乳癌淋巴水腫 － 真係冇得搞？
「醫生，我有冇淋巴水腫？」
「你而家冇。」
呢個時候病友總覺得張家輝會上醫生身：「你而家冇，但係將來會有⋯⋯」
究竟咩係淋巴水腫？有咩咁得人驚？有冇得預防？有冇得根治？呢篇為你解開重重疑團⋯⋯
什麼是淋巴系統？
「我知！排毒系統！」
淋巴系統並唔係坊間所講嘅排毒系統。
「唔係喎，我嗰美容師真係咁講喎！」
如果佢可信，消委會就唔會收咁多投訴。
「咁淋巴系統即係咩系統？」
我唔打算好學術咁講佢係咩黎，作為病友，你可以簡單咁當佢係一個液體回收系統。
「咩野液體回收系統？」
打個比喻，就好似水嘅循還回收系統。水每一日都會蒸發，積聚成雲之後落雨，經過雨水渠收集，去返水塘比我地再用。
雨水就係淋巴液，雨水渠就係淋巴管道。
我地身體每一日都會製造淋巴液，積聚係身體之後就會經過淋巴管道收集，去返血液循環比我地再用。
「咁咩係淋巴水腫？」
淋巴水腫就係當淋巴管道受損，淋巴液回收唔到，積聚喺手臂，搞到手腫。
水浸就係當雨水渠受損，雨水回收唔到，積聚喺路面，搞到水浸。
淋巴水腫症狀
「手腫又有咩問題？」
視乎嚴重程度，你可能覺得隻手好重好墜，郁得冇咁靈活，著衫／買衫有困難，甚至好谷好痛。受影響嘅手亦都會易D感染。
「好似好得人驚咁喎，咁一開始淋巴管道點解會受損？」
乳癌治療有兩樣野會令淋巴管受損：手術同電療。
手術講緊腋下淋巴手術，切斷呢D雨水渠，好易理解點解會水浸。越切得多淋巴，好自然越易水腫，所以全淋巴切除係易過只切前哨淋巴有水腫。
電療同樣道理，如果電腋下淋巴呢D位置，係會有機會傷到呢D雨水渠。
另外，如果好多癌細胞擴散去腋下淋巴，塞曬D雨水渠亦都可以搞到水浸。
預防淋巴水腫
「咁有冇得預防淋巴水腫／預防水浸？」
可以由以下幾方面去睇吓點樣預防水浸：
1）好好保護僅餘的雨水渠：正如人地有10條渠，你得返5條渠，咁唔該你好好保護佢地，你係易D水浸嘅。所以姑娘會教你唔好係呢隻手量血壓／抽血／打針，呢D動作我地怕佢會傷到剩落黎嘅雨水渠。
2）唔好落大雨：你嗰5條渠平時細雨可能都夠用，黃紅黑雨梗係水浸。所以姑娘會叫你唔好浸溫泉／焗桑拿／做劇烈運動／拎重野，因為呢D動作係會令血管擴張，增加淋巴液分泌（令到落大雨）。另外亦都要避免受傷，例如避免蚊叮蟲咬／寵物爪傷／小心D剪指夾，因為發炎又係會增加流量。
淋巴水腫治療
「死啦，我已經水浸咁點？」
最簡單醫生會叫你得閒／訓覺「浪」高隻手，因為水向低流，幫一幫／理順雨水渠嘅積水。
「試過，唔係太幫到⋯⋯」
下一步就係美容師／按摩師最鍾意嘅「淋巴水腫按摩」。
淋巴水腫按摩／物理治療
「咦咦咦，你又話佢地呃人嘅？」
佢地鍾意sell客姐，佢地係唔識嘅。因為真正嘅「淋巴水腫按摩」並唔係佢地大大力咁到你好毒就「通咗淋巴／排咗毒」，相反，亂咁按係會傷到剩落黎嘅雨水渠。
「咁咩係真正嘅淋巴水腫按摩？」
真正嘅淋巴水腫按摩（Manual Lymphatic Drainage，MLD）喺由受過專業訓練嘅物理治療師去做，係好溫柔嘅（就好似你嘅性格咁）。原理係「好輕、好柔、好慢」咁去疏導積水，你而家手部嘅雨水渠去唔切水麻，物理治療師就將呢D積水掃去／引去身體其他冇積水嘅地方，等D積水可以由其他通暢嘅雨水渠回收。
「咁自己按唔按得？」
當然得，物理治療師唔會跟你一世嘅，你可以自己／另一半跟物理治療師學，有樣學樣唔難學。文章最底段片都有教少少，或者以下條link都圖文並茂：
