乳癌檢查 － 醫好乳癌之後點跟進？
Breast HK，你之前講點醫乳癌係講得幾好，不過相逢恨晚，我已經過晒乳癌治療階段。究竟我醫好乳癌之後應該點跟進？乳癌點check？要做咩乳癌檢查？幾耐做一次先最好？⋯⋯
乳癌檢查
經歷完咁辛苦嘅乳癌治療過程，雖然醫好咗乳癌，但大部份病友已經變得杯弓蛇影，心理日夜受乳癌復發威脅，無論之後做咩乳癌檢查都好，好多時病友都會話：「咁疏呀？可唔可以早D做／做密D？」
「你想做密D咩乳癌檢查？」
「我想做密D唔知咩檢查囉，總之就同我check密D啦⋯⋯」
「⋯⋯」
諗深一層，醫生都未講做咩乳癌檢查，你點平衡好處同風險？未清楚風險，就問可唔可以check密D？
咁同D股民由隔夜嘅財經版收到內幕消息，未清楚風險，就訓身買入老千仙股有咩分別？
圖片來源：蘋果日報
分別就係股民輸身家，病友輸身體。
乳癌檢查4大風險
「乜乳癌檢查都有風險㗎咩？」
當然有風險。風險主要來自4方面：
1）成本風險：檢查係要時間同金錢嘅，越做得密，用得越多時間／金錢。你可能覺得時間同金錢對你唔成問題，但做得密係咪真係好先？想密D做乳癌檢查，舉個極端例子，最好就日日比醫生檢查住、日日照住。咁咪即係同醫生／醫院住埋一齊？聽都覺得「傻的嗎？」。
2）檢查風險：乳癌檢查本身係有風險嘅，簡單嘅抽血要拮你一針，複雜D嘅X光／電腦掃描／正電子掃描係有幅射嘅，照得過量，係人都知唔好。
3）假陽性風險：假陽性即係你本身真係冇野，但檢查話你有野。最常見就係抽血驗癌指數，無端端話你高咗有可疑，搞一大輪先話你冇事，唔計以上嗰D成本／檢查風險，無端端驚餐飽都唔抵啦。另一個常見假陽性嘅就係磁力共振（MRI），所以唔好「係又照、唔係又照」，MRI只適合高危組別嘅病人。
申延閱讀：乳房磁力共振（MRI Breast）－我又洗唔洗照吓？
4）假陰性風險：同假陽性相反，假陰性即係你本身有野，但檢查話你冇野。有D病友覺得乳癌檢查冇野喎，好開心，開心到其他方面掉以輕心，唔留意自己身體狀況，就咁樣被誤導咗，錯過咗早D發現乳癌復發嘅機會。
「咁多風險，我不如唔檢查喇⋯⋯」
咁又唔係咁嘅意思，始終中國人傳統智慧係啱嘅：「病向淺中醫」。合理地檢查，有咩事早D知／早D醫，點都好D。
「咩叫『合理地檢查』？」
就係我上面所講，平衡成效同風險後，得出嘅平衡點。乳癌檢查唔好太密，唔好太疏，唔好做少，亦唔好做多。
「咁呢個平衡點係邊呢？」
我地可以由以下4方面睇起：
1）覆診幾耐？
2）幾耐覆診？（你冇睇錯，兩句野好似嘅，不過講緊唔同野）
3）乳癌檢查方法
4）食藥要注意的地方
1）覆診幾耐？
呢個最易答，就好似你問個衰佬仲愛唔愛你一樣，答案係唔洗諗／唔准諗／一諗就死嘅「一生一世」。
「咩話？！要一世覆診？？」
好奇怪，你買件電器壞咗拎去整，如果保用期係一生一世，你唔會驚訝咁話「咩話？！一世保用？？」，你只會華仔上身咁話：「今時今日，咁嘅服務態度就啱喇」。
圖片來源：香港政府廣告截圖
而家你身體呢件電器壞咗（生乳癌）整返好，要一世保用有咩咁出奇？曾經壞過嘅野比其他人易壞是常識吧。
「我醫好乳癌5年後，醫生叫我唔洗覆診喎⋯⋯」
呢個係大部份公立醫院嘅做法（教學醫院例外），因為資源緊拙嘅關係，如果一世覆診，滾雪球咁累積病人落去，成個系統一定爆煲。所以醫生叫你「唔洗覆診」嘅全句意思係「唔洗返黎我度，請保重身體，記得一世覆診」。
「咁我唔係佢度覆診，可以去邊度地方檢查乳癌？」
病向錢中醫，去私家。
2）幾耐覆診？
呢個就隨住時間而有所不同。因為我地知道大致上乳癌復發嘅機會，會隨著年月減退，所以大方向係啱啱醫好就密D覆診，耐咗穩定咗就越黎越疏。
「有冇D時間表參考下？」
記住，幾耐覆診一次冇絕對「對與錯」，要睇好多因素，包括資源。
我個部門做法就頭2年每3到4個月覆診一次，第3到5年就每半年覆診一次，第6年以上就一年覆診一次。
外國指引（ASCO）就頭3年每3至6個月覆診一次，第4到5年就每6至12個月覆診一次，第6年以上就一年覆診一次。
另一個指引（NCCN）就頭5年每4至6個月覆診一次，第6年以上就一年覆診一次。
3）乳癌檢查方法
「咁我次次去覆診，要做咩乳癌檢查？乳癌點check？」
基本上都係乳房檢查3步曲：問病徴、做臨床檢查、每年照乳房造影。另外視乎情況，加減抽血／照掃描。
「唔係喎，我個私家醫生認為除左年年要做既乳房造影，其他內臟亦要檢測，包括肝、肺和骨：每年做X光照肺＋用超聲波睇上腹腔＋要驗CA15.3癌指數⋯⋯」
