasound照, 我問佢咩叫靚啲, 佢建議都喺佢介紹的Lab 照。 我心想1月30日先照完ultrasound ， 隔一個月又照？ 基於上次照mri 唔係好愉快嘅經歷, 我哋冇在他介紹的Lab 照。
2019年5月, 我們將所有報告交給醫生C跟進， 現在 還未見到醫生C, 不過在她的診所指引下， 要求我們 先照ultrasound 及 乳房 x光片， （ 可到他診所照或自己找化驗所照， 然後再將報告轉交給他） 再決定需不需要見醫生。
醫生, 我們現在好像無所適從, 不知如何是好, 這年幾的經歷, 實在使人很沮喪。 希望醫生你能回覆, 給一些中肯的方向及指引。
謝謝
照MRI 前，要慎重考慮跟唔跟它的結果去處理，因為MRI實在太多假陽性（false positive）了。如果唔跟，不如唔好照。醫生A照完MRI 結果BIRADS2，如果信MRI，就唔洗抽。同一道理，如果醫生B認為佢介紹的lab ultrasound 靚D，點解一開始介紹冇咁靚的ultrasound 你照？
根據你上面的資料， 9 -10點鐘 管道內乳頭狀瘤要做手術，最新mri報告說的兩粒4a要跟進，不外乎觀察／抽針／做手術。
醫生您好,
我今年28歲, 較早前沖涼時摸到硬塊, 上月中做超聲波, 結果為4A
然後再做粗針抽組織樣本, 現在等結果中。
因當時抽組織, 醫生有同我講話年輕唔需要做X光, 只需做超聲波+抽粗織
加上睇過您blog 裡面亦提及過, 除非可疑, 否則都可以唔需要做X光
但今日收到電話, 醫生建議我先去做X光, 再返去睇報告+覆診 (而我係未知抽粗織報告結果)
想請問一下, 咁情況係唔係仍然需要做X光呢?
感謝
追問抽組織報告結果先決定。
An oval, well defined,hypocchoic solid mass seen with no internal vascularity measures 0.89×0.52×0.89. 2cm from nipple.
是不是不需要特别担心？可否详细说明一下？谢谢
描述似良性，唔擔心。
醫生早晨，是否18歲都會有乳癌？我看到上面有位網友都與我有相同症狀，即係乳暈痕，且結咗硬焦，因為疫情已經痕咗個幾月都冇去睇過醫生，請問需要做什麼檢查？
18歲唔係冇機會，不過機會好微好微好微。都係照聲波，試藥，冇改善就攞組織去驗。
了解，多謝回復！
你好:想請問我在14年前隆過胸,呢幾年我都有去照過超聲波,但醫生話睇唔清楚,後來轉左照X光夾胸,醫生就話,我注入去物體已經和自已乳房脂肪混合左,但大致就看不到有甚麽特殊情況,現在我這情況是否繼續都是每一至二年照X光夾胸就可以,定我應該選擇照其他機更合適,如果我乳房有問題出現,是否這X光是可以檢查到?,麻煩你
打野隆過胸，超聲波好難睇得清楚。X光都變得唔準。呢個情況可以考慮乳房磁力共振。
您好，
本人快將39歲，最近左邊亂房有痛感及摸到粒狀東西，想去照下，但本人係超級肥胖型，脂肪非常多，上圍是110G，脂肪這麼多情況下我該照那種較好?我該先睇婦科還是直接去照?家中有小孩，我曾餵哺母乳近三年，直至現時已停餵哺一年半，在大力按壓乳房下會有透明分泌物及小許像過期豆渣物滲出，質感非常油。由於家中經濟很緊張，不知該如何是好，等得公共醫療的話少事都變大事。。所以想找最便宜而直接的私家對策處理，因此想在此徵詢意見，謝謝。
先照超聲波。
睇就睇外科乳腺科，唔係婦科。
想便宜就去香港乳癌基金會的乳健中心，合資助資格的話，可以免費照。
我媽媽上年確診三陰2b期，我也定期每年照超音波一次，之前兩年也各在同一位置抽幼針一次，結果都是良性冇變大