另外如果唔介意比幾百蚊，香港乳癌基金會有開班教點樣做淋巴水腫按摩，可以自己打去25256033查詢／報名，其他淋巴水腫服務／收費如下：
「我見其他病友用壓力衣／袖，又係咩原理？」
普通壓力袖嘅原理就好似掩耳盜鈴咁，封咗雨水渠入水口，等佢就算唔通暢都倒灌唔到。
圖片來源：互聯網
如果淋巴水腫嚴重，就要靠物理治療師幫你紥壓力繃帶，佢會紥到越近遠端（手掌）壓力越大，目的係希望製造壓力分野，咁D水自然由高壓區（手掌）流去低壓區（身體），同「浪」手水向下流原理差不多。
圖片來源：互聯網
「人地話搭飛機一定要著壓力衣／袖，係真唔係真？」
佢地覺得飛咗上天係低壓區，同埋長途機手部活動減少，易D誘發淋巴水腫，所以建議著壓力袖去預防水腫。
至於係咪真係預防到呢？冇好強嘅科學證據去支持呢個說法，不過作為一個簡單易行嘅建議，做吓又冇防嘅，信則有不信則冇咁囉。
淋巴水腫治療機
「有人sell我淋巴水腫治療機，又得唔得㗎呢？」
圖片來源：互聯網
佢原理同上面壓力繃帶差不多，都係製造高壓低壓區。不過因為用機嘅關係，所產生嘅壓力可以大得多。亦都正正因為呢個原因，唔識／唔清楚了解自己做緊咩嘅，我建議唔好亂咁試，怕嘅係怕過大嘅壓力（大過50mmHg）傷到剩落黎嘅雨水渠，令到情況越做越衰。
「我睇書／網上資料講到咩淋巴水腫沒法根治，其實係咪真係咁灰？」
傳統黎講，淋巴水腫真係一個棘手問題，如果唔係都唔會有以上五花百門嘅建議／你都唔會咁好心機睇到呢度。
不過呢度係要帶來希望嘅地方，我地唔應該咁灰嘅。
「咁你有咩希望比到我？」
近年原來淋巴水腫可以試吓做手術。
淋巴水腫手術
「乜原來淋巴水腫有手術做㗎咩？」
近年興起兩款手術：駁通小淋巴管（lymphovenous／lymphaticovenular anastomosis)同埋淋巴移植（lymph nodes transfer)。
兩款之中，以淋巴移植效果比較令人鼓舞。做法就係全身麻醉底下，整型科醫生喺大脾攞一D淋巴移植上去腋下。理論上呢D淋巴可以落地生根／刺激腋下淋巴管生長，就好似重新鋪設一D雨水渠，從而改善積水情況，甚至根治水浸問題。
淋巴水腫運動
坐咗喺電腦前睇咗咁耐，係時候去片郁吓做吓運動，呢段片係由網友upload去YouTube，版權屬於廣華醫院乳病中心，有關淋巴水腫運動嘅片段（冇2個鐘咁耐，大概一個鐘度啦，唔知點解upload時重覆咗）。
香港乳癌及乳病治療中心 
多謝醫生詳細解釋，的確預防勝於治療，從開始就勤啲自己推淋巴應該冇錯吧？！（但每次1小時其實有需要每日都推一次嗎？）
另，有點問題想問醫生：最近從報章讀到一種新的“免疫治療藥物”可令病者的免疫系統能重新啟動來對付腫瘤，有說可能在5年內可取代化療。這可用於乳癌患者身上？真的比化療更有效、更少副作用嗎？短期內可臨床應用嗎？謝謝醫生。
如果本身冇淋巴水腫，係唔洗做呢D按摩，冇證據喺呢D情況有幫助。
免疫細胞療法喺乳癌嘅臨床研究開始咗二十年以上，到而家都仲有好多困難未解決到。病人好多時都會由新聞／報紙／互聯網／討論區收到資料話「革命性突破／末期病人曙光」，諗真D，有突破都係醫生話你聽啦，點會係報章記者話你聽，對呢D新希望唔好太上心。
哦，有點失望，因為報紙上嗰位醫生就係大醫院個主診……算喇，都係唔講落去…….