公立醫院資源有限，所有野除咗要有根有據之外，最好就乎合經濟效益（cost-efficient），所以我地通常跟外國指引做法。人地指引係會定期更新，所有乳癌檢查都要有證據支持（evidence-based）有效先會建議做。 其中最權威嘅就係ASCO同埋NCCN guideline。
American Society of Clinical Oncology (ASCO) Guideline 全文 https://ascopubs.org/doi/pdfdirect/10.1200/JCO.2012.45.9859
圖片來源：ASCO Guideline截圖
你可以見到，如果喺冇病徴同埋臨床檢查正常嘅情況下，人地係唔建議（not recommended）定期做抽癌指數／照肺／照肝／照骨嘅。因為冇證據話咁樣有效早D發現乳癌復發，從而可以長命D。
National Comprehensive Cancer Network (NCCN) Guideline 
圖片來源：NCCN Guideline截圖
另一個NCCN guideline 就冇建議要做以上檢查。 所以公立醫院係有限資源之下，以上乳癌檢查（除左有D部門會抽癌指數之外）一概不做。
不過guideline唔一定啱晒，因為新證據可以隨時出現。再者，每個醫生都會根據個人經驗去決定跟定唔跟指引。喺私人市場資源相對豐富嘅情況下，當然寧枉無縱，總好過掉以輕心。對於病人黎講，要顧慮嘅就係我上面所講嘅風險等（成本／檢查副作用／假陽性／假陰性）。點樣取捨，真係因人而異。
4）食藥要注意的地方
「食緊藥有冇額外檢查要做？」
有，主要針對抗荷爾蒙藥嘅副作用去處理： 因為我地知道舊藥Tamoxifen，係會增加患子宮內膜癌嘅風險，所以如果食緊Tamoxifen而仲有子宮嘅，人地外國就會建議每年都做婦科盆腔檢查。香港公立醫院資源有限，我地就當有唔正常下體流血，先會轉介婦科跟進。
而食緊新藥AI嘅，因為佢會導致骨質疏鬆，所以會建議每年做一次骨質密度測試（Bone mineral density），去睇吓D骨有冇疏鬆。
結論
你而家應該清楚晒覆診幾耐、幾耐覆診、檢查乳癌方法、食藥有咩要注意。 下一個問題浮現喺腦海嘅應該係「乳癌檢查我一定跟足指示去做，但我平時有咩要注意？乳癌復發／轉移有咩病徵㗎？有冇復發先兆？⋯⋯」
下一篇：「乳癌復發10大病徵 － 你記緊要留意」再見⋯⋯
香港乳癌及乳病治療中心 
多謝Breast HK, 講得好好，好清楚，上面講到的都一直是心中的疑問。
請問維園哥哥：
文中提到的「MRI只適合高危組別嘅病人」，如何界定自己是否高危？
我服了tamoxifen 1年多，因有不尋常出血和長了瘜肉，之後改食Aromasin至今已兩年，骨質密度情況每況愈下，醫生已加重了鈣片+vit D份量仍未有改善，點算好？
高危無一個統一定義，一般黎講以下情況可視為高危：
1）已確定乳癌基因突變，如BRCA1／BRCA2突變。
2）非常後生病發，如35歲樓下病發。
3）好多直系親屬有乳癌／卵巢癌，尤其佢地係好早病發嗰D。
骨質密度下降甚至疏鬆，一般都係用bisphosphonate，例如每星期口服Fosamax，或者半年打一次骨針Zometa。
醫生你好，又有問題想請教你（不知為何，在公立醫院看著醫生的臉，發問竟成為一種壓力⋯）：
太太確診時已是第4期，癌細胞擴散到脊骨。先做化療，紅針打了三次，但胸部腫瘤並沒明顯縮小（也沒長大），公立醫生說在打第四針才作檢討，照一照腫瘤狀況考慮是否轉紫杉醇。請問醫生你意見：療程已進行兩個月，在腫瘤沒明顯縮細下現在療程會否有耽誤病程的情況？如果其他部位有擴散，是否快些處理掉源頭，即切除胸部的腫瘤為先？太太現在身體狀況沒大影響生活質素，所以反而很擔心現在公立醫院的處理方案有否拖延了醫治效率，之後一下子身體會衰退得很厲害，希望醫生你能給些意見，謝謝。（如果問題問得愚眛還莫見怪。）
問題並不愚眛，因為我見到你對太太的愛。
紅針係傳統對付乳癌嘅兩大主力之一，對太太應該係有效嘅（雖然你見唔到腫瘤明顯縮小），公立醫院嘅處理方案並沒有耽誤太太嘅病情。乳癌四期遲早都要用紫杉醇，現階段只要腫瘤唔係明顯增大（明顯紅針失效），紅針繼續用住先係可以理解嘅，因為醫生唔想咁快判紅針死刑／咁快出曬D皇牌。
