乳房硬塊 : 我係咪生乳癌?1
大部份既乳房硬塊多數為良性腫瘤,但同一時間,大部份有乳癌既女性都係摸到舊野先,咁即係點啊?
由上一篇你知道年紀越大,中招機會越大。呢一個概念,喺胸部硬塊/腫塊一樣用得著,我地又睇睇數據⋯⋯
乳房硬塊
後生(30歲以下)女仔胸部有硬塊,多數為乳房纖維瘤(良性)
中年(30-50歲)女士胸部有硬塊,可以係良性(纖維瘤,水囊等等),可以係惡性乳癌,又可以係中性會變嘅乳房葉狀腫瘤。
上年紀(50歲以上)女士有胸部硬塊,要小心,有事既機會率大大增加。如果醫生同你講你係普通纖維瘤,你都要諗真一啲,究竟醫生係做晒X光及抽針先下結論(乳房檢查三步曲)?定係咩都未做就落既輕率判斷。
你可能會問「有無咁簡單呀?」
呢個唔係簡單,反而佢係一個基於機會率嘅估計,咁當然仲有其他因素要考慮,例如:
1)時間性:同其他野一樣,時間會證明一切。一時摸到一時摸唔到,什或至胸部硬塊自己會消失的,呢啲冇咁驚。但如果問題持續數月甚至上年,而硬塊越來越大,呢啲要好小心。
2)高危組別:自己會唔會有一啲因素令到自己易啲生癌 乳癌成因 : 我易D生乳癌嗎?
3)胸部硬塊的特性:硬既唔郁嘅岩岩杉杉嘅,可疑一啲。相反,軟嘅郁嘅順滑嘅冇咁可疑。
4)同一時間有冇其他乳癌嘅病徵 乳癌症狀 : 我係咪生乳癌?
5)痛楚:胸部硬塊痛唔痛係冇關係嘅,痛可以係癌,又可以唔係癌。同一道理,唔痛都可以係癌(大部分乳癌係唔痛嘅)
下一篇我會講吓
相關醫學專欄:乳癌警號一:乳房硬塊要小心
Breast HK,
多謝你既鼓勵,我已一心勇往直前,完成可怕既化療差不多二星期了。可能看完你詳細既資料,有了一切心理,發現化療不是想像中禁可怕。本人在去年十二月做了部份切除,在腋下附近,屬於一期,以為順利過了一關,但我呢兩日又摸到同一邊乳房八點位置在乳頭附近有一粒很細的硬粒,我會盡快向醫生求助,不過現在很擔心,請問有無過住病例在這麼短時間,還未開始電療已發現癌細胞出現在其他位置的?謝謝。
Ka Man,
好開心聽到你話覺得呢度幫到你渡過呢個難關。
你問有冇病例咁快就有第二個腫瘤出現?答案係有,不過罕有。通常都係開頭發現腫瘤時,將精神過度集中係嗰度,大意忽略咗原來同一邊/另一邊仲有第二個源頭。到做完手術,冇做輔助治療,以為搞掂晒時,就晴天霹靂發現第二個源頭。呢D唔係復發,呢D係開頭遺漏咗。
不過唔洗過度擔心(雖然都係要盡快睇醫生),你個情況聽落去唔似以上情況。因為如果真係開頭已經係度/呢4個月先生出黎,呢段時間你打緊化療(同上面最大分別係你有做輔助治療),大部份情況化療都會㩒到/控制到第二個源頭。因此就時序上黎講,我估你係冇事嘅,不過都係老規矩-乳癌檢查3步曲,做晒先能下結論。
Breast HK,
謝謝你的解答。假設touch wood係呢四個月先生出來,是否一切要還原,再由動手術,化療,電療….重新開始過?謝謝。
啱,不過有少少微調。
手術好大可能要全乳房切除(除非第一同第二個源頭好近)。
化療就視乎之前打咗咩針,有可能要補針(唔洗完全黎過晒),盡可能用晒A針同T針。
標靶就睇吓新嗰個源頭係咪HER2型,先知洗唔洗補返。
之後先做電療,加減食藥。
雖然知道你已不再寫落去, 但盼望你會睇到同幫忙我解答, 與否都很感激你, 無私分享, 難能可貴.
