乳房葉狀腫瘤 － 究竟係咩黎㗎？

Posted by in Breast Disease 乳腺病

讀者來函：您好, 本人31歲, 因為媽媽剛剛發現有乳癌第二期, 自己亦有擔心, 於是於化驗所做了乳房超聲波檢查, 報告結果有4粒纖維瘤, 但其中一粒有「分葉」, 佢英文寫有lobulated contour, 叫我去睇婦科, 上網搵搵下婦科, 無意間發現醫生你個BLOG, 先知道原來要睇外科, 但又唔知邊D醫生先屬於乳房外科, 其實有個朋友的朋友係婦科醫生, 佢有睇過我個報告話我係葉狀瘤, 上網search講到好似好恐怖, 又話罕有, 又話會急速長大, 又話要做MRI, 又要做手術, 割左都會復發…所以更擔心, 又唔想講俾媽媽聽影響佢病情, 請問我應該搵咩醫生先適合? 十分迷茫

約法三章

第一次有朋友網上問病，我好樂意回答。因為互動D，先能夠真真正正由你角度出發，幫你解決問題。不過未答之前，約法三章：

1）網上問病，資料一定唔足，起碼冇咗臨床檢查一大資料，所得嘅結論，可以差之毫釐，謬之千里。讀者一定要好小心去理解網上資訊／建議，有咩唔明，始終都係要搵返自己個乳腺科醫生。雖則叫你搵返自己醫生，係咪完全冇野可講／冇野可學呢？又唔係，一啲原則性／大方向嘅野，就係你要知黎保護自己嘅東西。

2）我唔會個個問題都答，好多時呢啲網上信箱，開頭搞就好似好正，之後就越答越馬虎。再者，人人情況唔同，擔心嘅嘢唔同。答得你問題，第二個人睇又會覺得「關我咩事？」所以答問題嘅原則，就係睇吓你條問題有冇觸及一啲我冇講過／未講到嘅乳癌／乳腺病資訊，希望做到每篇文都係含金量高，咩人睇都係有得益嘅。

3）如果你來信好耐，我都仲未回覆，有兩個可能性：一係我太忙，冇時間寫文，希望你見諒；一係就已經有文章提及，希望你慢慢爬文。

明白規矩？好！我地一齊去幫吓呢位朋友，睇吓從中又學到D咩：

遺傳性乳癌

「本人31歲, 因為媽媽剛剛發現有乳癌第二期, 自己亦有擔心⋯⋯ 」

有睇過「乳癌症狀 ： 我係咪生乳癌？」嘅朋友，都應該知道年齡係一個好重要幫你估你有冇事嘅因素。讀者31歲，唔係好後生（20歲一定冇事嗰D），又唔係好老（70歲高度懷疑有野）嗰類。呢個年紀，開始有機會有野（雖然唔係好似40歲咁乳癌發病率急升），始終媽咪都有野，所有野都係小心D好。

「咁究竟我有幾大機會有事呢？」

仲記唔記得「乳癌成因：我易D生乳癌嗎？」裡面提過嘅乳癌風險計算機 Breast Cancer Risk Assessment Tool ？

我地一齊試吓計一計，當你嘗試入你D資料入去，第一樣你會發覺原來年齡最起碼都35歲。咩意思？即係35歲樓下嘅乳癌病發率真係好低（不過唔係冇可能），計都冇得計。我地假設佢冇咩特別，除咗媽咪最近有事，入咗以下假設性資料入去：

乳房超聲波檢查

圖片來源：National Cancer Institute

得出以下結果：

乳癌

圖片來源：National Cancer Institute

原來未來5年你有事嘅機會率係0.15%（唔記得點解要除2就返去上文溫下書），其他正常35歲女性就0.1%。唔好忘記你只係31歲，機會率係再少D，假設係0.1%，即係1000個你咁嘅人先會有1個中招，所以小心係要小心，不過另一方面，又唔好高估自己風險，自己嚇死自己。

 

「唔係喎，乜乳癌唔係會遺傳㗎咩？我阿媽啱啱確診喎，我冇理由咁低機會㗎？」

 

