乳頭分泌物 ： 我係咪生乳癌？3
「我的乳頭有野流出黎，正常㗎可？」
呢一次冇一個標準答案。即係可以有事，又可以無事⋯⋯
乳頭分泌物
最常見梗係喂緊人奶，有乳汁分泌。不過嗰啲孕婦都唔會覺得自己有問題去睇醫生啦。
剩低落嚟，當然係非孕婦有分泌物，有咩要注意呢？
1）色水：血色比淺黃色危險，因為癌症多數會流血，相反正常受荷爾蒙影響的分泌是透明或淺黃色的。
2）單管分泌比多管分泌危險，請看下圖
圖片來源：改篇自互聯網
其實乳腺就好似一棵樹咁，每個正常乳腺嘅分泌都會匯聚係個主樹幹到，如果啲血真係源自乳癌，應該係單管嘅機會大啲（不過唔係絕對，因為都可以有多源頭性的乳癌）。
圖片來源：改篇自互聯網
3）同樣道理，單邊單管係差過雙邊多管的，因為一邊中招嘅機會，點都多過兩邊一齊生癌。
結論：單邊單管血色分泌要小心，都係去睇醫生啦。
下一篇講吓⋯⋯
相關醫學專欄：乳癌警號二：血色分秘要小心
香港乳癌及乳病治療中心 
請問乳頭出血除左Cancer之外仲有冇其他原因？本人單邊乳頭單管出血(23歲)，已經睇過一次醫生照左超聲波，等緊報告出好不安，但想了解多啲。謝謝。
仲可以其他原因，例如乳腺管乳頭狀瘤（intraductal papilloma）。不過單邊單管出血，無論超聲波照到乜野，好大機會建議你做手術，要有心理準備。
上個月做超聲波檢查時，報告表示見有一粒橢圓的瘤，醫生表示比較接近乳腺，話擔心會有乳腺管乳頭狀瘤，請問可怎樣去確診？這類瘤可不做檢查直接做手術切割嗎？
乳房的瘤9成來自乳腺，唔明咩叫「比較接近乳腺」。如果粒野夠大，可以抽針去初步確定。適唔適合直接做手術，未見過你答唔到。
單邊乳房有透明分秘物，是正常嗎???
透明係冇咁可疑，不過唔可以單單咁講話正常。
兩年前單邊已因為出血做過一次手術，發現係良性HPV瘤，但是現在另一邊又有同樣出血情況，醫生都係話要手術，超擔心
我31歲， 女。 昨天早上起來， 右胸好似人地撞瘀咗咁嘅痛，右邊胸近乳頭右手邊有硬塊， 按一去會痛。我係唔係有乳癌？
做完乳房檢查三步曲先有進一步資訊：
乳房檢查 － 乳房檢查三步曲1
乳房造影檢查 （ 乳房X光 ／ 超聲波 ） － 乳房檢查三步曲2
乳房抽針檢查 － 乳房檢查三步曲3
我發現單邊乳頭出血一個多月，照了超音波同mammogram, 報告寫有cycts 同有a prominent duct without intra-ductal lesion。當時夾胸照時夾左一大啖血水出來，然後兩日之後就冇出血，過左三日， 今日睇醫生佢睇完報告話可能之前cycts 穿左出血，夾晒出來所以停左，叫我觀察下有冇再出血，但今晚又再出血了，我是要再觀察下還是要再看醫生？ 另外醫生有問過我血是從哪個孔出來，我根本看不到，請問可以點樣睇？
繼續流血要檢查清楚。自己唔會識／唔洗識睇，呢個係醫生責任，病人只要知有同冇就已經足夠。下一步係做乳腺管圖（ductogram）加減手術切除乳腺管（microdochectomy）。
單邊單管出血 係咩原因造成？點可以預防？同埋有幾大機會復發？
好多可能性，可以良性可以惡性，所以要睇醫生。冇得預防。