如果情況失控，擴散至更多地方，切除胸部腫瘤（處理源頭）對宏觀抗癌並冇幫助。相反，應該情況受控，大部份癌細胞都打死曬，切除胸部腫瘤先有意思。另一個情況係胸部腫瘤令到病人好痛苦，例如流血／流膿／劇痛，咁先會喺情況失控下，都去做切除手術。
打個比喻，木屋區石油氣失火（乳癌源頭），開始燒到其他鄰居（開始擴散）。如果情況失控，燒到成個山頭都係山火（擴散至更多地方），消防員衝入去起火源頭清石油氣罐（處理源頭）對宏觀戰况並冇幫助。相反，應該情況受控，大部份山火都救熄曬，清石油氣罐（處理源頭）先有意思。另一個情況係起火源頭令到人好痛苦，例如有人被困／比火燒緊，咁先會喺情況失控下，都去衝入去源頭救人。
謝謝回覆，很淺白的比喻，現在明白很多了！
作為患者身邊人，只有時刻覺得無力及無奈，正是窮得只有愛⋯
已擴散的癌細胞，其實可以如何監察著它們的狀況？現在太太有打骨針，食鈣片及Vit D，當下沒有痛楚的感覺，這刻紅針能對付得了這些已擴散的細胞嗎？醫生暫時計劃打6針紅針，如果之後轉荷爾蒙治療，癌細胞可會仍然受控？我們都想跟那些細胞好好共存，但總有些地方可以讓我們積極些，不致太被動⋯
謝謝醫生。
如果抽血癌指數高嘅話，可以用抽血黎監察住，呢個係最敏感嘅。另一方法，就係照掃描，睇吓有擴散嘅陰影有冇大到／活躍多咗。
紅針會走混全身去追殺癌細胞，至於控唔控制得到就睇嗰天。
謝謝你醫生。
Thank you very much! My mom has just finished 4AC + 4T chemo 1-1/2 months ago. She was doing well throughput the treatment; only that her side effects of feet swelling and numbness have not subsided and I heard this may take a few months or longer time. Can you give me some advice on anything we can do to ease her side effects? She is 75 years old and had triple negative (stage 2 since it was not spread to lymph nodes). I have been wondering about follow up so your article comes in the perfect time. Looking forward to reading your next one 下一篇：「乳癌復發10大病徵 － 你記緊要留意]. Thank you again! Your caring and kindness (and humor) means so much to me.
紫杉醇引致嘅手腳麻痺好難處理，因為冇一隻特效藥去針對呢個問題。病人嘅角度就只可以耐心等待，情況持續就話比醫生聽。醫生可能試唔同嘅藥去睇吓得唔得，最多醫學證據支持嘅係duloxetine（ASCO guideline） ，亦都好多醫生鍾意試gabapentin。
Thank you, 維園哥哥!
已經打了Zometa三年，呢三年間骨質密度一直下降！
咁可以試吓Denosumab。
謝謝維園哥哥回覆！
想再請問：Denosumab效用是否勁過Zometa? 通常病人在什麼情況下用Denosumab?
麻煩晒！
如果講用喺骨擴散嘅情況，Denosumab 相比起Zometa有3個好處：
1）更有效減少以上因乳癌骨轉移引致嘅併發症
2）皮下注射（subcutaneous injection），唔洗吊針（intravenous injection），對打完化療冇晒血管嘅病友尤其吸引。
3）開藥前唔洗抽血驗腎功能去教劑量
如果講骨質疏鬆，Denosumab係增加脊骨骨質密度方面好少少。
明白，多謝維園哥哥百忙中騰出寶貴時間回覆！
您好,我三月開始食tamoxifen,我的婦科醫生不建議量度子宮內膜厚度,認為無助及早發現子宮內膜癌,反而會令人做多一些不必要的手術,例如刮宮,他建議每年一次抹片檢查,不過我知道很多病友都每半年睇婦科量度子宮內膜厚度,究竟我應唔應該信我的婦科醫生?
呢方面我唔在行，唔敢妄下結論。不過我覺得你婦科醫生嘅建議合情合理，同我地一貫做法吻合。
唔該晒!