我大概6月頭突然發現有一粒如黃豆般大細及硬的東西(硬既唔郁), 在乳頭下方(很接近乳頭邊沿), 於是去門診求醫, 臨床檢驗轉介至瑪嘉烈排期, 排期竟然要到12月中. 由於擔心經濟能力(無買醫療保和危疾), 所以只呆子地等: 這是否就是乳癌? 一直在問自己、擔憂, 每日都摸到! 找網上資料又唔明白呢d 係咪所謂乳腺增生/纖維瘤, 真係好苦惱; 第一對不確定性之下既惶恐無助, 第二又好擔心醫療費用; 現在連跟伴侶行埋都會好驚好自卑.
硬粒至今亦未有咩變化, 乳頭沒下陷亦沒流東西, 但硬粒稍用力按壓會有刺痛感, 48 yrs old, 未生過, 家族無遺傳史, 最後一次經期是4月份.
請問這黃豆般的東西是什麼? 建議是否仍可等到12月中, 由醫院診斷? 若不建議, 我可從咩方法最低消費去確知這是否良性.
萬分感激 <3
48歲,粒野又硬又唔郁,呢幾樣野係唔滿意嘅地方,所以最好都係睇早D睇醫生/早D做檢查。
瑪嘉烈排期排到12月中,我覺得太耐喇(無奈公立醫院資源有限),所以用最少錢去加速嘅方法就係去私家乳腺科醫生度睇咗先(幾百至二千蚊度),之後照埋乳房X光/超聲波(二千四),睇吓夠唔夠錢做埋抽針(幾千),齊晒報告/資料再交上去瑪嘉烈,如果真係有野/有需要,佢地會比個快D嘅期你。
香港乳癌醫生 ﹣ 睇公立好?睇私家好?醫生攻略1
香港乳腺科醫生 - 點先可以快D睇?
想問問。。
早幾日黎m期間,突然右邊胸近乳暈位置好痕,因為係街所以無理到,返到屋企睇睇見到紅左啲同腫左,按落去有一舊嘢感覺好似一團嘢咁,唔痛,但都係有啲痕。
好擔心會唔會有咩問題。
有懷疑、又擔心、仲好似摸到舊野,最合理嘅做法梗係去搵個乳腺科醫生檢查清楚。
會盡快呢個星期去睇,不過咁岩見到呢個網純粹想問下
我34歲了,每次經期到都會脹痛,過後就不痛,2個月前經期著內衣緊了點,而且脾氣唔好,後來乳房痛,發炎去公家看,醫生開了消炎藥,後來自己摸到有硬塊去私家診所看,做了超聲波及x光,裡面顯示正常不用抽針,但第2周復診脹塊仍然在建議我做CT,但費用太高沒做,直到現在乳房已經左右兩邊一大一小,腫塊還在,我該怎麼辦?這到底是什麼病?
如果乳房X光同超聲波都話正常,九成機會真係冇野。如果想排除餘下一成的遺漏,就做乳房MRI,CT係冇用嘅。
但是現在明顯左乳大一點,是腫的并有硬塊,會是乳線增生嗎?
雖然乳腺增生可以自己覺得摸到有硬塊,不過好少可話會腫到明顯一邊大一邊細。
你好!年齡30,左胸有一硬塊,只做了胸部超聲波,醫生話有硬塊,但建議割除,並將其化驗。其實是否應進行抽針,看完結果 再作打算?
應該先抽針,你的想法正確。
現在已決定做手術再進行化驗!
