乳頭凹陷 ： 我係咪生乳癌？4
乳頭凹陷 －「少少凹姐，冇事嘅～～」千祈唔好咁諗！！
乳頭凹陷
先講乳頭凹陷，其實好多女士都有咁嘅情况，有啲人可以自己整返凸出黎，即係問題間歇性。
不過間唔間歇性呢個都唔係重點，重點係時間性！
咁咩叫時間性？即係問你「天生／細細個／後生已經有／有咗十幾年，定係新起／有咗幾個月／越來越凹？」
你由第一篇乳癌症狀 知道細細個係幾乎係冇可能生癌，時間證明一切，如果乳頭凹陷係天生／細細個／後生已經有／有咗十幾年，都仲未有事，仲可以坐係度上網，即係衰極有個普。
相反，如果乳頭凹陷係新起／有咗幾個月／越來越凹，即係乳房本身有變化，有啲野，甚至有啲衰野發生緊。
「咁有啲咩衰野啊？佢地又點解搞到我個乳頭凹咗嘅？」
首先我地又要了解下乳房既結構：
圖片來源：改篇自互聯網
乳房要保持堅挺，主要係靠乳房的懸韌帶（Cooper’s ligament or suspensory ligaments of breast)，佢地就好似鋼筋咁為乳房提供支撐。
當乳房生癌時，癌細胞就會侵蝕呢啲鋼筋，搞到乳頭凹陷／皮膚下陷。
皮膚下陷同乳頭凹陷有少少唔同，係唔會天生嘅，除非之前做過乳房手術。如果冇做過手術，乳房皮膚係唔會無緣無故凹陷。如果你凹之外，仲摸到有腫塊／硬塊，請立即睇醫生。
橙皮紋（peau d’orange）都係同一樣原因，當皮膚因癌細胞而令淋巴水腫，但係一部份皮膚卻被呢啲縮短咗嘅鋼筋拉住擴展唔到時，嗰樣就好似啲橙皮咁。
小貼士：呢種乳房橙皮紋同平時懷孕／暴肥之後暴瘦嗰D係唔同嘅，唔好攪錯。
圖片來源：改篇自互聯網
下一篇講吓⋯⋯
相關醫學專欄：乳癌警號三：乳頭凹陷、皮膚下陷及乳房橙皮紋
香港乳癌及乳病治療中心 
我兩邊乳房皆有良性腫瘤（曾有外科醫生抽過針證實），我兩邊既乳頭都因此凹陷左，假如日後有小朋友的話，會否影響餵母乳？
乳頭凹陷餵哺母乳雖然難少少，但都仲係得嘅。
我今年43歲。5年前做一次婦科check，婦科醫生話我知我乳頭凹陷問我知唔知道，我一直都冇留意亦冇為意。前日剛照左乳房Ultrasound同第一次做乳房mammogram, 個醫生又問我我知唔知乳頭凹陷，原來我自己一直都冇為意，我唔清楚我係咪天生定後天？
對上一次做ultrasound 已經係8年前，但個醫生冇話我知我乳頭凹陷，個年個 report 係靚仔既冇特別。
所以我有疑問我唔知道我乳頭凹陷屬於什麼程度。
– 我需要去見醫生睇吓我乳頭會唔會有問題呢？
– 會唔會如文章講可能有機會生癌？
– 我需要去睇醫生了解我乳頭凹陷係屬於咩程度同可唔可以挽救嗎？
至於前晚既report findings and comments：每邊乳房各一粒well defined oval ~ thick content cysts or fibroadenomata, 建議6個月後再scan 一次。 右邊胸～benign calcification. 醫生講就其餘都冇乜大問題。
謝謝你的回覆。
你今次個report Ok，最似都係天生，唔似生癌。擔心就睇多個醫生，唔擔心就六個月後再照已經OK。