又另，你說本身冇淋巴水腫就唔使做呢啲按摩﹣﹣即係如果患者做完切除手術，度過淋巴水腫指數係正常（唔知個名有冇錯，即係有架機去度隻手嗰種測試），就不用呢啲一個鐘頭嘅推淋巴？
指數正常即係冇水腫，唔洗推淋巴。
謝謝醫生呢！
你好，我前幾個月做了手術（之前也問過電療的事）九月初做完電療，是零期乳癌，局部切除。手術割了一粒前哨淋巴，做完電療之後腫瘤科醫生發現腋下有個水囊，用針把水抽了出3/4來，他說裡面還是有水不過不多。我想問這水囊和淋巴水腫是不是同一件事？
另外，外科醫生有說過淋巴位因為較敏感，所以傷口位微腫和手伸起（舉手）是會痛，半年後就會沒事。可是有時上臂的痛會伸延到前臂和手腕的位置，這是正常的嗎？我是不是應該去檢查淋巴水腫指數？
不好意思，因為電療前後的問題來來往往見了外科和腫瘤科多次，有時醫生又不一定有時間慢慢解釋，所以心裡很擔心又不知道可以問誰。
你個情況聽落去係手術位置積水未清，同淋巴水腫係唔同嘅野。
做完腋下淋巴手術，舉手覺得傷口痛係好常見的，不過好少可話伸延去到手腕，所以一方面唔可以話正常，但另一方面又唔可以話情況令人擔心。同去唔去檢查淋巴水腫指數係兩碼子嘅事。
明白。。。首先多謝你週日下午都回覆，真的很感謝。
那些少量的積水會對康復有影響嗎？手腕的痛應該要現在再安排見外科／腫瘤科醫生處理嗎？
下次外科複診是一月，腫瘤科複診是三月，而且。。。真的很貴（之前有兩三個星期，一週內看專科已經花近一萬元。。。因為有好多水泡隔一兩天就要review），應該現在馬上再找醫生複診嗎？
不好意思，這種情況，既不是十分嚴重（相對其他病友水深火熱中而言），對我卻很擔憂（擔憂以後都會這樣，而且是右手）不知道可以問誰。。。
少量積水對復康冇影響。
手腕問題擔心就去見吓醫生，雖然九成九冇野搞。
謝謝！明白了;-)
您好！想問問您上面提過關於淋巴移植的手術，我試過上網搵過資料但是不多，具體關於手術的資訊例如手術費用大概都冇相關提及，想請問下，可以去邊度搵到嚟d資訊？
做得最多的是瑪麗醫院整形外科，最近有新聞發報：
http://std.stheadline.com/instant/articles/detail/170943-香港-港大新技術+助淋巴水腫患者遠離「象腿」
http://www.am730.com.hk/article-319348
你好! 我是一名乳癌患者，有嚴重的淋巴水腫，曾幾次感染。 我有一個病友，她接收了這個手術。效果也不錯。請問，手術是在瑪麗醫院嗎? 而我應該怎麼做看到這個診所。 謝謝！
手術多數係東華醫院做，門診就瑪麗醫院睇，叫醫生寫轉介信去瑪麗S4外科整型科lymphedema clinic。
很多謝你醫生! 你的資訊十分有用。香港沒有太多網站會介紹乳癌療程。更不用說淋巴水腫。再次多謝你的建議。會取轉介信到瑪麗整形科的淋巴水腫門診。謝謝!
請問淋巴水腫要到甚麽程度，醫生才會建議進行淋巴移植手術呢？及有沒有甚麼條件才可以做或不可以做淋巴移植手術呢？最後，手術的成效如何?即能否根治水腫問題?
謝謝
第二、第三級已經可以考慮做（好難三言兩語講比你聽點分級，要靠醫生評估）。
七成人有幫助，好難界定係咪根治。
醫生你好, 請問在香港那裡可以買到淋巴壓力手袖. Thank you.