今年還未做檢查，現在剛懷孕八周，乳房開始脹大。請問懷孕期間適合做檢查嗎？乳房組織變化會否受懷孕影響結果？如可繼續檢查，在懷孕那個周數比較合適？如之後餵母乳，會否影響結果，也適合檢查嗎？
另外，現正打側睡，轉身時會發現被壓著的那邊乳房有一陣酸痛，這是正常嗎？
謝謝醫生
懷孕期間都適合做檢查，只係要避開X光夾胸，超聲波或者抽針都係安全。
懷孕唔會影響良性定惡性。
妊娠第二期 (13-28週)比較合適檢查。
餵母乳都合適檢查，只係超聲波多D背景雜訊，難D評估。
酸痛唔太令人擔心，不過正唔正常要檢查先知。
醫生您好，
本人33歲，早前沖涼時摸到硬塊，去看了醫生後，醫生轉介信上寫了照X光+超聲波，而我也全照了，
後來找到資訊說X光通常建議未滿40歲/未到更年期的女士照的，請問我現在照了X光會否有問題？謝謝！
只係照多咗，冇大問題。
請問如果一邊乳頭摸到/碰到/掂到時會好痛, 灼熱痛，類似掂到傷口出現的痛 , 但表面看不到有傷口，已痛接近兩星期，如果唔掂到佢就唔痛,超聲波照過無異常，會係可能咩問題引起? 是否有需要照下X光? 本人32歲.
乳頭太過敏感。冇需要照X光。
但以前從未出現這種痛, 而且痛得好厲害 ，害怕有問題，以及驚是因為超聲波照唔到的小病灶引起。會否可能是因為超聲波照唔到的其他病灶引起?
可以，不過機會極微（當然前設係超聲波質素合水平）。
舊年三月發現右腋下有一粒硬塊，九月開始覺得痛就去照超聲波，醫生話似係乳腺增生, 粒硬塊太扁，唔值得抽針，要再觀察。我好驚就去咗body check照埋乳房超聲波，發現三粒乳結節，睇回音係良性。事隔四個月，我覺得腋下硬塊大左同痛，乳房亦不時會癢同痛，請問係咪好大機會係乳癌？我應該去照啲咩先啱？
唔好自己估估下，應該去睇醫生檢查。
醫生你好，我2020/5月確診左6月做左手術，30幾歲原位癌，公院比左2021/5月做造影同超聲波，第日打來醫生話睇完報告，再比左個期我今年12月再做檢查，見上面話太密做唔好，我上網睇都係一年一次，係米因為我高危同上年確診，所以佢隔左半年又叫我做？係米我呢個情況半年唔算密？
通常都係五月嘅造影搵到啲應該良性嘅嘢，所以要半年之後複照。
唔該醫生，上網睇講到半年後要再睇情況，咁係米多數宜家都無事？屬第三級，98%或以上良性，2%或以下誤差個種？
係。
醫生您好，我媽媽今年59歲，想幫她做個身體檢查，檢查計劃已包括”乳房超聲波 (雙側)“，我在猶豫應不應該再加上”乳房X光造影檢查”好?
見到話40歲以上要做乳房X光造影檢查”， 但又見到做”乳房X光造影檢查”是有輻射的，因我擔心輻射會對健康有影響，><
所以十五十六，唔知應不應該做"乳房X光造影檢查”好?
因此想請教醫生意見，請問醫生覺得應不應該也給媽媽做"乳房X光造影檢查”好呢？等待回復，十分感激！！
應該做埋。
多謝您的回復，但做”乳房X光造影檢查”會有輻射，會唔會對身體健康有影響呢？真的比較擔心輻射，謝謝！
輻射量好低，好安全，唔會對身體有壞影響。
大咗（雖然少少）同有血管生入去（Doppler positive），所以醫生唔放心。
醫生你好！上年做左自體脂肪移植，術後曾經發現右胸有硬塊，但過左幾星期就消失。呢兩個月發現左邊都有舊硬塊，但遲遲未消失。摸上去係round-shape, moveable，所以去照了USG，但未有report。如果是fat necrosis的話要如何處理？
接受佢。
粒野相比起之前大左少少，同埋有血管生入去，所以醫生唔鍾意。
醫生你好，我今年35歲，家族無成員有乳癌。乳房超聲波結果如下：
The parenchymal echotexture of both breasts appear normal.