醫生您好, 最近自己模到自己右邊乳房有硬塊,經過提出的三步曲檢查后,確診為良甠纖維瘤,有2粒分別是2.6cm (自己摸到的)同2.1cm(摸不到的),仲有一d 鈣化點, 我本人就希望盡快做手術切悇上述三様, 现有以下問題:
1. 本人今年34歲, 從未試過全身麻醉做手術, 這個手術風險高嗎? (本人身體不太好, 少運動, 心又吾好, 成日跳得好快)
2. 手術會有後遺症嗎?手術後有什麼要注意?
3. 有必要性做手術嗎?
萬分感謝
1)小手術,風險低。
2)如果割得多,可能會凹陷。冇咩要注意。
3)問返自己主診醫生。
謝謝你的回覆
你好~月經前7天開始左邊乳房比右邊脹,約大一個cup, 但自己按過,沒有腫塊也不痛,也沒有其他症狀。上2星期都應該沒有這麼大分別的。原本安排了一個月後做regular ultrasound, 但如果這樣,要提早看醫生嗎,還是只是月經前影響(但單邊?)? <2年前做個ultrasound, 正常的。thanks~~~
擔心就早D睇醫生。
你好,我今年55,5月份做左乳房造影、超聲波,醫生話左邊組織密度吾平均,要我11月再照跟進,昨天照左一邊,照完兩張,聽姑娘講要大力的壓散佢,再補照兩張,比佢地講到我好驚,請問跟你們的經驗,我有冇事呢?
要睇片睇報告先知,冇可能僅憑你描述個過程去評估。
想問什麼是密度吾平均?多謝回覆
估你想問乳房X光報告asymmetrical density,即係有一個位置喺一個角度或者兩個角度有個白影,有冇事要醫生睇過先知。
Hallo想請問有關幼針報告, 請問..
1. 佢話papillary fragments, 其實係咩黎?report 最後寫”非典型上皮細胞存在”即係有機會良性,有機會惡性嗎?通常會係啲咩架?
2. 我下一步應該先抽粗針?定立即去做手術切左佢再化驗?
十分感謝您!
1)乳突狀病變,可以良性,可以惡性。
2)做手術切左佢,再抽粗針都唔能夠百分百排除惡性。
多謝回覆
今日抽左粗針,醫生感覺有dd硬,要打定輸數嗎… ultrasound話1.95 x 2.46cm…位置right breast aspirate at 1 o’clock 4cm from nipple…係未算好大..
請問會建議下一歩係先做手術?
建議不變,都係做手術。
你好醫生,上星期無啦啦發現乳房表皮有粒野突出黎,好似暗瘡又好似蚊咬既包咁,應該1cm都無,唔痛唔痕,點算,好驚,唔郁既,唔硬唔軟,望落系突出黎既唔系係入面摸到,呢d系咪都叫硬塊,定系係入面既先系硬塊,好驚,點算。。。今年29yrs
睇醫生搞清楚。
馬醫生你好,最近睇左醫生之後,對病情還有很多困擾,希望你能善心解答
本人2x歲,一邊胸摸到一粒腫塊去求醫
睇醫生A時,做了USG同FNAC,USG無report, 只知照到單邊有3粒野,摸到的一粒有1.1×0.5×1.1cm大,只有摸到的一粒做了FNAC result: scanty benign ductal cells with mucoid background, cytology diagnosis code: C1
當時被診斷為mucocele like lesion, 被建議可觀察或做手術拎成粒野去化驗
相隔大約一個月之後,去了醫生B 拎second opinions, 在放射科做USG,今次照到兩邊都有cysts,比上次多左5,6粒
之前以為摸到的一粒是一整粒,但今次照到是幾粒組成的
USG report: Clustered microcysts are noted, collectively measures about 1.1×0.6×1 cm in size. BI-RADS3
Multiple anechoic cysts are seen in both breasts, measure up to 0.7 cm in size. BI-RADS2
The retromammary planes are preserved.
醫生B結論因為之前FNAC report 是 C1,不能作診斷,有其他情況都可抽到 mucoid background,加上 USG report,可觀察或抽粗針,我選了嚟緊為摸到的一粒抽粗針
請問:
1. 短期內USG 照多左咁多粒cysts 有可能嗎?第二次照當日乳房有經期前脹痛會有關嗎?還是因為USG技術問題?
