荷爾蒙受體陽性乳癌-是福還是禍?

Posted by in Anti-hormone 荷爾蒙治療, Subtype 乳癌分類

以前乳癌我地了解得冇咁深時,所有治療都好簡單,睇期數對號入座,就好似入咗一間冇咩選擇的茶餐廳咁:侍應:「你咩期呀?一期A餐,二期B餐,三期C餐,四期D餐。」

慢慢當我地了解乳癌越來越多,成日會聽到「乳癌點止期數咁簡單」、「乳癌個人化治療」等等。

咁究竟有幾個人化?有幾唔簡單?今次應讀者要求,寫下荷爾蒙受體陽性乳癌,究竟它是福還是禍?

荷爾蒙受體陽性乳癌定義

唔知你仲記唔記得,好耐以前講過,乳癌有三樣好重要的指標,就係雌激素受體(Estrogen Receptor,ER)、孕酮受體(Progesterone Receptor,PR)同HER2受體。頭兩樣就係你成日聽到嘅荷爾蒙受體。

荷爾蒙受體陽性乳癌就係指以下三種情況(唔洗理會HER2 status):

1)雌激素受體陽性(ER+ve),孕酮受體陽性(PR+ve)
2)雌激素受體陽性(ER+ve),孕酮受體陰性(PR-ve)
3)雌激素受體陰性(ER-ve),孕酮受體陽性(PR+ve)

「我點先知我係咪雌激素受體陽性(ER+ve)?或者孕酮受體陽性(PR+ve)?」

手術前,就睇粗針報告。(伸延閱讀: 乳房抽針檢查 - 乳房檢查三步曲3
手術後,就睇手術病理報告。(伸延閱讀:病理報告的八大重點

報告裡面有一個分數,通常公立醫院就會出Allred Score(滿分8分),私家醫院就可能會出埋H score(滿分300分),大部份情況下,兩個是但睇一個就得。

Allred 0分或者2分(註:冇1分嘅),就係陰性(negative)。
Allred 3-8分(註:有D醫生當3分係踩界),就係陽性(positive)

H score 個定義就模糊D,有D醫生當50分或以上就係陽性(positive),有D就要H score 100-300分先算。

攞返個報告出黎,對一對分數,就知自己係唔係荷爾蒙受體陽性乳癌。

「我正正就係荷爾蒙受體陽性乳癌呀,咁佢有咩咁特別?」

啱你就可以睇埋落去,我會分開荷爾蒙治療篇,荷爾蒙標靶篇,同荷爾蒙化療篇去深入解釋吓佢嘅特性。

如果你唔係荷爾蒙受體陽性乳癌,請移玉步去:

三陰性乳癌 - 係咪真係咁惡?

乳癌類型巡禮 - 與你細數HER2型乳癌的歴史

荷爾蒙治療篇

「我知吖,你之前講過要食藥吖麻~」

聰明!不過之前冇睇開嘅病友,可以睇咗以下幾篇基礎文章溫下書先,我地先再進階D討論落去:

乳癌荷爾蒙治療 - 點解我仲要食藥?

乳癌荷爾蒙藥-究竟食咩藥?

乳癌荷爾蒙藥-不同年紀嚴選最正確食法

重點一:身體越多女性荷爾蒙刺激,荷爾蒙受體陽性乳癌就生長得越快

「咁點先可以對抗女性荷爾蒙刺激?」

我地先要了一了解敵人係邊度,先可以先下手為強。

收經前,女性荷爾蒙主要由卵巢製造。而收經後,女性荷爾蒙主要由脂肪轉化男性荷爾蒙而來。姑勿論女性荷爾蒙點黎,佢地最終都會痴落去乳癌細胞的荷爾蒙受體度,從而刺激乳癌細胞生長。