我琴日已經去左睇醫生照左超聲波見到乳線漲左，醫生拎左d血去化驗。衣家等緊報告，所以想知多少少資訊。因為衣家仲出緊血，其實係咪衣家唔應該做運動或者接觸到乳房？同埋有無需要忌口？唔該～
同埋醫生話有唔需要照x光，話可能有需要做磁力共振？
做運動同接觸乳房都可以，冇需要戒口。
如果照得磁力共振，就一定照咗X光先後照磁力共振。
明白。我記得果陣醫生話因為x光係40歲以上既女士先需要，我唔面要照x光。同埋因為我衣家係出血，咩情況先需要照磁力共振？同埋單邊出血可以係咩情況？因為我衣家係睇私家，如果需要做手術我會轉去公立醫院。唔該～
出血係警號，所以未夠40歲都要照X光，情況有如40以下的乳癌患者我地都會照X光一樣。如果X光超聲波都搵唔到源頭，下一步先考慮照乳腺管圖（ductogram）或磁力共振。
之前已經講咗可以良性可以惡性，講個學名比你聽都係冇用，只會混淆你。
如果是單邊有分泌物，會在乳頭上結一塊痂一樣，黃色的，正常嗎？
照咗乳房，拿多D資料先。
請問出血嘅定義是否要連續多天？因我有濕疹，天氣乾燥及大汗時乳頭會癢及甩皮，然後有少許黃色分泌及結焦，剛剛發現有血，不知是否太乾燥而磨擦整損？但塗了濕疹藥膏第二天後就沒有血了，唔知需唔需要去睇醫生？謝謝
出血的定義係血就得，唔需要連續數天。如果情況有改善，可以觀察一陣子。問題如果持續就要睇醫生。
我剛生BB2個月，喺脹奶時發現有一粒野(~1cm大）唔痛的，到依家一直都喺度，我去睇咗專科醫生但佢話我依家喂緊奶照超聲波都無意思會照到好多野而且喂奶期間都唔建議抽針，佢建議我半年後少啲奶/已經戒奶再去照。但我感覺粒野好似大咗咁，一脹奶時我自己認真睇都睇粒野。我應唔應該依家去照超聲波？
照，最多難睇D，但冇風險。
你好，我媽媽74歲，數天前胸部有像針刺的痛走咗去急症室，翌日做了抽針，5月7日返去睇報告及安排了7月9日照超聲波及造影，我是否應該先去私家照再把報告交政府醫院?我擔心如果是癌症會拖延了治療的黃金時間?
等5月7日睇完報告先決定。有問題，就去私家加速。冇問題，就可以選擇等定唔等7月9。
如果抽針傷口還沒好，是否不可以去照或造影? 多謝你的回覆。
超聲波還可以，X光就唔好。
今日返咗去睇報告，證實是乳癌最少應該2期，因有淋巴擴散，今日仲去埋照超聲波及素描，星期四就去CT scan，政府已經約了本月23日做手術，想問下醫生意見如一切報告沒有擴散，手術會如期進行，我有需要去多找一個醫生看嗎？
如果滿意手術方案及唔介意等待至23號，就唔洗睇多個。如果唔滿意手術方案或想快一D手術，就去私家睇多個。
多謝你的回覆
已取US 和掃描
右乳房有1粒2.40 x 2.14 x 2.43cm的癌腫瘤及2粒腋下淋巴分別是2.96 x 1.62cm 及2.00 x 1.22cm， 而CT報告就沒有發現擴散其他器官，照以上資料是否2期?而2期需要化療嗎？因為我怕媽媽受不了(74歲)， 不做化療復發機會大嗎？
起碼2B期，按病情就要化療，不過74歲要小心評估頂唔頂得順。唔做化療復發機會大。
謝謝醫生，如果真係受唔到化療，仲有無其他方法可延長存活期?
電療，有標靶受體的就打標靶，有荷爾蒙受體的就食藥。
通常會幾時就復發?
視乎癌細胞種類。
點樣先知道邊隻受體?驗血?
抽粗針時驗，或手術後驗。唔係驗血。
請問如何知道癌細胞係邊種?較惡的係邊種?