我地一齊睇睇癌症權威National Comprehensive Cancer Network 嘅指引，就乳癌遺傳方面點講：

乳癌症狀

圖片來源：NCCN Guideline

原來阿媽（第一直系親屬first degree relative）有乳癌，都要睇埋佢幾時病發先知／估關唔關遺傳事（當然仲有其他因素，詳細自己睇上圖，睇吓中唔中高危因素）。因為我地知道遺傳性乳癌通常會早病發過非遺傳性乳癌，呢度醫生用45歲做一個分界。讀者31歲，媽媽睇怕都五十幾先有乳癌，如果冇以上其他高危因素，你有乳癌嘅機會其實唔會高過常人好多，同以上乳癌風險計算機計到嘅係吻合嘅。

 

「你話就咁話低機會率姐，我咁黑仔，會唔會都中㗎？」

 

要醫生比D實在D嘅答案你究竟有事定冇事，咁就要做返我成日講嘅乳房檢查三步曲。

BI-RADS 系統

 

「我於是於化驗所做了乳房超聲波檢查, 報告結果有4粒纖維瘤, 但其中一粒有「分葉」, 佢英文寫有lobulated contour, 叫我去睇婦科⋯⋯」

 

讀者做得好啱，驚自己有事，梗係去照一照乳房。照超聲波亦完全正確，因為佢係31歲，係唔洗照X光嘅（詳見乳房檢查三步曲2－造影檢查）。咁究竟應該去邊度照好呢？我通常都反對在沒有醫生轉介下直接去化驗所照乳房，主要原因不外乎沒有醫生跟進，容易遺漏一D重要的結果／建議。

 

「我照咗喇喎，點知呢間好唔好？」

 

你睇返之前「乳癌醫生－睇咩科先啱？」就會知道乳房有事，要搵嘅係乳腺科外科專科醫生睇。

 

「我好擔心個報告，係睇乳腺科醫生之前，有冇辦法自己了解一下？」

 

極精明！乳房影像報告DIY，慳返過千診金⋯⋯馬國權醫生
乳房BIRADS3粒粒，原來要咁樣處理⋯⋯馬國權醫生

如果係做開照乳房嘅放射科醫生，寫報告通常都會跟美國放射學學會（American College of Radiology）嘅BI-RADS 系統。如果你個報告有寫明BI-RADS幾，恭喜你，你可以嘗試跟住個系統去了解一下自己情況。

 

「咁咩係BI-RADS系統？」

 

佢係一個等醫生之間可以有更好溝通嘅系統（放射科醫生用黎話比乳腺科醫生知有幾可疑生乳癌），詳見下圖：

乳癌成因

佢分咗7個級別，乳腺科醫生／你只要跟住個級別，就知生乳癌機會率，同埋應該點做。

1）BI-RADS 1/2，即係正常，咩都唔洗搞。

2）BI-RADS 3，應該良性，選擇性抽組織。

3）BI-RADS 4，可疑，要抽組織。

4）BI-RADS 5，非常可疑，快D去抽組織。

係咪好簡單？快D自己對一對。嗰D「咩分葉／lobulated contour」係比醫生睇嘅「過程」，唔好理佢，因為正規嘅放射科醫生點都要下個BI-RADS結論，你睇結論得㗎喇，因為你已經夠煩夠亂，唔重要嘅野就唔好理。

乳房葉狀腫瘤

 

輕視乳房葉狀瘤，健康遠你而去⋯⋯馬國權醫生
少女乳房有粒粒，唔通生乳癌？| 乳腺纖維瘤 － 其實好簡單｜馬國權醫生

「有個朋友的朋友係婦科醫生, 佢有睇過我個報告話我係葉狀瘤, 上網search講到好似好恐怖, 又話罕有, 又話會急速長大, 又話要做MRI, 又要做手術, 割左都會復發…所以更擔心」

 

咩係乳房葉狀腫瘤呢？如果你想上網查，英文係phyllodes tumor。

乳房粒粒，良性會唔會變惡性？馬國權醫生

「有冇毒？良性定惡性？」

 

可以良性（benign），可以中性（borderline），可以惡性（malignant），亦都可以由一款變另一款，就好似無間道咁，你都唔知華仔係好人定衰人。

 

「咁我點先確診？」

 