荷爾蒙受體陽性乳癌

「呢度我都跟到,咁同治療有咩關係?」

第一樣要介紹嘅,就係最多人用嘅三苯氧胺Tamoxifen,佢就係針對荷爾蒙受體嘅藥,原理就好似音樂椅遊戲咁,睇吓邊個霸到將櫈先。原來Tamoxifen好厲害,佢一坐就坐咗落「荷爾蒙受體」呢張櫈度,咁就算有「女性荷爾蒙」黎到想搵櫈坐,sorry,冇位喎(就好似地鐵關愛座咁,不過呢次「女性荷爾蒙」當然唔值得關愛),咁自然刺激唔到癌細胞。

荷爾蒙受體陽性乳癌

「咁咪一天都光曬?」

故事發展到呢度,好似D師奶劇咁,點會咁一帆風順。冇錯,現實中「女性荷爾蒙」有時都幾厲害,會比佢攝到埋黎(拿拿拿,我冇話過咩人呀,你自己歧視人咋)。

「咁咪死火?」

編劇黎到呢D位,當然係制造吓緊張氣氛但唔會比你死嘅,下一招就係源頭減廢。

「咩叫源頭減廢?」

既然霸未必夠你霸,我地一於斷你「女性荷爾蒙」米路。如果未收經,「女性荷爾蒙」來源係卵巢吖麻,我地一於對付卵巢,亦即你可能都聽過嘅「抑制卵巢」(ovarian suppression)

荷爾蒙受體陽性乳癌

「實際點操作?」

實際有三個方法,詳情暫且從簡,如果唔係收唔到筆:

1)每個月打停經針(例如zoladex)
2)做手術切咗卵巢(bilateral oopherectomy)
3)電死個卵巢(ovarian ablation)

「但我已經收咗經,又點算?」

收咗經嘅女士,「女性荷爾蒙」主要來自脂肪轉化,所以我地為咗針對呢個轉化過程,設計咗一類藥,就係芬香環轉化酶抑制劑Aromatase inhibitor (AI)。Al得三隻,non-steroidal AI兩隻anastrozole (Arimidex),letrozole(Femara),steroidal AI一隻exemastane(Aromasin) 。

荷爾蒙受體陽性乳癌

「咁咪一天都光曬?」

仲未可以開心住,現實中我地發現就算用曬以上法寶都好,都仲有D荷爾蒙受體陽性乳癌係唔受控制,為咗針對呢D漏網之魚,我地轉一轉思維,今次唔針對上游源頭,今次直接針對下游「荷爾蒙受體」呢張櫈,呢隻藥就係抗荷爾蒙針Faslodex(fulvestrant)。破壞埋你張櫈,等你女性荷爾蒙想坐都冇得坐。

荷爾蒙受體陽性乳癌

「原來咁多選擇~」

所以除咗簡單咁用單一Tamoxifen/AI之外,第二線情況醫生可能會混合咁用,例如ovarian suppression +AI,或者AI+Faslodex,千變萬化,不過萬變不離其宗,主要都係由上面四個方向著手。

睇到呢度,應該都嘔。不過如果你仲頂得順,下面有好野益你,就係進階荷爾蒙標靶篇。

荷爾蒙標靶篇

「咩係荷爾蒙標靶?」

之前講標靶治療,一路都係指針對HER2呢個靶的治療。(伸延閱讀:乳癌類型巡禮 - 與你細數HER2型乳癌的歴史

但原來近年醫學界已經發展出好多新希望,黎輔助荷爾蒙治療,就好似中醫的藥引概念咁,我地叫呢D做荷爾蒙標靶藥。喺某類病人用咗呢D荷爾蒙藥藥引,原來可以激活荷爾蒙藥未開發的潛能。

「嘩,咪好正?」

聽落係就係好正,不過但我地暫時都仲未好精準掌握到,究竟邊類病人最有效?究竟邊類病人冇效?所以暫時一係參加研究性質咁用,一係就試過好多線藥物都唔得時就放手一試。

「咁有咩新希望?」

1)cdk4/6 inhibitor:palbociclib,ribociclib
2)mTOR inhibitor:everolimus (afinitor)
3)PI3K inhibitor:BKM120,BYL719