Breast HK,
你好。剛完全療程半年了。請問超聲波，乳房造影需要半年一次嗎？私家跟公立醫院都有不有同的說法。
局部割？或是全乳房切除？
如果係局部割，嗰邊乳房仲有冇其他陰影／鈣化點？
醫生你好，我是在政府醫院做治療的（手術、化療、電療、)，請問如我除了繼續在政府覆診，可否另外搵私家醫生每隔一段時間覆診嗎，因政府每次都唔同醫生，兼且好多後生仔啊，似經驗尚淺……，如醫生常說的:俾唔到信心我…..驚驚地，請醫生可否給一點意見，謝謝!
當然可以，搵多個醫生睇，幫吓眼減少甩漏。
多謝醫生以神速回覆!宜家安心啦。
醫生您好！
我完成化療後服用Tamoxifen 接近一年，剛剛發現得了脂肪肝，醫生説以我年紀(39歲)來說算頗嚴重，要轉介肝臟專科，但由於冇咁快有得睇，想問問醫生你意見。我在網上找到一些文章指出Tamoxfien引發脂肪肝，以及一些外國病人指停用Tamoxifen 後脂肪肝好轉。我怕我乳癌沒復發但因肝病死了，哪我該立刻停服Tamoxifen 嗎？謝謝你
雖然脂肪肝可以導致肝硬化，不過唔會咁簡單就話停藥，好多因素要考慮（例如本身係唔係肥胖、血脂／膽固醇水平、有冇其他肝病／肝炎帶菌、有冇其他藥物可以取替、乳癌有幾惡等等），呢度唔合適胡亂去評估，建議問返自己醫生。
Breast HK 你好！我今年35歲，吃了Tamoxifen一年半，經期由發病前的極度不規則變為非常有規律。今天(生理周期的第10天)起床後突然出現上文提到的「唔正常下體流血」，量不多且很快停止了，這情況令我陷入極度不安中。我有在公立醫院定期覆診，但下次覆診時間是明年4月。想向你請教一下我現在應該要到哪裡求醫最好呢？
唔洗咁驚住，一次半次就可以觀察住先，問題持續先去揾婦科睇。
很感謝醫生你的回覆~~
之前忘了說，不正常的流血就只是昨天出現了一次，但同時我感覺肚臍對下位置有點不舒服，像是「谷」住，用手大力按下去間中會覺得痛。這種不適之前一、兩個月曾經出現過，好像持續一、兩天，之後又會消失了，所以我也沒為意。請問這會是子宮內膜病變的症狀嘛？
聽落唔似。
媽咪於今年1月確診，T2N0,Ki67 60%, grade 3,做左局部切除手術之後打4針T針，之後電療25次，已於今年6月完工晒治療，而腫瘤科醫生話媽咪係三陰所以建議媽咪頭2年每半年做一次正電子掃描+腦部MRI,同埋乳房造影+超聲波，請問是否有需要每半年做？會唔會太密？正電子是否輻射很高？做得咁密是否有反效果？
跟guideline就唔洗做正電子掃描同腦部MRI，乳房造影同超聲波就一年一次。
做多咗／做得太密的反效果就係金錢／時間／輻射／假陽性等風險。
媽咪半年前照完醫生話報告左邊有2粒，右邊有一粒，觀察下先，咁最近（半年後）再照醫生話哩3粒野無變化到，可以唔使理，繼續半年觀察住。咁我想問哩3粒野會係咩？半年無變化就可以嗎？如果係唔好野半年就會有變化嗎？會唔會哩半年無變化但之後變？係唔係可以割左佢唔使擔心？
太多可能性，無可能憑一兩句描述就輕率下結論，只可以問返自己醫生。
醫生你好，2014 年證實 DCIS 做手術+電療， 2015 年又證實是 LCIS 做手術前亦做埋 PET scan 冇擴散，今年約私家醫生檢查時，醫生建議做 MRI,因為比 mammography 清楚D，但我疑問是2次都是原位癌都算高危嗎？好似睇過你提及高危先需要做 MRI, 以後是否都需做 MRI 來取代 mammography 檢查呢？
其實有2次原位癌經歷，其中一次係LCIS，可以算做高危。至於係咪要做MRI去跟進，冇實質證據去支持／反對，國際間專家認為呢個情況「可以考慮額外做MRI」。注意係額外做，並不是取替mammography。
明白，謝謝回覆，會爭取先做 mammography,其他再議。
醫生你好，我屬於高危病人(兩年前32歲發病，her2 (3+), ER(0), PR(0), stage 2B (T2N1),淋巴共2粒感染，其中一粒是前哨，另一粒是全淋巴切除後找到，乳房全切。已完成化療TC×6+H×18及電療+局部再加電。最近驗癌指數CA153正常，但CEA升至5，數星期後驗多一次又再升至6，已預約PET/CT scan。請問遠端轉移的可能性大嗎? 若非復發，為可指數會比正常高出一倍? Thanks.
