乳房水囊 / 水瘤 - 有冇危險㗎?

Posted by in Breast Disease 乳腺病

乳房水囊 / 水瘤,一個好常見嘅診斷。醫生話我冇咩事,係咪真㗎呢?會唔會不斷長大?將來會唔會有危險?死啦,抽幼針話我非典型細胞,點算?洗唔洗做手術?今篇為你一一解答⋯⋯

讀者來函:「Breast HK,你好!!! 我剛剛結婚,之前去左家計會做婚前檢查,家計會醫生觸診有硬塊,寫紙俾我去私家照超聲波。超聲波報告寫﹕Ultrasoundography of the breasts shows normal echo patterns. Bilateral multiple breast cysts and no solid breast mass is detected. 家計會醫生告訴我沒事了,最好定期檢查。究竟什麼是breast cysts?」

今次我地又幫吓呢位朋友,睇吓學到D乜?

乳房水囊咩黎㗎?

乳房水囊(Breast cyst),顧名思義,即係喺乳房度有個,個囊裏面載住D。你可以睇成小朋友用黎掟人D水彈咁(氣球入面有D水)。水囊係良性嘅,唔會變惡,好多女性都有(文獻記載可高至四成女士都有)。

「點解無端端有水?」

D水係正常乳腺分泌,積聚埋一齊加上有個囊(包膜)就成為水囊,情況就好似暗瘡咁。

「咁咩係水瘤?」

乳房水瘤(Breast cystic tumor),顧名思義,即係喺乳房度有個腫瘤(有舊野),個瘤裏面有水。叫得腫瘤,可以係良性(例如intracystic papilloma),又可以係惡性嘅(例如intracystic papillary carcinoma)。相比起水囊,水瘤就罕見好多好多,平時門診見我諗500對1度啦。

「咁似嘅,咁水瘤同水囊點分?」

臨床係冇得分嘅,都係摸到一舊/幾舊硬塊。因此有D醫生都費事煩,直接叫佢地做囊腫(水囊加/或腫瘤)算數,之後再做乳房檢查三步曲(照超聲波加抽針)去確定良性定惡性。佢地嘅分別在於喺超聲波(呢個情況乳房X光係冇用嘅)底下嗰樣唔同。

「我個超聲波報告寫住Bilateral multiple breast cysts and no solid breast mass is detected. 咁即係水囊定水瘤?」

佢咁寫得,即係水囊,可以放心。

「咁係超聲波底下,水囊同水瘤個樣有咩分別?」

最簡單就係睇結論,究竟係BI-RADS幾(唔知咩係BI-RADS嘅,去睇返乳房葉狀腫瘤),就知下步點做

如果你個報告廢廢地,冇BI-RADS結論嘅,就自己對吓有冇以下特徵:

1)簡單水囊(simple cyst):邊界清晰(well-defined margin),內裏冇回聲(internal anechoic),後面有回聲增強(posterior acoustic enhancement),冇實心餡(no solid component)。簡單水囊係良性嘅。

乳房水囊

圖片來源:互聯網

2)水瘤/複雜水囊(cystic tumor/complex cyst):厚牆壁(thick wall),有間隔(septa),有實心餡(solid component),後面沒有回聲增強(NO posterior acoustic enhancement)。複雜水囊係要抽組織嘅,因為可以係惡性。

乳房水囊

圖片來源:互聯網

幾時要抽針?

「我去埋政府醫院,醫生叫我做一次FNAC(幼針),抽左3個位置⋯⋯」

如果超聲波個樣係典型簡單水囊,可以針都唔洗抽,因為超聲波都夠準確。

「咁幾時先要抽針?」

1)臨床檢查有舊野,後生女,又未做超聲波時。 

2)水囊好大/好脹/好痛,主要係抽咗D水,舒緩病徵。 

3)水瘤,主要抽囊裏舊實心餡(solid component),睇下有冇毒。

 

幼針嘅細胞分類

「點知一個位置的幼針REPORT話: Showed mild cytologic atypia,醫生就話即係細胞輕度異型,其實係咩黎?」

抽幼針,就係用針吸啜D細胞出黎,係顯微鏡底下睇吓細胞個樣衰唔衰,大部份醫生都用開英國 NHS 嘅報告系統去溝通(求知慾強嘅可以參考 http://www.cancerscreening.nhs.uk/breastscreen/publications/nhsbsp50.pdf),想簡單實用嘅,睇下面介紹得喇:

其實病理科醫生去判定D乳腺細胞正唔正常,就好似D評判判定D準亞洲先生正唔正常一樣。有五個可能性:

C1 - Inadequate for diagnosis 樣本質量有問題,不能下結論。其實好多時(三四成)都會係呢個結果,原因可以係技術上局限,又可以係病人本身個情況細胞好稀(例如水囊全部都係水),以致病理科醫生唔敢下結論。總之就係冇結論,白白抽咗一針。你可以做嘅就係觀察住先(如果覺得良性),一係再抽針(如果驚惡性)(注:抽粗針係唔會有呢個抽完針都冇結論嘅情況,所以如果有可疑,直接抽粗針啦)。情況有如亞洲先生面試,都冇人黎參加(唔夠細胞),評判(病理科醫生)唔能夠下結論。

乳房水囊

圖片來源:互聯網

 

C2 - Benign 良性。細胞(準亞洲先生)個樣正正常常,完全冇可疑,一睇就知良性。不過如果臨床/造影可疑,你都係要抽粗針。

乳房水囊

圖片來源:互聯網

 

C3 - Atypical cells 非典型細胞。即係細胞(準亞洲先生)個樣少少怪,你話佢良性又良性唔晒,你話佢好可疑佢又唔係。即係灰色地帶要做進一步檢查(即係粗針)

乳房水囊

圖片來源:互聯網

 

C4 - Suspicious of malignancy 懷疑係癌。一部份細胞(準亞洲先生)個樣肉肉酸酸,好可疑。又係要抽粗針去確定

乳房水囊

圖片來源:互聯網

 

C5 - Malignant 癌。全部細胞(準亞洲先生)都好樣衰,一睇就知係毒(癌/男)。不過幼針都係分唔到D癌細胞有冇侵蝕性,因為只見到樣衰嘅癌細胞,見唔到癌細胞與正常細胞之間嘅關係。

乳房水囊

圖片來源:互聯網

 

要確實知道有冇侵蝕性,要抽粗針睇埋正常組織,先見到毒癌(男)同正常細胞(女)之間嘅關係。以下呢D就有侵入性:

乳房水囊

圖片來源:互聯網

 

點跟進?點醫?

「咁我而家非典型細胞/細胞輕度異型,點算?點跟進?」

要視乎抽完針後仲有冇野剩低

如果係簡單水囊,好多時抽晒D水就唔見咗,就算你想再抽針/做手術都冇得你做,因為目標都冇咗咯。你可以做嘅,就係遲D再照睇吓有冇翻發

如果係水瘤/水囊有實心餡,就再抽粗針去確定有事定冇事,先決定下一步點做。

「醫生話可以考慮做手術,其實幾時先要做手術?」

以下情況可以考慮做手術:

1)惡性水瘤(intracystic papillary carcinoma)。

2)不能定性/有可疑嘅水瘤:例如抽幼針係C4嘅水瘤。

3)簡單水囊:前提係有病徵(脹痛)、加上好大(如果細嘅話,痛未必關佢事)、仲有好困擾(做手術嘅動機)同埋抽幾次針都仲翻發(好多時抽一次/幾次針,抽乾晒D水就冇事,唔洗做手術),先會考慮手術。

將來有冇危險?

「將來會不會變大?」

有可能,積多咗水咪變大(好似氣球咁),不過大唔大都唔係重點,因為大同細嘅處理方法都係一樣。重點係惡性定良性。

「將來會不會有危險?」

同「將來」冇關係,因為水囊同水瘤係唔會變性嘅。本身係良性簡單水囊就係良性,本身係惡性有毒水瘤就係惡性,佢唔似得乳房葉狀腫瘤咁會變。你要做嘅就係喺呢一刻去確定佢有事(非常細機會)、冇事(九成幾機會)定係唔知有冇事(幼針C3-要再抽組織/照超聲波跟進)。

「咁如果我在等待覆診期間懷孕,是否有問題?影唔影響我的生育計劃?」

如果係簡單水囊,同懷孕係冇關係嘅,放心去計劃啦。

如果係惡性水瘤,就醫好先去懷孕。

如果係唔知有冇事(幼針C3),要再抽針/甚至手術嘅,就做埋先計劃,因為唔阻你好耐。

如果係唔知有冇事(幼針C3),已經抽乾晒水,冇野/冇實心餡可再抽,剩係等定期照超聲波嘅,就去馬生小朋友啦。因為通常都冇事,再者叫得做定期照,即係照完呢次又有下一次,沒完沒了,生小朋友係有期限嘅,唔可以無了期咁等下一次。

「還有飲食方面如何去協調?有沒有什麼食療?洗唔洗戒口?」

好多人將乳房嘅所有病痛,都歸咎於雌激素事,認為要戒口(雞/黃豆/燕窩)。

其實咁係幫唔到件事,第一水囊同雌激素冇一個正比例嘅關係,個個女性都有雌激素㗎啦,點解我生佢唔生。就算你硬係覺得關事/要戒口,希望可以藉此減低身體雌激素,但係你又知唔知道身體自己生產嘅雌激素(收經前由卵巢製造/收經後由脂肪製造)係遠遠多過進食所得好多好多?即係點?即係戒口係幫唔到件事,唔洗戒囗囉

伸延閱讀:乳癌食療及食物禁忌 - 戒食雞?戒豆漿?

封面圖片來源:互聯網