7 solid nudules are seen in the breasts.(有講7粒纖維瘤位置，最大果粒系1.2×0.6×1.2cm)
No sign of intramammary fuct dilatation is identified.
Bilateral axillary lymph nodes are not enlarged.
請問我有甘多粒纖維瘤，要去做乳房造影檢查下嗎?感謝！
35歲仲後生，X光造影唔需要。
醫生您好，想請問如果40歲以下，之前只係照到有良性水囊，一般恆常超聲波檢查有冇話建議幾耐要做一次？每年定隔年照呢？謝謝您！
40歲以下唔需要定期照，如果關注健康，可以選擇一至兩年照一次。
你好.
我早前做了Mammogram同Ultrasound, 發現2邊乳房密度不一.
“Asymmetry at outer left breast (14mm) at posterior depth, also seen on tomosynthesis, woth no ultrasound correlate identified. Probably benign. BI-RADS category 3.”
醫生建議6個月後再照3D mammogram, 或現在照MRI排除occult lesion.
請問情況是否需要擔心？可等6個月後再照嗎？
謝謝.
唔擔心，可以等6個月後再照。
醫生你好！本人39歲上個月在政府醫院手術拎出一粒比較樣衰的瘤及一條有分泌的乳腺，化驗結果不是乳突瘤及乳腺也是正常的，沒有可疑就出院了。可惜今天又發現同一邊乳頭的一個窿窿又有透明分泌了（多手按壓才有），請問醫生我是否又要再照與乳管X光造影了？這種情況常見嗎？
謝謝
可以係手術嘅積水，經乳腺管流咗出嚟，返去搵手術醫生睇睇。
醫生你好, 我之前上過你診所睇，我餵緊人奶, 左胸單邊成日好似burning咁痛, OR抽痛OR 漲痛, 有時會痕，呢D唔舒服既感覺持續左3個多月，即使我食左收奶藥(但仲有少量奶)仍然好唔舒服, 最近乳頭乳暈下又再次起左粒野, 初起果時粒野好痛(唔紅,一粒豆咁), 依家過左2星期仲係度就唔痛但痕痕地咁, 之前都起過瑪麗話乳腹腫左無野做到, 我好唔安心，想做多D檢查, 但因為我仲有人奶, 是不是做X 光造影無咩意思? 會建議做咩檢查?
人奶係會影響造影嘅準確度，如果真係要求做多D檢查，就可以考慮MRI。
醫生多謝你咁忙都咁快回覆，但我唔係你所講果5類人, 都照MRI? (不過我確實左胸痛左3個多月, 睇過好多醫生都話唔知咩原因)如果真係照, 可唔可以搵番你地寫紙照? 同埋如果乳腺腫左 (即係起左果粒野), 會唔會建議抽針驗下?
按醫療準則你係唔洗照MRI，不過你睇咗好多醫生都唔滿意，而要求做多D檢查，所以先建議照個最敏感嘅造影等你安心。
腫左粒野需唔需要抽針，就要現場睇咗先知。
另外，我決定再一次食收奶藥，希望今次真係收曬D奶, 如果照MRI, 是不是收奶後照好D? 我真係好傍偟, 日日都好唔舒服, 唔知點算好, 甚至有D抑鬱..
收咗奶先照好啲。
你好，本人32歲，最近發現乳房乳暈很癢，而且搽了藥膏好像都反反覆覆，而且會甩皮，去做body check 時建議我去做乳房造影，我應該先去做超聲波還是做乳房造影 ？
未夠40歲，超聲波先。
你好 我想問下2023年七月做咗右乳全切除手術 我2023年六月已照過超聲波同造影 咁我系咩要每年照一次超聲波同造影追蹤住左乳🙏🏻🙏🏻
係。
醫生你好：
本人42歲已婚有2女兒，今天出左報告X光造影係Bi-Bads 2 而超聲波左邊係3 右邊係4A ，醫生建議抽幼針做化驗，其實係咪都會有人報告係咁會唔一樣？衣家好擔心右邊情況。謝謝解答
X光造影同超聲波係兩個唔同檢查，出嚟嘅結果係可以有出入，常見嘅。
BIRADS 4A 抽針就應該抽粗針。