高危病人加上指數高要小心處理，冇得估機會大唔大。指數係可以唔準，間唔中都有病人長期高但又揾唔到原因。
明白，謝謝醫生
維園阿伯：
請問AI一般食幾多年？5 年定10年？
一般食5年。不過近呢幾個月，多咗人討論10年AI。主要因為喺ASCO 2016公佈咗一個MA.17R的研究結果，話食10年femara，相比5年femara，5年後冇復發由91％提升至95％，而每年對面乳房有癌的機會則由0.49%降到0.21%。但係研究證明唔到5年整體存活率有分別，食10年94％5年後仲係度，食5年則93％5年後仲係度，統計學上唔可以話因為隻藥而導致有分別。
佢今次公佈只係以abstract form，full paper都未出，現階段我唔會咁倉猝下結論，只可以話拭目以待。
多謝阿伯回覆。
阿伯:
可否再給我意見, 到底現在停 AI 還是10年AI ?
病歷如下 :
現52歲
Oct 2010 (Left)確診 Stage 3C
Total Mastectomy
18/25 淋巴擴晒
Histologic grade 2
Nuclear grade 2-3
Ki67 – 3 (有做術前化療)
ER 260/300
Jan-2016 (Right)確診 DCIS
Total Mastectomy & Left Right tube + ovary 切除
ER/PR Negative
Ki67 – 17
DEXA :
T Score – Lumbar spine -1.6
Left Femur -1.8
因為骨質疏鬆, 醫生隨我選擇繼續AI 與否, 麻煩你 !
Stage 3C就食10年AI啦，高危復發食咗起碼求安心。無事無幹當然覺得應份，如果萬一復發，食咗10年Al自覺已經盡咗力，如果冇食10年AI必定怨天怨地。
T score -1.8未去到骨質疏鬆（osteoporosis），早期疏鬆姐（osteopenia）。
多謝寶貴意見！
你好。多謝你話個咁清豐富同清晰嘅網站，讓我由確診到治療都有清晰嘅指引。我係1期b HER 2乳癌，在私家做完4針化療加標靶後轉去瑪麗打標靶加賀爾蒙治療，上個月醫生話佢地會安排做完化療嘅病人做CT睇下有冇擴散，我上個月便做咗胸，腹同骨盆照CT, 下星期又要照腦CT。我担心照得太密，幅射會否太多?為什麼腦CT 不與上次一起照呢？我話比醫生聽隻腳冇力，佢又安排下個月我照骨掃描 bone scan,怕唔怕太多呢？醫生肯安排比我照係好，但真係担心照得太多。煩你給建議。
SK Wong
如果唔做PET Scan，一般都係照CT加Bone Scan去取代，咁照好常見，唔洗怕過多幅射。不過CT一般只照胸腔／腹腔同盆腔，至於醫生點解想照埋腦，就要問返醫生。
醫生, 想問吓乳房造影及超聲波是否一定要一齊做? 我13年確診,15年頭完成了化療,電療及標靶,現在仍服用 Tamoxifen,手術及所有療程都是在政府醫院做的.他們說由於資源問題,我只有在2015年一齊做過乳房造影及超聲波檢查,去年和今年都是只有乳房造影而沒有超聲波檢查,醫生說如果想做的就要自行找私家醫院做,我想問問超聲波是否一定要做?如要做,是否連乳房造影也應一併去找私家醫院做?謝謝!
冇話「一定」要做，不過有乳癌病歷的病人，我一概會建議做。比個粗略概念你，就咁照乳房x光，有乳癌而被發現的靈敏度大概8成（當然視乎本身乳房密度會有高有低），如果加埋乳房超聲波，靈敏度會增加到9成半。呢15％對普通人可能唔大分別，因為本身冇事機會多，但對於一個乳癌復康病人就十分緊要，有事冇事可以率涉生與死的分別，所以有乳癌病歷的病人，我一概建議兩樣做曬。
如果決定做曬兩樣，當然一併做好過分開做，因為有咩懷疑可以即時仔細睇清楚，例如x光見到有D可疑，咁照超聲波時就可以反覆睇清楚目標範圍。分開做就冇咗呢個優勢。
你好…………我媽咪今年七十歲，正等待腫瘤報告。我有點担心，知真的不幸確診，以她的年紀，可應付到化療嗎？
要睇需要同身體狀況，有D70歲可以好fit。
你好，好多謝你分享的諮詢。想請問乳癌手術後，通常如果結果是stage1grade1，有部分是invasive，淋巴無事。通常會做些什麼檢查？腫瘤科醫生只是建議whole bone scan和chest xray。bone報告出來沒有明確說有事但是說有地方有healing fracture(外側第八條肋骨兩邊一起)，認為只是healing fracture，和骨轉移沒關係。問醫生，醫生也只是問有沒有跌倒撞傷過，可是也沒有什麼印象。請問需要更詳細檢查嗎？報告有建議說可以更深入follow up排除progression。好害怕。
如果想搞清楚bone scan揾到嘅問題，可以照PET Scan。雖然唔係話你有事，但好少可兩邊肋骨一起骨折而你又唔知撞過的（就算撞過，好難同時撞兩邊而中間冇事）。