2. “The retromammary planes are preserved” 係點解?
3. 有無可能第一次FNAC吉左完整一粒cysts,之後變左 clustered microcysts?
4. 如果由始至終都係clustered microcysts, FNAC或粗針都可能穿破或整爛粒 cysts?穿破或整爛會有問題嗎?
5. 第一次抽完FNAC會因為抽走左部分 content 而影響次後的 USG同粗針結果嗎?
6. 抽粗針後是否就可以更加排除BI-RADS3 有機會患癌的可能性?
7. 有良性的情況都可在FNAC抽到mucoid background 嗎?
衷心感謝馬醫生在我們因病情迷惘同擔憂中拯救岀來,祝你們工作愉快!
1)都冇話係咪多咗,A醫生根本冇報告。
2)正常描述
3)唔會
4)抽針唔會引起問題
5)唔會
6)如果結果係良性的話,係。
7)可以。
你好,近排摸到右胸腋下有一粒2cm到嘅硬塊,摸嗰陣佢會跟住郁,睇左醫生,醫生話位置有啲尷尬,有可能係脂肪瘤亦有可能係乳房生出黎嘅,建議我去照超聲波。我22歲,冇家族病歷史,係PCOS患者,有長期食催經藥。請問應唔應該等公立排期照超聲波定去私家照?因為好似冇太大迫切性(?)我根據你地個我係米生乳癌啲post,我發現我冇其他嘅病徵/高因素風險
22歲有事機會唔大,唔怕等就等公立,唔想等經濟又許可就私家。
想請問ABUS Ultrasound scan 同平日的2D/3D ultrasound scan有咩分別? 本人35歲… 家族有D病歷所以諗緊做邊樣身體檢查好…… THANKS!!!
ABUS係照嘅過程全自動拍低D影像,希望減少人手需求,最終都係要醫生睇片去分析。傳統嘅ultrasound就人手一路照一路睇一路分析。究竟邊樣好,2020年我暫時傾向傳統,因為ABUS太新,醫生都要時間去學習點分析所得的影像。
請問乳房密度高會否容易令乳腺增生?甚或增加患乳癌的風險?
唔會。
醫生你好! 想問如乳房有良性瘤/乳腺增生,還可以繼續食避孕藥嗎?
(已食了多年低劑量的避孕藥YAZ. 因為經期問題需要調經)
長期服用(超過五年)會增加患上乳癌風險。
你好,見到台灣有case話乳頭痕癢同乳房生痘都係乳癌病徵之一,但我見資訊都冇提及呢樣嘢,請問呢兩個症狀係咪都要特別留意?
乳頭痕癢就唔係,所謂生痘你可以睇成乳房硬塊。
醫生你好
我係男士, 28歲
個胸(乳頭對上) 有約兩粒咖啡豆大細既硬塊
冇其他徵狀 應唔應該擔心同搵醫生Check 下?
如果要應該搵咩醫生? 搵GP轉介 定係直接搵乳腺科外科?
多謝
男士後生出事個機會就好細,如果擔心就直接搵乳腺科check。
咁想請問乳房會生痘係咪算正常?因為最近都發現左胸部會生痘(即係有啲似青春痘,會紅腫有少少痛,有啲會擠到白色野,有啲唔會,但有慢慢消腫)
乳房間唔中都會生暗瘡,自己會消失就唔怕,唔消失就睇醫生。
馬醫生你好,現年47歲,20年的時候摸到有1毫咁大嘅硬塊,造影和超波話係乳線增生,說沒事不用理會,到23年10月,月經過後發現胸很痛有好大舊硬塊,是同一位置,照完之後,話我有4.1cm硬塊,bi_rads 5,一個鈣化點bi_rads 4b,然後去了抽針,我有乳癌嘅機會是否很大機會?20年的造影是否有出錯呢?
大機會有乳癌,20年有冇出錯評論唔到。