MRI係冇用嘅，超聲波度睇，其實乳房葉狀腫瘤同乳房纖維瘤可以好似，好多時都係分唔到，要抽組織「乳房檢查三步曲3－抽組織檢查」先知。記住係抽粗針，幼針係分唔到乳房葉狀腫瘤同乳房纖維瘤嘅（即係抽幼針話係乳房纖維瘤可以原來係乳房葉狀瘤）。不過抽粗針都唔係百分百靈敏，有兩三成機會係假陰性（即係明明係乳房葉狀腫瘤，但佢話冇野），所以如果臨床有懷疑（例如急速長大）而抽粗針冇野，可能要做手術割出黎先確診到。

 

「係咪好罕有？」

 

對於乳腺科醫生黎講，其實好常見，當然唔夠乳房纖維瘤／乳癌普遍，大概一比一百度啦。

 

「係咪會急速長大？」

 

要視乎良性／中性定惡性。佢係可以急速長大嘅。

 

「如果我嘅腫瘤係屬於生長速度快嘅葉狀瘤，會唔會係等見醫生嘅兩、三個月內，有好大影響？」

 

幾個月通常都冇咩影響，乳房葉狀瘤講緊生長速度快，係大概講緊半年大1-2cm，對手術影響幅度好微。相對罕見／最惡嘅腫瘤－肉瘤（sarcoma），根本微不足道，人地講緊兩三個月內大5-6cm。叫得罕見，你唔洗擔心自己有，因為生得咁快嘅腫瘤，你唔會摸唔到／唔知道，仲慢慢坐係度上網搵資料，你會飛的去急症室，而佢都一定會收你入院。

 

「咁如果我舊野唔急速長大，喺咪即係冇事？」

 

唔係。舊野急速長大只係一個警號話比醫生聽，唔係普通乳房纖維瘤咁簡單，要諗吓會唔會係乳癌／乳房葉狀腫瘤。舊野唔大，雖然可以係良性乳房葉狀腫瘤，但唔好忘記佢可以變惡，所以急唔急速長大係唔影響治療方向，唔好當冇野唔理佢。

 

「咁點醫？良性／中性／惡性嘅乳房葉狀腫瘤處理方法上有冇唔同？」

 

一定要切，仲要夠切底，紙囗位／邊界緩衝區（margin）要1cm以上。如果唔係，好易翻發。因為乳房葉狀腫瘤好似無間道咁，良性可以變惡性，所以手術上係冇唔同，都係要切多D （wide local excision），之後加減電療（中性／惡性先要）。佢係唔洗做腋下淋巴手術／化療／標靶治療／食藥嘅。因為有機會變／翻發，所以要定期覆診。

乳房問題睇咩醫生？

 

「請問我應該搵咩醫生先適合? 十分迷茫」

 

你要搵乳腺科外科專科醫生。「乳腺科」喺政府係外科部門其中一個團隊，你拿住封轉介信比外科乳腺科就得㗎喇。如果你想去搵私家醫生睇，就搵外科專科醫生，因為「乳腺科」並唔係一個醫務委員會認可嘅銜頭，佢只代表嗰個醫生專攻嘅範疇。千祈唔好急就章匆匆割咗去，因為割乳房葉狀腫瘤對紙囗位／邊界緩衝區（margin）嘅要求仲多過割乳癌（乳癌只需1-2mm），割唔清／割唔夠係要返手的。

總結吓有咩學到：

1）原來屋企人有乳癌都唔一定係遺傳性，好多因素要睇（見上圖）。其實95%嘅乳癌係非遺傳性，即係你見人講嘅偶發性（sporadic），簡單D講即係「咁啱得咁橋」。

2）唔好唔經轉介直接去化驗所照乳房。

3）世界上有樣叫BI-RADS嘅系統，睇乳房造影結論原來可以好簡單。

4）懷疑自己有乳房葉狀腫瘤，都係離唔開乳房檢查三步曲，抽就抽粗針，確診後搵乳腺科外科專科醫生局部割（Wide local excision）

 

相關醫學專欄：乳房造影解密

馬國權醫生

乳房百寶箱四：鬼馬多端的葉狀腫瘤

乳房葉狀腫瘤

封面圖片來源：電影＜無間道＞