有一個骨科朋友都是這樣說，想請問驗血那些可以確認嗎？可是為什麼那個腫瘤科覺得沒事？我是幫家人問，我不敢告訴她叫她繼續檢查。
驗血可能比到一D線索，不過唔係十分靈敏/準確。點解腫瘤科咁睇要問返佢。
想請問你通常第一期病人手術後應該做些什麼額外檢查？有些人做了pet scan發現有問題才做bone scan或其他檢查，這是正常程序嗎？。因為如果可以希望透過除了輻射類檢查的其他檢查來確定是不是有問題。覺得家人精神很壓力。骨掃描報告說no definite osteoblastic skeletal metastases ,也說no specific foci 在兩根第八條肋骨那邊。依你建議，有問題percentage多高？好替家人擔心。謝謝你
手術後一般唔會做額外檢查，要檢查當然手術前做清楚曬先去做手術，唔應該開倒車。
冇得就咁根據你三言兩語去做評估。
好的，謝謝你的意見 會繼續跟醫生跟進 謝謝你的幫助。
您好！我服用了Tamoxifen快1年，這一年中曾有2個月沒有來經，是正常嗎？而婦科醫生建議我做子宮內膜檢查以查看是否由癌症引起，我應做嗎？另，甚麼是水鏡？
Tamoxifen 係可以搞到經期亂。如果由Tamoxifen所引起的子宮內膜癌，係應該唔正常流血，而唔係冇經期黎，睇唔到就住你個病徵子宮內膜檢查有咩價值。
唔知你所講的水鏡指咩野。
婦科醫生話做子宮內膜檢查可做埋水鏡，但並沒有解釋甚麼是水鏡。
咁要問返佢。
是的。最後謝謝您的火速回履以解我的困惑。
请问能从超声波中第一次查到乳癌和发现已经扩散到淋巴吗？谢谢
可以。
谢谢回复。那是不是说明癌发展很快，因为每年做体检都没有发现，一发现就已经扩散到淋巴了？多谢！
再加个问题 – 那是不是最起码是二期？谢谢
係。
唔一定係發展快，可以係一早有事但體檢偵測唔出，因為始終唔係專科。
多谢。所以即使用超声波年年体检，也有可能之前发现不了乳癌？那是不是半年照一次才能预防？
總會有檢查係揾到新問題，唔可以由此推斷要照得密D。
好的，万分感谢。
医生推荐活细胞测试，手术，化疗和电疗。是不是要等活细胞测试结果出来才确定呢？谢谢
抽完組織就確診。
医生已经按照超声波图像确诊是乳癌扩散到淋巴。所以已经订出以上的医疗计划。还要确诊什么呢？不好意思，我实在不懂。谢谢！
組織上確診，加上要知癌細胞屬性。單靠超聲波圖像係可以出錯的，亦都唔會知屬性。
哦，了解了。非常感谢您及时的回复！那也就是说如果查出是三期的，可能治疗计划会修改，因为现在最起码是二期？
可以咁理解。
还有超生波诊断乳癌加扩散出错的可能性大吗？
視乎負責醫生的經驗。
了解了。非常感谢您这么晚了，还尽心尽力的回复！感激不尽！
请问做biopsy能不能看到扩散到几粒淋巴？还是一定要手术割除以后才能确定扩散到几粒淋巴？谢谢。
Biopsy 不能斷定幾多淋巴受影響，要手術才能確定。
（另外，問問題最好去返相關文章度問，等個討論對後來者有意義D。如果當呢篇文章係私人咨詢文章咁，咩都係度問，咁樣離題會影響其他讀者。）
好的，了解。会的。多谢！
馬醫生, 你好, 如果右乳房+淋巴全切後, 是否都要照超聲波及X-RAY?
有事嗰邊超聲波要，Xray唔洗。冇事嗰邊兩樣都要。
Thanks Dr Ma
你好，我18年10月確診，三陽，做全套治療，19年12月中全部治療完，在食舊藥，12月尾照左乳超同乳攝，政府7月頭先覆診，請問如果我搵私家兩邊跟可以嗎？如果你吔，會幾耐覆一次？仲有，好多人講康復幾年？點計？係確診開始計定手術開始，定係打完標靶開始計？多謝你！
可以兩邊跟。
頭兩年每三個月，第三至五年每六個月。
手術日開始計。
好的，多謝你！
醫生你好，母親六十歲，上年七月在私家做了PET scan，確診三陰2B期，在私家做了手術，並在公立化療及剛在二月完成電療。
1. 如果公立安排在今年六月再做PET scan 檢查(一年內)，會否太密，怕太多幅射？
2. 另外你提及首兩年內應三至四個月做檢查，是以做完最一次療程開始計嗎？即是如果二月完成電療，五月至六月期間做超音波及造影檢查？
3. 如在六月做PET scan, 還需要自行安排同時做超音波及造影嗎？或是應該之後隔多久才做？
4. 如果回去私家覆診（因為公立等很久), 應否取得以上檢查報告 (PET scan, 超聲波，造影），才約見私家醫生？
1）係咪太密取決於點解六月要照？有理據，就唔密，冇理據純檢查就太密。
2）以手術日起計。
3）手術後一年。
4）齊報告好D。
你好，想問雙乳已切除+矽袋重建，已在政府2月完成治療，雖然乳腺科有覆診，但都剩係模下頸咁， 咩都冇做， 其實係咪要照ultrasound? 同埋是否每年照一次pet scan?