閣大醫院的復康店應該有售。
你好啊， 我做咗TCH 第六次 後2星期發現對腳開始水腫 而之前係無呢個情況， 請問係咪因為循環系統慢 /淋巴塞咗 會水腫？？ 會維持幾耐？
我過兩日做局部切除手術，會有影響嗎？
腳水腫 係咪可以參考之前 手臂水腫個VIDEO 去按摩呢 ？
謝謝您
打緊Herceptin而對腳腫，最緊要check心臟去排除心衰竭，再唔係淋巴／按摩咁簡單。
請問文中提及的淋巴移植，會不會令”donor side”水腫？即是說，衹是把問題轉移？另外，在香港可以到哪裏購買壓力手袖（如不想再政府醫院排期排那麽久）
有個細機會係咁。壓力手袖都係復康店或上網search，冇推介。
你好，我媽媽既乳癌細胞擴散左去腋下淋巴，右臂腫脹，我可以幫她按摩嗎?如不行，我們可以做什麼舒緩不適? (母親暫未進行任何手術)
可以溫柔按下。
本人媽媽都被象手問題困擾十多年，近年發炎的頻率高左，每次入院要打坑生素。想問淋巴水腫手術在香港有嗎？
有。
首先多謝網主的介紹 。上個月，在東華醫院看過廖醫生。他解釋很詳細， 也offer了我做手術。 現在考慮中。 我相信，在香港懂得做這類手術的醫生不多。 最有經驗的應該是東華醫院廖醫生。之前有相關報道。
想問下淋巴水腫既症狀會唔會唔係四肢出現，而係五官/膊頭內部出現痛症？鼻咽癌割走哂頸淋巴十年後出現無可解釋的炎症及痛楚，表面沒有水腫但鼻腔及痛灶附近發炎及有積液，望指教！
鼻咽癌偏離本網頁主題，恕不作回應。
你好，想問如做了腋下淋巴完全切除手術，做淋巴水腫運動有幫助嗎？另外，因化療吊針所引致的手腫(沒做淋巴切除的那邊手)，可做些什麼可以舒緩？謝謝！
運動有幫助。吊針唔應該會令到手腫，睇醫生。
請問如手部出現水腫問題，用淋巴水腫回流機有用嗎
人人反應唔同，有利有弊，試唔試係個人選擇。
你好，請問做完手術已半年，最近發現手有輕微淋巴水腫，我沒提重物或受傷，會否側身睡覺時壓過有影響？在醫院量度水有40度，這算嚴重嗎？要怎樣減退這情況？
側訓唔影響。
醫生評估嚴唔嚴重係睇臨床，唔係睇數字。
如何處理就好似上文所述一樣。
感謝你的回答
請問做完淋巴手術後,幾時開始做紓緩淋巴手腫運動最適合呢?謝謝。
隨時。
請問是否建議購買一部水腫回流機在家中使用？一部售價多少？哪裡製造？
不建議。
你好 家人做完腋下淋巴切除 並完成化療進入targeted therapy 但淋巴出現水腫跡象.家人以前有做瑜加的習慣 所以治療其間運動方面比較進取 周不時在家做瑜加 想問一問現時水腫情況是否與運動有關 有什麼方法可以改善這個問題 是否應該停止運動呢？唔該晒
應該唔關。處理方法參考上文。
醫生你好，想問下輕度淋巴水腫可唔可以針灸 ？去睇中醫佢好建議做針灸
唔建議。
醫生，廣華醫院段防水腫同減少手腫對淋巴全切的人有用嗎？
有
97%腫瘤HER2(-), 3%HER2(+), bi-rads:6這是屬於4期乳癌嗎? 本例腫瘤存在區城異質性, 分行計數區城–HER2基因無擴增(佔腫瘤細胞的比例為97); 區域二HER基因有擴增(佔腫瘤細胞的比例為3%), 可以做最大限度的保留乳房手術嗎?
你提供嘅資料唔能夠判斷係唔係第四期、或者做唔做到保留乳房手術。要現場睇晒所有數據先知。
醫生你好，我左右兩邊都做了前哨淋巴切除手術，想請問我要抽血的話該怎麼辦？（兩邊手臂都不可以抽血？）謝謝。
只做前哨淋巴可以抽血。