內容唔詳細講,因為發展日新月異,究竟有幾好?自己啱唔啱用?留返比你問自己醫生。

荷爾蒙化療篇

呢次唔好誤會以為化療可以激活荷爾蒙,情況啱啱相反,某程度上佢地其實係相沖嘅。

「點樣相沖法?」

化療原理係槍打出頭鳥,唔理你係癌細胞定正常細胞,邊個細胞活躍就打邊個。另一方面,荷爾蒙藥係餓死腫瘤,等佢冇咁活躍。如果一齊用,咁咪會荷爾蒙藥令到癌細胞活躍度減低,反而逃避咗化療嘅攻擊。

因此,唔知你有冇留意,如果醫生叫你做化療同荷爾蒙治療,佢係會先用化療(急攻),之後先用荷爾蒙治療(長期慢慢控制),永遠唔會一齊做嘅。

「原來係咁⋯⋯」

其實仲唔止咁簡單,我地仲知道原來荷爾蒙受體陽性乳癌,相比其他乳癌種類(例如三陰性乳癌HER2型乳癌),對化療反應其實冇咁好。

*不過唔好誤會「對化療冇咁好反應」等如「一定唔洗化療」,因為有D「荷爾蒙受體陽性乳癌」係同時帶有HER2受體,呢D叫管腔B型(Luminal B HER2 +ve breast cancer),係要打化療加標靶的*

「對化療反應唔好咁咪弊?」

其實是福不是禍,對化療反應冇咁好,歸根究底,其實係因為佢生長速度慢。

「生得慢咪好囉~」

BINGO,所以同一期數下,荷爾蒙受體陽性乳癌比起其他種類係好好多,少D復發,又長命D,就算萬一擴散咗都可以拖耐好多

「咁對化療反應唔好,實際操作上有咩影響?」

實際操作上,會有以下的影響:

1)少D傾向打術前化療(因為估計反應未必好),多D傾向直接做手術。
2)收經後女士,如果情況合適,手術前可以考慮術前荷爾蒙治療(neoadjuvant hormonal therapy),即係食一輪藥先做手術。
3)年紀大的病友,什至只用荷爾蒙治療,連手術都未必做。(伸延閱讀:老人家乳癌治療攻略-唔做手術/治療得唔得?
4)如果做手術,確定係早期管腔A型(Luminal A breast cancer),傾向唔洗做化療。
5)如果擴散咗第四期,都係傾向食住藥先,除非迫到埋身(我地叫visceral crisis),先做化療。

荷爾蒙治療攻略

終於去到最尾實戰攻略時間,睇得明就明,睇唔明就始終要靠醫生:

情景一:做完手術身體沒有癌,即係輔助性質:

收經前 Tamoxifen/[ovarian suppression +non-steroidal AI]
收經後 Tamoxifen/non-steroidal AI (arimidex/femara)

情景二:身體仲有荷爾蒙受體陽性乳癌細胞,例如擴散咗,即係治療性質:

收經前:[ovarian suppression +non-steroidal AI]/Tamoxifen
收經後:(假設之前已經用過Tamoxifen)non-steroidal AI,失效就 Aromasin /Faslodex,再失效就[Aromasin+Everolimus] /[palbociclib+Faslodex]

唔好誤會以上攻略係唯一的答案,人人情況唔同,再加上新證據越出越快,無可能一本通書睇到老。以上只係2016年11月我點煮呢尾餸,同一尾餸可以有唔同煮法的。

結論

荷爾蒙受體陽性乳癌是禍中之福,我地有好多法寶去控制佢,仲未計研發中的明星藥,好似米雪話齋「日日keep住食,藥箱都變成首飾箱」。

有唔明?係下面寫低佢,我會盡量解釋你聽⋯⋯

封面圖片來源:互聯網