要定期照乳房。PET scan有需要先照，唔洗每年照。
多謝醫生回覆，想問詳細一點。母親上年7月做pet scan 及局部切除手術，8月開始化療，今年2月完成電療，將於今年6月再按公立做pet scan. 請問何時應做超音波及造影？是手術後一年，即是今年7月嗎？之後首兩年每隔三個月做一次, 即今年10月，下年1月，如此類推？
今年7月照乳房（X光加超聲波）。之後每三個月臨床檢查，如果有超聲波機的診所，就照埋超聲波（準過觸診又冇輻射）。
馬醫生, 我係乳癌病人, 想問每年做乳房(US/MM), CT Thorax (胸肺)同埋肝超聲波, bone scan 是否足夠？ 有冇其他地方要跟進？有需要再去醫院做body check？
如果冇可疑，純粹係定期檢查，以上項目已經足夠。去唔去醫院做body check純粹個人喜好。
我係乳癌三期病人, 一年前完成手術, 化療,電療. 現在食緊AI, 但我的癌指數CA 15.3 有上升的趨勢, 有咩方法可以改善, 好驚
August 2020 – 19.1
March 2021 – 20.7
August 2021 – 22.7
指數都係正常水平以內，就唔睇趨勢嘅。
醫生你好， 我家人進行左乳房切除手術已近三年時間， 最近一次腫瘤科覆診， 因右肩胛骨一直疼痛， 醫生建議再做一次pet-scan (不含顯影劑）， 而對上兩次做pet-scan是切除手術前後 大概三年前， 而那兩次都是有用顯影劑的。
想問我今次再做pet scan 但沒用顯影劑， 對比之前有用顯影劑照出黎的結果 會唔會睇唔清個實際變化呢？ 又可否要求醫院改加顯影劑去照呢？
謝謝你解答
乳癌做PET scan 基本上係唔洗顯影劑嘅，因為地只係睇有冇遠端擴散，唔係考慮點樣切除擴散。之前做多咗，今次唔洗加。
醫生你好， 多謝你的回覆， 家人已經照完pet scan），不幸地在左肺尖頂部發現著左燈， 有異常代謝活動， 而其它地方都沒異常反應。 然後即刻再睇左胸肺外科醫生就安排左係養和做電腦掃描抽針，今日出左結果， 病理報告寫The cells stain positive for TTF – 1 . The reticulin stain shows a loss of basement membrane . The appearances are those of an adenocarcinoma .
我都有心理準備係壞消息， 但唔清楚會係乳癌引起的遠端轉移或是原發性的？ 病理報告也沒詳述。 治療方法會有不同嗎？
黎緊會番政府腫瘤科覆診睇下點應對。
其實半年前都有黎過馬醫生到做定期檢查， 原本諗住12月再番黎覆診，點知又多個肺病， 想問現階段還有需要回來嗎？ 謝謝你
TTF1 positive 即係原發性肺癌，唔係乳癌轉移。壞消息就係又中肺癌，好消息就係唔係乳癌轉移，即係仲有機會有得醫。現階段最需要心胸外科醫生嘅評估，睇吓有冇得切。
馬醫生你好, 我10月確診了乳癌, 10月26日做了左乳全乳切除，主瘤屬三陰性2.1CM , 另還有一粒小的0.6CM(荷爾蒙小小反應), 沒有淋巴感染, KI-67 80% , 見了兩個醫生。
醫生1建議AC+ TC (會加大存活率)
醫生2說AC+ TC , 其中的 Carboplatin是PCL1 +才有用, 沒有對我有幫助，想問兩者說法是否正確？
我要不要打Carboplatin？
另外想問4紅+12白是否效比4紅+4白顯著? 謝謝您
Carboplatin 係比BRCA mutation 嘅病人用。
4紅12白同4紅4白成效相約，因為只係將三星期一針嘅四針白針，以少食多餐嘅形式，拆開每個星期一針（4×3=12）。
馬醫生，如果三陰性乳癌做完手術後要不要每年都做pet scan?因為醫生說不用照得太密，但自己擔心有復發風險，請問係咪一定要用pet scan先睇到有無轉移風險，如果係，又是否應該一年照一次？
唔需要每年定期照PET scan，臨床醫生有懷疑有需要先照。睇有冇轉移唔一定用PET scan，亦可以透過抽血驗癌指數，照低輻射量電腦掃描個肺， 超聲波肝去評估。
醫生您好！首先多謝您地一直為有疑問既病人和家屬解答。我媽媽一年前全切一邊乳房，手術後醫生說ER和PR高分，只需食5年AI藥，沒有化電療。媽媽手術前驗血CEA 1.3、CA125 10.1、CA153 11.1；術後覆檢只驗血，CEA 0.9、CA125 10.4；半年後再驗血CEA也是0.9、CA153 8.8；再半年後即最近一次驗，CEA升至1.1、CA153升至10.3。請問這代表我媽媽有復發嗎？數值微升的意義大不大？謝謝醫生。
數值全部係正常範圍以內，唔擔心，本身係會高高低低嘅，好似體溫咁，只要唔超標就OK。
可以介紹一下淋巴管靜脈吻合術（LVA）嗎? 邊間醫院有得做?