抽粗針時驗，或手術後驗。三陰性最惡。
謝謝你醫生
早晨醫生，吊針化療是否可用口服藥代替?對老人家是否較適合?費用大約多少?天天食嗎？
人人情況唔同，唔可以籠統咁答。
明白，謝謝
馬醫生今你好，媽媽手術後報告:IDC, grade 1, T2N1a ，10粒淋巴2粒有癌細胞，ER8PR7, cerbB2 2+, Allred score positive (score 8), 公立醫生話要再驗下是否有標杷受體(cerbB2 2+)是否有受體? 嚟緊會去公立跟進輔助治療，但我想找一個私家醫生給予意見，我應該找哪科?腫瘤科嗎？ 因為媽媽年紀大，唔想化療，我哋都同意佢決定。
如果决定唔化療，冇意見要問。
明白，但想問下若有受體，賀爾蒙藥和標杷可以同時間進行嗎？好擔心媽媽好快就復發。謝謝你的解答。
可以同時進行。
醫生你好！我兩邊乳暈和乳頭不斷出黃水2個月係有咩問題？之前睇皮膚科就話我係濕疹，但搽左一排藥膏都無用一直出水。。。係咪要去做乳房檢查好啲？謝謝！
如果用藥冇改善，下一步要考慮拿組織去排除癌症。
你好，請問如果係乳管乳突瘤，係本身已經存在一段時間，還是個瘤突然之間出現？
剛停止餵人奶4個月，前日沖涼時，因好奇仲有冇奶，就試吓擠壓乳頭，左邊冇野出，右邊竟然擠出黑褐色液體，試過聞下，冇味的，第二日再試，一樣擠出黑褐色液體，但如果冇特登擠佢，又唔會漏出黎，自己摸過冇粒粒，冇腫塊，冇痛，請問我需唔需要去檢查？
需要。
睇乳腺科？
係咪需唔睇左普通科醫生先再refer?
如果可以的話，直接睇乳腺科。
醫生你好, 我一邊乳房最近一星期有黃色分泌物, 是否需要檢查? 是應該找外科婦科乳腺科還是普通科? 謝謝
檢查下安心啲。搵外科乳腺科。
醫生，早兩個星期發現單邊流透明分泌物（非自發性），跟住自己用力擠唔知係唔係整傷了乳頭。之後一路都冇理會也沒有自發性流出東西。到今天自己在按壓一下，發現有啲紅色又啡色嘅水流出來。請問這個是很大機會生乳癌？本身那邊乳房有三粒小過1cm嘅纖維瘤，從去年發現每半年monitor住。下星期會有做檢查ultrasound + mammogram. 兩年做嘅mammogram是沒有問題的。謝謝🙏
做咗檢查先評估。
您好，請問化療期間，乳頭有出血情況，是什麼原因呢？謝謝！
化療唔應該令到乳頭出血，要睇醫生。
你好，我無生過bb ,有日沖涼驗查乳房，擠壓乳頭，發現左同右乳房都有兩個孔擠出墨綠色分泌同乳白色分泌。會是惡性問題嗎？
唔似，當然都係建議檢查清楚。
你好，現時懷孕6個月，有妊娠濕疹，乳暈突然痕癢，抓損，搽了娥羅納英之後出黃色水，之後改搽紅霉素軟膏，仍然出水同痕癢但有小小結焦，已一星期多，請問我應該睇外科乳腺科定皮膚科？
濕疹睇皮膚科。
你好，昨晚我檢查乳房時發現乳頭有咖啡色分泌物，吱了兩三下又沒有了，今天都沒再有分泌物，請問是否乳癌先兆？
建議去搵醫生檢查清楚。
你好
因為發現有鈣化點，23/1星期二去了夾胸抽粗針等報告中，傷口聯左針及瘀了，現在未到期拆線，但剛剛沖涼時大力按乳頭時抽針那邊乳頭有血出，請問係咪因為傷口關係而出血？
其中一個可能性。
我单邊乳頭有脫皮和痕癢，當痕癢 抓痕時，發現乳頭有小量透明無色水在乳頭上，我是否要去看醫生？
想搞清楚就去睇醫生。
如果乳頭出血 化驗完atypical cell 會唔會有機會係乳頭感染 下一步應該點做
有機會。
下一步應該搵出源頭。