LVA成效唔顯著，所以大部分情況香港都係做淋巴移植加減抽脂。
馬醫生好
想問下自己的術後治療會是怎樣？
我做左lumpectomy +SNB
T1b 5.6mm 右乳R11H, 1cm from nipple
病理報告是
G2
ER 4/8
PR 6/8
Cerb-B2 -ve
Ki-67 5%
請問是什麼類型腫瘤及術後什麼治療？不化療可以嗎？
謝謝
管腔A型。
淋巴有冇感染？
我做完手術。。已經冇哂癌細胞。。醫生問我繼續打標靶嗎？？我真係唔識選擇。。可以解答我嗎
冇上文下理，答唔到。
我係屬於HER2陽性乳癌。。初治療打了6次化療加標靶之後做全切除乳房同前淋巴手術。。醫生同我講話手術切除得好好。。恭喜我已經冇哂癌細胞。。但係又問我繼續打標靶嗎？？那我應該打還是沒有需要打
打。
醫生話冇哂癌細胞。。咁打同唔打有咩分別?
做完手術，手術樣本冇哂癌細胞，證明術前用藥方向正確，標準療程係18針，方向正確自然要完成成個療程。提早唔打會增加復發風險。
醫生你好，3年前睇左你呢度幫助左我好多，最後3個腫瘤雖然都有癌細胞但係0期，不過公立醫院0期無化驗屬性，過左幾年變左有子宮肌瘤同朱古力瘤，婦科醫生話需要打停經針1-3個月有肋手術，婦科醫生話對我乳癌呢邊打針無影響，想問吓係米打呢個停經針唔會影響到復發機會？謝謝
唔會有壞影響。
Thank you 醫生，想問吓可以用止汗劑嗎？一舊石個d標榜無螢光劑
可以。
醫生你好，媽咪IIB手述後未有一年，有食緊荷爾蒙藥，但最近驗血ca153超標，可以有咩跟進
乳癌指數高咗？一分鐘學會處理⋯⋯
https://youtu.be/BUv2RsltUQk
醫生你好，我上年已完成右邊乳房切除手術，術後醫生話我是0期，無需做化療及電療，但一年後需再做乳房檢查，請問我應該做D咩檢查呢？抽血？超聱波？還是········
夾胸及超聲波。
醫生你好,
收到有關抽針報告,內容提及化驗結果為PASH (Pseudoangiamatous stromal hyerplasia) with columnar cell change, Microcalcifications are seen within columnar cell
1. 網上查看資料此診斷甚為罕見, 其實係乜嘢來的? 是否只是一般乳腺增生? 當中是否涉及荷爾蒙因素影響所致?
2.另外見你網頁提及微鈣化點是不好的, 那麼是否結果也是代表不好呢?
3.就以上情況有什麼需要可以跟進?
4.最後經網上資料查閱PASH表現甚少疼痛, 但卻感到十分疼痛是否只可服用止痛藥止痛還有其他方法嗎?
我看見你網頁提及到減少或避免服用咖啡因食品飲品可改善痛楚, 但卻感到疼痛情況仍然是持續, 請問與此診斷有關係嗎?
謝謝你
1)良性病變，同乳腺增生類似。
2）微鈣化點可以良性可以惡性，唔一定唔好，唔好誤會。你報告冇寫唔好。
3）病理報告就冇野要跟進，其他報告唔知。
4）可以有關，都係止痛藥同戒咖啡因。
感謝回覆。
首先都要系到感謝回覆，因為我真係覺得呢個網頁無論喺內容同埋設計方面都真係做得幾貼心! 真心欣賞你係網頁設計上呢個留言功能，令感到徬徨既病人增加呢方面知識， 同時亦多個意見作為參考。真心讚!
問多兩個提問:
1 請問如果懷孕後會否加劇PASH或者係乳腺增生相關情況?
2.如果個人比較緊張有關狀況，透過做ultrasound追蹤檢查,如每三個月至六個月進行檢查, 會否因為孕期而影響檢查效果?
(因為聽說懷孕期的婦女必然受到荷爾蒙起伏的影響)
再一次感謝回覆。
1）可以，但所謂加劇都係良性。
2）懷孕照超聲波會多啲雜訊，難啲去睇。
醫生你好
我太太2015年46歲時發現二期乳癌，做了全乳切除手術，2021年時另一邊發現零期乳癌，也做了全乳切除，後來做了基因測試，結果是沒有遺傳基因。
第二手術之後，每半年醫生會叫我太太做超聲波檢查，其實仲有冇需要呢？或係其他檢查更重要？
有需要，主要都係靠超聲波。其他檢查就定期可以考慮。